ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤШидэт мэргэн шувуу
759ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ
ᠡᠷᠲᠡ ᠤᠷᠢᠳᠤ ᠨᠢᠭᠡᠨ ᠴᠠᠭ ᠲᠤ᠌᠂ ᠠᠷᠤ ᠬᠠᠩᠭᠠᠢ ᠠᠭᠤᠯᠠᠨ ᠳ᠋ᠤ᠌᠂ ᠰᠣᠳᠣ ᠰᠡᠴᠡᠨ ᠪᠥᠭᠡᠳ ᠬᠥᠮᠦᠨ ᠦ᠌ ᠦᠭᠡ ᠶᠠᠷᠢᠵᠤ ᠴᠢᠳᠠᠳᠠᠭ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠭᠡᠵᠦ ᠪᠠᠢᠭᠰᠠᠨ ᠭᠡᠨᠡ᠃
ᠴᠢᠩᠭᠢᠭᠡᠳ ᠲᠡᠭᠦᠨ ᠢ᠋ ᠬᠡᠳᠦᠢ ᠣᠯᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠡᠵᠡᠨ ᠪᠠ ᠵᠣᠭᠣᠰᠳᠠᠨ ᠨᠤᠭᠤᠳ ᠬᠥᠮᠦᠨ ᠵᠠᠷᠤᠵᠤ ᠶᠠᠪᠤᠭᠤᠯᠬᠤ ᠪᠤᠶᠤ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠦ᠍ ᠣᠴᠢᠵᠤ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠣᠯᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠭᠠᠷᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ᠂ ᠬᠠᠮᠢᠭᠠ ᠴᠤ᠌ ᠶᠠᠪᠤᠭᠰᠠᠨ ᠦᠭᠡᠢ᠃ ᠮᠥᠨ ᠯᠡ ᠲᠦᠮᠡᠨ ᠵᠢᠯ ᠦ᠋ᠨ ᠨᠠᠢᠭᠤᠭᠰᠠᠨ ᠰᠠᠢᠬᠠᠨ ᠨᠠᠮᠠᠭᠠᠲᠠᠢ ᠨᠠᠷᠠᠰᠤᠨ ᠮᠣᠳᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠵᠤ᠂ ᠭᠠᠩᠬᠤᠭᠰᠠᠨ ᠰᠠᠢᠬᠠᠨ ᠨᠠᠮᠠᠭᠠᠨ ᠳᠣᠲᠣᠷᠠ ᠨᠢ ᠭᠠᠩᠭᠠᠩ ᠰᠠᠢᠬᠠᠨ ᠬᠣᠭᠣᠯᠠᠢ ᠪᠠᠷ ᠢ᠋ᠶ᠋ᠠᠨ ᠳᠠᠭᠤᠯᠠᠵᠤ ᠵᠢᠷᠭᠢᠨ ᠰᠠᠭᠤᠵᠤ ᠪᠠᠢᠳᠠᠭ ᠭᠡᠨᠡ᠃
ᠴᠢᠩᠭᠢᠭᠡᠳ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠶ᠋ᠢ ᠪᠠᠷᠢᠨᠠ ᠭᠡᠵᠦ ᠶᠠᠪᠤᠭᠰᠠᠭᠠᠷ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠴᠢᠭᠡᠭᠡ ᠵᠣᠪᠠ ᠵᠠᠮ ᠭᠠᠷᠭᠠᠭᠰᠠᠨ ᠭᠡᠨᠡ᠃
