ᠬᠣᠪᠳᠣᠭ ᠰᠢᠨᠤᠬᠠᠢ ᠷᠠᠳᠨᠠ ᠨᠣᠶᠠᠨ ᠢ᠋ ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠮᠣᠷᠳᠠᠭᠤᠯᠤᠭᠰᠠᠨ ᠨᠢ-ᠪᠠᠯᠭᠠᠨᠰᠠᠩ ᠤᠨ ᠦᠯᠢᠭᠡᠷ Ховдог шунахай раднаа ноёныг хурмаст тэнгэрт мордуулсан нь-Балгансангийн үлгэр
479ᠬᠣᠪᠳᠣᠭ ᠰᠢᠨᠤᠬᠠᠢ ᠷᠠᠳᠨᠠ ᠨᠣᠶᠠᠨ ᠢ᠋ ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠮᠣᠷᠳᠠᠭᠤᠯᠤᠭᠰᠠᠨ ᠨᠢ
ᠨᠢᠭᠡ ᠵᠢᠯ ᠪᠠᠯᠭᠠᠨᠰᠠᠩ᠂ ᠷᠠᠳᠨᠠ ᠨᠣᠶᠠᠨ ᠤ᠋ ᠳ᠋ᠤ᠌ ᠣᠷᠳᠣᠨ ᠬᠠᠷᠰᠢ ᠪᠠᠢᠭᠤᠯᠬᠤ ᠠᠵᠢᠯ ᠳᠦᠨᠢ ᠣᠷᠣᠯᠴᠠᠵᠤ ᠮᠣᠳᠣᠴᠢᠨ ᠪᠣᠯᠤᠭᠠᠳ ᠶᠠᠪᠤᠵᠤ ᠪᠠᠢᠵᠠᠢ᠃ ᠷᠠᠳᠨᠠ ᠨᠣᠶᠠᠨ ᠬᠡᠳᠦᠢᠪᠡᠷ ᠬᠣᠩᠬᠣᠷ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠠᠳᠤᠭᠤ ᠮᠠᠯ ᠲᠠᠢ᠂ ᠬᠣᠷᠭᠣ ᠪᠢᠯᠬᠠᠮᠠ ᠠᠯᠲᠠ ᠮᠥᠩᠭᠥ ᠲᠡᠢ᠂ ᠬᠣᠯᠠ ᠣᠢᠷᠠ ᠳ᠋ᠠᠭᠠᠨ ᠬᠣᠣᠰ ᠦᠭᠡᠢ ᠨᠡᠷᠡ ᠲᠡᠢ ᠪᠠᠶᠠᠨ ᠪᠣᠯᠪᠠᠴᠤ᠂ ᠬᠣᠷᠭᠣᠰᠤ ᠪᠠᠨ ᠬᠠᠲᠠᠭᠠᠵᠤ ᠢᠳᠡᠮᠡᠷ ᠬᠣᠪᠳᠣᠭ ᠰᠢᠨᠤᠬᠠᠢ ᠠᠮᠢᠲᠠᠨ ᠭᠡᠨᠡ᠃ ᠲᠡᠭᠡᠭᠡᠳ ᠷᠠᠳᠨᠠ ᠨᠣᠶᠠᠨ ᠣᠯᠠᠨ ᠬᠥᠮᠦᠰ ᠢ᠋ ᠴᠤᠭᠯᠠᠭᠤᠯᠤᠨ ᠣᠷᠳᠣᠨ ᠬᠠᠷᠰᠢ ᠪᠠᠨ ᠪᠠᠷᠢᠭᠤᠯᠵᠤ ᠳᠠᠭᠤᠰᠬᠤ ᠶ᠋ᠢᠨ ᠦᠶᠡᠰ᠄《ᠣᠳᠣ ᠡᠨᠡ ᠣᠯᠠᠨ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠤ᠋ ᠬᠥᠯᠥᠰᠥᠨ ᠵᠣᠭᠣᠰ ᠢ᠋ ᠥᠭᠬᠦ ᠪᠣᠯᠤᠯᠠ᠃ ᠪᠠᠭᠠ ᠳ᠋ᠠᠭᠠᠨ ᠪᠢᠷᠠᠭᠤ ᠲᠠᠢ ᠦᠨᠢᠶᠡ ᠲᠠᠪᠢ ᠵᠢᠷᠠ᠂ ᠬᠡᠯᠲᠦᠰᠬᠢᠪᠡᠯ ᠭᠡᠭᠦᠦ ᠤᠨᠠᠭᠠ ᠲᠠᠢ ᠭᠤᠴᠢ ᠳᠥᠴᠢ ᠶ᠋ᠢᠨ ᠵᠠᠷᠤᠳᠠᠯ ᠭᠠᠷᠤᠨᠠ᠃ ᠡᠳ᠋ ᠬᠣᠭᠰᠢᠯ ᠢ᠋ᠶ᠋ᠠᠨ ᠪᠠᠷᠠᠵᠤ᠂ ᠡᠴᠦᠨᠡᠨ ᠶᠡᠬᠡ ᠰᠦᠢᠳᠬᠡᠯ ᠭᠠᠷᠭᠠᠬᠤ ᠪᠠᠷ ᠡᠨᠡ ᠮᠤᠤᠰᠠᠢᠨ ᠭᠤᠶ᠋ᠢᠷᠠᠨᠴᠢᠳ ᠢ᠋ ᠰᠢᠲᠠᠭᠠᠵᠤ ᠠᠯᠠᠶᠠ》 ᠭᠡᠵᠦ ᠪᠤᠳᠤᠭᠠᠳ᠂ ᠨᠢᠭᠡᠨ ᠰᠥᠨᠢ ᠰᠢᠷᠠ ᠴᠠᠭᠠᠰᠤᠨ ᠳᠡᠭᠡᠷᠡ ᠤᠯᠠᠭᠠᠨ ᠰᠢᠩᠬᠤ ᠪᠠᠷ ᠲᠤᠩᠬᠠᠭ ᠪᠢᠴᠢᠭᠡᠳ ᠸᠠᠭᠠᠷᠠᠨ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠬᠡᠷᠡᠮ ᠳᠡᠭᠡᠷᠡ ᠨᠠᠭᠠᠵᠤ ᠲᠠᠯᠪᠢᠵᠤ ᠭᠡᠨᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠨᠠᠷ ᠢ᠋ ᠢᠷᠡᠬᠦ ᠳ᠋ᠦ᠍《ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠲᠤᠩᠬᠠᠭ》 ᠭᠡᠰᠡᠨ ᠵᠠᠷ ᠪᠠᠢᠪᠠ᠃ ᠲᠡᠷᠡ ᠲᠤᠩᠬᠠᠭ ᠲᠤ᠌ ᠪᠢᠴᠢᠭᠰᠡᠨ ᠨᠢ᠄
《ᠣᠸᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ᠂
ᠣᠷᠴᠢᠯᠠᠩ ᠳᠡᠯᠡᠬᠡᠢ ᠲᠠᠢᠪᠤᠩ ᠪᠣᠯᠲᠤᠭᠠᠢ᠂
ᠥᠬᠢᠨ ᠲᠩᠷᠢ ᠶ᠋ᠢᠨ ᠤᠷᠢᠯᠭᠠ ᠪᠣᠯᠲᠤᠭᠠᠢ᠂
ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠢᠷᠤᠭᠡᠯ ᠲᠠᠪᠢᠯᠠᠩ ᠢ᠋ᠶ᠋ᠠᠷ
ᠡᠵᠡᠨ ᠲᠩᠷᠢ ᠬᠤᠷᠮᠤᠰᠲᠠ ᠬᠠᠭᠠᠨ
ᠡᠳᠦᠭᠡ ᠬᠠᠷᠰᠢ ᠪᠠᠨ ᠰᠢᠨᠡᠳᠬᠡᠬᠦ ᠶ᠋ᠢᠨ ᠲᠥᠯᠥᠭᠡ
ᠡᠩ ᠳᠡᠯᠡᠬᠡᠢ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ
ᠡᠷᠳᠡᠮ ᠲᠡᠭᠦᠰ ᠤᠷᠡᠴᠤᠤᠨ ᠊ᠢ ᠤᠷᠢᠵᠤ ᠪᠠᠢᠨᠠᠮ᠂
ᠡᠷᠬᠢᠮ ᠨᠣᠶᠠᠨ ᠷᠡᠳᠨᠡ
