ᠶᠡᠬᠡ ᠬᠠᠭᠠᠨ ᠲᠠᠢ ᠤᠴᠠᠷᠠᠭᠰᠠᠨ ᠵᠡᠭᠦᠳᠦ-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯИх хаантай учирсан зүүд-Р.Чойном -R.Choinom
750ᠶᠡᠬᠡ ᠬᠠᠭᠠᠨ ᠲᠠᠢ ᠤᠴᠠᠷᠠᠭᠰᠠᠨ ᠵᠡᠭᠦᠳᠦ
ᠷ ∙ ᠴᠣᠢᠨᠣᠮ
ᠤᠷᠢᠳᠤ ᠰᠥᠨᠢ ᠪᠢ ᠨᠢᠭᠡ ᠭᠤᠶᠤᠯᠭᠠᠴᠢᠨ ᠡᠪᠦᠭᠡᠨ ᠵᠡᠭᠦᠳᠦᠯᠡᠯᠡ
ᠤᠷᠠᠩᠬᠠᠢ ᠨᠣᠣᠷᠬᠠᠢ ᠬᠤᠪᠴᠠᠰᠤ ᠲᠠᠢ
ᠤᠷᠤᠭᠤ ᠳᠣᠷᠣᠢ ᠴᠢᠷᠠᠢ ᠲᠠᠢ
ᠤᠷᠲᠤ ᠰᠢᠷᠠ ᠰᠠᠬᠠᠯ ᠲᠠᠢ
ᠤᠬᠢᠯᠠᠭᠰᠠᠨ ᠡᠪᠦᠭᠡᠨ ᠶᠠᠪᠤᠵᠤ ᠪᠠᠢᠬᠤ ᠶᠤᠮ
ᠰᠠᠢᠨ ᠪᠠᠢᠨᠠ ᠤᠤ
ᠲᠠ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠭᠠ ᠪᠣᠢ ᠭᠡᠪᠡᠯ
ᠰᠠᠢᠨ ᠶᠢᠨ ᠴᠤ᠌ ᠠᠯᠲᠠ ᠨᠣᠬᠠᠢ ᠳᠣᠯᠢᠶᠠ
ᠰᠠᠯᠵᠤ ᠪᠣᠯᠬᠤ ᠪᠦᠬᠦᠨ ᠡᠴᠡ ᠪᠡᠨ ᠰᠠᠯᠤᠭᠠᠳ
ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠬᠤᠳᠠᠯᠳᠤᠭᠠᠳ
ᠰᠠᠯᠭᠠᠨᠠᠵᠤ ᠶᠠᠪᠤᠨᠠ ᠳᠠ ᠬᠦᠦ ᠮᠢᠨᠢ
ᠶᠠᠭᠠᠬᠢᠴᠢᠬᠠᠭᠰᠠᠨ ᠶᠤᠮ ᠪᠣᠯ ᠳ᠋ᠣᠣ ᠵᠠᠢᠯᠠᠭᠤᠯ
ᠶᠠᠳᠠᠷᠠᠵᠤ ᠮᠤᠩᠭᠠᠨᠢᠭᠠᠳ ᠯᠠ ᠲᠡᠷᠡ ᠪᠠᠢᠬᠤ ᠳᠠ ᠬᠥᠭᠡᠷᠦᠬᠦᠢ
ᠶᠠᠭᠤᠮᠠ ᠪᠠᠨ ᠬᠥᠮᠦᠨ ᠳ᠋ᠦ᠍ ᠪᠤᠯᠢᠶᠠᠯᠭᠠ ᠶᠤᠮ ᠪᠣᠯᠪᠠ ᠤᠤ
