ᠬᠣᠨᠢᠨ ᠊ᠤ᠌ ᠤᠭᠤᠴᠠХонны ууц Khonny uuts
563ᠬᠣᠨᠢᠨ ᠊ᠤ᠌ ᠤᠭᠤᠴᠠ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌᠂ ᠮᠠᠨ ᠤ᠋ ᠡᠨᠡ ᠭᠠᠵᠠᠷ᠂ ᠠᠵᠢᠯ ᠦᠢᠯᠡ ᠳ᠋ᠦ᠍ ᠳᠤᠷᠠ ᠦᠭᠡᠢ᠂ ᠠᠷᠢᠶᠠᠪᠠᠯᠤ ᠭᠡᠵᠦ ᠵᠠᠯᠪᠠᠷᠢᠭᠠᠳ᠂ ᠠᠷᠭᠠ ᠮᠡᠬᠡ ᠪᠡᠷ ᠪᠠᠯᠢᠶᠠᠷᠲᠤᠨ᠂ ᠠᠰᠲᠠᠭᠠᠨ ᠬᠥᠮᠦᠨ ᠢ᠋ ᠵᠠᠯᠢᠯᠠᠵᠤ᠂ ᠠᠯᠢᠪᠠ ᠬᠦᠰᠡᠭᠰᠡᠨ ᠢ᠋ᠶ᠋ᠡᠨ ᠣᠯᠵᠠᠯᠠᠵᠤ᠂ ᠠᠮᠠᠨ ᠬᠦᠵᠦᠭᠦᠦ ᠤᠷᠤᠭᠤ ᠪᠠᠨ ᠭᠤᠯᠭᠤᠭᠤᠯᠳᠠᠭ᠂ ᠬᠠᠪ ᠵᠠᠪ ᠨᠢ ᠲᠠᠭᠠᠷᠠᠪᠠᠯ᠂ ᠬᠠᠷᠠ ᠭᠠᠷ ᠢ᠋ᠶ᠋ᠠᠨ ᠰᠣᠩᠭᠣᠳᠠᠭ ᠬᠠᠷᠠᠰᠢᠯᠲᠠᠢ ᠲᠡᠢᠮᠦ ᠪᠠᠳᠢᠷᠴᠢᠨ ᠭᠡᠵᠦ᠂ ᠬᠠᠮᠢᠭᠠ ᠴᠤ᠌ ᠨᠢᠭᠡ ᠬᠣᠶᠠᠷ ᠦᠵᠡᠭᠳᠡᠳᠡᠭ ᠪᠠᠢᠵᠤ ᠭᠡᠨᠡ᠃
ᠵᠧ! ᠲᠡᠩᠭᠢᠭᠡᠳ ᠲᠡᠷᠡ ᠨᠢᠭᠡ ᠵᠢᠯ ᠦ᠋ᠨ ᠪᠢᠲᠡᠭᠦᠨ ᠦ᠌ ᠣᠷᠣᠢ ᠮᠥᠨ ᠳᠡᠭᠡᠷᠡᠬᠢ ᠬᠡᠯᠡᠭᠰᠡᠨ ᠰᠢᠭ ᠲᠡᠢᠮᠦ ᠬᠣᠶᠠᠷ ᠪᠠᠳᠢᠷᠴᠢᠨ ᠶᠠᠪᠤᠵᠤ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠠᠢᠯ ᠳ᠋ᠤ᠌ ᠲᠠᠭᠠᠷᠠᠵᠤ ᠣᠷᠣᠭᠰᠠᠨ ᠳ᠋ᠤ᠌᠂ ᠬᠠᠷᠢᠨ ᠭᠠᠭᠴᠠ ᠡᠮᠡᠭᠲᠡᠢ ᠰᠢᠨᠡ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠪᠡᠯᠡᠳᠬᠡᠨ ᠣᠷᠣᠨ ᠭᠠᠷᠤᠨ ᠰᠠᠨᠳᠤᠷᠵᠤ ᠪᠠᠢᠬᠤ ᠲᠠᠢ ᠳᠤᠬᠢᠶᠯᠠᠳᠣᠵᠣ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠨ ᠰᠠᠭᠤᠭᠰᠠᠨ ᠳ᠋ᠤ᠌᠂ ᠭᠡᠷ ᠦ᠋ᠨ ᠡᠵᠡᠨ ᠡᠮᠡᠭᠲᠡᠢ ᠮᠥᠨ ᠣᠷᠣᠨ ᠭᠠᠷᠤᠨ ᠶᠠᠭᠠᠷᠠᠵᠤ ᠪᠠᠢᠬᠤ ᠵᠠᠪᠰᠠᠷ ᠲᠤ᠌᠂ ᠡᠨᠡ ᠬᠣᠶᠠᠷ ᠪᠠᠳᠢᠷᠴᠢᠨ ᠢᠩᠭᠢᠵᠦ ᠴᠢᠩᠭᠢᠵᠦ ᠪᠠᠢᠭᠠᠳ᠂ ᠲᠣᠭᠣᠭᠠᠨ ᠳᠣᠲᠣᠷᠠ ᠴᠢᠨᠠᠵᠤ ᠪᠠᠢᠭᠠ ᠬᠣᠨᠢᠨ ᠤᠭᠤᠴᠠ ᠶ᠋ᠢ ᠨᠢ ᠣᠯᠵᠤ ᠦᠵᠡᠭᠡᠳ᠂ ᠬᠣᠶᠠᠭᠤᠯᠠ ᠪᠠᠨ ᠬᠤᠯᠠᠭᠤᠬᠤ ᠠᠷᠭᠠ ᠪᠠᠨ ᠬᠡᠯᠡᠯᠴᠡᠨ ᠲᠣᠭᠲᠠᠭᠠᠳ᠂ ᠭᠡᠨᠡᠳᠲᠡ ᠪᠣᠰᠤᠯᠴᠠᠨ ᠵᠣᠳᠣᠯᠴᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠯᠳᠤᠨ ᠨᠣᠴᠣᠯᠳᠤᠬᠤ ᠳ᠋ᠤ᠌᠂ ᠭᠠᠳᠠᠨᠠ ᠪᠠᠢᠭᠰᠠᠨ ᠡᠮᠡᠭᠲᠡᠢ ᠶᠠᠭᠤ ᠪᠣᠯᠪᠠ ᠭᠡᠵᠦ ᠭᠡᠷ ᠲᠡᠭᠡᠨ ᠣᠷᠣᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠬᠠᠷᠢᠨ ᠬᠣᠶᠠᠷ ᠪᠠᠳᠢᠷᠴᠢᠨ ᠶᠠᠭᠤᠨ ᠤ᠋ ᠲᠤᠯᠠ ᠭᠡᠷᠡᠯᠲᠦᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠵᠢᠭᠤᠷᠠᠯᠳᠤᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠬᠣᠶᠠᠭᠤᠯᠠ ᠶ᠋ᠢ ᠰᠠᠯᠭᠠᠨ ᠭᠠᠳᠠᠨᠠ ᠠᠪᠴᠤ ᠭᠠᠷᠤᠭᠰᠠᠨ ᠳ᠋ᠤ᠌᠂ ᠨᠢᠭᠡ ᠨᠢ᠄《ᠡᠭᠡᠴᠢ ᠮᠢᠨᠢ ᠴᠢ ᠡᠭᠦᠨ ᠢ᠋ ᠲᠡᠪᠡᠷᠢᠵᠦ ᠪᠠᠢ᠃ ᠪᠢ ᠣᠷᠣᠵᠤ ᠡᠭᠦᠷᠭᠡ ᠪᠡᠨ ᠠᠪᠤᠶᠠ᠃ ᠲᠠ ᠨᠠᠮᠠᠶ᠋ᠢ ᠶᠠᠪᠤᠭᠰᠠᠨ ᠬᠣᠢᠨᠠ ᠡᠭᠦᠨ ᠢ᠋ ᠰᠠᠶᠢ ᠲᠠᠯᠪᠢᠭᠠᠷᠠᠢ!》 ᠭᠡᠵᠦ ᠭᠡᠷ ᠲᠦ᠋ᠨᠢ ᠣᠷᠣᠭᠰᠠᠨ ᠳ᠋ᠤ᠌ ᠭᠠᠳᠠᠨᠠ ᠬᠣᠴᠣᠷᠤᠭᠰᠠᠨ ᠨᠢ ᠳᠡᠭᠡᠷᠡ ᠳᠡᠭᠡᠷᠡ ᠦᠰᠦᠷᠴᠦ ᠬᠠᠷᠢᠶᠠᠨ ᠶᠡᠬᠡ ᠬᠣᠷᠣᠰᠤᠭᠰᠠᠨ ᠮᠠᠶᠢᠭ ᠭᠠᠷᠭᠠᠬᠤ ᠳ᠋ᠤ᠌᠂ ᠳᠣᠲᠣᠷᠠ ᠣᠷᠣᠭᠰᠠᠨ ᠨᠢᠭᠡ ᠨᠢ ᠶᠠᠭᠠᠷᠠᠨ ᠣᠷᠣᠵᠤ ᠲᠣᠭᠣᠭᠠᠨ ᠳᠣᠲᠣᠷᠠ ᠠ᠋ᠴᠠ ᠤᠭᠤᠴᠠ ᠶ᠋ᠢ ᠭᠠᠷᠭᠠᠨ ᠠᠪᠤᠶᠠ ᠭᠡᠰᠡᠨ ᠳ᠋ᠦ᠍᠂ ᠬᠠᠷᠢᠨ ᠶᠡᠬᠡ ᠬᠠᠯᠠᠭᠤᠨ ᠪᠥᠭᠡᠳ ᠭᠠᠷ ᠨᠢ ᠬᠠᠯᠠᠵᠤ᠂ ᠠᠪᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠲᠤᠯᠠ᠂ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠭᠠᠳᠠᠨᠠ ᠬᠥᠮᠦᠨ ᠳ᠋ᠡᠭᠡᠨ ᠮᠡᠳᠡᠭᠳᠡᠶᠡ ᠭᠡᠵᠦ᠂ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠰᠢᠲᠠᠩᠬᠠᠢ ᠲᠦᠯᠡᠩᠬᠡᠢ ᠴᠢᠭᠢᠶᠡᠲᠦᠷᠦ》 ᠭᠡᠰᠡᠨ ᠳ᠋ᠦ᠍᠂ ᠭᠠᠳᠠᠨᠠ᠂ ᠡᠮᠡᠭᠲᠡᠢ ᠳ᠋ᠦ᠍ ᠪᠠᠷᠢᠭᠳᠠᠨ ᠵᠣᠭᠰᠣᠭᠰᠠᠨ ᠨᠢ᠂ ᠲᠡᠭᠦᠨ ᠦ᠌ ᠤᠳᠬᠠ ᠶ᠋ᠢ ᠮᠡᠳᠡᠵᠦ ᠳᠣᠲᠣᠷᠠ ᠪᠠᠨ ᠦᠨᠡᠬᠡᠷ ᠲᠡᠢᠮᠦ ᠬᠠᠯᠠᠭᠤᠨ ᠪᠣᠯ ᠶᠠᠭᠤᠨ ᠳ᠋ᠤ᠌ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠲᠥᠷᠥᠵᠦ ᠠᠪᠬᠤ ᠦᠭᠡᠢ ᠪᠣᠢ ᠭᠡᠵᠦ ᠪᠣᠳᠣᠭᠠᠳ ᠭᠡᠳᠡᠷᠭᠦ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠬᠦᠢᠲᠡᠨ ᠭᠣᠣᠯ ᠳ᠋ᠤ᠌ ᠴᠠᠷᠴᠠᠵᠤ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠪᠠᠢᠭᠰᠠᠨ ᠨᠢᠭᠡ ᠨᠢ ᠮᠡᠳᠡᠵᠦ᠂ ᠤᠭᠤᠴᠠ ᠶ᠋ᠢ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠲᠥᠷᠥᠵᠦ ᠭᠠᠷᠭᠠᠭᠠᠳ᠂ ᠡᠭᠦᠷᠭᠡ ᠳ᠋ᠡᠭᠡᠨ ᠬᠢᠬᠦ ᠭᠡᠰᠡᠨ ᠳ᠋ᠦ᠍ ᠬᠠᠷᠢᠨ ᠪᠠᠭᠲᠠᠬᠤ ᠦᠭᠡᠢ ᠲᠤᠯᠠ ᠶᠡᠬᠡ ᠰᠠᠨᠳᠤᠷᠴᠤ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠠᠷᠤ ᠥᠪᠥᠷ ᠰᠤᠮᠤᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠢᠭᠢᠶᠡᠲᠦᠷᠦ》 ᠭᠡᠰᠡᠨ ᠳ᠋ᠦ᠍ ᠭᠠᠳᠠᠨᠠ ᠪᠠᠢᠭᠰᠠᠨ ᠨᠢ ᠡᠭᠦᠷᠭᠡ ᠳ᠋ᠦ᠍ ᠪᠠᠭᠲᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠡᠳ ᠬᠤᠭᠤᠯᠵᠤ ᠬᠢᠪᠡᠯ ᠪᠣᠯᠬᠤ ᠶᠤᠮ ᠭᠡᠳ᠄ 《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠨᠤᠭᠤᠯᠤᠭᠤᠯᠵᠤ᠂ ᠨᠤᠭᠤᠰᠤ ᠪᠠᠷ ᠢ᠋ᠶ᠋ᠠᠨ ᠲᠠᠰᠤᠯᠤᠭᠤᠯᠵᠤ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠪᠠᠢᠬᠤ ᠨᠢ᠄《ᠠ! ᠨᠠᠮᠠᠶ᠋ᠢ ᠬᠤᠭᠤᠯᠵᠤ ᠡᠭᠦᠷᠭᠡᠨ ᠳ᠋ᠡᠭᠡᠨ ᠤᠷᠤᠭᠤᠯ ᠭᠡᠵᠦ ᠪᠠᠢᠨᠠ》 ᠭᠡᠳ ᠤᠭᠤᠴᠠ ᠶ᠋ᠢ ᠬᠢᠲᠤᠭᠠ ᠦᠭᠡᠢ ᠭᠤᠢᠷᠠᠨᠴᠢ ᠠᠮᠢᠲᠠᠨ ᠰᠢᠦ》 ᠭᠡᠵᠦ ᠬᠠᠷᠢᠶᠠᠭᠰᠠᠨ ᠳ᠋ᠤ᠌ ᠭᠠᠳᠠᠨᠠ ᠪᠠᠢᠭᠰᠠᠨ ᠨᠢ᠄《ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠳᠡᠭᠦᠵᠢᠯᠡᠭᠳᠡᠵᠦ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠨᠢᠭᠡ ᠨᠢ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠬᠢᠲᠤᠭᠠ ᠶ᠋ᠢ ᠨᠢ ᠠᠪᠴᠤ ᠤᠭᠤᠴᠠ ᠶ᠋ᠢ ᠨᠢ ᠰᠠᠯᠭᠠᠨ ᠡᠭᠦᠷᠭᠡ ᠳ᠋ᠡᠭᠡᠨ ᠬᠢᠵᠦ ᠭᠠᠷᠴᠤ ᠢᠷᠡᠭᠡᠳ᠄《ᠵᠧ! ᠡᠭᠡᠴᠢ ᠮᠢᠨᠢ ᠨᠠᠮᠠᠶ᠋ᠢ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠡᠭᠦᠨ ᠢ᠋ ᠳᠡᠯᠪᠢ》 ᠭᠡᠵᠦ ᠬᠡᠯᠡᠭᠡᠳ ᠪᠠᠷᠠᠭᠤᠨᠰᠢ ᠭᠠᠷᠴᠤ ᠶᠠᠪᠤᠵᠠᠢ᠃ ᠴᠢᠩᠭᠢᠭᠡᠳ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠡᠮᠡᠭᠲᠡᠢ ᠭᠠᠳᠠᠨᠠ ᠪᠠᠢᠭᠰᠠᠨ ᠢ᠋ ᠨᠢ ᠲᠠᠯᠪᠢᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠮᠠᠰᠢ ᠠᠭᠤᠷᠲᠠᠢ ᠪᠠᠷ ᠡᠷᠬᠡᠪᠰᠢ ᠬᠥᠭᠡᠭᠡᠵᠦ ᠭᠦᠢᠴᠡᠵᠦ ᠠᠯᠠᠶᠠ ᠭᠡᠵᠦ ᠨᠡᠬᠡᠵᠦ ᠭᠦᠶᠦᠵᠡᠢ᠃
ᠴᠢᠩᠭᠢᠭᠡᠳ ᠳᠠᠯᠳᠠ ᠣᠷᠣᠵᠤ ᠬᠣᠶᠠᠷ ᠪᠠᠳᠢᠷᠴᠢᠨ ᠬᠠᠷᠢᠯᠴᠠᠨ ᠪᠡᠶᠡ ᠪᠡᠶᠡ ᠪᠡᠨ ᠮᠠᠭᠲᠠᠯᠴᠠᠨ ᠬᠣᠢᠭᠤᠷ ᠠᠷᠭᠠ ᠪᠠᠨ ᠭᠠᠢᠬᠠᠭᠤᠯᠤᠨ ᠤᠭᠤᠴᠠ ᠪᠠᠨ ᠢᠳᠡᠵᠦ ᠶᠠᠪᠤᠪᠠ ᠭᠡᠨᠡ᠃