ᠡᠳᠦᠭᠡ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠶ᠋ᠢᠠᠨ ᠲᠣᠮᠢᠯᠠ ᠶᠠᠪᠤᠭᠤᠯᠤᠮᠤ?》
ᠭᠡᠵᠡᠢ᠃ ᠡᠭᠦᠨ ᠢ᠋ ᠵᠠᠷᠤᠴᠠ ᠨᠠᠷ ᠨᠢ ᠦᠵᠡᠭᠡᠳ ᠭᠠᠢᠬᠠᠯᠳᠤᠵᠤ᠂ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠲᠠᠪᠰᠢᠭᠣᠯᠤᠭᠰᠠᠭᠠᠷ᠂ ᠷᠡᠳᠨᠡ ᠨᠣᠶᠠᠨ ᠤ᠋ ᠴᠢᠬᠢᠨ ᠳᠤᠨᠢ ᠬᠦᠷᠴᠡᠢ᠃ ᠷᠡᠳᠨᠡ ᠨᠣᠶᠠᠨ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠶᠡᠬᠡᠯᠡ ᠮᠡᠩᠳᠡᠨ ᠰᠣᠴᠢᠬᠰᠠᠨ ᠪᠠᠢᠳᠠᠯ ᠭᠠᠷᠭᠠᠨ᠄《ᠲᠡᠢᠮᠦ ᠶᠤᠮ ᠤᠤ? 》 ᠭᠡᠵᠦ ᠭᠦᠶᠦᠨ ᠢᠷᠡᠵᠦ ᠦᠵᠡᠭᠡᠳ᠂ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠨᠠᠷ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ᠄
《ᠵᠠ᠂ ᠲᠠᠨᠠᠷ ᠦᠵᠡᠪᠡᠦ? ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢᠨ ᠡᠵᠡᠨ ᠬᠠᠭᠠᠨ ᠲᠠ ᠪᠦᠬᠦᠨ ᠢ᠋ ᠤᠷᠢᠵᠤ ᠪᠠᠢᠨᠠ ᠲᠦᠷᠭᠡᠨ ᠪᠡᠯᠡᠳᠬᠡᠵᠦ ᠬᠣᠷᠳᠤᠨ ᠣᠴᠢᠬᠳᠣᠨ!》 ᠭᠡᠵᠦ ᠵᠠᠬᠢᠪᠠ᠃ ᠨᠢᠭᠡᠨ ᠰᠢᠪᠠᠷᠴᠢᠨ ᠦᠨᠡᠮᠰᠢᠨ ᠢᠲᠡᠭᠡᠭᠡᠳ᠄
《ᠪᠢᠳᠡ ᠶᠠᠭᠠᠬᠢᠨ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠴᠢᠳᠠᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠨᠣᠶᠠᠨ ᠤ᠋ ᠲᠣᠣᠷᠡ ᠨᠣᠬᠠᠢ ᠪᠣᠯᠵᠤ ᠬᠠᠳᠣᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠠᠪᠠ ᠪᠣᠯᠵᠤ ᠶᠠᠪᠤᠳᠠᠭ ᠪᠢᠴᠢᠭᠡᠴᠢ ᠨᠢ ᠭᠠᠷᠴᠤ ᠢᠷᠡᠭᠡᠳ᠄《ᠮᠤᠩᠬᠠᠭ ᠮᠢᠨᠦ ᠪᠣᠳᠣᠬᠤ ᠪᠠᠷ ᠪᠣᠯ ᠭᠠᠯ ᠳ᠋ᠤ᠌ ᠳᠡᠭᠳᠡᠵᠦ ᠡᠭᠦᠯᠡ ᠬᠥᠯᠭᠡᠯᠡᠨ ᠶᠠᠪᠤᠪᠠᠯ ᠶᠠᠮᠠᠷ ᠪᠣᠢ?》 ᠭᠡᠪᠡ᠃ ᠡᠭᠦᠨ ᠢ᠋ ᠷᠡᠳᠨᠡ ᠨᠣᠶᠠᠨ ᠰᠣᠨᠣᠰᠤᠭᠠᠳ᠄
《ᠮᠡᠷᠭᠡᠨ ᠪᠢᠴᠢᠭᠡᠴᠢ ᠶ᠋ᠢᠨ ᠠᠷᠭᠠ ᠮᠥᠨ ᠵᠥᠪ᠃ ᠲᠡᠭᠡᠪᠡᠯ ᠬᠡᠳᠦᠢ ᠲᠦᠯᠡᠭᠡᠨ ᠦ᠌ ᠭᠠᠯ ᠢ᠋ᠶ᠋ᠠᠷ ᠳᠡᠭᠳᠡᠭᠡᠪᠡᠯ ᠰᠠᠶᠢ ᠡᠭᠦᠯᠡ ᠬᠥᠯᠭᠡᠯᠡᠨ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠴᠢᠳᠠᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠪᠢᠴᠢᠭᠡᠴᠢ ᠨᠢ᠄
《ᠠᠷᠪᠠ ᠬᠣᠷᠢᠨ ᠬᠥᠮᠦᠨ ᠶᠠᠪᠤᠬᠤ ᠲᠤᠯᠠ ᠠᠳᠠᠭ ᠪᠠᠭᠠ ᠳ᠋ᠠᠭᠠᠨ ᠵᠠᠭᠤᠨ ᠲᠡᠷᠭᠡ ᠲᠦᠯᠡᠭᠡ ᠣᠷᠣᠨᠠ》 ᠭᠡᠵᠡᠢ᠃ ᠲᠡᠭᠡᠭᠡᠳ ᠡᠨᠡ ᠮᠡᠲᠦ ᠪᠡᠷ ᠷᠠᠳᠨᠡ ᠪᠠᠶᠠᠨ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠨᠠᠷ ᠢ᠋ᠶ᠋ᠠᠨ《ᠲᠩᠷᠢ ᠳ᠋ᠦ᠍ ᠮᠣᠷᠳᠠᠭᠤᠯᠬᠤ》 ᠪᠠᠷ ᠲᠣᠭᠲᠠᠵᠤ᠄
《ᠵᠠ᠂ ᠲᠠᠨᠠᠷ ᠦᠨᠡᠬᠡᠷ ᠥᠨᠳᠥᠷ ᠪᠤᠶᠠᠨ ᠲᠠᠢ ᠬᠥᠮᠦᠰ ᠪᠠᠢᠨᠠ᠂ ᠲᠦᠯᠡᠭᠡ ᠬᠠᠳᠤᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ᠂ ᠲᠩᠷᠢ ᠳ᠋ᠦ᠍ ᠭᠠᠷᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ᠂ ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ᠂ ᠭᠡᠷᠭᠡᠢ ᠬᠡᠦᠬᠡᠳ ᠲᠡᠢ ᠪᠡᠨ ᠠᠭᠤᠯᠵᠠᠵᠤ᠂ ᠬᠡᠳᠦᠨ ᠬᠣᠨᠣᠭ ᠰᠠᠢᠨ ᠨᠠᠢᠷᠯᠠᠭᠠᠳ ᠢᠷᠡ》 ᠭᠡᠳ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠢ᠋ᠶ᠋ᠠᠨ ᠭᠡᠷ ᠭᠡᠷ ᠲᠤᠨᠢ ᠬᠠᠷᠢᠭᠤᠯᠵᠠᠢ ᠭᠡᠨᠡ᠃
