ᠬᠠᠭᠠᠨ ᠲᠡᠭᠦᠰ ᠊ᠤᠨ ᠬᠦᠦ᠂ ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨХаан дүүсийн хүү, ширээтийн мэргэн хаан Khaan düüsiin khüü, shireetiin mergen khaan
1046
ᠰᠠᠢᠨ ᠴᠠᠭ ᠤ᠋ᠨ ᠡᠬᠢᠨ ᠳ᠋ᠦ᠍
ᠮᠠᠭᠤ ᠴᠠᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍
ᠵᠡᠭᠦᠨ ᠤᠷᠲᠤ ᠲᠢᠪ ᠢ᠋ ᠡᠵᠡᠯᠡᠭᠴᠢ
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠬᠦᠦ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠭᠡᠵᠦ ᠪᠠᠢᠵᠠᠢ᠃
ᠲᠡᠷᠡ ᠬᠠᠭᠠᠨ ᠤ᠋ ᠲᠥᠷᠥᠭᠰᠡᠨ ᠴᠠᠭ ᠨᠢ
ᠲᠦᠪᠰᠢᠨ ᠵᠢᠷᠭᠠᠯ ᠬᠣᠣᠰᠯᠠᠵᠤ
ᠲᠦᠮᠡᠨ ᠠᠮᠢᠲᠠᠨ ᠪᠠᠶᠠᠷ ᠲᠠᠢ ᠴᠠᠭ ᠲᠤ᠌ ᠲᠥᠷᠥᠵᠡᠢ᠃
ᠭᠠᠷᠤᠭᠰᠠᠨ ᠴᠠᠭ ᠠ᠋ᠴᠠ ᠨᠢ ᠬᠣᠢᠰᠢ
ᠭᠠᠮᠰᠢᠭ ᠵᠣᠪᠠᠭᠤᠷᠢ ᠦᠭᠡᠢ
ᠭᠠᠳᠠᠭᠤᠷ ᠪᠠᠢᠬᠤ ᠠᠷᠠᠳ ᠤ᠋ᠳ ᠨᠢ
ᠭᠠᠢᠬᠠᠮᠰᠢᠭᠲᠠᠢ ᠰᠠᠢᠰᠢᠶᠠᠵᠤ ᠪᠢᠰᠢᠷᠡᠳᠡᠭ ᠭᠡᠨᠡ᠃
ᠣᠯᠠᠨ ᠲᠦᠮᠡᠨ ᠨᠢ ᠬᠦᠷᠢᠶᠡᠯᠡᠭᠰᠡᠨ ᠡᠴᠡ
ᠣᠷᠣᠨ ᠬᠣᠲᠠᠯᠠᠭᠠᠷ ᠮᠠᠨᠳᠤᠵᠤ
ᠤᠳᠤᠮᠲᠤ ᠠᠷᠠᠳ ᠨᠢ ᠲᠦᠰᠢᠭᠰᠡᠨ ᠡᠴᠡ᠃
ᠤᠯᠠᠮ ᠰᠠᠢᠵᠢᠷᠠᠨ ᠪᠡᠬᠢᠵᠢᠭᠰᠡᠨ ᠭᠡᠨᠡ᠃
ᠵᠧ| ᠴᠢᠩᠭᠢᠭᠡᠳ ᠳᠣᠷᠣᠭᠰᠢ ᠬᠡᠯᠡᠪᠡᠯ᠄
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠤ᠋
ᠰᠠᠭᠤᠷᠢ ᠪᠠᠢᠷᠢ ᠭᠡᠷ ᠣᠷᠣᠨ ᠨᠢ
ᠠᠭᠠᠷᠤ ᠽᠠᠨᠳᠠᠨ ᠲᠣᠭᠣᠨᠣ ᠲᠠᠢ
ᠠᠮᠢᠳᠤ ᠯᠤᠤ ᠶ᠋ᠢᠨ ᠪᠦᠰᠡᠯᠡᠭᠦᠷ ᠲᠡᠢ
ᠮᠣᠭᠠᠢ ᠶ᠋ᠢᠨ ᠶᠠᠰᠤᠨ ᠣᠨᠢ ᠲᠠᠢ
ᠮᠣᠯᠣᠷ ᠽᠠᠨᠳᠠᠨ ᠬᠠᠭᠠᠯᠭᠠ ᠲᠠᠢ
ᠳ᠋ᠸᠮᠪᠣ ᠲᠣᠷᠭᠠᠨ ᠳᠡᠭᠡᠪᠦᠷ ᠲᠡᠢ
ᠬᠠᠮᠪᠤ ᠲᠣᠷᠭᠠᠨ ᠲᠤᠭᠤᠷᠭᠠ ᠲᠠᠢ
ᠬᠠᠷᠠ ᠲᠣᠷᠭᠠᠨ ᠬᠠᠶᠠᠭᠠᠪᠴᠢ ᠲᠠᠢ
ᠬᠠᠯᠠ ᠴᠡᠩᠮᠡ ᠪᠦᠷᠢᠶᠡᠰᠦ ᠲᠡᠢ
ᠡᠢᠮᠦ ᠰᠠᠢᠬᠠᠨ ᠣᠷᠳᠣᠨ ᠢ᠋
ᠥᠷᠥᠭᠡ ᠪᠣᠯᠭᠠᠨ ᠰᠠᠭᠤᠳᠠᠭ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠭᠡᠷ ᠲᠡᠭᠡᠨ ᠰᠠᠭᠤᠵᠤ
ᠨᠢᠲᠡᠷᠡᠵᠦ᠍ ᠠᠷᠠᠰᠤ ᠡᠯᠳᠡᠨ
ᠪᠣᠳᠣᠯᠭᠠ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ
ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠨᠠᠷᠢᠪᠴᠢᠯᠠᠭᠰᠠᠨ ᠨᠢ
《ᠬᠣᠵᠢᠮ ᠤ᠋ᠨ ᠡᠳᠦᠷ ᠢᠷᠡᠬᠦ ᠳ᠋ᠦ᠍
ᠬᠣᠢᠰᠢ ᠶ᠋ᠢᠨ ᠮᠠᠷᠭᠠᠲᠠ ᠪᠣᠯᠬᠤ ᠳ᠋ᠤ᠌᠂
ᠶᠠᠳᠠᠷᠠᠵᠤ ᠵᠦᠳᠡᠷᠡᠬᠦ ᠦᠶᠡ ᠳ᠋ᠦ᠍
ᠶᠠᠰᠤ ᠬᠦᠨᠳᠦᠷᠡᠬᠦ ᠴᠠᠭ ᠲᠤ᠌
ᠬᠠᠭᠠᠷᠬᠠᠢ ᠴᠣᠭᠣᠷᠬᠠᠢ ᠶ᠋ᠢ ᠥᠮᠥᠷᠥᠥᠯᠵᠦ ᠥᠭᠬᠦ
ᠬᠠᠨᠢ ᠨᠥᠬᠥᠷ ᠮᠢᠨᠢ ᠬᠠᠮᠢᠭᠠ ᠪᠠᠢᠬᠤ ᠪᠣᠯ?》 ᠭᠡᠳ
ᠮᠣᠷᠢᠨ ᠠ᠋ᠴᠠ ᠪᠠᠨ ᠠᠰᠠᠭᠤᠵᠤ ᠮᠡᠳᠡᠶᠡ ᠭᠡᠵᠦ
ᠮᠣᠯᠴᠣᠭᠲᠤ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠭᠠᠷᠬᠤ ᠳ᠋ᠤ᠌
ᠬᠠᠭᠠᠯᠭᠠ ᠶ᠋ᠢᠨ ᠪᠣᠱᠣᠭᠠ ᠲᠠᠢ ᠨᠢ ᠬᠢᠮᠤᠷᠠᠯᠳᠤᠵᠤ
ᠬᠠᠵᠠᠭᠠᠷ ᠤ᠋ᠨ ᠠᠮᠠᠭᠠᠢ ᠨᠢ ᠬᠠᠩᠭᠢᠨᠠᠬᠤ ᠳ᠋ᠤ᠌᠂
ᠠᠳᠤᠭᠤᠨ ᠳᠤᠮᠳᠠ ᠪᠠᠨ ᠪᠠᠢᠳᠠᠭ
ᠠᠭᠲᠠ ᠶ᠋ᠢᠨ ᠮᠠᠩᠯᠠᠢ ᠪᠣᠯᠳᠠᠭ
ᠵᠠᠭᠤᠨ ᠠᠯᠲᠠ ᠪᠡᠶᠡ ᠲᠡᠢ
ᠵᠠᠭᠠᠨ ᠰᠢᠭ᠋ ᠪᠠᠢᠳᠠᠯ ᠲᠠᠢ
ᠵᠡᠭᠡᠷᠡ ᠶ᠋ᠢᠨ ᠬᠥᠯ ᠰᠢᠭ ᠰᠢᠯᠪᠢ ᠲᠡᠢ
ᠵᠢᠷᠭᠤᠭᠠᠨ ᠠᠯᠲᠠ ᠬᠦᠵᠦᠭᠦᠦ ᠲᠡᠢ
ᠶᠢᠰᠦᠨ ᠲᠥᠭᠡ ᠴᠢᠬᠢ ᠲᠡᠢ
ᠢᠯᠡ ᠣᠳᠣᠨ ᠨᠢᠳᠦᠲᠦ
ᠢᠮᠡᠷᠦᠭᠰᠡᠨ ᠰᠠᠭᠰᠠᠭᠠᠷ ᠳᠡᠯ ᠲᠡᠢ
ᠢᠪᠢᠭᠡᠯᠵᠡᠭᠰᠡᠨ ᠥᠳᠬᠡᠨ ᠰᠡᠭᠦᠯ ᠲᠡᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ᠄
《ᠮᠠᠨᠳᠤᠭᠰᠠᠨ ᠤᠯᠤᠰ ᠮᠡᠨᠳᠦ ᠪᠠᠢᠬᠤ ᠳ᠋ᠤ᠌
ᠡᠵᠡᠨ ᠲᠥᠷᠥ ᠡᠩᠬᠡ ᠪᠠᠢᠬᠤ ᠳ᠋ᠤ᠌
ᠬᠠᠵᠠᠭᠠᠷ ᠶᠠᠭᠤᠨ ᠳ᠋ᠤ᠌ ᠬᠠᠩᠭᠢᠨᠠᠪᠠ?》 ᠭᠡᠳ
ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠭᠰᠠᠭᠠᠷ
ᠲᠣᠭᠣᠰᠣᠨ ᠠ᠋ᠴᠠ ᠪᠠᠨ ᠪᠤᠯᠭᠢᠭᠰᠠᠭᠠᠷ
ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠭᠠᠳᠤᠭᠰᠠᠭᠠᠷ
ᠰᠡᠭᠦᠳᠡᠷ ᠡᠴᠡ ᠪᠡᠨ ᠪᠤᠯᠭᠢᠭᠰᠠᠭᠠᠷ
ᠡᠵᠡᠨ ᠦ᠌ ᠪᠡᠨ ᠳᠡᠷᠭᠡᠳᠡ ᠢᠷᠡᠵᠡᠢ ᠭᠡᠨᠡ᠃
ᠡᠨᠡ ᠮᠣᠷᠢ ᠪᠠᠨ ᠪᠣᠯ
ᠤᠷᠭᠠ ᠪᠠᠷ ᠪᠠᠷᠢᠳᠠᠭ ᠦᠭᠡᠢ ᠤᠷᠢᠵᠤ ᠪᠠᠷᠢᠳᠠᠭ᠂
ᠬᠤᠢᠪᠢ ᠪᠠᠷ ᠪᠠᠷᠢᠳᠠᠭ ᠦᠭᠡᠢ ᠬᠤᠷᠤᠢᠯᠠᠵᠤ ᠪᠠᠷᠢᠳᠠᠭ ᠭᠡᠨᠡ᠃
ᠴᠢᠩᠭᠢᠭᠡᠳ ᠳᠣᠷᠣᠭᠰᠢ ᠬᠡᠯᠡᠪᠡᠯ᠄
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠢᠵᠢᠷ ᠠᠭᠲᠠ ᠠ᠋ᠴᠠ ᠪᠠᠨ ᠠᠰᠠᠭᠤᠭᠰᠠᠨ ᠨᠢ᠄
《ᠬᠣᠵᠢᠮ ᠤ᠋ᠨ ᠡᠳᠦᠷ ᠢᠷᠡᠬᠦ ᠳ᠋ᠦ᠍
ᠬᠣᠢᠰᠢ ᠶ᠋ᠢᠨ ᠮᠠᠷᠭᠠᠲᠠ ᠪᠣᠯᠬᠤ ᠳ᠋ᠤ᠌
ᠶᠠᠳᠠᠷᠠᠵᠤ ᠵᠦᠳᠡᠷᠡᠬᠦ ᠦᠶᠡ ᠳ᠋ᠦ᠍
ᠶᠠᠰᠤ ᠬᠦᠨᠳᠦᠷᠡᠬᠦ ᠴᠠᠭ ᠲᠤ᠌
ᠬᠠᠭᠠᠷᠬᠠᠢ ᠴᠣᠭᠣᠷᠬᠠᠢ ᠶ᠋ᠢ ᠥᠮᠥᠷᠥᠥᠯᠵᠦ ᠥᠭᠬᠦ
ᠬᠠᠨᠢ ᠨᠥᠬᠥᠷ ᠮᠢᠨᠢ ᠬᠠᠮᠢᠭᠠ ᠪᠠᠢᠬᠤ ᠪᠣᠯ
ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠳᠠᠷᠤᠵᠤ
ᠬᠠᠭᠠᠨ ᠡᠴᠢᠭᠡ ᠡᠴᠡ ᠠᠰᠠᠭᠤᠵᠤ
ᠬᠠᠲᠤᠨ ᠡᠵᠢ ᠡᠴᠡ ᠰᠤᠷᠪᠤᠯᠵᠢᠯᠠᠬᠤᠶᠠ
ᠪᠣᠯᠬᠤ ᠤᠤ?》 ᠭᠡᠰᠡᠨ ᠳ᠋ᠦ᠍
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ
ᠬᠣᠩᠬᠠᠯᠵᠠᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ᠄
《ᠪᠣᠯᠤᠨᠠ!》 ᠭᠡᠵᠦ ᠢᠨᠴᠠᠭᠠᠵᠤ
《ᠪᠦᠲᠦᠨᠡ》 ᠭᠡᠵᠦ ᠬᠠᠩᠭᠢᠨᠠᠪᠠ ᠭᠡᠨᠡ᠃
ᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠬᠦᠦ
ᠡᠵᠢ ᠠᠪᠤ ᠳ᠋ᠠᠭᠠᠨ ᠣᠴᠢᠵᠤ
ᠲᠠᠬᠢᠮ ᠡᠪᠦᠳᠦᠭ ᠨᠤᠭᠤᠯᠵᠤ
ᠲᠤᠬᠢᠷ ᠲᠣᠯᠣᠭᠠᠢ ᠪᠥᠬᠥᠢᠵᠦ
ᠬᠦᠨᠳᠦ ᠶᠣᠰᠣ ᠭᠦᠢᠴᠡᠳᠬᠡᠨ
ᠬᠥᠭᠰᠢᠳ ᠦ᠋ᠨ ᠣᠯᠪᠣᠭ ᠤ᠋ᠨ ᠡᠮᠦᠨᠡ
ᠬᠥᠯ ᠨᠤᠭᠤᠯᠤᠨ ᠴᠥᠮᠴᠥᠢᠵᠦ ᠰᠠᠭᠤᠭᠰᠠᠨ ᠳ᠋ᠤ᠌
ᠬᠠᠭᠠᠨ ᠲᠡᠭᠦᠰ ᠠᠪᠤ ᠨᠢ
ᠬᠠᠲᠤᠨ ᠰᠦᠷᠦᠩ ᠡᠵᠢ ᠨᠢ
《ᠵᠦᠭᠡᠷ ᠵᠠᠩ ᠳ᠋ᠠᠭᠠᠨ ᠰᠠᠭᠤᠬᠤ ᠦᠭᠡᠢ
ᠵᠣᠯᠭᠠᠬᠤ ᠪᠠᠷ ᠶᠠᠭᠤᠨ ᠳ᠋ᠤ᠌ ᠢᠷᠡᠪᠡ?
ᠬᠦᠨᠳᠦ ᠬᠡᠷᠡᠭ ᠭᠠᠷᠤᠭᠰᠠᠨ ᠤᠤ?
ᠬᠦᠦ ᠮᠢᠨᠢ ᠢᠷᠡᠭᠰᠡᠨ ᠨᠢ ᠶᠠᠭᠤ ᠪᠣᠯᠪᠠ?》ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠠᠪᠤ ᠡᠵᠢ ᠬᠣᠶᠠᠭᠤᠯᠠ ᠠ᠋ᠴᠠ
ᠠᠶᠤᠯ ᠦᠭᠡᠢ ᠠᠰᠠᠭᠤᠬᠤ ᠵᠦᠢᠯ ᠪᠣᠯ
ᠬᠣᠵᠢᠮ ᠤ᠋ᠨ ᠡᠳᠦᠷ ᠢᠷᠡᠬᠦ ᠳ᠋ᠦ᠍
ᠬᠣᠢᠰᠢ ᠶ᠋ᠢᠨ ᠮᠠᠷᠭᠠᠲᠠ ᠪᠣᠯᠬᠤ ᠳ᠋ᠤ᠌
ᠶᠠᠳᠠᠷᠠᠵᠤ ᠵᠦᠳᠡᠷᠡᠬᠦ ᠦᠶᠡ ᠳ᠋ᠦ᠍
ᠶᠠᠰᠤ ᠬᠦᠨᠳᠦᠷᠡᠬᠦ ᠴᠠᠭ ᠲᠤ᠌
ᠬᠠᠭᠠᠷᠬᠠᠢ ᠴᠣᠭᠣᠷᠤᠬᠠᠢ ᠶ᠋ᠢ ᠥᠮᠥᠷᠥᠥᠯᠵᠦ ᠥᠭᠭᠦ
ᠬᠠᠨᠢ ᠨᠥᠬᠥᠷ ᠮᠢᠨᠢ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ
ᠬᠠᠭᠠᠨ ᠴᠣᠯᠠᠲᠤ ᠠᠪᠤ
ᠬᠠᠲᠤᠨ ᠴᠣᠯᠠᠲᠤ ᠡᠵᠢ ᠮᠢᠨᠢ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠦᠦ ᠳ᠋ᠡᠭᠡᠨ
ᠰᠢᠯᠵᠢᠭᠦᠯᠦᠨ ᠵᠥᠩᠨᠡᠵᠦ ᠥᠭᠭᠦᠨᠡᠦ!》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠪᠡᠶᠡ
ᠬᠠᠲᠤᠨ ᠰᠦᠷᠦᠩ ᠲᠡᠢ ᠪᠡᠨ
ᠬᠠᠮᠲᠤ ᠪᠠᠷ ᠵᠡᠷᠭᠡᠴᠡᠨ
ᠬᠠᠷᠢᠭᠤᠯᠤᠨ ᠵᠥᠩᠨᠡᠵᠦ ᠵᠢᠭᠠᠭᠰᠠᠨ ᠨᠢ᠄
《ᠵᠢᠭᠦᠷ ᠲᠡᠢ ᠰᠢᠪᠠᠭᠤ ᠨᠢᠰᠴᠦ ᠬᠦᠷᠬᠦ ᠦᠭᠡᠢ
ᠲᠤᠭᠤᠷᠠᠢ ᠲᠠᠢ ᠮᠣᠷᠢ ᠴᠥᠮᠴᠢᠵᠦ ᠬᠦᠷᠬᠦ ᠦᠭᠡᠢ
ᠲᠡᠷᠡ ᠪᠠᠷᠠᠭᠤᠨ ᠬᠣᠢᠲᠤ ᠲᠢᠪ ᠦ᠋ᠨ
ᠨᠠᠷᠠᠨ ᠬᠠᠭᠠᠨ ᠤ᠋ ᠥᠬᠢᠨ ᠢ᠋
ᠨᠠᠢᠷ ᠬᠥᠷ ᠦ᠋ᠨ ᠳᠡᠭᠡᠷᠡ
ᠥᠨᠳᠡᠭᠡᠨ ᠰᠦᠢ ᠲᠠᠯᠪᠢᠵᠤ
ᠤᠷᠤᠭ ᠲᠣᠭᠲᠠᠭᠰᠠᠨ ᠤᠴᠢᠷ ᠪᠠᠢᠬᠤ ᠲᠤᠯᠠ
ᠬᠦᠦ ᠮᠢᠨᠢ ᠶᠠᠪᠤᠵᠤ
ᠬᠡᠦᠬᠡᠨ ᠢ᠋ᠶ᠋ᠡᠨ ᠣᠯᠵᠤ ᠢᠷᠡ!》 ᠭᠡᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠢᠯᠪᠢ ᠲᠤᠯᠭᠠᠨ ᠰᠥᠭᠥᠳᠴᠦ
ᠰᠢᠯᠵᠢᠯ ᠦᠭᠡᠢ ᠮᠥᠷᠭᠥᠭᠡᠳ
ᠰᠠᠯᠬᠤ ᠶᠣᠰᠣ ᠪᠠᠨ ᠭᠦᠢᠴᠡᠳᠬᠡᠨ
ᠰᠠᠭᠤᠷᠢ ᠠ᠋ᠴᠠ ᠪᠠᠨ ᠡᠷᠭᠢᠵᠦ
ᠡᠴᠢᠭᠡ ᠡᠬᠡ ᠡᠴᠡ ᠪᠡᠨ ᠰᠠᠯᠵᠤ
ᠡᠷᠦᠬᠡ ᠶ᠋ᠢᠨ ᠭᠠᠳᠠᠨᠠ ᠭᠠᠷᠴᠤ
ᠬᠥᠨᠳᠡᠢ ᠲᠠᠯᠠ ᠶ᠋ᠢᠨ ᠵᠦᠭ ᠵᠣᠭᠰᠣᠵᠤ
ᠬᠦᠯᠦᠭ ᠮᠣᠷᠢ ᠪᠠᠨ ᠤᠷᠢᠭᠠᠳ
ᠤᠷᠭᠠ ᠪᠠᠷ ᠪᠠᠷᠢᠭᠰᠠᠨ ᠦᠭᠡᠢ
ᠤᠷᠢᠵᠤ ᠳᠠᠭᠤᠳᠠᠨ ᠪᠠᠷᠢᠭᠠᠳ
ᠬᠤᠢᠪᠢ ᠪᠠᠷ ᠪᠠᠷᠢᠭᠰᠠᠨ ᠦᠭᠡᠢ
ᠬᠤᠷᠤᠢᠯᠠᠵᠤ ᠳᠠᠭᠤᠳᠠᠨ ᠪᠠᠷᠢᠭᠠᠳ᠂
ᠣᠷᠳᠣᠨ ᠳ᠋ᠠᠭᠠᠨ ᠪᠤᠴᠠᠵᠤ
ᠣᠯᠠᠨ ᠳ᠋ᠠᠭᠠᠨ ᠬᠡᠯᠡᠵᠦ
ᠬᠣᠯᠠ ᠠᠶᠠᠨ ᠳ᠋ᠤ᠌ ᠠᠶᠠᠯᠠᠬᠤ ᠪᠠᠷ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠪᠠᠨ
ᠬᠤᠷᠤᠭᠤ ᠳᠠᠷᠤᠨ ᠰᠣᠢᠵᠤ
ᠬᠣᠨᠣᠭ ᠲᠣᠭᠠᠯᠠᠨ ᠤᠶᠠᠵᠤ ᠡᠬᠢᠯᠡᠪᠡ ᠭᠡᠨᠡ᠃
ᠨᠢᠭᠡᠨ ᠬᠣᠨᠣᠭ ᠤᠶᠠᠵᠤ
ᠨᠢᠮᠭᠡᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠬᠣᠶᠠᠷ ᠬᠣᠨᠣᠭ ᠤᠶᠠᠵᠤ
ᠬᠣᠩᠭᠣᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠭᠤᠷᠪᠠᠨ ᠬᠣᠨᠣᠭ ᠤᠶᠠᠵᠤ
ᠭᠤᠶᠠ ᠶ᠋ᠢᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠳᠥᠷᠪᠡ ᠬᠣᠨᠣᠭ ᠤᠶᠠᠵᠤ
ᠳᠥᠷᠦᠭᠡᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠲᠠᠪᠤ ᠬᠣᠨᠣᠭ ᠤᠶᠠᠵᠤ
ᠲᠠᠷᠭᠤᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠵᠢᠷᠭᠤᠭᠠᠨ ᠬᠣᠨᠣᠭ ᠤᠶᠠᠵᠤ
ᠵᠤᠤᠵᠠᠢ ᠶ᠋ᠢᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠳᠣᠯᠣᠭᠠᠨ ᠬᠣᠨᠣᠭ ᠤᠶᠠᠵᠤ
ᠲᠣᠬᠣᠮ ᠤ᠋ᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠨᠠᠢ᠍ᠮᠠ ᠬᠣᠨᠣᠭ ᠤᠶᠠᠵᠤ
ᠨᠠᠷᠢᠨ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠶᠢᠰᠦ ᠬᠣᠨᠣᠭ ᠤᠶᠠᠵᠤ
ᠢᠳᠡᠷ ᠮᠢᠬᠠ ᠨᠢ ᠱᠠᠮᠠᠢᠵᠤ ᠭᠡᠨᠡ᠃
ᠠᠷᠪᠠ ᠬᠣᠨᠣᠭ ᠤᠶᠠᠵᠤ
ᠠᠯᠠᠭ ᠮᠢᠬᠠ ᠨᠢ ᠱᠠᠮᠠᠢᠵᠤ
ᠰᠠᠪᠬᠠ ᠶ᠋ᠢᠨ ᠴᠢᠨᠡᠭᠡ ᠰᠢᠭᠡᠵᠦ
ᠬᠣᠷᠭᠣᠯ ᠤ᠋ᠨ ᠲᠡᠳᠦᠢ ᠪᠠᠭᠠᠵᠤ ᠪᠠᠢᠨᠠ ᠭᠡᠨᠡ᠃
ᠵᠧ ᠲᠡᠭᠡᠭᠡᠳ
ᠮᠢᠨᠳᠠᠰᠤᠨ ᠰᠠᠢᠬᠠᠨ ᠨᠣᠭᠲᠣ ᠶ᠋ᠢ ᠨᠢ
ᠮᠠᠩᠨᠠᠢ ᠳᠤᠮᠳᠠ ᠨᠢ ᠲᠠᠭᠠᠷᠠᠭᠤᠯᠵᠤ
ᠮᠢᠩᠭᠠᠨ ᠯᠠᠩ ᠤ᠋ᠨ ᠬᠠᠵᠠᠭᠠᠷ ᠢ᠋ ᠨᠢ
ᠠᠮᠠᠭᠠᠢ ᠵᠠᠭᠤᠯᠭᠠᠨ ᠡᠮᠬᠦᠭᠦᠯᠵᠦ
ᠭᠥᠷᠦᠭᠡᠰᠦᠨ ᠦ᠌ ᠶᠠᠰᠤ ᠪᠠᠷ
ᠬᠦᠷᠢᠶᠡᠯᠡᠵᠦ ᠴᠢᠮᠡᠭᠯᠡᠨ ᠬᠢᠭᠰᠡᠨ
ᠬᠦᠳᠡᠷ ᠪᠤᠭᠤ ᠶ᠋ᠢᠨ ᠶᠠᠰᠤ ᠪᠠᠷ
ᠵᠠᠭᠠᠭᠯᠠᠵᠤ ᠴᠢᠮᠡᠭᠯᠡᠨ ᠬᠢᠭᠰᠡᠨ
ᠨᠠᠢᠭᠤᠭᠠ ᠽᠠᠨᠳᠠᠨ ᠪᠦᠭᠦᠷᠭᠡ ᠨᠢ
ᠡᠮᠦᠨᠡ ᠬᠣᠢᠨᠠ ᠨᠢ ᠭᠢᠯᠪᠠᠵᠤ
ᠨᠠᠢ᠍ᠮᠠᠨ ᠰᠠᠢᠬᠠᠨ ᠭᠠᠨᠵᠤᠭᠠ ᠨᠢ
ᠯᠠᠪᠷᠢ ᠪᠣᠯᠤᠨ ᠬᠡᠢᠰᠦᠭᠰᠡᠨ
ᠨᠠᠪᠴᠢ ᠬᠤᠸᠠᠷ ᠤ᠋ᠨ ᠭᠥᠯᠢᠮ ᠨᠢ
ᠵᠢᠭᠦᠷ ᠪᠣᠯᠤᠨ ᠳᠡᠯᠭᠡᠭᠰᠡᠨ
ᠨᠠᠷᠠᠨ ᠰᠠᠷᠠᠨ ᠳᠥᠷᠥᠭᠡ ᠨᠢ
ᠨᠠᠭᠠᠲᠠᠢ ᠴᠠᠭᠠᠲᠠᠢ ᠨᠢ ᠭᠢᠯᠪᠠᠯᠵᠠᠵᠤ
ᠥᠨᠳᠥᠷ ᠭᠡᠭᠴᠢ ᠬᠥᠮᠦᠨ ᠢ᠋ᠶ᠋ᠡᠷ ᠴᠢᠬᠢᠳᠡᠭᠦᠯᠦᠨ
ᠪᠣᠭᠣᠨᠢ ᠭᠡᠭᠴᠢ ᠬᠥᠮᠦᠨ ᠢ᠋ᠶ᠋ᠡᠷ ᠴᠢᠳᠦᠷᠯᠡᠭᠦᠯᠦᠭᠡᠳ
ᠲᠦᠮᠡᠨ ᠯᠠᠩ ᠤ᠋ᠨ ᠡᠮᠡᠭᠡᠯ ᠢ᠋ ᠨᠢ
ᠲᠥᠪ ᠳᠤᠮᠳᠠ ᠨᠢ ᠲᠣᠬᠣᠵᠤ
ᠲᠩᠷᠢ ᠲᠤᠯᠤᠮᠠ ᠳᠡᠭᠳᠡᠪᠡᠴᠦ
ᠦᠯᠦ ᠰᠠᠯᠬᠤ ᠪᠠᠷ ᠲᠠᠭᠠᠷᠠᠭᠤᠯᠵᠤ᠂
ᠣᠭᠣᠨᠣ ᠶ᠋ᠢᠨ ᠠᠷᠠᠰᠤᠨ ᠣᠯᠣᠩ ᠢ᠋ ᠨᠢ
ᠣᠭᠰᠢᠷᠠᠲᠠᠯᠠ ᠨᠢ ᠲᠠᠲᠠᠵᠤ
ᠣᠭᠲᠠᠷᠭᠤᠢ ᠲᠤᠯᠤᠮᠠ ᠳᠡᠭᠳᠡᠪᠡᠴᠦ
ᠦᠯᠦ ᠰᠠᠯᠬᠤ ᠪᠠᠷ ᠵᠣᠬᠢᠶᠠᠵᠤ᠂
ᠵᠡᠭᠡᠷᠡ ᠶ᠋ᠢᠨ ᠠᠷᠠᠰᠤᠨ ᠵᠢᠷᠢᠮ ᠢ᠋ ᠨᠢ
ᠵᠢᠭᠳᠡᠷᠡᠲᠡᠯᠡ ᠲᠠᠲᠠᠵᠤ
ᠵᠢᠪᠠᠷ ᠪᠠᠷᠢᠭᠠᠳ ᠳᠡᠭᠳᠡᠪᠡᠴᠦ
ᠦᠯᠦ ᠰᠠᠯᠬᠤ ᠪᠠᠷ ᠵᠣᠬᠢᠶᠠᠵᠤ᠂
ᠳᠠᠯᠠᠨ ᠯᠠᠩ ᠤ᠋ᠨ ᠲᠠᠰᠢᠭᠤᠷ ᠢ᠋
ᠳᠠᠯᠤ ᠳᠤᠮᠳᠠ ᠨᠢ ᠲᠠᠭᠠᠷᠠᠭᠤᠯᠵᠤ
ᠳᠠᠯᠠᠨ ᠬᠡᠳᠦᠨ ᠬᠥᠮᠦᠨ ᠢ᠋ᠶ᠋ᠡᠷ
ᠰᠤᠭᠤᠳᠠᠭᠤᠯᠤᠨ ᠮᠣᠷᠳᠠᠪᠠ ᠭᠡᠨᠡ᠃
ᠵᠧ! ᠲᠡᠭᠡᠭᠡᠳ
ᠶᠡᠷᠦ ᠬᠤᠯᠤ ᠶ᠋ᠢᠨ ᠪᠠᠢᠳᠠᠯ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ
ᠢᠷᠠᠭᠤ ᠡᠵᠡᠨ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠨᠢ᠄
《ᠡᠵᠡᠨ ᠮᠢᠨᠢ ᠰᠣᠨᠣᠰ!