ᠶᠠᠭᠤ ᠪᠠᠵᠠᠭᠠᠭᠠᠴᠢ ᠳᠧ ᠭᠡᠵᠦ
ᠥᠷᠥᠪᠳᠡᠵᠦ ᠪᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠠᠳ
ᠡᠪᠦᠭᠡᠨ ᠢ᠋ ᠳᠠᠭᠤ ᠦᠭᠡᠢᠬᠡᠨ ᠰᠢᠷᠲᠡᠯᠡ
ᠣᠴᠣᠢᠵᠤ ᠰᠠᠯᠭᠠᠨᠠᠭᠰᠠᠨ ᠲᠤᠷᠠᠩᠬᠠᠢ ᠡᠪᠦᠭᠡᠨ
ᠥᠭᠡᠳᠡ ᠡᠴᠡ ᠬᠠᠷᠠᠵᠤ
ᠤᠷᠢᠳᠤ ᠪᠢ ᠡᠵᠡᠨ ᠬᠠᠭᠠᠨ ᠪᠠᠢᠯᠠ
ᠤᠯᠤᠰ ᠭᠦᠷᠦᠨ ᠲᠡᠢ᠂ ᠨᠡᠷᠡ ᠲᠥᠷᠥ ᠲᠡᠢ
ᠲᠦᠮᠡᠨ ᠭᠠᠵᠠᠷ ᠢ᠋ ᠡᠵᠡᠯᠡᠭᠰᠡᠨ ᠨᠤᠲᠤᠭ ᠲᠠᠢ
ᠲᠡᠦᠬᠡ ᠶ᠋ᠢ ᠳᠣᠩᠰᠣᠯᠭᠠᠭᠰᠠᠨ ᠮᠣᠷᠢᠨ ᠴᠡᠷᠢᠭ ᠲᠡᠢ ᠪᠠᠢᠯᠠ
ᠣᠳᠣ ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ
ᠣᠷᠴᠢᠯᠠᠩ ᠤ᠋ᠨ ᠡᠯᠡᠭ ᠳᠣᠭᠣᠭᠢ ᠪᠣᠯᠵᠤ
ᠤᠯᠠ ᠪᠠᠨ ᠱᠠᠭᠠᠢᠭᠰᠠᠨ ᠬᠡᠳᠦᠨ ᠬᠡᠦᠬᠡᠳ
ᠤᠯᠤᠰ ᠪᠣᠯᠵᠤ ᠲᠣᠭᠯᠠᠵᠤ ᠪᠠᠢᠨᠠ
ᠬᠠᠷᠠᠭᠠᠳ ᠨᠢᠳᠦ ᠮᠢᠨᠢ ᠡᠪᠡᠳᠬᠦ ᠰᠢᠭ
ᠬᠠᠷᠠᠮᠰᠠᠭᠠᠳ ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠡᠪᠡᠳᠬᠦ ᠰᠢᠭ
ᠠᠯᠢ ᠮᠠᠭᠤ ᠪᠠᠨ ᠦᠵᠡᠵᠦ ᠪᠠᠷᠠᠬᠤ ᠠ᠋ᠴᠠ ᠪᠠᠨ ᠨᠠᠭᠠᠨᠠ
ᠠᠪᠰᠠᠨ ᠳ᠋ᠠᠭᠠᠨ ᠣᠴᠢᠵᠤ ᠨᠢᠳᠦ ᠳᠠᠯᠳᠠ ᠬᠡᠪᠲᠡᠶᠡ
ᠭᠤᠶᠤᠯᠭᠠᠴᠢᠨ ᠡᠪᠦᠭᠡᠨ ᠢᠩᠭᠢᠵᠦ
