ᠮᠣᠩᠭᠣᠯ ᠬᠤᠭᠤᠷ ᠤ᠋ᠨ ᠦᠯᠢᠭᠡᠷ ᠦᠨ ᠬᠡᠪᠰᠢᠭᠰᠡᠨ ᠬᠡᠯᠡᠯᠭᠡ – ᠷᠢᠨᠴᠢᠨᠳᠣᠷᠵᠢ᠂ᠬᠤᠪᠢᠲᠤ ᠨᠠᠢᠷᠠᠭᠤᠯᠪᠠ - ᠡᠮᠦᠨᠡᠬᠢ ᠦᠭᠡ(4) Монгол хуурын үлгэрийн хэвшсэн хэллэг – Ренчиндорж᠂Хувьт найруулав - Өмнөх үг -4
264ᠡᠮᠦᠨᠡᠭᠢ ᠦᠭᠡ – ᠳᠥᠷᠪᠡ
ᠳᠥᠷᠪᠡ
ᠤᠷᠲᠤ ᠬᠤᠭᠤᠴᠠᠭᠠᠨ ᠤ᠋ ᠳᠣᠲᠣᠷᠠ ᠬᠤᠭᠤᠷ ᠤ᠋ᠨ ᠦᠯᠢᠭᠡᠷ ᠲᠡᠭᠦᠨ ᠦ᠌ ᠣᠨᠴᠠᠯᠢᠭ ᠪᠦᠬᠦᠢ ᠥᠪᠡᠷᠮᠢᠴᠡ ᠴᠢᠨᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠣᠨᠣᠰᠤᠭᠴᠢᠳ ᠤ᠋ᠨ ᠤᠷᠮᠠ ᠪᠠᠬᠠ ᠶ᠋ᠢ ᠲᠠᠲᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠣᠯᠬᠣᠷ ᠥᠷᠭᠡᠨ ᠣᠯᠠᠨ ᠬᠤᠭᠤᠷᠴᠢ ᠨᠠᠷ ᠴᠤ᠌ ᠨᠡᠩ ᠰᠢᠮᠳᠠᠨ ᠬᠢᠴᠢᠶᠡᠵᠦ ᠰᠤᠪᠢᠨ ᠰᠢᠨᠵᠢᠯᠡᠵᠦ᠂ ᠨᠢᠭᠲᠠᠯᠠᠨ ᠰᠤᠳᠤᠯᠵᠤ᠂ ᠬᠤᠭᠤᠷ ᠤ᠋ᠨ ᠦᠯᠢᠭᠡᠷ ᠦᠨ ᠤᠷᠠᠯᠢᠭ ᠤ᠋ᠨ ᠬᠡᠯᠪᠡᠷᠢ ᠶ᠋ᠢ ᠤᠯᠠᠮ ᠳᠡᠭᠡᠭᠰᠢᠯᠡᠭᠦᠯᠦᠨ ᠬᠥᠭᠵᠢᠭᠦᠯᠵᠡᠢ᠃ ᠥᠷᠭᠡᠨ ᠣᠯᠠᠨ ᠬᠤᠭᠤᠷᠴᠢ ᠨᠠᠷ ᠦᠢᠯᠡᠳᠦᠯᠭᠡ ᠶ᠋ᠢᠨ ᠶᠠᠪᠤᠴᠠ ᠳ᠋ᠠᠭᠠᠨ ᠤᠯᠠᠮᠵᠢᠯᠠᠯᠲᠤ ᠤᠷᠠᠯᠢᠭ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠣᠨᠴᠠᠯᠢᠭ᠂ ᠪᠤᠰᠤᠳ ᠠ᠋ᠴᠠ ᠰᠤᠷᠤᠯᠴᠠᠭᠰᠠᠨ ᠮᠡᠷᠭᠡᠵᠢᠯ ᠢ᠋ ᠡᠭᠦᠳᠦᠨ ᠪᠦᠲᠦᠭᠡᠯᠲᠡ ᠶ᠋ᠢᠨ ᠠᠪᠢᠶᠠᠰ ᠵᠡᠷᠭᠡ ᠪᠡᠨ ᠣᠷᠭᠠᠨᠢᠭ ᠢ᠋ᠶ᠋ᠠᠷ ᠤᠶᠠᠯᠳᠤᠭᠤᠯᠵᠤ ᠬᠤᠪᠢ ᠬᠣᠪᠢᠨ ᠤ᠋ ᠣᠨᠴᠠᠯᠢᠭ ᠪᠦᠬᠦᠢ ᠬᠡᠪ ᠨᠠᠮᠪᠠ ᠪᠣᠯᠤᠨ ᠪᠦᠷᠢᠯᠳᠦᠵᠦ ᠪᠣᠢ᠃ ᠡᠨᠡ ᠨᠢ ᠬᠡᠳᠦᠢᠪᠡᠷ ᠬᠡᠯᠪᠡᠷᠢᠵᠢᠨ ᠲᠣᠭᠲᠠᠪᠤᠷᠢᠵᠢᠭᠰᠠᠨ ᠬᠡᠪ ᠨᠠᠮᠪᠠ ᠭᠡᠵᠦ ᠡᠷᠡᠰ ᠲᠠᠰᠤ ᠬᠤᠪᠢᠶᠠᠬᠤ ᠳ᠋ᠤ᠌ ᠪᠡᠷᠬᠡᠲᠡᠢ ᠪᠣᠯᠪᠠᠴᠤ᠂ ᠬᠤᠭᠤᠷᠴᠢ ᠨᠠᠷ ᠤ᠋ᠨ ᠣᠨᠴᠠᠯᠢᠭ ᠪᠣᠯᠤᠨ ᠠᠷᠭᠠ ᠠᠪᠴᠢᠯ ᠢ᠋ᠶ᠋ᠠᠷ ᠨᠢ ᠶᠡᠬᠡ ᠲᠥᠯᠥᠪ ᠬᠡᠳᠦᠨ ᠬᠡᠪ ᠨᠠᠮᠪᠠ ᠬᠤᠪᠢᠶᠠᠵᠤ ᠪᠣᠯᠤᠨᠠ᠃
ᠮᠠᠨ ᠤ᠋ ᠮᠡᠳᠡᠵᠦ ᠪᠠᠢᠭᠠ ᠣᠷᠴᠢᠨ ᠦᠶᠡ ᠶ᠋ᠢᠨ ᠪᠠ ᠣᠳᠣ ᠦᠶᠡ ᠶ᠋ᠢᠨ ᠬᠣᠷᠴᠢᠨ ᠭᠠᠵᠠᠷ ᠤ᠋ᠨ ᠬᠤᠭᠤᠷᠴᠢ ᠨᠠᠷ ᠠ᠋ᠴᠠ ᠵᠢᠭᠰᠠᠭᠠᠪᠠᠯ᠄ ᠰᠢᠨᠢᠨᠨᠢᠭᠡᠨ᠂ ᠴᠣᠢᠪᠠᠩ᠂ ᠫᠠᠵᠠᠢ᠂ ᠮᠤᠤᠥᠬᠢᠨ᠂ ᠴᠣᠢᠵᠢᠺᠠᠸᠠ᠂ ᠯᠤᠤᠽᠠᠷ ᠨᠠᠷ ᠢ᠋ ᠪᠠᠭᠲᠠᠭᠠᠭᠰᠠᠨ ᠵᠠᠷᠤᠳ ᠬᠤᠭᠤᠷᠴᠢ ᠪᠠᠷ ᠭᠣᠣᠯ ᠪᠣᠯᠭᠠᠭᠰᠠᠨ ᠨᠢᠭᠡ ᠪᠦᠯᠦᠭ ᠬᠤᠭᠤᠷᠴᠢ ᠪᠠᠢᠨᠠ᠃ ᠡᠳᠡᠨᠡᠷ ᠮᠣᠩᠭᠣᠯ ᠦᠯᠢᠭᠡᠷ ᠲᠤᠤᠯᠢᠰ ᠤᠯᠠᠮᠵᠢᠯᠠᠯ ᠢ᠋ ᠵᠠᠯᠭᠠᠮᠵᠢᠯᠠᠨ ᠬᠣᠯᠪᠣᠭᠠ ᠬᠣᠯᠪᠣᠬᠤ ᠠᠷᠭᠠ ᠪᠠᠷᠢᠯ ᠢ᠋ ᠬᠥᠭᠵᠢᠭᠦᠯᠦᠨ ᠪᠠᠳᠠᠷᠠᠭᠤᠯᠵᠤ ᠮᠣᠩᠭᠣᠯ ᠤ᠋ᠨ ᠤᠳᠤᠮᠰᠢᠯᠲᠤ ᠳᠦᠷᠰᠦᠯᠡᠬᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠦᠯᠢᠭᠡᠷ ᠢ᠋ᠶ᠋ᠡᠨ ᠳᠡᠯᠭᠡᠨ ᠬᠡᠯᠡᠳᠡᠭ ᠪᠥᠭᠡᠳ ᠦᠯᠢᠭᠡᠷ ᠦ᠋ᠨ ᠦᠯᠡ ᠶᠠᠪᠤᠳᠠᠯ ᠪᠠ ᠬᠥᠮᠦᠰ ᠢ᠋ᠶ᠋ᠡᠨ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠳᠦᠷᠰᠦᠯᠡᠨ ᠤᠷᠠᠯᠢᠭ ᠤ᠋ᠨ ᠬᠦᠴᠦᠨ ᠴᠢᠳᠠᠯ ᠢ᠋ ᠪᠠᠳᠠᠷᠠᠭᠤᠯᠵᠤ᠂ ᠤᠷᠤᠰᠤᠮᠠ ᠪᠠᠶᠠᠯᠢᠭ ᠬᠡᠯᠡ ᠪᠡᠷ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠠᠮᠢᠳᠤ ᠳᠦᠷᠰᠦᠯᠢᠭ ᠢᠯᠡᠳᠬᠡᠵᠦ ᠬᠥᠮᠦᠰ ᠦ᠋ᠨ ᠪᠠᠬᠠ ᠰᠣᠨᠢᠷᠬᠠᠯ ᠢ᠋ ᠲᠠᠲᠠᠳᠠᠭ᠃ ᠡᠳᠡᠨᠡᠷ ᠦ᠋ᠨ ᠶᠡᠷᠦᠩᠬᠡᠢ ᠣᠨᠴᠠᠯᠢᠭ ᠭᠡᠪᠡᠯ᠂ ᠦᠯᠢᠭᠡᠷ ᠬᠡᠯᠡᠬᠦ ᠬᠡᠪ ᠨᠠᠮᠪᠠ ᠨᠢ ᠤᠷᠤᠰᠤᠮᠠ ᠢᠯᠭᠤᠮ᠂ ᠬᠠᠳᠠᠨ ᠴᠢᠭᠢᠷᠠᠭ᠂ ᠢᠯᠡ ᠲᠣᠳᠣᠷᠬᠠᠢ ᠪᠥᠭᠡᠳ ᠠᠢᠵᠠᠮ ᠴᠣᠬᠢᠯᠭᠠ ᠪᠠᠷ ᠴᠢᠩᠭᠠ ᠡᠷᠴᠢᠮᠲᠡᠢ᠂ ᠠᠶᠠᠯᠭᠤ ᠡᠬᠡᠰᠢᠭ ᠢ᠋ᠶ᠋ᠡᠷ ᠣᠭᠵᠣᠮ ᠬᠥᠪᠭᠡᠯᠡᠩ ᠪᠠᠢᠳᠠᠭ᠃
