ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠОйт мэргэн тамнаОйт мэргэн тамна
391 ᠰᠣᠷᠤᠨᠵᠢᠨ ᠺᠦᠮᠪᠦ ᠬᠠᠨ ᠳ᠋ᠤ᠌ ᠨᠢᠭᠡ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠭᠡᠳᠡᠭ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠪᠣᠷ ᠰᠡᠴᠡᠨ ᠮᠡᠷᠭᠡᠨ ᠤᠬᠠᠭᠠᠨᠲᠠᠢ ᠲᠦᠰᠢᠮᠡᠯ ᠪᠠᠢᠭᠰᠠᠨ ᠰᠠᠨᠵᠠᠢ᠂ ᠡᠨᠡ ᠦᠶᠡ ᠳ᠋ᠦ᠍ ᠬᠢᠲᠠᠳ ᠤ᠋ᠨ ᠺᠦᠮᠪᠦ ᠬᠠᠨ ᠳ᠋ᠤ᠌ ᠨᠣᠭᠣᠭᠠᠨ᠂ ᠴᠠᠭᠠᠨ ᠬᠣᠶᠠᠷ ᠳᠠᠷᠬᠢ( ᠳᠠᠭᠢᠨᠢ) ᠪᠠᠢᠵᠤ ᠭᠡᠨᠡ᠃ ᠡᠨᠡ ᠬᠣᠶᠠᠷ ᠳᠠᠷᠬᠢ ᠶ᠋ᠢ ᠨᠤᠲᠤᠭ ᠲᠤ᠌ ᠪᠠᠨ ᠵᠠᠯᠠᠵᠤ ᠢᠷᠡᠭᠦᠯᠬᠦ ᠪᠡᠷ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢ ᠰᠣᠷᠤᠨᠵᠢᠨ ᠺᠦᠮᠪᠦ ᠬᠠᠨ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠭᠡᠨᠡ᠃
ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠬᠢᠲᠠᠳ ᠤ᠋ᠨ ᠺᠦᠮᠪᠦ ᠬᠠᠨ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌᠂ ᠬᠢᠲᠠᠳ ᠤ᠋ᠨ ᠺᠦᠮᠪᠦ ᠬᠠᠨ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠢᠷᠡᠭᠰᠡᠨ ᠤᠴᠢᠷ ᠢ᠋ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠢ᠋ ᠣᠷᠳᠣᠨ ᠳ᠋ᠤ᠌ ᠪᠠᠨ ᠣᠷᠣᠭᠤᠯᠤᠨ ᠨᠣᠭᠣᠭᠠᠨ ᠳᠠᠷᠬᠢ᠂ ᠴᠠᠭᠠᠨ ᠳᠠᠷᠬᠢ ᠲᠠᠢ ᠠᠳᠠᠯᠢ ᠬᠣᠶᠠᠷ ᠵᠠᠭᠤᠨ ᠬᠡᠦᠬᠡᠨ ᠨᠥᠬᠥᠳ ᠢ᠋ ᠰᠠᠭᠤᠯᠭᠠᠵᠤ᠄《ᠡᠳᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠲᠠᠨᠢᠵᠤ ᠠᠪ》 ᠭᠡᠵᠡᠢ᠃ ᠡᠭᠦᠨ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠠᠳ᠂ ᠲᠡᠷᠡ ᠨᠤᠲᠤᠭ ᠠ᠋ᠴᠠ ᠨᠢᠭᠤᠴᠠ ᠪᠠᠷ ᠺᠦᠮᠦ( ᠬᠥᠮᠦᠨ) ᠵᠠᠯᠠᠭᠠᠳ ᠵᠢᠭᠠᠯᠭᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠺᠦᠮᠦ ᠬᠠᠨ ᠤ᠋ ᠱᠠᠪ ᠭᠡᠰᠡᠨ ᠢ᠋ ᠡᠨᠳᠡᠳᠡᠭ ᠦᠭᠡᠢ《ᠰᠢᠷᠠ ᠪᠢᠴᠢᠭ》ᠨᠢ ᠮᠡᠳᠡᠵᠦ ᠣᠷᠬᠢᠭᠠᠳ ᠲᠣᠯᠣᠭᠠᠢ ᠪᠠᠨ ᠠᠪᠤᠭᠤᠯᠬᠤ ᠠ᠋ᠴᠠ ᠠᠶᠤᠭᠠᠳ ᠲᠡᠷᠡ ᠨᠤᠲᠤᠭ ᠠ᠋ᠴᠠ ᠬᠡᠨ ᠴᠦ᠍ ᠬᠡᠯᠡᠵᠦ ᠥᠭᠭᠦᠭᠦᠯ ᠦᠭᠡᠢ ᠤᠳᠠᠪᠠ ᠭᠡᠨᠡ᠃
ᠲᠡᠭᠡᠭᠡᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠨᠢᠭᠡ ᠤᠳᠠᠭᠠ ᠠᠷᠭᠠ ᠤᠬᠠᠭᠠᠨ ᠪᠣᠳᠣᠭᠠᠳ᠂ ᠨᠢᠭᠡ ᠡᠮᠡᠭᠡᠨ ᠡᠪᠦᠭᠡᠨ ᠢ᠋ ᠡᠷᠢᠵᠦ ᠣᠴᠢᠭᠠᠳ ᠨᠢᠭᠡ ᠲᠤᠯᠤᠮ ᠠᠯᠲᠠᠨ ᠤ᠋ ᠱᠠᠩ ᠥᠭᠭᠦᠭᠡᠳ᠄
《ᠠᠪᠤ ᠲᠠᠨ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠠᠰᠠᠭᠤᠶᠠ᠂ ᠨᠣᠭᠣᠭᠠᠨ ᠳᠠᠷᠬᠢ ᠴᠠᠭᠠᠨ ᠳᠠᠷᠬᠢ ᠶᠠᠭᠠᠬᠢᠵᠤ ᠲᠠᠨᠢᠭᠳᠠᠨᠠ? ᠬᠡᠯᠡᠵᠦ ᠥᠭᠭᠦᠭᠳᠦᠨ! 》 ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ᠄
《ᠪᠢᠳᠡᠨ ᠬᠣᠶᠠᠷ ᠬᠡᠯᠡᠵᠦ ᠥᠭᠬᠦ ᠡᠴᠡ ᠪᠡᠨ ᠱᠠᠪ ᠭᠡᠰᠡᠨ ᠢ᠋ ᠡᠨᠳᠡᠳᠡᠭ ᠦᠭᠡᠢ< ᠰᠢᠷᠠ ᠪᠢᠴᠢᠭ> ᠡᠴᠡ ᠲᠠᠲᠠᠭᠠᠯᠵᠠᠵᠤ ᠪᠠᠢᠨᠠ᠂》 ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠲᠡᠭᠦᠨ ᠳ᠋ᠦ᠍ ᠮᠡᠳᠡᠭᠦᠯᠳᠡᠭ ᠦᠭᠡᠢ ᠠᠷᠭᠠ ᠨᠠᠳᠠ ᠪᠠᠢᠨᠠ᠃ ᠲᠠ ᠬᠣᠶᠠᠷ ᠨᠠᠳᠠ ᠬᠡᠯᠡᠭᠡᠳ ᠥᠭᠭᠦᠭᠳᠦᠨ》 ᠭᠡᠪᠡ᠃