ᠭᠤᠲᠤᠭ ᠦᠭᠡᠢ ᠳᠣᠩᠭᠣᠰᠬᠤ ᠶ᠋ᠢ ᠦᠵᠡᠪᠡᠯ
ᠤᠬᠠᠭᠠᠨ ᠨᠢ ᠪᠠᠰᠠ ᠬᠤᠪᠴᠠᠰᠤ ᠰᠢᠭ᠋ ᠢ᠋ᠶ᠋ᠡᠨ
ᠤᠷᠠᠭᠳᠠᠵᠤ ᠪᠣᠯᠢᠭᠰᠠᠨ ᠪᠣᠯᠤᠯᠲᠠᠢ
ᠲᠡᠰᠬᠡᠯ ᠦᠭᠡᠢ ᠪᠢ ᠰᠡᠭᠦᠷᠡᠰᠦ ᠠᠯᠳᠠᠭᠠᠳ
ᠲᠡᠭᠡ ᠳᠧ ᠲᠠ᠂ ᠳᠠᠯᠳᠠ ᠣᠷᠣᠵᠤ ᠦᠵᠡ
ᠬᠡᠴᠡᠭᠦᠦ ᠭᠠᠯᠵᠠᠭᠤ ᠲᠣᠰᠴᠤ ᠳᠧ ᠲᠠᠨ ᠳ᠋ᠤ᠌
ᠬᠡᠵᠢᠶᠡ ᠡᠳᠡᠭᠡᠨᠡ ᠭᠡᠵᠦ ᠶᠠᠪᠤᠬᠤ ᠪᠣᠢ ᠳᠧ ᠭᠡᠲᠡᠯᠡ
ᠠᠭᠤᠷᠯᠠᠭᠰᠠᠨ ᠡᠪᠦᠭᠡᠨ ᠨᠣᠭᠣᠭᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ
ᠣᠯᠠᠨ ᠠ᠋ᠴᠠ ᠣᠷᠣᠢ ᠬᠦᠷᠲᠡᠯᠡ ᠬᠠᠷᠠᠭᠠᠳ
ᠦ ᠁ ᠦᠬᠦᠵᠦ ᠬᠡᠪᠲᠡᠭᠰᠡᠨ ᠮᠠᠭᠤ ᠰᠦᠭ ᠠ᠋
ᠥᠯᠪᠡᠷᠴᠦ ᠦᠬᠦᠬᠦ ᠳ᠋ᠡᠭᠡᠨ ᠲᠠᠭᠠᠷᠠᠭᠰᠠᠨ ᠮᠠᠯ ᠠ᠋
ᠡᠷᠲᠡᠨ ᠡᠴᠡ ᠮᠣᠩᠭᠣᠯᠴᠤᠳ ᠲᠡᠨᠡᠭ ᠪᠠᠢᠭᠰᠠᠨ ᠶᠤᠮ
ᠡᠳᠦᠭᠡ ᠪᠦᠷ ᠰᠣᠯᠢᠶᠠᠷᠠᠴᠢᠬᠠᠵᠤ ᠭᠡᠮ
ᠡᠬᠡ ᠡᠴᠢᠭᠡ ᠦᠭᠡᠢ ᠬᠡᠦᠬᠡᠳ ᠰᠢᠭ ᠴᠢᠷᠠᠢ ᠠᠯᠳᠠᠴᠢᠬᠠᠭᠠᠳ
ᠡᠵᠡᠨ ᠬᠠᠭᠠᠨ ᠢ᠋ᠶ᠋ᠠᠨ ᠴᠤ᠌ ᠲᠠᠨᠢᠬᠤ ᠪᠠᠨ ᠪᠣᠯᠢᠵᠤ ᠭᠡᠮ
ᠦ ᠁
ᠲᠠ ᠴᠢᠨᠢ ᠮᠠᠨ ᠤ᠋ ᠡᠵᠡᠨ ᠬᠠᠭᠠᠨ ᠪᠠᠢᠭᠰᠠᠨ ᠶᠤᠮ ᠤᠤ
ᠥᠭᠡᠷᠡ ᠬᠡᠨ ᠦ᠌ ᠬᠢ ᠪᠠᠢᠬᠤ ᠶᠤᠮ ᠮᠠᠯ ᠮᠢᠨᠢ
ᠲᠠ ᠨᠠᠷ ᠠ᠋ᠴᠠ ᠪᠤᠰᠤᠳ ᠤᠯᠤᠰ