ᠪᠠᠯᠭᠠᠨᠰᠠᠩ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠬᠠᠮᠲᠤ ᠬᠦᠴᠦ ᠶᠠᠪᠤᠵᠤ ᠪᠠᠢᠭᠰᠠᠨ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠠᠬᠠ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠭᠡᠷ ᠲᠡᠭᠡᠨ ᠤᠷᠢᠵᠤ᠄
《ᠶᠠᠭᠤᠨ ᠤ᠋ ᠴᠢᠨᠢ ᠡᠵᠡᠨ ᠲᠩᠷᠢ ᠬᠠᠭᠠᠨ ᠠ᠋ᠴᠠ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠢ᠋ ᠵᠠᠯᠠᠬᠤ ᠪᠣᠢ᠂ ᠶᠠᠰᠤ ᠪᠠᠨ ᠶᠠᠢᠷᠠᠭᠤᠯᠵᠤ ᠨᠠᠰᠤ ᠪᠠᠨ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠷᠠᠳᠨᠡ ᠨᠣᠶᠠᠨ ᠢᠯᠳᠠᠭ① ᠮᠡᠬᠡ ᠭᠠᠷᠭᠠᠵᠤ ᠪᠢᠳᠡᠨ ᠢ᠋ ᠬᠣᠣᠷᠯᠠᠨ ᠠᠯᠠᠵᠤ᠂ ᠶᠠᠪᠤᠭᠰᠠᠨ ᠬᠦᠴᠦᠨ ᠦ᠌ ᠬᠥᠯᠥᠰᠥ ᠮᠥᠩᠭᠥ ᠶ᠋ᠢ ᠵᠠᠯᠭᠢᠬᠤ ᠭᠡᠵᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠦᠷ ᠵᠥᠪ ᠭᠡᠵᠡᠢ᠃ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠥᠪᠳᠡᠯᠴᠡᠬᠦ ᠳ᠋ᠦ᠍ ᠪᠠᠯᠭᠠᠨᠰᠠᠩ᠂ ᠬᠠᠷᠠ ᠰᠠᠨᠠᠭᠠ ᠲᠠᠢ ᠷᠠᠳᠨᠡ ᠨᠣᠶᠠᠨ ᠠ᠋ᠴᠠ ᠬᠠᠷᠢᠭᠤ ᠥᠰᠢᠶᠡ ᠠᠪᠬᠤ ᠬᠠᠪᠤᠲᠠᠢ ᠨᠢᠭᠡᠨ ᠠᠷᠭᠠ ᠭᠠᠷᠭᠠᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠳᠠᠷᠠᠭᠠ ᠡᠳᠦᠷ ᠡᠴᠡ ᠨᠢ ᠡᠬᠢᠯᠡᠨ ᠬᠡᠳᠦᠭᠦᠯᠡ ᠪᠡᠨ ᠰᠠᠮ ᠢ᠋ᠶ᠋ᠠᠷ ᠡᠳᠦᠷ ᠰᠥᠨᠢ ᠦᠭᠡᠢ ᠡᠭᠡᠯᠵᠢᠯᠡᠨ《ᠲᠩᠷᠢ ᠳ᠋ᠦ᠍ ᠮᠣᠷᠳᠠᠬᠤ》 ᠭᠠᠵᠠᠷ ᠲᠠᠭᠠᠨ ᠬᠦᠷᠲᠡᠯᠡ ᠨᠦᠬᠡᠨ ᠰᠤᠪᠠᠭ ᠮᠠᠯᠲᠠᠵᠤ ᠲᠠᠯᠪᠢᠵᠠᠢ᠃
ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠬᠡᠳᠦᠭᠦᠯᠡ ᠪᠡᠨ ᠷᠠᠳᠨᠡ ᠨᠣᠶᠠᠨ ᠤ᠋ ᠳ᠋ᠠᠭᠠᠨ ᠬᠦᠷᠴᠦ ᠢᠷᠡᠵᠦ ᠭᠡᠨᠡ᠃ ᠷᠠᠳᠨᠡ ᠨᠣᠶᠠᠨ ᠦᠵᠡᠭᠡᠳ᠄《ᠮᠢᠨᠦ ᠭᠠᠷᠭᠠᠭᠰᠠᠨ ᠮᠡᠷᠭᠡᠨ ᠠᠷᠭᠠ ᠶ᠋ᠢ ᠡᠳᠡᠨᠦᠰ ᠴᠢᠨᠢ ᠮᠡᠳᠡᠭᠡᠳᠦᠢ ᠪᠠᠢᠨᠠ ᠰᠢᠦ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠠᠳ᠂ ᠶᠡᠬᠡᠯᠡ ᠳᠣᠲᠣᠨᠣᠰᠣᠭ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠠᠮᠤᠷ ᠮᠡᠨᠳᠦ ᠶ᠋ᠢ ᠨᠢ ᠡᠷᠢᠵᠦ ᠠᠷᠢᠬᠢ ᠳᠡᠷᠡᠰᠦᠨ ᠰᠢᠷᠡᠭᠡ ᠪᠠᠵᠠᠭᠠᠵᠤ᠂ ᠬᠤᠷᠢᠮ ᠳᠠᠢᠯᠠᠯᠭᠠ ᠬᠢᠵᠦ ᠭᠡᠨᠡ᠃ ᠬᠤᠨᠳᠠᠭᠠ ᠡᠷᠭᠦᠨ ᠠᠷᠢᠬᠢ ᠤᠤᠭᠤᠵᠤ᠂ ᠬᠢᠲᠤᠭᠠ ᠡᠷᠭᠢᠯᠳᠦᠭᠦᠯᠦᠨ ᠮᠢᠬᠠ ᠢᠳᠡᠵᠦ ᠪᠠᠢᠬᠤ ᠶ᠋ᠢᠨ ᠵᠠᠭᠤᠷᠠ᠂ ᠷᠠᠳᠨᠡ ᠨᠣᠶᠠᠨ ᠤᠷᠢᠳᠠᠪᠠᠷ᠄
《ᠮᠠᠷᠭᠠᠰᠢ ᠶ᠋ᠢᠨ ᠪᠠᠷᠰ ᠴᠠᠭ ᠲᠤ᠌
ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠲᠤᠶᠠᠭᠠᠯᠠᠯ ᠢ᠋ ᠪᠠᠷᠠᠳᠠᠭᠤᠯᠤᠨ᠂
ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠲᠠ ᠪᠦᠬᠦᠨ ᠢ᠋ᠶ᠋ᠡᠨ
ᠮᠠᠨᠳᠠᠯ ᠲᠩᠷᠢ ᠳ᠋ᠦ᠍ ᠦᠳᠡᠵᠦ ᠮᠣᠷᠳᠠᠭᠤᠯᠤᠶᠠ》 ᠭᠡᠰᠡᠨ ᠳ᠋ᠦ᠍᠂ ᠪᠠᠯᠭᠠᠨᠰᠠᠩ ᠥᠭᠡᠳᠡᠡᠴᠡ ᠨᠢ᠄
《ᠮᠣᠨᠢᠣ② ᠡᠳᠦᠷ ᠠᠳᠢᠶᠠ ᠭᠠᠷᠠᠭ ᠲᠠᠭᠠᠷᠠᠵᠠᠢ᠂
ᠮᠣᠷᠳᠠᠵᠤ ᠭᠠᠷᠬᠤ ᠳ᠋ᠤ᠌ ᠬᠡᠢ ᠮᠣᠷᠢ ᠰᠠᠢᠨ ᠡᠳᠦᠷ ᠠ᠋!