ᠨᠥᠭᠦᠭᠡ ᠨᠢᠭᠡ ᠪᠦᠯᠦᠭ ᠨᠢ ᠡᠦ ᠰᠢᠶᠠᠨ ᠪᠤᠤ᠂ ᠠᠯᠲᠠ᠂ ᠪᠤᠤ ᠰᠦᠸᠧ ᠵᠣ᠌᠂ ᠰᠥᠩ ᠯᠢᠨ᠂ ᠭᠦᠩᠭᠠ᠂ ᠡᠦ ᠳᠣᠷᠵᠢ᠂ ᠲᠠᠮᠤᠷᠠ ᠵᠡᠷᠭᠡ ᠶ᠋ᠢᠨ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠣᠰᠢᠭᠤ ᠪᠠ ᠬᠣᠢᠲᠤ ᠬᠣᠰᠢᠭᠤ ᠪᠠᠷ ᠭᠣᠣᠯᠯᠠᠭᠰᠠᠨ ᠨᠢᠭᠡ ᠪᠦᠯᠦᠭ ᠬᠤᠭᠤᠷᠴᠢ ᠪᠣᠢ᠃ ᠡᠳᠡᠨᠡᠷ ᠮᠣᠩᠭᠣᠯ ᠦᠯᠢᠭᠡᠷ ᠦ᠋ᠨ ᠤᠷᠠᠯᠢᠭ ᠤ᠋ᠨ ᠤᠯᠠᠮᠵᠢᠯᠠᠯ ᠢ᠋ ᠵᠠᠯᠠᠭᠠᠮᠵᠢᠯᠠᠵᠤ᠂ ᠬᠡᠲᠡᠳ ᠤᠨ ᠦᠯᠢᠭᠡᠷ ᠬᠡᠯᠡᠬᠦ ᠣᠨᠴᠠᠯᠢᠭ ᠢ᠋ ᠬᠢᠨᠠᠯᠲᠠ ᠪᠣᠯᠭᠠᠵᠤ᠂ ᠦᠯᠢᠭᠡᠷ ᠤᠨ ᠪᠦᠲᠦᠴᠡ ᠪᠡᠨ ᠨᠢᠭᠲᠠ ᠲᠣᠬᠢᠷᠠᠭᠤᠯᠵᠤ᠂ ᠦᠯᠢᠭᠡᠷᠯᠢᠭ ᠶᠠᠪᠤᠴᠠ ᠪᠠᠨ ᠴᠢᠩᠭᠠ ᠵᠣᠬᠢᠶᠠᠮᠵᠢᠯᠠᠵᠤ᠂ ᠬᠦᠦᠷᠨᠢᠯᠲᠡ ᠤᠶᠠᠩᠭᠠᠯᠠᠯ ᠢ᠋ ᠬᠣᠣᠰᠯᠠᠭᠤᠯᠵᠤ ᠰᠣᠨᠣᠰᠤᠭᠴᠢᠳ ᠤ᠋ᠨ ᠳᠤᠷᠠ ᠰᠣᠨᠢᠷᠬᠠᠯ ᠢ᠋ ᠲᠠᠲᠠᠳᠠᠭ᠃ ᠡᠳᠡᠨᠥᠰ ᠤᠨ ᠬᠡᠪ ᠨᠠᠮᠪᠠ ᠨᠢ ᠡᠪᠬᠡᠷᠡᠭᠦᠨ ᠤᠶᠠᠩᠭᠠᠯᠢᠭ᠂ ᠵᠥᠭᠡᠯᠡᠨ ᠨᠠᠢᠷᠠᠮᠳᠠᠭᠤ᠂ ᠨᠠᠮ ᠳᠣᠯᠬᠢᠶᠠᠲᠠᠢ ᠪᠥᠭᠡᠳ ᠠᠢᠵᠠᠮ ᠴᠣᠬᠢᠯᠭᠠ ᠨᠢ ᠠᠭᠠᠵᠢᠮ ᠤᠳᠠᠭᠠᠪᠲᠤᠷ᠂ ᠠᠶᠠᠯᠭᠤ ᠡᠬᠡᠰᠢᠭ ᠨᠢ ᠤᠶᠠᠷᠠᠮᠠ ᠨᠤᠭᠤᠯᠪᠤᠷᠢ ᠲᠠᠢ ᠪᠠᠢᠳᠠᠭ᠃
