ᠬᠠᠤᠯᠢ ᠨᠢ ᠭᠠᠤᠯᠢ ᠪᠣᠯᠵᠠᠢХуули нь гууль болжээ Khuuli ni guuli boljee
1556
ᠤᠷᠢᠳᠤ ᠨᠢᠭᠡᠨ ᠴᠠᠭ ᠲᠤ᠌᠂ ᠠᠭᠤᠵᠢᠮ ᠮᠣᠩᠭᠣᠯ ᠤ᠋ᠨ ᠣᠷᠣᠨ ᠳᠡᠭᠡᠷᠡᠬᠢ ᠲᠡᠷᠡ ᠨᠢᠭᠡᠨ ᠭᠠᠵᠠᠷ ᠲᠤ᠌᠂ ᠨᠢᠭᠡᠨ ᠰᠣᠬᠣᠷ ᠬᠤᠭᠤᠷᠴᠢ ᠪᠠᠢᠭᠰᠠᠨ ᠭᠡᠨᠡ᠃ ᠲᠡᠷᠡ ᠬᠤᠭᠤᠷᠴᠢ ᠪᠣᠯ᠂ ᠨᠢᠭᠡ ᠵᠢᠯ ᠦ᠋ᠨ ᠭᠤᠷᠪᠠᠨ ᠵᠠᠭᠤ ᠵᠢᠷᠠᠨ ᠬᠣᠨᠣᠭ ᠲᠤ᠌ ᠬᠤᠭᠤᠷ ᠢ᠋ᠶ᠋ᠠᠨ ᠬᠤᠭᠤᠷᠳᠠᠵᠤ᠂ ᠬᠣᠲᠠ ᠵᠡᠭᠡᠯᠢ ᠶ᠋ᠢ ᠬᠡᠰᠦᠵᠦ᠂ ᠠᠢᠯ ᠬᠥᠳᠡᠭᠡ ᠶ᠋ᠢ ᠲᠣᠭᠣᠷᠢᠵᠤ ᠦᠯᠢᠭᠡᠷ ᠬᠡᠯᠡᠵᠦ ᠳᠠᠭᠤᠤ ᠳᠠᠭᠤᠯᠠᠵᠤ ᠶᠠᠪᠤᠳᠠᠭ ᠭᠡᠨᠡ᠃
ᠡᠨᠡ ᠮᠡᠲᠦ ᠪᠡᠷ ᠬᠡᠴᠢᠨᠡᠨ ᠵᠢᠯ ᠪᠣᠯᠤᠭᠠᠳ ᠤᠳᠠᠭᠠᠨ ᠡᠳᠦᠷ᠂ ᠵᠤᠵᠠᠭᠠᠨ ᠬᠣᠨᠣᠭ ᠢ᠋ ᠥᠩᠭᠡᠷᠡᠭᠰᠡᠭᠡᠷ ᠦᠯᠢᠭᠡᠷ ᠬᠡᠯᠡᠨ ᠳᠠᠭᠤᠤ᠂ ᠳᠠᠭᠤᠯᠠᠨ ᠶᠠᠪᠤᠵᠤ᠂ ᠢᠳᠡᠬᠦ ᠡᠮᠦᠰᠬᠦ ᠪᠡᠨ ᠭᠠᠮᠨᠠᠨ ᠠᠷᠪᠢᠯᠠᠵᠤ᠂ ᠨᠡᠯᠢᠶᠡᠳ ᠲᠣᠭᠠᠨ ᠤ᠋ ᠮᠥᠩᠭᠥ ᠴᠤᠭᠯᠠᠭᠤᠯᠵᠤ᠂ ᠠᠭᠰᠢᠷᠠᠨ ᠵᠦᠳᠡᠷᠡᠬᠦ ᠦᠶᠡᠰ ᠲᠡᠭᠡᠨ ᠠᠮᠢᠨ ᠤ᠋ ᠲᠡᠵᠢᠭᠡᠯ ᠪᠣᠯᠭᠠᠶᠠ ᠭᠡᠵᠦ ᠬᠠᠳᠠᠭᠠᠯᠠᠨ᠂ ᠲᠡᠭᠦᠨ ᠢ᠋ ᠪᠡᠨ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠦ᠋ᠨ ᠡᠪᠦᠷ ᠲᠡᠭᠡᠨ ᠨᠢᠭᠡᠨ ᠪᠠᠭᠠ ᠤᠭᠤᠲᠠᠨ ᠳ᠋ᠤ᠌ ᠬᠢᠵᠦ ᠡᠭᠡᠨᠡᠭᠲᠡ ᠡᠪᠦᠷᠯᠡᠨ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠨᠢᠭᠡᠨ ᠡᠳᠦᠷ ᠪᠠᠰᠠ ᠤᠭ ᠬᠡᠪ ᠢ᠋ᠶ᠋ᠡᠷ ᠣᠯᠠᠨ ᠤ᠋ ᠴᠤᠭᠯᠠᠬᠤ ᠨᠢᠭᠡ ᠭᠠᠵᠠᠷ ᠰᠠᠭᠤᠵᠤ ᠬᠤᠭᠤᠷ ᠢ᠋ᠶ᠋ᠠᠨ ᠬᠠᠭᠤᠷᠲᠠᠵᠤ᠂ ᠳᠠᠭᠤᠤ ᠳᠠᠭᠤᠯᠠᠨ ᠪᠠᠢᠭᠰᠠᠨ ᠳ᠋ᠤ᠌᠂ ᠭᠣᠶᠣ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠪᠤᠯᠢᠭᠠᠷᠢ ᠠᠷᠠᠰᠤᠨ ᠭᠤᠲᠤᠯ ᠲᠠᠢ᠂ ᠬᠥᠬᠡ ᠬᠢᠯᠢᠩ ᠤᠭᠤᠵᠢ ᠲᠠᠢ ᠨᠢᠭᠡ ᠬᠥᠮᠦᠨ᠂ ᠬᠠᠷᠠ ᠲᠣᠷᠭᠠᠨ ᠮᠠᠯᠠᠭᠠᠢ ᠪᠠᠨ ᠬᠠᠵᠠᠭᠤ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ᠂ ᠬᠠᠴᠠᠷ ᠵᠢᠰᠦ ᠨᠢ ᠬᠤᠵᠢᠢᠵᠤ ᠬᠠᠢᠪᠠᠯᠵᠠᠨ ᠳᠠᠢᠪᠠᠯᠵᠠᠨ᠂ᠠᠯᠬᠤᠯᠠᠨ᠂ ᠬᠣᠷᠭᠣᠯ ᠤ᠋ᠨ ᠴᠢᠨᠡᠭᠡᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠤᠭᠤᠷᠴᠢ ᠦᠵᠡᠭᠡᠳ᠂ ᠠᠯᠬᠤᠮ ᠢ᠋ᠶ᠋ᠠᠨ ᠵᠣᠭᠰᠣᠵᠤ ᠠᠯᠭᠤᠷ ᠢ᠋ᠶ᠋ᠠᠷ ᠰᠢᠬᠠᠯᠳᠤᠭᠰᠠᠭᠠᠷ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠵᠤ ᠢᠷᠡᠭᠡᠳ᠂ ᠴᠣᠮᠴᠣᠢᠨ ᠰᠠᠭᠤᠵᠤ᠂ ᠳᠠᠭᠤᠤ ᠰᠣᠨᠣᠰᠬᠤ ᠰᠢᠭ᠋ ᠴᠢᠬᠢ ᠲᠠᠯᠪᠢᠬᠤ ᠪᠥᠭᠡᠳ ᠰᠢᠯᠵᠢᠯ ᠦᠭᠡᠢ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠢ᠋ ᠬᠠᠷᠠᠵᠤ᠂ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠰᠢᠷᠲᠡᠨᠡ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠤᠭᠤᠷᠴᠢ ᠶ᠋ᠢᠨ ᠳᠠᠭᠤᠤ ᠲᠡᠭᠦᠰᠴᠦ ᠣᠯᠠᠨ ᠬᠥᠮᠦᠨ ᠳᠠᠷᠬᠠᠨ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ᠂ ᠡᠨᠡ ᠭᠣᠶᠣ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ᠂ ᠥᠭᠡᠳᠡ ᠤᠷᠤᠭᠤ ᠬᠠᠷᠠᠵᠤ ᠣᠯᠠᠨ ᠬᠥᠮᠦᠰ ᠬᠣᠯᠠ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠭᠡᠨᠡᠳᠲᠡ ᠳᠠᠪ ᠬᠢᠵᠦ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠲᠦ᠍ ᠭᠠᠷ ᠢ᠋ᠶ᠋ᠠᠨ ᠣᠷᠣᠭᠤᠯᠵᠤ ᠤᠭᠤᠲᠠ ᠲᠠᠢ ᠮᠥᠩᠭᠥ ᠶ᠋ᠢ ᠨᠢ ᠪᠤᠯᠢᠶᠠᠬᠤ ᠳ᠋ᠤ᠌᠂ ᠰᠣᠬᠣᠷ ᠬᠤᠭᠤᠷᠴᠢ ᠶᠡᠬᠡᠯᠡ ᠮᠡᠩᠳᠡᠭᠦᠷᠡᠨ ᠰᠣᠴᠢᠵᠤ᠂ ᠡᠨᠡ ᠪᠠᠶᠠᠨ ᠬᠥᠮᠦᠨ ᠦ᠌ ᠬᠦᠦ ᠶ᠋ᠢᠨ ᠬᠠᠨᠵᠤ ᠠ᠋ᠴᠠ ᠨᠢ ᠠᠳᠬᠤᠨ ᠠᠪᠴᠤ ᠦᠬᠦᠨ ᠵᠢᠭᠤᠷᠠᠨ ᠲᠠᠯᠪᠢᠬᠤ ᠦᠭᠡᠢ ᠪᠥᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠵᠤ᠄《ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠦ᠋ᠨ ᠨᠠᠷᠠᠨ ᠳ᠋ᠤ᠌ ᠬᠥᠮᠦᠨ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍᠂ ᠣᠯᠠᠨ ᠬᠥᠮᠦᠨ ᠭᠦᠶᠦᠯᠳᠦᠨ ᠢᠷᠡᠵᠦ᠂ ᠬᠤᠭᠤᠷᠴᠢ ᠶ᠋ᠢᠨ ᠡᠪᠦᠷ ᠡᠴᠡ ᠭᠠᠷ ᠢ᠋ᠶ᠋ᠠᠨ ᠪᠠᠰᠠ ᠠᠪᠤᠨ ᠭᠠᠷᠭᠠᠵᠤ ᠵᠠᠪᠳᠤᠭᠠᠳᠤᠢ ᠬᠤᠯᠠᠭᠠᠢᠴᠢ ᠶ᠋ᠢ ᠪᠠᠷᠢᠨ ᠠᠪᠴᠤ ᠣᠯᠠᠨ ᠢ᠋ᠶ᠋ᠠᠷ ᠶᠡᠬᠡ ᠠᠭᠤᠷᠯᠠᠵᠤ᠂ ᠬᠤᠯᠠᠭᠠᠢᠴᠢ ᠶ᠋ᠢ ᠵᠢᠮᠡᠯᠡᠭᠰᠡᠨ ᠨᠢ᠄《ᠴᠢ ᠬᠠᠷᠢᠨ ᠡᠢᠮᠦ ᠰᠠᠢᠨ ᠬᠤᠪᠴᠠᠰᠤ ᠲᠠᠢ ᠪᠥᠭᠡᠳ᠂ ᠡᠨᠡ ᠬᠥᠭᠡᠷᠦᠬᠦᠢ ᠶᠠᠳᠠᠭᠤ ᠵᠦᠳᠡᠭᠦᠦ ᠰᠣᠬᠣᠷ ᠢ᠋ ᠳᠠᠷᠤᠯᠠᠵᠤ᠂ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠬᠥᠮᠦᠨ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠬᠦ ᠴᠢᠨᠢ ᠶᠠᠮᠠᠷ ᠵᠢᠭᠰᠢᠭᠦᠷᠢᠲᠡᠢ᠂ ᠴᠢᠰᠤ ᠪᠠᠨ ᠵᠠᠯᠭᠢᠭᠰᠠᠨ ᠠᠮᠢᠲᠠᠨ ᠪᠣᠢ?》 