ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢАрчъя сайдын тайж
360 ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠬᠡᠳᠦᠢᠨ ᠬᠡᠳᠦᠢᠨ ᠴᠠᠭ ᠲᠤ᠌᠂ ᠠᠷᠴᠢᠶᠠ ᠭᠡᠳᠡᠭ ᠨᠡᠷᠡ ᠲᠡᠢ ᠨᠢᠭᠡ ᠰᠠᠢᠳ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠰᠠᠢᠳ ᠨᠢᠭᠡ ᠲᠠᠢᠵᠢ ᠲᠠᠢ ᠶᠤᠮ ᠪᠠᠢᠵᠤ᠂ ᠠᠮᠢᠲᠠᠨ ᠬᠤᠰᠢᠭᠤᠨ ᠲᠡᠭᠦᠨ ᠢ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠭᠡᠵᠦ ᠳᠠᠭᠤᠳᠠᠳᠠᠭ ᠶᠤᠮ ᠪᠠᠢᠵᠠᠢ᠃
ᠨᠢᠭᠡᠨ ᠡᠳᠦᠷ᠂ ᠨᠢᠭᠡ ᠥᠯᠥᠨ ᠬᠥᠬᠡ ᠥᠯᠥᠭᠴᠢᠨ ᠴᠢᠨᠣᠠ ᠬᠣᠶᠠᠷ ᠪᠡᠯᠲᠡᠷᠭᠡ ᠲᠡᠢ ᠪᠡᠨ ᠶᠠᠪᠤᠭᠠᠳ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠠᠳᠤᠭᠤᠨ ᠤ᠋ ᠵᠠᠬᠠ ᠳ᠋ᠤ᠌ ᠢᠷᠡᠭᠰᠡᠨ ᠳ᠋ᠦ᠍ ᠳᠣᠯᠣᠭᠠᠨ ᠰᠠᠢᠬᠠᠨ ᠰᠤᠪᠠᠢ ᠲᠠᠷᠭᠤᠨ ᠭᠡᠭᠦᠦ ᠠᠳᠤᠭᠤᠨ ᠳᠣᠲᠣᠷᠠ ᠥᠭᠡᠳᠡ ᠤᠷᠤᠭᠤ ᠰᠢᠪᠲᠤ ᠰᠢᠪᠲᠤ ᠥᠩᠭᠡᠷᠡᠭᠡᠳ ᠲᠣᠭᠲᠠᠵᠤ ᠶᠠᠳᠠᠨ ᠪᠠᠢᠬᠤ ᠶ᠋ᠢ ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠪᠡᠯᠲᠡᠷᠭᠡ ᠦᠵᠡᠭᠡᠳ ᠬᠣᠪᠳᠣᠭ ᠰᠢᠯᠦᠰᠦ ᠨᠢ ᠠᠯᠲᠠ ᠭᠣᠭᠣᠵᠢᠵᠤ ᠡᠬᠡ ᠳ᠋ᠡᠭᠡᠨ᠄
《ᠡᠬᠡ᠂ ᠡᠬᠡ᠂ ᠡᠨᠡ ᠳᠣᠯᠣᠭᠠᠨ ᠰᠠᠢᠬᠠᠨ ᠲᠠᠷᠭᠤᠨ ᠭᠡᠭᠦᠨ ᠡᠴᠡ ᠨᠢ ᠨᠢᠭᠡ ᠶ᠋ᠢ ᠨᠢ ᠪᠠᠷᠢᠵᠤ ᠢᠳᠡᠶᠡ!》 ᠭᠡᠰᠡᠨ ᠳ᠋ᠦ᠍ ᠡᠬᠡ ᠨᠢ᠄