《ᠲᠡᠭᠡᠪᠡᠯ ᠠᠷᠭᠠ ᠪᠠᠨ ᠴᠢ ᠬᠡᠯᠡ》 ᠭᠡᠵᠦ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠬᠡᠯᠡᠪᠡ᠃ ᠡᠭᠦᠨ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠲᠡᠮᠦᠷ ᠲᠤᠯᠭᠠ ᠲᠤᠯᠤᠭᠠᠳ ᠬᠠᠢᠰᠤ ᠨᠡᠷᠡᠭᠡᠳ ᠳᠣᠲᠣᠷᠠ ᠨᠢ ᠳᠦᠭᠦᠷᠡᠩ ᠤᠰᠤ ᠬᠢᠵᠦ ᠡᠪᠦᠭᠡᠨ ᠢ᠋ ᠳᠣᠲᠣᠷᠠ ᠨᠢ ᠨᠢᠴᠦᠭᠦᠨ ᠰᠠᠭᠤᠯᠭᠠᠭᠠᠳ᠂ ᠪᠦᠷᠬᠦᠭᠦᠯ ᠢ᠋ ᠨᠢ ᠳᠠᠷᠤᠭᠰᠠᠨ ᠤ᠋ ᠳᠡᠭᠡᠷᠡ ᠰᠢᠪᠠᠭᠤᠨ ᠤ᠋ ᠥᠳᠥ᠂ ᠮᠤᠤᠷ ᠤ᠋ᠨ ᠲᠣᠯᠣᠭᠠᠢ ᠪᠣᠯᠤᠨ ᠬᠥᠯ ᠲᠠᠯᠪᠢᠭᠠᠳ᠂ ᠪᠦᠷᠬᠦᠭᠦᠯ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠡᠪᠦᠭᠡᠨ ᠦ᠌ ᠠᠮᠠᠨ ᠳ᠋ᠤ᠌ ᠴᠣᠭᠣᠷ ᠵᠠᠭᠤᠯᠭᠠᠭᠠᠳ᠂ ᠲᠡᠭᠡᠭᠡᠳ ᠲᠡᠷᠡ ᠴᠤᠭᠤᠷ ᠢ᠋ᠶ᠋ᠠᠷ ᠭᠡᠷ ᠦ᠋ᠨ ᠭᠠᠳᠠᠨᠠ ᠮᠢᠨᠦ ᠴᠢᠬᠢᠨ ᠳ᠋ᠦ᠍ ᠬᠡᠯᠡᠵᠦ ᠥᠭᠪᠡᠯ᠂ ᠱᠠᠪ ᠭᠡᠰᠡᠨ ᠢ᠋ ᠡᠨᠳᠡᠳᠡᠭ ᠦᠭᠡᠢ< ᠰᠢᠷᠠ ᠪᠢᠴᠢᠭ> ᠡᠨᠳᠡᠭᠦᠷᠡᠨᠡ》 ᠭᠡᠪᠡ᠃
ᠲᠡᠭᠡᠭᠡᠳ ᠮᠠᠷᠭᠠᠰᠢ ᠨᠢ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠡᠪᠦᠭᠡᠨ ᠢ᠋ ᠤᠰᠤ ᠲᠠᠢ ᠬᠠᠢᠰᠤᠨ ᠳᠣᠲᠣᠷᠠ ᠰᠠᠭᠤᠯᠭᠠᠭᠠᠳ᠂ ᠴᠤᠭᠤᠷ ᠢ᠋ᠶ᠋ᠠᠷ ᠡᠪᠦᠭᠡᠨ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍᠄
《ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠴᠢ ᠮᠠᠷᠭᠠᠰᠢ ᠬᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠴᠢᠬᠤᠯᠠ ᠲᠡᠨᠳᠡ ᠤᠷᠢᠳᠠᠬᠢ ᠲᠠᠢ ᠠᠳᠠᠯᠢ ᠪᠠᠷ ᠬᠣᠶᠠᠷ ᠵᠠᠭᠤᠨ ᠬᠡᠦᠬᠡᠨ ᠨᠦ᠍ᠭᠦᠳ ᠢ᠋ ᠰᠠᠭᠤᠯᠭᠠᠵᠤ ᠣᠷᠬᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠴᠢ ᠪᠠᠷᠠᠭᠤᠨ ᠪᠡᠶᠡ ᠪᠡᠷ ᠨᠢ ᠶᠠᠪᠤᠵᠤ ᠶᠠᠪᠤᠭᠠᠳ ᠲᠠᠯᠠ ᠳᠤᠮᠳᠠ ᠨᠢ ᠬᠦᠷᠦᠭᠡᠳ ᠦᠵᠡᠮᠡᠭᠴᠡ᠂ ᠪᠠᠷᠠᠭᠤᠨ ᠵᠡᠭᠦᠨ ᠮᠥᠷᠦᠨ ᠳᠡᠭᠡᠷᠡ ᠨᠢ ᠰᠢᠷᠠ ᠴᠣᠬᠣᠷ ᠬᠥᠬᠡ ᠴᠣᠬᠣᠷ ᠵᠥᠭᠡᠢ ᠨᠢᠰᠦᠭᠰᠡᠨ ᠮᠡᠲᠦ ᠰᠣᠯᠣᠩᠭᠠ ᠲᠠᠲᠠᠬᠤ ᠪᠣᠢ᠂ ᠲᠡᠷᠡ ᠪᠣᠯᠪᠠᠯ ᠴᠠᠭᠠᠨ ᠳᠠᠷᠬᠢ᠃ ᠵᠡᠭᠦᠨ ᠪᠡᠶᠡ ᠪᠡᠷ ᠨᠢ ᠮᠥᠨ ᠲᠡᠭᠦᠨ ᠲᠡᠢ ᠠᠳᠠᠯᠢ᠃ ᠡᠨᠡ ᠬᠣᠶᠠᠷ ᠪᠣᠯ ᠲᠠᠨ ᠤ᠋ ᠵᠠᠯᠠᠵᠤ ᠬᠠᠷᠢᠬᠤ ᠬᠣᠶᠠᠷ ᠳᠠᠷᠬᠢ ᠪᠣᠯᠤᠨᠠ᠂》 ᠭᠡᠵᠦ ᠬᠡᠯᠡᠵᠦ ᠥᠭᠪᠡ᠃
ᠲᠡᠭᠡᠭᠡᠳ ᠮᠠᠷᠭᠠᠰᠢ ᠨᠢ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠬᠢᠲᠠᠳ ᠤ᠋ᠨ ᠺᠤᠮᠪᠤ ᠬᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠷᠬᠣᠯᠠ᠂ ᠲᠡᠨᠳᠡ ᠤᠭ ᠤ᠋ᠨ ᠠᠳᠠᠯᠢ ᠪᠠᠷ ᠬᠡᠳᠦᠨ ᠵᠠᠭᠤᠨ ᠬᠡᠦᠬᠡᠨ ᠨᠦ᠍ᠭᠦᠳ ᠢ᠋ ᠰᠠᠭᠤᠯᠭᠠᠵᠤ ᠣᠷᠬᠢᠭᠰᠠᠨ ᠪᠠᠢᠵᠠᠢ᠃ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠪᠠᠷᠠᠭᠤᠨ ᠪᠡᠶᠡ ᠡᠴᠡ ᠪᠡᠨ ᠡᠬᠢᠯᠡᠭᠡᠳ ᠶᠠᠪᠤᠨ ᠠᠵᠢᠭᠯᠠᠭᠠᠳ ᠲᠠᠯᠠ ᠳᠤᠮᠳᠠ ᠨᠢ ᠬᠦᠷᠬᠦ ᠳ᠋ᠦ᠍ ᠡᠪᠦᠭᠡᠨ ᠦ᠌ ᠬᠡᠯᠡᠭᠰᠡᠨ ᠮᠡᠲᠦ᠂ ᠰᠢᠷᠠ ᠴᠣᠬᠣᠷ ᠬᠥᠬᠡ ᠴᠣᠬᠣᠷ ᠬᠣᠶᠠᠷ ᠵᠥᠭᠡᠢ ᠶ᠋ᠢᠨ ᠭᠡᠷᠡᠯ ᠬᠡᠦᠬᠡᠨ ᠦ᠌ ᠳᠡᠭᠡᠷᠡ ᠲᠣᠰᠤᠭᠠᠳ ᠰᠣᠯᠣᠩᠭᠠ ᠲᠠᠲᠠᠭᠠᠳ ᠪᠠᠢᠵᠠᠢ᠃ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠲᠡᠷᠡ ᠳᠠᠷᠤᠢ ᠨᠢ ᠲᠠᠨᠢᠭᠠᠳ᠂ ᠬᠣᠶᠠᠷ ᠳᠠᠷᠬᠢ ᠶ᠋ᠢᠨ ᠡᠮᠦᠨᠡ ᠬᠦᠷᠴᠦ᠄
《ᠣᠳᠣ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠵᠠᠯᠠᠷᠠᠵᠤ ᠣᠴᠢᠬᠤ ᠴᠠᠭ ᠴᠢᠨᠢ ᠨᠢᠭᠡᠨᠲᠡ ᠪᠣᠯᠪᠠ᠂》 ᠭᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠬᠢᠲᠠᠳ ᠤ᠋ᠨ ᠺᠠᠮᠪᠤ ᠬᠠᠨ᠂ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠪᠡ? ᠶᠠᠮᠠᠷ ᠬᠥᠮᠦᠨ ᠢ᠋ ᠵᠢᠭᠠᠵᠤ ᠥᠭᠪᠡ? ᠭᠡᠳ ᠱᠠᠪ ᠭᠡᠳᠡᠭ ᠢ᠋ ᠡᠨᠳᠡᠳᠡᠭ ᠦᠭᠡᠢ <ᠰᠢᠷᠠ ᠪᠢᠴᠢᠭ> ᠢ᠋ᠶ᠋ᠡᠨ ᠳᠡᠯᠭᠡᠭᠡᠳ ᠦᠵᠡᠬᠦ ᠳ᠋ᠦ᠍ ᠲᠡᠮᠦᠷ ᠬᠥᠯ ᠲᠡᠢ᠂ ᠴᠥᠭᠡ ᠬᠦᠵᠦᠭᠦᠦ ᠲᠡᠢ᠂ ᠤᠰᠤᠨ ᠴᠣᠭᠴᠠ ᠲᠠᠢ᠂ ᠵᠡᠰ ᠬᠣᠩᠰᠢᠶᠠᠷ ᠲᠠᠢ᠂ ᠥᠲᠥᠨ ᠳᠠᠯᠠᠪᠴᠢᠲᠠᠢ ᠂ ᠠᠷᠪᠠᠨ ᠬᠢᠮᠤᠰᠤ ᠲᠠᠢ ᠬᠥᠮᠦᠨ ᠵᠢᠭᠠᠵᠤ ᠥᠭᠪᠡ ᠭᠡᠵᠦ <ᠰᠢᠷᠠ ᠪᠢᠴᠢᠭ> ᠲᠦ᠍ ᠭᠠᠷᠴᠠᠢ᠃
ᠬᠢᠲᠠᠳ ᠤ᠋ᠨ ᠺᠣᠮᠪᠦ ᠬᠠᠨ ᠬᠠᠮᠤᠭ ᠨᠤᠲᠤᠭ ᠠ᠋ᠴᠠ ᠡᠢᠮᠦ ᠬᠥᠮᠦᠨ ᠢ᠋ ᠤᠳᠠᠲᠠᠯᠠ ᠨᠡᠩᠵᠢᠨ ᠡᠷᠢᠭᠡᠳ ᠣᠯᠤᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠡᠢᠮᠦ ᠬᠥᠮᠦᠨ ᠲᠥᠷᠥᠭᠡᠳ ᠦᠭᠡᠢ ᠭᠡᠵᠦ ᠮᠡᠳᠡᠭᠳᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠬᠢᠲᠠᠳ ᠤ᠋ᠨ ᠺᠤᠮᠪᠤ ᠬᠠᠨ ᠠᠭᠤᠷᠯᠠᠭᠠᠳ᠄
《<ᠰᠢᠷᠠ ᠪᠢᠴᠢᠭ > ᠡᠮᠦᠨᠡ ᠮᠡᠳᠡᠳᠡᠭ ᠪᠢᠯᠡ᠂ ᠣᠳᠣ ᠮᠡᠳᠡᠬᠦ ᠪᠡᠨ ᠪᠠᠢᠵᠠᠢ᠂》ᠭᠡᠵᠦ ᠬᠡᠯᠡᠭᠡᠳ ᠭᠠᠷᠭᠠᠭᠠᠳ ᠲᠦᠢᠮᠡᠷᠳᠡᠭᠦᠯᠵᠦ ᠣᠷᠬᠢᠵᠠᠢ᠃
《ᠰᠢᠷᠠ ᠪᠢᠴᠢᠭ》 ᠢ᠋ ᠲᠦᠢᠮᠡᠷᠳᠡᠬᠦ ᠳ᠋ᠦ᠍ ᠦᠨᠡᠰᠦ ᠨᠢ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠪᠡ᠃ ᠲᠡᠭᠦᠨ ᠢ᠋ ᠬᠡᠭᠡᠷᠡ ᠪᠡᠯᠴᠢᠵᠦ ᠶᠠᠪᠤᠭᠰᠠᠨ ᠨᠢᠭᠡ ᠰᠢᠷᠠ ᠲᠣᠯᠣᠭᠠᠢᠲᠠᠢ ᠬᠣᠨᠢ ᠣᠯᠵᠤ ᠢᠳᠡᠭᠡᠳ ᠣᠷᠬᠢᠭᠰᠠᠨ ᠭᠡᠨᠡ᠃
ᠲᠡᠭᠦᠨ ᠡᠴᠡ ᠦᠯᠡᠳᠡᠭᠰᠡᠨ ᠢ᠋ ᠨᠢ ᠨᠢᠭᠡ ᠬᠥᠮᠦᠨ ᠣᠯᠵᠤ ᠠᠪᠤᠭᠠᠳ ᠣᠷᠴᠢᠯᠠᠩ ᠳ᠋ᠤ᠌ ᠶᠢᠰᠦᠨ ᠦᠰᠦᠭ ᠵᠣᠬᠢᠶᠠᠵᠤ ᠭᠡᠨᠡ᠃
ᠲᠡᠭᠦᠨ ᠢ᠋ ᠢᠳᠡᠭᠰᠡᠨ ᠬᠣᠨᠢ ᠶ᠋ᠢ ᠮᠣᠩᠭᠣᠯ ᠬᠥᠮᠦᠨ《ᠰᠢᠷᠠ ᠪᠢᠴᠢᠭ》ᠰᠢᠷᠠ ᠲᠣᠯᠣᠭᠠᠢᠲᠤ ᠬᠣᠨᠢᠨ ᠤ᠋ ᠳᠠᠯᠤ ᠶ᠋ᠢᠨ ᠶᠠᠰᠤ ᠭᠡᠵᠦ ᠰᠡᠮᠡᠵᠡᠨ ᠳ᠋ᠦ᠍ ᠣᠷᠢᠶᠠᠵᠤ ᠠᠷᠢᠭᠤᠳᠬᠠᠭᠠᠳ ᠭᠠᠯ ᠳ᠋ᠤ᠌ ᠲᠦᠯᠡᠭᠡᠳ ᠪᠡᠯᠭᠡ ᠲᠠᠲᠠᠳᠠᠭ ᠪᠣᠯᠤᠭᠰᠠᠨ ᠪᠠ ᠰᠢᠷᠠ ᠲᠣᠯᠣᠭᠠᠢᠲᠤ ᠬᠣᠨᠢᠨ ᠤ᠋ ᠬᠣᠷᠭᠣᠰᠣ ᠪᠠᠷ ᠪᠡᠯᠭᠡ ᠲᠠᠲᠠᠵᠤ ᠮᠡᠳᠡᠳᠡᠭ ᠪᠣᠯᠤᠭᠰᠠᠨ ᠭᠡᠨᠡ᠃
ᠲᠡᠭᠡᠭᠡᠳ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠨᠠᠶᠠᠨ ᠬᠣᠨᠣᠭ ᠤ᠋ᠨ ᠨᠠᠢᠷ᠂ ᠳᠠᠯᠠᠨ ᠬᠣᠨᠣᠭ ᠤ᠋ᠨ ᠲᠠᠩᠭᠠᠷᠠ ᠬᠢᠵᠦ᠂ ᠴᠠᠭᠠᠨ ᠳᠠᠷᠬᠢ ᠨᠣᠭᠣᠭᠠᠨ ᠳᠠᠷᠬᠢ ᠶ᠋ᠢ ᠥᠭᠴᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠲᠡᠭᠦᠨ ᠦ᠌ ᠬᠣᠢᠨᠠ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠂ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠪᠡᠶᠡ ᠶ᠋ᠢ ᠨᠢ ᠶᠡᠬᠡ ᠰᠠᠭᠠᠲᠠᠭᠠᠭᠰᠠᠨ ᠢ᠋ ᠪᠣᠳᠣᠵᠤ᠂ ᠪᠢ ᠴᠦ᠍ ᠡᠭᠦᠨ ᠡᠴᠡ ᠬᠠᠷᠢᠭᠤ ᠪᠠᠨ ᠠᠪᠤᠶᠠ ᠭᠡᠳ ᠬᠤᠳᠠᠯ ᠢ᠋ᠶ᠋ᠠᠷ ᠡᠪᠡᠳᠴᠢᠯᠡᠵᠦ ᠬᠡᠪᠲᠡᠭᠡᠳ ᠣᠷᠳᠣᠨ ᠳ᠋ᠤᠨᠢ ᠬᠣᠴᠣᠷᠴᠤ ᠭᠡᠨᠡ᠃
ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠬᠠᠷᠢ ᠶ᠋ᠢᠨ ᠲᠦᠰᠢᠮᠡᠯ ᠡᠪᠡᠳᠴᠢᠯᠡᠪᠡ ᠭᠡᠵᠦ ᠰᠠᠨᠳᠤᠷᠤᠭᠠᠳ ᠰᠠᠢᠨ ᠡᠮᠴᠢ ᠪᠦᠬᠦᠨ ᠢ᠋ᠶ᠋ᠡᠨ ᠳᠠᠭᠤᠳᠠᠭᠤᠯᠬᠤ ᠬᠣᠭᠣᠷᠣᠨᠳᠣ᠂ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠮᠤᠤᠷ ᠪᠣᠯᠤᠨ ᠨᠣᠬᠠᠢ ᠶ᠋ᠢᠨ ᠭᠥᠯᠥᠭᠡ ᠠᠯᠠᠵᠤ ᠦᠮᠡᠬᠡᠢᠷᠡᠭᠦᠯᠦᠭᠡᠳ᠂ ᠬᠣᠶᠠᠷ ᠰᠦᠪᠡᠭᠡ ᠳ᠋ᠡᠭᠡᠨ ᠬᠠᠪᠴᠢᠭᠠᠳ ᠬᠥᠮᠦᠨ ᠣᠢᠷᠠᠲᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠭᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠮᠴᠢ ᠨᠠᠷ ᠢᠷᠡᠭᠡᠳ ᠲᠡᠷᠡᠬᠦ ᠦᠮᠡᠬᠡᠢ ᠦᠨᠦᠷ ᠲᠤᠨᠢ ᠣᠢᠷᠠᠲᠤᠵᠤ ᠡᠰᠡ ᠴᠢᠳᠠᠭᠰᠠᠨ ᠳ᠋ᠤ᠌ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠲᠡᠳᠡᠨ ᠳ᠋ᠦ᠍᠄
《ᠨᠠᠳᠠ ᠡᠢᠮᠦ ᠬᠦᠨᠳᠦ ᠡᠪᠡᠳᠴᠢᠨ ᠢᠷᠡᠪᠡ᠃ ᠨᠠᠮᠠᠶ᠋ᠢ ᠦᠵᠡᠬᠦ ᠳ᠋ᠦ᠍ ᠮᠢᠨᠦ ᠭᠤᠤᠷᠰᠤᠨ ᠠ᠋ᠴᠠ ᠤᠶᠠᠭᠰᠠᠨ ᠡᠨᠡ ᠶᠣᠩᠬᠣᠷ ᠲᠣᠷᠭᠠᠨ ᠤᠲᠠᠰᠤᠨ ᠤ᠋ ᠦᠵᠦᠭᠦᠷ ᠡᠴᠡ ᠪᠠᠷᠢᠭᠠᠳ ᠭᠠᠳᠠᠨᠠ ᠠ᠋ᠴᠠ ᠦᠵᠡᠪᠡᠯ ᠪᠣᠯᠴᠢᠬᠠᠨᠠ᠂》 ᠭᠡᠪᠡ᠃
ᠲᠡᠭᠡᠭᠡᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠮᠤᠤᠷ ᠪᠣᠯᠤᠨ ᠨᠣᠬᠠᠢ ᠶ᠋ᠢᠨ ᠬᠥᠯ ᠳ᠋ᠦ᠍ ᠤᠶᠠᠭᠰᠠᠨ ᠶᠣᠩᠬᠣᠷ ᠲᠣᠷᠭᠠᠨ ᠤᠲᠠᠰᠤᠨ ᠤ᠋ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠭᠡᠷ ᠦ᠋ᠨ ᠭᠠᠳᠠᠨᠠᠬᠢ ᠡᠮᠴᠢ ᠨᠠᠷ ᠲᠤ᠌ ᠳᠠᠮᠵᠢᠭᠤᠯᠤᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠡᠮᠴᠢ ᠨᠠᠷ ᠪᠠᠷᠢᠵᠤ ᠦᠵᠡᠭᠡᠳ᠄
《ᠠᠷᠢᠶᠠᠲᠠᠨ ᠬᠢᠮᠣᠰᠣᠳᠡᠨ ᠦ᠌ ᠰᠤᠳᠠᠰᠤ ᠭᠠᠷᠴᠤ ᠪᠠᠢᠨᠠ》 ᠭᠡᠪᠡ᠃
ᠡᠭᠦᠨ ᠳ᠋ᠦ᠍ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠠᠭᠤᠷᠯᠠᠵᠤ ᠬᠠᠷᠢ ᠶ᠋ᠢᠨ ᠡᠯᠴᠢ ᠶ᠋ᠢ ᠠᠷᠢᠶᠠᠲᠠᠨ ᠬᠢᠮᠣᠰᠣᠳᠡᠨ ᠭᠡᠮᠡᠨ ᠬᠤᠳᠠᠯ ᠬᠡᠯᠡᠯᠡ ᠭᠡᠳ ᠮᠡᠷᠭᠡᠨ ᠰᠠᠢᠨ ᠡᠮᠴᠢ ᠨᠠᠷ ᠢ᠋ᠶ᠋ᠠᠨ ᠴᠢᠩᠭᠠ ᠰᠢᠳᠬᠡᠪᠡ ᠭᠡᠨᠡ᠃
ᠲᠡᠭᠡᠭᠡᠳ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠳ᠋ᠤ᠌᠄
《ᠡᠪᠡᠳᠴᠢᠨ ᠴᠢᠨᠢ ᠡᠳᠡᠭᠡᠬᠦ ᠳ᠋ᠦ᠍ ᠶᠠᠮᠠᠷ ᠠᠷᠭᠠ ᠪᠠᠢᠨᠠ? ᠥᠪᠡᠷ ᠢ᠋ᠶ᠋ᠡᠨ ᠬᠡᠯᠡᠭᠡᠳ ᠥᠭᠭᠦᠨᠡᠦ?》 ᠭᠡᠮᠡᠨ ᠠᠰᠠᠭᠤᠪᠠ᠃ ᠡᠭᠦᠨ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠤ᠋ ᠬᠡᠪ ᠲᠣᠷᠭᠠ ᠨᠢ ᠶᠡᠬᠡ᠂ ᠽᠠᠨᠳᠠᠨ ᠮᠣᠳᠣ ᠨᠢ ᠶᠡᠬᠡ᠂ ᠬᠣᠨᠢ ᠨᠢ ᠶᠡᠬᠡ ᠭᠡᠳᠡᠭ ᠪᠢᠯᠡ᠃ ᠣᠳᠣ ᠪᠢ ᠲᠡᠭᠦᠨ ᠦ᠌ ᠶᠡᠬᠡ ᠭᠡᠭᠴᠢ ᠶ᠋ᠢ ᠨᠢ ᠦᠵᠡᠶᠡ ᠭᠡᠵᠦ ᠪᠣᠳᠣᠭᠠᠳ᠄
《ᠬᠣᠨᠢᠨ ᠤ᠋ ᠬᠦᠵᠦᠭᠦᠨ ᠦ᠌ ᠴᠢᠰᠤᠨ ᠠ᠋ᠴᠠ ᠨᠢᠭᠡ ᠪᠠᠯᠭᠤ ᠤᠤᠭᠤᠪᠠᠯ ᠡᠳᠡᠭᠡᠨᠡ》ᠭᠡᠪᠡ᠃
ᠬᠣᠨᠢᠨ ᠤ᠋ ᠬᠦᠵᠦᠭᠦᠨ ᠡᠴᠡ ᠴᠢᠰᠤ ᠭᠠᠷᠬᠤ ᠦᠭᠡᠢ ᠲᠤᠯᠠ ᠬᠣᠨᠢ ᠪᠠᠨ ᠠᠯᠠᠵᠤ ᠪᠠᠢᠭᠠᠳ ᠪᠠᠷᠠᠭᠰᠠᠨ ᠭᠡᠨᠡ᠃
《ᠬᠣᠨᠢᠨ ᠤ᠋ ᠬᠦᠵᠦᠭᠦᠨ ᠡᠴᠡ ᠴᠢᠰᠤ ᠭᠠᠷᠤᠭᠰᠠᠨ ᠦᠭᠡᠢ᠂ ᠣᠳᠣ ᠶᠠᠮᠠᠷ ᠠᠷᠭᠠ ᠪᠠᠢᠨᠠ?》 ᠭᠡᠵᠦ ᠬᠢᠲᠠᠳ ᠤ᠋ᠨ ᠺᠤᠮᠪᠤ ᠬᠠᠨ ᠬᠡᠯᠡᠬᠦᠯᠡ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠽᠠᠨᠳᠠᠨ ᠮᠣᠳᠣᠨ ᠤ᠋ ᠦᠨᠡᠰᠦ ᠡᠴᠡ ᠨᠢᠭᠡ ᠠᠳᠬᠤ ᠠᠪᠤᠭᠠᠳ ᠢᠷᠡᠪᠡᠯ ᠪᠣᠯᠤᠨᠠ 》 ᠭᠡᠪᠡ᠃
ᠲᠡᠭᠡᠭᠡᠳ ᠪᠦᠬᠦ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠪᠠᠷᠠᠲᠠᠯᠠ ᠲᠦᠯᠡᠬᠦᠯᠡ ᠦᠨᠡᠰᠦ ᠭᠠᠷᠴᠤ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠺᠤᠮᠪᠤ ᠬᠠᠨ᠄