ᠭᠡᠵᠦ ᠬᠤᠯᠠᠭᠠᠢᠴᠢ ᠶ᠋ᠢ ᠪᠠᠷᠢᠵᠤ᠂ ᠨᠣᠶᠠᠨ ᠳ᠋ᠤ᠌ ᠬᠦᠷᠭᠡᠬᠦ ᠳ᠋ᠦ᠍ ᠬᠤᠯᠠᠭᠠᠢᠴᠢ ᠭᠠᠷ ᠲᠠᠭᠠᠨ ᠬᠤᠭᠤᠷᠴᠢ ᠶ᠋ᠢᠨ ᠤᠭᠤᠲᠠᠲᠠᠢ ᠮᠥᠩᠭᠥ ᠶ᠋ᠢ ᠪᠠᠷᠢᠵᠤ ᠲᠠᠯᠪᠢᠬᠤ ᠦᠭᠡᠢ ᠪᠥᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠬᠦ ᠨᠢ᠄《ᠡᠨᠡ ᠮᠠᠭᠤ ᠬᠤᠭᠤᠷᠴᠢ ᠬᠠᠮᠢᠭᠠ ᠠ᠋ᠴᠠ ᠡᠳᠦᠢ ᠣᠯᠠᠨ ᠮᠥᠩᠭᠥ ᠣᠯᠬᠤ ᠪᠣᠢ᠃ ᠲᠠ ᠨᠠᠷ ᠪᠣᠳᠣᠵᠤ ᠦᠵᠡ! ᠡᠨᠡ ᠮᠠᠭᠤ ᠰᠣᠬᠣᠷ ᠠᠮᠢᠲᠠᠨ ᠬᠠᠷᠢᠨ ᠨᠠᠮᠠᠶ᠋ᠢ ᠯᠤᠢᠪᠠᠷᠳᠠᠵᠤ ᠪᠠᠢᠨᠠ》 ᠬᠡᠮᠡᠵᠦ ᠬᠡᠯᠡᠭᠡᠳ ᠬᠤᠭᠤᠷᠴᠢ ᠶ᠋ᠢᠨ ᠤᠭᠤᠲᠠ ᠲᠠᠢ ᠶ᠋ᠢ ᠮᠥᠨ ᠪᠤᠴᠠᠭᠠᠵᠤ ᠥᠭᠬᠦ ᠦᠭᠡᠢ ᠳ᠋ᠦ᠍᠂ ᠣᠯᠠᠨ ᠬᠥᠮᠦᠨ ᠮᠠᠰᠢ ᠠᠭᠤᠷᠯᠠᠵᠤ᠄《ᠡᠨᠡ ᠮᠠᠭᠤ ᠶᠠᠭᠤᠮᠠ᠂ ᠬᠠᠷᠢᠨ ᠪᠠᠰᠠ ᠬᠤᠭᠤᠷᠴᠢ ᠶ᠋ᠢ ᠯᠤᠢᠪᠠᠷᠳᠠᠵᠤ ᠪᠠᠢᠨᠠ》 ᠭᠡᠳ ᠲᠠᠲᠠᠭᠰᠠᠭᠠᠷ ᠴᠢᠩᠭᠠᠭᠠᠭᠰᠠᠭᠠᠷ ᠨᠣᠶᠠᠨ ᠤ᠋ ᠳᠡᠷᠭᠡᠳᠡ ᠠᠪᠴᠤ ᠣᠴᠢᠵᠠᠢ᠃
ᠨᠣᠶᠠᠨ ᠡᠨᠡ ᠶᠠᠪᠤᠳᠠᠯ ᠢ᠋ ᠰᠣᠨᠣᠰᠴᠤ᠂ ᠬᠤᠭᠤᠷᠴᠢ ᠶ᠋ᠢ ᠰᠠᠭᠤᠯᠭᠠᠨ᠂ ᠬᠤᠯᠠᠭᠠᠢᠴᠢ ᠶ᠋ᠢ ᠶᠡᠬᠡ ᠵᠠᠩᠳᠤᠷᠤᠨ᠄《ᠦᠳᠲᠡᠷ ᠰᠥᠭᠥᠳ! ᠥᠴᠢᠭ ᠢ᠋ᠶ᠋ᠡᠨ ᠮᠡᠳᠡᠭᠦᠯ! ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ᠂ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠴᠢ ᠬᠠᠷᠢᠨ ᠡᠨᠡ ᠮᠠᠭᠤ ᠶᠠᠳᠠᠷᠠᠭᠰᠠᠨ ᠵᠦᠳᠡᠷᠡᠭᠰᠡᠨ ᠬᠤᠭᠤᠷᠴᠢ ᠶ᠋ᠢ ᠳᠠᠷᠤᠯᠠᠨ ᠳᠣᠷᠣᠮᠵᠢᠯᠠᠵᠤ ᠶᠠᠪᠤᠬᠤ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠰᠠᠮᠠᠭᠤᠷᠠᠭᠰᠠᠨ ᠬᠤᠯᠠᠭᠠᠢᠴᠢ ᠪᠣᠢ ᠴᠢ᠂ ᠥᠷᠥᠰᠢᠶᠡᠯᠲᠦ ᠬᠠᠭᠠᠨ ᠦᠨᠡᠨ ᠡᠵᠡᠨ ᠦ᠌ ᠤᠯᠤᠰ ᠲᠤ᠌ ᠠᠮᠢᠳᠤᠷᠠᠵᠤ ᠪᠠᠢᠭᠠᠳ ᠡᠢᠮᠦ ᠳᠣᠣᠷᠠᠲᠤ ᠪᠠᠷ ᠶᠠᠪᠤᠬᠤ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠵᠦ ᠦᠵᠦᠭᠦᠷ ᠦᠭᠡᠢ ᠵᠠᠩᠨᠠᠬᠤ ᠳ᠋ᠤ᠌ ᠬᠤᠯᠠᠭᠠᠢᠴᠢ ᠬᠡᠯᠡᠭᠰᠡᠨ ᠨᠢ᠄《ᠨᠣᠶᠠᠨ ᠠᠪᠤ ᠮᠢᠨᠢ! ᠪᠢ ᠰᠠᠢᠨ ᠤ᠋ ᠪᠠᠨ ᠪᠤᠶᠠᠨ ᠳ᠋ᠤ᠌ ᠨᠡᠷᠡ ᠲᠥᠷᠥ ᠲᠡᠢ ᠬᠥᠮᠦᠨ ᠪᠢᠯᠡ᠃ ᠶᠠᠭᠠᠬᠢᠯᠠ ᠭᠡᠵᠦ ᠡᠢᠮᠦ ᠮᠠᠭᠤ ᠬᠡᠷᠡᠭ ᠭᠠᠷᠭᠠᠬᠤ ᠪᠣᠢ᠃ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠶᠠᠨ ᠳ᠋ᠤ᠌ ᠠᠯᠳᠠᠷ ᠴᠣᠯᠠ ᠲᠠᠢ ᠬᠥᠮᠦᠨ ᠪᠢᠯᠡ᠃ ᠠᠳᠠᠭ ᠳᠣᠯᠣᠭᠠᠨ ᠠᠷᠭᠠ ᠪᠠᠨ ᠪᠠᠷᠠᠯᠠ ᠭᠡᠵᠦ ᠡᠨᠡ ᠮᠠᠭᠤ ᠭᠣᠶ᠋ᠢᠷᠠᠨᠴᠢ ᠶ᠋ᠢ ᠳᠡᠭᠡᠷᠡᠮᠳᠡᠬᠦ ᠤᠤ ᠪᠢ?》 ᠭᠡᠰᠡᠨ ᠳ᠋ᠦ᠍ ᠨᠣᠶᠠᠨ《ᠤᠳᠤᠮ ᠮᠠᠭᠤ ᠳᠡᠭᠡᠳᠦ ᠲᠡᠢ᠂ ᠦᠬᠦᠭᠰᠡᠨ ᠢ᠋ᠶ᠋ᠡᠨ ᠲᠦᠷᠦᠭᠦᠦ ᠬᠤᠯᠠᠭᠠᠢᠴᠢ ᠴᠢ ᠬᠠᠷᠢᠨ ᠠᠪᠤ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠪᠤᠶᠠᠨ ᠳ᠋ᠤ᠌ ᠨᠡᠷᠡ ᠲᠥᠷᠥ ᠲᠡᠢ ᠬᠥᠮᠦᠨ ᠭᠡᠨᠡ? ᠴᠢᠩᠭᠢᠵᠦ ᠪᠠᠢᠭᠠᠳ ᠶᠠᠭᠤᠨ ᠳ᠋ᠤ᠌ ᠳᠣᠷᠣᠢ ᠪᠠᠭᠤᠷᠠᠢ ᠬᠥᠮᠦᠨ ᠢ᠋ ᠳᠠᠷᠤᠯᠠᠬᠤ ᠪᠣᠢ ᠴᠢ᠂ ᠪᠠᠰᠠ ᠨᠢᠭᠤᠷ ᠦᠭᠡᠢ ᠰᠠᠢᠨ ᠤ᠋ ᠪᠠᠨ ᠪᠤᠶᠠᠨ ᠳ᠋ᠤ᠌ ᠭᠡᠵᠦ ᠴᠠᠯᠴᠢᠬᠤ ᠴᠢᠨᠢ ᠶᠠᠭᠤ ᠪᠣᠢ? ᠲᠡᠷᠡ ᠤᠳᠤᠮ ᠢ᠋ᠶ᠋ᠠᠷ ᠮᠠᠭᠤ ᠡᠴᠢᠭᠡ ᠴᠢᠨᠢ ᠶᠠᠭᠠᠬᠢᠵᠤ ᠪᠠᠢᠭᠠᠳ ᠪᠠᠰᠠ ᠴᠢᠮᠠ ᠰᠢᠭ᠋ ᠡᠢᠮᠦ ᠠᠮᠢᠲᠠᠨ ᠢ᠋ ᠲᠥᠷᠥᠭᠰᠡᠨ ᠪᠣᠢ?》 