ᠮᠢᠨᠦ ᠲᠥᠷᠥᠭᠰᠡᠨ ᠦ ᠤᠴᠢᠷ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Миний төрсний учир. - Очирбатын Дашбалбар
690ᠮᠢᠨᠦ ᠲᠥᠷᠥᠭᠰᠡᠨ ᠦ ᠤᠴᠢᠷ
ᠭᠠᠵᠠᠷ ᠳᠡᠭᠡᠷᠡ ᠪᠢ ᠵᠣᠴᠢᠨ ᠪᠤᠰᠤ ᠡᠵᠡᠨ ᠨᠢ ᠪᠣᠯᠵᠤ ᠢᠷᠡᠭᠰᠡᠨ ᠶᠦᠮ᠃
ᠭᠤᠨᠢᠭ ᠳᠦᠭᠦᠷᠡᠩ ᠨᠢᠳᠦ ᠲᠡᠢ ᠥᠬᠢᠨ ᠦ᠌ ᠵᠢᠷᠦᠬᠡᠨ ᠳ᠋ᠦ᠍
ᠪᠠᠶᠠᠷ ᠤ᠋ᠨ ᠬᠤᠨᠳᠠᠭᠠ ᠴᠠᠯᠬᠢᠭᠠᠬᠤ ᠭᠡᠵᠦ
ᠭᠤᠳᠤᠢᠵᠤ ᠦᠵᠡᠭᠡ ᠦᠭᠡᠢ ᠰᠢᠯᠦᠭᠴᠢ ᠶ᠋ᠢᠨ ᠲᠡᠷᠢᠭᠦᠨ ᠢ᠋
ᠲᠡᠷᠡ ᠥᠬᠢᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠢᠯᠪᠢᠭᠦᠯᠬᠦ ᠭᠡᠵᠦ
ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠣᠲᠣᠭᠠᠳ ᠡᠵᠢ ᠪᠡᠨ ᠬᠦᠯᠢᠶᠡᠯᠭᠡᠬᠦ ᠭᠡᠵᠦ
ᠬᠣᠩᠭᠣᠷ ᠡᠵᠢ ᠳ᠋ᠡᠭᠡᠨ ᠠᠯᠤᠰ ᠠ᠋ᠴᠠ ᠡᠷᠭᠢᠵᠦ
ᠦᠷᠡ ᠲᠡᠢ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠭᠦᠯᠬᠦ ᠭᠡᠵᠦ
ᠬᠣᠷᠸᠠ ᠳ᠋ᠤ᠌ ᠪᠢ ᠤᠴᠠᠷᠠᠯ ᠭᠤᠨᠢᠭ ᠲᠠᠢ ᠰᠦᠯᠵᠢᠯᠳᠦᠨ ᠶᠠᠪᠤᠭᠠ ᠶᠤᠮ
ᠬᠣᠨᠣᠭ ᠤ᠋ᠨ ᠣᠯᠠᠨ ᠳ᠋ᠤ᠌ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠰᠦᠯᠳᠡᠯᠡᠨ
ᠡᠨᠡᠷᠢᠯ ᠬᠠᠢᠷᠠ ᠶ᠋ᠢᠨ ᠮᠠᠨᠠᠨ ᠳ᠋ᠤ᠌ ᠲᠥᠭᠡᠷᠢᠵᠦ ᠶᠠᠪᠤᠭᠠ ᠶᠤᠮ
ᠬᠤᠷᠢᠮ ᠤ᠋ᠨ ᠰᠥᠨᠢ ᠰᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠰᠠᠢᠬᠠᠨ ᠥᠬᠢᠳ ᠲᠡᠢ ᠪᠥᠵᠢᠭᠯᠡᠬᠦ ᠭᠡᠵᠦ
ᠬᠤᠷᠳᠤᠨ ᠬᠣᠯᠠ ᠶ᠋ᠢᠨ ᠵᠢᠭᠳᠡᠬᠡᠨ ᠲᠦᠪᠡᠷᠭᠡᠨ ᠳ᠋ᠦ᠍ ᠠᠵᠠ ᠵᠢᠷᠭᠠᠯ ᠢ᠋ᠶ᠋ᠠᠨ ᠵᠡᠭᠦᠳᠦᠯᠡᠬᠦ ᠭᠡᠵᠦ
ᠠᠷᠢᠬᠢ ᠳᠦᠭᠦᠷᠡᠩ ᠬᠤᠨᠳᠠᠭᠠ ᠰᠢᠭ᠋ ᠭᠣᠮᠣᠳᠠᠯ ᠲᠠᠢ ᠵᠢᠷᠦᠬᠡ ᠶ᠋ᠢ ᠠᠮᠠᠷᠠᠭᠠᠬᠤ ᠭᠡᠵᠦ
ᠠᠶᠠ᠂ ᠲᠡᠷᠡ ᠭᠤᠨᠢᠭ ᠢ᠋ ᠨᠢ ᠤᠤᠭᠤᠭᠠᠳ ᠥᠪᠡᠷ ᠦ᠋ᠨ ᠪᠠᠶᠠᠰᠬᠤᠯᠠᠩ ᠢ᠋
ᠥᠷᠥᠭᠡᠯ ᠦ᠋ᠨ ᠵᠢᠷᠦᠬᠡᠨ ᠳ᠋ᠦ᠍ ᠶᠡᠭᠦᠯᠡᠬᠦ ᠭᠡᠵᠦ
ᠠᠮᠲᠠᠲᠤ ᠡᠨᠡ ᠰᠣᠪᠢᠩ ᠪᠢᠯᠢᠭ ᠦ᠋ᠨ ᠣᠷᠴᠢᠯᠠᠩ ᠳ᠋ᠤ᠌ ᠪᠢ ᠲᠥᠷᠥᠭᠰᠡᠨ ᠶᠦᠮ᠃
ᠭᠠᠵᠠᠷ ᠳᠡᠭᠡᠷᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠷᠡᠵᠦ ᠪᠣᠢ ᠪᠢᠴᠢᠬᠠᠨ ᠬᠦᠦ ᠶ᠋ᠢ
ᠭᠠᠷ ᠰᠤᠩᠭᠠᠨ ᠬᠥᠮᠦᠰ ᠲᠡᠢ ᠴᠣᠭ ᠤᠭᠲᠤᠬᠤ ᠭᠡᠵᠦ
ᠭᠠᠯ ᠲᠣᠭᠣᠷᠢᠨ ᠰᠠᠭᠤᠵᠤ ᠰᠢᠨᠡ ᠬᠥᠮᠦᠨ ᠲᠥᠷᠥᠭᠰᠡᠨ ᠦ᠌
ᠪᠠᠶᠠᠷ ᠤ᠋ᠨ ᠰᠢᠷᠡᠭᠡ ᠶ᠋ᠢ ᠰᠢᠯᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠠᠰᠠᠬᠤ ᠭᠡᠵᠦ
ᠰᠢᠳᠢᠲᠦ ᠣᠷᠴᠢᠯᠠᠩ ᠤ᠋ᠨ ᠠᠭᠤᠯᠠᠰ᠂ ᠴᠠᠰᠤ᠂ ᠵᠡᠭᠦᠦ ᠶ᠋ᠢᠨ ᠰᠦᠪᠡᠭᠴᠢ ᠰᠢᠭ
ᠨᠠᠷᠢᠰᠬᠤ ᠲᠡᠭᠷᠢ ᠲᠡᠢ ᠴᠣᠭ ᠨᠠᠢᠷᠯᠠᠬᠤ ᠭᠡᠵᠦ
ᠬᠠᠭᠠᠯᠭᠠᠨ ᠤ᠋ ᠬᠢᠨᠢ ᠳᠡᠷᠭᠡᠳᠡ ᠭᠣᠣᠯᠲᠤ ᠪᠣᠷᠣ ᠶ᠋ᠢᠨ ᠴᠡᠴᠡᠭ
ᠢᠷᠡᠭᠡᠳᠦᠢ ᠶ᠋ᠢ ᠪᠡᠯᠭᠡᠳᠡᠨ ᠲᠠᠯᠪᠢᠵᠤ
ᠬᠠᠮᠢᠭᠠ ᠬᠣᠯᠠ ᠳ᠋ᠤ᠌ ᠬᠦᠷᠬᠦ ᠵᠠᠮ ᠢ᠋ ᠨᠢ ᠡᠬᠡ ᠣᠷᠣᠨ ᠤ᠋ ᠪᠠᠨ
ᠨᠠᠷᠠ ᠪᠠᠷ ᠵᠠᠰᠠᠬᠤ ᠭᠡᠵᠦ
ᠣᠷᠴᠢᠯᠠᠩ ᠳ᠋ᠤ᠌ ᠪᠢ ᠢᠷᠡᠭᠰᠡᠨ ᠶᠦᠮ᠃
ᠵᠠᠮ ᠪᠦᠬᠦᠨ ᠢ᠋ᠶ᠋ᠡᠷ ᠶᠠᠪᠤᠬᠤ ᠭᠡᠵᠦ
ᠤᠰᠤ ᠪᠦᠬᠦᠨ ᠡᠴᠡ ᠠᠮᠰᠠᠬᠤ ᠭᠡᠵᠦ
ᠣᠳᠣ ᠪᠦᠬᠦᠨ ᠲᠡᠢ ᠶᠠᠷᠢᠯᠴᠠᠬᠤ ᠭᠡᠵᠦ
ᠴᠡᠴᠡᠭ ᠪᠦᠬᠦᠨ ᠲᠡᠢ ᠰᠢᠪᠡᠨᠡᠯᠳᠦᠬᠦ ᠭᠡᠵᠦ