《ᠽᠠᠨᠳᠠᠨ ᠮᠣᠳᠣ ᠲᠦᠯᠡᠭᠡᠳ ᠦᠨᠡᠰᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠣᠳᠣ ᠥᠭᠡᠷᠡ ᠶᠠᠮᠠᠷ ᠠᠷᠭᠠ ᠪᠠᠢᠨᠠ?》ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠬᠡᠪ ᠲᠣᠷᠭᠠ ᠲᠦᠯᠡᠭᠡᠳ ᠲᠡᠭᠦᠨ ᠦ᠌ ᠦᠨᠡᠰᠦᠨ ᠡᠴᠡ ᠨᠢᠭᠡ ᠠᠳᠬᠤ ᠠᠪᠤᠭᠠᠳ ᠢᠷᠡᠭᠰᠡᠨ ᠴᠦ᠍ ᠪᠣᠯᠴᠢᠬᠠᠨᠠ》 ᠭᠡᠪᠡ᠃
ᠲᠡᠭᠡᠭᠡᠳ ᠲᠡᠳᠡᠨ ᠬᠡᠪ ᠲᠣᠷᠭᠠ ᠪᠦᠬᠦᠨ ᠢ᠋ ᠲᠦᠯᠡᠭᠰᠡᠨ ᠪᠣᠯᠪᠠᠴᠤ ᠨᠢᠭᠡ ᠴᠢᠮᠬᠢ ᠴᠦ᠍ ᠦᠨᠡᠰᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠡᠭᠦᠨ ᠢ᠋ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠳ᠋ᠤ᠌ ᠬᠡᠯᠡᠬᠦᠯᠡ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠴᠠᠭᠠᠨ ᠳᠠᠷᠬᠢ ᠨᠣᠭᠣᠭᠠᠨ ᠳᠠᠷᠬᠢ ᠬᠣᠶᠠᠷ ᠵᠠᠮ ᠳ᠋ᠤ᠌ ᠬᠣᠯᠠᠳᠪᠠ ᠭᠡᠵᠦ ᠪᠣᠳᠣᠭᠠᠳ᠄
《ᠪᠢ ᠡᠪᠡᠳᠴᠢᠨ ᠦ᠌ ᠬᠡᠷᠡᠭ ᠢ᠋ᠶ᠋ᠡᠷ ᠲᠠᠨ ᠤ᠋ ᠡᠨᠳᠡ ᠤᠳᠠᠭᠠᠨ ᠪᠣᠯᠪᠠ᠃ ᠣᠳᠣ ᠪᠢ ᠤᠷᠢᠳᠠᠬᠢ ᠠ᠋ᠴᠠ ᠭᠠᠢᠭᠤᠢ ᠪᠣᠯᠤᠭᠰᠠᠨ ᠲᠤᠯᠠ ᠮᠣᠷᠢ ᠤᠨᠤᠭᠠᠳ ᠲᠡᠷᠡ ᠨᠢᠭᠡ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠢᠷᠡᠶᠡ᠃ ᠨᠠᠳᠠ ᠬᠠᠨ ᠲᠠ ᠰᠢᠷᠠ ᠴᠢᠬᠢᠲᠡᠢ ᠬᠠᠷᠠ ᠲᠣᠯᠣᠭᠠᠢᠲᠠᠢ ᠬᠤᠷᠳᠤᠨ ᠬᠤᠨ ᠴᠠᠭᠠᠨ ᠭᠡᠳᠡᠭ ᠮᠣᠷᠢ ᠶ᠋ᠢ ᠠᠪᠴᠢᠷᠠᠭᠠᠳ ᠲᠣᠬᠣᠭᠠᠳ ᠦᠭᠭᠦᠭᠳᠤᠨ》ᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡᠬᠦ ᠮᠣᠷᠢ ᠶ᠋ᠢ ᠨᠢ ᠠᠪᠴᠤ ᠢᠷᠡᠭᠡᠳ ᠦᠭᠭᠦ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠤᠨᠤᠭᠠᠳ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠤᠨ ᠵᠣᠭᠰᠣᠵᠤ ᠪᠠᠢᠭᠠᠳ ᠬᠢᠲᠠᠳ ᠤ᠋ᠨ ᠺᠤᠮᠪᠤ ᠬᠠᠨ ᠳ᠋ᠤ᠌᠄
ᠨᠠᠮᠠᠶ᠋ᠢ ᠠᠩᠬᠠ ᠡᠨᠳᠡ ᠢᠷᠡᠬᠦ ᠳ᠋ᠦ᠍ ᠬᠦᠯᠢᠶᠡᠯᠭᠡᠵᠦ ᠰᠠᠭᠠᠲᠠᠭᠠᠵᠤ ᠵᠣᠪᠠᠭᠠᠭᠰᠠᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠴᠢᠨᠢ ᠪᠢ᠂ ᠶᠡᠬᠡ ᠭᠡᠳᠡᠭ ᠬᠣᠨᠢ ᠶ᠋ᠢ ᠴᠢᠨᠢ ᠠᠯᠠᠭᠤᠯᠵᠤ ᠪᠠᠷᠠᠪᠠ᠃ ᠶᠡᠬᠡ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠽᠠᠨᠳᠠᠨ ᠮᠣᠳᠣ ᠪᠣᠯᠤᠨ ᠬᠡᠪ ᠲᠣᠷᠭᠠ ᠶ᠋ᠢ ᠴᠢᠨᠢ ᠰᠢᠲᠠᠭᠠᠯᠭᠠᠵᠤ ᠪᠠᠷᠠᠪᠠ᠃ ᠨᠣᠭᠣᠭᠠᠨ ᠳᠠᠷᠬᠢ ᠴᠠᠭᠠᠨ ᠳᠠᠷᠬᠢ ᠬᠣᠶᠠᠷ ᠢ᠋ ᠴᠢᠨᠢ ᠵᠠᠯᠠᠵᠤ ᠠᠪᠤᠪᠠ᠃ ᠰᠢᠷᠠ ᠴᠢᠬᠢᠲᠡᠢ ᠬᠠᠷᠠ ᠲᠣᠯᠣᠭᠠᠢᠲᠠᠢ ᠬᠤᠷᠳᠤᠨ ᠬᠤᠨ ᠴᠠᠭᠠᠨ ᠬᠥᠯᠦᠭ ᠢ᠋ ᠴᠢᠨᠢ ᠤᠨᠤᠵᠤ ᠠᠪᠤᠯᠠ ᠪᠢ᠃ ᠵᠠ᠂ ᠪᠠᠶᠠᠷᠲᠠᠢ᠂ ᠰᠠᠢᠨ ᠪᠠᠢᠭᠠᠷᠠᠢ》 ᠭᠡᠮᠡᠨ ᠬᠡᠯᠡᠮᠡᠭᠴᠡ ᠨᠤᠲᠤᠭ ᠢ᠋ᠶ᠋ᠠᠨ ᠴᠢᠭᠯᠡᠭᠡᠳ ᠲᠣᠭᠣᠰᠣ ᠪᠤᠲᠠᠷᠠᠭᠤᠯᠤᠨ ᠳᠠᠪᠬᠢᠵᠤ ᠣᠳᠪᠠ ᠭᠡᠨᠡ᠃
ᠲᠡᠭᠡᠭᠡᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠴᠠᠭᠠᠨ ᠳᠠᠷᠬᠢ ᠨᠣᠭᠣᠭᠠᠨ ᠳᠠᠷᠬᠢ ᠬᠣᠶᠠᠷ ᠢ᠋
ᠭᠦᠢᠴᠡᠵᠦ ᠢᠷᠡᠭᠡᠳ᠄
《ᠲᠠᠨᠠᠷ ᠣᠨ ᠵᠠᠯᠠᠷᠠᠭᠠᠳ ᠢᠷᠡᠵᠦ ᠪᠠᠢᠬᠤ ᠴᠢᠮᠡᠭᠡ ᠶ᠋ᠢ ᠪᠢ ᠤᠷᠢᠳᠠᠪᠠᠷ ᠰᠣᠷᠢᠨᠵᠢᠨ ᠺᠤᠮᠪᠤ ᠬᠠᠨ ᠳ᠋ᠤ᠌ ᠬᠦᠷᠦᠭᠡᠳ ᠬᠡᠯᠡᠶᠡ》ᠭᠡᠵᠦ ᠤᠷᠢᠳᠠᠪᠠᠷ ᠶᠠᠪᠤᠪᠠ᠃
ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠴᠢᠮᠡᠭᠡ ᠬᠦᠷᠭᠡᠵᠦ ᠢᠷᠡᠬᠦᠯᠡ ᠰᠣᠷᠢᠨᠵᠢᠨ ᠺᠤᠮᠪᠤ ᠬᠠᠨ ᠲᠡᠭᠦᠨ ᠡᠴᠡ᠄