ᠮᠣᠷᠳᠠᠬᠤ ᠵᠦᠭ ᠮᠥᠷ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠦᠵᠡᠬᠦᠯᠡ᠂
ᠮᠣᠭᠠᠢᠲᠤ ᠶ᠋ᠢᠨ ᠬᠥᠲᠥᠯ ᠦ᠋ᠨ ᠵᠠᠮ ᠤ᠋ᠨ ᠪᠠᠯᠴᠢᠷ ᠰᠠᠢᠨ ᠭᠡᠨᠡ》 ᠭᠡᠵᠡᠢ᠃
ᠷᠠᠳᠨᠠ ᠨᠣᠶᠠᠨ ᠰᠣᠨᠣᠰᠤᠭᠠᠳ᠄《ᠵᠠ᠂ ᠪᠣᠯᠵᠠᠢ! ᠮᠠᠭᠤ ᠰᠠᠢᠨ ᠭᠤᠶ᠋ᠢᠷᠠᠨᠴᠢᠳ ᠮᠢᠨᠢ ᠮᠣᠭᠠᠢᠲᠤ ᠶ᠋ᠢᠨ ᠬᠥᠲᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠣᠨᠢᠯ!》 ᠭᠡᠵᠦ ᠪᠤᠳᠤᠭᠠᠳ᠂
《ᠪᠣᠯᠤᠨᠠ! ᠪᠣᠯᠤᠨᠠ! ᠲᠠ ᠪᠦᠬᠦᠨ ᠦ᠌ ᠬᠦᠰᠡᠯ ᠳᠤᠷᠠ ᠪᠠᠷ ᠪᠣᠯᠤᠶᠠ》 ᠭᠡᠪᠡ᠃
ᠲᠡᠭᠡᠭᠡᠳ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠪᠠᠯᠭᠠᠨᠰᠠᠩ᠂ ᠮᠣᠳᠣᠴᠢᠨ ᠰᠢᠪᠠᠷᠴᠢᠳ ᠲᠠᠢ ᠪᠠᠨ ᠷᠠᠳᠨᠠ ᠨᠣᠶᠠᠨ ᠤ᠋ ᠪᠡᠯᠡᠳᠬᠡᠭᠰᠡᠨ ᠲᠦᠯᠡᠭᠡ ᠶ᠋ᠢ ᠬᠡᠳᠦᠢᠨ ᠬᠡᠯᠡᠯᠴᠡᠵᠦ ᠲᠣᠬᠢᠷᠠᠭᠠᠳ ᠮᠠᠯᠲᠠᠵᠤ ᠪᠡᠯᠡᠳᠬᠡᠭᠰᠡᠨ ᠨᠦᠬᠡᠨ ᠰᠤᠪᠠᠭ ᠤ᠋ᠨ ᠢ᠋ᠶ᠋ᠠᠨ ᠠᠮᠠᠰᠠᠷ ᠳᠡᠭᠡᠷᠡ ᠣᠪᠣᠭᠠᠯᠠᠵᠤ ᠲᠠᠯᠪᠢᠵᠠᠢ᠃
ᠮᠠᠷᠭᠠᠰᠢ ᠶ᠋ᠢᠨ ᠬᠢᠨᠢ ᠥᠷᠯᠥᠭᠡ᠂ ᠨᠠᠷᠠᠨ ᠮᠠᠨᠳᠤᠬᠤ ᠶ᠋ᠢᠨ ᠦᠶᠡᠰ ᠪᠠᠯᠭᠠᠨᠰᠠᠩ᠂ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠨᠠᠷ ᠲᠠᠢ ᠪᠠᠨ ᠣᠪᠣᠭᠠᠲᠠᠢ ᠲᠦᠯᠡᠭᠡᠨ ᠳᠡᠭᠡᠷᠡ ᠭᠠᠷᠴᠤ᠂ ᠪᠤᠷᠬᠠᠨ ᠪᠣᠯᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠵᠠᠪᠢᠯᠠᠵᠤ ᠰᠠᠭᠤᠭᠠᠳ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠭᠠᠨ ᠵᠠᠯᠪᠢᠷᠠᠭᠰᠠᠭᠠᠷ᠄
《ᠠᠶᠠᠭᠠᠨ ᠤ᠋ ᠬᠠᠷᠢᠭᠤ ᠡᠳᠦᠷ ᠲᠡᠭᠡᠨ᠂
ᠠᠭᠲᠠ ᠶ᠋ᠢᠨ ᠬᠠᠷᠢᠭᠤ ᠵᠢᠯ ᠳ᠋ᠡᠭᠡᠨ᠂
ᠢᠪᠡᠭᠡᠯᠳᠦ ᠨᠣᠶᠠᠨ ᠤ᠋ ᠥᠷᠥᠰᠢᠶᠡᠯ ᠢ᠋
ᠢᠷᠡᠬᠦ ᠵᠢᠯ ᠦ᠋ᠨ ᠬᠠᠪᠤᠷ ᠬᠠᠷᠢᠭᠤᠯᠤᠶᠠ!
ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ ᠳᠠ᠂
ᠰᠠᠪᠠ ᠰᠠᠭᠤᠯᠠᠭᠠ ᠴᠢᠨᠢ ᠪᠢᠯᠬᠠᠭᠠᠷᠠᠢ!
ᠡᠷᠡᠭᠦᠯ ᠮᠡᠨᠳᠦ ᠪᠠᠢᠭᠠᠷᠠᠢ ᠳᠠ᠂
ᠡᠷᠭᠢᠭᠡᠳ ᠢᠷᠡᠬᠦ ᠶ᠋ᠢ ᠮᠢᠨᠢ ᠬᠦᠯᠢᠶᠡᠭᠡᠷᠡᠢ!》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠷᠠᠳᠨᠠ ᠨᠣᠶᠠᠨ᠄《ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ ᠳᠠ᠂
ᠵᠠ ᠲᠡᠭᠡᠭᠡᠳ ᠪᠤᠰᠢᠭᠤᠬᠠᠨ ᠪᠤᠴᠠᠵᠤ ᠢᠷᠡᠭᠡᠷᠡᠢ!》 ᠭᠡᠳ᠂ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄《ᠲᠦᠷᠭᠡᠨ! ᠪᠤᠰᠢᠭᠤᠯᠠ! ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠭᠠᠯ ᠨᠣᠴᠣᠭᠠ! ᠬᠣᠢᠨᠠ ᠡᠮᠦᠨᠡ ᠡᠴᠡ ᠨᠢ ᠬᠤᠷᠳᠤᠨ ᠭᠠᠯ ᠣᠷᠣᠭᠤᠯ!》 ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠭᠡᠨᠡ᠃
ᠵᠠᠭᠤᠨ ᠲᠡᠷᠭᠡ ᠲᠦᠯᠡᠭᠡᠨ ᠦ᠌ ᠭᠠᠯ ᠤ᠋ᠨ ᠳᠥᠯᠥ ᠲᠩᠷᠢ ᠲᠤᠯᠤᠮᠠ ᠳᠦᠷᠡᠯᠵᠡᠵᠦ ᠬᠠᠷᠠ ᠤᠲᠤᠭᠠ ᠮᠠᠨᠠᠷᠠᠨ᠂ ᠬᠠᠷᠠᠵᠤ ᠪᠠᠢᠭᠠ ᠬᠥᠮᠦᠰ ᠬᠠᠪᠢᠳᠠᠨ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠠᠯᠭᠠᠨᠰᠠᠩ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠨᠠᠷ ᠲᠠᠢ ᠪᠠᠨ ᠣᠪᠣᠭᠠᠲᠠᠢ ᠲᠦᠯᠡᠭᠡᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠡᠴᠡ ᠣᠩᠬᠣᠢᠯᠠᠵᠣ ᠪᠡᠯᠡᠳᠬᠡᠭᠰᠡᠨ ᠬᠥᠨᠳᠡᠢ ᠪᠡᠷ ᠳᠣᠷᠣᠭᠰᠢ ᠪᠠᠭᠤᠵᠤ᠂ ᠥᠨᠥ ᠮᠠᠯᠲᠠᠭᠰᠠᠨ ᠨᠦᠬᠡ ᠪᠡᠷ ᠢ᠋ᠶ᠋ᠡᠨ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ᠂ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠦᠵᠡᠭᠳᠡᠬᠦ ᠦᠭᠡᠢ ᠨᠦᠬᠡᠨ ᠭᠡᠷ ᠲᠦ᠍ ᠠᠮᠢᠳᠤᠷᠠᠵᠤ ᠭᠡᠨᠡ᠃
ᠷᠠᠳᠨᠠ ᠨᠣᠶᠠᠨ᠂ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ᠂ ᠬᠠᠷᠠᠳᠠᠭᠤᠨ ᠰᠠᠨᠠᠭᠠ ᠨᠢ ᠬᠠᠨᠤᠮᠵᠢᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠬᠤᠢᠬᠤᠷ ᠪᠢᠴᠢᠭᠡᠴᠢ ᠲᠡᠢ ᠪᠡᠨ ᠬᠣᠶᠠᠭᠤᠯᠠ᠂ ᠬᠤᠷᠠᠭᠠᠨ ᠮᠢᠬᠠ ᠲᠠᠪᠠᠭᠯᠠᠵᠤ᠂ ᠬᠤᠨᠳᠠᠭᠠ ᠡᠷᠭᠦᠨ ᠬᠡᠯᠡᠯᠴᠡᠵᠦ ᠰᠠᠭᠤᠬᠤ ᠳ᠋ᠠᠭᠠᠨ᠄
《ᠦᠬᠦᠯ ᠨᠢ ᠢᠷᠡᠭᠰᠡᠨ ᠭᠤᠢᠷᠠᠨᠴᠢᠳ ᠤ᠋ᠨ
ᠦᠬᠦᠭᠡᠷ ᠨᠢ ᠣᠳᠣ ᠦᠨᠡᠰᠦ ᠪᠣᠯᠵᠤ ᠳᠠ᠂
ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠤᠯᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠨᠠ
ᠤᠬᠠᠭᠠᠨ ᠦᠭᠡᠢ ᠠᠮᠢᠲᠠᠨ ᠣᠯᠠᠨ ᠤ᠋ ᠰᠢᠪᠰᠢᠭ ᠪᠣᠯᠤᠨᠠ》 ᠭᠡᠵᠦ ᠭᠡᠨᠡ᠃
ᠡᠳᠦᠷ ᠬᠣᠨᠣᠭ ᠭᠡᠭᠴᠢ ᠤᠳᠠᠨᠠ ᠤᠤ ᠳᠠ᠂ ᠣᠨ ᠵᠢᠯ ᠭᠡᠭᠴᠢ ᠲᠦᠷᠭᠡᠨ ᠶᠦ᠍ᠮ᠃ ᠤᠳᠠᠭᠰᠠᠨ ᠦᠭᠡᠢ ᠨᠠᠮᠤᠷ ᠥᠩᠭᠡᠷᠡᠭᠡᠳ ᠡᠪᠦᠯ ᠪᠣᠯᠵᠤ᠂ ᠡᠪᠦᠯ ᠢ᠋ ᠲᠤᠭᠤᠯᠤᠭᠠᠳ
ᠬᠠᠪᠤᠷ ᠪᠣᠯᠵᠠᠢ᠃ ᠭᠡᠨᠡᠳᠲᠡ ᠨᠢᠭᠡᠨ ᠰᠥᠨᠢ ᠪᠠᠯᠭᠠᠨᠰᠠᠩ᠂ ᠮᠣᠳᠣᠴᠢᠨ ᠰᠢᠪᠠᠷᠴᠢᠳ ᠲᠠᠢ ᠪᠠᠨ ᠬᠡᠳᠦᠭᠦᠯᠡ᠂ ᠰᠢᠷᠠ ᠳᠡᠪᠡᠯ ᠱᠠᠮᠤᠤ ③ ᠮᠠᠯᠠᠭᠠᠢ ᠡᠮᠦᠰᠦᠨ᠂ ᠠᠪᠳᠠᠷᠠ ᠳᠦᠭᠦᠷᠡᠩ ᠠᠯᠲᠠ ᠮᠥᠩᠭᠥ᠂ ᠬᠣᠷᠭᠣ ᠳᠦᠭᠦᠷᠡᠩ ᠬᠣᠷᠭᠣᠢ ᠲᠣᠷᠭᠠ ᠳᠠᠮᠨᠠᠭᠰᠠᠭᠠᠷ᠂ ᠷᠠᠳᠨᠠ ᠨᠣᠶᠠᠨ ᠤ᠋ ᠸᠠᠭᠠᠷᠠᠨ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠳᠡᠭᠡᠷᠡ ᠵᠣᠭᠰᠣᠭᠠᠳ᠄
《ᠷᠠᠳᠨᠠ ᠨᠣᠶᠠᠨ ᠭᠡᠷ ᠲᠡᠭᠡᠨ ᠪᠠᠢᠨᠠ ᠤᠤ?》 ᠭᠡᠵᠦ ᠬᠠᠰᠬᠢᠷᠴᠤ ᠭᠡᠨᠡ᠃ ᠳᠡᠯᠪᠡᠷᠡᠲᠡᠯᠡ ᠪᠡᠨ ᠢᠳᠡᠵᠦ ᠦᠬᠦᠰᠢᠷᠡᠲᠡᠯᠡ ᠪᠡᠨ ᠤᠨᠲᠠᠵᠤ ᠪᠠᠢᠭᠰᠠᠨ ᠷᠠᠳᠨᠠ ᠨᠣᠶᠠᠨ᠂ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠳᠡᠭᠡᠷᠡ ᠡᠴᠡ ᠪᠠᠷᠬᠢᠷᠠᠬᠤ ᠳᠠᠭᠤᠨ ᠢ᠋ ᠰᠣᠨᠣᠰᠤᠭᠠᠳ ᠰᠣᠴᠢᠨ ᠰᠡᠷᠡᠵᠦ᠂ ᠵᠡᠭᠦᠷᠮᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠯ ᠨᠢᠴᠦᠭᠦᠨ ᠭᠠᠷᠴᠤ ᠦᠵᠡᠬᠦᠯᠡ ᠬᠠᠷᠢᠨ ᠪᠠᠯᠭᠠᠨᠰᠠᠩ᠂ ᠮᠣᠳᠣᠴᠢᠨ ᠰᠢᠪᠠᠷᠴᠢᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠦᠷᠴᠦ ᠢᠷᠡᠭᠡᠳ ᠵᠣᠭᠰᠣᠵᠤ ᠪᠠᠢᠵᠠᠢ᠃ ᠷᠠᠳᠨᠠ ᠨᠣᠶᠠᠨ ᠰᠦᠨᠡᠰᠦ ᠪᠡᠨ ᠭᠠᠷᠲᠠᠯᠠ ᠠᠶᠤᠨ᠂ ᠭᠠᠷᠬᠠᠨ ᠨᠢᠳᠦ ᠨᠢ ᠭᠠᠪᠠᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠨᠢ ᠭᠠᠷᠴᠤ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠯᠠᠭ ᠮᠡᠯᠡᠬᠡᠢ ᠰᠢᠭ᠌ ᠭᠠᠵᠠᠷ ᠲᠤ᠌ ᠨᠠᠭᠠᠯᠳᠤᠨ ᠰᠥᠭᠥᠳᠦᠭᠡᠳ᠄