ᠡᠨᠳᠡᠭᠳᠡᠯ ᠬᠡᠳᠦ ᠪᠠᠢᠨᠠ᠃
ᠡᠭᠦᠨ ᠢ᠋ ᠲᠡᠰᠴᠦ ᠥᠩᠭᠡᠷᠡᠪᠡᠯ
ᠡᠷᠭᠢᠵᠦ ᠶᠡᠷᠦ ᠲᠦᠭᠰᠢᠭᠦᠷᠢ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠢᠳᠠᠷ ᠠᠭᠲᠠ ᠠ᠋ᠴᠠ ᠪᠠᠨ ᠠᠰᠠᠭᠤᠭᠰᠠᠨ ᠨᠢ᠄
《ᠡᠨᠳᠡᠭᠳᠡᠯ ᠭᠡᠳᠡᠭ ᠶᠠᠭᠤ ᠪᠣᠢ?
ᠡᠭᠦᠨ ᠢ᠋ᠶ᠋ᠡᠨ ᠲᠠᠢᠯᠵᠤ ᠥᠭᠭᠦᠨᠡᠦ?》 ᠭᠡᠰᠡᠨ ᠳ᠋ᠦ᠍
ᠠᠶᠤᠯᠲᠤ ᠲᠡᠢᠨ ᠳ᠋ᠦ᠍ ᠤᠨᠤᠳᠠᠭ
ᠠᠭᠲᠠ ᠶ᠋ᠢᠨ ᠮᠠᠩᠯᠠᠢ ᠪᠣᠯᠳᠠᠭ
ᠶᠡᠷᠦ ᠬᠤᠯᠤ ᠶ᠋ᠢᠨ ᠪᠠᠢᠳᠠᠯ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠨᠢ᠄
《ᠣᠳᠣ ᠠ᠋ᠴᠠ ᠪᠢ ᠲᠣᠭᠯᠠᠵᠤ
ᠣᠭᠲᠠᠷᠭᠤᠢ ᠳ᠋ᠤ᠌ ᠭᠠᠷᠴᠤ
ᠣᠳᠣ ᠲᠣᠭᠠᠯᠠᠨ ᠪᠤᠯᠭᠢᠨᠠ᠃
ᠣᠢ ᠰᠢᠭᠤᠢ ᠪᠠᠷ ᠨᠡᠪᠲᠡᠯᠵᠦ
ᠨᠠᠪᠴᠢ ᠲᠣᠭᠠᠯᠠᠨ ᠪᠤᠯᠭᠢᠨᠠ᠃
ᠭᠠᠵᠠᠷ ᠳᠣᠣᠷᠠ ᠣᠷᠣᠵᠤ
ᠦᠨᠳᠦᠰᠦ ᠲᠣᠭᠠᠯᠠᠨ ᠪᠤᠯᠭᠢᠨᠠ᠃
ᠭᠠᠢᠬᠠᠯᠲᠠᠢ ᠳᠠᠯᠠᠢ ᠳ᠋ᠤ᠌ ᠣᠷᠣᠵᠤ
ᠵᠢᠷᠠᠭᠠᠬᠠᠢ ᠲᠣᠭᠠᠯᠠᠨ ᠪᠤᠯᠭᠢᠨᠠ᠃
ᠤᠨᠤᠵᠤ ᠰᠠᠭᠤᠬᠤ ᠪᠠᠨ ᠬᠢᠴᠢᠶᠡᠭᠡᠷᠡᠢ!》 ᠭᠡᠵᠦ
ᠤᠬᠤᠰᠬᠢᠵᠦ ᠳᠠᠪᠬᠢᠭᠠᠳ
ᠣᠭᠲᠠᠷᠭᠤᠢ ᠳ᠋ᠤ᠌ ᠭᠠᠷᠴᠤ
ᠣᠳᠣ ᠲᠣᠭᠠᠯᠠᠨ
ᠣᠢ ᠰᠢᠭᠤᠢ ᠪᠠᠷ ᠨᠡᠪᠲᠡᠯᠵᠦ
ᠨᠠᠪᠴᠢ ᠲᠣᠭᠠᠯᠠᠨ ᠪᠤᠯᠭᠢᠭᠠᠳ᠂
ᠭᠠᠢᠬᠠᠯᠲᠠᠢ ᠳᠠᠯᠠᠢ ᠳ᠋ᠤ᠌ ᠣᠷᠣᠵᠤ
ᠵᠢᠷᠠᠭᠠᠬᠠᠢ ᠲᠣᠭᠠᠯᠠᠨ ᠪᠤᠯᠭᠢᠭᠠᠳ᠂
ᠪᠣᠯᠳᠠᠭ ᠭᠡᠳᠡᠭ ᠨᠡᠷᠡᠲᠡᠢ
ᠪᠣᠮᠪᠣᠨ ᠴᠠᠭᠠᠨ ᠠᠭᠤᠯᠠᠨ ᠳᠡᠭᠡᠷᠡ ᠵᠣᠭᠰᠣᠪᠠ᠃
ᠴᠢᠩᠭᠢᠭᠡᠳ ᠬᠠᠭᠠᠨ ᠬᠦᠦ
ᠠᠭᠲᠠ ᠠ᠋ᠴᠠ ᠪᠠᠨ ᠪᠠᠭᠤᠵᠤ
ᠠᠮᠢᠰᠬᠤᠭᠠ ᠪᠠᠨ ᠳᠠᠷᠤᠵᠤ ᠮᠣᠷᠳᠠᠶᠠ ᠭᠡᠳ
ᠠᠭᠤᠯᠠᠨ ᠤ᠋ ᠣᠷᠣᠢ ᠳ᠋ᠤ᠌ ᠰᠠᠭᠤᠵᠤ
ᠠᠭᠤᠳᠠᠮ ᠰᠢᠯᠢ ᠶ᠋ᠢ ᠬᠠᠷᠠᠭᠠᠳ
ᠭᠠᠩ ᠬᠡᠲᠡ ᠪᠡᠨ ᠴᠣᠬᠢᠵᠤ
ᠭᠠᠩᠰᠠ ᠰᠢᠯᠪᠢ ᠪᠡᠨ ᠵᠠᠭᠤᠵᠤ
ᠭᠠᠯᠵᠠᠭᠤ ᠰᠢᠷᠠ ᠲᠠᠮᠠᠬᠢ ᠪᠠᠨ
ᠭᠠᠪ ᠭᠠᠪ ᠰᠠᠪᠰᠠᠬᠤ ᠳ᠋ᠤ᠌
ᠠᠮᠠᠨ ᠤᠲᠤᠭᠠ ᠨᠢ
ᠠᠷᠪᠠᠨ ᠰᠢᠯᠢ ᠶ᠋ᠢ ᠪᠦᠷᠬᠦᠵᠦ
ᠬᠣᠭᠣᠯᠠᠢ ᠶ᠋ᠢᠨ ᠤᠲᠤᠭᠠ ᠨᠢ
ᠬᠣᠷᠢᠨ ᠰᠢᠯᠢ ᠶ᠋ᠢ ᠪᠦᠷᠬᠦᠵᠦ
ᠪᠠᠷᠠᠭᠤᠨ ᠵᠠᠪᠠᠵᠢ ᠶ᠋ᠢᠨ ᠤᠲᠤᠭᠠ ᠨᠢ
ᠪᠠᠷᠠᠭᠤᠨ ᠰᠢᠯᠢ ᠶ᠋ᠢ ᠪᠦᠷᠬᠦᠵᠦ
ᠵᠡᠭᠦᠨ ᠵᠠᠪᠠᠵᠢ ᠶ᠋ᠢᠨ ᠤᠲᠤᠭᠠ ᠨᠢ
ᠵᠡᠭᠦᠨ ᠰᠢᠯᠢ ᠶ᠋ᠢ ᠪᠦᠷᠬᠦᠭᠰᠡᠨ ᠳ᠋ᠦ᠍᠂
ᠡᠨᠳᠡᠬᠢ ᠠᠮᠢᠲᠠᠨ ᠡᠯᠵᠢᠭᠡ ᠪᠡᠨ ᠬᠥᠯᠵᠦ
ᠲᠡᠨᠳᠡᠬᠢ ᠠᠮᠢᠲᠠᠨ ᠲᠡᠷᠭᠡ ᠪᠡᠨ ᠬᠥᠯᠵᠦ
ᠬᠣᠯᠠ ᠶ᠋ᠢᠨ ᠲᠦᠢᠮᠡᠷ ᠦ᠋ᠨ ᠤᠲᠤᠭᠠ
ᠬᠤᠷᠤᠢᠯᠠᠵᠤ ᠢᠷᠡᠪᠡ ᠭᠡᠳ
ᠬᠣᠢᠰᠢ ᠤᠷᠤᠭᠰᠢ ᠳᠤᠲᠠᠭᠠᠵᠤ
ᠬᠤᠪᠢ ᠬᠤᠪᠢ ᠳ᠋ᠠᠭᠠᠨ ᠰᠠᠨᠳᠤᠷᠴᠤ ᠪᠠᠢᠨᠠ ᠭᠡᠨᠡ᠃
ᠳᠠᠬᠢᠭᠠᠳ ᠬᠠᠭᠠᠨ ᠬᠦᠦ
ᠲᠠᠮᠠᠬᠢ ᠪᠠᠨ ᠲᠡᠳᠡᠨ ᠪᠠᠷᠠᠵᠤ
ᠭᠠᠩᠰᠠᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ
ᠳᠠᠯᠠᠨ ᠠᠯᠲᠠ ᠬᠠᠳᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ
ᠲᠠᠪᠰᠢᠨ ᠭᠦᠪᠢᠵᠦ ᠲᠣᠭᠰᠢᠬᠤ ᠳ᠋ᠤ᠌
ᠴᠠᠭᠠᠲᠠᠢ ᠪᠠᠢᠭᠰᠠᠨ ᠠᠮᠢᠲᠠᠨ ᠨᠤᠭᠤᠳ ᠨᠢ
ᠴᠢᠬᠢ ᠪᠡᠨ ᠲᠠᠯᠪᠢᠨ ᠴᠢᠩᠨᠠᠵᠤ
ᠴᠡᠯᠮᠡᠭ ᠲᠩᠷᠢ ᠲᠤᠩᠭᠠᠯᠠᠭ ᠪᠠᠢᠬᠤ ᠳ᠋ᠤ᠌
ᠴᠠᠬᠢᠯᠭᠠᠨ ᠶᠠᠭᠤᠨ ᠳ᠋ᠤ᠌ ᠳᠤᠤᠭᠠᠷᠪᠠ ᠭᠡᠳ᠂
ᠴᠢᠨᠦ ᠮᠢᠨᠦ ᠦᠭᠡᠢ ᠶᠠᠷᠢᠯᠴᠠᠴᠤ
ᠰᠢᠳᠦ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠪᠢᠷᠤᠭᠤᠯᠵᠤ ᠪᠠᠢᠨᠠ ᠭᠡᠨᠡ᠂
ᠵᠧ! ᠴᠢᠨᠠᠭᠰᠢ ᠬᠡᠯᠡᠪᠡᠯ᠄
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠨᠤᠲᠤᠭ ᠠ᠋ᠴᠠ
ᠨᠠᠷᠠᠨ ᠬᠠᠭᠠᠨ ᠤ᠋ ᠣᠷᠣᠨ ᠬᠦᠷᠲᠡᠯᠡ
ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠠᠶᠠᠨ ᠵᠠᠮ ᠠᠯᠤᠰ ᠭᠡᠨᠡ᠃
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠢᠯᠵᠢᠨ ᠴᠢᠨᠠᠭᠰᠢ ᠮᠥᠷᠳᠡᠵᠦ
ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠰᠢᠭ ᠭᠢᠯᠪᠠᠯᠵᠠᠭᠤᠯᠵᠤ
ᠴᠢᠳᠠᠬᠤ ᠴᠢᠨᠡᠭᠡ ᠪᠡᠷ ᠨᠢ ᠭᠦᠶᠦᠯᠭᠡᠵᠦ
ᠡᠳᠦᠷ ᠰᠥᠨᠢ ᠶ᠋ᠢᠨ ᠢᠯᠭᠠᠯ ᠦᠭᠡᠢ
ᠡᠭᠦᠯᠡ ᠪᠠᠷᠢᠨ ᠳᠡᠭᠳᠡᠭᠦᠯᠵᠦ
ᠡᠯᠢᠶᠡ ᠱᠠᠭᠠᠵᠠᠭᠠᠢ ᠲᠠᠢ ᠣᠷᠣᠯᠳᠣᠭᠰᠠᠭᠠᠷ
ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠥᠩᠭᠡᠷᠡᠭᠰᠡᠭᠡᠷ
ᠰᠠᠯᠬᠢᠨ ᠵᠢᠪᠠᠷ ᠠ᠋ᠴᠠ ᠤᠷᠢᠲᠠᠭᠰᠠᠭᠠᠷ
ᠰᠠᠪᠠ ᠶᠡᠬᠡ ᠳᠠᠯᠠᠢ ᠶ᠋ᠢ ᠭᠡᠲᠦᠯᠦᠭᠰᠡᠭᠡᠷ
ᠲᠩᠷᠢ ᠭᠠᠵᠠᠷ ᠨᠡᠢᠯᠡᠵᠦ ᠪᠠᠢᠬᠤ
ᠲᠡᠷᠡ ᠪᠠᠷᠠᠭᠤᠨ ᠬᠣᠢᠲᠤ ᠳ᠋ᠤ᠌
ᠨᠢᠭᠡᠨ ᠶᠡᠬᠡ ᠠᠢᠯ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌
ᠨᠢᠰᠬᠦ ᠮᠡᠲᠦ ᠳᠠᠪᠬᠢᠵᠤ ᠢᠷᠡᠨ
ᠠᠢᠯ ᠳ᠋ᠤ᠌ ᠢᠷᠡᠵᠦ ᠪᠠᠭᠤᠭᠰᠠᠨ ᠳ᠋ᠤ᠌᠂
ᠠᠷᠢᠭᠤᠨ ᠰᠠᠢᠬᠠᠨ ᠭᠤᠷᠪᠠᠨ ᠵᠠᠯᠠᠭᠤ
ᠠᠯᠲᠠᠨ ᠨᠤᠮᠤ ᠰᠠᠭᠠᠳᠠᠭ ᠵᠦᠯᠭᠦᠵᠦ
ᠠᠮᠤᠷ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃
ᠬᠠᠭᠠᠨ ᠬᠦᠦ ᠣᠷᠣᠵᠤ ᠢᠷᠡᠭᠡᠳ
ᠬᠠᠮᠤᠭ ᠮᠡᠨᠳᠦ ᠰᠠᠢᠨ ᠢ᠋ ᠨᠢ ᠠᠰᠠᠭᠤᠵᠤ
ᠬᠥᠮᠦᠨ ᠦ᠌ ᠠᠶᠠᠭᠠᠯᠠᠨ ᠥᠭᠭᠦᠭᠰᠡᠨ
ᠬᠥᠬᠡ ᠴᠠᠢ ᠶ᠋ᠢ ᠨᠢ ᠤᠤᠭᠤᠵᠤ ᠪᠠᠢᠲᠠᠯᠠ
ᠭᠤᠷᠪᠠᠨ ᠰᠠᠢᠬᠠᠨ ᠵᠠᠯᠠᠭᠤ ᠶ᠋ᠢᠨ
ᠭᠣᠶᠣ ᠨᠢᠭᠡᠨ ᠵᠠᠯᠠᠭᠤ ᠨᠢ
ᠡᠪᠴᠢᠭᠦᠦ ᠪᠡᠨ ᠲᠦᠯᠬᠢᠵᠦ
ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠭᠠᠷᠭᠠᠵᠤ᠄
《ᠪᠢᠳᠡᠨ ᠭᠤᠷᠪᠠ ᠰᠢᠭ᠋ ᠭᠣᠶᠣ ᠵᠠᠯᠠᠭᠤ ᠶ᠋ᠢ
ᠪᠢᠨᠳᠦ ᠵᠢᠷᠤᠭ ᠳᠡᠭᠡᠷᠡ ᠦᠵᠡᠪᠡ ᠤᠤ?》 ᠭᠡᠰᠡᠨ ᠳ᠋ᠦ᠍
ᠪᠤᠰᠤ ᠨᠢᠭᠡᠨ ᠵᠠᠯᠠᠭᠤ ᠨᠢ
ᠪᠤᠷᠤᠭᠤ ᠳᠠᠰᠢ ᠬᠠᠨᠳᠤᠵᠤ
ᠪᠡᠶᠡ ᠪᠡᠨ ᠮᠡᠳᠡᠬᠦ ᠦᠭᠡᠢ ᠦᠭᠡ ᠶ᠋ᠢ
ᠪᠢᠲᠡᠭᠡᠢ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠷᠢ!
ᠴᠢ ᠪᠢᠳᠡ ᠭᠤᠷᠪᠠᠭᠤᠯᠠ ᠪᠠᠢᠬᠤ ᠶᠠᠭᠤ ᠪᠣᠢ᠃
ᠵᠡᠭᠦᠨ ᠤᠷᠲᠤ ᠲᠢᠪ ᠢ᠋ ᠡᠵᠡᠯᠡᠭᠰᠡᠨ
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠬᠦᠦ ᠭᠡᠳᠡᠭ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠪᠣᠯ
ᠪᠡᠷᠬᠡ ᠶ᠋ᠢᠨ ᠰᠠᠢᠬᠠᠨ ᠭᠣᠶᠣ ᠡᠷᠡ ᠭᠡᠨᠡ᠃
ᠲᠡᠷᠡ ᠲᠡᠢ ᠠᠳᠠᠯᠢᠳᠬᠠᠨ ᠦᠵᠡᠪᠡᠯ
ᠲᠡᠩᠴᠡᠬᠦ ᠡᠷᠡ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠠᠭᠤᠭᠰᠠᠨ ᠠ᠋ᠴᠠ ᠪᠠᠨ ᠪᠣᠰᠴᠤ᠄
《ᠨᠠᠷᠠᠨ ᠬᠠᠭᠠᠨ ᠤ᠋ ᠣᠷᠳᠣᠨ
ᠨᠡᠯᠢᠶᠡᠳ ᠬᠣᠯᠠ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍
ᠭᠣᠶᠣ ᠰᠠᠢᠬᠠᠨ ᠵᠠᠯᠠᠭᠤᠴᠤᠳ
《ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠪᠠᠢᠨᠠ》 ᠭᠡᠪᠡ᠃
ᠬᠠᠭᠠᠨ ᠬᠦᠦ ᠡᠨᠳᠡ ᠡᠴᠡ ᠭᠠᠷᠴᠤ
ᠬᠠᠲᠠᠷᠢᠭᠤᠯᠤᠨ ᠴᠢᠨᠠᠭᠰᠢ ᠶᠠᠪᠤᠭᠰᠠᠭᠠᠷ
ᠪᠠᠰᠠ ᠨᠢᠭᠡᠨ ᠠᠢᠯ ᠳ᠋ᠤ᠌ ᠬᠦᠷᠦᠭᠡᠳ
ᠪᠤᠯᠠᠭ ᠤ᠋ᠨ ᠳᠡᠭᠡᠷᠡ ᠨᠢ ᠪᠠᠭᠤᠵᠤ
ᠪᠠᠭᠤᠳᠠᠯ ᠳ᠋ᠤ᠌ ᠨᠢ ᠣᠷᠣᠭᠠᠳ
ᠪᠠᠷᠠᠯᠠᠨ ᠬᠠᠷᠠᠵᠤ ᠦᠵᠡᠭᠰᠡᠨ ᠳ᠋ᠦ᠍᠂
ᠭᠤᠷᠪᠠᠨ ᠰᠠᠢᠬᠠᠨ ᠬᠡᠦᠬᠡᠨ ᠰᠠᠭᠤᠵᠤ
ᠬᠠᠯᠢᠭᠤ ᠲᠣᠷᠭᠠ ᠡᠰᠬᠡᠭᠰᠡᠭᠡᠷ᠄
《ᠬᠠᠢᠷᠠᠲᠤ ᠮᠢᠨᠢ ᠬᠣᠩᠭᠣᠷ》 ᠭᠡᠵᠦ
ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠵᠤ ᠪᠠᠢᠨᠠ ᠭᠡᠨᠡ᠃
ᠬᠠᠭᠠᠨ ᠬᠦᠦ ᠣᠷᠣᠵᠤ
ᠬᠠᠮᠤᠭ ᠰᠠᠢᠨ ᠢ᠋ ᠨᠢ ᠮᠡᠳᠡᠯᠴᠡᠨ
ᠬᠠᠯᠠᠭᠤᠨ ᠴᠠᠢ ᠶ᠋ᠢ ᠨᠢ ᠤᠤᠭᠤᠵᠤ
ᠬᠠᠭᠤᠷᠠᠢ ᠠᠮᠤ ᠶ᠋ᠢ ᠨᠢ ᠢᠳᠡᠵᠦ ᠪᠠᠢᠬᠤ ᠳ᠋ᠤ᠌
ᠭᠤᠷᠪᠠᠨ ᠥᠬᠢᠨ ᠦ᠌ ᠥᠷᠥᠭᠡᠰᠦᠨ
ᠭᠣᠶᠣ ᠭᠡᠰᠡᠨ ᠨᠢᠭᠡ ᠨᠢ ᠪᠣᠰᠤᠭᠠᠳ
《ᠪᠢᠳᠡ ᠭᠤᠷᠪᠠ ᠰᠢᠭ᠋ ᠭᠣᠶᠣ
ᠪᠢᠨᠳᠦᠷ ᠴᠡᠴᠡᠭ ᠰᠢᠭ ᠰᠠᠢᠬᠠᠨ
ᠣᠷᠴᠢᠯᠠᠩ ᠳ᠋ᠤ᠌ ᠦᠭᠡᠢ ᠬᠡᠦᠬᠡᠨ ᠢ᠋
ᠣᠯᠵᠤ ᠬᠠᠷᠠᠵᠤ ᠪᠠᠢᠭᠰᠠᠨ ᠤᠤ?》 ᠭᠡᠰᠡᠨ ᠳ᠋ᠦ᠍
ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠰᠠᠨ ᠨᠢᠭᠡ ᠨᠢ
ᠬᠠᠨᠴᠤᠢ ᠠ᠋ᠴᠠ ᠨᠢ ᠴᠢᠩᠭᠠᠭᠠᠵᠤ᠄
《ᠬᠦᠢ᠂ ᠡᠭᠡᠴᠢ ᠮᠢᠨᠢ ᠪᠠᠢᠭ!
ᠬᠥᠮᠦᠨ ᠢ᠋ ᠪᠤᠤ ᠪᠠᠰᠤᠮᠵᠢᠯᠠ
ᠦᠨᠡᠨ ᠳ᠋ᠡᠭᠡᠨ ᠠᠪᠤᠭᠠᠳ ᠬᠡᠯᠡᠪᠡᠯ
ᠥᠪᠡᠷ ᠦ᠋ᠨ ᠡᠭᠡᠴᠢ ᠳᠡᠭᠦᠦ ᠪᠢᠳᠡ ᠶᠠᠭᠤ ᠪᠠᠢᠬᠤ ᠪᠣᠢ᠃
ᠪᠠᠷᠠᠭᠤᠨ ᠬᠣᠢᠲᠤ ᠲᠢᠪ ᠢ᠋ ᠡᠵᠡᠯᠡᠭᠴᠢ
ᠨᠠᠷᠠᠨ ᠬᠠᠭᠠᠨ ᠤ᠋ ᠥᠬᠢᠨ ᠭᠡᠳᠡᠭ ᠪᠣᠯ
ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠᠨ ᠮᠡᠲᠦ ᠭᠡᠷᠡᠯ ᠲᠡᠢ
ᠤᠷᠭᠤᠮᠠᠯ ᠴᠡᠴᠡᠭ ᠰᠢᠭ ᠰᠠᠢᠬᠠᠨ
ᠤᠳᠠ ᠶ᠋ᠢᠨ ᠨᠠᠪᠴᠢ ᠰᠢᠭ᠋ ᠬᠥᠮᠥᠰᠬᠡ ᠲᠡᠢ
ᠤᠷᠠᠨ ᠭᠤᠸᠠ ᠪᠡᠶᠡ ᠲᠡᠢ
ᠨᠠᠮᠤᠷ ᠤ᠋ᠨ ᠲᠩᠷᠢ ᠰᠢᠭ ᠲᠤᠩᠭᠠᠯᠠᠭ
ᠨᠠᠢᠭᠤᠭᠠ ᠽᠠᠨᠳᠠᠨ ᠰᠢᠭ᠋ ᠪᠠᠢᠳᠠᠯ ᠲᠠᠢ
ᠨᠠᠷᠢᠬᠠᠨ ᠤᠷᠠᠨ ᠪᠡᠶᠡ ᠲᠡᠢ
ᠨᠠᠭᠤᠷ ᠤ᠋ᠨ ᠤᠰᠤ ᠰᠢᠭ᠋ ᠨᠢᠳᠦ ᠲᠡᠢ
ᠰᠠᠷᠠᠨ ᠤ᠋ ᠭᠡᠷᠡᠯ ᠰᠢᠭ ᠭᠡᠭᠡᠬᠡᠨ
ᠽᠠᠮᠪᠤᠲᠢᠪ ᠲᠤ᠌ ᠴᠥᠭᠡᠬᠡᠨ
ᠰᠠᠭᠰᠠᠭᠠᠷ ᠰᠠᠮᠪᠠᠢ ᠦᠰᠦ ᠲᠡᠢ
ᠰᠠᠢᠨ ᠰᠠᠢᠬᠠᠨ ᠪᠦᠷᠢᠳᠬᠡᠯ ᠲᠡᠢ
ᠴᠡᠴᠡᠭ ᠮᠡᠲᠦ ᠦᠨᠦᠷ ᠲᠡᠢ
ᠴᠡᠪᠡᠷᠬᠡᠨ ᠤᠯᠠᠭᠠᠨ ᠬᠠᠴᠠᠷ ᠲᠠᠢ
ᠴᠢᠩᠭᠢᠯᠵᠠᠭᠤᠷ ᠤ᠋ᠨ ᠳᠠᠭᠤ ᠲᠠᠢ
ᠴᠡᠭᠡᠵᠢ ᠳᠦᠭᠦᠷᠡᠩ ᠤᠳᠬᠠ ᠲᠠᠢ
ᠲᠤᠭᠤᠷᠭᠠ ᠨᠡᠪᠲᠡ ᠲᠤᠶᠠᠭᠠ ᠲᠠᠢ
ᠲᠤᠨᠤᠮᠠᠯ ᠤᠯᠠᠭᠠᠨ ᠤᠷᠤᠭᠤᠯ ᠲᠠᠢ
ᠲᠣᠭᠣᠰᠣ ᠶ᠋ᠢ ᠳᠠᠷᠤᠬᠤ ᠢᠨᠢᠶᠡᠳᠦ ᠲᠡᠢ
ᠲᠣᠭᠣᠷᠤᠤ ᠶ᠋ᠢ ᠲᠤᠩᠭᠠᠬᠤ ᠬᠠᠷᠠᠴᠠ ᠲᠠᠢ
ᠤᠯᠠᠢᠵᠤ ᠪᠠᠷᠤᠢᠭᠰᠠᠨ ᠴᠢᠷᠠᠢ ᠨᠢ ᠪᠣᠯᠪᠠᠴᠤ
ᠤᠯᠢᠶᠠᠷᠠᠭ ᠨᠠᠢᠷ ᠲᠠᠢ ᠤᠯᠠᠪᠠᠯᠵᠠᠳᠠᠭ᠂
ᠠᠭᠤᠷᠯᠠᠨ ᠬᠠᠷᠠᠬᠤ ᠨᠢᠳᠦᠨ ᠳ᠋ᠦ᠍ᠨᠢ ᠪᠣᠯᠪᠠᠴᠤ
ᠠᠭᠤᠤᠴᠢᠯᠠᠨ ᠬᠠᠢᠷᠠᠯᠠᠬᠤ ᠭᠡᠷᠡᠯ ᠲᠡᠢ ᠭᠡᠨᠡ᠃
ᠮᠠᠯ ᠤ᠋ᠨ ᠦᠰᠦ ᠶ᠋ᠢ ᠪᠣᠯᠪᠠᠴᠤ ᠬᠠᠷᠠᠨ ᠲᠣᠭᠠᠯᠠᠳᠠᠭ
ᠮᠠᠯᠠᠭᠠᠢ ᠶ᠋ᠢᠨ ᠦᠰᠦ ᠶ᠋ᠢ ᠪᠣᠯᠪᠠᠴᠤ ᠪᠠᠷᠢᠨ ᠲᠣᠭᠠᠯᠠᠳᠠᠭ
ᠲᠦᠩ ᠰᠢᠷᠣᠢ ᠶ᠋ᠢ ᠪᠣᠯᠪᠠᠴᠤ ᠦᠵᠡᠨ ᠲᠣᠭᠠᠯᠠᠳᠠᠭ
ᠲᠡᠮᠡᠭᠡ ᠶ᠋ᠢᠨ ᠨᠣᠣᠰᠣ ᠶ᠋ᠢ ᠪᠣᠯᠪᠠᠴᠤ ᠳᠠᠭᠠᠷᠢᠨ ᠲᠣᠭᠠᠯᠠᠳᠠᠭ
ᠡᠢᠮᠦ ᠰᠡᠴᠡᠨ ᠰᠠᠢᠬᠠᠨ ᠥᠬᠢᠨ ᠲᠡᠢ ᠦᠯᠢᠭᠡᠷᠯᠡᠪᠡᠯ
ᠡᠭᠡᠴᠢ ᠳᠡᠭᠦᠦ ᠪᠢᠳᠡ ᠭᠤᠷᠪᠠᠭᠤᠯᠠ ᠶᠠᠭᠤ ᠪᠠᠢᠨᠠ ᠳᠠ!》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ
ᠬᠢᠵᠠᠭᠠᠷᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠵᠤ᠄
《ᠨᠠᠷᠠᠨ ᠬᠠᠭᠠᠨ ᠤ᠋ ᠣᠷᠳᠣᠨ
ᠣᠳᠣ ᠬᠡᠳᠦᠢ ᠭᠠᠵᠠᠷ ᠪᠠᠢᠨᠠ?》 ᠭᠡᠬᠦ ᠳ᠋ᠦ᠍
ᠭᠣᠶᠣ ᠰᠠᠢᠬᠠᠨ ᠥᠬᠢᠳ᠄
《ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠪᠠᠢᠨᠠ》 ᠭᠡᠪᠡ᠃
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠯᠵᠢᠨ ᠮᠣᠷᠳᠠᠵᠤ ᠶᠠᠪᠤᠭᠰᠠᠭᠠᠷ
ᠪᠠᠰᠠ ᠨᠢᠭᠡᠨ ᠠᠢᠯ ᠳ᠋ᠤ᠌ ᠢᠷᠡᠵᠦ
ᠪᠠᠭᠤᠳᠠᠯᠯᠠᠨ ᠦᠳᠡᠯᠡᠵᠦ ᠭᠠᠷᠤᠶᠠ ᠭᠡᠰᠡᠨ ᠳ᠋ᠦ᠍
ᠪᠠᠷᠠᠭᠠᠨ ᠥᠩᠭᠡ ᠲᠡᠢ ᠭᠡᠷ ᠲᠤᠨᠢ
ᠪᠠᠭᠠ ᠰᠢᠭ᠋ ᠬᠠᠷᠠ ᠬᠦᠦ ᠪᠠᠢᠨᠠ ᠭᠡᠨᠡ᠃
ᠬᠠᠭᠠᠨ ᠬᠦᠦ ᠲᠡᠷᠡ ᠲᠡᠢ
ᠬᠠᠷᠢᠯᠴᠠᠨ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠵᠦ᠄
《ᠨᠠᠷᠠᠨ ᠬᠠᠭᠠᠨ ᠤ᠋ ᠣᠷᠳᠣᠨ
ᠨᠠ ᠦᠭᠡᠢ ᠬᠣᠯᠠ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍
ᠪᠠᠭᠠ ᠰᠢᠭ᠋ ᠬᠠᠷᠠ ᠬᠦᠦ ᠶ᠋ᠢᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠪᠠᠷᠠᠭᠤᠨ ᠳᠣᠣᠷᠠ ᠪᠠᠢᠨᠠ᠃
ᠮᠠᠯ ᠤ᠋ᠨ ᠪᠠᠭᠠᠰᠤ ᠶ᠋ᠢ ᠨᠢ ᠪᠢ ᠳᠡᠯᠭᠡᠳᠡᠭ
ᠮᠥᠨᠥᠬᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠪᠢ
ᠡᠷᠲᠡ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠶᠠ ᠭᠡᠬᠦ ᠳ᠋ᠦ᠍
ᠡᠷᠭᠢᠨ ᠲᠠ ᠮᠣᠷᠢᠯᠠᠵᠤ ᠢᠷᠡᠪᠡ》 ᠭᠡᠰᠡᠨ ᠳ᠋ᠦ᠍
ᠪᠠᠭᠠ ᠬᠠᠷᠠ ᠬᠦᠦ ᠡᠴᠡ ᠰᠠᠯᠵᠤ
ᠪᠠᠷᠠᠭᠤᠨ ᠳᠠᠪᠠᠭᠠ ᠤᠷᠤᠭᠤ ᠨᠢ ᠪᠠᠭᠤᠬᠤ ᠳ᠋ᠠᠭᠠᠨ
ᠶᠡᠷᠦ ᠬᠤᠯᠤ ᠶ᠋ᠢᠨ ᠪᠠᠢᠳᠠᠯ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠪᠠᠨ
ᠬᠣᠪᠢᠯ ᠭᠡᠵᠦ ᠬᠤᠪᠢᠯᠭᠠᠭᠠᠳ
ᠬᠠᠮᠠᠭᠤ ᠲᠠᠢ ᠪᠣᠷᠣ ᠳᠠᠭᠠ ᠪᠣᠯᠭᠠᠵᠤ
ᠱᠠᠭᠠᠨᠲᠤ ᠪᠠᠷ ᠨᠢ ᠰᠢᠷᠠ ᠨᠢᠭᠢᠰᠦ ᠴᠤᠪᠤᠭᠤᠯᠵᠤ
ᠪᠣᠭᠲᠣᠰ ᠢ᠋ᠶ᠋ᠠᠷ ᠨᠢ ᠪᠣᠷᠣ ᠨᠢᠭᠢᠰᠦ ᠴᠤᠪᠤᠭᠤᠯᠵᠤ
ᠮᠠᠢᠭᠠᠨ ᠲᠠᠢᠭᠠᠨ ᠶᠠᠪᠤᠭᠤᠯᠵᠤ
ᠮᠠᠯᠲᠠᠨ ᠲᠡᠭᠡᠵᠦ ᠠᠯᠬᠤᠭᠤᠯᠤᠨ
ᠨᠠᠷᠠᠨ ᠬᠠᠭᠠᠨ ᠤ᠋ ᠡᠭᠦᠳᠡ ᠪᠡᠷ ᠨᠢ
ᠨᠠᠭᠠᠯᠳᠤᠭᠤᠯᠤᠨ ᠭᠠᠷᠬᠤ ᠮᠥᠷ ᠲᠡᠭᠡᠨ
ᠪᠣᠷᠣ ᠳᠠᠭᠠ ᠨᠢ ᠪᠦᠳᠦᠷᠢᠭᠡᠳ
ᠪᠤᠷᠤᠭᠤᠲᠠᠢ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠵᠠᠢ᠃
ᠳᠣᠭᠣᠯᠳᠠᠭᠤᠯᠤᠨ ᠲᠡᠭᠡᠵᠦ ᠣᠴᠢᠭᠠᠳ
ᠮᠣᠷᠢ ᠤᠶᠠᠳᠠᠭ ᠦᠭᠡᠢ ᠤᠶᠠᠭᠠ ᠳ᠋ᠤᠨᠢ
ᠮᠣᠷᠢ ᠪᠠᠨ ᠤᠶᠠᠭᠠᠳ
ᠬᠥᠮᠦᠨ ᠣᠷᠣᠳᠠᠭ ᠦᠭᠡᠢ ᠣᠷᠳᠣᠨ ᠳ᠋ᠤᠨᠢ
ᠰᠢᠭᠤᠳ ᠠᠯᠬᠤᠯᠠᠨ ᠣᠷᠣᠵᠤ
ᠰᠠᠭᠤᠳᠠᠭ ᠦᠭᠡᠢ ᠣᠯᠪᠣᠭ ᠲᠤᠨᠢ
ᠰᠠᠨᠳᠠᠢᠯᠠᠵᠤ ᠳᠡᠭᠡᠷᠡ ᠨᠢ ᠰᠠᠭᠤᠵᠤ
ᠤᠤᠭᠤᠳᠠᠭ ᠦᠭᠡᠢ ᠤᠯᠠᠭᠠᠨ ᠴᠠᠢ ᠶ᠋ᠢ ᠨᠢ
ᠣᠳᠬᠣᠨ ᠠᠪᠴᠤ ᠤᠤᠭᠤᠵᠤ ᠪᠠᠢᠲᠠᠯᠠ
ᠨᠠᠷᠠᠨ ᠬᠠᠭᠠᠨ ᠤ᠋ ᠳᠣᠣᠷᠠᠬᠢ
ᠨᠢᠭᠡᠨ ᠲᠦᠰᠢᠮᠡᠯ ᠢᠷᠡᠵᠦ
ᠶᠡᠬᠡᠮᠰᠦᠭ ᠵᠠᠩ ᠭᠠᠷᠭᠠᠵᠤ
ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠵᠠᠩᠨᠠᠵᠤ
《ᠶᠠᠮᠠᠷ ᠰᠠᠮᠠᠭᠤᠷᠠᠭᠰᠠᠨ ᠬᠥᠮᠦᠨ ᠪᠣᠢ?
ᠶᠠᠭᠤᠨ ᠳ᠋ᠤ᠌ ᠳᠤᠷᠠ ᠪᠠᠷ ᠵᠣᠷᠢᠭᠯᠠᠵᠤ
ᠮᠣᠷᠢ ᠤᠶᠠᠳᠠᠭ ᠦᠭᠡᠢ ᠤᠶᠠᠭᠠ ᠠ᠋ᠴᠠ
ᠮᠣᠷᠢ ᠪᠠᠨ ᠤᠶᠠᠪᠠ ᠴᠢ?
ᠬᠥᠮᠦᠨ ᠣᠷᠣᠳᠠᠭ ᠦᠭᠡᠢ ᠣᠷᠳᠣᠨ ᠳ᠋ᠤ᠌
ᠣᠷᠣᠵᠤ ᠢᠷᠡᠪᠡ ᠴᠢ?
ᠰᠠᠭᠤᠳᠠᠭ ᠦᠭᠡᠢ ᠣᠯᠪᠣᠭ ᠤ᠋ᠨ ᠳᠡᠭᠡᠷᠡ
ᠰᠠᠭᠤᠭᠰᠠᠨ ᠴᠢᠨᠢ ᠶᠠᠭᠤ ᠪᠣᠢ?
ᠤᠤᠭᠤᠳᠠᠭ ᠦᠭᠡᠢ ᠤᠯᠠᠭᠠᠨ ᠴᠠᠢ ᠶ᠋ᠢ
ᠤᠤᠭᠤᠭᠰᠠᠨ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠮᠣᠷᠢ ᠤᠶᠠᠳᠠᠭ ᠦᠭᠡᠢ ᠶᠤᠮ ᠪᠣᠯ
ᠤᠶᠠᠭᠠ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠪᠤᠯᠠᠪᠠ?
ᠪᠤᠯᠠᠭᠤᠯᠵᠤ ᠬᠠᠶᠠ!
ᠬᠥᠮᠦᠨ ᠣᠷᠣᠳᠠᠭ ᠦᠭᠡᠢ ᠶᠤᠮ ᠪᠣᠯ
ᠣᠷᠳᠣᠨ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠪᠠᠷᠢᠪᠠ?
ᠪᠠᠭᠤᠯᠭᠠᠵᠤ ᠬᠠᠶᠠ!
ᠰᠠᠭᠤᠳᠠᠭ ᠦᠭᠡᠢ ᠶᠤᠮ ᠪᠣᠯ
ᠣᠯᠪᠣᠭ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠳᠡᠪᠢᠰᠦᠭᠰᠡᠨ ᠪᠣᠢ?
ᠭᠠᠳᠠᠨᠠ ᠠᠪᠠᠴᠢᠵᠤ ᠴᠢᠯᠠᠭᠤᠳᠠ!
ᠤᠤᠭᠤᠳᠠᠭ ᠦᠭᠡᠢ ᠶᠤᠮ ᠪᠣᠯ
ᠴᠠᠢ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠴᠢᠨᠠᠭᠰᠠᠨ ᠪᠣᠢ?
ᠠᠪᠤᠭᠠᠳ ᠠᠰᠬᠠ!》 ᠭᠡᠰᠡᠨ ᠳ᠋ᠦ᠍
ᠬᠠᠲᠠᠭᠤ ᠵᠠᠩ ᠲᠠᠢ ᠲᠦᠰᠢᠮᠡᠯ ᠨᠢ
ᠬᠠᠷᠢᠭᠤᠯᠬᠤ ᠦᠭᠡ ᠣᠯᠳᠠᠭᠰᠠᠨ ᠦᠭᠡᠢ
ᠬᠣᠢᠰᠢ ᠤᠬᠤᠷᠢᠨ ᠭᠠᠷᠴᠤ
ᠬᠠᠭᠠᠨ ᠳ᠋ᠠᠭᠠᠨ ᠢᠷᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍᠂
ᠬᠠᠭᠠᠨ ᠨᠢ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ
ᠬᠠᠮᠤᠭ ᠮᠡᠷᠭᠡᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠢᠯᠡᠭᠡᠵᠦ
ᠬᠠᠪᠤᠲᠠᠢ ᠰᠠᠢᠬᠠᠨ ᠠᠰᠠᠭᠤᠯᠭᠠᠭᠰᠠᠨ ᠨᠢ᠄
《ᠠᠪᠤᠭᠠᠢ ᠲᠠ ᠠᠯᠢ ᠨᠤᠲᠤᠭ ᠤ᠋ᠨ ᠪᠣᠢ?
ᠠᠯᠤᠰ ᠤ᠋ᠨ ᠵᠣᠷᠢᠯᠭᠠ ᠬᠠᠮᠢᠭᠠ ᠪᠣᠢ?
ᠡᠷᠭᠢᠨ ᠲᠠ ᠠᠯᠢ ᠣᠷᠣᠨ ᠤ᠋ ᠪᠣᠢ?
ᠡᠷᠢᠯ ᠦ᠋ᠨ ᠮᠥᠰᠬᠢᠯ ᠶᠠᠭᠤᠨ ᠳ᠋ᠤ᠌ ᠪᠣᠢ?》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠬᠠᠵᠠᠭᠤ ᠳ᠋ᠤᠨᠢ ᠬᠠᠨᠠ ᠪᠠᠷᠢᠭᠠ ᠡᠳᠦᠢ
ᠬᠠᠮᠠᠷ ᠲᠤᠨᠢ ᠪᠤᠢᠯᠠ ᠬᠢᠭᠡ ᠡᠳᠦᠢ
ᠰᠢᠷᠡᠭᠡ ᠪᠦᠬᠦ ᠨᠢ ᠰᠢᠯᠵᠢᠭᠡ ᠡᠳᠦᠢ
ᠰᠢᠷᠢᠨ ᠲᠠᠪᠠᠭ ᠨᠢ ᠴᠣᠭᠣᠷᠣᠭᠠ ᠡᠳᠦᠢ
ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠵᠢᠨ ᠲᠡᠮᠡᠭᠡ ᠨᠢᠭᠡ᠂
ᠬᠠᠵᠠᠳᠠᠭ ᠬᠠᠷᠠ ᠪᠤᠤᠷᠠ ᠨᠢᠭᠡ
ᠬᠠᠰᠢᠳᠠᠭ ᠬᠠᠷᠠᠭᠴᠢ ᠢᠩᠭᠡ ᠨᠢᠭᠡ
ᠳ᠋ᠦᠩ ᠲᠣᠭᠠ ᠨᠢ ᠠᠷᠪᠠᠨ ᠭᠤᠷᠪᠠ
ᠠᠯᠳᠠᠵᠤ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠪᠣᠯᠪᠠ᠃
ᠲᠡᠮᠡᠭᠡ ᠶ᠋ᠢᠨ ᠡᠷᠢᠯᠴᠢ ᠪᠠᠢᠨᠠ ᠪᠢ》 ᠭᠡᠰᠡᠨ ᠳ᠋ᠦ᠍
ᠮᠡᠷᠭᠡᠨ ᠲᠦᠰᠢᠮᠡᠯ ᠨᠢ ᠰᠣᠨᠣᠰᠴᠤ
ᠮᠡᠳᠡᠭᠰᠡᠨ ᠤᠴᠢᠷ ᠠᠯᠠᠭᠠ ᠲᠤᠯᠠ
ᠨᠠᠷᠠᠨ ᠬᠠᠭᠠᠨ ᠳ᠋ᠠᠭᠠᠨ ᠢᠷᠡᠵᠦ
ᠨᠠᠷᠢᠪᠴᠢᠯᠠᠨ ᠬᠡᠯᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍
ᠬᠠᠭᠠᠨ ᠨᠢ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ᠄
《ᠬᠠᠷᠢᠨ ᠵᠦᠭᠡᠷ ᠦᠭᠡ ᠪᠢᠰᠢ
ᠬᠠᠪᠤᠲᠠᠢ ᠵᠦᠢᠲᠡᠢ ᠦᠭᠡ ᠪᠠᠢᠨᠠ》 ᠭᠡᠵᠦ
ᠰᠠᠳᠤᠨ ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠤᠭᠯᠠᠵᠤ
ᠰᠥᠨᠢ ᠰᠢᠪᠬᠠᠷᠠᠲᠠᠯᠠ ᠬᠡᠯᠡᠯᠴᠡᠵᠦ
ᠰᠣᠶᠣᠭᠠᠷᠠᠨ ᠮᠡᠳᠡᠭᠰᠡᠨ ᠦᠭᠡᠢ
ᠰᠣᠨᠢᠨ ᠢ᠋ ᠲᠠᠢᠯᠤᠭᠰᠠᠨ ᠦᠭᠡᠢ ᠳ᠋ᠦ᠍
ᠮᠣᠷᠢ ᠬᠠᠯᠠᠭᠤᠯᠤᠨ ᠭᠦᠶᠦᠯᠭᠡᠵᠦ
ᠮᠣᠵᠢ ᠶ᠋ᠢᠨ ᠲᠦᠰᠢᠮᠡᠯ ᠢ᠋ ᠵᠠᠷᠯᠠᠵᠤ
ᠬᠥᠮᠦᠨ ᠬᠠᠯᠠᠭᠤᠯᠤᠨ ᠳᠠᠪᠬᠢᠭᠤᠯᠵᠤ
ᠬᠦᠢ ᠪᠦᠬᠦᠨ ᠢ᠋ ᠴᠤᠭᠯᠠᠭᠤᠯᠵᠤ᠂
ᠤᠯᠤᠰ ᠳᠠᠶᠠᠭᠠᠷ ᠬᠤᠷᠠᠯᠳᠤᠵᠤ᠂
ᠣᠭᠲᠣ ᠢᠯᠭᠠᠭᠠᠷᠠᠢ ᠭᠠᠷᠤᠭᠰᠠᠨ ᠦᠭᠡᠢ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠠᠭᠤᠭᠰᠠᠨ ᠪᠠᠢᠰᠢᠩ ᠭᠡᠷ ᠦ᠋ᠨ ᠢ᠋ᠶ᠋ᠡᠨ
ᠰᠢᠯ ᠴᠣᠩᠬᠣ ᠪᠠᠷ ᠬᠠᠷᠠᠭᠰᠠᠨ ᠳ᠋ᠤ᠌
ᠪᠠᠭᠠᠰᠤᠨ ᠠᠵᠢᠯ ᠳ᠋ᠤ᠌ ᠶᠠᠪᠤᠬᠤ
ᠪᠠᠭᠠ ᠰᠢᠭ᠋ ᠬᠠᠷᠠ ᠬᠦᠦ ᠶ᠋ᠢ ᠦᠵᠡᠵᠦ᠄
《ᠲᠠᠨ ᠤ᠋ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ
ᠲᠠᠢᠯᠵᠤ ᠢᠯᠭᠠᠨ ᠮᠡᠳᠡᠭᠰᠡᠨ ᠤᠤ?》 ᠭᠡᠰᠡᠨ ᠳ᠋ᠦ᠍
《ᠪᠠᠭᠠᠰᠤ ᠰᠢᠭᠡᠰᠦᠨ ᠦ᠌ ᠠᠵᠢᠯ ᠠ᠋ᠴᠠ ᠭᠠᠷᠭᠠᠵᠤ
ᠪᠠᠭᠠᠬᠠᠨ ᠴᠢᠯᠥᠭᠡ ᠥᠭᠪᠡᠯ᠂
ᠪᠢᠲᠡᠭᠦᠦ ᠦᠭᠡ ᠶ᠋ᠢ ᠴᠢᠨᠢ
ᠪᠢ ᠲᠠᠢᠯᠵᠤ ᠴᠢᠳᠠᠨᠠ》 ᠭᠡᠰᠡᠨ ᠳ᠋ᠦ᠍᠂
ᠬᠠᠭᠠᠨ ᠬᠦᠦ ᠰᠣᠨᠣᠰᠤᠭᠠᠳ᠄
《ᠬᠠᠷᠢᠨ ᠡᠵᠡᠨ ᠴᠢᠨᠢ ᠪᠤᠷᠤᠭᠤᠳᠠᠪᠠ᠃
ᠠᠵᠢᠯ ᠤ᠋ᠨ ᠠᠷᠠᠳ ᠠ᠋ᠴᠠ ᠪᠠᠨ ᠠᠰᠠᠭᠤᠬᠤ ᠦᠭᠡᠢ
ᠠᠯᠢ ᠬᠡᠷᠡᠭ ᠴᠢᠨᠢ ᠪᠦᠲᠦᠳᠡᠭ ᠪᠣᠢ?》 ᠭᠡᠵᠦ
ᠬᠠᠷᠠ ᠬᠦᠦ ᠶ᠋ᠢ ᠵᠠᠷᠤᠭᠰᠠᠨ ᠳ᠋ᠤ᠌
ᠬᠠᠷᠠᠢᠯᠠᠭᠰᠠᠭᠠᠷ ᠶᠠᠪᠤᠪᠠ ᠭᠡᠨᠡ᠃
ᠡᠨᠡ ᠦᠶᠡᠰ ᠨᠠᠷᠠᠨ ᠬᠠᠭᠠᠨ
ᠡᠷᠳᠡᠮᠲᠡᠨ ᠲᠦᠰᠢᠮᠡᠳ ᠲᠡᠢ ᠪᠡᠨ ᠵᠥᠪᠳᠡᠵᠦ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠦᠭᠡ ᠶ᠋ᠢ
ᠰᠢᠭᠦᠵᠦ ᠣᠯᠤᠭᠰᠠᠨ ᠦᠭᠡᠢ ᠲᠤᠯᠠ
ᠰᠡᠳᠬᠢᠯ ᠪᠠᠬᠠᠨ ᠵᠣᠪᠠᠨᠢᠵᠤ
ᠰᠠᠨᠠᠭᠠ ᠪᠠᠬᠠᠨ ᠰᠠᠷᠨᠢᠵᠤ
ᠬᠠᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠴᠤ
ᠬᠠᠷᠰᠢ ᠤᠷᠲᠤ ᠪᠠᠨ ᠬᠡᠰᠦᠵᠦ
ᠬᠠᠭᠠᠯᠭᠠ ᠡᠭᠦᠳᠡ ᠪᠡᠨ ᠨᠡᠪᠲᠡᠯᠵᠦ
ᠬᠠᠯᠠᠰᠤᠨ ᠪᠣᠳᠣᠵᠤ ᠶᠠᠪᠤᠬᠤ ᠳ᠋ᠤ᠌᠂
ᠬᠠᠷᠠ ᠬᠦᠦ ᠶ᠋ᠢᠨ ᠭᠦᠶᠦᠨ ᠢᠷᠡᠬᠦ ᠲᠡᠢ ᠤᠴᠠᠷᠠᠵᠤ
ᠡᠩᠭᠡᠷ ᠲᠤᠯᠤᠮᠠ ᠮᠥᠷᠭᠥᠯᠳᠦᠵᠦ
ᠡᠪᠴᠢᠭᠦᠦ ᠲᠤᠯᠤᠮᠠ ᠳᠠᠭᠠᠷᠢᠯᠳᠤᠭᠠᠳ
ᠬᠠᠭᠠᠨ ᠬᠠᠷᠠ ᠬᠦᠦ ᠬᠣᠶᠠᠭᠤᠯᠠ
ᠬᠠᠮᠲᠤ ᠪᠠᠷ ᠭᠡᠳᠡᠷᠭᠦ ᠪᠡᠨ ᠤᠨᠠᠵᠤ
ᠫᠠᠯᠠᠩ ᠬᠥᠰᠡᠷ ᠦ᠋ᠨ ᠳᠡᠭᠡᠷᠡ
ᠫᠠᠯᠲᠠᠭ ᠬᠣᠶᠠᠭᠤᠯᠠ ᠰᠠᠭᠤᠭᠠᠳ
ᠬᠠᠭᠠᠨ ᠨᠢ ᠶᠡᠬᠡ ᠠᠭᠤᠷᠯᠠᠵᠤ
ᠬᠠᠷᠠ ᠬᠦᠦ ᠪᠡᠨ ᠶᠡᠬᠡ ᠵᠠᠩᠨᠠᠬᠤ ᠳ᠋ᠤ᠌᠄
《ᠬᠠᠭᠠᠨ ᠭᠤᠸᠠᠢ ᠮᠢᠨᠢ᠂ ᠬᠠᠭᠠᠨ ᠭᠤᠸᠠᠢ ᠮᠢᠨᠢ!
ᠭᠠᠳᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠵᠣᠴᠢᠨ ᠤ᠋
ᠭᠠᠷᠠᠬᠠᠲᠤ ᠦᠭᠡ ᠶ᠋ᠢ ᠳᠡᠢᠯᠪᠡᠦ?》 ᠭᠡᠰᠡᠨ ᠳ᠋ᠦ᠍᠄
《ᠦᠭᠡᠢ᠂ ᠬᠠᠷᠢᠨ ᠦᠭᠡᠢ!
ᠦᠨᠡᠬᠡᠷ ᠵᠣᠪᠠᠭᠤᠷᠢᠲᠠᠢ ᠬᠡᠷᠡᠭ ᠠ᠋》 ᠭᠡᠰᠡᠨ ᠳ᠋ᠦ᠍᠄
《ᠡᠵᠡᠨ ᠮᠢᠨᠢ ᠥᠷᠥᠰᠢᠶᠡᠵᠦ
ᠡᠷᠬᠢᠮ ᠴᠢᠯᠥᠭᠡ ᠬᠠᠢᠷᠠᠯᠠᠪᠠᠯ
ᠡᠭᠦᠨ ᠢ᠋ ᠪᠢ ᠪᠦᠷ ᠲᠠᠢᠯᠵᠤ
ᠡᠨᠳᠡᠭᠳᠡᠯ ᠶᠡᠷᠦ ᠭᠠᠷᠭᠠᠬᠤ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠨᠢ ᠮᠠᠰᠢ ᠪᠠᠶᠠᠷᠯᠠᠵᠤ
ᠬᠠᠷᠠ ᠬᠦᠦ ᠶ᠋ᠢ ᠬᠥᠲᠥᠯᠦᠨ ᠶᠠᠪᠤᠵᠤ
ᠬᠠᠷᠰᠢ ᠣᠷᠳᠣᠨ ᠳ᠋ᠠᠭᠠᠨ ᠣᠷᠣᠵᠤ
《ᠬᠠᠮᠤᠭ ᠲᠦᠰᠢᠮᠡᠯ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠨᠢ᠄
《ᠡᠨᠳᠡᠭᠦᠦ ᠪᠤᠷᠤᠭᠤ ᠪᠣᠯᠵᠠᠢ᠃ ᠪᠢᠳᠡ
ᠠᠵᠢᠯ ᠤ᠋ᠨ ᠬᠦᠦ ᠪᠡᠨ ᠡᠷᠢᠵᠦ
ᠠᠰᠠᠭᠤᠬᠤ ᠪᠠᠨ ᠮᠠᠷᠲᠠᠪᠠ》 ᠭᠡᠳ
ᠠᠯᠭᠤᠷ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠨᠢ᠄
《ᠬᠡᠷᠪᠡ ᠴᠢ ᠲᠠᠢᠯᠤᠨ ᠴᠢᠳᠠᠪᠠᠯ
ᠬᠡᠷᠡᠭ ᠶᠠᠪᠤᠳᠠᠯ ᠳ᠋ᠤ᠌ ᠮᠢᠨᠢ ᠣᠷᠣᠯᠴᠠᠵᠤ
ᠬᠢᠭᠢᠷᠢ ᠶ᠋ᠢᠨ ᠳᠠᠷᠤᠭᠠ ᠮᠢᠨᠢ ᠪᠣᠯᠵᠤ
ᠬᠢᠵᠠᠭᠠᠯᠠᠰᠢ ᠦᠭᠡᠢ ᠵᠢᠳᠬᠦᠭᠡᠷᠡᠢ!》 ᠭᠡᠵᠦ
ᠪᠠᠢᠭᠰᠠᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠵᠤ
ᠪᠠᠷᠠᠭᠤᠨ ᠵᠡᠭᠦᠨ ᠢ᠋ᠶ᠋ᠡᠷ ᠵᠢᠭᠰᠠᠭᠠᠵᠤ
ᠪᠠᠭᠠ ᠬᠠᠷᠠ ᠬᠦᠦ ᠪᠡᠷ
ᠪᠠᠷᠠᠲᠠᠯᠠ ᠲᠠᠢᠯᠤᠭᠤᠯᠤᠭᠰᠠᠨ ᠨᠢ᠄
《ᠬᠠᠵᠠᠭᠤ ᠳ᠋ᠤᠨᠢ ᠬᠠᠨᠠ ᠪᠠᠷᠢᠭᠠ ᠡᠳᠦᠢ
ᠬᠠᠮᠠᠷ ᠲᠤᠨᠢ ᠪᠤᠢᠯᠠ ᠬᠢᠭᠡ ᠡᠳᠦᠢ
ᠰᠢᠷᠡᠭᠡ ᠪᠦᠬᠦ ᠨᠢ ᠰᠢᠯᠵᠢᠭᠡ ᠦᠭᠡᠢ
ᠭᠤᠷᠪᠠᠨ ᠨᠠᠰᠤᠨ ᠤ᠋ ᠭᠤᠨᠵᠢᠨ ᠲᠡᠮᠡᠭᠡ ᠨᠢᠭᠡ ᠭᠡᠭᠴᠢ
ᠬᠠᠭᠠᠨ ᠭᠤᠸᠠᠢ ᠶ᠋ᠢᠨ ᠥᠬᠢᠨ
ᠭᠢᠯᠠᠭᠤ ᠮᠡᠷᠭᠡᠨ ᠭᠦᠩᠵᠦ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠃
ᠬᠠᠵᠠᠳᠠᠭ ᠬᠠᠷᠠ ᠪᠤᠤᠷᠠ ᠨᠢᠭᠡ ᠭᠡᠭᠴᠢ
ᠬᠠᠭᠠᠨ ᠭᠤᠸᠠᠢ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠃
ᠬᠠᠰᠢᠳᠠᠭ ᠬᠠᠷᠠᠭᠴᠢ ᠢᠩᠭᠡ ᠨᠢᠭᠡ ᠭᠡᠭᠴᠢ
ᠬᠠᠲᠤᠨ ᠭᠤᠸᠠᠢ ᠶ᠋ᠢ ᠬᠡᠯᠡᠭᠰᠡᠨ ᠶᠤᠮ ᠠ᠋᠃
ᠳ᠋ᠦᠩ ᠲᠣᠭᠠ ᠨᠢ ᠠᠷᠪᠠᠨ ᠭᠤᠷᠪᠠ ᠭᠡᠭᠴᠢ
ᠬᠠᠭᠠᠨ ᠤ᠋ ᠰᠠᠳᠤᠨ ᠲᠥᠷᠥᠯ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃
ᠠᠯᠳᠠᠵᠤ ᠠᠷᠪᠠᠨ ᠬᠣᠶᠠᠷ ᠰᠠᠷᠠ ᠪᠣᠯᠵᠠᠢ ᠭᠡᠭᠴᠢ
ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠠᠯᠤᠰ ᠠ᠋ᠴᠠ ᠢᠷᠡᠪᠡ ᠭᠡᠰᠡᠨ ᠦᠭᠡ᠃
ᠲᠡᠮᠡᠭᠡ ᠶ᠋ᠢᠨ ᠡᠷᠢᠯᠴᠢ ᠪᠠᠢᠨᠠ ᠭᠡᠭᠴᠢ
ᠲᠡᠦᠬᠡ ᠨᠠᠮᠲᠠᠷ ᠢ᠋ ᠤᠷᠪᠠᠭᠤᠯᠵᠤ
ᠥᠨᠳᠡᠭᠡᠨ ᠰᠦᠢ ᠪᠡᠨ ᠨᠡᠬᠡᠵᠦ
ᠥᠭᠡᠳᠡᠯᠡᠵᠦ ᠢᠷᠡᠭᠰᠡᠨ ᠬᠥᠮᠦᠨ ᠮᠥᠨ》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠨᠢ ᠳᠠᠷᠤᠢ ᠬᠢᠭᠢᠷᠢ ᠪᠡᠨ ᠲᠤᠰᠢᠶᠠᠵᠤ
ᠬᠠᠷᠠ ᠬᠦᠦ ᠳ᠋ᠡᠭᠡᠨ ᠲᠦᠰᠢᠮᠡᠯ ᠵᠡᠷᠭᠡ ᠥᠭᠴᠦ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠢ᠋ ᠳᠠᠭᠤᠳᠠᠵᠤ
ᠰᠢᠷᠡᠭᠡ ᠵᠢᠭᠠᠨ ᠰᠠᠭᠤᠯᠭᠠᠭᠠᠳ
ᠥᠨᠳᠡᠭᠡᠨ ᠰᠦᠢ ᠪᠡᠨ ᠨᠡᠬᠡᠵᠦ
ᠥᠭᠡᠳᠡᠯᠡᠨ ᠢᠷᠡᠭᠰᠡᠨ ᠲᠤᠯᠠ ᠲᠠ
ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠮᠥᠷᠥᠢ ᠪᠡᠷ
ᠡᠩᠬᠦᠷᠡᠢ ᠥᠬᠢᠨ ᠢ᠋ᠶ᠋ᠡᠨ ᠲᠤᠰᠢᠶᠠᠨᠠ᠃
ᠬᠡᠷᠪᠡ ᠲᠠᠢᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ
ᠬᠡᠵᠢᠶᠡᠳᠡ ᠪᠠᠷᠠᠭᠤᠨ ᠬᠣᠢᠰᠢ ᠪᠤᠤ ᠬᠠᠨᠳᠤ!
ᠭᠠᠨᠵᠤᠭᠠ ᠴᠢᠨᠢ ᠬᠡᠢᠰᠴᠦ
ᠭᠠᠷ ᠴᠢᠨᠢ ᠬᠣᠭᠣᠰᠣᠷᠠᠵᠤ
ᠠᠴᠢᠶᠠ ᠴᠢᠨᠢ ᠠᠯᠠᠭᠠ
ᠠᠮᠠ ᠴᠢᠨᠢ ᠬᠠᠭᠤᠷᠠᠢ
ᠠᠮᠢ ᠪᠠᠨ ᠮᠡᠨᠳᠦ ᠬᠠᠷᠢᠶᠠ ᠭᠡᠪᠡᠯ
ᠠᠯᠲᠠᠨ ᠬᠢᠯᠢ ᠶ᠋ᠢ ᠮᠢᠨᠢ ᠭᠠᠷᠲᠠᠯᠠ
ᠠᠪᠴᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠯᠬᠤᠯᠠᠵᠤ
ᠠᠷᠢᠭᠤᠨ ᠣᠷᠣᠨ ᠠ᠋ᠴᠠ ᠮᠢᠨᠢ ᠭᠠᠷ! ᠭᠡᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠷᠡᠭᠡᠨ ᠡᠴᠡ ᠪᠡᠨ ᠪᠣᠰᠴᠤ ᠳᠠᠪᠰᠢᠨ᠄
《ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠮᠥᠷᠥᠢ ᠭᠡᠭᠴᠢ
ᠠᠯᠢ ᠭᠤᠷᠪᠠ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ ᠪᠣᠢ?︾ ᠭᠡᠰᠡᠨ ᠳ᠋ᠦ᠍
ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠮᠣᠷᠢ ᠣᠷᠣᠯᠳᠣᠭᠠᠳ᠂
ᠲᠡᠭᠦᠨ ᠦ᠌ ᠳᠠᠷᠠᠭᠠ ᠪᠠᠷ ᠨᠢ ᠰᠤᠮᠤ ᠬᠠᠷᠪᠤᠨᠠ᠃
ᠪᠦᠷ ᠰᠡᠭᠦᠯ ᠳ᠋ᠦ᠍ᠨᠢ ᠪᠥᠬᠡ ᠪᠠᠷᠢᠯᠳᠤᠨᠠ᠃︾ ᠭᠡᠵᠡᠢ᠃
ᠲᠡᠭᠡᠭᠡᠳ ᠬᠡᠳᠦᠨ ᠡᠳᠦᠷ ᠪᠣᠯᠤᠭᠰᠠᠨ ᠦᠭᠡᠢ
ᠲᠦᠷᠦᠭᠦᠨ ᠤᠷᠤᠯᠳᠤᠭᠠᠨ ᠪᠣᠯᠵᠤ
ᠨᠠᠷᠠᠨ ᠬᠠᠭᠠᠨ ᠤ᠋ ᠡᠲᠡᠭᠡᠳ ᠡᠴᠡ
ᠨᠡᠷᠡ ᠲᠡᠢ ᠮᠣᠷᠢ ᠭᠤᠷᠪᠠᠨ ᠮᠢᠩᠭᠠ
ᠬᠣᠲᠣᠭᠣᠷ ᠳᠦᠭᠦᠷᠲᠡᠯᠡ ᠴᠤᠭᠯᠠᠷᠠᠵᠤ
ᠬᠤᠷᠳᠤᠨ ᠮᠥᠷᠥᠢ ᠶ᠋ᠢ ᠬᠦᠯᠢᠶᠡᠭᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠨᠠᠷᠠᠨ ᠬᠠᠭᠠᠨ ᠠ᠋ᠴᠠ ᠠᠰᠠᠭᠤᠭᠰᠠᠨ ᠨᠢ᠄
《ᠬᠠᠭᠠᠨ ᠲᠠᠨ ᠤ᠋ ᠮᠣᠷᠢ ᠲᠠᠯᠪᠢᠬᠤ
ᠬᠠᠨᠳᠤᠯᠭᠠ ᠵᠢᠱ᠌ᠢᠶᠡ ᠬᠡᠳᠦᠢ ᠭᠠᠵᠠᠷ ᠪᠣᠢ?︾ ᠭᠡᠰᠡᠨ ᠳ᠋ᠦ᠍
ᠨᠠᠷᠠᠨ ᠬᠠᠭᠠᠨ ᠤ᠋ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠮᠣᠷᠢᠳ ᠪᠣᠯ
ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠵᠢᠱ᠌ᠢᠶᠡ ᠲᠠᠢ ᠭᠠᠵᠠᠷ ᠠ᠋ᠴᠠ
ᠭᠤᠶᠠᠳᠠᠵᠤ ᠳᠠᠪᠬᠢᠨ ᠢᠷᠡᠳᠡᠭ ᠶᠤᠮ︾ ᠭᠡᠰᠡᠨ ᠳ᠋ᠦ᠍
ᠬᠥᠪᠡᠭᠦᠳ ᠦ᠋ᠨ ᠰᠣᠷᠢᠯᠲᠠ ᠶ᠋ᠢᠨ ᠮᠣᠷᠢᠳ ᠢ᠋
ᠬᠦᠪᠭᠢᠭᠦᠯᠦᠨ ᠲᠠᠯᠪᠢᠳᠠᠭ ᠭᠠᠵᠠᠷ ᠪᠠᠢᠨᠠ᠃
ᠬᠦᠴᠦ ᠲᠡᠢ ᠡᠷᠡ ᠶ᠋ᠢᠨ ᠰᠢᠭᠡᠰᠦ ᠦᠰᠦᠷᠪᠡᠯ
ᠬᠦᠷᠴᠦ ᠲᠤᠰᠬᠤ ᠭᠠᠵᠠᠷ ᠪᠠᠢᠨᠠ᠃
ᠵᠢᠩᠬᠢᠨᠢ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ ᠶ᠋ᠢ
ᠵᠢᠯ ᠦ᠋ᠨ ᠵᠢᠱ᠌ᠢᠶᠡ ᠲᠠᠢ ᠭᠠᠵᠠᠷ ᠠ᠋ᠴᠠ ᠲᠠᠯᠪᠢᠳᠠᠭ ᠶᠤᠮ︾ ᠭᠡᠰᠡᠨ ᠳ᠋ᠦ᠍
《ᠴᠢᠨᠦ ᠮᠠᠭᠤ ᠬᠠᠮᠠᠭᠤ ᠲᠠᠢ ᠳᠠᠭᠠ ᠢᠷᠡᠪᠡᠯ
ᠮᠢᠨᠦ ᠲᠠᠷᠭᠤᠨ ᠮᠣᠷᠢ ᠪᠣᠯᠤᠨᠠ》 ᠭᠡᠵᠦ
ᠵᠢᠯ ᠦ᠋ᠨ ᠭᠠᠵᠠᠷ ᠲᠠᠯᠪᠢᠬᠤ ᠪᠠᠷ
ᠵᠢᠮᠡ ᠬᠠᠤᠯᠢ ᠲᠣᠭᠲᠠᠭᠠᠳ
ᠮᠣᠷᠢᠳ ᠢ᠋ᠶ᠋ᠠᠨ ᠬᠠᠵᠠᠭᠠᠷᠯᠠᠵᠤ
ᠮᠣᠷᠳᠠᠬᠤ ᠪᠠᠷ ᠪᠣᠯᠤᠭᠰᠠᠨ ᠳ᠋ᠤ᠌
ᠬᠠᠭᠠᠨ ᠬᠦᠦ ᠶ᠋ᠢᠨ ᠪᠣᠷᠣ ᠳᠠᠭᠠ
ᠬᠠᠮᠠᠭᠤ ᠶᠠᠷᠠ ᠲᠠᠢ ᠭᠡᠵᠦ
ᠪᠠᠭᠠᠴᠤᠳ ᠨᠢᠭᠡᠨ ᠴᠦ᠍ ᠤᠨᠤᠵᠤ ᠥᠭᠬᠦ ᠦᠭᠡᠢ ᠳ᠋ᠦ᠍
ᠪᠠᠭᠠ ᠰᠢᠭ᠋ ᠬᠠᠷᠠ ᠬᠦᠦ ᠢᠷᠡᠭᠡᠳ᠄
《ᠪᠢ ᠰᠢᠷᠡᠭᠡᠲᠦ ᠶ᠋ᠢᠨ ᠬᠠᠭᠠᠨ ᠭᠤᠸᠠᠢ ᠲᠠᠨ ᠤ᠋ ᠮᠣᠷᠢ ᠶ᠋ᠢ
ᠪᠡᠯᠴᠢᠵᠦ ᠤᠨᠤᠵᠤ ᠥᠭᠭᠦᠶᠡ》 ᠭᠡᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ
ᠬᠠᠵᠠᠭᠤ ᠳ᠋ᠠᠭᠠᠨ ᠬᠠᠷᠠ ᠬᠦᠦ ᠶ᠋ᠢ ᠠᠪᠴᠢᠷᠠᠵᠤ
ᠴᠢᠬᠢᠨ ᠳ᠋ᠦ᠍ᠨᠢ ᠬᠡᠳᠦᠨ ᠦᠭᠡ
ᠰᠢᠪᠡᠨᠡᠵᠦ ᠰᠤᠷᠭᠠᠨ ᠬᠡᠯᠡᠭᠡᠳ
ᠰᠢᠭᠤᠳᠠᠢ ᠨᠢᠭᠡ ᠶ᠋ᠢ ᠥᠭᠴᠦ
ᠴᠢᠪᠠᠭᠠ ᠭᠤᠷᠪᠠ ᠶ᠋ᠢ ᠠᠳᠬᠤᠭᠤᠯᠵᠤ
ᠨᠠᠷᠠᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠣᠴᠢᠵᠤ
《ᠨᠠᠳᠠ ᠬᠠᠷᠠ ᠬᠦᠦ ᠪᠡᠨ ᠲᠦᠷ ᠥᠭᠭᠦᠨᠡ ᠤᠤ?》 ᠭᠡᠰᠡᠨ ᠳ᠋ᠦ᠍
《ᠬᠡᠦᠬᠡᠳ ᠳᠠᠭᠠᠭᠤᠯᠤᠨ ᠢᠷᠡᠭᠰᠡᠨ ᠦᠭᠡᠢ ᠲᠤᠯᠠ
ᠬᠥᠮᠦᠨ ᠢ᠋ ᠮᠢᠨᠢ ᠵᠠᠷᠤᠵᠤ ᠪᠣᠯᠤᠨᠠ》 ᠭᠡᠵᠦ
ᠮᠣᠷᠢᠳ ᠭᠠᠷᠴᠤ ᠬᠥᠳᠡᠯᠪᠡ ᠭᠡᠨᠡ᠃
ᠶᠠᠪᠤᠭᠰᠠᠭᠠᠷ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ
ᠶᠡᠬᠡ ᠰᠢᠭ ᠨᠢᠭᠡᠨ ᠠᠢᠯ ᠤ᠋ᠨ ᠨᠤᠲᠤᠭ ᠲᠤ᠌ ᠬᠦᠷᠴᠦ
ᠥᠨᠥ ᠬᠠᠷᠠ ᠬᠦᠦ ᠰᠢᠭᠤᠳ ᠣᠴᠢᠵᠤ
ᠦᠨᠡᠰᠦᠨ ᠣᠪᠣᠭᠠ ᠳᠡᠭᠡᠷᠡ ᠨᠢ ᠪᠠᠭᠤᠭᠠᠳ
ᠴᠢᠪᠠᠭᠠ ᠨᠢᠭᠡ ᠪᠡᠨ ᠢᠳᠡᠵᠦ
ᠰᠢᠭᠤᠳᠠᠢ ᠳ᠋ᠠᠭᠠᠨ ᠦᠨᠡᠰᠦ ᠬᠢᠵᠦ
ᠴᠢᠬᠢᠨ ᠳᠣᠣᠷᠠ ᠪᠠᠨ ᠳᠡᠷᠡᠯᠡᠵᠦ
ᠬᠦᠷᠬᠢᠷᠡᠨ ᠰᠤᠨᠵᠤ ᠤᠨᠲᠠᠪᠠ᠃
ᠨᠠᠷᠠᠨ ᠬᠠᠭᠠᠨ ᠤ᠋ ᠮᠣᠷᠢᠳ ᠤ᠋ᠨ ᠬᠡᠦᠬᠡᠳ
ᠮᠠᠢᠬᠠᠨ ᠥᠷᠲᠡᠭᠡ ᠳ᠋ᠦ᠍ ᠪᠠᠭᠤᠵᠤ
ᠮᠠᠭᠤ ᠳᠠᠭᠠ ᠲᠠᠢ ᠬᠦᠦ ᠶ᠋ᠢ ᠳᠣᠮᠣᠭᠯᠠᠨ
ᠮᠢᠬᠠ ᠲᠣᠰᠣ ᠮᠠᠩᠰᠢᠭᠤᠷᠠᠲᠠᠯᠠ ᠢᠳᠡᠵᠦ
ᠮᠠᠷᠭᠠᠰᠢ ᠶ᠋ᠢᠨ ᠡᠷᠲᠡ ᠪᠣᠯᠲᠠᠯᠠ ᠤᠨᠲᠠᠵᠤ
ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠦᠶᠡᠰ ᠢ᠋ᠶ᠋ᠡᠷ
ᠮᠡᠩᠳᠡ ᠰᠡᠩᠳᠡ ᠲᠦᠷᠴᠢᠭᠢᠨᠡᠵᠦ
ᠵᠡᠭᠦᠨ ᠬᠣᠢᠰᠢ ᠵᠦᠭᠯᠡᠵᠦ
ᠵᠡᠷᠭᠡᠴᠡᠭᠡ ᠪᠡᠷ ᠮᠣᠷᠳᠠᠨ ᠳᠠᠪᠬᠢᠪᠠ᠃
ᠪᠠᠭᠠ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍
ᠪᠠᠭᠤᠭᠰᠠᠨ ᠬᠥᠰᠬᠡ ᠨᠢ ᠬᠥᠳᠡᠯᠦᠭᠰᠡᠨ ᠳ᠋ᠦ᠍
ᠦᠨᠡᠰᠦᠨ ᠳ᠋ᠦ᠍ ᠤᠨᠲᠠᠭᠰᠠᠨ ᠬᠠᠷᠠ ᠬᠦᠦ
ᠥᠩᠬᠥᠷᠢᠨ ᠮᠥᠯᠬᠥᠨ ᠪᠣᠰᠤᠭᠠᠳ
ᠦᠳᠡ ᠪᠣᠯᠲᠠᠯᠠ ᠤᠨᠲᠠᠪᠠ ᠭᠡᠵᠦ
ᠦᠶᠡᠷ ᠪᠠᠭᠤᠲᠠᠯᠠ ᠰᠢᠭᠡᠵᠦ
ᠲᠡᠷᠢᠭᠦᠨ ᠲᠦᠰᠢᠮᠡᠯ ᠳ᠋ᠦ᠍ ᠣᠴᠢᠵᠤ
ᠮᠣᠷᠢ ᠣᠷᠣᠯᠳᠣᠬᠤ ᠪᠣᠯᠪᠠ ᠤᠤ? ᠭᠡᠰᠡᠨ ᠳ᠋ᠦ᠍
ᠲᠦᠰᠢᠮᠡᠯ ᠶᠡᠬᠡ ᠵᠠᠩᠨᠠᠵᠤ
ᠲᠥᠭᠡ ᠦᠭᠡᠢ ᠠᠭᠠᠰᠢᠯᠠᠵᠤ
ᠡᠴᠢᠭᠡ ᠪᠡᠨ ᠠᠯᠠᠭᠰᠠᠨ ᠬᠠᠷᠠ ᠲᠣᠯᠣᠭᠠᠢ
ᠡᠬᠡ ᠪᠡᠨ ᠴᠠᠪᠴᠢᠭᠰᠠᠨ ᠪᠣᠷᠣ ᠲᠣᠯᠣᠭᠠᠢ ᠴᠢ
ᠬᠥᠮᠦᠨ ᠦ᠌ ᠮᠣᠷᠢ ᠤᠨᠤᠵᠤ ᠪᠠᠢᠭᠠᠳ
ᠬᠥᠯᠴᠥᠭᠦᠷᠡᠨ ᠤᠨᠲᠠᠬᠤ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠵᠦ
ᠬᠤᠷᠳᠤᠨ ᠮᠣᠷᠢᠨ ᠳ᠋ᠤᠨᠢ ᠮᠣᠷᠳᠠᠭᠤᠯᠵᠤ
ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠬᠡᠭᠦᠯᠵᠦ ᠢᠯᠡᠭᠡᠪᠡ᠃
ᠰᠢᠭᠤᠳᠠᠢ ᠲᠠᠢ ᠦᠨᠡᠰᠦ ᠪᠡᠨ ᠲᠡᠪᠡᠷᠢᠵᠦ
ᠴᠤᠪᠤᠭᠤᠯᠤᠨ ᠬᠡᠳᠦ ᠭᠤᠶᠠᠳᠠᠭᠰᠠᠨ ᠳ᠋ᠤ᠌
ᠠᠯᠮᠠᠰ ᠪᠦᠯᠡᠵᠢᠩ ᠢ᠋ᠶ᠋ᠡᠨ ᠳᠤᠷᠠᠰᠬᠠᠭᠠᠳ᠂
ᠨᠠᠷᠠᠨ ᠬᠠᠭᠠᠨ ᠳ᠋ᠤ᠌ ᠣᠴᠢᠵᠤ᠄
《ᠲᠡᠷᠢᠭᠦᠨ ᠮᠥᠷᠥᠢ ᠣᠯᠪᠠ》 ᠭᠡᠰᠡᠨ ᠳ᠋ᠦ᠍
《ᠳᠠᠷᠠᠭᠠ ᠶ᠋ᠢᠨ ᠮᠥᠷᠥᠢ ᠳ᠋ᠦ᠍ ᠦᠵᠡᠶᠡ》 ᠭᠡᠵᠦ
ᠳᠠᠮᠰᠠᠭ ᠰᠦᠷ ᠭᠠᠷᠭᠠᠵᠤ
ᠳᠠᠩᠬᠠᠯᠵᠠᠨ ᠰᠠᠵᠢᠵᠤ ᠪᠤᠴᠠᠭᠠᠳ
ᠬᠣᠪᠢᠨ ᠤ᠋ ᠪᠠᠭᠠᠲᠤᠷ ᠤ᠋ᠳ ᠢ᠋ᠶ᠋ᠠᠨ ᠤᠷᠢᠵᠤ
ᠬᠣᠶᠠᠳᠤᠭᠠᠷ ᠮᠥᠷᠥᠢ ᠶ᠋ᠢ ᠠᠪᠤᠶᠠ ᠭᠡᠳ
ᠬᠣᠨᠢ ᠠᠯᠠᠨ ᠬᠤᠷᠢᠮᠯᠠᠵᠤ
ᠬᠤᠨᠳᠠᠭᠠ ᠡᠷᠭᠦᠨ ᠠᠷᠢᠬᠢᠯᠠᠵᠤ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠳ᠋ᠤ᠌᠄
《ᠨᠤᠮᠤ ᠲᠠᠲᠠᠵᠤ ᠰᠤᠮᠤ ᠬᠠᠷᠪᠤᠶᠠ》 ᠭᠡᠰᠡᠨ ᠳ᠋ᠦ᠍᠄
《ᠶᠠᠮᠠᠷ ᠵᠢᠱ᠌ᠢᠶᠡ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ
ᠶᠠᠭᠤ ᠶ᠋ᠢ ᠲᠠᠯᠪᠢᠵᠤ ᠣᠨᠢᠯᠠᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄
《ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠵᠢᠱ᠌ᠢᠶᠡᠨ ᠦ᠌ ᠭᠠᠵᠠᠷ
ᠭᠤᠲᠤᠯ ᠪᠤᠰᠬᠠᠵᠤ ᠬᠠᠷᠪᠤᠳᠠᠭ》 ᠭᠡᠰᠡᠨ ᠳ᠋ᠦ᠍᠄
《ᠡᠭᠦᠨ ᠢ᠋ ᠪᠠᠰᠠ ᠬᠠᠷᠪᠤᠪᠠ ᠭᠡᠵᠦ
ᠡᠭᠦᠷᠢᠳᠡ ᠶᠡᠷᠦ ᠪᠣᠳᠣᠳᠠᠭ ᠦᠭᠡᠢ᠃
ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠪᠣᠯᠪᠠᠯ
ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ
ᠭᠣᠮᠣᠳᠠᠯ ᠦᠭᠡᠢ ᠳᠤᠰᠬᠠᠬᠤ ᠪᠥᠭᠡᠳ
ᠭᠣᠳᠣᠰ ᠵᠠᠮ ᠤ᠋ᠨ ᠬᠣᠭᠣᠷᠣᠨᠳᠣ ᠨᠢ
ᠬᠣᠨᠢᠨ ᠴᠢᠨᠡᠭᠡᠨ ᠴᠠᠭᠠᠨ ᠴᠢᠯᠠᠭᠤ
ᠦᠬᠡᠷ ᠦ᠋ᠨ ᠴᠢᠨᠡᠭᠡᠨ ᠬᠠᠷᠠ ᠴᠢᠯᠠᠭᠤ
ᠬᠤᠪᠠᠬᠠᠢ ᠰᠡᠭᠦᠵᠢ
ᠮᠥᠩᠭᠥᠨ ᠲᠡᠪᠡᠨᠡ
ᠡᠴᠦᠰ ᠲᠦ᠋ᠨᠢ ᠠᠯᠲᠠᠨ ᠲᠡᠪᠡᠨᠡ
ᠡᠰᠢ ᠶ᠋ᠢ ᠨᠢ ᠲᠣᠩᠭᠣᠷᠤᠤ ᠬᠠᠳᠬᠤᠵᠤ
ᠦᠵᠦᠭᠦᠷ ᠲᠦ᠋ᠨᠢ ᠰᠤᠮᠤ ᠪᠠᠨ ᠲᠣᠭᠲᠠᠭᠠᠳᠠᠭ》 ᠭᠡᠰᠡᠨ ᠳ᠋ᠦ᠍᠄
《ᠴᠢᠨᠦ ᠰᠤᠮᠤ ᠬᠡᠳᠦᠢ ᠲᠣᠰᠪᠠᠯ
ᠮᠢᠨᠦ ᠪᠠᠭᠠᠲᠤᠷ ᠤ᠋ᠳ ᠪᠠᠰᠠ ᠬᠣᠯᠠᠳᠠᠭᠤᠯᠬᠤ ᠦᠭᠡᠢ》 ᠭᠡᠵᠦ
ᠪᠠᠢᠭᠰᠠᠨ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠪᠦᠷᠢᠳᠬᠡᠵᠦ
ᠪᠠᠭᠠᠲᠤᠷ ᠤ᠋ᠳ ᠨᠢ ᠤᠷᠢᠳᠠᠪᠡᠷ ᠬᠠᠷᠪᠤᠭᠰᠠᠨ ᠳ᠋ᠤ᠌
ᠰᠤᠮᠤ ᠨᠢ ᠦᠨᠡᠰᠦᠨ ᠣᠪᠣᠭᠠᠨ ᠤ᠋ ᠴᠠᠭᠠᠲᠠᠢ
ᠭᠢᠯᠠᠰ ᠭᠡᠵᠦ ᠲᠤᠰᠪᠠ ᠭᠡᠨᠡ᠃
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠵᠢᠷ ᠠᠯᠲᠠᠨ ᠨᠤᠮᠤ ᠪᠠᠨ ᠡᠷᠭᠦᠵᠦ
ᠤᠷᠭᠤᠬᠤ ᠨᠠᠷᠠᠨ ᠤ᠋ ᠦᠶᠡ ᠳ᠋ᠦ᠍ ᠳᠡᠯᠢᠵᠦ
ᠦᠳᠡ ᠶ᠋ᠢᠨ ᠨᠠᠷᠠᠨ ᠭᠣᠣᠯᠯᠠᠬᠤ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠳ᠋ᠤ᠌
ᠬᠣᠨᠢᠨ ᠴᠢᠨᠡᠭᠡᠨ ᠴᠠᠭᠠᠨ ᠴᠢᠯᠠᠭᠤ
ᠬᠣᠭ ᠰᠤᠭ ᠬᠡᠢᠰᠴᠦ
ᠦᠬᠡᠷ ᠦ᠋ᠨ ᠴᠢᠨᠡᠭᠡᠨ ᠬᠠᠷᠠ ᠴᠢᠯᠠᠭᠤ
ᠤᠢᠷᠢ ᠰᠡᠢᠷᠢ ᠪᠣᠯᠵᠤ
ᠬᠤᠪᠠᠬᠠᠢ ᠰᠡᠭᠦᠵᠢ ᠶ᠋ᠢᠨ ᠰᠦᠪᠡᠭᠴᠢ ᠪᠡᠷ ᠣᠷᠣᠭᠤᠯᠵᠤ
ᠮᠥᠩᠭᠥᠨ ᠲᠡᠪᠡᠨᠡ ᠶ᠋ᠢᠨ ᠰᠠᠨᠵᠢ ᠪᠠᠷ ᠰᠢᠷᠭᠤᠭᠤᠯᠵᠤ
ᠠᠯᠲᠠᠨ ᠲᠡᠪᠡᠨᠡ ᠶ᠋ᠢᠨ ᠦᠵᠦᠭᠦᠷ ᠳᠡᠭᠡᠷᠡ ᠨᠢ ᠲᠣᠭᠲᠠᠭᠠᠵᠤ
ᠬᠣᠶᠠᠳᠤᠭᠠᠷ ᠮᠥᠷᠥᠢ ᠶ᠋ᠢ ᠨᠢ ᠠᠪᠤᠪᠠ᠃
ᠬᠠᠷᠠᠵᠤ ᠪᠠᠢᠲᠠᠯᠠ ᠬᠣᠶᠠᠷ ᠮᠥᠷᠥᠢ
ᠬᠠᠭᠠᠨ ᠬᠦᠦ ᠶ᠋ᠢᠨ ᠪᠣᠯᠤᠭᠰᠠᠨ ᠳ᠋ᠤ᠌᠂
ᠨᠠᠷᠠᠨ ᠬᠠᠭᠠᠨ ᠳᠣᠲᠣᠷᠠ ᠪᠠᠨ ᠰᠠᠨᠳᠤᠷᠴᠤ
ᠨᠢᠭᠤᠴᠠ ᠪᠠᠷ ᠵᠠᠷᠤᠴᠠ ᠳᠠᠪᠬᠢᠭᠤᠯᠵᠤ
ᠭᠤᠷᠪᠠᠳᠤᠭᠠᠷ ᠮᠥᠷᠥᠢ ᠶ᠋ᠢ ᠪᠠᠲᠤᠯᠠᠶᠠ ᠭᠡᠳ
ᠭᠣᠢᠳᠠ ᠪᠣᠳᠣᠯᠭᠠ ᠲᠠᠯᠪᠢᠭᠠᠳ
ᠲᠩᠷᠢ ᠶ᠋ᠢᠨ ᠲᠡᠮᠦᠷ ᠬᠥᠬᠡ ᠪᠥᠬᠡ ᠶ᠋ᠢ ᠵᠠᠯᠠᠭᠰᠠᠨ ᠳ᠋ᠤ᠌
ᠲᠡᠷᠡ ᠪᠥᠬᠡ ᠶ᠋ᠢᠨ ᠢᠷᠡᠬᠦ ᠨᠢ
ᠲᠡᠮᠦᠷ ᠠᠷᠠᠯᠲᠤ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠵᠤ
ᠲᠡᠩᠴᠡᠰᠢ ᠦᠭᠡᠢ ᠪᠠᠷᠳᠠᠮᠨᠠᠵᠤ
ᠲᠡᠮᠦᠷ ᠬᠣᠶᠠᠷ ᠮᠠᠨᠴᠤᠷᠭᠠ ᠪᠠᠷ
ᠲᠠᠯᠤᠨ ᠮᠥᠷᠥ ᠪᠡᠨ ᠴᠣᠬᠢᠭᠤᠯᠵᠤ
ᠬᠤᠶᠠᠩ ᠶᠤᠭᠠᠨ ᠳᠠᠷᠤᠭᠤᠯᠵᠤ
ᠬᠣᠬᠣᠲᠣᠨᠠᠬᠤ ᠳᠠᠭᠤᠨ ᠬᠦᠩᠭᠢᠨᠡᠵᠦ
ᠰᠠᠪᠠ ᠮᠠᠯᠤ ᠲᠡᠪᠡᠷᠢᠵᠦ
ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠤᠤᠭᠤᠵᠤ
ᠦᠬᠡᠷ ᠦ᠋ᠨ ᠭᠤᠶᠠ ᠪᠠᠷᠢᠵᠤ
ᠡᠮᠬᠦ ᠡᠮᠬᠦ ᠪᠡᠷ ᠬᠣᠷᠣᠭᠳᠠᠵᠤ
ᠦᠰᠦ ᠰᠠᠬᠠᠯ ᠢ᠋ᠶ᠋ᠠᠨ ᠰᠡᠷᠪᠡᠢᠯᠭᠡᠨ
ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠵᠠᠩᠳᠤᠷᠴᠤ
ᠡᠩᠭᠡᠷ ᠵᠠᠭᠠᠮᠠ ᠪᠠᠨ ᠢᠷᠡᠵᠦ
ᠡᠪᠴᠢᠭᠦᠦ ᠴᠡᠭᠡᠵᠢ ᠪᠡᠨ ᠡᠭᠡᠭᠡᠵᠦ
ᠡᠵᠡᠨ ᠦ᠌ ᠮᠥᠷᠥᠢ ᠶ᠋ᠢ ᠪᠠᠲᠤᠯᠠᠬᠤ ᠳ᠋ᠤ᠌
ᠡᠨᠡ ᠪᠡᠶᠡ ᠶ᠋ᠢᠨ ᠬᠦᠴᠦ ᠪᠡᠨ ᠪᠠᠳᠠᠷᠠᠭᠤᠯᠬᠤ ᠳ᠋ᠤ᠌
ᠭᠠᠷ ᠬᠣᠭᠣᠰᠣᠨ ᠳᠠᠪᠬᠢᠵᠤ ᠶᠠᠭᠠᠬᠢᠪᠠ ᠭᠡᠳ
ᠭᠠᠳᠠᠨᠠ ᠪᠠᠢᠭᠰᠠᠨ ᠬᠣᠨᠢ ᠶ᠋ᠢ ᠰᠢᠭᠦᠷᠡᠨ ᠪᠠᠷᠢᠵᠤ
ᠭᠠᠯᠵᠠᠭᠤᠷᠠᠭᠰᠠᠨ ᠮᠡᠲᠦ ᠮᠠᠭᠰᠢᠵᠤ
ᠭᠠᠵᠠᠷ ᠬᠠᠶᠠᠨ ᠴᠢᠯᠠᠭᠤᠳᠠᠭᠠᠳ
ᠰᠦᠷᠡᠬᠡᠢ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠵᠤ
ᠰᠦᠷ ᠦᠵᠡᠭᠦᠯᠦᠨ ᠡᠷᠭᠢᠭᠡᠳ
ᠰᠦᠪᠡᠭᠡ ᠲᠤᠯᠵᠤ ᠠᠯᠴᠠᠢᠭᠠᠳ
ᠰᠦᠷᠳᠡᠭᠦᠯᠦᠨ ᠲᠡᠷᠡ ᠵᠣᠭᠰᠣᠭᠰᠠᠨ ᠳ᠋ᠤ᠌
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠪ ᠭᠡᠲᠡᠯᠡ ᠪᠡᠯᠡᠳᠬᠡᠨ ᠲᠡᠭᠦᠰᠴᠦ
ᠭᠠᠷ ᠬᠣᠭᠣᠰᠣᠨ ᠪᠤᠤ ᠳᠠᠪᠬᠢᠶᠠ ᠭᠡᠳ
ᠦᠨᠡᠰᠦᠨ ᠣᠪᠣᠭᠠᠨ ᠳ᠋ᠤ᠌ ᠬᠡᠪᠲᠡᠭᠰᠡᠨ
ᠬᠣᠮ ᠱᠠᠲᠤᠲᠡᠢ ᠬᠣᠶᠠᠷ ᠲᠡᠮᠡᠭᠡ ᠶ᠋ᠢ ᠪᠠᠷᠢᠵᠤ
ᠬᠤᠷᠤᠢᠯᠵᠠᠭᠰᠠᠨ ᠰᠠᠯᠬᠢᠨ ᠰᠢᠭ᠋ ᠳᠠᠪᠬᠢᠵᠤ
ᠬᠣᠲᠠᠯᠠᠭᠠᠷ ᠢ᠋ ᠨᠢᠭᠡ ᠲᠣᠭᠣᠷᠢᠵᠤ
ᠬᠣᠶᠠᠷ ᠲᠡᠰᠢ ᠠᠪᠤᠨ ᠲᠠᠶᠠᠭᠳᠠᠭᠠᠳ
ᠲᠡᠮᠦᠷ ᠬᠥᠬᠡ ᠪᠥᠬᠡ ᠲᠡᠢ ᠵᠣᠯᠭᠠᠵᠤ
ᠲᠩᠷᠢ ᠭᠠᠵᠠᠷ ᠨᠤᠷᠠᠲᠠᠯᠠ ᠨᠣᠴᠣᠯᠳᠤᠵᠤ
ᠭᠠᠷ ᠭᠠᠷ ᠠ᠋ᠴᠠ ᠪᠠᠨ ᠠᠳᠬᠤᠵᠤ
ᠭᠠᠵᠠᠷ ᠨᠤᠷᠠᠮᠠᠷ ᠲᠤᠯᠤᠯᠳᠤᠵᠤ
ᠵᠣᠳᠣᠭ ᠵᠣᠳᠣᠭ ᠠ᠋ᠴᠠ ᠪᠠᠨ ᠠᠪᠴᠤ
ᠵᠠᠭᠤᠷᠠᠯᠳᠤᠨ ᠬᠦᠩᠬᠦᠵᠦ ᠠᠴᠠᠯᠳᠤᠵᠤ
ᠴᠢᠳᠠᠯ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ
ᠴᠡᠯᠴᠡᠢᠲᠡᠯᠡ ᠴᠡᠯᠴᠡᠢᠲᠡᠯᠡ ᠳᠤᠭᠲᠤᠷᠴᠤ
ᠡᠷᠳᠡᠮ ᠮᠡᠬᠡ ᠪᠡᠨ ᠬᠡᠷᠡᠭᠯᠡᠨ
ᠡᠷᠭᠢᠲᠡᠯᠡ ᠡᠷᠭᠢᠲᠡᠯᠡ ᠬᠠᠪᠰᠤᠷᠴᠤ
ᠬᠦᠴᠦ ᠬᠦᠴᠦᠨ ᠢ᠋ᠶ᠋ᠡᠨ ᠲᠡᠩᠰᠡᠵᠦ
ᠬᠥᠯ ᠬᠥᠯ ᠢ᠋ᠶ᠋ᠡᠨ ᠭᠣᠬᠠᠳᠠᠵᠤ
ᠠᠳᠬᠤᠯᠴᠠᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠠᠯᠲᠠᠨ ᠲᠣᠪᠣᠷᠤᠤ ᠨᠢ ᠪᠤᠲᠠᠷᠠᠨ ᠤᠨᠠᠵᠤ
ᠮᠤᠰᠬᠢᠯᠳᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠮᠥᠩᠭᠥᠨ ᠲᠣᠯᠢ ᠨᠢ ᠬᠣᠪᠬᠣᠷᠠᠵᠤ
ᠥᠨᠳᠥᠷ ᠠᠰᠠᠷ ᠢ᠋ ᠲᠣᠭᠣᠷᠢᠭᠤᠯᠤᠨ
ᠥᠷᠭᠡᠨ ᠬᠠᠷᠰᠢ ᠶ᠋ᠢ ᠡᠷᠭᠢᠵᠦ
ᠦᠬᠦᠨ ᠵᠢᠭᠤᠷᠠᠯᠳᠤᠨ ᠨᠣᠴᠣᠯᠳᠤᠵᠤ
ᠦᠳᠡ ᠶ᠋ᠢᠨ ᠬᠢᠷᠢ ᠪᠣᠯᠬᠤ ᠳ᠋ᠤ᠌
ᠲᠡᠮᠦᠷ ᠬᠥᠬᠡ ᠪᠥᠬᠡ ᠲᠠᠮᠢᠷᠳᠠᠵᠤ
ᠲᠡᠮᠦᠷ ᠬᠥᠬᠡ ᠶ᠋ᠢᠨ ᠵᠣᠳᠣᠭ ᠨᠢ ᠬᠦᠨᠳᠦᠷᠡᠵᠦ
ᠲᠩᠷᠢ ᠶ᠋ᠢᠨ ᠪᠥᠬᠡ ᠪᠣᠯᠪᠠᠴᠤ
ᠲᠡᠰᠬᠦ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠵᠤ
ᠠᠯᠬᠤᠭᠠ ᠭᠢᠰᠬᠢᠭᠡ ᠨᠢ ᠰᠠᠮᠠᠭᠤᠷᠠᠵᠤ
ᠠᠮᠢᠰᠬᠤᠭᠠ ᠬᠡᠢ ᠨᠢ ᠳᠡᠭᠡᠷᠡᠳᠡᠵᠦ
ᠠᠯᠠᠭ ᠬᠣᠶᠠᠷ ᠨᠢᠳᠦ ᠨᠢ ᠡᠷᠭᠢᠯᠳᠦᠵᠦ
ᠠᠤᠭᠠ ᠬᠦᠴᠦ ᠨᠢ ᠪᠠᠷᠠᠭᠳᠠᠭᠰᠠᠨ ᠳ᠋ᠤ᠌
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠲᠦ ᠪᠡᠨ ᠵᠠᠭᠤᠨ ᠬᠦᠴᠦᠯᠡᠭᠡᠳ
ᠡᠮᠦᠰᠦᠭᠰᠡᠨ ᠵᠣᠳᠣᠭ ᠢ᠋ ᠨᠢ ᠬᠠᠩᠭᠠᠷᠠᠭᠤᠯᠵᠤ
ᠡᠪᠴᠢᠭᠦᠦ ᠴᠡᠭᠡᠵᠢ ᠶ᠋ᠢ ᠨᠢ ᠲᠤᠷᠭᠢᠭᠤᠯᠵᠤ
ᠡᠷᠭᠢᠭᠦᠯᠵᠦ ᠡᠷᠭᠢᠭᠦᠯᠵᠦ ᠪᠠᠢᠭᠠᠳ
ᠡᠷᠡᠬᠡᠢ ᠶ᠋ᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ
ᠬᠤᠷᠤᠢᠯᠠᠵᠤ ᠬᠤᠷᠤᠢᠯᠠᠵᠤ ᠪᠠᠢᠭᠠᠳ
ᠬᠤᠷᠤᠭᠤ ᠶ᠋ᠢᠨ ᠲᠡᠳᠦᠢ ᠪᠣᠯᠭᠠᠵᠤ
ᠬᠠᠪᠴᠢᠯ ᠭᠠᠵᠠᠷ ᠤ᠋ᠨ ᠠᠩ ᠢ᠋ᠶ᠋ᠠᠷ
ᠬᠠᠶᠠ ᠴᠣᠬᠢᠵᠤ ᠣᠷᠣᠭᠤᠯᠪᠠ᠃
ᠨᠠᠷᠠᠨ ᠬᠠᠭᠠᠨ ᠤ᠋ ᠳᠠᠶᠠᠭᠠᠷ ᠦᠵᠡᠵᠦ
ᠨᠠᠷᠭᠢᠯᠳᠤᠨ ᠪᠦᠭᠦᠳᠡᠭᠡᠷ ᠭᠠᠢᠬᠠᠯᠳᠤᠵᠤ
ᠢᠯᠡᠢ ᠢᠯᠡᠢ ᠬᠥᠭᠡᠷᠦᠬᠦᠢ
ᠡᠰᠡᠯᠡ ᠡᠰᠡᠯᠡ ᠠᠯᠠᠪᠠ ᠭᠡᠳ
ᠬᠥᠮᠦᠨ ᠦ᠌ ᠰᠠᠢᠨ ᠪᠥᠬᠡ ᠶ᠋ᠢ
ᠬᠥᠨᠳᠡᠢ ᠳ᠋ᠦ᠍ ᠴᠣᠬᠢᠵᠤ ᠣᠷᠣᠭᠤᠯᠪᠠ ᠭᠡᠳ
ᠬᠦᠷᠵᠡ ᠬᠦᠷᠵᠡ ᠵᠡᠭᠡᠲᠦᠦ ᠵᠡᠭᠡᠲᠦᠦ
ᠬᠥᠩᠭᠡᠨ ᠮᠠᠯᠲᠠᠵᠤ ᠭᠠᠷᠭᠠᠶᠠ ᠭᠡᠬᠦ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ
ᠰᠢᠭᠡᠵᠡᠢ ᠬᠤᠷᠤᠭᠤ ᠪᠠᠷ ᠡᠯᠭᠦᠨ ᠡᠲᠡᠭᠰᠡᠨ ᠳ᠋ᠦ᠍
ᠦᠨᠡᠰᠦᠨ ᠣᠪᠣᠭᠠᠨ ᠤ᠋ ᠴᠠᠭᠠᠨᠠ ᠨᠢ
ᠪᠣᠯᠳᠣᠭ ᠭᠡᠵᠦ ᠦᠵᠡᠭᠳᠡᠭᠰᠡᠨ ᠭᠡᠨᠡ᠃
ᠪᠦᠭᠦᠳᠡ ᠭᠤᠷᠪᠠᠨ ᠮᠥᠷᠥᠢ ᠶ᠋ᠢ ᠨᠢ
ᠪᠤᠴᠠᠯ ᠦᠭᠡᠢ ᠢᠩᠭᠢᠵᠦ ᠠᠪᠤᠭᠠᠳ
ᠬᠡᠰᠢᠭ ᠲᠦ᠋ᠨᠢ ᠳᠠᠷᠤᠢ ᠮᠥᠷᠭᠥᠵᠦ
ᠬᠡᠬᠡᠷᠡᠲᠡᠯᠡ ᠶᠡᠬᠡ ᠪᠠᠶᠠᠰᠬᠠᠵᠤ
ᠭᠢᠯᠠᠭᠤᠨ ᠮᠡᠷᠭᠡᠨ ᠭᠦᠩᠵᠦ ᠶ᠋ᠢ ᠨᠢ
ᠬᠠᠨᠢ ᠪᠠᠨ ᠪᠣᠯᠭᠠᠨ ᠲᠠᠲᠠᠭᠠᠳ
ᠬᠠᠭᠠᠨ ᠤ᠋ ᠲᠣᠮᠣ ᠪᠤᠶᠠᠨ ᠳᠡᠭᠡᠷᠡ ᠨᠢ
ᠬᠠᠨᠲᠠᠯᠠ ᠶᠡᠬᠡ ᠬᠤᠷᠢᠮᠯᠠᠵᠤ
ᠠᠪᠤ ᠶ᠋ᠢᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠪᠠᠷ
ᠠᠴᠢᠶᠠ ᠬᠥᠰᠬᠡ ᠪᠡᠨ ᠬᠤᠮᠢᠵᠤ
ᠪᠠᠭᠠᠰᠤᠨ ᠤ᠋ ᠵᠠᠷᠤᠴᠠ ᠪᠠᠢᠭᠰᠠᠨ
ᠪᠠᠭᠠ ᠰᠢᠭ᠋ ᠬᠠᠷᠠ ᠬᠦᠦ ᠪᠡᠷ
ᠲᠡᠷᠢᠭᠦᠨ ᠲᠦᠰᠢᠮᠡᠯ ᠪᠣᠯᠭᠠᠵᠤ
ᠲᠥᠷᠥ ᠪᠡᠨ ᠲᠥᠯᠥᠭᠡᠯᠡᠵᠦ ᠬᠦᠷᠭᠡᠭᠦᠯᠪᠡ ᠭᠡᠨᠡ᠃
ᠬᠥᠳᠡᠯᠦᠨ ᠭᠠᠷᠬᠤ ᠦᠶᠡᠰ ᠲᠤᠨᠢ
ᠬᠥᠭᠰᠢᠨ ᠬᠠᠭᠠᠨ ᠬᠠᠲᠤᠨ ᠲᠠᠢ ᠪᠠᠨ
ᠬᠦᠷᠭᠡᠨ ᠥᠬᠢᠨ ᠬᠣᠶᠠᠷ ᠲᠠᠭᠠᠨ
ᠬᠦᠨᠳᠦᠲᠦ ᠢᠷᠦᠭᠡᠯ ᠲᠠᠯᠪᠢᠭᠰᠠᠨ ᠨᠢ᠄
《ᠭᠠᠷᠤᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠭᠠᠮᠰᠢᠭ ᠠᠷᠢᠯᠵᠤ
ᠬᠦᠷᠦᠭᠰᠡᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠬᠥᠨᠥᠭᠡᠯ ᠠᠷᠢᠯᠤᠭ!
ᠶᠠᠪᠤᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠶᠠᠷᠰᠢᠭ ᠠᠷᠢᠯᠵᠤ
ᠠᠶᠠᠯᠠᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠠᠶᠤᠯ ᠠᠷᠢᠯᠤᠭ!
ᠬᠣᠨᠣᠭᠰᠠᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠬᠣᠣᠷᠯᠠᠯ ᠠᠷᠢᠯᠵᠤ
ᠦᠳᠡᠯᠡᠭᠰᠡᠨ ᠭᠠᠵᠠᠷ ᠲᠤ᠌ ᠴᠢᠨᠢ
ᠦᠬᠦᠯ ᠠᠷᠢᠯᠤᠭ!
ᠴᠢᠭᠯᠡᠭᠰᠡᠨ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠨᠢ
ᠴᠠᠰᠤ ᠲᠠᠭᠠᠷᠠᠬᠤ ᠦᠭᠡᠢ
ᠮᠣᠷᠳᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠨᠢ
ᠮᠥᠨᠳᠥᠷ ᠲᠠᠭᠠᠷᠠᠬᠤ ᠦᠭᠡᠢ
ᠪᠠᠭᠤᠳᠠᠯᠯᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠨᠢ
ᠪᠣᠷᠣᠭᠠᠨ ᠲᠠᠭᠠᠷᠠᠬᠤ ᠦᠭᠡᠢ
ᠰᠠᠭᠤᠳᠠᠯᠯᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠴᠢᠨᠢ
ᠰᠠᠯᠬᠢᠨ ᠲᠠᠭᠠᠷᠠᠬᠤ ᠦᠭᠡᠢ
ᠥᠪᠡᠷ ᠵᠠᠭᠤᠷᠠ ᠪᠠᠨ ᠨᠠᠢᠷᠲᠠᠢ
ᠥᠯᠵᠡᠢ ᠮᠥᠷ ᠲᠡᠢ ᠬᠠᠷᠢ!
ᠦᠰᠦ ᠪᠡᠨ ᠴᠠᠢᠲᠠᠯᠠ ᠶᠠᠪᠤᠵᠤ
ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠷᠡᠵᠢᠭᠦᠯ!
ᠡᠴᠢᠭᠡ ᠶ᠋ᠢᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠵᠤ
ᠡᠶᠡᠲᠡᠢ ᠢᠨᠠᠭᠯᠠᠵᠤ ᠠᠮᠢᠳᠤᠷᠠ!
ᠡᠬᠡ ᠣᠷᠣᠨ ᠳ᠋ᠠᠭᠠᠨ ᠬᠦᠷᠴᠦ
ᠡᠪ ᠲᠡᠢ ᠰᠠᠢᠬᠠᠨ ᠣᠨ ᠳ᠋ᠤ᠌ ᠣᠷᠣ!
ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠠᠮᠤᠷᠬᠠᠨ ᠶᠠᠪᠤᠵᠤ
ᠠᠢᠯ ᠨᠤᠲᠤᠭ ᠲᠠᠭᠠᠨ ᠠᠯᠳᠠᠷᠲᠠᠢ ᠬᠥᠷ!》 ᠭᠡᠵᠦ
ᠠᠷᠢᠭᠤᠨ ᠢᠷᠦᠭᠡᠯ ᠢ᠋ᠶ᠋ᠡᠨ ᠲᠠᠯᠪᠢᠵᠤ
ᠠᠰᠬᠠᠷᠠᠭᠰᠠᠨ ᠨᠢᠯᠪᠤᠰᠤ ᠪᠠᠨ ᠤᠨᠠᠭᠠᠭᠠᠳ᠂
ᠬᠠᠭᠠᠨ ᠬᠦᠦ ᠭᠢᠯᠠᠭᠤᠨ ᠮᠡᠷᠭᠡᠨ ᠭᠦᠩᠵᠦ ᠪᠡᠨ
ᠬᠠᠯᠠᠭᠤᠨ ᠨᠢᠯᠪᠤᠰᠤ ᠪᠠᠷ ᠢ᠋ᠶ᠋ᠠᠨ ᠦᠳᠡᠪᠡ ᠭᠡᠨᠡ᠂
ᠬᠦᠷᠭᠡᠯ ᠦ᠋ᠨ ᠣᠯᠠᠨ ᠤᠯᠤᠰ ᠤ᠋ᠳ ᠨᠢ
ᠬᠦᠷᠢᠶᠡᠯᠡᠨ ᠲᠣᠭᠣᠷᠢᠵᠤ ᠶᠠᠪᠤᠭᠠᠳ
ᠡᠷᠡᠭᠲᠡᠢ ᠨᠢ ᠪᠠᠷᠠᠭᠤᠨ ᠳ᠋ᠤ᠌ ᠮᠥᠷᠯᠡᠵᠦ
ᠡᠮᠡᠭᠲᠡᠢ ᠨᠢ ᠵᠡᠭᠦᠨ ᠳ᠋ᠦ᠍ ᠮᠥᠷᠯᠡᠵᠦ
ᠡᠭᠡᠵᠦ ᠳᠠᠬᠢᠨ ᠪᠤᠴᠠᠶᠠ ᠭᠡᠪᠡᠴᠦ
ᠡᠭᠡᠨᠡᠭᠲᠡ ᠡᠷᠭᠢᠵᠦ ᠪᠤᠴᠠᠬᠤ ᠦᠭᠡᠢ ᠳ᠋ᠦ᠍
ᠬᠠᠮᠠᠭᠤ ᠲᠠᠢ ᠳᠠᠭᠠ ᠪᠠᠨ ᠠᠯᠬᠤᠭᠤᠯᠵᠤ
ᠦᠨᠡᠰᠦᠨ ᠣᠪᠣᠭᠠᠨ ᠳᠡᠭᠡᠷᠡ ᠨᠢ ᠣᠴᠢᠵᠤ
ᠥᠩᠬᠥᠷᠢᠭᠦᠯᠦᠨ ᠬᠤᠪᠢᠯᠭᠠᠭᠠᠳ
ᠶᠡᠷᠦ ᠬᠤᠯᠤ ᠶ᠋ᠢᠨ ᠪᠠᠢᠳᠠᠯ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠪᠠᠨ ᠪᠣᠯᠭᠠᠵᠤ
ᠪᠠᠷᠠᠭᠤᠨᠰᠢ ᠭᠤᠷᠪᠠ ᠡᠷᠭᠢᠭᠦᠯᠵᠦ
ᠪᠠᠷᠠᠭᠤᠨ ᠬᠠᠮᠠᠷ ᠢ᠋ᠶ᠋ᠠᠷ ᠨᠢ ᠳᠣᠷᠭᠢᠭᠤᠯᠤᠭᠰᠠᠨ ᠳ᠋ᠤ᠌
ᠡᠷᠡᠭᠲᠡᠢᠴᠦᠳ ᠦ᠋ᠨ ᠡᠲᠡᠭᠡᠳ ᠲᠦ᠋ᠨᠢ
ᠠᠯᠲᠠ ᠮᠥᠩᠭᠥ ᠥᠩᠭᠥᠷᠢᠳᠡᠭᠰᠡᠨ ᠳ᠋ᠦ᠍
ᠡᠷᠡᠭᠲᠡᠢ ᠨᠢ ᠲᠡᠨᠳᠡ ᠪᠡᠨ ᠬᠣᠴᠣᠷᠪᠠ ᠭᠡᠨᠡ᠃
ᠵᠡᠭᠦᠨᠰᠢ ᠭᠤᠷᠪᠠ ᠡᠷᠭᠢᠭᠦᠯᠵᠦ
ᠵᠡᠭᠦᠨ ᠬᠠᠮᠠᠷ ᠢ᠋ᠶ᠋ᠠᠷ ᠨᠢ ᠳᠣᠷᠭᠢᠭᠤᠯᠤᠭᠰᠠᠨ ᠳ᠋ᠤ᠌
ᠡᠮᠡᠭᠲᠡᠢᠴᠦᠳ ᠦ᠋ᠨ ᠡᠲᠡᠭᠡᠳ ᠲᠦ᠋ᠨᠢ
ᠰᠤᠪᠤᠳ ᠲᠠᠨᠠ ᠥᠩᠭᠥᠷᠢᠳᠡᠭᠰᠡᠨ ᠳ᠋ᠦ᠍
ᠡᠮᠡᠭᠲᠡᠢ ᠨᠢ ᠲᠡᠨᠳᠡ ᠪᠡᠨ ᠬᠣᠴᠣᠷᠤᠭᠰᠠᠨ ᠳ᠋ᠤ᠌
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠴᠢᠩᠭᠢᠵᠦ ᠴᠢᠨᠠᠭᠰᠢ ᠮᠣᠷᠳᠠᠭᠠᠳ
ᠢᠷᠡᠬᠦ ᠦᠶᠡ ᠳ᠋ᠡᠭᠡᠨ ᠲᠠᠭᠠᠷᠠᠭᠰᠠᠨ
ᠢᠪᠡᠭᠡᠯ ᠲᠡᠢ ᠭᠤᠷᠪᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶ᠋ᠢ
ᠡᠶᠡᠯᠳᠡᠭ ᠢ᠋ᠶ᠋ᠡᠷ ᠨᠡᠢᠯᠡᠭᠦᠯᠦᠨ ᠳᠠᠭᠠᠭᠤᠯᠵᠤ
ᠬᠣᠪᠢᠨ ᠤ᠋ ᠣᠷᠣᠨ ᠵᠦᠭ ᠶᠠᠪᠤᠬᠤ ᠳ᠋ᠠᠭᠠᠨ
ᠡᠬᠡᠨᠡᠷ ᠲᠡᠭᠡᠨ ᠣᠴᠢᠵᠤ
ᠡᠴᠢᠭᠡ ᠡᠬᠡ ᠪᠡᠨ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ᠄
《ᠪᠢ ᠤᠷᠢᠳᠠ ᠪᠠᠷ ᠬᠠᠷᠢᠶᠠ ᠭᠡᠵᠦ᠃
ᠳᠤᠭᠤᠢᠯᠠᠭᠰᠠᠨ ᠭᠠᠵᠠᠷ ᠮᠢᠨᠢ ᠦᠳᠡᠯᠡᠵᠦ
ᠳᠥᠷᠪᠡᠯᠵᠢᠯᠡᠭᠰᠡᠨ ᠭᠠᠵᠠᠷ ᠮᠢᠨᠢ ᠬᠣᠨᠣᠵᠤ ᠶᠠᠪᠤᠭᠠᠷᠠᠢ!》 ᠭᠡᠳ
ᠡᠬᠡᠨᠡᠷ ᠢ᠋ᠶ᠋ᠡᠨ ᠦᠨᠦᠰᠦᠨ ᠰᠠᠯᠵᠤ
ᠡᠴᠢᠭᠡ ᠶ᠋ᠢᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠰᠡᠨ ᠳ᠋ᠦ᠍᠂
ᠢᠰᠡᠭᠡᠢ ᠭᠡᠷ ᠦ᠋ᠳ ᠨᠢ ᠬᠠᠷᠠᠯᠠᠵᠤ
ᠢᠯᠢᠮ ᠵᠢᠯᠢᠮ ᠪᠣᠯᠤᠭᠰᠠᠨ ᠳ᠋ᠤ᠌
ᠡᠪᠴᠢᠭᠦᠦ ᠴᠡᠭᠡᠵᠢ ᠨᠢ ᠪᠤᠬᠢᠨᠢᠳᠤᠵᠤ᠄
ᠡᠵᠢ ᠠᠪᠤ ᠮᠢᠨᠢ! ᠭᠡᠵᠦ ᠤᠬᠢᠯᠠᠬᠤ ᠳ᠋ᠤ᠌
ᠡᠯᠢᠶᠡ ᠱᠠᠭᠠᠵᠠᠭᠠᠢ ᠰᠣᠴᠢᠵᠤ
ᠡᠷᠭᠢᠨ ᠲᠣᠭᠣᠷᠢᠨ ᠨᠢᠰᠦᠭᠰᠡᠨ ᠳ᠋ᠦ᠍
ᠬᠠᠭᠠᠨ ᠬᠦᠦ ᠶ᠋ᠢᠨ ᠳᠣᠲᠣᠷᠠ ᠨᠢ ᠬᠠᠷᠠᠯᠠᠵᠤ
ᠬᠠᠯᠠᠭᠤᠨ ᠨᠢᠯᠪᠤᠰᠤ ᠨᠢ ᠠᠰᠬᠠᠷᠠᠵᠤ
ᠬᠠᠮᠤᠭ ᠢ᠋ ᠲᠣᠭᠣᠷᠢᠨ ᠶᠠᠪᠤᠵᠤ
ᠬᠠᠷᠠᠵᠤ ᠰᠢᠨᠵᠢᠨ ᠪᠠᠢᠭᠰᠠᠨ ᠳ᠋ᠤ᠌
ᠳᠠᠯᠤ ᠶ᠋ᠢᠨ ᠶᠠᠰᠤ ᠲᠠᠭᠠᠷᠠᠵᠤ
ᠲᠡᠷᠡ ᠳᠠᠯᠤ ᠳᠡᠭᠡᠷᠡ ᠨᠢ ᠪᠢᠴᠢᠭᠳᠡᠵᠦ ᠪᠠᠢᠬᠤ ᠨᠢ᠄
《ᠵᠦᠭ ᠦ᠋ᠨ ᠮᠠᠭᠤ ᠡᠲᠡᠭᠡᠳ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠡᠴᠡ
ᠢᠷᠣᠭᠠᠷ ᠦᠭᠡᠢ ᠳᠠᠯᠠᠢ ᠠ᠋ᠴᠠ
ᠶᠣᠨᠳᠣᠷ ᠤ᠋ᠨ ᠭᠤᠷᠪᠠᠨ ᠮᠣᠳᠣᠨ ᠠ᠋ᠴᠠ
ᠬᠥᠯ ᠦ᠋ᠨ ᠬᠢᠨᠢ ᠬᠢᠮᠤᠰᠤ ᠨᠢ
ᠬᠥᠳᠡᠭᠡ ᠳᠠᠰᠢ ᠤᠷᠭᠤᠵᠤ
ᠬᠢᠷᠥᠭᠡ ᠣᠭᠣᠯᠢ ᠪᠣᠯᠤᠭᠰᠠᠨ
ᠭᠠᠷ ᠤ᠋ᠨ ᠬᠢᠨᠢ ᠬᠢᠮᠤᠰᠤ ᠨᠢ
ᠭᠠᠳᠠᠭᠰᠢ ᠳᠣᠲᠣᠭᠰᠢ ᠤᠷᠭᠤᠵᠤ
ᠭᠠᠪ ᠳᠥᠩᠭᠡ ᠪᠣᠯᠤᠭᠰᠠᠨ
ᠬᠥᠬᠡ ᠡᠷᠢᠶᠡᠨ ᠨᠢᠳᠦ ᠲᠡᠢ
ᠬᠦᠷᠡᠩ ᠤᠯᠠᠭᠠᠨ ᠬᠠᠴᠠᠷ ᠲᠠᠢ
ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ ᠢᠳᠡᠳᠡᠭ
ᠬᠡᠦᠬᠡᠳ ᠦ᠋ᠨ ᠮᠢᠬᠠ ᠶ᠋ᠢ ᠵᠣᠭᠣᠭᠯᠠᠳᠠᠭ
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠢᠷᠡᠵᠦ
ᠠᠪᠤ ᠡᠵᠢ ᠶ᠋ᠢ ᠴᠢᠨᠢ ᠰᠢᠭᠦᠷᠡᠵᠦ
ᠠᠷᠠᠳ ᠣᠯᠠᠨ ᠢ᠋ ᠴᠢᠨᠢ ᠠᠯᠪᠠᠳᠠᠵᠤ
ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠴᠢᠨᠢ ᠰᠥᠨᠥᠭᠡᠵᠦ
ᠭᠠᠢᠬᠯᠲᠤ ᠤᠯᠤᠰ ᠢ᠋ ᠴᠢᠨᠢ ᠳᠦᠢᠪᠡᠭᠡᠪᠡ᠃
ᠠᠴᠢᠲᠤ ᠮᠡᠷᠭᠡᠨ ᠬᠦᠦ ᠮᠢᠨᠢ ᠴᠢ
ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠵᠤ
ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠠᠯᠪᠠᠳᠠᠭᠤᠯᠬᠤ ᠠ᠋ᠴᠠ ᠭᠠᠷᠭᠠᠶᠠ ᠭᠡᠪᠡᠯ
ᠠᠮᠢ ᠪᠡᠶᠡ ᠪᠡᠨ ᠭᠡᠭᠡᠨᠡ᠃ ᠴᠢᠩᠭᠢᠬᠦ ᠡᠴᠡ
ᠠᠢᠯ ᠭᠡᠷ ᠢ᠋ᠶ᠋ᠡᠨ ᠪᠦᠲᠦᠭᠡᠵᠦ
ᠠᠯᠲᠠᠨ ᠲᠥᠷᠥ ᠪᠡᠨ ᠪᠠᠢᠭᠤᠯᠤᠨ ᠰᠠᠭᠤᠭᠠᠷᠠᠢ!》 ᠭᠡᠵᠦ
ᠳᠠᠬᠢᠨ ᠳᠠᠪᠲᠠᠨ ᠪᠢᠴᠢᠭᠰᠡᠨ ᠢ᠋ ᠦᠵᠡᠭᠡᠳ
ᠠᠭᠤᠷ ᠨᠢ ᠳᠡᠭᠳᠡᠵᠦ
ᠠᠭᠠᠷ ᠲᠤ᠌ ᠲᠤᠯᠤᠭᠠᠳ
ᠠᠯᠠᠶᠠ ᠭᠡᠰᠡᠨ ᠰᠡᠳᠬᠢᠯ
ᠠᠶᠤᠤᠯᠢᠬᠠᠢ ᠳᠦᠭᠦᠷᠴᠦ
ᠪᠠᠷᠤᠢᠭᠰᠠᠨ ᠬᠢᠯᠢᠩ ᠨᠢ ᠳᠡᠭᠳᠡᠵᠦ
ᠪᠣᠭᠳᠠ ᠠᠭᠤᠯᠠᠨ ᠳ᠋ᠤ᠌ ᠲᠤᠯᠤᠭᠠᠳ
ᠪᠦᠷᠢᠯᠭᠡᠶᠡ ᠭᠡᠰᠡᠨ ᠰᠡᠳᠬᠢᠯ
ᠪᠠᠭᠠᠯᠵᠤᠷ ᠲᠤᠨᠢ ᠪᠥᠭᠯᠡᠷᠡᠵᠦ
ᠶᠡᠷᠦ ᠬᠤᠯᠤ ᠶ᠋ᠢᠨ ᠪᠠᠢᠳᠠᠯ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠠ᠋ᠴᠠ ᠪᠠᠨ᠄
《ᠮᠠᠩᠭᠤᠰ ᠤ᠋ᠨ ᠣᠷᠣᠨ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌
ᠮᠠᠭᠠᠳ ᠡᠨᠳᠡᠭᠳᠡᠯ ᠪᠠᠢᠨᠠᠤ?》 ᠭᠡᠰᠡᠨ ᠳ᠋ᠦ᠍
ᠮᠣᠷᠢ ᠨᠢ ᠢᠩᠭᠢᠵᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠵᠣᠷᠢᠭ ᠪᠠᠢᠪᠠᠯ ᠡᠵᠡᠨ ᠮᠢᠨᠢ
ᠵᠠᠭᠤ ᠬᠦᠷᠴᠦ ᠪᠣᠯᠤᠨᠠ᠃
ᠶᠠᠳᠠᠷᠠᠬᠤ ᠳ᠋ᠤ᠌ ᠪᠦᠦ ᠮᠤᠬᠤᠷ ᠠ᠋!