《ᠡᠨᠡ ᠳᠣᠯᠣᠭᠠᠨ ᠭᠡᠭᠦᠦ ᠡᠴᠡ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠠᠷᠴᠢᠶᠠ ᠰᠠᠢᠳ ᠲᠤ᠌ ᠠᠷᠭᠠ ᠦᠭᠡᠢ ᠬᠤᠷᠳᠤᠨ ᠬᠡᠳᠦᠨ ᠮᠣᠷᠢ ᠪᠠᠢᠬᠤ ᠶᠤᠮ᠃ ᠲᠡᠷᠡ ᠬᠡᠷᠪᠡ ᠣᠯᠵᠤ ᠮᠡᠳᠡᠭᠡᠳ ᠮᠠᠨᠤᠰ ᠢ ᠠᠯᠠᠬᠤ ᠪᠠᠷ ᠳᠠᠪᠢᠷᠠᠭᠤᠯᠪᠠᠯ᠂ ᠥᠭᠡᠬᠦ ᠬᠣᠷᠠᠭᠤ ᠢᠳᠡᠭᠰᠡᠨ ᠮᠠᠨᠤᠰ ᠭᠦᠶᠦᠵᠦ ᠴᠢᠳᠠᠬᠤ ᠦᠭᠡᠢ ᠪᠡᠷ ᠲᠡᠭᠦᠨ ᠳ᠋ᠦ᠍ ᠪᠠᠷᠢᠭᠳᠠᠨ ᠠᠯᠠᠭᠳᠠᠨᠠ ᠰᠢᠦ᠂ ᠬᠠᠷᠢᠨ ᠲᠡᠷᠡ ᠠᠳᠤᠭᠤᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠢᠭᠠ ᠡᠴᠡᠭᠰᠡᠨ ᠬᠡᠭᠡᠷ ᠭᠡᠭᠦᠦ ᠶ᠋ᠢ ᠪᠠᠷᠢᠵᠤ ᠢᠳᠡᠶᠡ!》 ᠭᠡᠵᠡᠢ᠃ ᠭᠡᠲᠡᠯᠡ ᠬᠣᠶᠠᠷ ᠪᠡᠯᠲᠡᠷᠭᠡ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠯ ᠦᠭᠡᠢ ᠪᠡᠷ ᠳᠣᠯᠣᠭᠠᠨ ᠰᠤᠪᠠᠢ ᠭᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠶ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠢᠳᠡᠵᠡᠢ᠃
ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠠᠳᠤᠭᠤ ᠪᠠᠨ ᠡᠷᠭᠢᠬᠦ ᠪᠡᠷ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠭᠤᠷᠪᠠᠨ ᠴᠢᠨᠣᠠ ᠲᠠᠷᠭᠤᠨ ᠰᠤᠪᠠᠢ ᠭᠡᠭᠦᠦ ᠶ᠋ᠢ ᠨᠢ ᠢᠳᠡᠵᠦ ᠳᠠᠭᠤᠰᠤᠭᠠᠳ ᠴᠠᠭᠠᠷᠠ ᠭᠠᠷᠴᠤ ᠪᠠᠢᠵᠠᠢ᠃ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠠᠭᠤᠷᠯᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠠᠭᠤᠷᠯᠠᠵᠤ᠂ ᠭᠤᠷᠪᠠᠨ ᠴᠢᠨᠣᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠳᠠᠪᠢᠷᠠᠭᠤᠯᠵᠤ ᠡᠯᠳᠡᠭᠡᠳ ᠬᠣᠶᠠᠷ ᠪᠡᠯᠲᠡᠷᠭᠡ ᠶ᠋ᠢ ᠨᠢ ᠭᠦᠢᠴᠡᠵᠦ ᠠᠪᠤᠭᠠᠳ ᠴᠣᠬᠢᠨ ᠠᠯᠠᠵᠤ᠂ ᠡᠬᠡ ᠶ᠋ᠢ ᠨᠢ ᠳᠠᠪᠠᠷᠠᠬᠤᠯᠤᠭᠰᠠᠨ ᠳ᠋ᠤ᠌ ᠥᠯᠥᠭᠴᠢᠨ ᠴᠢᠨᠣᠠ᠄《ᠡᠨᠡ ᠪᠠᠷᠤᠭ ᠳᠤᠩᠭᠤᠢ ᠭᠡᠭᠦᠨ ᠦ᠌ ᠤᠨᠠᠭᠠ ᠤᠨᠤᠵᠤ ᠪᠠᠢᠬᠤ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠪᠣᠳᠣᠭᠠᠳ ᠭᠠᠵᠠᠷ ᠤᠷᠤᠭᠤ ᠳᠤᠲᠠᠭᠠᠭᠰᠠᠨ ᠳ᠋ᠤ᠌ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠶᠣᠰᠣᠲᠠᠢ ᠲᠣᠩᠭᠣᠢ ᠭᠡᠭᠦᠨ ᠦ᠌ ᠤᠨᠠᠭᠠ ᠤᠨᠤᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠡᠰᠡ ᠭᠦᠢᠴᠡᠵᠡᠢ᠃ ᠲᠡᠭᠡᠭᠡᠳ ᠨᠢᠭᠡ ᠬᠥᠭᠰᠢᠨ ᠭᠡᠭᠦᠨ ᠦ᠌ ᠤᠨᠠᠭᠠ ᠶ᠋ᠢ ᠰᠣᠯᠢᠵᠤ ᠤᠨᠤᠭᠠᠳ ᠲᠡᠷᠡ ᠴᠢᠨᠣᠠ ᠶ᠋ᠢ ᠬᠥᠭᠡᠭᠡᠭᠰᠡᠨ ᠳ᠋ᠦ᠍ ᠴᠢᠨᠣᠠ᠄《ᠡᠨᠡ ᠪᠠᠷᠤᠭ ᠬᠥᠭᠰᠢᠨ ᠭᠡᠭᠦᠨ ᠦ᠌ ᠤᠨᠠᠭᠠ ᠶ᠋ᠢ ᠰᠣᠯᠢᠵᠤ ᠤᠨᠤᠭᠠᠳ ᠢᠷᠡᠵᠦ ᠪᠠᠢᠬᠤ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠪᠣᠳᠣᠭᠠᠳ ᠭᠠᠵᠠᠷ ᠥᠭᠡᠳᠡ ᠡᠷᠭᠢᠵᠦ ᠠᠪᠤᠭᠠᠳ ᠳᠤᠲᠠᠭᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠲᠠᠢᠵᠢ ᠶᠠᠭ ᠬᠥᠭᠰᠢᠨ ᠭᠡᠭᠦᠨ ᠦ᠌ ᠤᠨᠠᠭᠠ ᠤᠨᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠡᠰᠡ ᠭᠦᠢᠴᠡᠵᠡᠢ᠃ ᠲᠡᠭᠡᠭᠡᠳ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠨᠢᠭᠡ ᠢᠳᠡ ᠭᠡᠭᠦᠨ ᠦ᠌ ᠤᠨᠠᠭᠠ ᠶ᠋ᠢ ᠰᠣᠯᠢᠵᠤ ᠤᠨᠤᠭᠠᠳ ᠴᠢᠨᠣᠠ ᠶ᠋ᠢ ᠬᠥᠭᠡᠭᠡᠵᠦ ᠭᠦᠢᠴᠡᠵᠦ ᠠᠪᠤᠭᠠᠳ ᠠᠯᠠᠵᠤ ᠭᠡᠳᠡᠷᠭᠦ ᠪᠡᠨ ᠪᠤᠴᠠᠬᠤ ᠭᠡᠰᠡᠨ ᠳ᠋ᠦ᠍ ᠨᠤᠲᠤᠭ ᠤᠰᠤᠨ ᠤ᠋ ᠪᠠᠨ ᠵᠠᠬᠠ ᠠ᠋ᠴᠠ ᠭᠠᠷᠤᠭᠠᠳ ᠨᠡᠯᠢᠶᠡᠳ ᠬᠣᠯᠠ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠭᠡᠳᠡᠷᠭᠦ ᠪᠤᠴᠠᠬᠤ ᠵᠠᠮ ᠢ᠋ᠶ᠋ᠠᠨ ᠠᠯᠳᠠᠭᠠᠳ ᠲᠥᠭᠡᠷᠢᠵᠡᠢ ᠭᠡᠨᠡ᠃ ᠲᠡᠷᠡ ᠨᠤᠲᠤᠭ ᠤᠰᠤ ᠪᠠᠨ ᠬᠠᠢᠵᠤ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠬᠠᠷᠢᠨ ᠨᠢᠭᠡ ᠲᠠᠨᠢᠳᠠᠭ ᠮᠡᠳᠡᠳᠡᠭ ᠦᠭᠡᠢ ᠬᠠᠭᠠᠨ ᠤ᠋ ᠳ᠋ᠤ᠌ ᠬᠦᠷᠴᠦ᠂ ᠲᠡᠭᠦᠨ ᠦ᠌ ᠠᠳᠤᠭᠤᠴᠢᠨ ᠪᠣᠯᠤᠭᠠᠳ ᠰᠠᠭᠤᠵᠠᠢ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ᠂ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠲᠠᠢ ᠬᠠᠮᠲᠤ ᠠᠳᠤᠭᠤ ᠬᠠᠷᠢᠭᠤᠯᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠢᠭᠡ ᠦᠬᠦᠭᠰᠡᠨ ᠮᠣᠷᠢᠨ ᠤ᠋ ᠴᠠᠭᠠᠨ ᠶᠠᠰᠤᠨ ᠲᠣᠯᠣᠭᠠᠢ ᠬᠡᠪᠲᠡᠵᠦ ᠪᠠᠢᠵᠠᠢ᠃ ᠲᠡᠷᠡ᠄
《ᠠ ᠬᠥᠭᠡᠷᠦᠬᠦᠢ᠂ ᠠᠷᠠᠨᠵᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠭᠡᠵᠦ ᠴᠢᠮᠠᠶ᠋ᠢ ᠬᠡᠯᠡᠳᠡᠭ ᠪᠠᠢᠨᠠ! ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠳᠡᠭ ᠪᠠᠢᠨᠠ!》 ᠭᠡᠳ ᠴᠠᠭᠠᠨ ᠶᠠᠰᠤᠨ ᠲᠣᠯᠣᠭᠠᠢ ᠶ᠋ᠢ ᠡᠷᠭᠢᠭᠦᠯᠵᠦ ᠤᠷᠪᠠᠭᠤᠯᠤᠭᠠᠳ ᠬᠠᠯᠢᠶᠠᠵᠤ ᠪᠠᠢᠵᠠᠢ᠃
ᠠᠰᠠᠬᠤᠨ ᠪᠣᠯᠬᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠪᠠᠨ ᠠᠳᠤᠭᠤ ᠪᠠᠨ ᠲᠠᠭᠤᠭᠠᠳ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠠᠭᠠᠨ ᠤ᠋ ᠠᠳᠤᠭᠤᠴᠢᠨ ᠬᠠᠭᠠᠨ ᠤ᠋ ᠪᠠᠨ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠴᠦ᠄