《ᠵᠠᠯᠠᠵᠤ ᠢᠷᠡᠭᠰᠡᠨ ᠬᠣᠶᠠᠷ ᠳᠠᠷᠬᠢ ᠥᠩᠭᠡ ᠵᠢᠰᠦ ᠪᠡᠷ ᠶᠠᠮᠠᠷ ᠪᠣᠢ?》 ᠭᠡᠮᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠥᠩᠭᠡ ᠵᠢᠰᠦ ᠨᠢ ᠴᠦ᠍ ᠦᠵᠡᠰᠬᠦᠯᠡᠩ ᠪᠠᠢᠨᠠ᠃ ᠭᠡᠲᠡᠯᠡ ᠲᠠᠤᠯᠠᠢ ᠤᠷᠤᠭᠤᠯ ᠲᠠᠢ ᠰᠠᠨᠵᠢ》 ᠭᠡᠵᠦ ᠬᠤᠳᠠᠯ ᠬᠡᠯᠡᠭᠡᠳ᠂ ᠵᠠᠯᠠᠵᠤ ᠢᠷᠡᠭᠰᠡᠨ ᠳᠠᠷᠬᠢ ᠳ᠋ᠤ᠌ ᠰᠣᠷᠢᠨᠵᠢᠨ ᠺᠤᠮᠪᠤ ᠬᠠᠨ ᠤ᠋ ᠪᠠᠷᠰ ᠠᠮᠠ ᠲᠠᠢ ᠶᠤᠮ ᠭᠡᠪᠡ᠃
ᠬᠠᠨ ᠬᠣᠶᠠᠷ ᠳᠠᠷᠬᠢ ᠶ᠋ᠢ ᠦᠵᠡᠭᠡᠳ ᠡᠢᠮᠦ ᠰᠠᠢᠬᠠᠨ ᠵᠢᠷᠤᠭ ᠰᠢᠭ᠋ ᠳᠠᠷᠬᠢ ᠶ᠋ᠢ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶᠠᠭᠤᠨ ᠳ᠋ᠤ᠌ ᠮᠠᠭᠤᠴᠢᠯᠠᠭᠠᠳ ᠬᠤᠳᠠᠯ ᠬᠡᠯᠡᠪᠡ ᠭᠡᠵᠦ ᠠᠭᠤᠷᠯᠠᠭᠠᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠬᠣᠶᠠᠷ ᠨᠢᠳᠦᠨ ᠦ᠌ ᠴᠡᠴᠦᠭᠡᠢ ᠶ᠋ᠢ ᠨᠢ ᠵᠡᠭᠦᠦ ᠪᠡᠷ ᠰᠢᠭᠠᠵᠤ ᠰᠣᠬᠣᠯᠤᠭᠠᠳ ᠣᠷᠳᠣᠨ ᠠ᠋ᠴᠠ ᠪᠠᠨ ᠬᠥᠭᠡᠭᠡᠨ ᠶᠠᠪᠤᠭᠤᠯᠪᠠ᠃
ᠬᠣᠶᠠᠷ ᠨᠢᠳᠦᠨ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠲᠡᠮᠲᠡᠷᠬᠢᠯᠡᠨ ᠶᠠᠪᠤᠵᠤ ᠪᠠᠢᠭᠠᠳ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡ ᠨᠢᠭᠡ ᠬᠠᠷᠠ ᠴᠢᠯᠠᠭᠤ ᠣᠯᠤᠭᠠᠳ ᠲᠡᠭᠦᠨ ᠢ᠋ ᠭᠤᠷᠪᠠᠨ ᠳᠣᠯᠣᠭᠠ ᠬᠣᠨᠣᠭ ᠲᠠᠷᠨᠢᠳᠠᠭᠠᠳ᠂ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠷᠪᠠᠰ ᠬᠠᠷᠠ ᠬᠥᠪᠡᠭᠦᠨ ᠪᠣᠯᠭᠠᠵᠤ ᠪᠡᠶᠡ ᠪᠡᠨ ᠲᠡᠵᠢᠭᠡᠯᠭᠡᠨ ᠠᠰᠠᠷᠠᠭᠤᠯᠪᠠ᠃
ᠠᠷᠪᠠᠰ ᠬᠠᠷᠠ ᠬᠥᠪᠡᠭᠦᠨ ᠠᠪᠤ ᠪᠠᠨ ᠪᠠᠭᠤᠷᠠᠢ ᠳ᠋ᠠᠭᠠᠨ ᠥᠯᠳᠡᠭᠡᠭᠡᠳ ᠡᠳᠦᠷ ᠲᠤᠨᠢ ᠠᠩ ᠠᠪᠠᠯᠠᠭᠠᠳ ᠶᠠᠪᠤᠴᠢᠬᠠᠳᠠᠭ ᠪᠠᠢᠵᠠᠢ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠵᠣᠣ ᠶ᠋ᠢᠨ ᠠᠯᠲᠠᠨ ᠲᠡᠭᠡᠭᠡᠪᠦᠷᠢ ᠲᠡᠢ ᠪᠠᠭᠤᠳᠠᠯ ᠪᠤᠰᠬᠠᠨᠠ ᠭᠡᠳ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠰᠦᠮᠡ ᠪᠠᠷᠢᠯᠭᠠ ᠡᠬᠢᠯᠡᠵᠡᠢ᠃ ᠭᠡᠲᠡᠯᠡ ᠪᠠᠷᠢᠯᠭᠠ ᠨᠢ ᠡᠳᠦᠷ ᠲᠦ᠍ ᠪᠣᠰᠤᠭᠠᠳ ᠰᠥᠨᠢ ᠨᠤᠷᠠᠵᠤ᠂ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ ᠶ᠋ᠢ ᠪᠣᠰᠬᠠᠵᠤ ᠶᠠᠳᠠᠪᠠ᠃ ᠡᠭᠦᠨ ᠳ᠋ᠦ᠍ ᠵᠠᠮᠰᠥᠢ᠍ᠷᠣᠩ ᠰᠠᠬᠢᠭᠤᠯᠰᠤᠨ᠄
《ᠣᠷᠴᠢᠯᠠᠩ ᠳᠡᠭᠡᠷᠡ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠠ᠋ᠴᠠ ᠥᠭᠡᠷᠡ ᠬᠥᠮᠦᠨ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠮᠡᠳᠡᠬᠦ ᠶᠣᠰᠣ ᠦᠭᠡᠢ᠃ ᠣᠳᠣ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠠ᠋ᠴᠠ ᠠᠷᠭᠠᠳᠠᠵᠤ ᠠᠰᠠᠭᠤᠭᠠᠳ ᠮᠡᠳᠡᠶᠡ᠂》 ᠭᠡᠳ ᠪᠡᠶᠡ ᠪᠡᠨ ᠴᠠᠭᠠᠨ ᠮᠠᠨᠵᠢ ᠬᠤᠪᠢᠯᠭᠠᠨ᠂ ᠲᠠᠪᠤᠨ ᠴᠠᠭᠠᠨ ᠢᠮᠠᠭᠠ ᠲᠠᠭᠤᠵᠤ᠂ ᠬᠣᠶᠠᠷ ᠬᠠᠲᠠᠭᠤ ᠬᠤᠷᠤᠳ ᠡᠪᠦᠷᠲᠦᠯᠡᠵᠦ ᠢᠷᠡᠪᠡ᠃ ᠲᠡᠭᠡᠭᠡᠳ ᠠᠷᠪᠠᠰ ᠬᠥᠪᠡᠭᠦᠨ ᠦ᠌ ᠠᠩ ᠠᠪᠠᠯᠠᠭᠠᠳ ᠭᠡᠷ ᠡᠴᠡ ᠪᠡᠨ ᠬᠣᠯᠠᠳᠤᠭᠰᠠᠨ ᠵᠠᠪ ᠢ᠋ ᠠᠰᠢᠭᠯᠠᠵᠤ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠢᠷᠡᠵᠦ ᠰᠠᠭᠤᠭᠠᠳ ᠵᠣᠣ ᠶ᠋ᠢᠨ ᠪᠠᠷᠢᠯᠭᠠ ᠪᠤᠰᠬᠠᠵᠤ ᠴᠢᠳᠠᠯ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠡᠯᠡᠬᠦ ᠶ᠋ᠢᠨ ᠳᠠᠭᠠᠤ ᠬᠤᠷᠤᠳ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠲᠦᠷᠴᠢᠭᠢᠨᠡᠲᠡᠯᠡ ᠬᠡᠮᠡᠯᠢᠪᠡ᠃ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠰᠣᠨᠣᠰᠤᠭᠠᠳ᠄
《ᠢᠰᠬᠦᠯᠡᠩ ᠢ᠋ ᠢᠳᠡᠪᠡᠯ ᠰᠢᠯᠦᠰᠦ ᠠᠰᠬᠠᠷᠠᠳᠠᠭ᠂ ᠢᠨᠠᠭ ᠢ᠋ ᠰᠠᠨᠠᠬᠤᠯᠠ ᠨᠢᠯᠪᠤᠰᠤ ᠠᠰᠬᠠᠷᠠᠳᠠᠭ ᠶᠤᠮ᠂ ᠬᠥᠪᠡᠭᠦᠨ ᠬᠤᠷᠤᠳ ᠴᠢᠨᠢ ᠪᠠᠢᠪᠠᠯ ᠨᠢᠭᠡ ᠶ᠋ᠢ ᠥᠭ》 ᠭᠡᠪᠡ᠃ ᠴᠠᠭᠠᠨ ᠮᠠᠨᠵᠢ ᠳᠠᠪ ᠭᠡᠲᠡᠯᠡ ᠬᠤᠷᠤᠳ ᠠ᠋ᠴᠠ ᠪᠠᠨ ᠨᠢᠭᠡ ᠶ᠋ᠢ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠳ᠋ᠤ᠌ ᠥᠭᠭᠦᠭᠡᠳ ᠣᠷᠬᠢᠪᠠ᠃ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠢᠳᠡᠭᠡᠳ ᠰᠣᠭᠲᠣᠵᠤ᠄
《ᠯᠤᠤᠰᠲᠤ ᠶ᠋ᠢᠨ ᠬᠠᠨ ᠤ᠋ ᠭᠦᠢᠰᠦᠨ ᠳᠡᠭᠡᠷᠡ ᠰᠦᠮᠡ ᠪᠠᠷᠢᠵᠤ ᠪᠣᠯᠳᠠᠭ ᠶᠤᠮ ᠤᠤ? ᠴᠠᠭᠠᠨ ᠳᠠᠷᠬᠢ ᠨᠣᠭᠣᠭᠠᠨ ᠳᠠᠷᠬᠢ ᠬᠣᠶᠠᠷ ᠤ᠋ᠨ ᠮᠥᠩᠭᠥᠨ ᠪᠦᠯᠡᠵᠡᠭ ᠠᠯᠲᠠᠨ ᠪᠦᠯᠡᠵᠡᠭ ᠬᠣᠶᠠᠷ ᠢ᠋ ᠠᠪᠴᠤ ᠢᠷᠡᠭᠡᠳ ᠲᠠᠯᠪᠢᠬᠤᠯᠠ ᠪᠣᠰᠬᠠᠵᠤ ᠪᠣᠯᠤᠨᠠ ᠭᠡᠳ ᠦᠭᠡ ᠠᠯᠳᠠᠭᠠᠳ ᠣᠷᠬᠢᠪᠠ᠃ ᠴᠠᠭᠠᠨ ᠮᠠᠨᠵᠢ᠂ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠠ᠋ᠴᠠ ᠦᠭᠡ ᠠᠯᠳᠠᠭᠤᠯᠵᠤ ᠠᠪᠤᠭᠠᠳ ᠲᠦᠷᠭᠡᠨ ᠭᠠᠷᠴᠤ ᠲᠠᠪᠤᠨ ᠢᠮᠠᠭᠠ ᠪᠠᠨ ᠲᠠᠭᠤᠭᠠᠳ ᠶᠠᠪᠤᠪᠠ᠃
ᠬᠡᠰᠡᠭ ᠤᠳᠠᠭᠠᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠰᠡᠷᠡᠵᠦ ᠦᠭᠡ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠡᠳ ᠠᠷᠪᠠᠰ ᠬᠠᠷᠠ ᠬᠥᠪᠡᠭᠦᠨ ᠨᠢ ᠢᠷᠡᠬᠦᠯᠡ ᠲᠡᠭᠦᠨ ᠢ᠋ᠶ᠋ᠡᠷ ᠲᠡᠷᠡ ᠳᠣᠣᠷᠠ ᠨᠢ ᠨᠡᠬᠡᠭᠦᠯᠪᠡ᠃ ᠭᠡᠪᠡᠴᠦ ᠨᠡᠬᠡᠵᠦ ᠭᠦᠢᠴᠡᠭᠰᠡᠨ ᠦᠭᠡᠢ᠂ ᠴᠠᠭᠠᠨ ᠮᠠᠨᠵᠢ ᠨᠢᠭᠡᠨᠲᠡ ᠪᠠᠢᠷᠢ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠲᠤᠯᠠ ᠠᠷᠪᠠᠰ ᠬᠠᠷᠠ ᠬᠥᠪᠡᠭᠦᠨ ᠠᠷᠭᠠ ᠦᠭᠡᠢ ᠬᠠᠷᠢᠵᠤ ᠢᠷᠡᠬᠦᠯᠡ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠠᠷᠪᠠᠰ ᠬᠥᠪᠡᠭᠦᠨ ᠳ᠋ᠡᠭᠡᠨ᠄
《ᠵᠠ᠂ ᠪᠣᠯᠵᠠᠢ᠂ ᠣᠳᠣ ᠨᠠᠮᠠ ᠶ᠋ᠢ ᠡᠭᠦᠷᠦᠭᠡᠳ ᠶᠠᠪᠤ》 ᠭᠡᠪᠡ᠂ ᠲᠡᠳᠡᠨ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠬᠥᠪᠡᠭᠦᠨ ᠡᠴᠡ ᠪᠡᠨ᠄
ᠬᠥᠪᠡᠭᠦᠨ ᠶᠠᠭᠤ ᠦᠵᠡᠭᠳᠡᠵᠦ ᠪᠠᠢᠨᠠ?》 ᠭᠡᠬᠦ ᠳ᠋ᠦ᠍ ᠬᠥᠪᠡᠭᠦᠨ ᠨᠢ᠄
《ᠵᠣᠣ ᠶ᠋ᠢᠨ ᠰᠦᠮᠡ ᠶ᠋ᠢ ᠪᠣᠰᠬᠠᠵᠤ ᠣᠷᠬᠢᠪᠠ》 ᠭᠡᠮᠡᠨ ᠬᠡᠯᠡᠵᠦ ᠥᠭᠪᠡ᠃
ᠵᠠ ᠲᠡᠭᠡᠪᠡᠯ ᠪᠣᠯᠵᠠᠢ᠂ ᠣᠳᠣ ᠠᠪᠤ ᠪᠠᠨ ᠡᠭᠦᠷᠦᠭᠡᠳ ᠶᠠᠪᠤ》 ᠭᠡᠪᠡ᠃
ᠲᠡᠳᠡ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠬᠥᠪᠡᠭᠡ ᠳ᠋ᠦ᠍ ᠢᠷᠡᠬᠦ ᠳ᠋ᠦ᠍ ᠠᠪᠤ ᠨᠢ᠄
ᠶᠠᠮᠠᠷ ᠭᠠᠵᠠᠷ ᠲᠤ᠌ ᠢᠷᠡᠪᠡ? ᠶᠠᠭᠤ ᠦᠵᠡᠭᠳᠡᠵᠦ ᠪᠠᠢᠨᠠ?》 ᠭᠡᠬᠦ ᠳ᠋ᠦ᠍ ᠬᠥᠪᠡᠭᠦᠨ ᠨᠢ᠄
《ᠨᠢᠭᠡ ᠶᠡᠬᠡ ᠳᠠᠯᠠᠢ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠦ᠍ ᠢᠷᠡᠪᠡ ᠃ ᠦᠬᠡᠷ ᠬᠠᠷᠠ ᠳᠤᠯ ᠵᠢᠭᠠᠰᠤᠨ ᠦᠵᠡᠭᠳᠡᠵᠦ ᠪᠠᠢᠨᠠ᠃》 ᠭᠡᠬᠦ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠴᠢ ᠲᠡᠷᠡ ᠵᠢᠭᠠᠰᠤᠨ ᠤ᠋ ᠭᠡᠳᠡᠰᠦ ᠶ᠋ᠢ ᠬᠠᠭᠠ ᠲᠠᠲᠠᠭᠠᠳ ᠳᠣᠲᠣᠷᠠᠬᠢ ᠮᠣᠯ ᠣᠯᠠᠭᠠ ᠡᠷᠳᠡᠨᠢ ᠶ᠋ᠢ ᠨᠢ ᠰᠤᠭᠤᠯᠠᠭᠠᠳ ᠠᠪᠤᠭᠠᠳ ᠢᠷᠡ!》