ᠶᠠᠪᠤᠬᠤ ᠪᠠᠨ ᠮᠡᠳᠡ》 ᠭᠡᠳ᠂
ᠵᠡᠭᠦᠨ ᠬᠣᠢᠰᠢ ᠵᠦᠭᠯᠡᠵᠦ
ᠵᠢᠭᠦᠷᠲᠡᠨ ᠰᠢᠪᠠᠭᠤ ᠲᠠᠢ ᠤᠷᠤᠯᠳᠤᠵᠤ
ᠰᠠᠯᠬᠢᠨ ᠪᠣᠷᠣᠭᠠᠨ ᠳ᠋ᠤ᠌ ᠱᠤᠩᠪᠠᠵᠤ
ᠴᠠᠰᠤ ᠯᠠᠪᠰᠠᠨ ᠳ᠋ᠤ᠌ ᠰᠢᠷᠭᠤᠨ
ᠠᠭᠤᠯᠠ ᠰᠢᠯᠢ ᠶ᠋ᠢ ᠥᠩᠭᠡᠷᠡᠭᠡᠵᠦ
ᠠᠭᠤᠳᠠᠮ ᠲᠠᠯᠠ ᠶ᠋ᠢ ᠲᠤᠭᠤᠯᠵᠤ
ᠬᠦᠢᠲᠡᠨ ᠣᠷᠣᠨ ᠳ᠋ᠤ᠌ ᠲᠤᠯᠵᠤ
ᠮᠥᠰᠥᠨ ᠠᠭᠤᠯᠠ ᠶ᠋ᠢ ᠬᠡᠰᠦᠵᠦ
ᠴᠠᠭ ᠢ᠋ ᠰᠢᠬᠠᠵᠤ
ᠡᠳᠦᠷ ᠢ᠋ ᠤᠭᠲᠤᠷᠭᠠᠨ
ᠵᠢᠯ ᠢ᠋ ᠰᠠᠷᠠ ᠪᠠᠷ ᠳᠠᠪᠬᠢᠵᠤ
ᠰᠠᠷᠠ ᠶ᠋ᠢ ᠡᠳᠦᠷ ᠢ᠋ᠶ᠋ᠡᠷ ᠲᠣᠪᠴᠢᠯᠠᠵᠤ
ᠡᠳᠦᠷ ᠢ᠋ ᠴᠠᠭ ᠢ᠋ᠶ᠋ᠠᠷ ᠨᠤᠭᠤᠯᠵᠤ
ᠴᠠᠭ ᠢ᠋ ᠮᠥᠴᠡ ᠪᠡᠷ ᠬᠤᠷᠢᠶᠠᠵᠤ
ᠢᠷᠣᠭᠠᠷ ᠦᠭᠡᠢ ᠳᠠᠯᠠᠢ
ᠶᠣᠨᠳᠣᠷ ᠤ᠋ᠨ ᠭᠤᠷᠪᠠᠨ ᠮᠣᠳᠣᠨ ᠤ᠋
ᠪᠤᠷᠵᠢᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠪᠤᠵᠠᠷ ᠨᠤᠲᠤᠭ ᠲᠤᠨᠢ ᠬᠦᠷᠴᠦ
ᠳᠥᠷᠥᠭᠡ ᠴᠣᠬᠢᠨ ᠬᠠᠩᠭᠢᠨᠠᠭᠤᠯᠵᠤ
ᠳᠥᠷᠪᠡᠨ ᠵᠦᠭ ᠠᠵᠢᠭᠯᠠᠨ ᠶᠠᠪᠤᠬᠤ ᠳ᠋ᠤ᠌
ᠡᠪᠦᠭᠡᠨ ᠬᠥᠭᠰᠢᠨ ᠬᠣᠶᠠᠷ
ᠴᠥᠭᠡᠨ ᠲᠣᠭᠠ ᠲᠠᠢ ᠬᠣᠨᠢ ᠬᠥᠭᠡᠭᠡᠵᠦ
ᠡᠮᠦᠰᠴᠦ ᠡᠳ᠋ᠯᠡᠭᠰᠡᠨ ᠬᠤᠪᠴᠠᠰᠤ ᠨᠢ
ᠤᠨᠵᠢᠢᠨ ᠨᠡᠪᠲᠡᠷᠡᠨ ᠤᠷᠠᠭᠳᠠᠵᠤ
ᠲᠠᠪᠤᠨ ᠬᠠᠭᠠᠨ ᠤ᠋ ᠤᠬᠤᠨᠠ ᠰᠢᠭ᠋
ᠲᠠᠮᠢᠷᠳᠠᠨ ᠮᠠᠢᠭᠠᠵᠤ ᠶᠠᠪᠤᠨᠠ᠃
ᠣᠢᠷᠠ ᠣᠴᠢᠵᠤ ᠦᠵᠡᠭᠰᠡᠨ ᠳ᠋ᠦ᠍
ᠥᠭᠡᠷᠡ ᠬᠥᠮᠦᠨ ᠪᠢᠰᠢ
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠪᠡᠶᠡ
ᠬᠠᠯᠭᠤ ᠦᠭᠡᠢ ᠮᠥᠨ ᠭᠡᠨᠡ᠃
ᠡᠴᠢᠭᠡ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠵᠤ
ᠬᠦᠵᠦᠭᠦᠦ ᠶ᠋ᠢ ᠨᠢ ᠲᠡᠪᠡᠷᠢᠨ ᠤᠬᠢᠯᠠᠵᠤ᠂
ᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠯᠴᠡᠵᠦ
ᠥᠰᠢᠶᠡ ᠠᠪᠬᠤ ᠪᠠᠨ ᠵᠥᠪᠳᠡᠪᠡ᠃
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠬᠡᠯᠡᠭᠰᠡᠨ ᠨᠢ
《ᠬᠠᠷᠠ ᠠᠲᠤᠭᠠᠷ ᠮᠠᠩᠭᠤᠰ ᠪᠣᠯ
ᠬᠠᠯᠳᠠᠰᠢ ᠦᠭᠡᠢ ᠠᠷᠪᠢᠨ ᠰᠦᠨᠡᠰᠦ ᠲᠡᠢ
ᠬᠣᠶᠠᠷ ᠰᠦᠨᠡᠰᠦ ᠨᠢ ᠪᠡᠶᠡ ᠳ᠋ᠡᠭᠡᠨ ᠪᠠᠢᠵᠤ
ᠬᠣᠴᠣᠷᠤᠭᠰᠠᠨ ᠪᠦᠬᠦᠨ ᠨᠢ ᠨᠠᠢ᠍ᠮᠠᠨ ᠵᠦᠭ ᠲᠦ᠍ ᠪᠠᠢᠳᠠᠭ᠃
ᠡᠳᠡᠭᠡᠷ ᠢ᠋ ᠣᠯᠵᠤ ᠰᠠᠷᠨᠢᠭᠤᠯᠬᠤ ᠦᠭᠡᠢ ᠪᠣᠯ
ᠡᠭᠦᠷᠢᠳᠡ ᠳᠡᠢᠯᠦᠨᠡ ᠭᠡᠵᠦ ᠪᠦᠦ ᠰᠠᠨᠠ》 ᠭᠡᠰᠡᠨ ᠳ᠋ᠦ᠍᠃
ᠰᠢᠷᠡᠭᠡᠲᠦ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠳᠦ ᠪᠡᠨ ᠵᠠᠭᠤᠵᠤ
ᠡᠴᠢᠭᠡ ᠳ᠋ᠡᠭᠡᠨ ᠡᠷᠭᠢᠭᠦᠯᠵᠦ ᠬᠡᠯᠡᠭᠰᠡᠨ ᠨᠢ᠄
《ᠡᠭᠡᠵᠦ ᠪᠤᠴᠠᠵᠤ ᠬᠠᠷᠢᠭᠠᠳ
ᠡᠬᠡ ᠳ᠋ᠦ᠍ ᠮᠢᠨᠢ ᠬᠡᠯᠡᠭᠡᠳ
ᠡᠨᠡ ᠣᠷᠣᠢ ᠤᠨᠲᠠᠬᠤ ᠳ᠋ᠠᠭᠠᠨ
ᠮᠠᠩᠭᠤᠰ ᠤ᠋ᠨ ᠡᠷᠦᠬᠡ ᠶ᠋ᠢ ᠳᠠᠷᠤᠬᠤ ᠳ᠋ᠤ᠌
ᠮᠠᠩᠰᠢᠭᠤᠷᠠᠭᠤᠯᠤᠨ ᠶᠠᠭᠤᠮᠠ ᠪᠤᠳᠤᠭᠤᠯᠬᠤ ᠪᠠᠷ᠄
《ᠮᠠᠷᠭᠠᠰᠢ ᠥᠷᠯᠥᠭᠡ ᠶ᠋ᠢᠨ ᠦᠶᠡ ᠪᠡᠷ
ᠮᠠᠩᠭᠤᠰ ᠤ᠋ᠨ ᠨᠠᠷᠠᠨ ᠵᠡᠭᠦᠨ ᠬᠣᠢᠲᠤ ᠠ᠋ᠴᠠ
ᠮᠠᠨ ᠤ᠋ ᠨᠠᠷᠠᠨ ᠵᠡᠭᠦᠨ ᠡᠮᠦᠨᠡ ᠡᠴᠡ》 ᠭᠡᠵᠦ ᠬᠡᠯᠡᠪᠡᠯ
《ᠶᠠᠷᠵᠢᠭᠠᠷ ᠬᠠᠷᠠ ᠮᠠᠩᠭᠤᠰ
ᠶᠠᠮᠠᠷ ᠤᠬᠠᠭᠠᠨᠲᠠᠢ ᠦᠭᠡ ᠪᠣᠢ? ᠭᠡᠵᠦ
ᠶᠠᠳᠠᠷᠠᠲᠠᠯᠠ ᠲᠡᠷᠡ ᠪᠣᠳᠣᠭᠠᠳ
ᠶᠠᠷᠰᠢᠭᠲᠠᠢ ᠮᠠᠭᠤ ᠵᠡᠭᠦᠳᠦᠯᠡᠵᠦ ᠤᠨᠲᠠᠬᠤ ᠶᠤᠮ》 ᠭᠡᠳ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠪᠠᠨ ᠭᠤᠶᠠᠳᠠᠵᠤ
ᠬᠣᠯᠠ ᠵᠠᠢᠯᠠᠨᠠ ᠶᠠᠪᠤᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠠᠭᠠᠨ ᠬᠦᠦ ᠶᠠᠪᠤᠵᠤ
ᠡᠮᠦᠨᠡ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠳ᠋ᠦ᠍
ᠮᠠᠩᠭᠤᠰ ᠤ᠋ᠨ ᠨᠢᠭᠡᠳᠦᠭᠡᠷ ᠰᠦᠨᠡᠰᠦ ᠨᠢ
ᠲᠡᠮᠡᠭᠡ ᠴᠢᠨᠡᠭᠡᠨ ᠲᠣᠮᠣ ᠠᠭᠠᠯᠵᠢ
ᠲᠩᠷᠢ ᠲᠤᠯᠤᠮᠠ ᠦᠰᠦᠷᠴᠦ
ᠲᠡᠮᠦᠷ ᠬᠥᠯ ᠢ᠋ᠶ᠋ᠡᠨ ᠰᠠᠷᠪᠠᠢᠯᠭᠠᠨ ᠢᠷᠡᠬᠦ ᠳ᠋ᠦ᠍
ᠪᠣᠯᠣᠳ ᠨᠤᠮᠤ ᠪᠠᠨ ᠠᠪᠴᠤ
ᠪᠤᠯᠤ ᠪᠣᠯᠲᠠᠯᠠ ᠳᠡᠯᠢᠵᠦ ᠲᠠᠯᠪᠢᠭᠰᠠᠨ ᠳ᠋ᠤ᠌
ᠲᠡᠮᠡᠭᠡᠨ ᠠᠭᠠᠯᠵᠢ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍ ᠨᠢ
ᠲᠠᠰᠤ ᠨᠡᠪᠲᠡᠯᠵᠦ ᠣᠷᠣᠭᠰᠠᠨ ᠳ᠋ᠤ᠌᠂
ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠦ᠋ᠨ
ᠭᠠᠯᠵᠠᠭᠤ ᠬᠠᠷᠠ ᠤᠬᠤᠨᠠ ᠨᠢ
ᠭᠠᠩ ᠡᠪᠡᠷ ᠢ᠋ᠶ᠋ᠡᠨ ᠬᠠᠳᠬᠤᠵᠤ
ᠬᠠᠳᠠ ᠮᠥᠷᠭᠥᠨ ᠢᠷᠡᠬᠦ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠵᠢᠷ ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠪᠡᠨ ᠰᠤᠭᠤ ᠲᠠᠲᠠᠵᠤ
ᠰᠡᠢᠯᠪᠦᠷᠢ ᠭᠠᠷᠲᠠᠯᠠ ᠴᠠᠪᠴᠢᠭᠠᠳ
ᠪᠠᠷᠠᠭᠤᠨ ᠵᠦᠭ ᠲᠦ᠍ ᠶᠠᠪᠤᠭᠰᠠᠨ ᠳ᠋ᠤ᠌
ᠪᠠᠷᠰ ᠲᠣᠭᠯᠠᠨ ᠬᠠᠷᠠᠢᠯᠠᠵᠤ
ᠠᠭᠵᠠᠰ ᠭᠡᠵᠦ ᠨᠣᠴᠣᠯᠳᠤᠨ ᠢᠷᠡᠭᠡᠳ
ᠠᠯᠲᠠᠨ ᠢᠯᠳᠦᠨ ᠳ᠋ᠦ᠍ᠨᠢ ᠴᠠᠪᠴᠢᠭᠳᠠᠵᠤ
ᠠᠩᠭᠢ ᠬᠤᠪᠢᠶᠠᠷᠠᠨ ᠤᠨᠠᠪᠠ᠃
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍ ᠨᠢ
ᠭᠠᠯᠵᠠᠭᠤ ᠬᠤᠴᠠ ᠲᠣᠰᠴᠤ
ᠭᠠᠳᠠᠮᠠ ᠬᠠᠳᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ
ᠭᠠᠳᠠᠨ ᠪᠠᠭᠤᠵᠤ ᠢᠷᠡᠬᠦ ᠳ᠋ᠦ᠍᠂
ᠬᠥᠯ ᠨᠢ ᠭᠠᠵᠠᠷ ᠲᠤᠰᠬᠤ ᠠ᠋ᠴᠠ ᠡᠮᠦᠨᠡ
ᠬᠥᠪᠴᠢ ᠶ᠋ᠢᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ
ᠬᠥᠳᠡᠯᠵᠦ ᠲᠡᠷᠡ ᠴᠢᠳᠠᠭᠰᠠᠨ ᠦᠭᠡᠢ
ᠬᠥᠨᠳᠡᠢ ᠴᠡᠭᠡᠵᠢ ᠪᠡᠷ ᠨᠢ ᠨᠡᠪᠲᠡᠷᠡᠪᠡ᠃
ᠬᠣᠢᠲᠤ ᠵᠦᠭ ᠲᠦ᠍ ᠬᠡᠢᠰᠬᠡᠨ ᠣᠴᠢᠭᠰᠠᠨ ᠳ᠋ᠤ᠌
ᠠᠪᠤᠷᠭᠤ ᠪᠦᠳᠦᠭᠦᠨ ᠮᠣᠭᠠᠢ
ᠠᠷᠪᠠᠨ ᠰᠢᠯᠢ ᠶ᠋ᠢᠨ ᠭᠠᠵᠠᠷ ᠢ᠋ ᠣᠷᠢᠶᠠᠵᠤ
ᠠᠮᠢᠲᠠᠨ ᠪᠦᠬᠦᠨ ᠢ᠋ ᠰᠣᠷᠣᠵᠤ
ᠠᠲᠠᠷ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠬᠡᠪᠲᠡᠭᠡᠳ
ᠬᠠᠭᠠᠨ ᠬᠦᠦ ᠶ᠋ᠢᠨ ᠢᠷᠡᠬᠦ ᠶ᠋ᠢ ᠦᠵᠡᠭᠡᠳ
ᠬᠠᠮᠤᠭ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠠᠲᠤᠷᠢᠵᠤ
ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠲᠦᠷᠭᠡᠨ
ᠬᠠᠷᠰᠢᠯᠳᠤᠨ ᠨᠢᠴᠢᠭᠢᠨᠠᠨ ᠢᠷᠡᠬᠦ ᠳ᠋ᠦ᠍᠂
ᠪᠤᠮᠪᠠ ᠪᠠᠨ ᠡᠷᠭᠦᠨ ᠲᠣᠰᠴᠤ
ᠪᠣᠷᠣ ᠲᠣᠯᠣᠭᠠᠢ ᠶ᠋ᠢ ᠨᠢ ᠮᠠᠨᠠᠷᠠᠲᠠᠯᠠ ᠮᠥᠷᠭᠥᠭᠦᠯᠵᠦ
ᠪᠥᠮᠪᠥᠷᠢᠨ ᠤᠷᠪᠠᠨ ᠤᠨᠠᠬᠤ ᠳ᠋ᠤ᠌
ᠪᠤᠰᠢᠭᠤᠬᠠᠨ ᠴᠠᠪᠴᠢᠵᠤ ᠬᠡᠰᠡᠭᠯᠡᠭᠡᠳ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍ ᠣᠴᠢᠭᠰᠠᠨ ᠳ᠋ᠤ᠌
ᠠᠵᠢᠷᠭᠠ ᠰᠦᠨᠡᠰᠦ ᠲᠡᠢ ᠲᠣᠬᠢᠶᠠᠯᠳᠤᠵᠤ
ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠨ ᠬᠤᠷᠤᠢᠯᠠᠵᠤ
ᠳᠥᠷᠪᠡᠨ ᠲᠤᠭᠤᠷᠠᠢ ᠪᠠᠨ ᠴᠠᠪᠴᠢᠯᠠᠬᠤ ᠳ᠋ᠤ᠌
ᠠᠪᠤᠨ ᠬᠠᠷᠪᠤᠨ ᠠᠯᠠᠭᠠᠳ᠂
ᠵᠡᠭᠦᠨ ᠵᠦᠭ ᠲᠦ᠍ ᠣᠴᠢᠭᠰᠠᠨ ᠳ᠋ᠤ᠌
ᠵᠢᠪᠡᠭᠦᠨ ᠰᠠᠯᠬᠢᠨ ᠰᠦᠷᠴᠢᠭᠢᠨᠡᠵᠦ
ᠵᠢᠭᠲᠡᠢ ᠠᠷᠰᠯᠠᠨ ᠦᠰᠦᠷᠦᠨ ᠢᠷᠡᠭᠡᠳ
ᠵᠠᠭᠤᠷᠠᠯᠳᠤᠨ ᠬᠣᠶᠠᠭᠤᠯᠠ ᠭᠠᠵᠠᠷ ᠤᠨᠠᠵᠤ
ᠠᠭᠤᠯᠠᠨ ᠤ᠋ ᠡᠩᠭᠡᠷ ᠡᠴᠡ ᠨᠣᠴᠣᠯᠳᠤᠵᠤ
ᠣᠷᠣᠢ ᠶ᠋ᠢᠨ ᠳᠡᠭᠡᠷᠡ ᠨᠢ ᠭᠠᠷᠲᠠᠯᠠ ᠴᠣᠬᠢᠯᠳᠤᠵᠤ
ᠵᠣᠭᠳᠣᠷ ᠳᠡᠯ ᠡᠴᠡ ᠨᠢ ᠠᠳᠬᠤᠵᠤ
ᠵᠠᠭᠤᠷᠮᠠ ᠪᠠᠬᠠᠨ ᠡᠷᠭᠦᠵᠦ ᠪᠠᠢᠭᠠᠳ
ᠵᠠᠭᠤᠨ ᠠᠯᠲᠠ ᠭᠠᠳᠠᠮᠠ ᠬᠠᠳᠠ ᠤᠷᠤᠭᠤ
ᠵᠠᠶᠠᠭᠠ ᠴᠢᠨᠢ ᠮᠡᠳᠡᠭ ᠭᠡᠵᠦ ᠣᠷᠬᠢᠭᠠᠳ
ᠵᠡᠭᠦᠨ ᠡᠮᠦᠨᠡ ᠣᠴᠢᠭᠰᠠᠨ ᠳ᠋ᠤ᠌
ᠵᠡᠪᠡ ᠶ᠋ᠢᠨ ᠲᠤᠰᠤᠯᠲᠠ ᠮᠡᠳᠡᠭ ᠭᠡᠵᠦ
ᠵᠢᠭᠳᠡᠷᠡᠲᠡᠯᠡ ᠲᠠᠲᠠᠵᠤ ᠬᠠᠷᠪᠤᠭᠠᠳ
ᠪᠤᠷᠤᠭᠤᠯᠠᠨ ᠳᠤᠲᠠᠭᠠᠬᠤ ᠪᠤᠬᠠ ᠶ᠋ᠢ
ᠪᠤᠲᠠᠷᠠᠲᠠᠯᠠ ᠬᠠᠷᠪᠤᠨ ᠠᠯᠠᠭᠠᠳ
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠢᠯ ᠭᠡᠷ ᠲᠦ᠋ᠨᠢ ᠤᠶᠠᠵᠤ
ᠠᠵᠢᠭᠯᠠᠨ ᠰᠠᠷᠠᠪᠴᠢᠯᠠᠵᠤ ᠦᠵᠡᠭᠰᠡᠨ ᠳ᠋ᠦ᠍
ᠲᠡᠮᠦᠷ ᠭᠠᠳᠠᠰᠤᠨ ᠪᠤᠯᠠᠭᠠᠲᠠᠢ
ᠰᠢᠷᠡᠮᠦᠨ ᠥᠷᠭᠡᠰᠦᠨ ᠲᠠᠲᠠᠯᠭᠠ ᠲᠠᠢ
ᠳᠦᠭᠦᠷᠡᠩ ᠶᠡᠬᠡ ᠬᠠᠰᠢᠶᠠᠨ ᠳ᠋ᠠᠭᠠᠨ
ᠲᠦᠮᠡᠨ ᠮᠢᠩᠭᠠᠨ ᠠᠷᠠᠳ ᠢ᠋ ᠬᠣᠷᠢᠵᠤ
ᠡᠳᠦᠷ ᠰᠥᠨᠢ ᠶ᠋ᠢᠨ ᠢᠯᠭᠠᠯ ᠦᠭᠡᠢ
ᠡᠪᠴᠢᠭᠦᠦ ᠬᠡᠮᠬᠡᠷᠡᠲᠡᠯᠡ ᠠᠵᠢᠯᠯᠠᠭᠤᠯᠵᠤ
ᠦᠢᠯᠡ ᠳ᠋ᠡᠭᠡᠨ ᠭᠠᠷᠭᠠᠭᠰᠠᠨ ᠡᠳ᠋ ᠢ᠋ ᠨᠢ
ᠥᠪᠡᠷ ᠦ᠋ᠨ ᠰᠠᠩ ᠳ᠋ᠠᠭᠠᠨ ᠲᠠᠲᠠᠳᠠᠭ
ᠶᠠᠰᠤ ᠶ᠋ᠢ ᠨᠢ ᠬᠤᠭᠤᠷᠠᠲᠠᠯᠠ ᠶᠠᠪᠤᠭᠤᠯᠵᠤ
ᠠᠷᠠᠰᠤ ᠶ᠋ᠢ ᠨᠢ ᠢᠵᠠᠷᠠᠲᠠᠯᠠ ᠭᠤᠶᠠᠳᠠᠵᠤ
ᠮᠠᠨᠠᠷᠠᠭᠤᠯᠤᠨ ᠲᠤᠨᠤᠷᠠᠭᠤᠯᠤᠨ ᠤᠨᠠᠭᠠᠵᠤ
ᠮᠢᠬᠠ ᠴᠢᠰᠤ ᠶ᠋ᠢ ᠨᠢ ᠰᠣᠷᠣᠳᠠᠭ
ᠪᠣᠭᠣᠯ ᠰᠢᠪᠡᠭᠴᠢᠨ ᠢ᠋ᠶ᠋ᠡᠷ ᠲᠠᠬᠠᠷᠳᠠᠵᠤ
ᠪᠣᠰᠤᠭᠠ ᠶ᠋ᠢᠨ ᠠᠶᠠᠭᠠᠴᠢ ᠪᠠᠨ ᠪᠣᠯᠭᠠᠵᠤ
ᠪᠥᠭᠡᠲᠥᠷ ᠪᠣᠯᠲᠠᠯᠠ ᠠᠷᠠᠯᠳᠠᠭᠤᠯᠵᠤ
ᠪᠦᠷᠢᠯᠵᠦ ᠠᠷᠢᠯᠲᠠᠯᠠ ᠮᠥᠯᠵᠢᠳᠡᠭ
ᠡᠢᠮᠦ ᠬᠠᠷᠭᠢᠰ ᠮᠠᠩᠭᠤᠰ ᠲᠤ᠌
ᠡᠰᠢ ᠦᠭᠡᠢ ᠶᠡᠬᠡ ᠠᠭᠤᠷᠯᠠᠵᠤ
ᠲᠡᠷᠰᠯᠡᠭᠦᠦ ᠮᠠᠩᠭᠤᠰ ᠢ᠋ ᠠᠷᠢᠯᠭᠠᠬᠤ ᠦᠭᠡᠢ ᠪᠣᠯ
ᠲᠩᠷᠢ ᠬᠠᠷᠠᠬᠤ ᠦᠭᠡᠢ ᠭᠡᠵᠦ ᠲᠠᠩᠭᠠᠷᠢᠭᠯᠠᠵᠤ
ᠨᠢᠭᠦᠯᠲᠦ ᠮᠠᠭᠤ ᠮᠠᠩᠭᠤᠰ ᠲᠠᠢ
ᠨᠢᠭᠡᠨ ᠨᠠᠷᠠᠨ ᠢ᠋ ᠰᠢᠲᠦᠬᠦ ᠦᠭᠡᠢ ᠭᠡᠵᠦ ᠠᠮᠠᠯᠳᠠᠭᠠᠳ
ᠮᠠᠩᠭᠤᠰ ᠤ᠋ᠨ ᠭᠡᠷ ᠡᠷᠦᠬᠡ ᠳ᠋ᠦ᠍ᠨᠢ
ᠮᠢᠷᠠᠨ ᠭᠡᠲᠡᠵᠦ ᠣᠢᠷᠠᠲᠤᠭᠠᠳ
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠪᠡᠶᠡ ᠨᠢ
ᠬᠠᠯᠠᠰᠢᠷᠠᠲᠠᠯᠠ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃
ᠡᠴᠢᠭᠡ ᠬᠦᠦ ᠲᠡᠢ ᠪᠡᠨ ᠵᠣᠯᠭᠠᠵᠤ
ᠡᠢᠮᠦ ᠲᠡᠢᠮᠦ ᠭᠡᠵᠦ ᠰᠢᠪᠡᠨᠡᠯᠳᠦᠭᠡᠳ
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠬᠥᠮᠦᠨ ᠦ᠌ ᠶᠠᠰᠤ ᠪᠠᠷ ᠬᠦᠷᠢᠶᠡᠯᠡᠵᠦ
ᠬᠡᠦᠬᠡᠳ ᠦ᠋ᠨ ᠶᠠᠰᠤ ᠪᠠᠷ ᠬᠤᠴᠢᠭᠰᠠᠨ
ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠪᠠᠷ ᠭᠠᠳᠠᠷᠯᠠᠵᠤ
ᠭᠠᠷ ᠬᠥᠯ ᠦ᠋ᠨ ᠶᠠᠰᠤ ᠪᠠᠷ ᠳᠣᠲᠣᠷᠯᠠᠭᠰᠠᠨ
ᠬᠣᠣᠷᠠᠲᠤ ᠮᠣᠭᠠᠢ ᠶ᠋ᠢᠨ ᠪᠦᠰᠡᠯᠡᠭᠦᠷ ᠲᠡᠢ
ᠬᠥᠮᠦᠨ ᠦ᠌ ᠠᠷᠠᠰᠤᠨ ᠬᠠᠶᠠᠭᠠᠪᠴᠢ ᠲᠠᠢ
ᠢᠷᠣᠠ ᠲᠠᠲᠠᠭᠰᠠᠨ ᠭᠡᠷ ᠲᠦ᠋ᠨᠢ
ᠢᠷᠣᠠ ᠮᠠᠭᠤ ᠲᠠᠢ ᠰᠠᠭᠤᠷᠢ ᠳ᠋ᠤᠨᠢ ᠣᠢᠷᠠᠳᠴᠤ᠂
ᠰᠠᠷᠠᠪᠴᠢ ᠶ᠋ᠢ ᠨᠢ ᠳᠡᠭᠡᠭᠰᠢ ᠵᠠᠪᠰᠠᠷᠯᠠᠵᠤ
ᠱᠠᠭᠠᠢᠵᠤ ᠳᠣᠲᠣᠭᠰᠢ ᠬᠠᠷᠠᠭᠰᠠᠨ ᠳ᠋ᠤ᠌᠂
ᠠᠶᠤᠩᠭᠠ ᠶ᠋ᠢᠨ ᠨᠢᠷᠭᠡᠯᠲᠡ ᠳ᠋ᠦ᠍ ᠳᠠᠭᠠᠷᠢᠭᠳᠠᠪᠠ ᠭᠡᠵᠦ
ᠠᠶᠤᠯ ᠵᠢᠭᠲᠡᠢ ᠪᠡᠷ ᠵᠡᠭᠦᠳᠦᠯᠡᠵᠦ
ᠠᠶᠤᠨ ᠡᠮᠢᠶᠡᠨ ᠠᠲᠤᠷᠢᠵᠤ
ᠠᠶᠤᠤᠯᠢᠬᠠᠢ ᠪᠠᠨ ᠢᠷᠡᠨ ᠤᠨᠲᠠᠬᠤ ᠳ᠋ᠤ᠌
ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠨᠦᠬᠡᠨ ᠡᠴᠡ ᠨᠢ
ᠬᠠᠷᠠ ᠠᠯᠲᠠᠨ ᠯᠤᠤ ᠰᠦᠯᠵᠢᠵᠦ ᠪᠠᠢᠨᠠ ᠭᠡᠨᠡ᠃
ᠵᠢᠷᠪᠢᠯᠵᠡᠭᠰᠡᠨ ᠬᠣᠶᠠᠷ ᠯᠤᠤ ᠶ᠋ᠢᠨ
ᠵᠡᠷᠭᠡᠴᠡᠬᠦ ᠶ᠋ᠢ ᠲᠠᠭᠠᠷᠠᠭᠤᠯᠵᠤ ᠬᠠᠷᠪᠤᠭᠠᠳ
ᠵᠡᠷᠭᠡ ᠪᠡᠷ ᠨᠢ ᠰᠦᠪᠡᠯᠡᠵᠦ ᠠᠯᠠᠬᠤ ᠳ᠋ᠤ᠌
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ
ᠠᠶᠤᠩᠭᠠ ᠰᠢᠭ᠋ ᠪᠠᠷᠬᠢᠷᠠᠵᠤ
ᠠᠭᠵᠠᠰ ᠭᠡᠵᠦ ᠦᠰᠦᠷᠦᠨ ᠪᠣᠰᠤᠭᠠᠳ
ᠴᠢᠨᠣᠠ ᠶ᠋ᠢᠨ ᠰᠢᠲᠦ ᠲᠡᠢ ᠰᠢᠲᠠᠮ ᠢ᠋ᠶ᠋ᠠᠨ
ᠰᠢᠭᠦᠷᠦᠨ ᠠᠪᠤᠭᠠᠳ ᠵᠠᠨᠴᠢᠭᠰᠠᠨ ᠳ᠋ᠤ᠌
