ᠬᠠᠭᠠᠨ ᠊ᠤ᠌ ᠰᠠᠨᠠᠭᠠᠰᠢᠷᠠᠯ- ᠳ᠋ᠣ᠋·ᠪᠤᠯᠤᠳᠬᠤᠶᠠᠭХааны санаашрал-д·Болдхуяг
622ᠬᠠᠭᠠᠨ ᠊ᠤ᠌ ᠰᠠᠨᠠᠭᠠᠰᠢᠷᠠᠯ
ᠳ᠋ᠣ᠋·ᠪᠤᠯᠤᠳᠬᠤᠶᠠᠭ
ᠣ· ᠤᠤᠭᠠᠨᠪᠠᠶᠠᠷ ᠤᠶᠠᠩᠭᠠᠯᠠᠨᠠ
ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠬᠠᠭᠠᠨ ᠪᠠᠢᠯᠠ ᠭᠡᠳ
ᠲᠡᠭᠷᠢ ᠶ᠋ᠢᠨ ᠳᠣᠣᠷᠠ ᠶᠠᠭᠤ ᠰᠠᠨ ᠪᠢᠯᠡ
ᠡᠨᠡ ᠣᠷᠴᠢᠯᠠᠩ ᠤ᠋ᠨ ᠡᠵᠡᠨ ᠴᠦ᠍ ᠭᠡᠯᠡ ᠪᠢ
ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠬᠡᠨ ᠰᠠᠨ ᠪᠢᠯᠡ
ᠦᠷᠡ ᠰᠠᠲᠤ ᠮᠢᠨᠢ ᠨᠠᠮᠠᠶ᠋ᠢ ᠰᠢᠭᠦᠬᠦ ᠦᠭᠡᠢ ᠴᠦ᠍
ᠥᠷᠯᠥᠭ ᠲᠡᠦᠬᠡ ᠳᠠᠩᠰᠠᠯᠠᠵᠤ ᠲᠠᠭᠠᠷᠠᠨᠠ
ᠥᠨᠳᠥᠷ ᠠᠯᠳᠠᠷ ᠤ᠋ᠨ ᠮᠢᠨᠢ ᠴᠡᠭᠡᠷ ᠭᠡᠭᠡᠭᠳᠡᠵᠦ
ᠦᠶᠡ ᠴᠢᠴᠠᠤᠲᠠᠨ ᠰᠢᠭ᠋ ᠠᠭᠠᠰᠢᠯᠠᠵᠤ ᠮᠡᠳᠡᠨᠡ
ᠴᠢᠨᠠᠭᠰᠢ ᠨᠠᠮᠠᠶ᠋ᠢ ᠲᠩᠷᠢ ᠭᠡᠮᠡᠨ ᠰᠠᠨᠠᠵᠤ
ᠴᠢᠯᠡᠬᠦ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ ᠮᠠᠷᠲᠠᠬᠤ ᠪᠣᠢ
ᠮᠥᠨ ᠪᠡᠶᠡ ᠪᠡᠨ ᠡᠯᠡᠲᠡᠯᠡ ᠶᠠᠪᠤᠵᠤ ᠬᠤᠷᠢᠶᠠᠭᠰᠠᠨ ᠤᠯᠤᠰ ᠢ᠋ ᠮᠢᠨᠢ
ᠮᠥᠴᠢᠳ ᠤᠬᠠᠭᠠᠨᠲᠤ ᠬᠣᠢᠴᠢᠰ ᠮᠢᠨᠢ ᠲᠠᠷᠬᠠᠭᠠᠵᠤ ᠣᠷᠬᠢᠬᠤ ᠪᠣᠢ
ᠪᠠᠳᠠᠷᠠᠭᠠᠳ ᠪᠥᠬᠥᠳᠡᠭ ᠠᠮᠢ ᠴᠤ᠌ ᠭᠡᠯᠡ
ᠪᠠᠭᠠᠲᠤᠷ ᠡᠷᠡᠰ ᠢ᠋ ᠦᠷᠡᠭᠰᠡᠨ ᠮᠢᠨᠢ ᠬᠡᠨ ᠦ᠌ ᠲᠥᠯᠥᠭᠡ
ᠮᠠᠨᠳᠤᠭᠠᠳ ᠮᠥᠬᠥᠳᠡᠭ ᠵᠢᠮᠡ ᠴᠦ᠍ ᠭᠡᠯᠡ