《ᠲᠠ᠁ ᠲᠠ ᠨᠠᠷ ᠴᠢᠨᠢ ᠶᠠᠭᠠᠬᠢᠭᠠᠳ ᠬᠠᠷᠢᠵᠤ ᠢᠷᠡᠪᠡ?》ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠠᠯᠭᠠᠨᠰᠠᠩ᠄
《ᠲᠠᠷᠢᠭᠰᠠᠨ ᠪᠤᠳᠠᠭᠠ ᠤᠷᠭᠤᠳᠠᠭ᠂
ᠲᠠᠬᠢᠭᠰᠠᠨ ᠪᠤᠷᠬᠠᠨ ᠤᠷᠪᠠᠳᠠᠭ᠂
ᠢᠳᠡᠭᠰᠡᠨ ᠬᠣᠭᠣᠯᠠ ᠰᠢᠩᠭᠡᠳᠡᠭ᠂
ᠶᠠᠪᠤᠭᠰᠠᠨ ᠬᠥᠮᠦᠨ ᠢᠷᠡᠳᠡᠭ! ᠪᠢᠳᠡ ᠲᠠᠨ ᠤ᠋ ᠬᠥᠭᠵᠢᠭᠰᠡᠨ ᠭᠠᠯ ᠢ᠋ᠶ᠋ᠠᠷ ᠳᠡᠭᠳᠡᠵᠦ ᠡᠭᠦᠯᠡ ᠬᠥᠯᠭᠡᠯᠡᠨ ᠲᠡᠷᠡ ᠡᠳᠦᠷ ᠲᠡᠭᠡᠨ ᠲᠩᠷᠢ ᠶ᠋ᠢᠨ ᠣᠷᠳᠣᠨᠠ ᠬᠦᠷᠴᠦ᠂ ᠥᠬᠢᠨ ᠲᠩᠷᠢ ᠶ᠋ᠢᠨ ᠣᠷᠳᠣᠨ ᠢ᠋ ᠰᠡᠯᠪᠢᠨ ᠪᠠᠢᠭᠤᠯᠵᠤ ᠳᠠᠭᠤᠰᠬᠠᠭᠠᠳ ᠬᠥᠯᠥᠰᠥ ᠮᠥᠩᠭᠥ ᠪᠡᠨ ᠣᠯᠵᠤ᠂ ᠬᠤᠷᠮᠤᠰᠲᠠ ᠲᠩᠷᠢ ᠡᠴᠡ ᠪᠠᠭᠤᠵᠤ ᠬᠣᠷᠸᠠ ᠶᠢᠷᠲᠢᠨᠴᠦ ᠳ᠋ᠡᠭᠡᠨ ᠪᠤᠴᠠᠵᠤ ᠢᠷᠡᠪᠡ》 ᠭᠡᠵᠦ ᠬᠠᠷᠢᠭᠤᠯᠤᠭᠠᠳ᠂ ᠠᠪᠳᠠᠷᠠ ᠳᠦᠭᠦᠷᠡᠩ ᠠᠯᠲᠠ ᠮᠥᠩᠭᠥ ᠪᠡᠨ ᠦᠵᠡᠭᠦᠯᠵᠦ᠂ ᠬᠣᠷᠭᠣ ᠳᠦᠭᠦᠷᠡᠩ ᠬᠣᠷᠭᠣᠢ ᠲᠣᠷᠭᠠ ᠪᠠᠨ ᠬᠠᠷᠠᠭᠤᠯᠤᠭᠰᠠᠨ ᠳ᠋ᠤ᠌᠂ ᠬᠣᠪᠳᠣᠭ ᠰᠢᠨᠤᠬᠠᠢ ᠷᠠᠳᠨᠠ ᠨᠣᠶᠠᠨ ᠤ᠋ ᠬᠣᠶᠠᠷ ᠵᠠᠪᠠᠵᠢ ᠠ᠋ᠴᠠ ᠨᠢ ᠰᠢᠯᠦᠰᠦ ᠨᠢ ᠰᠡᠢᠷᠡᠵᠦ᠄
《ᠰᠠᠢᠨ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠴᠢᠨᠢ ᠪᠤᠶᠠᠨ ᠲᠠᠢ ᠯᠠ ᠪᠠᠢᠨᠠ᠃ ᠭᠡᠷ ᠲᠦ ᠮᠣᠷᠢᠯᠠᠵᠤ ᠪᠠᠭᠤᠮᠤ᠃》ᠭᠡᠵᠦ ᠶᠡᠬᠡᠯᠡ ᠬᠦᠨᠳᠦᠳᠬᠡᠵᠡᠢ᠃
ᠲᠡᠭᠡᠭᠡᠳ ᠭᠡᠷ ᠲᠤᠨᠢ ᠣᠷᠣᠭᠰᠠᠨ ᠤ᠋ ᠬᠣᠢᠨᠠ ᠪᠠᠯᠭᠠᠨᠰᠠᠩ᠂ ᠡᠪᠦᠷ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠥᠭᠡᠳᠡᠩ ᠢ᠋ᠶ᠋ᠡᠷ ᠭᠠᠳᠠᠷᠯᠠᠵᠤ᠂ ᠬᠡᠮᠡᠷᠯᠢᠭ ᠢ᠋ᠶ᠋ᠡᠷ ᠳᠣᠲᠣᠷᠯᠠᠭᠰᠠᠨ ᠲᠤᠭᠲᠤᠢ ᠭᠠᠷᠭᠠᠨ ᠷᠠᠳᠨᠠ ᠨᠣᠶᠠᠨ ᠤ᠋ ᠡᠮᠦᠨᠡ ᠳᠡᠯᠭᠡᠨ ᠪᠠᠷᠢᠵᠤ ᠤᠩᠰᠢᠪᠠ᠄
《ᠤᠸᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ᠂
ᠤᠯᠤᠰ ᠠᠮᠢᠲᠠᠨ ᠮᠥᠩᠬᠡᠷᠡᠬᠦ ᠪᠣᠯᠲᠤᠭᠠᠢ᠃
ᠮᠡᠷᠭᠡᠨ ᠮᠣᠳᠣᠴᠢᠨ ᠢ᠋ᠶ᠋ᠠᠨ ᠶᠠᠪᠤᠭᠤᠯᠣᠭᠰᠠᠨ ᠳ᠋ᠤ᠌ ᠴᠢᠨᠢ
ᠮᠥᠩᠬᠡ ᠲᠩᠷᠢ ᠪᠠᠶᠠᠰᠪᠠᠢ᠂
ᠰᠠᠢᠨ ᠰᠢᠪᠠᠷᠴᠢᠨ ᠢ᠋ᠶ᠋ᠠᠨ ᠢᠷᠡᠭᠥᠯᠥᠭᠰᠠᠨ ᠳ᠋ᠤ᠌ ᠴᠢᠨᠢ
ᠰᠠᠬᠢᠭᠤᠯᠰᠤᠨ ᠲᠩᠷᠢ ᠪᠠᠶᠠᠰᠪᠠᠢ
ᠡᠷᠳᠡᠮᠲᠡᠨ ᠪᠠᠷᠢᠯᠭᠠᠴᠢᠨᠢᠶᠠᠨ ᠲᠣᠮᠢᠯᠠᠭᠰᠠᠨ ᠳ᠋ᠤ᠌ ᠴᠢᠨᠢ
ᠡᠵᠡᠨ ᠲᠩᠷᠢ ᠪᠠᠶᠠᠰᠪᠠᠢ᠃
ᠡᠷᠬᠢᠮ ᠷᠠᠳᠨᠡ ᠨᠣᠶᠠᠨ ᠲᠠᠨ ᠢ᠋
ᠡᠳᠦᠭᠡ ᠬᠣᠷᠮᠤᠰᠳᠠ ᠶ᠋ᠢᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠵᠠᠯᠠᠵᠤ
ᠡᠷᠭᠢᠵᠦ ᠪᠤᠴᠠᠬᠤ ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠢ᠋ᠶ᠋ᠠᠷ
ᠡᠨᠡᠬᠦ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠳᠠᠮᠵᠢᠭᠤᠯᠪᠠ》 ᠭᠡᠵᠡᠢ᠃
ᠷᠠᠳᠨᠡ ᠨᠣᠶᠠᠨ ᠲᠡᠷᠡ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠳᠡᠯᠭᠡᠨ ᠦᠵᠡᠭᠰᠡᠨ ᠴᠢᠨᠢ᠂ᠠᠯᠲᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠤᠯᠠᠭᠠᠨ ᠰᠢᠩᠬᠤ ᠪᠠᠷ ᠮᠢᠷᠠᠯᠵᠠᠲᠠᠯᠠ ᠪᠢᠴᠢᠭᠰᠡᠨ ᠬᠡᠳᠦᠨ ᠮᠥᠷ ᠦᠰᠦᠭ ᠬᠠᠷᠠᠭᠳᠠᠪᠠ᠃ ᠴᠣᠬᠣᠮ ᠶᠠᠮᠠᠷ ᠦᠰᠦᠭ ᠢ᠋ᠶ᠋ᠡᠷ ᠶᠠᠭᠤ ᠭᠡᠵᠦ ᠪᠢᠴᠢᠭᠰᠡᠨ ᠢ᠋ ᠨᠢ ᠮᠡᠳᠡᠭᠰᠡᠨ ᠦᠭᠡᠢ᠃ ᠭᠡᠪᠡᠴᠦ ᠷᠠᠳᠨᠡ ᠨᠣᠶᠠᠨ ᠪᠠᠯᠭᠠᠨᠰᠠᠩ ᠤ᠋ᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠪᠠ ᠡᠨᠡᠬᠦ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠦᠵᠡᠭᠡᠳ ᠦᠨᠡᠬᠡᠷ ᠡᠵᠡᠨ ᠲᠩᠷᠢ ᠵᠠᠯᠠᠵᠤ ᠪᠠᠢᠨᠠ ᠭᠡᠵᠦ ᠢᠲᠡᠭᠡᠭᠡᠳ᠄
《ᠵᠠ! ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠳᠤᠷᠠᠲᠠᠶᠠ ᠮᠡᠬᠦᠢᠨ ᠭᠥᠷᠳᠡᠶᠡ》 ᠭᠡᠳ ᠬᠦᠯᠢᠶᠡᠨ ᠵᠥᠪᠰᠢᠶᠡᠵᠦ ᠭᠡᠨᠡ᠃ᠲᠡᠭᠡᠭᠡᠳ ᠷᠠᠳᠨᠡ ᠨᠣᠶᠠᠨ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠳᠠᠢᠯᠠᠯᠭᠠ ᠳ᠋ᠤ᠌ ᠣᠷᠣᠯᠴᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠬᠦᠨᠳᠦ ᠪᠡᠯᠡᠭ ᠣᠯᠣᠨᠡ ᠭᠡᠵᠦ ᠪᠣᠳᠣᠭᠠᠳ᠄
《ᠬᠡᠵᠢᠶᠡ ᠣᠴᠢᠬᠤ ᠪᠣᠢ? ᠬᠡᠷᠬᠢᠨ ᠶᠠᠪᠤᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠪᠠᠯᠭᠠᠨᠰᠠᠩ᠄
《ᠮᠣᠳᠣᠴᠢᠨ ᠰᠢᠪᠠᠷᠴᠢᠨ ᠤ᠋ ᠮᠥᠷ ᠢ᠋ᠶ᠋ᠡᠷ ᠶᠠᠪᠤ᠂
ᠮᠣᠭᠠᠢᠲᠤ ᠶ᠋ᠢᠨ ᠬᠥᠲᠥᠯ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤ᠂
ᠮᠣᠳᠣᠨ ᠭᠠᠯ ᠤ᠋ᠨ ᠡᠭᠦᠯᠡ ᠪᠡᠷ ᠬᠥᠯᠭᠡᠯᠡᠨ᠂
ᠮᠣᠷᠢᠨ ᠴᠠᠭ ᠤ᠋ᠨ ᠡᠬᠢᠨ ᠢ᠋ᠶ᠋ᠡᠷ ᠮᠣᠷᠳᠠ!》 ᠭᠡᠵᠦ ᠬᠠᠷᠠᠭᠤᠯᠵᠠᠢ᠃
ᠮᠠᠷᠭᠠᠰᠢ ᠨᠢ ᠵᠢᠩ ᠦᠳᠡ ᠪᠣᠯᠬᠤ ᠦᠶᠡ ᠳ᠋ᠦ᠍ ᠮᠥᠨ ᠮᠣᠭᠠᠢᠲᠤ ᠶ᠋ᠢᠨ ᠬᠥᠲᠥᠯ ᠦ᠋ᠨ ᠵᠠᠮ ᠤ᠋ᠨ ᠪᠠᠯᠴᠢᠷ ᠳᠡᠭᠡᠷᠡ ᠮᠣᠳᠣᠨ ᠲᠦᠯᠡᠭᠡ ᠣᠪᠣᠭᠠᠯᠠᠵᠤ᠂ ᠷᠡᠳᠨᠡ ᠨᠣᠶᠠᠨ ᠢ᠋ ᠲᠩᠷᠢ ᠶ᠋ᠢᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠮᠣᠷᠳᠠᠭᠤᠯᠬᠤ ᠪᠣᠯᠵᠠᠢ᠃
ᠷᠡᠳᠨᠡ ᠨᠣᠶᠠᠨ᠂ ᠣᠯᠣᠨᠳᠠᠢ ᠬᠦᠷᠮᠡ ᠪᠡᠨ ᠤᠭᠰᠠᠷᠠᠵᠤ᠂ ᠤᠲᠤᠭᠠ ᠵᠢᠩᠰᠡ ᠲᠡᠢ ᠮᠠᠯᠠᠭᠠᠢ ᠪᠠᠨ ᠣᠷᠣᠢᠯᠳᠠᠨ᠂ᠥᠬᠢᠨ ᠦ᠌ ᠪᠡᠨ ᠬᠤᠷᠢᠮ ᠳ᠋ᠤ᠌ ᠤᠷᠢᠭᠳᠠᠬᠤ ᠰᠢᠭ᠋ ᠬᠤᠪᠴᠠᠯᠠᠭᠠᠳ᠂ᠣᠪᠣᠭᠠᠯᠠᠭᠰᠠᠨ ᠮᠣᠳᠣᠨ ᠲᠦᠯᠡᠭᠡ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ᠂ ᠤᠮᠵᠠᠳ④ ᠮᠠᠮᠠ ᠰᠢᠭ᠋ ᠵᠠᠪᠢᠯᠠᠨ ᠰᠠᠭᠤᠭᠠᠳ᠂ ᠤᠲᠠᠢ ᠶ᠋ᠢᠨ ᠣᠮᠪᠣ⑤ ᠰᠢᠭ᠋ ᠵᠠᠯᠪᠠᠷᠢᠨ ᠨᠠᠮᠴᠢᠯᠠᠵᠦ᠂ ᠣᠯᠠᠨ ᠤ᠋ ᠵᠦᠭ ᠲᠦ ᠬᠠᠨᠳᠤᠨ᠄
《ᠮᠠᠯ ᠰᠥᠷᠦᠭ ᠢ᠋ ᠮᠢᠨᠢ ᠰᠠᠢᠨ ᠠᠷᠠᠴᠢᠯᠠᠵᠤ ᠪᠠᠢᠭᠠᠷᠠᠢ᠂
ᠮᠢᠬᠠ ᠪᠤᠳᠠᠭᠠ ᠶ᠋ᠢ ᠮᠢᠨᠢ ᠰᠠᠢᠨ ᠠᠷᠪᠢᠯᠠᠵᠤ ᠪᠠᠢᠭᠠᠷᠠᠢ᠂
ᠮᠠᠨᠽᠤᠰᠢᠷᠢ⑥ ᠪᠤᠷᠬᠠᠨ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ᠂
ᠮᠠᠭᠠᠳ ᠪᠠᠶᠠᠵᠢᠭᠠᠳ ᠢᠷᠡᠨᠡ ᠷᠡᠳᠨᠠ ᠪᠢ!》 ᠭᠡᠪᠡ᠃
ᠪᠠᠯᠭᠠᠨᠰᠠᠩ ᠬᠠᠷᠢᠭᠤ ᠳᠤᠨᠢ᠄
《ᠬᠤᠷᠮᠤᠰᠲᠠ ᠲᠩᠷᠢ ᠬᠣᠭᠰᠢᠯ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ᠂
ᠬᠣᠪᠳᠣᠭ ᠬᠥᠮᠦᠨ ᠦ᠌ ᠬᠣᠳᠣᠭᠣᠳᠣ ᠨᠢ ᠳᠦᠭᠦᠷᠬᠦ ᠦᠭᠡᠢ᠂
ᠬᠣᠣᠷᠲᠤ ᠮᠣᠭᠠᠢ ᠬᠠᠳᠠᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠦᠬᠦᠨᠡ᠂
ᠬᠣᠣᠷ ᠤ᠋ᠨ ᠰᠠᠨᠠᠭᠠᠲᠤ ᠬᠤᠵᠤᠤᠯᠡ ᠶ᠋ᠢᠨ ᠭᠠᠯ ᠳ᠋ᠤ᠌ ᠲᠣᠨᠢᠯᠤᠨᠠ᠂
ᠰᠠᠢᠨ ᠶᠠᠪᠤᠭᠠᠳ ᠲᠦᠷᠭᠡᠨ ᠢᠷᠡᠭᠡᠷᠡᠢ!
