ᠠᠷᠭᠠ ᠠᠯᠳᠠᠬᠤ ᠦᠭᠡᠢ ᠪᠣᠯ ᠪᠠᠷᠰ ᠊ᠢ ᠠᠶᠤᠯᠭᠠᠨᠠАрга алдахгүй бол барыг айлгана Arga aldakhgüi bol baryg ailgana
463
ᠠᠷᠭᠠ ᠠᠯᠳᠠᠬᠤ ᠦᠭᠡᠢ ᠪᠣᠯ ᠪᠠᠷᠰ ᠢ᠋ ᠠᠶᠤᠯᠭᠠᠨᠠ
ᠡᠷᠲᠡ ᠤᠷᠢᠳᠤ ᠨᠢᠭᠡᠨ ᠴᠠᠭ ᠲᠤ᠌᠂ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠪᠠᠢᠵᠠᠢ᠃ ᠴᠥᠭᠡᠬᠡᠨ ᠬᠡᠳᠦᠨ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠵᠤ ᠠᠮᠢᠳᠤᠷᠠᠳᠠᠭ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ ᠡᠪᠦᠭᠡᠨ ᠬᠡᠳᠦᠨ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠤᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌᠂ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠰᠠᠯᠬᠢᠨ ᠳᠡᠭᠳᠡᠵᠦ᠂ ᠪᠠᠷᠠᠭᠠᠨ ᠥᠩᠭᠡᠲᠡᠢ ᠡᠭᠦᠯᠡ᠂ ᠴᠡᠯᠮᠡᠭ ᠲᠩᠷᠢ ᠶ᠋ᠢ ᠪᠦᠷᠬᠦᠵᠦ᠂ ᠪᠦᠷᠬᠦᠭ ᠬᠠᠷᠠᠩᠭᠤᠢ ᠪᠣᠯᠵᠤ᠂ ᠶᠡᠬᠡ ᠴᠠᠰᠤ ᠰᠢᠭᠤᠷᠭᠠᠨ ᠪᠣᠰᠴᠤ᠂ ᠶᠠᠪᠤᠬᠤ ᠵᠠᠮ ᠢ᠋ ᠨᠢ ᠪᠠᠯᠠᠷᠠᠭᠤᠯᠵᠤ᠂ ᠲᠩᠷᠢ ᠭᠠᠵᠠᠷ ᠦᠷᠭᠦᠯᠵᠢᠯᠡᠨ ᠴᠠᠰᠤᠨ ᠳᠠᠯᠠᠢ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠮᠠᠰᠢ ᠲᠠᠭᠠᠷᠠᠵᠤ ᠴᠥᠭᠡᠬᠡᠨ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠪᠠᠨ ᠬᠥᠭᠡᠭᠡᠵᠦ᠂ ᠵᠦᠭ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠪᠠᠷᠲᠠᠭᠠᠨ ᠲᠠᠢ ᠬᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠣᠷᠣᠭᠠᠳ᠂ ᠳᠠᠯᠳᠠᠯᠠᠬᠤ ᠨᠥᠮᠥᠷᠢ ᠶ᠋ᠢ ᠡᠷᠢᠨ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌᠂ ᠠᠭᠤᠯᠠᠨ ᠤ᠋ ᠪᠠᠯ ᠳ᠋ᠤ᠌ ᠨᠢᠭᠡᠨ ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠤᠷᠲᠤ ᠴᠠᠭᠠᠨ ᠭᠡᠷ ᠬᠠᠷᠠᠭᠳᠠᠵᠤ ᠭᠡᠨᠡ᠃