ᠮᠢᠯᠠᠭᠠ ᠲᠠᠯᠪᠢᠯ ᠦᠭᠡᠢ ᠳᠠᠢᠳᠤᠭᠰᠠᠨ ᠮᠢᠨᠢ ᠶᠠᠭᠤᠨ ᠤ᠋ ᠲᠤᠯᠠᠳᠠ
ᠬᠠᠨ ᠳᠥᠷᠪᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠬᠥᠯ ᠬᠥᠰᠡᠷ ᠠᠮᠠᠷᠠᠭᠠᠭᠰᠠᠨ ᠦᠭᠡᠢ
ᠬᠠᠢᠷᠠᠲᠠᠢ ᠵᠢᠷᠭᠤᠭᠠᠨ ᠭᠦᠩᠵᠦ ᠪᠡᠨ ᠭᠠᠷ ᠭᠠᠵᠠᠷ ᠵᠢᠷᠭᠠᠭᠰᠠᠨ ᠦᠭᠡᠢ
ᠬᠠᠴᠠᠷ ᠭᠤᠸᠠ ᠬᠠᠲᠤᠳ ᠢ᠋ᠶ᠋ᠠᠨ ᠪᠦᠲᠦᠨ ᠨᠣᠢᠷ ᠲᠠᠢ ᠬᠣᠨᠣᠭᠤᠯᠤᠭᠰᠠᠨ ᠦᠭᠡᠢ
ᠬᠠᠮᠤᠭ ᠣᠯᠠᠨ ᠠᠷᠠᠳ ᠢ᠋ᠶ᠋ᠠᠨ ᠴᠤ᠌ ᠲᠦᠪᠰᠢᠨ ᠠᠮᠤᠷ ᠰᠠᠭᠤᠯᠭᠠᠭᠰᠠᠨ ᠦᠭᠡᠢ
ᠥᠨᠥᠴᠢᠨ ᠲᠠᠪᠤᠨ ᠳᠡᠭᠦᠦ ᠪᠡᠨ ᠠᠭᠲᠠ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌ ᠬᠠᠲᠠᠵᠤ
ᠥᠷᠯᠥᠭ ᠶᠢᠰᠦᠨ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠠᠶᠠᠨ ᠤ᠋ ᠤᠷᠲᠤ ᠳ᠋ᠤ᠌ ᠵᠦᠳᠡᠭᠡᠵᠦ
ᠦᠳᠡᠯᠦᠭᠡ ᠪᠤᠭᠤᠷᠤᠯ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠷᠦ ᠵᠢᠷᠦᠬᠡ ᠶ᠋ᠢ ᠲᠦᠭᠰᠢᠭᠡᠵᠦ
ᠡᠳᠦᠷ ᠰᠥᠨᠢ ᠶ᠋ᠢ ᠢᠯᠭᠠᠯ ᠦᠭᠡᠢ ᠬᠣᠲᠠ ᠪᠠᠯᠭᠠᠳ ᠢ᠋ ᠳᠦᠢᠪᠡᠭᠡᠯᠡ
ᠡᠩᠬᠡ ᠰᠢᠳᠤᠷᠭᠤ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠡᠪ ᠡᠶᠡ ᠶ᠋ᠢ ᠲᠡᠳᠬᠦᠬᠦ ᠭᠡᠵᠦ
ᠢᠰᠡᠭᠡᠢ ᠲᠤᠭᠤᠷᠭᠠᠲᠤ ᠤᠯᠤᠰ ᠤ᠋ᠨ ᠢ᠋ᠶ᠋ᠠᠨ ᠡᠮᠵᠢᠶᠡᠷᠢ ᠬᠠᠶᠠᠭᠠ ᠶ᠋ᠢ ᠲᠡᠯᠡᠬᠦ ᠭᠡᠵᠦ
ᠬᠠᠷᠢ ᠭᠦᠷᠦᠨ ᠢ᠋ ᠮᠥᠬᠥᠭᠡᠵᠦ ᠬᠠᠳᠠᠨ ᠢᠯᠳᠦ ᠶ᠋ᠢ ᠮᠣᠬᠣᠭᠠᠪᠠ
ᠬᠦᠯᠦᠭ ᠮᠣᠷᠢᠳ ᠢ᠋ ᠤᠯᠠᠳᠠᠭᠠᠵᠤ ᠥᠯᠭᠡ ᠳᠠᠢᠰᠤᠨ ᠢ᠋ ᠰᠢᠨᠳᠠᠯᠠᠪᠠ
ᠶᠡᠬᠡ ᠴᠡᠷᠢᠭ ᠦ᠋ᠨ ᠤᠤᠬᠠᠢ ᠪᠠᠷ ᠲᠠᠩᠭᠢᠰ ᠳᠠᠯᠠᠢ ᠶ᠋ᠢ ᠴᠠᠯᠭᠢᠭᠤᠯᠵᠤ
ᠢᠷᠲᠦ ᠮᠡᠰᠡ ᠶ᠋ᠢᠨ ᠤᠴᠢᠰ ᠢ᠋ᠶ᠋ᠠᠷ ᠣᠳᠣᠨ ᠮᠢᠴᠢᠳ ᠢ᠋ ᠳᠠᠯᠳᠢᠴᠢᠭᠤᠯᠵᠤ
ᠣᠨᠢᠰᠣᠨ ᠴᠢᠳᠥᠷ ᠦ᠋ᠨ ᠨᠦᠷᠭᠢᠭᠡᠨ ᠢ᠋ᠶ᠋ᠡᠷ ᠭᠠᠯᠲᠤ ᠠᠭᠤᠯᠠᠰ ᠢ᠋ ᠰᠡᠷᠢᠭᠡᠵᠦ
ᠣᠩᠭᠢᠲᠦ ᠵᠡᠪᠡ ᠶ᠋ᠢᠨ ᠢᠰᠬᠡᠷᠦᠭᠡᠨ ᠢ᠋ᠶ᠋ᠡᠷ ᠬᠠᠷᠠ ᠰᠢᠭᠤᠷᠭᠠ ᠳᠡᠭᠳᠡᠭᠡᠪᠡ
ᠡᠷᠭᠢᠭᠦᠳ᠂ ᠰᠠᠷᠲᠠᠭᠤᠯ᠂ ᠨᠠᠩᠭᠢᠶᠠᠳ᠂ ᠵᠦᠷᠴᠢᠳ ᠦᠭᠡᠢ
ᠡᠯᠢᠭᠡ ᠶ᠋ᠢ ᠨᠢ ᠡᠮᠲᠡᠯᠵᠦ ᠪᠣᠭᠣᠯ ᠢ᠋ᠶ᠋ᠠᠨ ᠪᠣᠯᠭᠠᠪᠠ
ᠡᠮᠢᠷ᠂ ᠬᠠᠯᠢᠹ᠂ ᠬᠤᠸᠠᠩᠳᠢ᠂ ᠰᠤᠯᠲᠠᠨ ᠦᠭᠡᠢ
ᠡᠭᠡᠮ ᠢ᠋ ᠨᠢ ᠬᠤᠭᠤᠯᠵᠤ ᠪᠣᠱᠣᠭᠠᠨ ᠳ᠋ᠠᠭᠠᠨ ᠰᠥᠭᠦᠳᠦᠭᠦᠯᠪᠡ
ᠬᠦᠴᠦᠲᠦ ᠲᠥᠷᠥ ᠶ᠋ᠢᠨ ᠥᠯᠮᠡᠢ ᠶ᠋ᠢ ᠲᠦᠰᠢᠬᠦ ᠭᠡᠵᠦ
ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠪᠤᠳᠠᠭᠠ ᠰᠢᠭ᠋ ᠰᠠᠴᠤᠯᠠ
ᠲᠦᠪᠰᠢᠨ ᠴᠠᠭ ᠤ᠋ᠨ ᠬᠥᠯ ᠢ᠋ ᠲᠤᠱᠠᠬᠤ ᠭᠡᠵᠦ
ᠲᠦᠮᠡᠨ ᠦ᠌ ᠦᠷᠡᠰ ᠢ᠋ ᠬᠣᠷᠸᠠ ᠪᠠᠷ ᠲᠠᠷᠬᠠᠭᠠᠯᠠ
ᠥᠯᠢᠰᠢ ᠦᠭᠡᠢ ᠬᠥᠬᠡ ᠲᠡᠭᠷᠢ ᠡᠴᠡ ᠦᠯᠢᠭᠡᠷ ᠠᠪᠴᠤ
ᠥᠷᠥᠰᠢᠶᠡᠬᠦ ᠰᠡᠳᠬᠢᠯ ᠳ᠋ᠦ᠍ ᠪᠡᠨ ᠪᠦᠬᠦᠨ ᠢ᠋ ᠪᠠᠭᠲᠠᠭᠠᠵᠤ
ᠮᠦᠰᠢᠶᠡᠬᠦ ᠮᠡᠯᠮᠡᠢ ᠳ᠋ᠦ᠍ ᠪᠡᠨ ᠰᠣᠯᠣᠩᠭᠠ ᠲᠠᠲᠠᠭᠤᠯᠤᠨ