ᠡᠨᠡ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠶ᠋ᠢ ᠵᠡᠭᠦᠨ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠭᠰᠡᠨ ᠢᠷᠲᠡᠭᠡᠷ ᠬᠠᠭᠠᠨ ᠰᠣᠨᠣᠰᠴᠤ᠂ ᠡᠨᠡ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠠᠮᠢᠲᠠᠨ ᠪᠣᠢ᠂ ᠬᠡᠨ ᠣᠴᠢᠪᠠᠴᠤ ᠬᠠᠭᠤᠷᠲᠠᠭᠳᠠᠨ ᠬᠠᠷᠢᠳᠠᠭ ᠭᠡᠨᠡ᠃ ᠪᠢ ᠣᠴᠢᠪᠠᠯ ᠶᠠᠭᠠᠬᠢᠭᠰᠠᠨ ᠴᠤ᠌ ᠠᠪᠴᠢᠷᠠᠵᠤ ᠴᠢᠳᠠᠨᠠ ᠭᠡᠳ ᠮᠣᠷᠳᠠᠨ ᠶᠠᠪᠤᠵᠤ ᠭᠡᠨᠡ᠃
ᠢᠷᠳᠡᠭᠡᠷ ᠬᠠᠭᠠᠨ ᠠᠷᠤ ᠬᠠᠩᠭᠠᠢ ᠳ᠋ᠤ᠌ ᠭᠠᠷᠴᠤ᠂ ᠲᠦᠮᠡᠨ ᠵᠢᠯ ᠦ᠋ᠨ ᠨᠠᠢᠭᠤᠭᠰᠠᠨ ᠰᠠᠢᠬᠠᠨ ᠨᠠᠮᠠᠭᠠᠲᠠᠢ ᠨᠠᠷᠠᠰᠤᠨ ᠮᠣᠳᠣᠨ ᠳᠣᠣᠷᠠ ᠬᠦᠷᠦᠭᠰᠡᠨ ᠳ᠋ᠦ᠍᠂ ᠥᠨᠥ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠳᠤᠲᠠᠭᠠᠬᠤ ᠦᠭᠡᠢ᠂ ᠦᠷᠭᠦᠬᠦ ᠦᠭᠡᠢ ᠨᠣᠮᠣᠬᠠᠨ ᠰᠢᠳᠤᠷᠭᠤ ᠪᠠᠷᠢᠭᠳᠠᠭᠰᠠᠨ ᠳ᠋ᠤ᠌ ᠢᠷᠳᠡᠭᠡᠷ ᠬᠠᠭᠠᠨ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠴᠢᠭᠡᠭᠡ ᠵᠣᠪᠠ ᠵᠠᠮ ᠢ᠋ᠶ᠋ᠠᠷ ᠨᠢ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠤᠨᠢ᠂ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠬᠡᠯᠡᠭᠰᠡᠨ ᠨᠢ᠄《ᠡᠷᠭᠢᠨ ᠬᠠᠭᠠᠨ ᠨᠠᠮᠠᠶ᠋ᠢ ᠪᠠᠷᠢᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠪᠢᠰᠢ᠂ ᠭᠠᠭᠴᠠᠬᠦ ᠲᠠ ᠨᠠᠮᠠᠶ᠋ᠢ ᠠᠪᠴᠤ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ ᠭᠡᠮᠰᠢᠵᠦ ᠪᠣᠯᠬᠤ ᠦᠭᠡᠢ ᠪᠥᠭᠡᠳ ᠶᠠᠭᠤ ᠴᠤ᠌ ᠳᠤᠤᠭᠠᠷᠬᠤ ᠦᠭᠡᠢ ᠳᠤᠭᠤᠢ ᠶᠠᠪᠤᠵᠤ ᠪᠠᠰᠠ ᠪᠣᠯᠬᠤ ᠦᠭᠡᠢ᠃ ᠦᠭᠡᠢ ᠪᠣᠯ ᠪᠢ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠨᠢᠰᠴᠦ ᠳᠤᠲᠠᠭᠠᠨᠠ᠃ ᠡᠢᠮᠦ ᠪᠣᠯᠬᠣᠷ ᠶᠠᠭᠤ ᠴᠤ᠌ ᠪᠣᠯᠪᠠ᠂ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠨᠢᠭᠡ ᠨᠢ ᠵᠠᠪᠠᠯ ᠦᠭᠡ ᠶᠠᠷᠢᠵᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍᠂ ᠢᠷᠲᠡᠭᠡᠷ ᠬᠠᠭᠠᠨ᠄ ᠵᠧ! ᠲᠡᠭᠡᠪᠡᠯ ᠴᠢ ᠨᠢᠭᠡ ᠦᠭᠡ ᠶᠠᠷᠢᠵᠤ ᠶᠠᠪᠤᠭᠠᠷᠠᠢ!》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ᠄《ᠵᠧ! ᠴᠢᠩᠭᠢᠪᠡᠯ ᠡᠵᠡᠨ ᠴᠢᠮᠠ ᠳ᠋ᠤ᠌ ᠨᠢᠭᠡᠨ ᠦᠯᠢᠭᠡᠷ ᠬᠡᠯᠡᠵᠦ ᠥᠭᠭᠦᠶᠡ》 ᠭᠡᠳ ᠦᠯᠢᠭᠡᠷ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠨᠢ᠄
《ᠲᠡᠷᠡ ᠨᠢᠭᠡᠨ ᠭᠠᠵᠠᠷ ᠲᠤ᠌ ᠨᠢᠭᠡᠨ ᠰᠠᠢᠨ ᠠᠩᠴᠢᠨ᠂ ᠨᠢᠭᠡᠨ ᠰᠠᠢᠨ ᠨᠣᠬᠠᠢ ᠲᠠᠢ ᠪᠠᠢᠵᠤ ᠭᠡᠨᠡ᠃ ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ ᠨᠣᠬᠠᠢ ᠪᠠᠨ ᠳᠠᠭᠠᠭᠤᠯᠵᠤ᠂ ᠠᠩ ᠬᠦᠷᠦᠭᠡ ᠬᠢᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌᠂ ᠠᠭᠤᠯᠠᠨ ᠤ᠋ ᠬᠠᠪᠴᠢᠯ ᠵᠠᠮ ᠳ᠋ᠤ᠌ ᠳᠦᠭᠦᠷᠡᠩ ᠮᠥᠩᠭᠥ ᠲᠡᠭᠡᠭᠡᠭᠰᠡᠨ ᠬᠠᠰᠠᠭ ᠲᠡᠷᠭᠡ ᠡᠪᠳᠡᠷᠡᠭᠡᠳ᠂ ᠡᠵᠡᠨ ᠨᠢ ᠠᠷᠭᠠ ᠪᠠᠨ ᠪᠠᠷᠠᠵᠤ ᠰᠠᠭᠤᠵᠤ ᠪᠠᠢᠵᠠᠢ᠃ ᠡᠭᠦᠨ ᠲᠡᠢ ᠠᠩᠴᠢᠨ ᠠᠭᠤᠯᠵᠠᠵᠤ᠂ ᠠᠮᠤᠷ ᠰᠠᠢᠨ ᠢ᠋ᠶ᠋ᠠᠨ ᠮᠡᠳᠡᠯᠴᠡᠨ᠂ ᠴᠣᠭ ᠭᠠᠵᠠᠷ ᠰᠠᠭᠤᠵᠤ᠂ ᠲᠠᠮᠠᠬᠢ ᠲᠡᠳᠡᠨ ᠪᠠᠢᠬᠤ ᠳ᠋ᠤ᠌᠂ ᠲᠡᠷᠭᠡᠨ ᠦ᠌ ᠡᠵᠡᠨ ᠬᠡᠯᠡᠭᠰᠡᠨ ᠨᠢ᠄《ᠠᠩᠴᠢᠨ ᠠᠪᠤᠭᠠᠢ ᠪᠢ ᠡᠨᠡ ᠤᠷᠲᠤ ᠠᠢᠯ ᠳ᠋ᠤ᠌ ᠣᠴᠢᠵᠤ ᠲᠡᠷᠭᠡᠨ ᠦ᠌ ᠳᠠᠷᠬᠠᠨ ᠳᠠᠭᠤᠳᠠᠵᠤ ᠢᠷᠡᠶᠡ᠃ ᠴᠢ ᠡᠨᠡ ᠰᠠᠢᠨ ᠨᠣᠬᠠᠢ ᠲᠠᠢ ᠪᠠᠨ ᠡᠨᠳᠡ ᠰᠠᠭᠤᠵᠤ ᠲᠡᠷᠭᠡ ᠶ᠋ᠢ ᠮᠢᠨᠢ ᠬᠠᠷᠠᠵᠤ ᠪᠠᠢ!》 ᠭᠡᠰᠡᠨ ᠳ᠋ᠦ᠍᠂ ᠠᠩᠴᠢᠨ ᠬᠥᠮᠦᠨ᠄ 《ᠵᠧ! ᠲᠡᠭᠡᠶᠡ ᠭᠡᠵᠦ ᠲᠡᠷᠭᠡ ᠶ᠋ᠢ ᠨᠢ ᠰᠠᠬᠢᠵᠤ ᠰᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠭᠡᠨ ᠦ᠌ ᠡᠵᠡᠨ ᠶᠡᠬᠡ ᠪᠠᠶᠠᠷᠯᠠᠵᠤ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠶᠠᠪᠤᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠩᠴᠢᠨ ᠣᠷᠣᠢ ᠪᠣᠯᠲᠠᠯᠠ ᠬᠦᠯᠢᠶᠡᠭᠡᠳ᠂ ᠲᠡᠷᠭᠡᠨ ᠦ᠌ ᠡᠵᠡᠨ ᠬᠠᠷᠢᠵᠤ ᠢᠷᠡᠬᠦ ᠦᠭᠡᠢ ᠳ᠋ᠦ᠍᠂ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠰᠠᠨ ᠨᠢ᠄ ᠬᠥᠭᠰᠢᠨ ᠡᠵᠢ ᠮᠢᠨᠢ ᠨᠢᠳᠦ ᠮᠠᠭᠤ᠃ ᠡᠷᠲᠡ ᠡᠴᠡ ᠣᠷᠣᠢ ᠪᠣᠯᠲᠠᠯᠠ ᠬᠣᠭᠣᠯᠠ ᠣᠯᠵᠤ ᠢᠳᠡᠭᠡ ᠦᠭᠡᠢ ᠰᠠᠭᠤᠵᠤ ᠪᠠᠢᠭᠠ ᠪᠠᠢᠬᠤ ᠭᠡᠳ᠂ ᠨᠣᠬᠠᠢ ᠳ᠋ᠤ᠌ ᠪᠠᠨ ᠬᠡᠯᠡᠭᠰᠡᠨ ᠨᠢ᠄《ᠴᠢ ᠡᠨᠡ ᠲᠡᠷᠭᠡ ᠶ᠋ᠢᠨ ᠡᠵᠡᠨ ᠢ᠋ ᠢᠷᠡᠲᠡᠯᠡ᠂ ᠡᠨᠳᠡ ᠰᠠᠬᠢᠵᠤ ᠪᠠᠢ! ᠬᠤᠯᠠᠭᠠᠢᠴᠢ ᠳ᠋ᠤ᠌ ᠪᠢᠲᠡᠭᠡᠢ ᠬᠣᠯᠭᠣᠭᠳᠠᠭᠲᠤᠨ! ᠪᠢ ᠬᠠᠷᠢᠵᠤ᠂ ᠡᠵᠢ ᠳ᠋ᠡᠭᠡᠨ ᠬᠣᠭᠣᠯᠠ ᠬᠢᠵᠦ ᠥᠭᠭᠦᠶᠡ》 ᠭᠡᠳ ᠪᠤᠴᠠᠵᠤ ᠶᠠᠪᠤᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠣᠬᠠᠢ ᠨᠢ ᠦᠨᠡᠨ ᠰᠢᠳᠤᠷᠭᠤ ᠪᠠᠷ ᠡᠵᠡᠨ ᠦ᠌ ᠪᠡᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠳᠠᠭᠠᠵᠤ᠂ ᠲᠡᠷᠭᠡᠨ ᠦ᠌ ᠦᠬᠡᠷ ᠢ᠋ ᠬᠣᠯᠠᠳᠠᠭᠤᠯᠬᠤ ᠦᠭᠡᠢ᠂ ᠡᠷᠭᠢᠨ ᠲᠣᠭᠣᠷᠢᠨ ᠶᠠᠪᠤᠵᠤ ᠦᠨᠡᠬᠡᠷ ᠨᠢᠭᠡᠨ ᠰᠠᠢᠨ ᠬᠠᠷᠠᠭᠤᠯ ᠰᠢᠭ᠋ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠪᠠᠢᠵᠤ ᠰᠥᠨᠢ ᠣᠷᠣᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠥᠨᠥ ᠲᠡᠷᠭᠡᠨ ᠦ᠌ ᠡᠵᠡᠨ ᠨᠢ ᠬᠡᠴᠢᠨᠡᠨ ᠠᠢᠯ ᠢ᠋ ᠬᠡᠰᠦᠵᠦ ᠳᠥᠩᠭᠡᠵᠢ ᠨᠢᠭᠡ ᠲᠡᠷᠭᠡᠨ ᠦ᠌ ᠳᠠᠷᠬᠠᠨ ᠣᠯᠵᠤ ᠬᠠᠷᠢᠵᠤ ᠢᠷᠡᠭᠡᠳ ᠦᠵᠡᠭᠰᠡᠨ ᠳ᠋ᠦ᠍ ᠠᠩᠴᠢᠨ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠣᠯᠵᠤ᠂ ᠭᠠᠭᠴᠠ ᠨᠣᠬᠠᠢ ᠨᠢ ᠰᠢᠳᠤᠷᠭᠤ ᠪᠠᠲᠤ ᠪᠠᠨ ᠰᠠᠬᠢᠵᠤ ᠲᠡᠷᠭᠡ ᠶ᠋ᠢ ᠨᠢ ᠬᠠᠮᠠᠭᠠᠯᠠᠵᠤ ᠪᠠᠢᠵᠠᠢ᠃ ᠲᠡᠷᠭᠡᠨ ᠦ᠌ ᠡᠵᠡᠨ ᠡᠭᠦᠨ ᠢ᠋ ᠦᠵᠡᠭᠡᠳ ᠦᠨᠡᠬᠡᠷ ᠰᠠᠢᠨ ᠨᠣᠬᠠᠢ ᠪᠠᠢᠨᠠ ᠭᠡᠳ᠂ ᠲᠠᠯᠠᠷᠬᠠᠯ ᠤ᠋ᠨ ᠮᠥᠩᠭᠥ ᠭᠡᠵᠦ ᠨᠣᠬᠠᠢ ᠳ᠋ᠤ᠌ ᠨᠢᠭᠡᠨ ᠬᠡᠰᠡᠭ ᠮᠥᠩᠭᠥ ᠡᠮᠬᠦᠭᠦᠯᠵᠦ ᠬᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌᠂ ᠡᠵᠡᠨ ᠨᠢ ᠡᠭᠦᠳᠡᠨ ᠳ᠋ᠡᠭᠡᠨ ᠵᠣᠭᠰᠣᠵᠤ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠲᠤᠯᠠ᠂ ᠳᠠᠷᠤᠢ ᠠᠭᠤᠯᠵᠠᠭᠠᠳ ᠡᠮᠬᠦᠭᠰᠡᠨ ᠮᠥᠩᠭᠥ ᠪᠡᠨ ᠭᠠᠵᠠᠷ ᠲᠠᠯᠪᠢᠭᠰᠠᠨ ᠳ᠋ᠤ᠌᠂ ᠠᠩᠴᠢᠨ ᠳᠣᠲᠣᠷᠠ ᠪᠠᠨ ᠶᠡᠬᠡ ᠭᠣᠮᠣᠳᠠᠵᠤ ᠠᠭᠤᠷᠯᠠᠵᠤ᠄《ᠪᠢ ᠬᠠᠷᠢᠨ ᠬᠥᠮᠦᠨ ᠦ᠌ ᠡᠳ᠋ ᠢ᠋ ᠰᠠᠢᠬᠠᠨ ᠰᠠᠬᠢᠵᠤ ᠥᠭ! ᠭᠡᠰᠡᠨ ᠳ᠋ᠦ᠍ ᠡᠨᠡ ᠠᠮᠢᠲᠠᠨ ᠬᠠᠷᠢᠨ ᠬᠥᠮᠦᠨ ᠦ᠌ ᠮᠥᠩᠭᠥ ᠶ᠋ᠢ ᠬᠤᠯᠠᠭᠠᠢᠯᠠᠵᠤ ᠢᠷᠡᠪᠡ》 ᠭᠡᠳ ᠰᠢᠳᠡᠮ ᠠᠪᠴᠤ ᠨᠣᠬᠠᠢ ᠪᠠᠨ ᠴᠣᠬᠢᠨ ᠠᠯᠠᠴᠢᠪᠠ》 ᠭᠡᠰᠡᠨ ᠳ᠋ᠦ᠍