《ᠲᠡᠷᠡ ᠮᠠᠭᠤ ᠬᠥᠪᠡᠭᠦᠨ ᠥᠨᠥᠳᠥᠷ ᠨᠢᠭᠡ ᠦᠬᠦᠭᠰᠡᠨ ᠮᠣᠷᠢᠨ ᠤ᠋ ᠴᠠᠭᠠᠨ ᠶᠠᠰᠤᠨ ᠲᠣᠯᠣᠭᠠᠢ ᠶ᠋ᠢ ᠣᠯᠵᠤ ᠠᠪᠤᠭᠠᠳ <ᠠ ᠬᠥᠭᠡᠷᠦᠬᠦᠢ! ᠠᠷᠠᠨᠵᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠭᠡᠵᠦ ᠴᠢᠮᠠᠶ᠋ᠢ ᠬᠡᠯᠡᠳᠡᠭ ᠪᠠᠢᠨᠠ᠂ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠭᠡᠵᠦ ᠨᠠᠮᠠᠶ᠋ᠢ ᠬᠡᠯᠡᠳᠡᠭ ᠪᠠᠢᠨᠠ>ᠭᠡᠳ ᠡᠷᠭᠢᠭᠦᠯᠵᠦ ᠤᠷᠪᠠᠭᠤᠯᠤᠭᠠᠳ ᠰᠠᠭᠤᠪᠠ》 ᠭᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠶ᠋ᠢ ᠬᠠᠵᠠᠭᠤ ᠳ᠋ᠠᠭᠠᠨ ᠳᠠᠭᠤᠳᠠᠵᠤ ᠢᠷᠡᠭᠡᠳ᠄
《ᠴᠢ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠮᠥᠨ ᠪᠣᠢ ᠤᠤ?》
《ᠮᠥᠨ!》
《ᠴᠢ ᠠᠷᠠᠨᠵᠤᠯᠠ ᠶ᠋ᠢ ᠲᠠᠨᠢᠳᠠᠭ ᠪᠣᠢ ᠤᠤ?》
《ᠲᠠᠨᠢᠳᠠᠭ!》
《ᠲᠡᠭᠡᠭᠡᠳ ᠮᠠᠨ ᠤ᠋ ᠠᠳᠤᠭᠤᠨ ᠳᠣᠲᠣᠷᠠ ᠠᠷᠠᠨᠵᠤᠯᠠ ᠪᠠᠢᠨᠠᠤ?》
《ᠪᠠᠢᠨᠠ!》
《ᠲᠡᠭᠡᠭᠡᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠴᠢ ᠠᠷᠠᠨᠵᠤᠯᠠ ᠪᠠᠨ ᠤᠨᠤᠭᠠᠳ ᠨᠤᠲᠤᠭ ᠲᠠᠭᠠᠨ ᠪᠤᠴᠠ! ᠴᠢᠨᠦ ᠨᠤᠲᠤᠭ ᠤ᠋ᠨ ᠵᠠᠬᠠ ᠶ᠋ᠢ ᠮᠠᠨᠤᠰ ᠬᠡᠯᠡᠵᠦ ᠥᠭᠭᠦᠶᠡ!》 ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠭᠤᠯᠵᠠᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠠᠭᠠᠨ ᠤ᠋ ᠬᠢᠨ ᠠᠳᠤᠭᠤ ᠪᠠᠨ ᠬᠥᠭᠡᠭᠡᠵᠦ ᠢᠷᠡᠭᠡᠳ᠄