ᠭᠡᠬᠦ ᠳ᠋ᠦ᠍᠄《ᠨᠣᠶᠠᠨ ᠠᠪᠤ! ᠮᠢᠨᠦ ᠡᠴᠢᠭᠡ ᠤᠳᠤᠮ ᠢ᠋ᠶ᠋ᠠᠷ ᠮᠠᠭᠤ ᠬᠥᠮᠦᠨ ᠪᠢᠰᠢ᠃ ᠦᠨᠡᠨ ᠳ᠋ᠡᠭᠡᠨ ᠠᠯᠳᠠᠷ ᠴᠣᠯᠠ ᠲᠠᠢ ᠪᠥᠭᠡᠳ ᠳᠥᠷᠪᠡᠨ ᠳᠠᠯᠠᠢ ᠶ᠋ᠢᠨ ᠳᠣᠲᠣᠷᠠ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠦᠭᠡᠢ᠃ ᠥᠷᠥᠰᠢᠶᠡᠯᠲᠦ ᠬᠠᠭᠠᠨ ᠠ᠋ᠴᠠ ᠲᠡᠷᠢᠭᠦᠯᠡᠨ ᠥᠩᠭᠡᠲᠡᠢ ᠭᠡᠷᠡᠯᠲᠡᠢ ᠶᠠᠪᠤᠵᠤ ᠪᠠᠢᠬᠤ ᠨᠣᠶᠠᠨ ᠲᠦᠰᠢᠮᠡᠳ ᠪᠠ ᠡᠷᠦᠬᠡ ᠭᠡᠷ ᠨᠢ ᠤᠳᠤᠮ ᠲᠠᠢ ᠤᠯᠤᠰ ᠪᠦᠷ ᠲᠠᠨᠢᠨᠠ》 ᠭᠡᠰᠡᠨ ᠳ᠋ᠦ᠍ ᠦᠨᠡᠨ ᠶᠡᠬᠡ ᠠᠭᠤᠷᠯᠠᠵᠤ᠄《ᠬᠡᠨ ᠴᠢᠨᠦ ᠲᠡᠷᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠴᠦ᠍ ᠰᠤᠷᠭᠠᠨ ᠴᠢᠳᠠᠭᠰᠠᠨ ᠦᠭᠡᠢ ᠮᠤᠩᠬᠠᠭ ᠡᠴᠢᠭᠡ ᠶ᠋ᠢ ᠴᠢᠨᠢ ᠲᠠᠨᠢᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠬᠤᠯᠠᠭᠠᠢᠴᠢ᠄《ᠨᠣᠶᠠᠨ ᠠᠪᠤ! ᠪᠢ ᠬᠡᠷᠪᠡ ᠠᠪᠤ ᠶ᠋ᠢᠨ ᠨᠡᠷᠡ ᠪᠡᠨ ᠬᠡᠯᠡᠪᠡᠯ ᠡᠷᠬᠢᠮ ᠲᠠ ᠪᠠᠰᠠ ᠯᠠᠪ ᠲᠠᠨᠢᠨᠠ》 ᠭᠡᠰᠡᠨ ᠳ᠋ᠦ᠍ ᠨᠣᠶᠠᠨ᠄《ᠴᠢᠨᠦ ᠲᠡᠷᠡ ᠴᠢᠰᠤ ᠪᠠᠨ ᠵᠠᠯᠭᠢᠭᠰᠠᠨ ᠪᠣᠬᠢᠷ ᠡᠴᠢᠭᠡ ᠶ᠋ᠢ ᠴᠢᠨᠢ ᠶᠠᠯᠠᠯᠠᠵᠤ ᠪᠣᠯᠤᠨᠠ᠃ ᠬᠡᠨ ᠭᠡᠰᠡᠨ ᠨᠡᠷᠡ ᠲᠡᠢ ᠠᠮᠢᠲᠠᠨ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠬᠤᠯᠠᠭᠠᠢᠴᠢ ᠨᠣᠶᠠᠨ ᠤ᠋ ᠵᠦᠭ ᠨᠢᠳᠦ ᠪᠡᠨ ᠢᠷᠮᠡᠨ ᠴᠠᠪᠴᠢᠵᠤ ᠬᠡᠯᠡᠭᠰᠡᠨ ᠨᠢ᠄《ᠮᠢᠨᠦ ᠠᠪᠤ ᠪᠣᠯ ᠨᠢᠭᠤᠷ ᠨᠢ ᠴᠣᠬᠣᠷ᠂ ᠨᠢᠷᠤᠭᠤ ᠨᠢ ᠪᠥᠭᠲᠥᠷ᠂ ᠨᠡᠷᠡ ᠲᠠᠪᠢ ᠲᠠᠢ ᠡᠪᠦᠭᠡᠨ ᠭᠡᠵᠦ ᠬᠡᠯᠡᠳᠡᠭ ᠶᠤᠮ》 ᠭᠡᠰᠡᠨ ᠳ᠋ᠦ᠍ ᠨᠣᠶᠠᠨ ᠬᠡᠷᠡᠭ ᠰᠢᠭᠦᠬᠦ ᠪᠡᠨ ᠪᠠᠢᠵᠤ ᠨᠡᠯᠢᠶᠡᠳ ᠤᠳᠠᠲᠠᠯᠠ ᠪᠣᠳᠣᠭᠠᠳ᠂ ᠪᠠᠬᠠᠨ ᠢᠨᠢᠶᠡᠮᠰᠦᠭᠯᠡᠵᠦ᠄《ᠵᠧ! ᠲᠠᠨ ᠤ᠋ ᠡᠨᠡ ᠶᠠᠷᠰᠢᠭᠲᠠᠢ ᠤᠷᠰᠢᠭᠲᠠᠢ ᠬᠡᠷᠡᠭ ᠢ᠋ ᠴᠢᠨᠢ ᠮᠠᠷᠭᠠᠰᠢ ᠰᠢᠳᠬᠡᠶᠡ》 ᠭᠡᠵᠦ ᠬᠤᠭᠤᠷᠴᠢ ᠪᠠ ᠬᠤᠯᠠᠭᠠᠢᠴᠢ ᠬᠣᠶᠠᠭᠤᠯᠠ ᠶ᠋ᠢ ᠬᠣᠶᠠᠷ ᠳᠠᠰᠢ ᠰᠠᠯᠭᠠᠵᠤ ᠬᠣᠨᠣᠭᠰᠠᠨ ᠳ᠋ᠤ᠌ ᠣᠷᠣᠢ ᠨᠢ ᠬᠤᠯᠠᠭᠠᠢᠴᠢ ᠨᠣᠶᠠᠨ ᠳ᠋ᠤ᠌ ᠲᠠᠪᠢᠨ ᠯᠠᠩ ᠤ᠋ᠨ ᠨᠢᠭᠤᠷ ᠨᠢ ᠴᠣᠬᠣᠷ᠂ ᠨᠢᠷᠤᠭᠤ ᠨᠢ ᠪᠥᠭᠲᠥᠷ ᠮᠥᠩᠭᠥᠨ ᠶᠤᠸᠠᠮᠪᠤᠤ ᠭᠠᠷᠭᠠᠵᠤ ᠬᠠᠬᠤᠤᠯᠢ ᠲᠦᠯᠬᠢᠪᠡ ᠭᠡᠨᠡ᠃
ᠮᠠᠷᠭᠠᠰᠢ ᠨᠢ ᠨᠣᠶᠠᠨ ᠡᠳᠡᠨ ᠬᠣᠶᠠᠷ ᠢ᠋ ᠠᠪᠴᠢᠷᠠᠨ ᠬᠡᠷᠡᠭ ᠤᠴᠢᠷ ᠢ᠋ ᠨᠢ ᠰᠢᠳᠬᠡᠬᠦ ᠳ᠋ᠦ᠍ ᠬᠠᠷᠢᠨ ᠥᠴᠥᠭᠡᠳᠦᠷ ᠦ᠋ᠨ ᠠᠳᠠᠯᠢ ᠬᠤᠯᠠᠭᠠᠢᠴᠢ ᠶ᠋ᠢ ᠰᠢᠭᠦᠨ ᠵᠠᠩᠳᠤᠷᠬᠤ ᠦᠭᠡᠢ ᠪᠥᠭᠡᠳ ᠰᠣᠬᠣᠷ ᠬᠤᠭᠤᠷᠴᠢ ᠳ᠋ᠤ᠌ ᠶᠡᠬᠡ ᠠᠭᠤᠷᠯᠠᠨ᠄《ᠴᠢ ᠮᠠᠭᠤ ᠬᠠᠷᠠ ᠰᠣᠬᠣᠷ ᠭᠣᠶ᠋ᠢᠷᠠᠨᠴᠢ᠂ ᠠᠮᠤᠷ ᠠᠮᠢᠳᠤᠷᠠᠨ᠂ ᠬᠡᠪ ᠢ᠋ᠶ᠋ᠡᠨ ᠰᠠᠬᠢᠵᠤ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠢᠨ ᠠᠯᠳᠠᠷᠲᠤ ᠬᠥᠮᠦᠰ ᠲᠡᠢ ᠠᠲᠠᠭᠠᠷᠬᠠᠵᠤ᠂ ᠡᠷᠬᠢᠮ ᠬᠥᠮᠦᠰ ᠲᠡᠢ ᠮᠥᠴᠡᠭᠡᠷᠬᠡᠵᠦ᠂ ᠠᠮᠠᠨ ᠤ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠬᠥᠮᠦᠨ ᠢ᠋ ᠭᠤᠲᠤᠭᠠᠨ ᠮᠠᠭᠤᠰᠢᠶᠠᠵᠤ᠂ ᠭᠡᠭᠡᠨ ᠬᠠᠭᠠᠨ ᠤ᠋ ᠲᠥᠷᠥ᠂ ᠭᠡᠷᠡᠯᠲᠦ ᠨᠠᠷᠠᠨ ᠤ᠋ ᠳᠣᠣᠷᠠ ᠰᠠᠢᠨ ᠬᠥᠮᠦᠨ ᠢ᠋ ᠯᠤᠢᠪᠠᠷᠳᠠᠨ ᠶᠠᠪᠤᠬᠤ ᠴᠢᠨᠢ ᠪᠣᠳᠣᠯᠭᠠ ᠲᠠᠢ ᠪᠣᠢ?》 