ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤБух хар нохой хийгээд бух хар шувуу
992
ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠢᠭᠡ ᠰᠦᠷᠡᠬᠡᠢ ᠵᠠᠯᠠᠭᠤ ᠬᠠᠲᠤᠨ ᠲᠠᠢ ᠥᠳᠥᠯᠡᠭᠰᠡᠨ ᠬᠠᠭᠠᠨ ᠪᠠᠢᠵᠤ ᠭᠡᠨᠡ᠃
ᠡᠨᠡ ᠬᠠᠲᠤᠨ ᠨᠢ ᠬᠠᠭᠠᠨ ᠤ᠋ ᠪᠠᠨ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠯᠠᠵᠤ ᠡᠯᠳᠡᠪ ᠠᠷᠭᠠ ᠪᠠᠷ ᠠᠷᠭᠠᠳᠠᠨ ᠠᠯᠢ ᠪᠦᠬᠦ ᠰᠠᠢᠨ ᠢ᠋ ᠬᠡᠯᠡᠵᠦ᠂ ᠡᠳ᠋ ᠮᠥᠩᠭᠥ ᠪᠡᠷ ᠥᠳᠥᠭᠡᠵᠦ᠂ ᠥᠪᠡᠷ ᠦ᠋ᠨ ᠵᠦᠭ ᠢ᠋ᠶ᠋ᠡᠨ ᠲᠠᠲᠠᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ ᠳ᠋ᠤ᠌ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠶᠡᠷᠦ ᠣᠢᠰᠢᠶᠠᠬᠤ ᠦᠭᠡᠢ ᠪᠠᠢᠵᠠᠢ᠃
ᠢᠩᠭᠢᠬᠦ ᠳ᠋ᠦ᠍ ᠡᠨᠡ ᠬᠠᠷᠭᠢᠰ ᠬᠠᠲᠤᠨ ᠳᠣᠲᠣᠷᠠ ᠪᠠᠨ ᠶᠡᠬᠡᠯᠡ ᠬᠣᠷᠣᠰᠴᠤ ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠨᠢ᠄《ᠰᠣᠨᠣᠰᠪᠠᠯ ᠲᠡᠷᠡ ᠪᠠᠷᠠᠭᠤᠨ ᠬᠣᠢᠨᠠ᠂ ᠲᠦᠮᠡᠨ ᠡᠷᠡ ᠳᠡᠢᠯᠳᠡᠭ ᠦᠭᠡᠢ ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠭᠡᠵᠦ ᠪᠠᠢᠳᠠᠭ ᠭᠡᠨᠡ᠃ ᠬᠡᠷᠪᠡ ᠡᠨᠡ ᠬᠣᠶᠠᠷ ᠠᠮᠢᠲᠠᠨ ᠢ᠋ ᠪᠠᠷᠢᠨ ᠠᠪᠴᠢᠷᠠᠵᠤ᠂ ᠪᠤᠬᠠ ᠬᠠᠷᠠ ᠨᠣᠬᠠᠢ ᠪᠠᠷ ᠨᠢ ᠬᠣᠲᠠ ᠬᠠᠰᠢᠶᠠ ᠰᠠᠬᠢᠭᠤᠯᠵᠤ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠪᠠᠷ ᠨᠢ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠬᠠᠷᠢᠭᠤᠯᠤᠭᠤᠯᠪᠠᠯ᠂ ᠬᠣᠲᠠ ᠬᠠᠰᠢᠶᠠᠨ ᠳ᠋ᠤ᠌ ᠮᠢᠨᠢ ᠬᠠᠯᠳᠠᠬᠤ ᠳᠠᠢᠰᠤᠨ ᠦᠭᠡᠢ ᠪᠣᠯᠵᠤ ᠬᠣᠩᠬᠣᠷ ᠭᠣᠣ ᠳᠦᠭᠦᠷᠲᠡᠯᠡ ᠠᠳᠤᠭᠤ ᠮᠠᠯ ᠦᠷᠡᠵᠢᠨᠡ᠃》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠢ᠋ ᠶᠡᠬᠡ ᠪᠠᠶᠠᠷᠯᠠᠵᠤ ᠡᠨᠡ ᠬᠠᠷᠢᠨ ᠰᠠᠢᠨ ᠬᠡᠷᠡᠭ ᠪᠠᠢᠨᠠ᠃ ᠭᠡᠪᠡᠴᠦ ᠬᠡᠨ ᠶᠠᠪᠤᠵᠤ᠂ ᠡᠨᠡ ᠬᠣᠶᠠᠷ ᠠᠮᠢᠲᠠᠨ ᠢ᠋ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠪᠣᠢ᠃ ᠮᠢᠨᠦ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠪᠣᠯ᠂ ᠡᠨᠡ ᠬᠣᠶᠠᠷ ᠠᠮᠢᠲᠠᠨ ᠰᠦᠷᠡᠬᠡᠢ ᠳᠣᠭᠰᠢᠨ᠂ ᠤᠷᠢᠳᠤ ᠣᠴᠢᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠴᠥᠮ ᠢᠳᠡᠭᠳᠡᠵᠦ᠂ ᠠᠮᠢᠳᠤ ᠪᠤᠴᠠᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠨᠢᠭᠡᠴᠦ ᠭᠠᠷᠤᠭᠰᠠᠨ ᠦᠭᠡᠢ ᠭᠡᠳᠡᠭ ᠭᠡᠵᠦ ᠵᠣᠪᠠᠬᠤ ᠳ᠋ᠤ᠌᠃ ᠬᠠᠲᠤᠨ ᠨᠢ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠰᠠᠨ ᠨᠢ᠄ ᠣᠳᠣ ᠡᠨᠡ ᠠᠩᠴᠢᠨ ᠬᠦᠦ ᠶ᠋ᠢ ᠶᠠᠪᠤᠭᠤᠯᠵᠤ ᠪᠠᠷᠢᠵᠤ ᠢᠷᠡ ᠭᠡᠪᠡᠯ᠂ ᠲᠡᠷᠡ ᠮᠠᠭᠤ ᠠᠮᠢᠲᠠᠨ ᠣᠴᠢᠵᠤ ᠠᠮᠢ ᠪᠠᠨ ᠥᠭᠬᠦ ᠦᠭᠡᠢ ᠬᠠᠮᠢᠭᠠ ᠶᠠᠪᠤᠨᠠ ᠭᠡᠳ᠂ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠨᠢ᠄《ᠪᠢ ᠦᠵᠡᠪᠡᠯ ᠮᠠᠨ ᠤ᠋ ᠲᠡᠷᠡ ᠠᠳᠤᠭᠤᠨ ᠤ᠋ ᠵᠠᠯᠠᠭᠤ ᠢᠳᠡᠷᠬᠡᠭ ᠪᠠᠭᠠᠲᠤᠷ ᠮᠠᠶᠢᠭ ᠲᠠᠢ᠂ ᠲᠡᠭᠦᠨ ᠢ᠋ ᠶᠠᠪᠤᠭᠤᠯᠪᠠᠯ ᠣᠯᠵᠤ ᠢᠷᠡᠵᠦ ᠴᠢᠳᠠᠬᠤ ᠮᠠᠭᠠᠳ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠨᠢ ᠳᠠᠷᠤᠢ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠠᠳᠤᠭᠤᠨ ᠤ᠋ ᠵᠠᠯᠠᠭᠤ ᠶ᠋ᠢ ᠳᠠᠭᠤᠳᠠᠨ ᠠᠪᠴᠢᠷᠠᠭᠠᠳ ᠲᠤᠰᠢᠶᠠᠭᠰᠠᠨ ᠨᠢ᠄《ᠴᠢ ᠪᠠᠷᠠᠭᠤᠨ ᠬᠣᠢᠰᠢ ᠶᠠᠪᠤᠵᠤ᠂ ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠶ᠋ᠢ ᠪᠠᠷᠢᠵᠤ ᠢᠷᠡ! ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ》 ᠭᠡᠰᠡᠨ ᠳ᠋ᠦ᠍᠂ ᠬᠠᠲᠤᠨ᠂ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠬᠠᠷᠠᠵᠤ ᠦᠵᠡᠭᠡᠳ᠄《ᠴᠢ ᠶᠠᠮᠠᠷ ᠠᠶᠤᠮᠰᠢᠭ ᠦᠭᠡᠢ᠂ ᠮᠢᠨᠦ ᠰᠠᠨᠠᠭᠠᠨ ᠠ᠋ᠴᠠ ᠵᠥᠷᠢᠳᠡᠭ ᠪᠣᠢ᠃ ᠣᠳᠣ ᠬᠠᠲᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠦᠷᠡᠬᠡᠢ ᠶ᠋ᠢ ᠮᠡᠳᠡᠵᠦ ᠪᠣᠯᠤᠨᠠ》 ᠭᠡᠵᠦ ᠪᠣᠳᠣᠭᠰᠠᠨ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠠᠷᠭᠠ ᠦᠭᠡᠢ᠂ ᠡᠨᠡ ᠬᠠᠲᠤᠨ ᠤ᠋ ᠬᠣᠣᠷᠲᠤ ᠰᠠᠨᠠᠭᠠ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠥᠨᠳᠥᠷ ᠤᠷᠭᠠ ᠪᠠᠨ ᠠᠳᠬᠤᠵᠤ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠬᠤᠸᠠ ᠲᠣᠯᠣᠭᠠᠢ ᠶ᠋ᠢᠨ ᠡᠩᠭᠡᠷ ᠲᠦ᠍ ᠢᠷᠡᠭᠡᠳ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠬᠠᠳᠠ ᠶ᠋ᠢ ᠳᠡᠷᠡᠯᠡᠵᠦ ᠬᠥᠯ ᠢ᠋ᠶ᠋ᠡᠨ ᠵᠡᠭᠦᠨ ᠬᠠᠳᠠᠨ ᠤ᠋ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂ ᠠᠷᠠᠢ ᠪᠠᠬᠠᠨ ᠤᠨᠲᠠᠶᠠ ᠭᠡᠵᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠴᠢᠬᠢᠨ ᠳ᠋ᠦ᠍ᠨᠢ ᠶᠠᠭᠤ ᠬᠥᠮᠦᠨ ᠤᠬᠢᠯᠠᠵᠤ ᠪᠠᠢᠬᠤ ᠰᠢᠭ᠋ ᠢᠨᠢᠶᠡᠵᠦ ᠪᠠᠢᠬᠤ ᠰᠢᠭ᠋ ᠳᠠᠭᠤᠯᠠᠵᠤ ᠪᠠᠢᠬᠤ ᠰᠢᠭ᠋ ᠰᠣᠨᠣᠰᠳᠠᠵᠠᠢ᠃ ᠴᠢᠩᠭᠢᠭᠡᠳ ᠪᠣᠰᠴᠤ ᠦᠵᠡᠭᠰᠡᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠬᠠᠷᠠᠭᠳᠠᠬᠤ ᠦᠭᠡᠢ ᠳ᠋ᠦ᠍᠄《ᠡᠨᠡ ᠦᠵᠡᠭᠡ ᠦᠭᠡᠢ ᠬᠠᠷᠠ ᠬᠡᠭᠡᠷᠡ ᠭᠠᠵᠠᠷ ᠬᠡᠨ ᠢᠷᠡᠵᠦ ᠤᠬᠢᠯᠠᠵᠤ ᠳᠠᠭᠤᠯᠠᠬᠤ ᠪᠣᠢ》 ᠭᠡᠵᠦ ᠪᠣᠳᠣᠭᠠᠳ ᠳᠠᠬᠢᠨ ᠬᠡᠪᠲᠡᠭᠡᠳ ᠤᠨᠲᠠᠶᠠ ᠭᠡᠲᠡᠯᠡ᠂ ᠦᠨᠡᠬᠡᠷ ᠪᠠᠰᠠ ᠬᠥᠮᠦᠨ ᠤᠬᠢᠯᠠᠵᠤ ᠳᠠᠭᠤᠯᠠᠵᠤ᠂ᠢᠨᠢᠶᠡᠵᠦ ᠪᠠᠢᠬᠤ ᠲᠤᠯᠠ ᠠᠳᠤᠭᠤᠴᠢᠨ ᠬᠦᠦ ᠪᠣᠰᠤᠭᠠᠳ ᠮᠣᠷᠢ ᠪᠠᠨ ᠤᠨᠤᠵᠤ ᠬᠤᠸᠠ ᠲᠣᠯᠣᠭᠠᠢ ᠶ᠋ᠢ ᠳᠠᠪᠠᠵᠤ ᠭᠠᠷᠤᠭᠠᠳ ᠦᠵᠡᠭᠰᠡᠨ ᠳ᠋ᠦ᠍᠂ ᠨᠢᠭᠡᠨ ᠬᠠᠰ ᠴᠠᠭᠠᠨ ᠭᠡᠷ ᠲᠦ᠍᠂ ᠨᠢᠭᠡ ᠥᠬᠢᠨ ᠨᠢ ᠤᠬᠢᠯᠠᠵᠤ᠂ ᠪᠠᠰᠠ ᠨᠢᠭᠡ ᠥᠬᠢᠨ ᠨᠢ ᠳᠠᠭᠤᠯᠠᠵᠤ᠂ ᠭᠤᠷᠪᠠᠳᠤᠭᠠᠷ ᠥᠬᠢᠨ ᠨᠢ ᠢᠨᠢᠶᠡᠵᠦ ᠪᠠᠢᠨᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠣᠴᠢᠵᠤ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠡᠨᠡ ᠭᠤᠷᠪᠠᠨ ᠥᠬᠢᠨ ᠦ᠌ ᠬᠡᠯᠡᠭᠰᠡᠨ ᠨᠢ᠄《ᠪᠢᠳᠡ ᠭᠤᠷᠪᠠᠭᠤᠯᠠ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠨ ᠥᠬᠢᠨ ᠦ᠌ ᠬᠠᠮᠤᠭ ᠤ᠋ᠨ ᠪᠠᠭᠠ ᠭᠤᠷᠪᠠ ᠨᠢ ᠪᠢᠯᠡ᠃ ᠪᠢᠳᠡᠨ ᠦ᠌ ᠠᠷᠪᠠᠨ ᠡᠭᠡᠴᠢ ᠶ᠋ᠢ ᠠᠪᠤᠷᠭᠤ ᠮᠣᠭᠠᠢ ᠡᠳᠦᠷ ᠦ᠋ᠨ ᠨᠢᠭᠡ ᠵᠠᠯᠭᠢᠭᠰᠠᠭᠠᠷ ᠪᠠᠢᠭᠠᠳ ᠠᠷᠪᠠᠭᠤᠯᠠ ᠶ᠋ᠢ ᠴᠥᠮ ᠵᠠᠯᠭᠢᠪᠠ᠃ ᠣᠳᠣ ᠥᠨᠥᠳᠥᠷ ᠪᠠᠰᠠ ᠢᠷᠡᠨᠡ᠃ ᠲᠡᠢᠮᠦ ᠪᠣᠯᠬᠣᠷ᠂ ᠪᠢᠳᠡᠨ ᠦ᠌ ᠥᠨᠥᠳᠥᠷ ᠵᠠᠯᠭᠢᠭᠳᠠᠬᠤ ᠨᠢ ᠤᠬᠢᠯᠠᠵᠤ᠂ ᠮᠠᠷᠭᠠᠲᠠ ᠵᠠᠯᠭᠢᠭᠳᠠᠬᠤ ᠨᠢ ᠳᠠᠭᠤᠯᠠᠵᠤ᠂ ᠨᠥᠭᠥᠭᠡᠳᠦᠷ ᠵᠠᠯᠭᠢᠭᠳᠠᠬᠤ ᠨᠢ ᠢᠨᠢᠶᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠠᠰᠠᠭᠤᠭᠰᠠᠨ ᠨᠢ᠄《ᠲᠠᠨ ᠤ᠋ ᠡᠵᠢ ᠴᠢᠨᠢ ᠶᠠᠭᠤᠨ ᠳ᠋ᠤ᠌ ᠲᠠᠨ ᠢ᠋ ᠬᠠᠮᠠᠭᠠᠯᠠᠬᠤ ᠦᠭᠡᠢ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠥᠬᠢᠳ᠄《ᠡᠵᠢ ᠮᠢᠨᠢ ᠬᠡᠳᠦ ᠤᠳᠠᠭᠠ ᠠᠪᠤᠷᠭᠤ ᠮᠣᠭᠠᠢ ᠲᠠᠢ ᠲᠤᠯᠤᠯᠳᠤᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ》 ᠭᠡᠵᠦ ᠬᠡᠯᠡᠵᠡᠢ᠃
ᠢᠩᠭᠢᠵᠦ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠬᠠᠷᠠ ᠰᠠᠯᠬᠢ ᠰᠡᠷᠴᠢᠭᠢᠨᠡᠨ ᠪᠣᠰᠤᠭᠰᠠᠨ ᠢ᠋ ᠦᠵᠡᠭᠡᠳ᠂ ᠭᠤᠷᠪᠠᠭᠤᠯᠠ ᠪᠠᠨ ᠴᠢᠷᠠᠢ ᠵᠢᠰᠦ ᠨᠢ ᠬᠤᠪᠢᠷᠠᠵᠤ᠂ ᠥᠭᠡᠳᠡ ᠤᠷᠤᠭᠤ ᠪᠠᠨ ᠭᠦᠶᠦᠵᠦ᠂ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠶ᠋ᠢ ᠴᠢ ᠲᠦᠷᠭᠡᠨ ᠶᠠᠪᠤ᠂ ᠣᠳᠣ ᠠᠪᠤᠷᠭᠤ ᠮᠣᠭᠠᠢ ᠢᠷᠡᠵᠦ ᠪᠠᠢᠨᠠ᠃ ᠬᠡᠷᠪᠡ ᠴᠢ ᠳᠤᠲᠠᠭᠠᠬᠤ ᠦᠭᠡᠢ ᠪᠣᠯ ᠴᠢᠮᠠᠶ᠋ᠢ ᠴᠦ᠍ ᠪᠠᠰᠠ ᠪᠠᠷᠢᠵᠤ ᠵᠠᠯᠭᠢᠨᠠ ᠭᠡᠵᠦ᠂ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠱᠠᠭᠠᠷᠳᠠᠭᠰᠠᠭᠠᠷ ᠭᠠᠷᠭᠠᠭᠰᠠᠨ ᠳ᠋ᠤ᠌᠂ ᠠᠳᠤᠭᠤᠴᠢᠨ ᠬᠦᠦ ᠠᠭᠲᠠ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠠᠰ ᠬᠣᠢᠰᠢ ᠭᠠᠷᠴᠤ ᠬᠠᠷᠠᠭᠰᠠᠨ ᠳ᠋ᠤ᠌᠂ ᠤᠯᠠᠭᠠᠨ ᠲᠣᠭᠣᠰᠣ ᠳᠡᠭᠳᠡᠨ᠂ ᠠᠭᠤᠯᠠ ᠬᠠᠳᠠ ᠲᠦᠷᠴᠢᠭᠢᠨᠡᠵᠦ᠂ ᠤᠰᠤ ᠮᠥᠷᠡᠨ ᠴᠠᠯᠭᠢᠵᠤ ᠰᠠᠯᠬᠢᠨ ᠵᠢᠪᠠᠷ ᠳᠡᠭᠳᠡᠨ᠂ ᠨᠢᠭᠡ ᠶᠡᠬᠡ ᠠᠪᠤᠷᠭᠤ ᠮᠣᠭᠠᠢ ᠭᠤᠯᠭᠤᠨ ᠶᠠᠪᠤᠵᠤ ᠢᠷᠡᠵᠦ ᠪᠠᠢᠨᠠ ᠭᠡᠨᠡ᠃
ᠡᠭᠦᠨ ᠢ᠋ ᠦᠵᠡᠭᠡᠳ᠂ ᠭᠡᠨᠡᠳᠲᠡ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠳᠠᠪᠬᠢᠵᠤ᠂ ᠣᠢᠷᠠᠲᠤᠨ ᠣᠴᠢᠭᠠᠳ᠂ ᠥᠨᠳᠥᠷ ᠤᠷᠭᠠ ᠪᠠᠨ ᠭᠤᠶᠠᠳᠠᠵᠤ᠂ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠬᠠᠶᠠᠨ ᠣᠷᠣᠭᠤᠯᠤᠭᠠᠳ᠂ ᠬᠦᠴᠦᠨ ᠦ᠌ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠮᠤᠰᠬᠢᠵᠦ ᠬᠦᠳᠡᠷ ᠶᠡᠬᠡ ᠮᠣᠭᠠᠢ ᠶ᠋ᠢ ᠬᠥᠳᠡᠯᠭᠡᠬᠦ ᠦᠭᠡᠢ ᠪᠣᠭᠣᠮᠢᠯᠠᠭᠰᠠᠨ ᠳ᠋ᠤ᠌ ᠠᠪᠤᠷᠭᠤ ᠮᠣᠭᠠᠢ ᠪᠠᠴᠢᠮᠳᠠᠵᠤ᠂ ᠠᠮᠢ ᠲᠡᠮᠡᠴᠡᠨ ᠦᠰᠦᠷᠦᠭᠰᠡᠨ ᠳ᠋ᠦ᠍ ᠤᠷᠭᠠ ᠶ᠋ᠢᠨ ᠰᠢᠵᠢᠮ ᠦ᠋ᠨ ᠡᠷᠴᠢᠮ ᠨᠢ ᠴᠢᠩᠭᠠᠷᠠᠵᠤ ᠤᠷᠪᠠᠨ ᠬᠥᠷᠪᠡᠵᠦ ᠳᠤᠲᠠᠭᠠᠬᠤ ᠶ᠋ᠢᠨ ᠵᠠᠢ ᠦᠭᠡᠢ ᠪᠣᠯᠵᠤ᠂ ᠬᠡᠢ ᠠᠮᠢᠰᠬᠤᠭᠠ ᠨᠢ ᠪᠥᠭᠯᠡᠷᠡᠵᠦ᠂ ᠬᠡᠴᠡᠭᠦᠦ ᠰᠡᠭᠦᠯ ᠢ᠋ᠶ᠋ᠡᠨ ᠭᠤᠶᠠᠳᠠᠭᠰᠠᠭᠠᠷ ᠦᠬᠦᠪᠡ ᠭᠡᠨᠡ᠃
ᠴᠢᠩᠭᠢᠭᠡᠳ ᠡᠨᠡ ᠭᠤᠷᠪᠠᠨ ᠥᠬᠢᠨ ᠡᠭᠦᠨ ᠢ᠋ ᠦᠵᠡᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠳ᠋ᠦ᠍ ᠲᠠᠯᠠᠷᠬᠠᠨ᠂ ᠴᠠᠢ ᠬᠣᠭᠣᠯᠠ ᠥᠭᠴᠦ ᠶᠡᠬᠡ ᠪᠠᠶᠠᠷᠯᠠᠬᠤ ᠳ᠋ᠤ᠌᠂ ᠶᠡᠬᠡ ᠥᠬᠢᠨ ᠨᠢ ᠬᠡᠯᠡᠭᠰᠡᠨ ᠨᠢ᠄《ᠣᠳᠣ ᠮᠠᠨ ᠤ᠋ ᠡᠵᠢ ᠢᠷᠡᠬᠦ ᠰᠢᠬᠠᠪᠠ᠃ ᠮᠠᠨ ᠤ᠋ ᠡᠵᠢ ᠪᠣᠯ ᠠᠭᠤᠷ ᠲᠦᠷᠭᠡᠨ᠂ ᠬᠢᠯᠢᠩ ᠲᠣᠭᠰᠢᠨ ᠬᠥᠮᠦᠨ ᠶᠤᠮ᠃ ᠬᠡᠷᠪᠡ ᠴᠢ ᠡᠨᠳᠡ ᠪᠠᠢᠪᠠᠯ ᠴᠢᠮᠠᠶ᠋ᠢ ᠴᠣᠬᠢᠵᠤ ᠠᠯᠠᠬᠤ ᠳ᠋ᠤ᠌ ᠰᠠᠭᠠᠳ ᠦᠭᠡᠢ᠃ ᠴᠢ ᠤᠷᠲᠤ ᠬᠤᠸᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠨᠢᠭᠤᠵᠤ ᠪᠠᠢ᠃ ᠡᠵᠢ ᠢᠷᠡᠭᠰᠡᠨ ᠬᠣᠢᠨᠠ ᠪᠢᠳᠡ ᠤᠴᠢᠷ ᠢ᠋ ᠨᠢ ᠬᠡᠯᠡᠵᠦ ᠦᠵᠡᠶᠡ》 ᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠬᠤᠸᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠣᠴᠢᠭᠤᠯᠵᠤ ᠨᠢᠭᠤᠯᠭᠠᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠨᠢᠭᠤᠨ ᠰᠠᠭᠤᠵᠤ ᠪᠠᠢᠲᠠᠯᠠ᠂ ᠠᠰ ᠡᠮᠦᠨᠡ ᠡᠴᠡ ᠨᠢᠭᠡᠨ ᠬᠡᠰᠡᠭ ᠬᠠᠷᠠ ᠡᠭᠦᠯᠡ᠂ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠲᠦᠷᠭᠡᠨ ᠨᠢᠰᠴᠦ ᠢᠷᠡᠭᠡᠳ᠂ ᠡᠨᠡ ᠴᠠᠭᠠᠨ ᠭᠡᠷ ᠦ᠋ᠨ ᠳᠡᠭᠡᠭᠦᠷ ᠭᠤᠷᠪᠠ ᠡᠷᠭᠢᠵᠦ᠂ ᠬᠠᠷᠠ ᠡᠭᠦᠯᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠨᠢᠭᠡᠨ ᠬᠡᠰᠡᠭ ᠴᠠᠭᠠᠨ ᠡᠭᠦᠯᠡ ᠳᠡᠯᠪᠡᠯᠵᠡᠨ ᠭᠠᠷᠴᠤ ᠰᠢᠭᠤᠳ ᠳᠣᠷᠣᠭᠰᠢ ᠪᠠᠭᠤᠭᠠᠳ᠂ ᠴᠠᠭᠠᠨ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠨᠢ ᠨᠢᠰᠦᠨ ᠣᠷᠣᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠠᠨ ᠭᠠᠷᠤᠳᠢ ᠦᠵᠡᠭᠰᠡᠨ ᠳ᠋ᠦ᠍᠂ ᠦᠯᠡᠳᠡᠭᠰᠡᠨ ᠭᠤᠷᠪᠠᠨ ᠬᠡᠦᠬᠡᠨ ᠨᠢ ᠨᠢᠭᠡᠴᠦ ᠳᠤᠲᠠᠭᠤ ᠦᠭᠡᠢ ᠪᠥᠭᠡᠳ ᠶᠡᠬᠡᠯᠡ ᠪᠠᠶᠠᠷ ᠲᠠᠢ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠠᠪᠤᠷᠭᠤ ᠮᠣᠭᠠᠢ ᠢᠷᠡᠭᠰᠡᠨ ᠦᠭᠡᠢ ᠤᠤ? ᠭᠡᠵᠦ ᠠᠰᠠᠭᠤᠵᠠᠢ᠃ ᠥᠬᠢᠳ ᠨᠢ ᠬᠡᠯᠡᠭᠰᠡᠨ ᠨᠢ᠄《ᠡᠨᠡ ᠡᠳᠦᠷ ᠨᠢᠭᠡᠨ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠢᠷᠡᠵᠦ᠂ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢ ᠤᠷᠭᠠᠳᠠᠨ ᠪᠣᠭᠣᠮᠢᠯᠠᠵᠤ ᠠᠯᠠᠪᠠ》 ᠭᠡᠰᠡᠨ ᠳ᠋ᠦ᠍᠂ ᠬᠠᠨ ᠭᠠᠷᠤᠳᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠂ ᠲᠡᠷᠡ ᠠᠳᠤᠭᠤᠴᠢᠨ ᠵᠠᠯᠠᠭᠤ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠲᠠ ᠨᠠᠷ ᠬᠠᠷᠢᠨ ᠠᠮᠢ ᠪᠠᠨ ᠠᠪᠤᠷᠠᠭᠰᠠᠨ ᠬᠥᠮᠦᠨ ᠦ᠌ ᠪᠡᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠬᠤ ᠦᠭᠡᠢ ᠪᠡᠷ ᠬᠠᠮᠢᠭᠠᠰᠢ ᠶᠠᠪᠤᠭᠤᠯᠪᠠ? ᠭᠡᠰᠡᠨ ᠳ᠋ᠦ᠍᠄《ᠮᠥᠨ ᠡᠮᠦᠨᠡ ᠬᠤᠸᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢᠭᠤᠵᠤ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌᠄ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠬᠤᠷᠳᠤᠨ ᠠᠪᠴᠤ ᠢᠷᠡ ᠭᠡᠪᠡ᠃
ᠢᠩᠭᠢᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠬᠠᠨ ᠭᠠᠷᠤᠳᠢ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠭᠤᠯᠤᠭᠰᠠᠨ ᠳ᠋ᠤ᠌᠂ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ᠄《ᠬᠦᠦ ᠮᠢᠨᠢ ᠶᠡᠬᠡ ᠪᠠᠭᠠᠲᠤᠷ ᠪᠠᠢᠨᠠ᠃ ᠪᠢᠳᠡᠨ ᠦ᠌ ᠳᠠᠢᠰᠤᠨ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢ ᠠᠯᠠᠵᠤ᠂ ᠥᠬᠢᠳ ᠦ᠋ᠨ ᠮᠢᠨᠢ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ ᠳ᠋ᠤ᠌ ᠴᠢᠨᠢ᠂ ᠠᠴᠢ ᠶ᠋ᠢ ᠴᠢᠨᠢ ᠬᠠᠷᠢᠭᠤᠯᠠᠨᠠ᠃ ᠬᠦᠦ ᠮᠢᠨᠢ ᠠᠯᠢ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠪᠣᠢ? ᠠᠯᠤᠰ ᠤ᠋ᠨ ᠵᠣᠷᠢᠯᠭᠠ ᠶᠠᠭᠤᠨ ᠳ᠋ᠤ᠌ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ᠄《ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠶ᠋ᠢ ᠪᠠᠷᠢᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠬᠠᠨ ᠭᠠᠷᠤᠳᠢ᠄《ᠡᠨᠡ ᠬᠠᠷᠢᠨ ᠪᠡᠷᠬᠡᠲᠡᠢ ᠶᠠᠪᠤᠳᠠᠯ ᠪᠠᠢᠨᠠ᠃ ᠭᠡᠪᠡᠴᠦ ᠡᠵᠢ ᠨᠢ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠵᠤ ᠥᠭᠭᠦᠶᠡ》 ᠭᠡᠵᠦ ᠬᠡᠯᠡᠵᠡᠢ᠃
ᠲᠡᠭᠡᠭᠡᠳ ᠭᠤᠷᠪᠠᠨ ᠡᠳᠦᠷ ᠪᠡᠯᠡᠳᠬᠡᠯ ᠬᠢᠵᠦ᠂ ᠬᠠᠨ ᠭᠠᠷᠤᠳᠢ ᠨᠢᠭᠡᠨ ᠬᠠᠲᠠᠭᠤ ᠲᠡᠮᠦᠷ ᠳᠡᠭᠡᠭᠡ ᠬᠢᠵᠦ ᠠᠪᠤᠭᠠᠳ ᠬᠣᠶᠠᠭᠤᠯᠠ ᠪᠠᠨ ᠶᠠᠪᠤᠵᠤ᠂ ᠤᠳᠠᠭᠰᠠᠨ ᠦᠭᠡᠢ ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤᠨ ᠤ᠋ ᠨᠤᠲᠤᠭ ᠲᠤᠨᠢ ᠢᠷᠡᠵᠦ ᠦᠵᠡᠭᠰᠡᠨ ᠳ᠋ᠦ᠍᠂ ᠦᠨᠡᠬᠡᠷ ᠬᠣᠶᠠᠷ ᠬᠠᠷᠠ ᠠᠭᠤᠯᠠ ᠰᠢᠭ᠋ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃
ᠪᠤᠬᠠ ᠬᠠᠷᠠ ᠨᠣᠬᠠᠢ ᠨᠢ ᠪᠣᠯ᠂ ᠭᠠᠵᠠᠷ ᠳᠡᠭᠡᠭᠦᠷ ᠠᠮᠢᠲᠠᠨ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠠᠷᠢᠵᠤ ᠢᠳᠡᠳᠡᠭ ᠪᠥᠭᠡᠳ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠨᠢ ᠠᠭᠠᠷ ᠳᠡᠭᠡᠭᠦᠷ ᠵᠢᠭᠦᠷᠲᠡᠨ ᠨᠢᠰᠦᠭᠦᠯᠬᠦ ᠦᠭᠡᠢ ᠬᠥᠭᠡᠭᠡᠵᠦ ᠢᠳᠡᠳᠡᠭ ᠲᠤᠯᠠ᠂ ᠡᠳᠡ ᠬᠣᠶᠠᠭᠤᠯᠠ ᠠᠳᠤᠭᠤᠴᠢᠨ ᠬᠦᠦ᠂ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠢᠷᠡᠬᠦ ᠶ᠋ᠢ ᠣᠯᠵᠤ ᠦᠵᠡᠭᠡᠳ᠂ ᠰᠢᠪᠠᠭᠤ ᠨᠢ ᠬᠠᠷᠠ ᠰᠣᠯᠣᠩᠭᠠ ᠲᠠᠲᠠᠵᠤ᠂ ᠳᠡᠭᠡᠭᠰᠢ ᠪᠣᠰᠴᠤ ᠬᠠᠨ ᠭᠠᠷᠤᠳᠢ ᠶ᠋ᠢ ᠰᠢᠭᠤᠳ ᠨᠡᠬᠡᠨ ᠢᠷᠡᠬᠦ ᠳ᠋ᠦ᠍᠂ ᠬᠠᠨ ᠭᠠᠷᠤᠳᠢ ᠬᠠᠲᠠᠭᠤ ᠲᠡᠮᠦᠷ ᠳᠡᠭᠡᠭᠡ ᠪᠡᠷ ᠢ᠋ᠶ᠋ᠡᠨ ᠨᠢᠭᠡᠨᠲᠡ ᠭᠣᠬᠠᠳᠠᠵᠤ᠂ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠶ᠋ᠢ ᠪᠠᠷᠢᠵᠤ ᠠᠪᠤᠪᠠ᠃ ᠪᠤᠬᠠ ᠬᠠᠷᠠ ᠨᠣᠬᠠᠢ ᠨᠢ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠪᠠᠷᠢᠵᠤ ᠢᠳᠡᠬᠦ ᠪᠡᠷ ᠭᠦᠶᠦᠨ ᠢᠷᠡᠬᠦ ᠳ᠋ᠦ᠍᠂ ᠠᠳᠤᠭᠤᠴᠢᠨ ᠬᠦᠦ ᠠᠯᠠᠪᠬᠢᠵᠤ ᠴᠢᠬᠢᠳᠡᠨ ᠮᠣᠷᠳᠠᠭᠠᠳ ᠴᠣᠬᠢᠭᠰᠠᠭᠠᠷ ᠨᠣᠮᠣᠬᠠᠨ ᠪᠣᠯᠭᠠᠵᠤ ᠠᠪᠴᠠᠢ᠃