《ᠵᠠ ᠬᠥᠪᠡᠭᠦᠨ! ᠴᠢᠨᠦ ᠲᠠᠨᠢᠳᠠᠭ ᠮᠡᠳᠡᠳᠡᠭ ᠠᠷᠠᠨᠵᠤᠯᠠ ᠠᠯᠢ ᠪᠣᠢ? ᠣᠳᠣ ᠴᠢ ᠲᠡᠭᠦᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠠᠪᠤᠭᠠᠳ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠬᠠᠷᠢ!》 ᠭᠡᠰᠡᠨ ᠳ᠋ᠦ᠍ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠠᠳᠤᠭᠤᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠮᠠᠭᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠶ᠋ᠢᠨ ᠪᠠᠭᠠᠰᠤ ᠨᠠᠭᠠᠯᠳᠤᠭᠰᠠᠨ ᠳᠠᠭᠠᠬᠢ ᠲᠠᠢ ᠬᠡᠭᠡᠷ ᠳᠠᠭᠠ ᠪᠠᠷᠢᠭᠠᠳ ᠠᠪᠴᠠᠢ᠃ ᠠᠮᠢᠲᠠᠨ ᠬᠤᠰᠢᠭᠤᠨ ᠲᠡᠭᠦᠨ ᠢ᠋ ᠦᠵᠡᠭᠡᠳ᠄
《ᠴᠢᠨᠦ ᠰᠠᠢᠬᠠᠨ ᠠᠷᠠᠨᠵᠤᠯᠠ ᠭᠡᠭᠴᠢ ᠡᠨᠡ ᠪᠠᠢᠬᠤ ᠪᠠᠢᠨᠠ᠃》 ᠭᠡᠳ ᠬᠥᠬᠡ ᠡᠯᠢᠭᠡ ᠨᠢ ᠬᠥᠰᠢᠲᠡᠯᠡ ᠢᠨᠢᠶᠡᠯᠳᠦᠵᠦ᠂ ᠲᠡᠷᠡ ᠳᠠᠭᠠᠬᠢ ᠲᠠᠢ ᠬᠡᠭᠡᠷ ᠳᠠᠭᠠ ᠶ᠋ᠢ ᠨᠢ ᠲᠣᠬᠣᠵᠤ ᠥᠭᠴᠡᠢ᠂ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ᠄
《ᠣᠳᠣ ᠲᠠᠨᠤᠰ ᠮᠢᠨᠦ ᠡᠨᠡ ᠠᠷᠠᠨᠵᠤᠯᠠ ᠳ᠋ᠤ᠌ ᠬᠣᠶᠠᠷ ᠳᠠᠩ ᠪᠤᠷᠠ ᠲᠡᠩᠨᠡᠵᠦ ᠥᠭ!》 ᠭᠡᠰᠡᠨ ᠳ᠋ᠦ᠍ ᠮᠥᠨ ᠬᠣᠶᠠᠷ ᠳᠠᠩ ᠪᠤᠷᠠ ᠳᠠᠩᠨᠠᠭᠠᠳ ᠥᠭᠴᠡᠢ᠃
ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠳᠠᠭᠠᠬᠢ ᠲᠠᠢ ᠬᠡᠭᠡᠷ ᠳᠠᠭᠠ ᠪᠠᠨ ᠤᠨᠤᠭᠠᠳ ᠭᠠᠷᠬᠤ ᠳ᠋ᠤ᠌ ᠬᠤᠰᠢᠭᠤᠨ ᠤ᠋ ᠠᠮᠢᠲᠠᠨ ᠲᠡᠭᠦᠨ ᠢ᠋ ᠨᠤᠲᠤᠭ ᠤ᠋ᠨ ᠬᠢᠨᠢ ᠵᠠᠬᠠ ᠳ᠋ᠤ᠌ ᠬᠦᠷᠭᠡᠬᠦ ᠪᠡᠷ ᠬᠠᠮᠲᠤ ᠭᠠᠷᠤᠭᠠᠳ᠄