ᠭᠡᠵᠦ ᠠᠭᠤᠷᠯᠠᠬᠤ ᠳ᠋ᠤ᠌ ᠥᠨᠥ ᠰᠣᠬᠣᠷ ᠬᠤᠭᠤᠷᠴᠢ ᠶᠠᠭᠤ ᠴᠤ᠌ ᠳᠤᠤᠭᠠᠷᠬᠤ ᠦᠭᠡᠢ ᠲᠣᠪ ᠳᠤᠭᠤᠢ ᠰᠠᠭᠤᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠢ᠋ ᠮᠠᠯᠲᠠᠵᠤ ᠪᠠᠢᠨ ᠪᠠᠢᠨ ᠴᠢᠬᠢ ᠪᠡᠨ ᠭᠠᠵᠠᠷ ᠲᠤ᠌ ᠨᠠᠭᠠᠯᠳᠤᠭᠤᠯᠤᠨ ᠶᠠᠭᠤᠮᠠ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠰᠢᠭ᠋ ᠴᠢᠩᠨᠠᠨ ᠤᠬᠤᠵᠤ ᠮᠠᠯᠲᠠᠨ ᠪᠠᠢᠬᠤ ᠶ᠋ᠢ ᠨᠣᠶᠠᠨ ᠦᠵᠡᠭᠡᠳ ᠡᠨᠡ ᠮᠠᠭᠤ ᠬᠠᠷᠠ ᠰᠣᠬᠣᠷ ᠴᠢᠨᠢ ᠶᠠᠭᠤ ᠬᠢᠵᠦ ᠪᠠᠢᠬᠤ ᠶᠤᠮ ᠪᠣᠢ ᠭᠡᠵᠦ ᠪᠣᠳᠣᠭᠠᠳ᠄《ᠬᠦᠢ! ᠴᠢ ᠮᠠᠭᠤ ᠴᠢᠰᠤ ᠪᠠᠷ ᠵᠠᠯᠭᠢᠭᠰᠠᠨ ᠬᠠᠷᠠ ᠭᠣᠶ᠋ᠢᠷᠠᠨᠴᠢ ᠶᠠᠭᠤ ᠬᠢᠵᠦ ᠪᠠᠢᠬᠤ ᠶᠤᠮ?》 ᠭᠡᠰᠡᠨ ᠳ᠋ᠦ᠍ ᠰᠣᠬᠣᠷ ᠬᠤᠭᠤᠷᠴᠢ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄《ᠨᠣᠶᠠᠨ ᠮᠢᠨᠢ! ᠥᠴᠥᠭᠡᠳᠦᠷ ᠡᠨᠳᠡ ᠬᠠᠤᠯᠢ ᠳᠤᠤᠭᠠᠷᠴᠤ ᠪᠠᠢᠭᠰᠠᠨ ᠶᠤᠮᠰᠠᠨ᠃ ᠭᠡᠪᠡᠴᠦ ᠡᠨᠡ ᠡᠳᠦᠷ ᠡᠨᠳᠡ ᠭᠠᠤᠯᠢ ᠳᠤᠤᠭᠠᠷᠴᠤ ᠪᠠᠢᠨᠠ᠃ ᠬᠠᠷᠢᠨ ᠮᠥᠩᠭᠥ ᠪᠠᠢᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ ᠮᠠᠯᠲᠠᠨ ᠭᠠᠷᠭᠠᠵᠤ ᠨᠣᠶᠠᠨ ᠳ᠋ᠤ᠌ ᠠᠪᠴᠤ ᠪᠠᠷᠢᠶᠠ ᠭᠡᠰᠡᠨ ᠶᠤᠮ》 ᠭᠡᠰᠡᠨ ᠳ᠋ᠦ᠍ ᠨᠣᠶᠠᠨ ᠮᠠᠰᠢ ᠮᠡᠩᠳᠡᠵᠦ ᠴᠢᠷᠠᠢ ᠨᠢ ᠬᠤᠪᠢᠷᠠᠵᠤ ᠳᠠᠷᠤᠢ ᠰᠣᠬᠣᠷ ᠬᠤᠭᠤᠷᠴᠢ ᠶ᠋ᠢ ᠬᠥᠭᠡᠭᠡᠨ ᠭᠠᠷᠭᠠᠪᠠ ᠭᠡᠨᠡ᠃