ᠲᠡᠭᠡᠭᠡᠳ ᠠᠳᠤᠭᠤᠴᠢᠨ ᠬᠦᠦ᠂ ᠬᠠᠨ ᠭᠠᠷᠤᠳᠢ ᠳ᠋ᠤ᠌ ᠬᠦᠨᠳᠦ ᠲᠠᠯᠠᠷᠬᠠᠯ ᠬᠢᠵᠦ ᠰᠠᠯᠤᠭᠠᠳ᠂ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠪᠠᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠵᠤ ᠪᠤᠬᠠ ᠬᠠᠷᠠ ᠨᠣᠬᠠᠢ ᠪᠠᠨ ᠳᠠᠭᠠᠭᠤᠯᠵᠤ᠂ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠢᠷᠡᠬᠦ ᠳ᠋ᠦ᠍᠂ ᠬᠠᠭᠠᠨ ᠨᠢ ᠰᠤᠷᠠᠭ ᠢ᠋ ᠨᠢ ᠰᠣᠨᠣᠰᠤᠭᠠᠳ᠂ ᠶᠡᠬᠡᠯᠡ ᠠᠶᠤᠵᠤ ᠡᠨᠡ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠬᠢᠭᠡᠳ ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠥᠮᠦᠨ ᠪᠠᠷᠢᠵᠤ ᠢᠳᠡᠳᠡᠭ᠃ ᠣᠳᠣ ᠶᠠᠭᠠᠬᠢᠬᠤ ᠪᠢᠯᠡ? ᠭᠡᠵᠦ ᠬᠠᠭᠠᠨ ᠦᠩᠬᠦᠯᠴᠡᠭ ᠢ᠋ᠶ᠋ᠡᠨ ᠬᠠᠭᠠᠷᠠᠲᠠᠯᠠ ᠠᠶᠤᠭᠠᠳ ᠰᠢᠷᠡᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ᠂ ᠤᠭᠤᠲᠠ ᠪᠠᠨ ᠡᠭᠦᠷᠴᠦ ᠳᠤᠲᠠᠭᠠᠨ ᠶᠠᠪᠤᠪᠠ ᠭᠡᠨᠡ᠃
ᠬᠠᠲᠤᠨ ᠨᠢ ᠬᠠᠮᠤᠭ ᠰᠠᠢᠬᠠᠨ ᠵᠠᠰᠠᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠴᠢᠮᠡᠭᠯᠡᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠶ᠋ᠢ ᠤᠭᠲᠤᠨ ᠢᠷᠡᠬᠦ ᠳ᠋ᠦ᠍ ᠪᠤᠬᠠ ᠬᠠᠷᠠ ᠨᠣᠬᠠᠢ ᠬᠢᠭᠡᠳ᠂ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠨᠢ ᠬᠠᠮᠲᠤ ᠪᠠᠷ ᠣᠴᠢᠵᠤ ᠬᠠᠲᠤᠨ ᠢ᠋ ᠨᠢ ᠬᠣᠶᠠᠷ ᠲᠡᠰᠢ ᠨᠢ ᠰᠠᠯᠭᠠᠵᠤ ᠢᠳᠡᠪᠡ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠳᠤᠭᠤᠴᠢᠨ ᠬᠦᠦ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ᠨᠢ ᠰᠠᠭᠤᠵᠤ᠂ ᠪᠤᠬᠠ ᠬᠠᠷᠠ ᠨᠣᠬᠠᠢ ᠪᠠᠷ ᠢ᠋ᠶ᠋ᠠᠨ ᠬᠣᠲᠠ ᠬᠠᠰᠢᠶᠠ ᠪᠠᠨ ᠰᠠᠬᠢᠭᠤᠯᠵᠤ᠂ ᠪᠤᠬᠠ ᠬᠠᠷᠠ ᠰᠢᠪᠠᠭᠤ ᠪᠠᠷ ᠢ᠋ᠶ᠋ᠠᠨ ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠬᠠᠷᠠᠭᠤᠯᠵᠤ᠂ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠨ ᠰᠠᠭᠤᠪᠠ ᠭᠡᠨᠡ᠃