ᠴᠢᠩᠭᠢᠭᠡᠳ ᠡᠪᠦᠭᠡᠨ ᠣᠴᠢᠵᠤ ᠡᠭᠦᠳᠡ ᠶ᠋ᠢ ᠨᠢ ᠲᠦᠯᠬᠢᠵᠦ ᠦᠵᠡᠭᠰᠡᠨ ᠳ᠋ᠦ᠍᠂ ᠬᠠᠷᠢᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤ ᠪᠠᠷ ᠲᠦᠯᠬᠢᠨ ᠲᠤᠯᠤᠭᠰᠠᠨ ᠪᠠᠢᠵᠠᠢ᠂ ᠡᠪᠦᠭᠡᠨ ᠡᠨᠡ ᠦᠶᠡ ᠳ᠋ᠦ᠍ ᠮᠠᠰᠢ ᠲᠠᠭᠠᠷᠠᠵᠤ ᠪᠡᠭᠡᠷᠡᠵᠦ ᠪᠠᠢᠭᠰᠠᠨ ᠲᠤᠯᠠ᠂ ᠡᠨᠡ ᠭᠡᠷ ᠲᠦ᠍ ᠣᠷᠣᠵᠤ ᠳᠤᠯᠠᠭᠠᠴᠠᠶᠠ ᠭᠡᠵᠦ ᠪᠣᠳᠣᠭᠠᠳ ᠪᠦᠬᠦ ᠴᠢᠳᠠᠯ ᠲᠡᠩᠬᠡ ᠪᠡᠨ ᠭᠠᠷᠭᠠᠵᠤ ᠲᠦᠯᠬᠢᠭᠰᠡᠭᠡᠷ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤ ᠶ᠋ᠢ ᠨᠢ ᠲᠣᠩᠭᠣᠷᠤᠭᠤᠯᠵᠤ᠂ ᠭᠡᠷ ᠲᠦ᠋ᠨᠢ ᠣᠷᠣᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠠᠷᠤ ᠳᠡᠭᠡᠷᠡ ᠨᠢ ᠨᠢᠭᠡᠨ ᠬᠦᠷᠡᠩ ᠡᠷᠢᠶᠡᠨ ᠪᠠᠷᠰ᠂ ᠳᠥᠷᠪᠡᠨ ᠬᠥᠯ ᠢ᠋ᠶ᠋ᠡᠨ ᠲᠡᠷᠡᠢᠯᠭᠡᠨ ᠬᠡᠪᠲᠡᠨ᠂ ᠤᠨᠲᠠᠵᠤ ᠪᠠᠢᠨᠠ ᠭᠡᠨᠡ᠃
ᠡᠪᠦᠭᠡᠨ ᠦᠵᠡᠭᠡᠳ ᠪᠠᠯᠠᠷᠠᠲᠠᠯᠠ ᠠᠶᠤᠵᠤ᠂ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠤ᠋ ᠳᠠᠯᠳᠠ ᠣᠷᠣᠵᠤ ᠨᠢᠭᠤᠭᠰᠠᠨ ᠳ᠋ᠤ᠌ ᠪᠠᠷᠰ ᠭᠡᠨᠡᠳᠲᠡ ᠦᠰᠦᠷᠦᠨ ᠪᠣᠰᠴᠤ᠂ ᠬᠡᠨ ᠮᠢᠨᠦ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ? ᠭᠡᠳ ᠶᠡᠬᠡ ᠠᠭᠤᠷᠯᠠᠵᠤ᠂ ᠢᠯᠳᠦ ᠪᠡᠨ ᠰᠤᠭᠤ ᠲᠠᠲᠠᠵᠤ᠂ ᠡᠭᠦᠳᠡᠨ ᠦ᠌ ᠵᠦᠭ ᠨᠢᠭᠡᠨᠲᠡ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠢᠯᠳᠦᠨ ᠦ᠌ ᠦᠵᠦᠭᠦᠷ ᠨᠢ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠣᠰᠴᠤ᠂ ᠦᠵᠦᠭᠦᠷ ᠨᠢ ᠦᠭᠡᠢ ᠪᠣᠯᠵᠠᠢ᠃ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠢᠯᠳᠦᠨ ᠦ᠌ ᠳᠤᠮᠳᠠᠭᠤᠷ ᠨᠢ ᠠᠯᠠᠭᠠ ᠪᠣᠯᠵᠤ᠂ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠡᠰᠢ ᠶ᠋ᠢᠨ ᠲᠡᠳᠦᠢᠯᠡ ᠦᠯᠡᠳᠡᠭᠰᠡᠨ ᠳ᠋ᠦ᠍ ᠪᠠᠷᠰ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠪᠢ ᠴᠢᠮᠠᠶ᠋ᠢ ᠴᠠᠪᠴᠢᠵᠤ ᠠᠯᠠᠪᠠ ᠭᠡᠳ ᠭᠡᠳᠡᠷᠭᠡᠨ ᠬᠡᠪᠲᠡᠵᠦ ᠬᠤᠷᠬᠢᠷᠠᠨ ᠤᠨᠲᠠᠵᠠᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ᠂ ᠪᠠᠷᠰ ᠪᠣᠰᠤᠭᠠᠳ ᠦᠵᠡᠭᠰᠡᠨ ᠳ᠋ᠦ᠍ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠤ᠋ ᠬᠣᠢᠨᠠ ᠨᠢ ᠨᠢᠭᠡᠨ ᠡᠪᠦᠭᠡᠨ ᠬᠠᠮᠠᠷ ᠲᠠᠲᠠᠵᠤ ᠤᠨᠲᠠᠵᠤ ᠪᠠᠢᠵᠠᠢ᠂ ᠪᠠᠷᠰ ᠦᠵᠡᠭᠡᠳ᠄《ᠬᠦᠢ! ᠡᠪᠦᠭᠡᠨ ᠠ᠋! ᠦᠷ ᠴᠠᠢᠵᠤ ᠥᠷᠯᠥᠭᠡ ᠪᠣᠯᠵᠠᠢ᠃ ᠬᠤᠷᠳᠤᠨ ᠪᠣᠰᠤᠭᠲᠤᠨ!》 ᠭᠡᠵᠦ᠂ ᠡᠪᠦᠭᠡᠨ ᠢ᠋ ᠲᠦᠯᠬᠢᠭᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠨᠢᠳᠦ ᠪᠡᠨ ᠨᠤᠬᠤᠯᠠᠨ ᠪᠣᠰᠤᠭᠠᠳ᠂ ᠮᠠᠭᠤ ᠨᠢᠳᠦ ᠪᠡᠷ ᠪᠠᠷᠰ ᠢ᠋ ᠦᠵᠡᠭᠡᠳ ᠬᠡᠯᠡᠭᠰᠡᠨ ᠨᠢ᠄《ᠴᠢ ᠶᠠᠮᠠᠷ ᠣᠯᠢᠭ ᠦᠭᠡᠢ ᠠᠮᠢᠲᠠᠨ ᠪᠣᠢ! ᠥᠴᠥᠭᠡᠳᠦᠷ ᠰᠥᠨᠢ ᠬᠥᠮᠦᠨ ᠢ᠋ ᠠᠮᠤᠷ ᠤᠨᠲᠠᠭᠤᠯᠬᠤ ᠦᠭᠡᠢ ᠴᠢᠮᠬᠢᠵᠦ ᠨᠢᠰᠠᠯᠠᠭᠠᠳ ᠪᠠᠢᠬᠤ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠪᠠᠷᠰ᠂ ᠮᠡᠳᠡᠭᠡ ᠦᠭᠡᠢ ᠪᠣᠯᠲᠠᠯᠠ ᠠᠶᠤᠵᠤ᠂ ᠪᠣᠳᠣᠭᠰᠠᠨ ᠨᠢ᠄《ᠲᠩᠷᠢ ᠨᠠᠮᠠᠶ᠋ᠢ ᠠᠪᠤᠷᠠ! ᠪᠢ ᠬᠠᠷᠢᠨ ᠪᠦᠬᠦᠯᠢ ᠪᠡᠶᠡ ᠶ᠋ᠢᠨ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠠᠪᠴᠢᠭᠰᠠᠨ ᠢ᠋ ᠡᠨᠡ ᠬᠠᠷᠢᠨ ᠴᠢᠬᠢᠮᠵᠦ ᠨᠢᠰᠠᠯᠠᠪᠠ ᠭᠡᠨᠡ᠃ ᠡᠨᠡ ᠶᠠᠮᠠᠷ ᠠᠶᠤᠮᠰᠢᠭ ᠲᠠᠢ ᠠᠮᠢᠲᠠᠨ ᠪᠣᠢ!》 ᠭᠡᠵᠦ ᠴᠡᠴᠡᠷᠡᠨ ᠳᠠᠭᠵᠢᠨ ᠰᠠᠭᠤᠬᠤ ᠳ᠋ᠤ᠌᠂ ᠡᠪᠦᠭᠡᠨ ᠦᠵᠡᠭᠡᠳ ᠡᠨᠡ ᠰᠦᠷᠡᠬᠡᠢ ᠠᠮᠢᠲᠠᠨ ᠮᠢᠨᠦ ᠠᠷᠭᠠ ᠳ᠋ᠤ᠌ ᠣᠨᠣᠭᠳᠠᠪᠠ ᠭᠡᠵᠦ ᠪᠣᠳᠣᠭᠠᠳ᠂ ᠬᠡᠯᠡᠭᠰᠡᠨ ᠨᠢ᠄《ᠪᠢ ᠬᠠᠷᠢᠨ ᠠᠯᠢ ᠴᠤ᠌ ᠡᠳᠦᠷ ᠭᠡᠰᠡᠨ ᠭᠠᠳᠠᠭᠰᠢ ᠭᠠᠷᠴᠤ ᠭᠠᠨᠵᠤᠭᠠ ᠲᠠᠢ ᠬᠠᠷᠠᠳᠠᠭ ᠶᠤᠮ᠃ ᠡᠨᠡ ᠡᠳᠦᠷ ᠬᠠᠷᠢᠨ ᠴᠢᠨᠦ ᠡᠨᠳᠡ ᠢᠷᠡᠭᠡᠳ ᠰᠢᠭᠤᠳᠠᠢ ᠮᠥᠩᠭᠥ ᠣᠯᠤᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ᠂ ᠰᠦᠷᠡᠬᠡᠢ ᠰᠠᠢᠬᠠᠨ ᠪᠠᠷᠰ ᠤ᠋ᠨ ᠠᠷᠠᠰᠤ ᠬᠠᠷᠠᠭᠳᠠᠨᠠ》 ᠭᠡᠵᠦ ᠪᠠᠷᠰ ᠢ᠋ ᠳᠡᠮᠡᠢᠯᠡ ᠦᠵᠡᠬᠦᠢ ᠳ᠋ᠦ᠍ ᠪᠠᠷᠰ᠄ ᠣᠳᠣ ᠨᠠᠮᠠᠶ᠋ᠢ ᠶ᠋ᠢ ᠠᠯᠠᠵᠤ ᠠᠷᠠᠰᠤ ᠶ᠋ᠢ ᠮᠢᠨᠢ ᠠᠪᠤᠨᠠ ᠭᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠂ ᠶᠡᠬᠡ ᠠᠶᠤᠵᠤ᠂ ᠡᠪᠦᠭᠡᠨ ᠦ᠌ ᠡᠮᠦᠨᠡ ᠲᠦᠰ ᠬᠢᠲᠡᠯᠡ ᠰᠥᠭᠥᠳᠦᠭᠡᠳ᠄《ᠡᠪᠦᠭᠡᠨ ᠭᠤᠸᠠᠢ᠂ ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠ! ᠤᠳᠠᠯ ᠦᠭᠡᠢ ᠪᠢ ᠨᠢᠭᠡ ᠳᠡᠭᠲᠦ ᠲᠡᠢ ᠮᠥᠩᠭᠥ ᠬᠦᠷᠭᠡᠵᠦ ᠣᠴᠢᠶᠠ᠃ ᠠᠷᠠᠰᠤ ᠶ᠋ᠢ ᠮᠢᠨᠢ ᠠᠪᠬᠤ ᠪᠠᠨ ᠪᠠᠢᠨᠠᠤ!》 ᠭᠡᠰᠡᠨ ᠳ᠋ᠦ᠍ ᠡᠪᠦᠭᠡᠨ ᠶᠡᠬᠡ ᠪᠣᠳᠣᠯᠭᠠ ᠲᠠᠢ ᠰᠢᠭ᠋ ᠰᠠᠭᠤᠵᠤ ᠪᠠᠢᠭᠠᠳ᠄《ᠵᠧ᠂ ᠲᠡᠭᠡᠶᠡ᠂ ᠪᠢ ᠣᠳᠣ ᠶᠠᠪᠤᠨᠠ᠃ ᠴᠢ ᠤᠳᠠᠯ ᠦᠭᠡᠢ ᠮᠢᠨᠦ ᠭᠡᠷ ᠲᠦ᠍ ᠬᠥᠷᠥᠭᠲᠦᠨ᠃ ᠪᠢ ᠴᠢᠮᠠᠶ᠋ᠢ ᠶ᠋ᠢ ᠰᠠᠢᠨ ᠵᠣᠴᠢᠨ ᠢ᠋ᠶ᠋ᠠᠷ ᠳᠠᠢᠯᠠᠵᠤ᠂ ᠴᠠᠢ ᠤᠤᠭᠤᠯᠭᠠᠶᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠴᠠᠢ ᠭᠡᠵᠦ ᠰᠣᠨᠣᠰᠤᠭᠠᠳ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠵᠤ᠄《ᠵᠧ! ᠪᠢ ᠤᠳᠠᠯ ᠦᠭᠡᠢ ᠲᠠᠨ ᠳ᠋ᠤ᠌ ᠬᠦᠷᠦᠨᠡ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠠᠳ ᠡᠪᠦᠭᠡᠨ ᠢ᠋ ᠬᠦᠷᠭᠡᠵᠦ ᠶᠠᠪᠤᠭᠤᠯᠪᠠ᠃
ᠡᠪᠦᠭᠡᠨ ᠮᠥᠨ ᠳᠣᠲᠣᠷᠠ ᠪᠠᠨ ᠪᠢ ᠬᠠᠷᠢᠨ ᠡᠢᠮᠦ ᠨᠢᠭᠡᠨ ᠠᠷᠭᠠ ᠪᠠᠷ ᠪᠡᠶᠡ ᠪᠡᠨ ᠠᠪᠤᠷᠠᠪᠠ ᠭᠡᠵᠦ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠬᠡᠳᠦᠨ ᠴᠥᠭᠡᠬᠡᠨ ᠬᠣᠨᠢ ᠢᠮᠠᠭᠠ ᠪᠠᠨ ᠬᠣᠷᠢᠶᠠᠨ ᠳ᠋ᠠᠭᠠᠨ ᠬᠣᠷᠢᠵᠤ᠂ ᠭᠡᠷ ᠲᠡᠭᠡᠨ ᠣᠷᠣᠭᠠᠳ᠂ ᠡᠮᠡᠭᠡᠨ ᠳ᠋ᠡᠭᠡᠨ ᠥᠴᠥᠭᠡᠳᠦᠷ ᠰᠥᠨᠢ ᠲᠠᠭᠠᠷᠠᠭᠰᠠᠨ ᠰᠣᠨᠢᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠡᠬᠢ ᠳᠠᠷᠠᠭᠠ ᠪᠠᠷ ᠨᠢ ᠬᠡᠯᠡᠵᠦ ᠥᠭᠭᠦᠭᠡᠳ᠂ ᠪᠠᠰᠠ ᠵᠠᠬᠢᠵᠤ ᠬᠡᠯᠡᠭᠰᠡᠨ ᠨᠢ᠄《ᠤᠳᠠᠯ ᠦᠭᠡᠢ ᠪᠠᠷᠰ ᠢᠷᠡᠬᠦ ᠮᠠᠭᠠᠳ ᠦᠭᠡᠢ᠃ ᠴᠢᠩᠭᠡᠪᠡᠯ ᠴᠢ ᠴᠠᠢ ᠬᠢᠵᠦ ᠥᠭ᠃ ᠴᠢᠩᠭᠢᠭᠡᠳ ᠳᠠᠷᠠᠭᠠ ᠪᠠᠷ ᠨᠢ ᠴᠢ ᠨᠠᠳᠠ ᠠ᠋ᠴᠠ ᠶᠠᠮᠠᠷ ᠬᠣᠭᠣᠯᠠ ᠢᠳᠡᠬᠦ ᠪᠣᠢ ᠭᠡᠵᠦ ᠠᠰᠠᠭᠤᠭᠲᠤᠨ᠃ ᠴᠢᠩᠭᠡᠪᠡᠯ ᠮᠢᠨᠦ ᠬᠠᠷᠢᠭᠤᠯᠬᠤ ᠦᠭᠡ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠡᠮᠡᠭᠡᠨ ᠨᠢ ᠵᠧ ᠭᠡᠵᠦ ᠰᠦ ᠲᠡᠢ ᠴᠠᠢ ᠪᠤᠴᠠᠯᠭᠠᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠥᠨᠥ ᠪᠠᠷᠰ ᠨᠢᠭᠡᠨ ᠶᠡᠬᠡ ᠳᠡᠭᠲᠦ ᠡᠭᠦᠷᠴᠦ᠂ ᠬᠥᠯᠥᠰᠥ ᠪᠠᠭᠠᠰᠤ ᠭᠣᠭᠣᠵᠢᠭᠤᠯᠤᠨ ᠢᠷᠭᠡᠳ᠂ ᠳᠡᠭᠲᠦ ᠲᠡᠢ ᠮᠥᠩᠭᠥ ᠪᠡᠨ ᠬᠦᠷᠢᠶᠡᠨ ᠡᠭᠦᠳᠡᠨ ᠳ᠋ᠦ᠍ ᠲᠠᠯᠪᠢᠭᠠᠳ ᠰᠠᠭᠤᠵᠤ ᠠᠮᠢᠰᠤᠭᠠ ᠳᠡᠭᠡᠷᠡᠳᠴᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠦ᠌ ᠴᠥᠭᠡᠬᠡᠨ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠨᠢ ᠦᠷᠭᠦᠨ ᠰᠢᠬᠠᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠠᠭᠴᠠ ᠤᠬᠤᠨᠠ ᠪᠠᠷᠰ ᠢ᠋ ᠦᠵᠡᠭᠡᠳ ᠶᠡᠬᠡ ᠭᠠᠢᠬᠠᠵᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ᠶ᠋ᠠᠨ ᠪᠠᠢᠴᠠᠭᠠᠬᠤ ᠳ᠋ᠤ᠌᠂ ᠪᠠᠷᠰ ᠴᠤ᠌ ᠤᠬᠤᠨᠠ ᠶ᠋ᠢ ᠦᠵᠡᠭᠡᠳ ᠲᠠᠨᠢᠬᠤ ᠦᠭᠡᠢ ᠲᠤᠯᠠ᠂ ᠪᠠᠰᠠ ᠶᠡᠬᠡ ᠰᠣᠨᠢᠷᠬᠠᠯ ᠪᠣᠯᠭᠠᠵᠤ ᠰᠢᠷᠲᠡᠨ ᠦᠵᠡᠭᠰᠡᠭᠡᠷ᠂ ᠤᠬᠤᠨᠠ ᠶ᠋ᠢᠨ ᠰᠠᠯᠲᠠᠭᠠᠨ ᠳᠣᠲᠣᠷᠠ ᠤᠨᠵᠠᠢᠵᠤ ᠶᠠᠭᠤᠮᠠ ᠶ᠋ᠢ ᠨᠢ ᠭᠡᠨᠡᠳᠲᠡ ᠣᠯᠵᠤ ᠦᠵᠡᠭᠡᠳ᠄《ᠬᠦᠢ᠂ ᠠᠪᠤᠭᠠᠢ! ᠲᠠᠨ ᠤ᠋ ᠲᠡᠷᠡ ᠤᠨᠵᠡᠢᠵᠤ ᠪᠠᠢᠭᠠ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠤᠬᠤᠨᠠ᠄《ᠠ! ᠡᠨᠡ ᠪᠣᠯ ᠢᠳᠡᠵᠦ ᠤᠤᠭᠤᠵᠤ ᠦᠯᠡᠳᠡᠭᠰᠡᠨ ᠢ᠋ᠶ᠋ᠡᠨ ᠠᠭᠤᠳᠠᠯᠳᠠᠭ ᠤᠭᠤᠲᠠ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠤᠬᠤᠨᠠ ᠰᠠᠬᠠᠯ ᠢ᠋ ᠨᠢ ᠦᠵᠡᠭᠡᠳ᠄《ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠤᠬᠤᠨᠠ᠄《ᠡᠨᠡ ᠪᠣᠯ ᠪᠠᠷᠰ ᠢ᠋ ᠪᠦᠬᠦᠯᠢ ᠪᠡᠷ ᠨᠢ ᠵᠠᠯᠭᠢᠭᠠᠳ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠨ ᠠᠷᠴᠢᠳᠠᠭ ᠠᠯᠴᠢᠭᠤᠷ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠪᠠᠬᠠᠨ ᠠᠶᠤᠵᠤ᠄《ᠠ! ᠲᠡᠢᠮᠦ ᠤᠤ? ᠠᠪᠤᠭᠠᠢ! ᠲᠠᠨ ᠤ᠋ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠨᠢ ᠪᠠᠢᠭᠠ ᠬᠣᠶᠠᠷ ᠦᠵᠦᠭᠦᠷ ᠲᠡᠢ ᠶᠠᠭᠤᠮᠠ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠵᠦ ᠤᠬᠤᠨᠠ ᠶ᠋ᠢᠨ ᠡᠪᠡᠷ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠤᠬᠤᠨᠠ ᠶᠡᠬᠡ ᠮᠠᠶᠢᠭ ᠭᠠᠷᠭᠠᠵᠤ ᠬᠦᠴᠦᠷᠬᠡᠭ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠢᠯᠠᠨ᠄《ᠡᠨᠡ ᠪᠣᠯ ᠴᠢᠮᠠᠶ᠋ᠢ ᠵᠢᠳᠠᠯᠠᠳᠠᠭ ᠵᠢᠳᠠ ᠪᠠᠢᠨᠠ》 ᠭᠡᠵᠦ ᠦᠰᠦᠷᠦᠨ ᠮᠥᠷᠭᠥᠯᠡᠬᠦ ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠴᠢᠴᠠᠭᠠ ᠠᠯᠳᠠᠲᠠᠯᠠ ᠠᠶᠤᠵᠤ᠂ ᠭᠡᠳᠡᠷᠭᠡᠨ ᠵᠠᠢᠯᠠᠭᠠᠳ᠂ ᠡᠪᠦᠭᠡᠨ ᠦ᠌ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ ᠬᠠᠷᠢᠨ ᠬᠣᠢᠨᠠ ᠪᠠᠨ ᠰᠠᠭᠤᠵᠤ᠂ ᠳᠡᠭᠡᠷᠡ ᠪᠡᠶᠡ ᠪᠡᠨ ᠨᠢᠴᠦᠭᠦᠯᠡᠵᠦ ᠴᠠᠢ ᠤᠤᠭᠤᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃
ᠪᠠᠷᠰ ᠣᠷᠣᠵᠤ ᠢᠷᠡᠭᠡᠳ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠨᠢ ᠰᠠᠭᠤᠵᠤ᠂ ᠡᠪᠦᠭᠡᠨ ᠳ᠋ᠦ᠍᠄《ᠡᠪᠦᠭᠡᠨ ᠭᠤᠸᠠᠢ ᠴᠢᠨᠦ ᠡᠭᠦᠳᠡ ᠶ᠋ᠢ ᠰᠠᠬᠢᠵᠤ ᠪᠠᠢᠭᠠ ᠲᠡᠷᠡ ᠴᠠᠭᠠᠨ ᠥᠩᠭᠡᠲᠡᠢ ᠬᠣᠣᠰ ᠵᠢᠳᠠ ᠲᠠᠢ ᠠᠮᠢᠲᠠᠨ ᠴᠢᠨᠢ ᠶᠠᠮᠠᠷ ᠬᠡᠴᠡᠭᠦᠦ ᠠᠮᠢᠲᠠᠨ ᠪᠣᠢ? ᠨᠠᠮᠠᠶ᠋ᠢ ᠠᠷᠠᠢ ᠯᠠ ᠵᠢᠳᠠᠯᠠᠵᠤ ᠠᠯᠠᠴᠢᠬᠠᠭᠰᠠᠨ ᠦᠭᠡᠢ》 ᠭᠡᠳ ᠠᠮᠢᠰᠬᠤᠭᠠ ᠳᠡᠭᠡᠷᠡᠳᠴᠦ ᠰᠠᠭᠤᠬᠤ ᠳ᠋ᠤ᠌᠂ ᠡᠪᠦᠭᠡᠨ᠄《ᠵᠧ᠂ ᠴᠢ ᠮᠢᠨᠢ᠂ ᠬᠠᠷᠢᠨ ᠪᠤᠤ ᠠᠶᠤᠵᠤ ᠰᠦᠨᠡᠰᠦ ᠪᠡᠨ ᠠᠯᠳᠠᠴᠢᠬᠠ ᠳᠠ! ᠴᠠᠢ ᠤᠤᠭᠤ!》 ᠭᠡᠵᠦ ᠪᠠᠷᠰ ᠲᠤ᠌ ᠰᠦ ᠲᠡᠢ ᠴᠠᠢ ᠬᠢᠵᠦ ᠤᠤᠭᠤᠯᠭᠠᠬᠤ ᠳ᠋ᠤ᠌ ᠪᠠᠷᠰ ᠬᠠᠷᠢᠨ ᠰᠦ ᠲᠡᠢ ᠴᠠᠢ ᠳ᠋ᠤ᠌ ᠶᠡᠬᠡ ᠳᠤᠷᠠᠲᠠᠢ ᠪᠣᠯᠵᠤ ᠬᠡᠳᠦᠨ ᠠᠶᠠᠭᠠ ᠤᠤᠭᠤᠭᠰᠠᠨ ᠬᠣᠢᠨᠠ᠂ ᠡᠮᠡᠭᠡᠨ ᠨᠢ ᠪᠠᠷᠰ ᠤ᠋ᠨ ᠠᠪᠴᠢᠷᠠᠭᠰᠠᠨ ᠳᠡᠭᠲᠦ ᠲᠡᠢ ᠮᠥᠩᠭᠥ ᠶ᠋ᠢ ᠨᠢ ᠠᠪᠤᠭᠠᠳ᠂ ᠣᠷᠣᠵᠤ ᠢᠷᠡᠨ ᠡᠪᠦᠭᠡᠨ ᠡᠴᠡ᠄《ᠶᠠᠮᠠᠷ ᠬᠣᠭᠣᠯᠠ ᠢᠳᠡᠬᠦ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠶᠡᠬᠡ ᠤᠳᠬᠠ ᠭᠦᠨ ᠰᠢᠭ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠠᠭᠠᠳ᠂ ᠡᠮᠡᠭᠡᠨ ᠢ᠋ᠶ᠋ᠡᠨ ᠵᠠᠩᠨᠠᠭᠰᠠᠨ ᠨᠢ᠄《ᠥᠴᠥᠭᠡᠳᠦᠷ ᠠᠯᠠᠭᠰᠠᠨ ᠪᠠᠷᠰ ᠤ᠋ᠨ ᠡᠪᠴᠢᠭᠦᠦ ᠪᠠᠢᠬᠤ ᠦᠭᠡᠢ ᠤᠤ? ᠬᠡᠷᠪᠡ ᠴᠥᠮ ᠪᠠᠷᠠᠭᠳᠠᠭᠰᠠᠨ ᠪᠣᠯ ᠡᠨᠳᠡ ᠰᠠᠭᠤᠵᠤ ᠪᠠᠢᠭᠠ᠁ ᠶ᠋ᠢ ᠣᠯᠵᠤ ᠦᠵᠡᠬᠦ ᠦᠭᠡᠢ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ᠄《ᠠ! ᠴᠢᠮᠠᠶ᠋ᠢ ᠨᠠᠮᠠᠶ᠋ᠢ ᠢᠳᠡᠨᠡ ᠭᠡᠵᠦ ᠪᠠᠢᠨᠠ》 ᠶᠡᠬᠡᠯᠡ ᠠᠶᠤᠵᠤ ᠭᠣᠳ ᠭᠠᠷᠤᠨ ᠳᠤᠲᠠᠭᠠᠬᠤ ᠳ᠋ᠤ᠌ ᠬᠦᠷᠢᠶᠡᠨ ᠦ᠌ ᠳᠤᠮᠳᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠤᠬᠤᠨᠠ ᠲᠠᠢ ᠠᠭᠤᠯᠵᠠᠨ ᠨᠡᠩ ᠠᠶᠤᠵᠤ᠂ ᠠᠮᠢ ᠲᠠᠯᠪᠢᠨ ᠳᠣᠪᠲᠣᠯᠬᠤ ᠳ᠋ᠤ᠌ ᠤᠬᠤᠨᠠ ᠬᠣᠢᠨᠠ ᠠ᠋ᠴᠠ ᠨᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠢᠯᠠᠵᠤ ᠨᠡᠬᠡᠭᠰᠡᠭᠡᠷ ᠮᠥᠰᠥᠨ ᠳᠡᠭᠡᠷᠡ ᠢᠷᠡᠵᠦ᠂ ᠪᠠᠷᠰ ᠳᠤᠲᠠᠭᠠᠨ ᠭᠠᠷᠪᠠ᠃ ᠤᠬᠤᠨᠠ ᠭᠤᠯᠭᠤᠷᠢᠳᠤᠨ ᠤᠨᠠᠭᠠᠳ᠂ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠭᠰᠠᠨ ᠨᠢ᠄《ᠢᠰᠢ! ᠬᠠᠷᠠᠯᠠ! ᠳᠠᠯᠠᠢ ᠮᠢᠨᠢ ᠲᠠᠰᠤᠷᠠᠪᠠ᠃ ᠦᠭᠡᠢ ᠪᠣᠯ ᠴᠢᠮᠠᠶ᠋ᠢ ᠡᠨᠡ ᠡᠳᠦᠷ ᠪᠠᠷᠢᠵᠤ ᠢᠳᠡᠬᠦ ᠪᠠᠢᠭᠰᠠᠨ ᠶᠤᠮ》 ᠭᠡᠳ ᠬᠠᠷᠢᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠪᠠᠷᠰ ᠨᠢᠭᠡᠨ ᠠᠮᠢᠰᠬᠤᠭᠠ ᠪᠠᠷ ᠭᠦᠶᠦᠵᠦ ᠪᠣᠳᠣᠭᠰᠠᠨ ᠨᠢ᠄《ᠲᠩᠷᠢ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠭᠡᠳ ᠲᠡᠷᠡ ᠬᠣᠣᠰ ᠵᠢᠳᠠ ᠲᠠᠢ ᠠᠮᠢᠲᠠᠨ ᠤ᠋ ᠳᠠᠯᠠᠢ ᠶ᠋ᠢ ᠨᠢ ᠲᠠᠰᠤᠯᠪᠠ᠃ ᠦᠭᠡᠢ ᠪᠣᠯ ᠡᠨᠡ ᠡᠳᠦᠷ ᠬᠠᠷᠢᠨ ᠠᠮᠢ ᠪᠠᠨ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠪᠡ》 ᠭᠡᠵᠦ ᠭᠦᠶᠦᠵᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠨᠢᠭᠡ ᠬᠥᠬᠡ ᠴᠢᠨᠣᠠ ᠲᠣᠬᠢᠶᠠᠯᠳᠤᠭᠠᠳ᠄《ᠪᠠᠷᠰ ᠠᠪᠤᠭᠠᠢ! ᠶᠠᠭᠤᠨ ᠳ᠋ᠤ᠌ ᠲᠡᠢᠮᠦ ᠯᠡ ᠭᠦᠶᠦᠵᠦ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠪᠠᠷᠰ ᠰᠠᠶᠢ ᠶ᠋ᠢᠨ ᠲᠠᠭᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠳ᠋ᠦ᠍᠂ ᠴᠢᠨᠣᠠ ᠶᠡᠬᠡᠯᠡ ᠢᠨᠢᠶᠡᠵᠦ《ᠠᠢ᠂ ᠪᠠᠷᠰ ᠭᠤᠸᠠᠢ!