ᠭᠡᠬᠦ ᠳ᠋ᠦ᠍ ᠬᠥᠪᠡᠭᠦᠨ ᠦᠰᠦᠷᠴᠦ ᠪᠣᠰᠤᠭᠠᠳ ᠦᠬᠡᠷ ᠬᠠᠷᠠ ᠳᠤᠯ ᠵᠢᠭᠠᠰᠤᠨ ᠤ᠋ ᠭᠡᠳᠡᠰᠦ ᠶ᠋ᠢ ᠬᠠᠭᠠ ᠲᠠᠲᠠᠭᠠᠳ ᠳᠣᠲᠣᠷᠠᠬᠢ ᠮᠣᠯ ᠣᠯᠠᠭᠠ ᠡᠷᠳᠡᠨᠢ ᠶ᠋ᠢ ᠨᠢ ᠰᠤᠭᠤᠯᠵᠤ ᠠᠪᠴᠢᠷᠪᠠ᠃ ᠡᠭᠦᠨ ᠳ᠋ᠦ᠍ ᠠᠪᠤ ᠨᠢ᠄
《ᠵᠠ᠂ ᠲᠡᠭᠦᠨ ᠢ᠋ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠯ ᠮᠠᠩᠨᠠᠢ ᠳᠡᠭᠡᠷᠡ ᠳᠠᠷᠤᠭᠠᠳ ᠳᠡᠯᠪᠢ᠂ ᠠᠪᠤ ᠶ᠋ᠢᠨ ᠴᠢᠨᠢ ᠨᠢᠳᠦ ᠡᠳᠡᠭᠡᠨᠡ》 ᠭᠡᠪᠡ᠃
ᠬᠥᠪᠡᠭᠦᠨ ᠮᠣᠯ ᠣᠯᠠᠭᠠ ᠡᠷᠳᠡᠨᠢ ᠶ᠋ᠢ ᠭᠡᠳᠡᠷᠭᠦ ᠬᠡᠪᠲᠡᠭᠰᠡᠨ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠳᠡᠭᠡᠷᠡ ᠲᠠᠯᠪᠢᠬᠤᠯᠠ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠶ᠋ᠢᠨ ᠰᠣᠬᠣᠷᠠᠭᠰᠠᠨ ᠬᠣᠶᠠᠷ ᠨᠢᠳᠦ ᠨᠢ ᠡᠳᠡᠭᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ ᠳᠠᠬᠢᠨ ᠰᠣᠷᠢᠨᠵᠢᠨ ᠺᠣᠮᠪᠣ ᠬᠠᠨ ᠤ᠋ ᠳ᠋ᠤ᠌ ᠣᠴᠢᠬᠤ ᠪᠠᠷ ᠠᠷᠪᠠᠰ ᠬᠠᠷᠠ ᠬᠥᠪᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠭᠦᠷᠦᠭᠦᠯᠦᠨ ᠶᠠᠪᠤᠪᠠ᠃ ᠲᠡᠭᠦᠨ ᠦ᠌ ᠢᠷᠡᠵᠦ ᠪᠠᠢᠭᠠ ᠴᠢᠮᠡᠭᠡ ᠶ᠋ᠢ ᠨᠢ ᠰᠣᠷᠢᠨᠵᠢᠨ ᠺᠣᠮᠪᠣ ᠬᠠᠨ ᠰᠣᠨᠣᠰᠤᠭᠠᠳ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠭᠠᠵᠠᠷ ᠠ᠋ᠴᠠ ᠡᠯᠴᠢ ᠲᠣᠮᠢᠯᠠᠨ ᠣᠴᠢᠭᠤᠯᠵᠤ᠂ ᠤᠭᠲᠤᠨ ᠠᠪᠴᠢᠷᠠᠭᠠᠳ ᠵᠠᠯᠠᠨ ᠵᠣᠴᠢᠯᠠᠵᠠᠢ᠃ ᠡᠭᠦᠨ ᠳ᠋ᠦ᠍ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠵᠠ᠂ᠪᠢ ᠬᠠᠨ ᠲᠠᠨ ᠢ᠋ ᠬᠠᠨ ᠴᠠᠭ ᠲᠤ᠌ ᠣᠢᠲᠤ ᠮᠡᠷᠭᠡᠨ ᠲᠦᠰᠢᠮᠡᠯ ᠨᠢ ᠪᠣᠯᠵᠤ ᠲᠥᠷᠥᠯᠡ᠃ ᠬᠢᠲᠠᠳ ᠤ᠋ᠨ ᠺᠣᠮᠪᠣ ᠬᠠᠨ ᠳ᠋ᠤ᠌ ᠰᠤᠮᠤᠴᠢ ᠪᠠᠷᠢᠶᠠᠴᠢ ᠪᠣᠯᠵᠤ ᠲᠥᠷᠥᠯᠡ᠃ ᠭᠡᠰᠡᠷ ᠪᠣᠭᠳᠠ ᠬᠠᠨ ᠳ᠋ᠤ᠌ ᠪᠢᠯᠢᠭ ᠦ᠋ᠨ ᠬᠡᠭᠡᠷ ᠮᠣᠷᠢ ᠨᠢ ᠪᠣᠯᠵᠤ ᠲᠥᠷᠥᠯᠡ᠃ ᠣᠳᠣ ᠲᠠ ᠠᠯᠢ ᠨᠢᠳᠦ ᠶ᠋ᠢ ᠮᠢᠨᠢ ᠰᠣᠬᠣᠯᠬᠤ ᠭᠡᠵᠦ ᠪᠠᠢᠨᠠ》 ᠭᠡᠬᠦ ᠳ᠋ᠦ᠍ ᠰᠣᠷᠢᠨᠵᠢᠨ ᠺᠣᠮᠪᠣ ᠬᠠᠨ ᠬᠠᠷᠠ ᠴᠠᠭᠠᠨ ᠳᠠᠭᠤ ᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃
ᠲᠡᠭᠡᠭᠡᠳ ᠣᠢᠲᠤ ᠮᠡᠷᠭᠡᠨ ᠲᠠᠮᠤᠨᠠ᠄
《ᠡᠨᠡ ᠡᠷᠳᠡᠨᠢ ᠵᠣᠣ ᠳ᠋ᠤ᠌ ᠪᠠᠢᠬᠤ ᠵᠥᠪᠲᠡᠢ》 ᠭᠡᠵᠦ ᠬᠡᠯᠡᠭᠡᠳ ᠮᠣᠯ ᠣᠯᠠᠭᠠ ᠡᠷᠳᠡᠨᠢ ᠶ᠋ᠢ ᠵᠣᠣ ᠳ᠋ᠤ᠌ ᠥᠭᠴᠦ ᠬᠠᠳᠠᠭᠭᠠᠯᠠᠭᠣᠯᠣᠭᠰᠠᠠ ᠭᠡᠨᠡ᠃
ᠵᠡᠭᠦᠯᠲᠡ᠄
ᠲᠤᠰ ᠵᠣᠬᠢᠶᠠᠯ ᠢ᠋ ᠰᠢᠨᠵᠢᠶᠠᠩ ᠤ᠋ᠨ《ᠬᠠᠨ ᠲᠩᠷᠢ》 ᠰᠡᠳᠬᠦᠯ ᠦ᠋ᠨ1988 ᠣᠨ ᠤ᠋4 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ ᠠ᠋ᠴᠠ ᠰᠣᠩᠭᠣᠪᠠ᠃ ᠳᠤ· ᠶᠠᠷᠢᠮᠫᠧᠯ ᠦ᠋ᠨ ᠬᠡᠯᠡᠭᠰᠡᠨ ᠢ᠋ ᠯ· ᠪᠠᠲᠤᠬᠤᠳᠴᠠᠷ ᠲᠡᠮᠳᠡᠭᠯᠡᠵᠦ᠂ ᠣᠶᠤᠨᠭᠡᠷᠡᠯ ᠬᠤᠳᠤᠮᠴᠢᠯᠠᠪᠠ᠃ ᠲᠤᠰ ᠨᠣᠮ ᠳ᠋ᠤ᠌ ᠰᠣᠩᠭᠣᠭᠳᠠᠬᠤ ᠳ᠋ᠠᠭᠠᠨ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠠᠯᠠ ᠪᠠᠷ ᠪᠠᠭᠠ ᠵᠠᠰᠠᠯᠲᠠ ᠬᠢᠵᠦ᠂ ᠠᠭᠤᠯᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠪᠠᠭᠠ ᠲᠣᠪᠴᠢᠯᠠᠭᠰᠠᠨ ᠪᠣᠯᠬᠤ ᠪᠠᠨ ᠲᠣᠳᠣᠷᠬᠠᠢᠯᠠᠶᠠ᠃
ᠦᠰᠦᠭ ᠠᠮᠢᠯᠠᠭᠤᠯᠴᠢᠬᠠᠵᠠᠢ᠄ ᠲᠣᠳᠤᠭᠡᠷᠡᠯ᠂ ᠲ᠂ ᠴᠠᠭᠠᠨ᠂ ᠳ᠂ ᠣᠶᠤᠨᠴᠢᠮᠡᠭ ᠂ ᠨᠠ᠊᠂ ᠴᠠᠭᠠᠨ᠂ ᠪᠦᠷᠢᠨᠴᠡᠴᠡᠭ ᠂ ᠬᠦᠭᠵᠢᠯᠴᠡᠴᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠲᠣᠭᠲᠠᠭᠤᠨ᠂ ᠲᠣᠳᠤᠭᠡᠷᠡᠯ