ᠢᠷᠲᠡᠭᠡᠷ ᠬᠠᠭᠠᠨ᠄ 《ᠢᠰᠢ! ᠶᠠᠮᠠᠷ ᠠᠯᠠᠮᠠᠷ ᠲᠠᠢ ᠬᠡᠷᠡᠭ ᠪᠣᠢ! ᠡᠢᠮᠦ ᠰᠠᠢᠨ ᠨᠣᠬᠠᠢ ᠶ᠋ᠢ ᠡᠨᠳᠡᠭᠦᠦ ᠠᠯᠠᠪᠠ》 ᠭᠡᠵᠦ ᠭᠡᠮᠰᠢᠭᠰᠡᠨ ᠳ᠋ᠦ᠍᠂ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ᠄ ᠵᠧ ᠴᠢ ᠭᠡᠮᠰᠢᠪᠡ ᠭᠡᠵᠦ ᠬᠡᠯᠡᠮᠡᠭᠴᠡ ᠪᠦᠷ ᠬᠢᠲᠡᠯᠡ ᠨᠢᠰᠦᠭᠡᠳ ᠶᠠᠪᠤᠴᠢᠬᠠᠪᠠ᠃
ᠲᠡᠭᠡᠭᠡᠳ ᠢᠷᠳᠡᠭᠡᠷ ᠬᠠᠭᠠᠨ᠄《ᠠᠢ! ᠪᠢ ᠶᠠᠭᠤᠨ ᠳ᠋ᠤ᠌ ᠭᠡᠮᠰᠢᠵᠦ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠰᠠᠬᠢᠯ ᠢ᠋ ᠠᠯᠳᠠᠪᠠ》 ᠭᠡᠵᠦ ᠪᠡᠶᠡ ᠳ᠋ᠡᠭᠡᠨ ᠭᠣᠮᠣᠳᠠᠭᠠᠳ ᠳᠠᠬᠢᠨ ᠠᠷᠤ ᠬᠠᠩᠭᠠᠢ ᠳ᠋ᠤ᠌ ᠪᠤᠴᠠᠵᠤ ᠣᠴᠢᠭᠠᠳ᠂ ᠥᠨᠥ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ᠄《ᠵᠧ! ᠣᠳᠣ ᠪᠠᠰᠠ ᠨᠢᠭᠡᠨ ᠦᠯᠢᠭᠡᠷ ᠬᠡᠯᠡᠵᠦ ᠥᠭᠭᠦᠶᠡ》 ᠭᠡᠳ ᠬᠡᠯᠡᠭᠰᠡᠨ ᠨᠢ᠄
《ᠲᠡᠷᠡ ᠨᠢᠭᠡᠨ ᠭᠠᠵᠠᠷ᠂ ᠨᠢᠭᠡᠨ ᠪᠦᠰᠡᠭᠦᠢ᠂ ᠨᠢᠭᠡᠨ ᠰᠠᠢᠨ ᠮᠤᠤᠷ ᠲᠠᠢ ᠪᠠᠢᠵᠤ ᠭᠡᠨᠡ᠃ ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ᠂ ᠥᠨᠥ ᠪᠦᠰᠡᠭᠦᠢ ᠬᠤᠤᠳᠤᠭ ᠳᠡᠭᠡᠷᠡ ᠣᠴᠢᠬᠤ ᠳ᠋ᠠᠭᠠᠨ ᠮᠤᠤᠷ ᠲᠠᠭᠠᠨ ᠵᠠᠬᠢᠭᠰᠠᠨ ᠨᠢ᠄《ᠴᠢ ᠥᠯᠥᠭᠡᠢ ᠲᠡᠢ ᠪᠢᠴᠢᠬᠠᠨ ᠬᠦᠦ ᠶ᠋ᠢ ᠮᠢᠨᠢ᠂ ᠰᠠᠢᠬᠠᠨ ᠬᠠᠷᠠᠵᠤ ᠪᠠᠢ!》 ᠭᠡᠳ ᠤᠰᠤᠨ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠮᠤᠤᠷ ᠨᠢ ᠥᠯᠥᠭᠡᠢ ᠶ᠋ᠢᠨ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠢᠯᠠᠭᠠ ᠪᠠᠲᠠᠭᠠᠨᠠ ᠶ᠋ᠢ ᠬᠥᠭᠡᠵᠦ ᠪᠠᠢᠭᠰᠠᠨ ᠳ᠋ᠤ᠌ ᠭᠡᠨᠡᠳᠲᠡ ᠡᠭᠦᠳᠡᠨ ᠦ᠌ ᠠᠷᠤ ᠠ᠋ᠴᠠ ᠨᠢᠭᠡᠨ ᠪᠦᠳᠦᠭᠦᠨ ᠬᠤᠯᠤᠭᠠᠨᠠ ᠭᠠᠷᠴᠤ ᠢᠷᠡᠭᠡᠳ᠂ ᠪᠢᠴᠢᠬᠠᠨ ᠬᠦᠦ ᠶ᠋ᠢᠨ ᠴᠢᠬᠢ ᠶ᠋ᠢ ᠢᠳᠡᠬᠦ ᠪᠡᠷ ᠮᠢᠷᠠᠭᠰᠠᠨ ᠳ᠋ᠤ᠌ ᠮᠤᠤᠷ ᠶᠡᠬᠡ ᠠᠭᠤᠷᠯᠠᠵᠤ ᠬᠤᠯᠤᠭᠠᠨᠠ ᠶ᠋ᠢ ᠬᠥᠭᠡᠭᠡᠵᠦ ᠭᠠᠳᠠᠭᠰᠢ ᠭᠠᠷᠤᠭᠰᠠᠨ ᠬᠣᠭᠣᠷᠣᠨᠳᠣ᠂ ᠪᠠᠰᠠ ᠨᠢᠭᠡ ᠪᠦᠳᠦᠭᠦᠨ ᠬᠤᠯᠤᠭᠠᠨᠠ ᠭᠠᠷᠴᠤ ᠢᠷᠡᠭᠡᠳ᠂ ᠪᠢᠴᠢᠬᠠᠨ ᠬᠦᠦ ᠶ᠋ᠢᠨ ᠥᠷᠥᠭᠡᠰᠦᠨ ᠴᠢᠬᠢ ᠶ᠋ᠢ ᠨᠢ ᠲᠠᠰᠤ ᠬᠠᠵᠠᠵᠤ ᠠᠪᠤᠭᠰᠠᠨ ᠳ᠋ᠤ᠌᠂ ᠪᠢᠴᠢᠬᠠᠨ ᠬᠦᠦ ᠡᠪᠡᠳᠬᠦ ᠳ᠋ᠡᠭᠡᠨ ᠤᠬᠢᠯᠠᠵᠢ᠃ ᠬᠤᠯᠤᠭᠠᠨᠠ ᠶ᠋ᠢ ᠬᠥᠭᠡᠭᠡᠵᠦ ᠪᠠᠢᠭᠰᠠᠨ ᠮᠤᠤᠷ ᠶᠡᠬᠡ ᠰᠣᠴᠢᠵᠤ ᠡᠷᠭᠢᠨ ᠣᠷᠣᠵᠤ ᠢᠷᠡᠭᠡᠳ᠂ ᠲᠡᠷᠡ ᠪᠦᠳᠦᠭᠦᠨ ᠬᠤᠯᠤᠭᠠᠨᠠ ᠶ᠋ᠢ ᠡᠭᠦᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠬᠠᠵᠠᠵᠤ ᠠᠯᠠᠭᠠᠳ᠂ ᠪᠢᠴᠢᠬᠠᠨ ᠬᠦᠦ ᠶ᠋ᠢᠨ ᠴᠢᠬᠢᠨ ᠦ᠌ ᠴᠢᠰᠤ ᠶ᠋ᠢ ᠨᠢ ᠲᠤᠯᠤᠭᠠᠳ ᠰᠠᠭᠠᠲᠠᠭᠤᠯᠵᠤ ᠪᠠᠢᠵᠠᠢ᠃ ᠥᠨᠥ ᠪᠦᠰᠡᠭᠦᠢ ᠣᠷᠣᠵᠤ ᠢᠷᠡᠵᠦ ᠦᠵᠡᠭᠡᠳ᠂ ᠮᠠᠰᠢ ᠶᠡᠬᠡ ᠠᠭᠤᠷᠯᠠᠭᠠᠳ᠄《ᠡᠨᠡ ᠮᠠᠭᠤ ᠮᠤᠤᠷ ᠬᠦᠦ ᠶ᠋ᠢ ᠮᠢᠨᠢ ᠰᠠᠬᠢᠵᠤ ᠪᠠᠢ! ᠭᠡᠰᠡᠨ ᠳ᠋ᠦ᠍ ᠬᠠᠷᠢᠨ ᠮᠠᠭᠤ ᠰᠡᠳᠬᠢᠯ ᠭᠠᠷᠭᠠᠵᠤ᠂ ᠬᠥᠪᠡᠭᠦᠨ ᠦ᠌ ᠮᠢᠨᠢ ᠴᠢᠬᠢ ᠶ᠋ᠢ ᠢᠳᠡᠪᠡ ᠭᠡᠵᠦ᠂ ᠴᠣᠬᠢᠨ ᠠᠯᠠᠭᠠᠳ ᠬᠣᠢᠰᠢ ᠬᠠᠷᠠᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠡᠭᠦᠳᠡᠨ ᠦ᠌ ᠠᠷᠤ ᠳ᠋ᠤᠨᠢ ᠨᠢᠭᠡᠨ ᠪᠦᠳᠦᠭᠦᠨ ᠬᠤᠯᠤᠭᠠᠨᠠ ᠪᠢᠴᠢᠬᠠᠨ ᠬᠦᠦ ᠶ᠋ᠢᠨ ᠴᠢᠬᠢ ᠶ᠋ᠢ ᠡᠮᠬᠦᠵᠦ ᠦᠬᠦᠭᠰᠡᠨ ᠢ᠋ ᠦᠵᠡᠭᠡᠳ ᠰᠠᠢ ᠮᠤᠤᠷ ᠢ᠋ᠶ᠋ᠠᠨ ᠡᠨᠳᠡᠭᠦᠦ ᠠᠯᠠᠪᠠ ᠭᠡᠵᠦ ᠤᠬᠢᠯᠠᠪᠠ》 ᠭᠡᠰᠡᠨ ᠳ᠋ᠦ᠍᠂
ᠢᠷᠲᠡᠭᠡᠷ ᠬᠠᠭᠠᠨ᠄《ᠠᠢ! ᠶᠠᠮᠠᠷ ᠬᠥᠭᠡᠷᠦᠬᠦᠢ ᠶᠤᠮ ᠪᠠᠢ!》 ᠭᠡᠵᠦ ᠭᠡᠮᠰᠢᠭᠰᠡᠨ ᠳ᠋ᠦ᠍ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠪᠦᠷ ᠭᠡᠵᠦ ᠨᠢᠰᠦᠨ ᠶᠠᠪᠤᠴᠢᠪᠠ᠃
ᠴᠢᠩᠭᠢᠭᠡᠳ ᠢᠷᠲᠡᠭᠡᠷ ᠬᠠᠭᠠᠨ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠠᠷᠤ ᠬᠠᠩᠭᠠᠢ ᠳ᠋ᠤ᠌ ᠭᠠᠷᠴᠤ᠂ ᠲᠦᠮᠡᠨ ᠵᠢᠯ ᠦ᠋ᠨ ᠨᠠᠷᠠᠰᠤᠨ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠶ᠋ᠢ ᠪᠠᠷᠢᠵᠤ ᠴᠢᠭᠡᠭᠡ ᠵᠣᠪᠠ ᠵᠠᠮ ᠢ᠋ᠶ᠋ᠠᠷ ᠪᠤᠴᠠᠵᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠪᠠᠰᠠ ᠨᠢᠭᠡ ᠦᠯᠢᠭᠡᠷ ᠬᠡᠯᠡᠭᠰᠡᠨ ᠨᠢ᠄
《ᠲᠡᠷᠡ ᠨᠢᠭᠡᠨ ᠵᠢᠯ ᠪᠣᠷᠣᠭᠠᠨ ᠤᠰᠤ ᠬᠣᠪᠣᠷ ᠪᠣᠯᠵᠤ᠂ ᠭᠠᠵᠠᠷ ᠳᠡᠯᠡᠬᠡᠢ ᠭᠠᠩᠳᠠᠵᠤ᠂ ᠭᠠᠮᠰᠢᠭ ᠶᠡᠬᠡ ᠲᠣᠬᠢᠶᠠᠯᠳᠤᠭᠰᠠᠨ ᠳ᠋ᠤ᠌᠂ ᠠᠷᠪᠠᠢ ᠨᠡᠷᠡ ᠲᠡᠢ ᠬᠥᠮᠦᠨ ᠭᠠᠮᠰᠢᠭ ᠠ᠋ᠴᠠ ᠵᠠᠢᠯᠠᠵᠤ᠂ ᠭᠠᠢᠭᠤᠢ ᠨᠢᠭᠡᠨ ᠭᠠᠵᠠᠷ ᠣᠴᠢᠵᠤ ᠠᠮᠤᠷ ᠰᠠᠢᠬᠠᠨ ᠠᠮᠢᠳᠤᠷᠠᠶᠠ ᠭᠡᠳ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠭᠠᠷᠴᠤ ᠠᠯᠬᠤᠭᠤᠯᠤᠨ ᠭᠢᠰᠬᠢᠵᠦ ᠶᠠᠪᠤᠭᠰᠠᠭᠠᠷ᠂ ᠠᠭᠠᠷ ᠤ᠋ᠨ ᠨᠠᠷᠠᠨ ᠳ᠋ᠤ᠌ ᠰᠢᠷᠠᠭᠳᠠᠵᠤ ᠠᠮᠠᠨ ᠬᠣᠭᠣᠯᠠᠢ ᠨᠢ ᠬᠠᠲᠠᠵᠤ᠂ ᠠᠷᠭᠠ ᠦᠭᠡᠢ ᠶᠡᠬᠡ ᠠᠩᠭᠠᠵᠤ᠂ ᠶᠠᠪᠤᠬᠤ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠵᠤ᠂ ᠥᠨᠳᠥᠷ ᠨᠢᠭᠡᠨ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠦᠬᠦᠬᠦ ᠪᠡᠷ ᠬᠦᠯᠢᠶᠡᠵᠦ ᠰᠠᠭᠤᠭᠰᠠᠨ ᠳ᠋ᠤ᠌᠂ ᠬᠠᠵᠠᠭᠤ ᠲᠠᠯᠠ ᠳ᠋ᠤᠨᠢ ᠲᠤᠰ ᠲᠤᠰ ᠬᠢᠵᠦ᠂ ᠬᠠᠳᠠᠨ ᠤ᠋ ᠣᠷᠣᠢ ᠠ᠋ᠴᠠ ᠨᠢᠭᠡᠨ ᠳᠤᠰᠤᠯ ᠨᠢᠭᠡᠨ ᠳᠤᠰᠤᠯ ᠢ᠋ᠶ᠋ᠠᠷ ᠤᠰᠤ ᠲᠤᠰᠤᠯᠵᠤ ᠪᠠᠢᠵᠠᠢ᠃ ᠡᠭᠦᠨ ᠢ᠋ ᠠᠷᠪᠠᠢ ᠨᠡᠷᠡᠲᠦ ᠦᠵᠡᠭᠡᠳ᠂ ᠠᠰᠤᠷᠤ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠲᠠᠭᠱᠠ ᠠᠶᠠᠭᠠ ᠪᠠᠨ ᠭᠠᠷᠭᠠᠵᠤ᠂ ᠲᠣᠰᠴᠤ ᠠᠪᠤᠭᠠᠳ ᠠᠷᠠᠢ ᠭᠡᠵᠦ ᠨᠢᠭᠡ ᠠᠶᠠᠭᠠ ᠪᠣᠯᠭᠠᠵᠤ᠂ ᠳᠥᠩᠭᠡᠵᠢ ᠤᠤᠭᠤᠶᠠ ᠭᠡᠲᠡᠯᠡ ᠭᠡᠨᠡᠳᠲᠡ ᠨᠢᠭᠡᠨ ᠬᠡᠷᠢᠶᠡ ᠨᠢᠰᠦᠨ ᠢᠷᠡᠵᠦ ᠠᠷᠪᠠᠢ ᠶ᠋ᠢᠨ ᠠᠶᠠᠭᠠ ᠶ᠋ᠢ ᠳᠠᠯᠠᠪᠴᠢ ᠪᠠᠷ ᠢ᠋ᠶ᠋ᠠᠨ ᠴᠣᠬᠢᠵᠤ ᠲᠠᠭᠱᠠ ᠠᠶᠠᠭᠠ ᠲᠠᠢ ᠤᠰᠤ ᠶ᠋ᠢ ᠨᠢ ᠪᠦᠷ ᠠᠰᠬᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍᠂ ᠠᠷᠪᠠᠢ ᠨᠡᠷᠡᠲᠦ᠂ ᠠᠭᠤᠷ ᠨᠢ ᠶᠡᠬᠡ ᠬᠦᠷᠴᠦ᠂ ᠨᠠᠢ᠍ᠮᠠᠢ ᠥᠷᠥᠰᠢᠶᠡᠨ ᠤᠰᠤ ᠲᠤᠰᠠᠯᠠᠵᠤ ᠬᠠᠢᠷᠠᠯᠠᠭᠰᠠᠨ ᠢ᠋ ᠡᠨᠡ ᠮᠠᠭᠤ ᠬᠠᠷᠠ ᠠᠮᠢᠲᠠᠨ᠂ ᠬᠠᠭᠰᠠᠭᠰᠠᠨ ᠬᠥᠮᠦᠨ ᠢ᠋ ᠠᠪᠤᠷᠠᠬᠤ ᠦᠭᠡᠢ ᠭᠡᠵᠦ ᠪᠦᠳᠦᠭᠦᠨ ᠴᠢᠯᠠᠭᠤ ᠠᠳᠬᠤᠵᠤ᠂ ᠨᠡᠬᠡᠵᠦ ᠬᠥᠭᠡᠭᠡᠨ ᠣᠴᠢᠵᠤ᠂ ᠨᠢᠭᠡᠨᠲᠡ ᠴᠣᠬᠢᠨ ᠠᠯᠠᠭᠠᠳ ᠳᠡᠭᠡᠷᠡ ᠨᠢ ᠣᠴᠢᠵᠤ ᠦᠵᠡᠭᠰᠡᠨ ᠳ᠋ᠦ᠍ ᠬᠡᠷᠢᠶᠡ ᠶ᠋ᠢᠨ ᠤᠨᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠬᠣᠯᠠ ᠦᠭᠡᠢ᠂ ᠴᠢᠨᠠᠭᠰᠢ ᠶᠠᠪᠤᠬᠤ ᠵᠠᠮ ᠠ᠋ᠴᠠ ᠨᠢ ᠣᠢᠷᠠᠬᠠᠨ ᠬᠠᠳᠠᠨ ᠤ᠋ ᠴᠢᠯᠠᠭᠤᠨ ᠵᠠᠪᠰᠠᠷ ᠠ᠋ᠴᠠ ᠬᠦᠢᠲᠡᠨ ᠤᠰᠤ ᠣᠷᠭᠢᠯᠤᠨ ᠤᠷᠤᠰᠴᠤ ᠭᠠᠷᠤᠭᠠᠳ᠂ ᠳᠡᠭᠡᠷᠡ ᠨᠦᠬᠡᠨ ᠡᠴᠡ ᠨᠢ ᠭᠠᠷᠴᠤ ᠳᠣᠣᠷᠠ ᠨᠦᠬᠡᠨ ᠳ᠋ᠡᠭᠡᠨ ᠣᠷᠣᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠦᠨᠡᠬᠡᠷ ᠶᠡᠬᠡ ᠪᠠᠶᠠᠷᠯᠠᠵᠤ ᠬᠠᠨᠲᠠᠯᠠ ᠤᠰᠤ ᠤᠤᠭᠤᠭᠠᠳ ᠡᠷᠭᠢᠨ ᠪᠣᠰᠤᠭᠠᠳ ᠰᠠᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠢᠷᠡᠵᠦ ᠪᠣᠭᠣᠳᠠᠯᠲᠠᠢ ᠶᠠᠭᠤᠮᠠ ᠪᠠᠨ ᠠᠪᠤᠶᠠ ᠭᠡᠵᠦ ᠳᠡᠭᠡᠭᠰᠢ ᠬᠠᠷᠠᠨ ᠦᠵᠡᠭᠰᠡᠨ ᠳ᠋ᠦ᠍ ᠬᠠᠳᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠠᠪᠤᠷᠭᠤ ᠮᠣᠭᠠᠢ ᠬᠡᠪᠲᠡᠵᠦ᠂ ᠠᠮᠢᠰᠤᠭᠠ ᠲᠡᠳᠡᠨ ᠤᠨᠲᠠᠵᠤ᠂ ᠬᠣᠣᠷᠲᠤ ᠬᠡᠯᠡ ᠪᠡᠨ ᠤᠨᠵᠠᠢᠯᠭᠠᠨ ᠰᠢᠯᠦᠰᠦ ᠪᠡᠨ ᠳᠣᠷᠣᠭᠰᠢ ᠲᠤᠰᠤᠯᠭᠠᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠄《ᠠ! ᠮᠢᠨᠦ ᠲᠤᠰᠤᠭᠰᠠᠨ ᠤᠰᠤ ᠴᠢᠨᠢ ᠡᠭᠦᠨ ᠦ᠌ ᠰᠢᠯᠦᠰᠦ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠡᠳ᠂ ᠬᠡᠷᠢᠶᠡ ᠮᠢᠨᠦ ᠠᠮᠢ ᠶ᠋ᠢ ᠠᠪᠤᠷᠠᠪᠠ》 ᠭᠡᠵᠦ ᠬᠡᠷᠢᠶᠡ ᠠᠯᠠᠭᠰᠠᠨ ᠢ᠋ᠶ᠋ᠠᠨ ᠭᠡᠮᠰᠢᠵᠦ ᠤᠬᠢᠯᠠᠪᠠ》 ᠭᠡᠰᠡᠨ ᠳ᠋ᠦ᠍᠂
ᠢᠷᠲᠡᠭᠡᠷ ᠬᠠᠭᠠᠨ《ᠠᠢ! ᠬᠡᠷᠢᠶᠡ ᠦᠨᠡᠬᠡᠷ ᠬᠥᠭᠡᠷᠦᠬᠦᠢ᠂ ᠲᠡᠭᠦᠨ ᠦ᠌ ᠰᠠᠢᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠬᠥᠮᠦᠨ ᠢ᠋ ᠲᠤᠰᠠᠯᠠᠵᠤ ᠠᠮᠢ ᠪᠠᠨ ᠪᠠᠷᠠᠪᠠ》 ᠭᠡᠰᠡᠨ ᠳ᠋ᠦ᠍
ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ᠂ ᠴᠢ ᠪᠠᠰᠠ ᠭᠡᠮᠰᠢᠪᠡ ᠭᠡᠵᠦ ᠬᠡᠯᠡᠭᠡᠳ ᠨᠢᠰᠦᠨ ᠬᠠᠷᠢᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠢᠷᠲᠡᠭᠡᠷ ᠬᠠᠭᠠᠨ᠂ ᠰᠢᠳᠢᠲᠦ ᠮᠡᠷᠭᠡᠨ ᠰᠢᠪᠠᠭᠤ ᠶ᠋ᠢ ᠶᠡᠷᠦ ᠪᠠᠷᠢᠨᠠ ᠭᠡᠵᠦ ᠴᠢᠭᠡᠭᠡ ᠵᠣᠪᠠ ᠵᠠᠮ ᠭᠠᠷᠭᠠᠪᠠ ᠭᠡᠰᠡᠨ ᠨᠢ ᠢᠩᠭᠢᠵᠦ ᠭᠠᠷᠭᠠᠭᠰᠠᠨ ᠠᠴᠢ ᠭᠡᠵᠦ᠄ ᠵᠧ ᠪᠣᠯᠢᠶᠠ ᠡᠭᠦᠨ ᠢ᠋ ᠪᠠᠷᠢᠵᠤ ᠬᠠᠷᠢᠬᠤ ᠬᠡᠷᠡᠭ ᠦᠨᠡᠬᠡᠷ ᠪᠦᠲᠦᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠭᠡᠷ ᠲᠡᠭᠡᠨ ᠬᠠᠷᠢᠪᠠ ᠭᠡᠨᠡ᠃