ᠴᠢᠮᠠ ᠳ᠋ᠤ᠌ ᠪᠠᠨ ᠤᠩᠰᠢᠬᠤ ᠰᠢᠯᠦᠭ - ᠱᠠᠷᠠᠢᠳ· ᠭᠡᠷᠡᠯЧамдаа унших шүлэг-Шарайд· Гэрэл
676ᠴᠢᠮᠠ ᠳ᠋ᠤ᠌ ᠪᠠᠨ ᠤᠩᠰᠢᠬᠤ ᠰᠢᠯᠦᠭ
ᠵᠣᠬᠢᠶᠠᠭᠴᠢ᠄ ᠱᠠᠷᠠᠢᠳ· ᠭᠡᠷᠡᠯ
ᠤᠶᠠᠩᠭᠠᠯᠠᠭᠴᠢ᠄ ᠤᠷᠠᠯᠢᠭ
ᠲᠡᠷᠭᠡᠯ ᠰᠠᠷᠠᠨ ᠴᠢᠷᠠᠢ ᠶ᠋ᠢ ᠴᠢᠨᠢ
ᠢᠨᠢᠶᠡᠳᠦ ᠪᠠᠶᠠᠷ ᠢ᠋ᠶ᠋ᠠᠷ ᠪᠠᠶᠠᠰᠬᠠᠵᠤ
ᠴᠡᠴᠡᠭᠡᠨ ᠰᠠᠢᠬᠠᠨ ᠪᠡᠶᠡ ᠶ᠋ᠢ ᠴᠢᠨᠢ
ᠠᠷᠴᠠ ᠶ᠋ᠢᠨ ᠦᠨᠦᠷ ᠢ᠋ᠶ᠋ᠡᠷ ᠷᠠᠰᠢᠶᠠᠯᠠᠵᠤ
ᠴᠢᠨᠦ ᠲᠥᠯᠥᠭᠡ ᠨᠡᠭᠦᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠢᠷᠠ ᠪᠠᠷ ᠤᠶᠠᠷᠠᠭᠠᠵᠤ
ᠴᠢᠨᠦ ᠲᠤᠬᠠᠢ ᠬᠡᠯᠬᠢᠭᠰᠡᠨ ᠨᠠᠢᠷᠠᠭ ᠢ᠋ᠶ᠋ᠠᠨ ᠳᠤᠷᠠᠯᠠᠯ ᠢ᠋ᠶ᠋ᠠᠷ ᠠᠮᠢᠯᠠᠭᠤᠯᠵᠤ
ᠲᠣᠷᠮᠣᠭᠣᠷ ᠠᠯᠠᠭ ᠨᠢᠳᠦᠨ ᠳ᠋ᠦ᠍ ᠨᠢ ᠨᠢᠯᠪᠤᠰᠤ ᠬᠦᠷᠭᠡᠬᠦ ᠦᠭᠡᠢ
ᠲᠣᠭᠠ ᠲᠠᠢ ᠨᠠᠰᠤᠨ ᠤ᠋ ᠵᠠᠶᠠᠭᠠᠨ ᠳ᠋ᠤ᠌ ᠴᠢᠨᠢ ᠬᠦ ᠬᠦᠷᠭᠡᠬᠦ ᠦᠭᠡᠢ
ᠳᠣᠭᠳᠣᠯᠬᠤ ᠬᠦᠷᠡᠩ ᠵᠢᠷᠦᠬᠡᠨ ᠳ᠋ᠦ᠍ ᠨᠢ ᠰᠡᠪ ᠬᠦᠷᠭᠡᠬᠦ ᠦᠭᠡᠢ
ᠲᠤᠤᠯᠠ ᠶ᠋ᠢᠨ ᠤᠰᠤᠨ ᠴᠣᠭᠴᠠᠰ ᠲᠤ᠌ ᠴᠢᠨᠢ ᠰᠡᠪ ᠬᠦᠷᠭᠡᠬᠦ ᠦᠭᠡᠢ
ᠴᠢᠮᠠ ᠲᠠᠢ ᠤᠭᠲᠤᠭᠰᠠᠨ ᠪᠣᠯᠵᠣᠭᠠ ᠪᠦᠬᠦᠨ ᠢ᠋ ᠨᠠᠨᠳᠢᠩᠨᠠᠵᠤ
ᠴᠢᠮᠠ ᠲᠠᠢ ᠲᠤᠭᠤᠯᠤᠭᠰᠠᠨ ᠤᠴᠠᠷᠠᠯ ᠪᠦᠬᠦᠨ ᠢ᠋ ᠡᠷᠬᠢᠮᠯᠡᠵᠦ
ᠴᠢᠮᠠ ᠲᠠᠢ ᠪᠠᠢᠭᠰᠠᠨ ᠴᠠᠭ ᠮᠥᠴᠡ ᠪᠦᠬᠦᠨ ᠢ᠋ ᠬᠢᠮᠠᠭᠠᠳᠠᠵᠤ
ᠴᠢᠮᠠ ᠲᠠᠢ ᠲᠠᠨᠢᠯᠴᠠᠭᠰᠠᠨ ᠬᠠᠯᠠᠭᠤᠬᠠᠨ ᠮᠥᠴᠡ ᠪᠡᠨ ᠮᠥᠷᠥᠭᠡᠳᠴᠦ
ᠨᠠᠳᠠ ᠲᠠᠢ ᠦᠶᠡᠷᠬᠡᠬᠰᠡᠨ ᠠᠷᠢᠭᠤᠨ ᠳᠤᠷᠠᠳᠬᠠᠯ ᠢ᠋ᠶ᠋ᠠᠨ ᠤᠩᠰᠢᠵᠤ
ᠨᠠᠳᠠ ᠪᠠᠷ ᠪᠠᠶᠠᠷᠬᠠᠳᠠᠭ ᠠᠩᠬᠢᠷᠬᠠᠨ ᠳᠠᠭᠤᠨ ᠳ᠋ᠤ᠌ ᠴᠢᠨᠢ ᠤᠶᠠᠷᠠᠴᠤ
ᠨᠠᠮᠠ ᠶ᠋ᠢ ᠲᠦᠰᠢᠬᠦ ᠡᠮᠵᠡᠭ ᠮᠥᠴᠡ ᠶ᠋ᠢ ᠴᠢᠨᠢ ᠪᠥᠭᠡᠴᠡᠢᠯᠡᠵᠦ
ᠨᠠᠮᠠ ᠶ᠋ᠢ ᠬᠠᠢᠷᠠᠯᠠᠳᠠᠭ ᠡᠩᠬᠦᠷᠡᠢ ᠰᠡᠳᠬᠢᠯ ᠢ᠋ ᠴᠢᠨᠢ ᠡᠪᠦᠷᠯᠡᠵᠦ
ᠴᠢᠮᠠ ᠲᠠᠢ ᠦᠷᠭᠦᠯᠵᠢᠯᠡᠬᠦ ᠢᠷᠡᠭᠡᠳᠦᠢ ᠳ᠋ᠦ᠍ ᠪᠡᠨ ᠲᠡᠮᠡᠦᠯᠦᠨᠡᠮ
ᠴᠢᠮᠠ ᠲᠠᠢ ᠥᠩᠭᠡᠷᠡᠭᠦᠯᠬᠦ ᠠᠮᠢᠳᠤᠷᠠᠯ ᠡᠷᠭᠦᠵᠦ ᠳᠡᠪᠳᠡᠷᠢᠨᠡᠮ
ᠴᠢᠮᠠ ᠲᠠᠢ ᠵᠢᠷᠭᠠᠬᠤ ᠠᠯᠤᠰ ᠤ᠋ᠨ ᠬᠦᠰᠡᠯ ᠲᠥᠰᠥᠭᠡᠯᠡᠨᠡᠮ
ᠴᠢᠮᠠ ᠲᠠᠢ ᠮᠥᠩᠬᠡᠷᠡᠬᠦ ᠠᠷᠢᠭᠤᠨ ᠬᠠᠢᠷᠠ ᠪᠠᠷ ᠬᠠᠢᠯᠤᠨᠠᠮ
ᠦᠰᠦᠭ ᠬᠠᠳᠠᠭᠴᠢ᠄ ᠱᠠᠷᠠᠢᠳ· ᠭᠡᠷᠡᠯ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠷᠠᠢᠳ· ᠭᠡᠷᠡᠯ