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠳᠠᠮ ᠢ᠋ ᠨᠢ ᠲᠣᠰᠣᠨ ᠴᠠᠪᠴᠢᠵᠤ
ᠳᠣᠣᠷᠠ ᠪᠠᠨ ᠬᠣᠶᠠᠭᠤᠯᠠ ᠲᠤᠯᠤᠯᠳᠤᠵᠤ
ᠳᠣᠯᠣᠭᠠ ᠨᠠᠢ᠍ᠮᠠ ᠵᠥᠷᠢᠯᠳᠦᠨ
ᠡᠷᠭᠢᠵᠦ ᠬᠣᠶᠠᠭᠤᠯᠠ ᠲᠤᠯᠤᠯᠳᠤᠵᠤ
ᠶᠢᠰᠦ ᠠᠷᠪᠠ ᠵᠥᠷᠢᠯᠳᠦᠨ
ᠠᠰ ᠳᠣᠣᠷᠠ ᠪᠠᠨ ᠲᠤᠯᠤᠯᠳᠤᠵᠤ
ᠠᠷᠪᠠ ᠬᠣᠷᠢ ᠵᠥᠷᠢᠯᠳᠦᠨ
ᠬᠤᠷᠳᠤᠨ ᠳᠠᠷᠤᠢ ᠲᠤᠯᠤᠯᠳᠤᠵᠤ
ᠬᠣᠷᠢ ᠭᠤᠴᠢ ᠵᠥᠷᠢᠯᠳᠦᠨ
ᠠᠲᠤᠭᠠᠷ ᠮᠠᠩᠭᠤᠰ ᠠᠭᠤᠷᠯᠠᠨ
ᠠᠭᠤᠯᠠ ᠪᠠᠷ ᠠᠪᠤᠨ ᠴᠢᠯᠠᠭᠤᠳᠠᠵᠤ
ᠬᠠᠭᠠᠨ ᠬᠦᠦ ᠬᠢᠯᠢᠩᠯᠡᠵᠦ
ᠬᠠᠳᠠ ᠪᠠᠷ ᠠᠪᠤᠨ ᠰᠢᠲᠠᠵᠤ
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠶ᠋ᠢ ᠬᠥᠪᠬᠡᠯᠵᠡᠲᠡᠯᠡ
ᠬᠥᠬᠡ ᠳᠠᠯᠠᠢ ᠶ᠋ᠢ ᠴᠠᠯᠭᠢᠭᠤᠯᠵᠤ᠂
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠳᠣᠷᠭᠢᠭᠤᠯᠵᠤ
ᠠᠷᠤ ᠳᠠᠯᠠᠢ ᠶ᠋ᠢ ᠪᠤᠴᠠᠯᠲᠠᠯᠠ
ᠠᠯᠠᠯᠳᠤᠭᠴᠢ ᠨᠢᠭᠡ ᠶ᠋ᠢ ᠪᠣᠳᠣᠬᠤ ᠨᠢ᠄
《ᠠᠪᠤ ᠡᠵᠢ ᠪᠡᠨ ᠬᠠᠮᠠᠭᠠᠯᠠᠵᠤ
ᠠᠷᠠᠳ ᠪᠦᠬᠦᠨ ᠢ᠋ᠶ᠋ᠡᠨ ᠭᠠᠷᠭᠠᠵᠤ
ᠠᠴᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠷᠡᠵᠢᠭᠦᠯᠵᠦ
ᠠᠯᠪᠠᠲᠠᠨ ᠪᠣᠭᠣᠯᠴᠢᠯᠠᠬᠤ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠵᠤ
ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠠᠮᠢᠳᠤᠷᠠᠶᠠ》 ᠭᠡᠳ
ᠠᠷᠭᠠ ᠪᠠᠨ ᠭᠦᠢᠴᠡᠳᠬᠡᠨ ᠬᠦᠴᠦᠯᠡᠵᠦ
《ᠭᠣᠯᠣᠮᠲᠠ ᠪᠠᠨ ᠪᠠᠯᠠᠷᠠᠭᠤᠯᠤᠭᠰᠠᠨ ᠦᠰ ᠢ᠋ᠶ᠋ᠡᠨ
ᠭᠣᠮᠣᠳᠠᠯ ᠦᠭᠡᠢ ᠬᠠᠷᠢᠭᠤᠯᠤᠶᠠ》 ᠭᠡᠵᠦ
ᠠᠯᠠᠬᠤ ᠰᠡᠳᠬᠢᠯ ᠰᠢᠭᠤᠳᠴᠠᠢ᠃
ᠠᠰᠲᠠᠭᠠᠨ ᠨᠢᠭᠡ ᠨᠢ ᠪᠣᠳᠣᠭᠰᠠᠨ ᠨᠢ
《ᠠᠭᠠᠷ ᠤ᠋ᠨ ᠨᠠᠷᠠᠨ ᠢ᠋ ᠠᠳᠬᠤᠵᠤ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠭᠢᠰᠬᠢᠯᠡᠵᠦ
ᠠᠯᠳᠠᠷᠲᠤ ᠪᠠᠭᠠᠲᠤᠷ ᠤ᠋ᠳ ᠢ᠋ ᠰᠥᠨᠥᠭᠡᠵᠦ
ᠠᠭᠤᠳᠠᠮ ᠣᠷᠣᠨ ᠢ᠋ ᠨᠢ ᠡᠵᠡᠯᠡᠵᠦ
ᠠᠷᠠᠳ ᠣᠯᠠᠨ ᠢ᠋ ᠨᠢ ᠠᠯᠪᠠᠳᠠᠵᠤ
ᠠᠮᠢᠲᠠᠨ ᠪᠦᠬᠦᠨ ᠢ᠋ ᠨᠢ ᠳᠠᠷᠤᠯᠠᠶᠠ》 ᠭᠡᠳ
《ᠰᠦᠨᠡᠰᠦ ᠪᠡᠨ ᠠᠯᠠᠭᠳᠠᠭᠰᠠᠨ ᠦᠰ ᠢ᠋ᠶ᠋ᠡᠨ
ᠰᠢᠨᠲᠠᠷᠠᠯ ᠦᠭᠡᠢ ᠠᠪᠤᠶᠠ》 ᠭᠡᠳ
ᠠᠮᠢ ᠪᠠᠨ ᠬᠠᠶᠠᠵᠤ ᠳᠣᠭᠰᠢᠷᠠᠨ
ᠠᠭᠤᠯᠠ ᠬᠠᠳᠠ ᠶ᠋ᠢ ᠨᠤᠷᠠᠲᠠᠯᠠ
ᠠᠭᠤᠳᠠᠮ ᠲᠠᠯᠠ ᠶ᠋ᠢ ᠳᠠᠪᠠᠲᠠᠯᠠ
ᠤᠰᠤ ᠮᠥᠷᠡᠨ ᠢ᠋ ᠣᠷᠭᠢᠯᠲᠠᠯᠠ
ᠣᠢ ᠰᠢᠭᠤᠢ ᠶ᠋ᠢ ᠬᠡᠪᠲᠡᠲᠡᠯᠡ
ᠲᠠᠮᠢᠷ ᠲᠡᠩᠬᠡᠭᠡ ᠪᠡᠨ ᠦᠵᠡᠯᠴᠡᠨ
ᠳᠡᠰ ᠨᠢᠰ ᠵᠣᠳᠣᠯᠴᠠᠨ
ᠡᠷᠡ ᠬᠦᠴᠦ ᠪᠡᠨ ᠦᠵᠡᠯᠴᠡᠨ
ᠡᠷᠭᠢ ᠶᠡᠭᠦᠷᠡᠲᠡᠯᠡ ᠵᠠᠨᠴᠢᠯᠳᠤᠨ
ᠭᠠᠩ ᠵᠡᠪᠰᠡᠭ ᠨᠢ ᠮᠥᠷᠭᠥᠯᠳᠦᠨ
ᠭᠠᠯ ᠤ᠋ᠨ ᠨᠣᠷᠮᠠ ᠨᠢ ᠪᠤᠲᠠᠷᠠᠨ
ᠬᠠᠷᠪᠤᠭᠰᠠᠨ ᠰᠤᠮᠤ ᠨᠢ ᠬᠢᠮᠤᠷᠠᠯᠳᠤᠨ
ᠬᠠᠭᠠ ᠨᠢᠴᠠ ᠣᠴᠢᠵᠤ
ᠬᠥᠲᠥ ᠵᠥᠷᠢᠨ ᠭᠠᠷᠴᠤ
ᠬᠥᠷᠪᠡᠨ ᠳᠠᠬᠢᠨ ᠣᠷᠣᠵᠤ
ᠬᠡᠯᠲᠡ ᠵᠥᠷᠢᠨ ᠭᠠᠷᠴᠤ᠂
ᠬᠡᠯᠪᠡᠷᠢᠨ ᠳᠠᠬᠢᠨ ᠣᠷᠣᠵᠤ
ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ
ᠬᠠᠷᠠᠭᠠ ᠶ᠋ᠢ ᠨᠢ ᠦᠵᠡᠨ ᠲᠤᠯᠤᠯᠴᠠᠵᠤ
ᠰᠠᠷᠠᠭᠤᠯ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ
ᠰᠡᠭᠦᠳᠡᠷ ᠢ᠋ ᠨᠢ ᠦᠵᠡᠨ ᠪᠠᠢᠯᠳᠤᠵᠤ
ᠠᠯᠠᠶᠠ ᠭᠡᠰᠡᠨ ᠰᠡᠳᠬᠢᠯ ᠨᠢ
ᠠᠭᠠᠷ ᠢ᠋ ᠲᠤᠯᠤᠨ ᠪᠠᠳᠠᠷᠠᠵᠤ
ᠠᠶᠤᠩᠭᠠ ᠮᠡᠲᠦ ᠳᠠᠭᠤᠨ ᠨᠢ
ᠠᠷᠪᠠᠨ ᠰᠢᠯᠢ ᠶ᠋ᠢ ᠪᠦᠷᠬᠦᠵᠦ
ᠵᠠᠨᠤᠯᠲᠤ ᠰᠡᠳᠬᠢᠯ ᠨᠢ ᠪᠠᠳᠠᠷᠠᠵᠤ
ᠵᠠᠪᠠᠯ ᠠᠯᠠᠶᠠ ᠭᠡᠵᠦ ᠪᠣᠳᠣᠭᠠᠳ
ᠵᠢᠭᠠᠵᠤ ᠢᠷᠡᠬᠦ ᠵᠡᠪᠰᠡᠭ ᠦ᠋ᠳ ᠨᠢ
ᠵᠢᠬᠡᠭᠦᠨ ᠰᠠᠯᠬᠢᠨ ᠲᠠᠲᠠᠵᠤ
ᠰᠢᠲᠦ ᠪᠡᠨ ᠬᠠᠪᠢᠷᠤᠭᠰᠠᠨ ᠰᠡᠳᠬᠢᠯ ᠨᠢ
ᠰᠢᠷᠦᠭᠦᠨ ᠠᠶᠤᠮᠠᠷ ᠪᠣᠯᠵᠤ
ᠰᠢᠷᠦᠭᠦᠨ ᠢᠷᠡᠬᠦ ᠵᠡᠪᠰᠡᠭ ᠨᠢ
ᠰᠢᠷᠦᠭᠦᠨ ᠰᠠᠯᠬᠢᠨ ᠳᠡᠭᠳᠡᠵᠦ
ᠳᠠᠬᠢᠨ ᠳᠠᠬᠢᠨ ᠲᠤᠯᠤᠯᠳᠤᠵᠤ
ᠲᠠᠪᠤᠨ ᠡᠳᠦᠷ ᠪᠣᠯᠵᠤ
ᠵᠠᠭᠤᠷᠠᠯᠳᠤᠨ ᠵᠠᠭᠤᠷᠠᠯᠳᠤᠨ ᠨᠣᠴᠣᠯᠳᠤᠵᠤ
ᠵᠢᠷᠭᠤᠭᠠᠨ ᠡᠳᠦᠷ ᠪᠣᠯᠤᠭᠰᠠᠨ ᠳ᠋ᠤ᠌
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠤᠭᠠ ᠬᠦᠴᠦ ᠨᠢ ᠪᠠᠭᠤᠷᠠᠵᠤ
ᠠᠳᠬᠤᠭᠰᠠᠨ ᠵᠡᠪᠰᠡᠭ ᠨᠢ ᠬᠦᠨᠳᠦᠷᠡᠵᠦ
ᠠᠷᠤ ᠶ᠋ᠢᠨ ᠬᠥᠯᠥᠰᠥ ᠨᠢ ᠭᠣᠭᠣᠵᠢᠭᠠᠳ
ᠬᠠᠯᠠᠰᠢᠷᠠᠵᠤ ᠳᠣᠲᠣᠷᠠ ᠨᠢ ᠪᠥᠭᠯᠡᠷᠡᠵᠦ
ᠬᠠᠷᠠᠯᠠᠵᠤ ᠳᠣᠲᠣᠷᠠ ᠨᠢ ᠮᠠᠨᠠᠷᠠᠵᠤ
ᠬᠠᠷᠢᠭᠤᠯᠤᠨ ᠵᠣᠳᠣᠬᠤ ᠶ᠋ᠢ ᠬᠡᠯᠡᠬᠦ ᠦᠭᠡᠢ
ᠬᠠᠯᠬᠠᠯᠠᠬᠤ ᠵᠠᠢ ᠴᠤ᠌ ᠣᠯᠳᠠᠬᠤ ᠦᠭᠡᠢ
ᠴᠠᠪᠴᠢᠵᠤ ᠪᠠᠭᠤᠬᠤ ᠢᠯᠳᠦ ᠨᠢ
ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠰᠢᠭ ᠭᠢᠯᠪᠠᠯᠵᠠᠵᠤ
ᠴᠠᠰᠤ ᠯᠠᠪᠰᠠᠨ ᠪᠠᠭᠤᠬᠤ ᠰᠢᠭ᠋
ᠴᠠᠭᠠᠨᠠ ᠨᠠᠭᠠᠨᠠ ᠨᠢ ᠲᠣᠰᠴᠤ
ᠮᠥᠯᠢᠢᠭᠰᠡᠨ ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠨᠢ
ᠮᠤᠩᠬᠠᠭ ᠮᠠᠩᠭᠤᠰ ᠤ᠋ᠨ ᠲᠣᠯᠣᠭᠠᠢ ᠤᠷᠤᠭᠤ
ᠮᠥᠨᠳᠥᠷ ᠣᠷᠣᠬᠤ ᠰᠢᠭ᠋ ᠪᠠᠭᠤᠵᠤ
ᠮᠤᠯᠲᠤ ᠮᠤᠯᠲᠤ ᠴᠠᠪᠴᠢᠭᠰᠠᠨ ᠳ᠋ᠤ᠌
ᠮᠢᠬᠠ ᠤᠨᠠᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠮᠠᠩᠭᠤᠰ ᠪᠣᠰᠤᠨ ᠭᠠᠷᠴᠤ
ᠮᠠᠨᠴᠤᠷᠭᠠ ᠪᠠᠨ ᠰᠢᠭᠦᠷᠡᠨ ᠭᠦᠶᠦᠭᠡᠳ
ᠮᠢᠬᠠ ᠢᠳᠡᠶᠡ ᠭᠡᠵᠦ ᠪᠠᠷᠬᠢᠷᠠᠵᠠᠢ᠃
ᠴᠢᠰᠤ ᠲᠤᠰᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠰᠢᠮᠨᠤᠰ ᠪᠣᠰᠤᠨ ᠭᠠᠷᠴᠤ
ᠰᠢᠳᠠᠮ ᠢ᠋ᠶ᠋ᠠᠨ ᠰᠢᠭᠦᠷᠡᠨ ᠭᠦᠶᠦᠭᠡᠳ
ᠴᠢᠰᠤ ᠤᠤᠭᠤᠶᠠ ᠭᠡᠵᠦ ᠪᠠᠷᠬᠢᠷᠠᠵᠠᠢ ᠃
ᠣᠯᠠᠨ ᠮᠠᠩᠭᠤᠰ ᠦᠢᠮᠡᠯᠳᠦᠨ
ᠣᠴᠢᠬᠤ ᠵᠠᠮ ᠢ᠋ ᠨᠢ ᠬᠠᠭᠠᠭᠠᠵᠤ᠂
ᠠᠷᠪᠢᠨ ᠰᠢᠮᠨᠤᠰ ᠠᠷᠵᠠᠢᠵᠤ
ᠠᠯᠬᠤᠬᠤ ᠵᠠᠮ ᠢ᠋ ᠨᠢ ᠬᠠᠭᠠᠭᠠᠵᠤ᠂
ᠡᠷᠭᠢᠨ ᠲᠣᠭᠣᠷᠢᠨ ᠡᠷᠪᠡᠢᠵᠦ
ᠡᠷᠭᠢᠬᠦ ᠵᠠᠮ ᠢ᠋ ᠨᠢ ᠬᠠᠭᠠᠭᠠᠵᠤ᠂
ᠪᠤᠭ ᠴᠢᠳᠬᠥᠷ ᠨᠢ ᠪᠣᠰᠴᠤ
ᠪᠤᠴᠠᠬᠤ ᠵᠠᠮ ᠢ᠋ ᠨᠢ ᠬᠠᠯᠬᠠᠯᠠᠵᠤ᠂
ᠪᠤᠭᠤᠷᠤᠯ ᠰᠠᠭᠠᠷᠠᠯ ᠢ᠋ᠶ᠋ᠠᠷ ᠪᠠᠷᠬᠢᠷᠠᠵᠤ
ᠪᠤᠰᠢᠭᠤᠬᠠᠨ ᠵᠠᠪᠳᠤᠵᠤ ᠢᠷᠡᠨᠡ᠃
ᠵᠦᠭ ᠵᠦᠭ ᠡᠴᠡ ᠨᠢ ᠮᠠᠨᠴᠤᠷᠭᠠᠳᠠᠵᠤ
ᠵᠣᠭᠰᠣᠭᠠᠬᠤ ᠴᠢᠯᠥᠭᠡ ᠣᠯᠭᠣᠬᠤ ᠦᠭᠡᠢ᠂
ᠵᠣᠪᠬᠢᠰ ᠵᠣᠪᠬᠢᠰ ᠠ᠋ᠴᠠ ᠨᠢ ᠰᠢᠳᠠᠮᠳᠠᠵᠤ
ᠵᠠᠢᠯᠠᠬᠤ ᠵᠠᠪᠰᠢᠶᠠᠨ ᠣᠯᠭᠣᠬᠤ ᠦᠭᠡᠢ
ᠭᠤᠯᠭᠤᠨ ᠨᠢᠭᠤᠵᠤ ᠣᠢᠷᠠᠲᠤᠨ
ᠬᠣᠢᠨᠠ ᠠ᠋ᠴᠠ ᠨᠢ ᠭᠡᠲᠡᠵᠦ ᠢᠷᠡᠨ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ ᠶ᠋ᠢ
ᠰᠢᠳᠠᠮᠳᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠭᠰᠠᠨ ᠳ᠋ᠤ᠌
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ
ᠠᠮᠠ ᠪᠠᠨ ᠠᠩᠭᠠᠢᠨ ᠪᠠᠶᠠᠷᠯᠠᠵᠤ
ᠠᠮᠢᠳᠤ ᠮᠢᠬᠠ ᠢᠳᠡᠶᠡ ᠭᠡᠵᠦ
ᠠᠷᠪᠠᠢᠨ ᠰᠡᠷᠪᠡᠢᠨ ᠢᠷᠡᠭᠰᠡᠨ ᠳ᠋ᠦ᠍
ᠭᠡᠨᠡᠳᠲᠡ ᠭᠦᠶᠦᠨ ᠪᠣᠰᠴᠤ
ᠭᠡᠳᠡᠰᠦ ᠳᠡᠭᠡᠷᠡ ᠨᠢ ᠣᠨᠢᠯᠠᠵᠤ
ᠭᠡᠳᠡᠷᠭᠡᠨ ᠣᠢᠴᠢᠲᠠᠯᠠ ᠢᠰᠬᠦᠯᠵᠦ
ᠭᠡᠵᠢᠭᠡᠨ ᠡᠴᠡ ᠨᠢ ᠬᠣᠷᠢᠶᠠᠨ ᠪᠠᠷᠢᠭᠰᠠᠨ ᠳ᠋ᠤ᠌
ᠦᠮᠡᠬᠡᠢ ᠮᠠᠭᠤ ᠮᠠᠩᠭᠤᠰ
ᠢᠩᠭᠢᠵᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠡᠳ
ᠡᠷᠢᠶᠡᠨ ᠪᠠᠷᠢᠶᠠᠨ ᠪᠠᠷᠬᠢᠷᠠᠵᠤ
ᠡᠷᠭᠢᠨ ᠳᠠᠬᠢᠵᠤ ᠪᠣᠰᠤᠶᠠ ᠭᠡᠲᠡᠯᠡ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠯᠢᠨ ᠬᠦᠵᠦᠭᠦᠦ ᠳᠡᠭᠡᠷᠡ ᠨᠢ ᠭᠢᠰᠬᠢᠵᠦ
ᠰᠢᠷᠡᠮᠦᠨ ᠪᠣᠯᠣᠳ ᠨᠢᠳᠤᠷᠭᠠ ᠪᠠᠷ
ᠰᠢᠯᠵᠢᠯ ᠦᠭᠡᠢ ᠴᠣᠬᠢᠭᠰᠠᠨ ᠳ᠋ᠤ᠌
ᠬᠥᠬᠡ ᠨᠢᠳᠦ ᠨᠢ ᠡᠷᠢᠶᠡᠯᠵᠢᠵᠦ
ᠬᠦᠷᠡᠩ ᠬᠡᠯᠡ ᠨᠢ ᠤᠨᠵᠢᠢᠵᠤ᠂
ᠬᠦᠴᠦ ᠲᠠᠮᠢᠷ ᠨᠢ ᠰᠠᠷᠨᠢᠵᠤ
ᠬᠥᠳᠡᠭᠡ ᠲᠡᠰᠢ ᠬᠠᠨᠳᠤᠨ ᠬᠡᠪᠲᠡᠭᠡᠳ᠂
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ ᠳ᠋ᠦ᠍
ᠰᠢᠯᠵᠢᠯ ᠦᠭᠡᠢ ᠮᠥᠷᠭᠥᠵᠦ
ᠰᠢᠵᠢᠮ ᠲᠡᠳᠦᠢ ᠠᠮᠢ ᠪᠠᠨ
ᠰᠢᠪᠬᠤᠲᠠᠯᠠ ᠭᠤᠶᠤᠵᠤ ᠪᠠᠢᠬᠤ ᠨᠢ᠄
《ᠠᠯᠢᠪᠠ ᠬᠥᠷᠥᠩᠭᠡ ᠪᠡᠨ ᠥᠭᠭᠦᠶᠡ ᠪᠢ᠂
ᠠᠯᠲᠠ ᠮᠥᠩᠭᠥ ᠪᠡᠨ ᠪᠠᠷᠢᠶᠠ ᠪᠢ᠂
ᠠᠯᠪᠠᠲᠤ ᠪᠣᠭᠣᠯ ᠴᠢᠨᠢ ᠪᠣᠯᠤᠶᠠ ᠪᠢ᠂
ᠠᠭᠲᠠ ᠶ᠋ᠢᠨ ᠬᠥᠲᠥᠴᠢ ᠪᠡᠷ ᠴᠢᠨᠢ ᠶᠠᠪᠤᠶᠠ ᠪᠢ᠂
ᠲᠠᠰᠢᠭᠤᠷ ᠢ᠋ ᠴᠢᠨᠢ ᠡᠷᠭᠦᠵᠦ
ᠳᠥᠷᠥᠭᠡ ᠶ᠋ᠢ ᠴᠢᠨᠢ ᠲᠦᠰᠢᠵᠦ
ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠳᠠᠷᠤᠵᠤ
ᠬᠠᠮᠤᠭ ᠬᠦᠴᠦ ᠪᠡᠨ ᠡᠷᠭᠦᠶᠡ᠂
ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠᠪᠠᠯ
ᠠᠮᠢᠳᠤ ᠪᠤᠷᠬᠠᠨ ᠰᠢᠭ᠋ ᠰᠢᠲᠦᠶᠡ᠂
ᠠᠯᠠᠬᠤ ᠪᠠᠨ ᠵᠣᠭᠰᠣᠵᠤ ᠨᠠᠮᠠᠶ᠋ᠢ
ᠠᠭᠤᠴᠢᠯᠠᠨ ᠦᠷᠦᠰᠢᠶᠡ》 ᠭᠡᠰᠡᠨ ᠳ᠋ᠦ᠍
ᠮᠠᠩᠭᠤᠰ ᠤ᠋ᠨ ᠶᠠᠯᠠ ᠶ᠋ᠢ ᠨᠢ ᠲᠣᠭᠠᠴᠢᠵᠤ
ᠮᠠᠭᠤ ᠲᠡᠦᠬᠡ ᠶ᠋ᠢ ᠨᠢ ᠶᠠᠷᠢᠵᠤ
ᠣᠯᠠᠨ ᠤ᠋ ᠦᠰ ᠢ᠋ ᠠᠪᠬᠤ ᠳ᠋ᠤ᠌
ᠣᠭᠲᠣ ᠴᠢᠮᠠᠶ᠋ᠢ ᠥᠷᠥᠰᠢᠶᠡᠬᠦ ᠦᠭᠡᠢ
ᠴᠢᠨᠦ ᠭᠠᠷ ᠲᠤ᠌ ᠦᠬᠦᠭᠰᠡᠨ
ᠰᠢᠳᠤᠷᠭᠤ ᠠᠷᠠᠳ ᠤ᠋ᠨ ᠲᠥᠯᠥᠭᠡ ᠭᠡᠵᠦ
ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠪᠡᠨ ᠳᠠᠯᠠᠢᠵᠤ
ᠡᠷᠭᠢᠭᠦᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠠᠰᠤ ᠴᠠᠪᠴᠢᠭᠠᠳ
ᠲᠡᠮᠦᠷ ᠬᠡᠷᠡᠮ ᠢ᠋ ᠨᠢ ᠡᠪᠳᠡᠵᠦ
ᠲᠦᠪᠡᠭᠳᠡᠭᠰᠡᠨ ᠣᠯᠠᠨ ᠢ᠋ᠶ᠋ᠠᠨ ᠲᠠᠯᠪᠢᠵᠤ
ᠠᠪᠤ ᠡᠵᠢ ᠪᠡᠨ ᠠᠪᠤᠭᠠᠳ
ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ
ᠠᠴᠢᠶᠠ ᠬᠥᠰᠬᠡ ᠪᠡᠨ ᠵᠠᠰᠠᠵᠤ
ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠮᠣᠷᠳᠠᠬᠤ ᠳ᠋ᠠᠭᠠᠨ
ᠮᠠᠩᠭᠤᠰ ᠤ᠋ᠨ ᠨᠢᠭᠦᠯᠲᠦ ᠦᠬᠦᠳᠡᠯ ᠢ᠋
ᠮᠠᠭᠤ ᠬᠠᠷᠰᠢ ᠣᠷᠳᠣᠨ ᠲᠠᠢ ᠨᠢ
ᠵᠢᠩᠰᠡᠷᠭᠡᠯᠡᠨ ᠭᠠᠯ ᠲᠠᠯᠪᠢᠵᠤ
ᠵᠡᠭᠦᠨ ᠡᠮᠦᠨᠡ ᠲᠢᠪ ᠲᠡᠭᠡᠨ ᠢᠷᠡᠭᠰᠡᠨ ᠳ᠋ᠦ᠍
ᠬᠢᠯᠠᠭᠤᠨ ᠮᠡᠷᠭᠡᠨ ᠠᠪᠠᠭᠠᠢ ᠨᠢ
ᠬᠡᠵᠢᠶᠡᠨᠡᠢ ᠬᠦᠷᠴᠦ ᠢᠷᠡᠭᠡᠳ
ᠬᠡᠷᠡᠮ ᠬᠠᠰᠢᠶᠠ ᠪᠠᠨ ᠵᠠᠰᠠᠵᠤ
ᠬᠡᠪ ᠳᠦᠷᠢ ᠪᠡᠷ ᠪᠣᠯᠭᠠᠵᠠᠢ ᠃
ᠬᠠᠷᠢᠵᠤ ᠢᠷᠡᠭᠰᠡᠨ ᠤᠯᠤᠰ ᠲᠠᠢ
ᠬᠠᠷᠢᠯᠴᠠᠨ ᠦᠨᠦᠰᠦᠨ ᠲᠡᠪᠡᠷᠢᠯᠳᠦᠵᠦ
ᠬᠠᠯᠠᠭᠤᠨ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠵᠤ
ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠯᠳᠤᠨ
ᠬᠠᠭᠠᠨ ᠲᠡᠭᠦᠰ ᠠᠪᠤ᠂ ᠬᠠᠲᠤᠨ ᠡᠵᠢ ᠳ᠋ᠡᠭᠡᠨ
ᠬᠠᠷᠢ ᠳ᠋ᠤ᠌ ᠢᠷᠡᠭᠰᠡᠨ ᠪᠡᠷᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠬᠢᠵᠦ
ᠬᠠᠷᠢᠶᠠᠲᠤ ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ
ᠬᠠᠮᠲᠤᠷᠠᠭᠰᠠᠨ ᠶᠡᠬᠡ ᠪᠠᠶᠠᠷ ᠬᠢᠵᠦ
ᠬᠢᠲᠤᠭᠠ ᠲᠠᠯᠪᠢᠬᠤ ᠦᠭᠡᠢ ᠴᠠᠳᠲᠠᠯᠠ ᠮᠢᠬᠠ ᠢᠳᠡᠵᠦ
ᠬᠤᠨᠳᠠᠭᠠ ᠲᠠᠯᠪᠢᠯ ᠦᠭᠡᠢ ᠬᠠᠨᠲᠠᠯᠠ ᠠᠷᠢᠬᠢ ᠤᠤᠭᠤᠵᠤ
ᠨᠠᠶᠠᠨ ᠡᠳᠦᠷ ᠦ᠋ᠨ ᠨᠠᠢᠷ ᠬᠢᠵᠦ
ᠵᠢᠷᠠᠨ ᠡᠳᠦᠷ ᠦ᠋ᠨ ᠵᠢᠷᠭᠠᠯ ᠬᠢᠵᠦ
ᠠᠯᠳᠠᠷᠲᠤ ᠤᠯᠤᠰ ᠢ᠋ᠶ᠋ᠠᠨ ᠪᠠᠢᠭᠤᠯᠵᠤ
ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠭᠰᠠᠨ ᠭᠡᠨᠡ᠃