《ᠣᠳᠣ ᠴᠢ ᠡᠢᠮᠦ ᠰᠠᠢᠬᠠᠨ ᠠᠷᠠᠨᠵᠤᠯᠠ ᠪᠠᠨ ᠤᠨᠤᠭᠠᠳ ᠬᠡᠵᠢᠶᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠠᠷᠠᠭᠠ ᠠᠪᠬᠤ ᠪᠣᠢ?》 ᠭᠡᠳ ᠨᠠᠭᠠᠳᠤᠮ ᠱᠣᠭ ᠬᠢᠵᠦ᠂ ᠥᠨᠳᠥᠷ ᠥᠨᠳᠥᠷ ᠲᠠᠷᠭᠤᠨ ᠲᠠᠷᠭᠤᠨ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠬᠠᠵᠠᠭᠤ ᠪᠠᠷ ᠨᠢ ᠲᠠᠯᠪᠢᠭᠠᠳ ᠲᠠᠯᠪᠢᠭᠠᠳ ᠥᠩᠭᠡᠷᠡᠵᠦ ᠪᠠᠢᠵᠠᠢ᠃ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ ᠠᠮᠢᠲᠠᠨ ᠤ᠋ ᠠᠷᠤ ᠠ᠋ᠴᠠ ᠭᠦᠢᠴᠡᠵᠦ ᠶᠠᠳᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠩᠨᠡᠵᠦ ᠠᠪᠤᠭᠰᠠᠨ ᠪᠤᠷᠠ ᠪᠠᠨ ᠨᠢᠭᠡ ᠨᠢᠭᠡ ᠪᠡᠷ ᠰᠤᠭᠤᠯᠵᠤ ᠠᠪᠤᠭᠠᠳ ᠳᠠᠭᠠᠬᠢ ᠲᠠᠢ ᠬᠡᠭᠡᠷ ᠳᠠᠭᠠ ᠪᠠᠨ ᠭᠤᠶᠠᠳᠠᠨ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠠᠬᠠ ᠳ᠋ᠤ᠌ ᠣᠢᠷᠠᠲᠤᠵᠤ᠂ ᠠᠭᠤᠯᠠ ᠤᠰᠤᠨ ᠤ᠋ ᠬᠢᠨᠢ ᠪᠠᠷᠠ ᠦᠵᠡᠭᠳᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠳᠠᠩ ᠪᠤᠷᠠ ᠪᠠᠨ ᠰᠤᠭᠤᠯᠠᠵᠤ ᠴᠣᠬᠢᠭᠠᠳ ᠪᠠᠷᠠᠵᠤ᠂ ᠳᠠᠭᠠᠬᠢ ᠲᠠᠢ ᠬᠡᠭᠡᠷ ᠳᠠᠭᠠ ᠨᠢ ᠭᠡᠨᠡᠳᠲᠡ ᠠᠮᠢᠲᠠᠨ ᠳᠣᠲᠣᠷᠠ ᠠ᠋ᠴᠠ ᠰᠤᠭᠤ ᠦᠰᠦᠷᠦᠨ ᠨᠢᠰᠬᠦ ᠳ᠋ᠦ᠍ ᠠᠷᠴᠢᠶᠠ ᠰᠠᠢᠳ ᠤ᠋ᠨ ᠲᠠᠢᠵᠢ᠄
《ᠠᠷᠨᠨᠵᠤᠯᠠ ᠬᠣᠯᠢᠨᠠ ᠭᠡᠳᠡᠭ ᠡᠨᠡ ᠪᠠᠢᠨᠠ ᠰᠢᠦ! ᠠᠷᠴᠢᠶᠠ ᠶ᠋ᠢᠨ ᠰᠠᠢᠳ ᠬᠠᠷᠢᠨᠠ ᠭᠡᠳᠡᠭ ᠡᠨᠡ ᠪᠠᠢᠨᠠ ᠰᠢᠦ!》 ᠭᠡᠳ ᠬᠠᠷᠠᠭᠠ ᠲᠠᠰᠤᠷᠠᠨ ᠶᠠᠪᠤᠵᠠᠢ᠃ ᠬᠤᠰᠢᠭᠤᠨ ᠤ᠋ ᠠᠮᠢᠲᠠᠨ᠄