ᠰᠠᠭᠰᠠᠷ ᠲᠤ᠌ ᠬᠦᠷᠦᠭᠡᠳ ᠬᠤᠷᠳᠤᠨ ᠪᠤᠴᠠᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠡᠳ ᠲᠦᠯᠡᠭᠡᠨ ᠳ᠋ᠦ᠍ ᠭᠠᠯ ᠣᠷᠣᠭᠤᠯᠤᠨ ᠬᠠᠷᠭᠢᠰ ᠷᠠᠳᠨᠠ ᠨᠣᠶᠠᠨ ᠢ᠋ ᠰᠢᠲᠠᠭᠠᠨ ᠠᠯᠠᠵᠠᠢ ᠭᠡᠨᠡ᠃
ᠴᠤᠭᠯᠠᠭᠤᠯᠤᠭᠰᠠᠨ ᠣᠷᠣᠨ᠄ ᠴᠠᠬᠠᠷ ᠨᠤᠲᠤᠭ
ᠶᠠᠷᠢᠭᠰᠠᠨ ᠨᠢ᠄ ᠪᠠᠲᠤᠰᠦ᠋ᠬᠡ
ᠲᠡᠮᠳᠡᠭᠯᠡᠨ ᠡᠮᠬᠢᠳᠬᠡᠭᠰᠡᠨ ᠨᠢ᠄ ᠮᠠᠬᠠᠢ· ᠮᠥᠷᠡᠨ
ᠵᠡᠭᠦᠯᠲᠡ᠄
① ᠢᠯᠳᠠᠭ— ᠰᠢᠯᠲᠠᠭ ᠭᠡᠰᠡᠨ ᠦᠭᠡᠨ ᠦ᠌ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤ᠃
② ᠮᠣᠨᠢᠣ— ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠨᠠᠢ᠍ᠮᠠᠳᠤᠭᠠᠷ ᠨᠢ ᠪᠡᠴᠢᠨ ᠰᠠᠮᠵᠠ ᠭᠡᠰᠡᠨ ᠤᠳᠬᠠ ᠲᠠᠢ ᠮᠠᠨᠵᠤ ᠦᠭᠡ᠃
③ ᠱᠠᠮᠤᠤ— ᠥᠨᠳᠥᠷ ᠬᠡᠷᠭᠡᠮᠲᠡᠨ ᠯᠠᠮᠠ ᠶ᠋ᠢᠨ ᠵᠡᠭᠦᠳᠡᠭ ᠲᠣᠭᠣᠷᠢᠭ ᠰᠠᠷᠠᠪᠴᠢ ᠲᠠᠢ᠂ ᠱᠠ ᠪᠠᠷ ᠰᠦᠯᠵᠢᠵᠦ ᠬᠢᠭᠰᠡᠨ ᠮᠠᠯᠠᠭᠠᠢ᠃ ᠪᠠᠰᠠ ᠱᠠ ᠮᠠᠯᠠᠭᠠᠢ ᠴᠤ᠌ ᠭᠡᠳᠡᠭ᠃
④ ᠤᠮᠵᠠᠳ— ᠰᠦᠮᠡ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ ᠣᠯᠠᠨ ᠤ᠋ ᠤᠩᠰᠢᠯᠭᠠ ᠶ᠋ᠢ ᠤᠲᠤᠷᠢᠳᠣᠨ ᠳᠠᠭᠠᠭᠤᠯᠳᠠᠭ ᠲᠤᠰᠢᠶᠠᠯ ᠲᠠᠢ ᠯᠠᠮᠠ ᠶ᠋ᠢᠨ ᠬᠡᠷᠬᠢᠮ᠃
⑤ ᠣᠮᠪᠣ— ᠭᠡᠷ ᠡᠷᠦᠬᠡ ᠡᠴᠡ ᠪᠡᠨ ᠠᠩᠭᠢᠵᠢᠷᠠᠨ ᠲᠤᠰᠬᠠᠢᠯᠠᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠳᠠᠭ ᠯᠠᠮᠠ ᠶ᠋ᠢᠨ ᠴᠣᠯᠠ᠃
⑥ ᠮᠠᠨᠽᠤᠰᠢᠷᠢ— ᠨᠣᠮ ᠤ᠋ᠨ ᠬᠠᠭᠠᠨ ᠭᠡᠰᠡᠨ ᠤᠳᠬᠠ ᠲᠠᠢ ᠪᠤᠷᠬᠠᠨ ᠤ ᠨᠡᠷᠡ᠂ ᠰᠠᠨᠰᠺᠷᠢᠲ ᠦᠭᠡ᠃ ᠠᠷᠠᠳ ᠤ᠋ᠨ ᠶᠠᠷᠢᠶᠠᠨ ᠳ᠋ᠤ᠌ ᠡᠨᠡ ᠦᠭᠡ ᠶ᠋ᠢ ᠨᠣᠮ ᠪᠢᠴᠢᠭ ᠲᠦ ᠰᠠᠢᠨ᠂ ᠮᠡᠷᠭᠡᠨ ᠰᠡᠴᠡᠨ ᠭᠡᠰᠡᠨ ᠤᠳᠬᠠ ᠪᠠᠷ ᠵᠦᠢᠷᠯᠡᠵᠦ ᠬᠡᠷᠡᠭᠯᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠢᠬᠤᠸᠠᠷ᠂ ᠬᠦᠭᠵᠢᠯᠴᠡᠴᠡᠭ᠂ ᠣᠳᠬᠠᠨᠴᠡᠴᠡᠭ᠂ ᠲᠣᠭᠲᠠᠭᠤᠨ᠂ ᠬᠥᠭᠵᠢᠯᠴᠡᠴᠡᠭ᠂ ᠲᠣᠳᠣᠭᠡᠷᠡᠯ᠂ ᠤᠶᠤᠨᠴᠢᠮᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠲᠣᠭᠲᠠᠭᠤᠨ