ᠡᠪᠦᠭᠡ ᠳᠡᠭᠡᠳᠦᠰ ᠢ᠋ᠶ᠋ᠡᠨ ᠲᠠᠨᠢᠬᠤ ᠲᠠᠢ ᠪᠠᠨ ᠪᠠᠢᠬᠤ ᠳ᠋ᠤ᠌
ᠭᠡᠵᠦ ᠢᠷᠡᠭᠡᠳ ᠯᠡ ᠭᠤᠲᠤᠭ ᠦᠭᠡᠢ
ᠠᠢᠯᠠᠳᠤᠭᠠᠳ ᠥᠭᠡᠳᠡ ᠡᠴᠡ ᠰᠢᠷᠲᠡᠯᠡ
ᠭᠤᠶᠤᠯᠭᠠᠴᠢᠨ ᠬᠢᠷᠢᠨᠡ ᠣᠮᠣᠭ ᠲᠠᠢ ᠭᠡᠳᠡᠭ ᠨᠢ
ᠵᠠ ᠁
ᠲᠡᠢᠮᠦ ᠪᠣᠯᠲᠤᠭᠠᠢ
ᠠᠶᠠ ᠪᠠᠷ ᠨᠢ ᠪᠠᠢᠶᠠ
ᠵᠠᠢᠯᠠᠭᠤᠯ
ᠪᠢᠳᠡᠨ ᠦ᠌ ᠠᠮᠠ ᠪᠠᠷ ᠶᠢᠷᠲᠢᠨᠴᠦ ᠬᠤᠪᠢᠷᠠᠬᠤ ᠪᠢᠰᠢ ᠳᠧ
ᠲᠠ ᠁ ᠬᠠᠭᠠᠨ ᠪᠠᠢᠭᠰᠠᠨ ᠪᠠᠢᠵᠤ ᠪᠣᠯᠤᠨᠠ
ᠲᠠᠩᠰᠤᠭ ᠰᠠᠢᠬᠠᠨ ᠬᠤᠪᠴᠠᠰᠤᠨ ᠤ᠋ ᠪᠠᠨ ᠣᠷᠣᠨ ᠳ᠋ᠤ᠌
ᠲᠠᠭᠠᠷ ᠨᠠᠪᠲᠠᠰ ᠨᠥᠮᠥᠷᠴᠢᠬᠡᠭᠰᠡᠨ ᠪᠣᠯᠬᠣᠷ ᠴᠢᠨᠢ
ᠲᠠᠨᠢᠭᠰᠠᠨ ᠦᠭᠡᠢ ᠰᠢᠦ ᠥᠷᠥᠰᠢᠶᠡᠭᠡᠷᠡᠢ ᠁
ᠥᠷᠥᠰᠢᠶᠡᠯ ᠮᠥᠨ ᠴᠦ᠍ ᠶᠠᠭᠠᠬᠢᠮᠤᠢ ᠬᠦᠦ ᠮᠢᠨᠢ
ᠡᠮᠦᠰᠬᠡᠯ ᠵᠡᠭᠦᠯᠲᠡ ᠬᠠᠮᠤᠭ ᠪᠦᠬᠦᠨ ᠢ᠋ ᠮᠢᠨᠢ
ᠪᠤᠯᠠᠰᠢᠨ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠬᠡᠭᠦᠷ ᠲᠣᠨᠣᠭᠠᠴᠢᠨ ᠨᠤᠤᠭᠤᠨ
ᠪᠤᠯᠲᠤ ᠶ᠋ᠢ ᠨᠢ ᠠᠪᠤᠭᠠᠳ ᠬᠤᠳᠠᠯᠳᠤᠴᠢᠬᠠᠭᠰᠠᠨ ᠶᠤᠮ
ᠣᠴᠢᠭᠠ ᠦᠭᠡᠢ ᠪᠢᠵᠡ ᠳᠧ ᠴᠢ
ᠶᠠᠭᠤ ᠪᠠᠨ ᠦᠵᠡᠬᠦᠪ ᠳᠧ ᠴᠢ
ᠦᠵᠡᠭᠰᠡᠨ ᠴᠢᠨᠢ ᠵᠥᠪᠬᠡᠨ ᠡᠷᠢᠶᠡᠨ ᠴᠠᠭᠠᠰᠤ
ᠦᠰᠦᠭ ᠡᠴᠡ ᠴᠠᠭᠠᠰᠢ ᠦᠭᠡᠢ ᠴᠥᠮ ᠬᠤᠳᠠᠯ