《ᠮᠠᠨᠤᠰ ᠰᠠᠢᠨ ᠬᠥᠮᠦᠨ ᠰᠠᠢᠨ ᠮᠣᠷᠢ ᠶ᠋ᠢ ᠲᠠᠨᠢᠳᠠᠭ ᠦᠭᠡᠢ᠂ ᠨᠢᠳᠦ ᠲᠡᠢ ᠪᠠᠢᠭᠠᠳ ᠰᠣᠬᠣᠷ ᠲᠠᠢ ᠠᠳᠠᠯᠢ ᠠᠮᠢᠲᠠᠨ ᠪᠠᠢᠨᠠ!》 ᠭᠡᠴᠡᠭᠡᠭᠡᠳ ᠪᠤᠴᠠᠨ ᠶᠠᠪᠤᠵᠠᠢ᠃
ᠠᠷᠴᠢᠶᠠ ᠰᠠᠢᠳ᠄《ᠮᠢᠨᠦ ᠬᠥᠪᠡᠭᠦᠨ ᠳ᠋ᠦ᠍ ᠨᠢᠭᠡ ᠠᠷᠠᠨᠵᠤᠯᠠ ᠲᠣᠬᠢᠶᠠᠯᠳᠤᠪᠠᠯ ᠲᠡᠭᠦᠨ ᠢ᠋ ᠤᠨᠤᠭᠠᠳ ᠰᠠᠶᠢ ᠬᠠᠷᠢᠵᠤ※ ᠢᠷᠡᠵᠦ ᠴᠢᠳᠠᠬᠤ ᠶᠤᠮ!》 ᠭᠡᠳ ᠵᠠᠭᠤ ᠪᠥᠭᠡᠳ ᠨᠠᠢ᠍ᠮᠠᠨ ᠠᠯᠲᠠ ᠤᠷᠲᠤ ᠤᠷᠭᠠ ᠪᠡᠯᠡᠳᠬᠡᠭᠡᠳ ᠡᠳᠦᠷ ᠡᠳᠦᠷ ᠶᠢᠰᠦᠨ ᠳᠠᠪᠬᠤᠷ ᠰᠤᠪᠤᠷᠭᠠ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠬᠦᠯᠢᠶᠡᠵᠦ ᠰᠠᠭᠤᠳᠠᠭ ᠶᠤᠮ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ ᠬᠥᠪᠡᠭᠦᠨ ᠨᠢ ᠶᠣᠰᠣᠲᠠᠢ ᠨᠢᠭᠡ ᠠᠷᠠᠨᠵᠤᠯᠠ ᠤᠨᠤᠭᠠᠳ ᠨᠢᠰᠬᠡᠨ ᠢᠷᠡᠬᠦ ᠳ᠋ᠦ᠍ ᠲᠡᠷᠡ ᠵᠠᠭᠤ ᠪᠥᠭᠡᠳ ᠨᠠᠢ᠍ᠮᠠᠨ ᠠᠯᠲᠠ ᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠤᠷᠭᠠᠳᠠᠭᠠᠳ ᠠᠪᠴᠤ ᠰᠠᠭᠤᠵᠠᠢ᠃
ᠵᠡᠭᠦᠯᠲᠡ᠄
ᠲᠤᠰ ᠵᠣᠬᠢᠶᠠᠯ ᠢ᠋ ᠴᠢ· ᠪᠦᠷᠢᠨᠪᠠᠶᠠᠷ ᠤ᠋ᠨ ᠭᠣᠣᠯᠯᠠᠨ ᠨᠠᠢᠷᠠᠭᠤᠯᠤᠭᠰᠠᠨ
《ᠳᠡᠭᠡᠳᠦ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠤ᠋ᠨ ᠳᠡᠭᠡᠵᠢ ᠪᠢᠴᠢᠭ》 ᠡᠴᠡ ᠰᠣᠩᠭᠣᠪᠠ᠃ ᠬᠥᠬᠡᠨᠠᠭᠤᠷ ᠮᠣᠵᠢ ᠶ᠋ᠢᠨ ᠰᠦᠷᠦᠩᠬᠡᠷ ᠶᠠᠷᠢᠵᠤ᠂ ᠣ᠊· ᠴᠡᠷᠡᠨᠳᠦᠨᠳᠦᠪ ᠡᠮᠬᠢᠳᠬᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠢᠬᠤᠸᠠᠷ᠂ ᠲᠣᠳᠤᠭᠡᠷᠡᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠲᠣᠭᠲᠠᠭᠤᠨ᠂ ᠣᠳᠬᠠᠨᠴᠡᠴᠡᠭ᠂ ᠲᠣᠳᠤᠭᠡᠷᠡᠯ