ᠲᠡᠷᠡ ᠴᠢᠨᠢ ᠤᠬᠤᠨᠠ ᠪᠠᠢᠨᠠ᠃ ᠪᠢ ᠣᠴᠢᠵᠤ ᠪᠠᠷᠢᠵᠤ ᠢᠳᠡᠶᠡ!》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠪᠠᠬᠠᠨ ᠢᠲᠡᠭᠡᠵᠦ᠂ ᠬᠣᠶᠠᠭᠤᠯᠠ ᠰᠡᠭᠦᠯ ᠰᠡᠭᠦᠯ ᠡᠴᠡ ᠪᠡᠨ ᠬᠣᠯᠪᠣᠵᠤ ᠣᠴᠢᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠦ᠌ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠣᠢᠷᠠᠳᠴᠤ ᠢᠷᠡᠭᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠡᠭᠦᠳᠡᠨ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ᠂ ᠴᠢᠩᠭᠠ ᠳᠠᠭᠤᠨ ᠢ᠋ᠶ᠋ᠠᠷ᠄《ᠬᠥᠭᠰᠢᠨ! ᠥᠨᠥ ᠵᠠᠯᠢᠲᠤ ᠴᠢᠨᠣᠠ ᠴᠢᠨᠢ᠂ ᠥᠷᠢᠨ ᠳ᠋ᠡᠭᠡᠨ ᠨᠢᠭᠡ ᠪᠠᠷᠰ ᠠᠪᠴᠤ ᠢᠷᠡᠵᠡᠢ᠃ ᠠᠪᠤᠨᠠᠤ? ᠪᠣᠯᠢᠨᠠᠤ?》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠴᠢᠴᠠᠭᠠ ᠠᠯᠳᠠᠲᠠᠯᠠ ᠠᠶᠤᠵᠤ ᠴᠢᠨᠣᠠ ᠪᠠᠨ ᠴᠢᠷᠦᠨ ᠭᠦᠶᠦᠵᠦ ᠨᠢᠭᠡᠨ ᠠᠮᠢᠰᠬᠤᠭᠠ ᠪᠠᠷ ᠬᠡᠳᠦᠨ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ᠂ ᠬᠣᠢᠰᠢ ᠬᠠᠨᠳᠤᠨ ᠦᠵᠡᠭᠰᠡᠨ ᠳ᠋ᠦ᠍᠂ ᠴᠢᠨᠣᠠ ᠨᠢ ᠴᠢᠷᠦᠭᠳᠡᠭᠰᠡᠭᠡᠷ ᠰᠢᠳᠦ ᠨᠢ ᠢᠷᠵᠠᠢᠵᠤ᠂ ᠦᠰᠦ ᠨᠢ ᠵᠤᠯᠭᠠᠷᠠᠵᠤ ᠦᠬᠦᠪᠡ ᠭᠡᠨᠡ᠃ ᠪᠠᠷᠰ ᠡᠭᠦᠨ ᠢ᠋ ᠦᠵᠡᠭᠡᠳ ᠶᠡᠬᠡᠯᠡ ᠠᠭᠤᠷᠯᠠᠵᠤ᠂ ᠪᠢ ᠠᠶᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠢ ᠬᠠᠷᠢᠨ ᠢᠨᠢᠶᠡᠨᠡ ᠭᠡᠨᠡ? ᠪᠢ ᠲᠠᠭᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠴᠢ ᠬᠠᠯᠠᠭᠤᠳᠠᠨᠠ ᠭᠡᠨᠡ? ᠭᠡᠵᠦ ᠴᠢᠨᠣᠠ ᠪᠠᠨ ᠭᠡᠭᠡᠵᠦ ᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠣᠷᠣᠵᠤ ᠠᠮᠢᠳᠤᠷᠠᠪᠠ ᠭᠡᠨᠡ᠃