ᠥᠰᠢᠬᠦ ᠬᠠᠷᠠᠴᠠᠨ ᠳ᠋ᠤ᠌ ᠪᠠᠨ ᠠᠶᠤᠩᠭᠠ ᠴᠠᠬᠢᠯᠤᠭᠤᠯᠤᠭᠰᠠᠭᠠᠷ
ᠮᠣᠷᠢᠨ ᠳᠡᠯ ᠳᠡᠭᠡᠷᠡ ᠨᠠᠰᠤ ᠶ᠋ᠢ ᠪᠠᠷᠠᠬᠤ ᠳ᠋ᠠᠭᠠᠨ
ᠮᠤᠢᠯᠲᠦ ᠤᠨᠤᠨ ᠠ᠋ᠴᠠ ᠪᠠᠨ ᠲᠥᠭᠡ ᠴᠦ᠍ ᠬᠣᠯᠠᠳᠠᠭᠰᠠᠨ ᠦᠭᠡᠢ
ᠬᠠᠮᠤᠭ ᠣᠷᠴᠢᠯᠠᠩ ᠢ᠋ ᠰᠤᠮᠤ ᠪᠠᠷ ᠬᠡᠮᠵᠢᠬᠦ ᠳ᠋ᠦ᠍ ᠪᠡᠨ
ᠬᠠᠯᠳᠤᠨ ᠠᠭᠤᠯᠠᠨ ᠠ᠋ᠴᠠ ᠪᠠᠨ ᠰᠥᠭᠡᠮ ᠴᠦ᠍ ᠰᠠᠯᠤᠭᠰᠠᠨ ᠦᠭᠡᠢ
ᠠᠬᠤ ᠲᠥᠷᠥ ᠶ᠋ᠢᠨ ᠢ᠋ᠶ᠋ᠡᠨ ᠵᠢᠯᠣᠭᠣ ᠶ᠋ᠢ ᠡᠪᠬᠡᠵᠦ
ᠠᠰᠢᠳᠠ ᠥᠷᠥᠰᠢᠶᠡᠯᠲᠦ ᠬᠥᠪᠡᠭᠦᠨ ᠳ᠋ᠦ᠍ ᠪᠡᠨ ᠥᠭᠭᠦᠨᠡ
ᠠᠯᠲᠠᠬᠠᠨ ᠪᠡᠶᠡ ᠪᠡᠨ ᠡᠲᠦᠭᠡᠨ ᠳ᠋ᠦ᠍ ᠦᠯᠡᠳᠡᠭᠡᠵᠦ
ᠠᠯᠳᠠᠭᠠ ᠤᠨᠤᠭᠠ ᠪᠠᠨ ᠲᠡᠦᠬᠡᠨ ᠳ᠋ᠦ᠍ ᠲᠤᠰᠢᠶᠠᠨᠠ
ᠲᠢᠪ ᠳᠡᠯᠡᠬᠡᠢ ᠶ᠋ᠢ ᠬᠤᠷᠢᠶᠠᠭᠰᠠᠨ ᠮᠢᠨᠢ
ᠲᠡᠭᠷᠢ ᠡᠴᠡ ᠰᠣᠶᠣᠷᠬᠠᠭᠰᠠᠨ ᠬᠦᠴᠦ
ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠢ᠋ ᠲᠣᠬᠣᠨᠢᠭᠤᠯᠤᠭᠰᠠᠨ ᠮᠢᠨᠢ
ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠ᠃
ᠪᠣᠯᠣᠷ ᠴᠣᠮᠣ ᠶ᠋ᠢᠨ ᠡᠵᠡᠨ ᠢᠷᠠᠭᠤ ᠨᠠᠢᠷᠠᠭᠴᠢ
ᠲᠡᠦᠬᠡ ᠶ᠋ᠢᠨ ᠤᠬᠠᠭᠠᠨ ᠤ᠋ ᠳ᠋ᠣᠺᠲ᠋ᠣᠷ ᠳ᠋ᠣ᠋· ᠪᠤᠯᠤᠳᠬᠤᠶᠠᠭ
ᠤᠯᠠᠭᠠᠪᠠᠭᠠᠲᠤᠷ ᠬᠣᠲᠠ2022 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ: ᠲᠦᠮᠡᠨᠴᠡᠴᠡᠭ
ᠢᠷᠡᠯᠲᠡ ᠄ ᠡ᠊ ᠣᠷᠭᠢᠯ ᠤ᠋ᠨ ᠸᠡᠴᠠᠲ ᠪᠢᠴᠢᠯᠭᠡ ᠡᠴᠡ