ᠪᠠᠰᠠ ᠨᠢᠭᠡ ᠪᠦᠯᠦᠭ ᠨᠢ ᠭᠡᠪᠡᠯ᠂ ᠵᠠᠨᠠ᠂ ᠡᠷᠳᠡᠨᠢᠵᠢᠷᠦᠬᠡ᠂ ᠰᠢᠷᠠᠪ᠂ ᠪᠠᠢ ᠱᠦᠨ᠂ ᠪᠠᠢ ᠰᠦᠸᠧ᠂ ᠪᠦᠷᠢᠨᠪᠡᠷᠡᠷ᠂ ᠮᠥᠩᠬᠡᠭᠣᠣᠯᠲᠣ᠌᠂ ᠬᠠᠢᠪᠤᠤ᠂ ᠭᠠᠨᠵᠤᠤᠷ ᠵᠡᠷᠭᠡ ᠬᠤᠭᠤᠷᠴᠢ ᠶ᠋ᠢ ᠪᠠᠭᠲᠠᠭᠠᠭᠰᠠᠨ ᠵᠠᠷᠤᠳ — ᠲᠦᠰᠢᠶᠡᠲᠦ ᠶ᠋ᠢᠨ ᠨᠢᠭᠡ ᠪᠦᠯᠦᠭ ᠬᠤᠭᠤᠷᠴᠢ ᠪᠠᠢᠳᠠᠭ᠃ ᠡᠳᠡᠨᠡᠷ᠂ ᠮᠣᠩᠭᠣᠯ ᠬᠤᠭᠤᠷ ᠤ᠋ᠨ ᠦᠯᠢᠭᠡᠷ ᠤᠨ ᠤᠯᠠᠮᠵᠢᠯᠠᠯᠲᠤ ᠣᠨᠴᠠᠯᠢᠭ ᠪᠠ ᠬᠢᠲᠠᠳ ᠤ᠋ᠨ ᠦᠯᠢᠭᠡᠷ ᠤᠨ ᠣᠨᠴᠠᠯᠢᠭ ᠲᠠᠢ ᠢᠳᠡᠭᠡᠰᠢᠭᠦᠯᠦᠨ ᠤᠶᠠᠯᠳᠤᠭᠤᠯᠵᠤ᠂ ᠦᠯᠢᠭᠡᠷ ᠬᠡᠯᠡᠬᠦ ᠠᠷᠭᠠ ᠪᠠᠷᠢᠯ ᠢ᠋ᠶ᠋ᠠᠨ ᠪᠠᠶᠠᠯᠢᠭᠵᠢᠭᠤᠯᠤᠨ ᠬᠥᠭᠵᠢᠭᠦᠯᠦᠭᠡᠳ ᠦᠯᠢᠭᠡᠷ ᠤᠨ ᠯᠣᠭᠢᠭ ᠬᠠᠷᠢᠴᠠᠭᠠ ᠶ᠋ᠢ ᠴᠢᠩᠭᠠ ᠠᠩᠬᠠᠷᠴᠤ᠂ ᠦᠨᠡᠮᠰᠢᠭᠦᠯᠬᠦ ᠴᠢᠨᠠᠷ ᠢ᠋ ᠳᠡᠭᠡᠭᠰᠢᠯᠡᠭᠦᠯᠵᠦ᠂ ᠪᠠᠶᠠᠯᠢᠭ ᠳᠦᠷᠰᠦᠯᠢᠭ ᠪᠥᠭᠡᠳ ᠭᠦᠨ ᠤᠬᠠᠭᠠᠯᠢᠭ ᠬᠡᠯᠡᠯᠭᠡ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠦᠢᠯᠡ ᠶᠠᠪᠤᠳᠠᠯ ᠪᠠ ᠬᠥᠮᠦᠰ ᠤᠨ ᠬᠥᠳᠡᠯᠭᠡᠭᠡᠨ ᠲᠡᠢ ᠤᠷᠠᠯᠳᠤᠭᠤᠯᠤᠨ ᠠᠮᠢᠳᠤᠷᠠᠯ ᠤ᠋ᠨ ᠵᠦᠢ ᠶᠣᠰᠣ ᠶ᠋ᠢ ᠲᠣᠳᠣᠷᠬᠠᠢᠯᠠᠵᠤ ᠬᠥᠮᠦᠰ ᠲᠦ᠍ ᠥᠭᠬᠦ ᠬᠥᠮᠦᠵᠢᠭᠦᠯᠬᠦ ᠦᠢᠯᠡᠳᠦᠯ ᠢ᠋ ᠨᠡᠯᠢᠶᠡᠳ ᠠᠩᠬᠠᠷᠳᠠᠭ᠃ ᠮᠥᠨ ᠳᠡᠭᠦᠯᠴᠢᠯᠡᠨ ᠦᠯᠢᠭᠡᠷ ᠤᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠳᠡᠯᠭᠡᠭᠡᠳ᠂ ᠰᠠᠯᠠᠭᠠ ᠪᠦᠬᠦᠨ ᠢ᠋ ᠨᠢ ᠬᠤᠮᠢᠨ ᠬᠤᠷᠢᠶᠠᠵᠤ ᠬᠤᠷᠢᠶᠠᠩᠭᠤᠢᠯᠠᠨ ᠨᠢᠭᠡᠳᠬᠡᠬᠦ ᠠᠷᠭᠠ ᠪᠠᠷ ᠬᠥᠮᠦᠰ ᠲᠦ᠍ ᠭᠦᠨ ᠭᠦᠨᠵᠡᠭᠡᠢ ᠰᠠᠭᠤᠭᠳᠠᠯ ᠢ᠋ ᠥᠭᠳᠡᠭ ᠶᠦᠮ᠃ ᠡᠳᠡᠨᠡᠷ ᠤᠨ ᠬᠡᠪ ᠨᠠᠮᠪᠠ ᠨᠢ ᠭᠡᠪᠡᠯ᠂ ᠦᠯᠢᠭᠡᠷ ᠲᠡᠭᠡᠨ ᠲᠣᠬᠢᠷᠠᠭᠰᠠᠨ ᠠᠭᠤᠷ ᠠᠮᠢᠰᠬᠤᠯ ᠲᠠᠢ᠂ ᠤᠷᠤᠰᠤᠮᠠ ᠰᠠᠢᠬᠠᠨ᠂ ᠭᠦᠨ ᠤᠬᠠᠭᠠᠯᠢᠭ᠂ ᠨᠠᠷᠢᠨ ᠲᠣᠳᠣ ᠪᠥᠭᠡᠳ ᠠᠢᠵᠠᠮ ᠴᠣᠬᠢᠯᠭᠠ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ᠂ ᠠᠶᠠᠯᠭᠤ ᠬᠥᠭ ᠳᠣᠯᠭᠢᠨ ᠡᠷᠴᠢᠮ ᠲᠡᠢ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠡᠳᠡᠭᠡᠷ ᠬᠤᠭᠤᠷᠴᠢ ᠨᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠪᠠᠰᠠ ᠠᠳᠠᠯᠢ ᠦᠭᠡᠢ ᠪᠠᠢᠳᠠᠭ᠂ ᠲᠡᠳᠡᠨᠡᠷ ᠬᠡᠳᠦᠢᠪᠡᠷ ᠶᠡᠷᠦᠩᠬᠡᠢ ᠣᠨᠴᠠᠯᠢᠭ ᠲᠠᠢ ᠪᠠᠢᠯᠠ ᠴᠤ᠌ ᠭᠡᠰᠡᠨ ᠦᠢᠯᠡᠳᠦᠯᠭᠡ ᠶ᠋ᠢᠨ ᠶᠠᠪᠤᠴᠠ ᠳ᠋ᠠᠭᠠᠨ ᠮᠥᠨ ᠥᠪᠡᠷ ᠥᠪᠡᠷ ᠤᠨ ᠣᠨᠴᠠᠯᠢᠭ ᠢ᠋ᠶ᠋ᠠᠨ ᠪᠠᠳᠠᠷᠠᠭᠤᠯᠵᠤ᠂ ᠳᠣᠲᠣᠷᠠ ᠪᠠᠨ ᠪᠠᠰᠠ ᠬᠣᠢᠲᠤ ᠶ᠋ᠢᠨ᠂ ᠳᠤᠮᠳᠠᠳᠤ ᠶ᠋ᠢᠨ᠂ ᠡᠡᠮᠦᠨᠡᠳᠡᠬᠢ ᠶ᠋ᠢᠨ ᠪᠦᠯᠦᠭ ᠭᠡᠵᠦ ᠭᠤᠷᠪᠠᠨ ᠪᠦᠯᠦᠭ ᠬᠤᠪᠢᠶᠠᠳᠠᠭ᠃ ᠰᠣᠨᠣᠰᠤᠭᠴᠢᠳ ᠵᠠᠩᠰᠢᠯ ᠠ᠋ᠴᠠ ᠪᠠᠨ ᠵᠠᠨᠠ᠂ ᠡᠷᠳᠡᠨᠢᠵᠢᠷᠦᠬᠡ᠂ ᠰᠢᠷᠠᠪ᠂ ᠪᠠᠢ ᠱᠦᠨ ᠨᠠᠷ ᠢ᠋ᠶ᠋ᠠᠷ ᠲᠥᠯᠥᠭᠡᠯᠡᠭᠦᠯᠦᠭᠰᠡᠨ ᠬᠤᠭᠤᠷᠴᠢ ᠨᠠᠷ ᠢ ᠬᠣᠢᠲᠤ ᠬᠡᠰᠡᠭ ᠤᠨ ᠬᠤᠭᠤᠷᠴᠢ ᠭᠡᠵᠦ ᠨᠡᠷᠡᠯᠡᠭᠡᠳ᠂ ᠪᠦᠷᠢᠨᠪᠠᠶᠠᠷ᠂ ᠭᠠᠨᠵᠤᠤᠷ ᠨᠠᠷ ᠢ᠋ ᠳᠤᠮᠳᠠᠳᠤ ᠬᠡᠰᠡᠭ ᠤᠨ ᠬᠤᠭᠤᠷᠴᠢ᠂ ᠮᠥᠩᠬᠡᠭᠣᠣᠯᠲᠣ᠌᠂ ᠬᠠᠢᠪᠤᠤ ᠨᠠᠷ ᠢ᠋ ᠡᠮᠦᠨᠡ ᠬᠡᠰᠡᠭ ᠤᠨ ᠬᠤᠭᠤᠷᠴᠢ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠡᠳᠡᠨᠥᠰ ᠦ᠋ᠨ ᠦᠯᠢᠭᠡᠷ ᠬᠡᠯᠡᠬᠦ ᠠᠷᠭᠠ ᠪᠠᠷᠢᠯ ᠪᠠ ᠨᠠᠮᠪᠠ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠮᠥᠨ ᠨᠡᠯᠢᠶᠡᠳ ᠢᠯᠭᠠᠭᠠ ᠲᠠᠢ ᠪᠠᠢᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠬᠣᠢᠲᠤ ᠬᠡᠰᠡᠭ ᠤᠨ ᠬᠢᠨ ᠭᠦᠨ ᠤᠬᠠᠭᠠᠯᠢᠭ ᠴᠢᠨᠠᠷ ᠢ᠋ᠶ᠋ᠠᠷ ᠦᠯᠡᠮᠵᠢ᠃ ᠳᠤᠮᠳᠠᠳᠤ ᠬᠡᠰᠡᠭ ᠦ᠋ᠨ ᠬᠢᠨ ᠯᠣᠭᠢᠭ ᠠᠪᠴᠠᠯᠳᠤᠭᠠ ᠪᠠᠷ ᠴᠢᠩᠭᠠ; ᠡᠮᠦᠨᠡᠲᠦ ᠬᠡᠰᠡᠭ ᠦ᠋ᠨ ᠬᠢᠨ ᠱᠣᠭ ᠶᠥᠮᠥᠯᠢᠭ ᠢ᠋ᠶ᠋ᠡᠷ ᠭᠠᠷᠮᠠᠭᠠᠢ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠣᠨᠴᠠᠯᠢᠭ ᠪᠣᠢ᠃
ᠬᠤᠭᠤᠷ ᠤ᠋ᠨ ᠦᠯᠢᠭᠡᠷ ᠠᠷᠠᠳ ᠣᠯᠠᠨ ᠤ᠋ ᠪᠠᠬᠠ ᠰᠣᠨᠢᠷᠬᠠᠯ ᠢ᠋ ᠲᠠᠲᠠᠭᠰᠠᠨ ᠤᠷᠠᠯᠢᠭ ᠤ᠋ᠨ ᠬᠤᠪᠢ ᠳ᠋ᠤ᠌᠂ ᠥᠪᠡᠷ ᠤᠨ ᠬᠥᠭᠵᠢᠯ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠤᠭᠰᠢᠯᠠᠵᠤ᠂ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠢ᠋ᠶ᠋ᠠᠨ ᠪᠠᠳᠠᠷᠠᠭᠤᠯᠵᠤ᠂ ᠵᠦᠢᠯ ᠪᠦᠷᠢ ᠶ᠋ᠢᠨ ᠬᠡᠪ ᠨᠠᠮᠪᠠ ᠶ᠋ᠢ ᠪᠦᠷᠢᠯᠳᠦᠭᠦᠯᠵᠦ᠂ ᠲᠥᠯᠥᠪᠵᠢᠨ ᠲᠣᠭᠲᠠᠭᠤᠨ᠂ ᠤᠷᠠᠯᠢᠭ ᠤ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠥᠩᠭᠡ ᠭᠢᠯᠪᠠᠭᠠ ᠪᠠᠨ ᠨᠡᠮᠡᠷᠢᠯᠡᠵᠦ ᠪᠠᠢᠨᠠ᠃ ᠡᠨᠡ ᠪᠣᠯ ᠨᠢᠭᠡ ᠵᠦᠢᠯ ᠦ᠋ᠨ ᠪᠠᠶᠠᠷᠯᠠᠭᠤᠰᠢᠲᠠᠢ ᠶᠠᠪᠤᠳᠠᠯ ᠪᠥᠭᠡᠳ ᠡᠭᠦᠨ ᠡᠴᠡ ᠬᠣᠢᠰᠢ᠂ ᠭᠦᠨᠵᠡᠭᠡᠢᠷᠡᠨ ᠰᠤᠳᠤᠯᠤᠨ ᠰᠢᠨᠵᠢᠯᠡᠮᠡᠷ ᠠᠰᠠᠭᠤᠳᠠᠯ ᠶᠤᠮ᠃