ᠭᠠᠭᠴᠠ ᠦᠨᠡᠨ ᠶᠠᠭᠤᠮᠠ ᠭᠡᠪᠡᠯ
ᠲᠠ ᠨᠠᠷ ᠤ᠋ᠨ ᠭᠠᠷ ᠮᠤᠬᠤᠷ ᠨᠢᠳᠦ ᠰᠣᠬᠣᠷ ᠪᠠᠢᠨᠠ
ᠬᠦᠵᠦᠭᠦᠨ ᠳ᠋ᠡᠭᠡᠨ ᠳᠥᠩᠭᠡ ᠲᠡᠢ ᠪᠠᠢᠬᠤ ᠳ᠋ᠠᠭᠠᠨ ᠴᠤ᠌
ᠪᠢ ᠴᠦ᠍ ᠢᠩᠭᠢᠵᠦ ᠬᠥᠮᠦᠨ ᠦ᠌ ᠡᠷᠬᠡᠨ ᠳ᠋ᠦ᠍
ᠰᠥᠭᠥᠳᠴᠦ ᠶᠠᠪᠤᠭᠠ ᠦᠭᠡᠢ ᠶᠤᠮ ᠰᠢᠦ
ᠵᠠ ᠁ ᠴᠢᠮᠠ ᠲᠠᠢ ᠶᠠᠷᠢᠭᠠᠳ ᠴᠤ᠌ ᠶᠠᠭᠠᠬᠢᠬᠤ ᠶᠤᠮ ᠪᠣᠢ
ᠵᠠᠰᠠᠭ ᠵᠠᠶᠠᠭᠠ ᠬᠣᠶᠠᠷ ᠲᠠᠭᠠᠨ ᠭᠣᠮᠣᠳᠠ ᠭᠡᠵᠦ ᠬᠡᠯᠡᠭᠡᠳ
ᠵᠠᠳᠠᠷᠠᠭᠰᠠᠨ ᠡᠪᠦᠭᠡᠨ ᠴᠠᠭᠠᠭᠰᠢ ᠪᠠᠨ ᠡᠷᠭᠢᠭᠡᠳ
ᠵᠠᠮ ᠢ᠋ᠶ᠋ᠠᠨ ᠳᠠᠭᠠᠵᠤ ᠬᠡᠯᠲᠦᠷᠢᠵᠦ ᠣᠳᠤᠯᠠ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ ᠠᠶᠤᠯᠭᠠᠬᠤ ᠨᠢ ᠪᠢᠲᠡᠭᠡᠢ ᠬᠡᠯᠡ
ᠬᠡᠦᠬᠡᠳ ᠨᠣᠬᠠᠢ ᠶ᠋ᠢᠨ ᠲᠣᠭᠯᠠᠭᠠᠨ ᠪᠣᠯᠤᠮᠠᠷ
ᠬᠠᠲᠠᠭᠰᠠᠨ ᠨᠠᠪᠴᠢ ᠰᠢᠭ᠋ ᠥᠴᠦᠬᠡᠨ ᠡᠨᠡ ᠡᠪᠦᠭᠡᠨ
ᠬᠠᠵᠠᠭᠠᠨᠠᠭᠰᠠᠭᠠᠷ ᠪᠠᠷᠠ ᠲᠠᠰᠤᠷᠠᠯᠠ
ᠡᠵᠡᠨ ᠴᠢᠩᠭᠢᠰ᠂ ᠡᠵᠡᠨ ᠴᠢᠩᠭᠢᠰ ᠡᠨᠡ ᠤᠤ ᠭᠡᠭᠰᠡᠭᠡᠷ ᠪᠢ
ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠬᠥᠬᠥᠷᠡᠪᠡ
ᠳᠡᠩᠳᠡᠭᠦᠦ ᠢᠨᠢᠶᠡᠯᠡ ᠭᠡᠳ ᠰᠡᠷᠢᠭᠰᠡᠨ ᠴᠢᠨᠢ
ᠳᠡᠷᠡ ᠪᠡᠨ ᠨᠡᠪᠲᠡᠷᠡᠲᠡᠯᠡ ᠤᠬᠢᠯᠠᠭᠰᠠᠨ ᠪᠠᠢᠯᠠ᠃