ᠭᠠᠵᠠᠷ ᠳᠡᠭᠡᠷᠡ ᠪᠢ ᠲᠥᠷᠥᠭᠰᠡᠨ ᠶᠦᠮ
ᠬᠡᠦᠬᠡᠨ ᠪᠦᠬᠦᠨ ᠢ᠋ ᠬᠠᠢᠷᠠᠯᠠᠵᠤ ᠨᠢᠭᠡᠨ ᠳ᠋ᠦ᠍ᠨᠢ ᠳᠤᠷᠠᠯᠠᠵᠤ
ᠬᠥᠮᠦᠨ ᠪᠦᠬᠦᠨ ᠢ᠋ ᠬᠦᠨᠳᠦᠯᠡᠵᠦ ᠨᠢᠭᠡ ᠲᠡᠢ ᠨᠢ ᠨᠥᠬᠥᠷᠯᠡᠵᠦ
ᠬᠦᠯᠦᠭ ᠪᠦᠬᠦᠨ ᠢ᠋ ᠤᠨᠤᠵᠤ ᠨᠢᠭᠡ ᠶ᠋ᠢ ᠨᠢ ᠰᠢᠯᠢᠬᠦ ᠭᠡᠵᠦ
ᠬᠦᠰᠡᠯ ᠦ᠋ᠨ ᠴᠡᠩᠬᠡᠷ ᠣᠷᠴᠢᠯᠠᠩ ᠳ᠋ᠤ᠌ ᠢᠷᠡᠭᠰᠡᠨ ᠶᠦᠮ᠃
ᠠᠶᠠ᠂ ᠣᠯᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠮᠢᠨᠦ ᠠᠷᠤ ᠠ᠋ᠴᠠ
ᠣᠷᠴᠢᠯᠠᠩ ᠳᠡᠭᠡᠷᠡ ᠢᠷᠡᠭᠰᠡᠨ ᠬᠦᠦ ᠮᠢᠨᠢ!
ᠤᠤᠭᠤᠬᠤ ᠶ᠋ᠢ ᠬᠦᠰᠡᠪᠡᠯ ᠴᠢᠮᠠᠲᠤ ᠪᠢ ᠲᠠᠭᠱᠠ ᠳᠦᠭᠦᠷᠡᠩ ᠰᠢᠭᠦᠳᠡᠷᠢ ᠥᠭᠭᠦᠨᠡ
ᠢᠳᠡᠬᠦ ᠶ᠋ᠢ ᠬᠦᠰᠡᠪᠡᠯ ᠴᠢᠮᠠᠲᠤ ᠪᠢ ᠠᠳᠬᠤ ᠳᠦᠭᠦᠷᠡᠩ ᠮᠣᠢᠯ ᠥᠭᠭᠦᠨᠡ
ᠲᠠᠭᠠᠷᠠᠪᠠᠯ ᠴᠢᠨᠢ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠤᠷᠠ ᠶ᠋ᠢ ᠠᠰᠬᠠᠷᠠᠭᠤᠯᠤᠨᠠ
ᠣᠷᠣᠬᠤ ᠣᠷᠣᠨ ᠦᠭᠡᠢ ᠪᠣᠯᠪᠠᠯ ᠠᠭᠤᠯᠠᠰ ᠭᠡᠷ ᠴᠢᠨᠢ ᠪᠣᠯᠤᠨᠠ
ᠣᠢ ᠭᠤᠨᠢᠭ ᠢ᠋ ᠴᠢᠨᠢ ᠪᠣᠷᠣᠭᠠᠨ ᠤ᠋ ᠳᠠᠷᠠᠭᠠᠬᠢ ᠰᠣᠯᠣᠩᠭᠠ ᠠᠷᠴᠢᠨᠠ
ᠳᠠᠢᠰᠤᠨ ᠴᠢᠮᠠ ᠤᠷᠤᠭᠤ ᠬᠠᠯᠳᠠᠪᠠᠯ ᠣᠢ ᠮᠣᠳᠣ ᠰᠢᠪᠡᠭᠡ ᠪᠣᠯᠤᠨᠠ
ᠡᠬᠡ ᠣᠷᠣᠨ ᠨᠤᠮᠤ ᠪᠣᠯᠤᠨᠠ
ᠠᠷᠠᠳ ᠲᠦᠮᠡᠨ ᠰᠤᠮᠤ ᠪᠣᠯᠤᠨᠠ
ᠳᠠᠶᠠᠭᠠᠷ ᠮᠣᠩᠭᠣᠯ ᠳ᠋ᠤ᠌ ᠨᠢᠯᠬᠠ ᠦᠷᠡ ᠴᠢᠨᠦ ᠲᠥᠯᠥᠭᠡ ᠳᠤᠲᠠᠬᠤ ᠶᠠᠭᠤᠮᠠ ᠦᠭᠡᠢ
ᠥᠨᠥᠳᠥᠷ ᠪᠢ ᠴᠢᠮᠠᠲᠤ ᠥᠪᠡᠷ ᠢ᠋ ᠪᠡᠨ ᠵᠣᠷᠢᠭᠤᠯᠤᠨᠠ
ᠥᠷᠭᠡᠨ ᠣᠯᠠᠨ ᠳ᠋ᠠᠭᠠᠨ ᠴᠢ ᠮᠠᠷᠭᠠᠰᠢ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠵᠣᠷᠢᠭᠤᠯᠤᠭᠠᠷᠠᠢ !