ᠤᠷᠠᠨᠳᠦ᠋ᠰᠢ ᠶᠢᠨ ᠳᠣᠮᠣᠭ (ᠬᠣᠶᠠᠷ)– ᠭᠠᠰᠢᠸᠠ Урандүшийн домог(2) – Гашваа
692 ᠭᠠᠯ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠪᠣᠯᠬᠣᠷ ᠪᠢᠳᠡ ᠠᠭᠤᠯᠠᠨ ᠬᠥᠨᠳᠡᠢ ᠡᠴᠡ ᠠᠷᠠᠢ ᠴᠢᠷᠠᠢ ᠭᠠᠷᠴᠤ ᠢᠷᠡᠭᠡᠳ ᠮᠠᠰᠢᠨ ᠢ᠋ᠶ᠋ᠠᠨ ᠪᠠᠷᠢᠵᠤ ᠤᠷᠠᠨᠳᠥ᠋ᠰᠢ ᠶ᠋ᠢ ᠴᠢᠭᠯᠡᠪᠡ᠃ ᠡᠨᠳᠡ ᠡᠴᠡ ᠤᠷᠠᠨᠳᠥ᠋ᠰᠢ ᠬᠦᠷᠲᠡᠯᠡ ᠳᠡᠮᠡᠢ ᠬᠣᠯᠠ ᠦᠭᠡᠢ ᠭᠡᠨᠡ᠃ ᠰᠢᠯᠢ ᠶ᠋ᠢᠨ ᠡᠷᠡᠴᠦᠳ ᠦ᠋ᠨ ᠦᠭᠡ ᠪᠡᠷ ᠪᠣᠯ ᠮᠣᠤ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠣᠢᠷᠠᠬᠠᠨ ᠪᠠᠢᠬᠤ᠂ ᠴᠠᠢ ᠴᠢᠨᠠᠬᠤ ᠶ᠋ᠢᠨ ᠵᠠᠭᠤᠷᠠ ᠬᠦᠷᠳᠡᠭ ᠭᠠᠵᠠᠷ ᠰᠢᠦ ᠭᠡᠵᠦ ᠪᠤ ᠠᠪᠤᠭᠠᠢ ᠶᠠᠷᠢᠨᠠ᠃ ᠭᠡᠲᠡᠯᠡ ᠡᠨᠡ ᠵᠠᠮ ᠢ᠋ ᠶᠠᠪᠤᠵᠤ ᠭᠠᠷᠬᠤ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠥᠮᠦᠨ ᠯᠡ ᠮᠡᠳᠡᠵᠦ ᠶᠠᠪᠤᠭᠰᠠᠨ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠴᠤ᠌ ᠢᠲᠡᠭᠡᠵᠦ ᠶᠠᠳᠠᠨᠠ᠃ ᠠᠭᠤᠯᠠᠨ ᠵᠠᠮ ᠨᠠᠷᠢᠨ ᠪᠥᠭᠡᠳ ᠮᠤᠷᠤᠢ ᠮᠤᠰᠬᠢᠭᠤ᠂ ᠡᠩᠬᠦᠯ ᠳᠤᠩᠬᠤᠯ᠂ ᠲᠡᠷᠭᠡᠨ ᠦ᠌ ᠲᠣᠯᠣᠭᠠᠢ ᠪᠥᠭᠰᠡ ᠨᠢ ᠡᠷᠭᠢᠲᠡᠯᠡ ᠦᠰᠦᠷᠴᠦ ᠪᠢᠳᠡ ᠬᠡᠳᠦᠨ ᠡᠮᠡᠭᠡᠨ ᠡᠪᠦᠭᠡᠨ ᠢ᠋ ᠭᠡᠳᠡᠰᠦ ᠳᠣᠲᠣᠷ ᠢ᠋ ᠨᠢ ᠬᠣᠯᠢᠮᠠᠷ ᠪᠣᠯᠭᠠᠵᠤ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠡᠡᠡᠭ ᠵᠡᠪᠡ ᠭᠠᠷᠴᠤ ᠢᠨᠳᠡᠷᠯᠡᠭᠰᠡᠨ ᠠᠭᠤᠯᠠ ᠶ᠋ᠢᠨ ᠢᠷᠣᠭᠠᠷ ᠢ᠋ᠶ᠋ᠠᠷ ᠥᠩᠭᠡᠷᠡᠬᠦ ᠪᠡᠷ ᠲᠡᠷᠭᠡ ᠬᠥᠮᠦᠨ ᠲᠡᠢ ᠨᠢ ᠯᠢᠪ ᠳᠠᠷᠤᠴᠢᠬᠠᠮᠠᠷ ᠰᠠᠨᠠᠭᠳᠠᠭᠤᠯᠵᠤ ᠨᠢᠭᠡ ᠯᠡ ᠪᠡᠶᠡ ᠴᠢᠩᠭᠠᠷᠠᠵᠤ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦ ᠠᠷᠵᠠᠢᠵᠤ ᠠᠪᠤᠨᠠ᠃ ᠠᠭᠤᠯᠠ ᠬᠠᠭᠠᠭᠠᠯᠵᠤ ᠬᠠᠳᠠ ᠲᠡᠭᠡᠭᠡᠭᠰᠡᠨ ᠵᠠᠭᠤ ᠮᠢᠩᠭᠠᠨ ᠲᠡᠷᠭᠡ ᠲᠡᠮᠡᠭᠡᠨ ᠬᠡᠯᠬᠢᠶᠡ ᠮᠡᠲᠦ ᠵᠢᠭᠰᠠᠵᠤ ᠡᠮᠦᠨᠡ ᠬᠣᠢᠨᠠ ᠨᠢ ᠰᠢᠬᠠᠵᠤ ᠬᠠᠪᠴᠢᠵᠤ ᠤᠯᠠ ᠮᠥᠷ ᠦ᠋ᠨ ᠲᠣᠭᠣᠰᠣ ᠨᠢ ᠲᠡᠭᠷᠢ ᠭᠠᠵᠠᠷ ᠢ᠋ ᠨᠡᠢᠯᠡᠭᠦᠯᠦᠨᠡ᠃ ᠨᠠᠷᠠᠨ ᠭᠡᠷᠡᠯ ᠢ᠋ ᠬᠠᠯᠬᠠᠯᠠᠭᠰᠠᠨ ᠲᠣᠭᠣᠰᠣᠨ ᠳ᠋ᠤ᠌ ᠲᠡᠷᠭᠡᠨ ᠳ᠋ᠧᠩ ᠢ᠋ᠶ᠋ᠡᠨ ᠨᠣᠴᠣᠭᠠᠭᠠᠳ ᠶᠠᠪᠤᠭᠰᠠᠨ ᠴᠤ᠌ ᠠᠯᠲᠠ ᠳᠡᠯᠢᠮ ᠦ᠋ᠨ ᠴᠠᠭᠠᠨᠠ ᠶᠠᠭᠤ ᠪᠠᠢᠬᠤ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠦᠢᠯᠡ ᠲᠠᠮᠤ ᠶ᠋ᠢ ᠦᠵᠡᠭᠦᠯᠦᠨᠡ᠃ ᠶᠠᠪᠤᠨ ᠪᠠᠢᠭᠰᠠᠭᠠᠷ ᠦᠳᠡ ᠬᠠᠵᠠᠢᠯᠠ᠃ ᠮᠣᠤ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ ᠭᠡᠳᠡᠭ ᠭᠠᠵᠠᠷ ᠪᠠᠰᠠ ᠯᠠ ᠪᠠᠷᠠ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ᠃ ᠡᠨᠡ ᠦᠶᠡ ᠳ᠋ᠦ᠍ ᠥᠷᠯᠥᠭᠡ ᠶ᠋ᠢᠨ ᠬᠣᠭᠣᠯᠠ ᠦᠶᠡᠷ ᠦ᠋ᠨ ᠬᠥᠨᠳᠡᠢ ᠳ᠋ᠦ᠍ ᠴᠤ᠌ ᠶᠤᠮ ᠤ᠋ᠤ᠂ ᠠᠭᠤᠯᠠ ᠶ᠋ᠢᠨ ᠵᠠᠪᠰᠠᠷ ᠲᠤ᠌ ᠴᠤ᠌ ᠶᠤᠮ ᠤ᠋ᠤ᠂ ᠠᠯᠢ ᠬᠡᠵᠢᠶᠡᠨ ᠦ᠌ ᠰᠢᠩᠭᠡᠭᠡᠳ ᠥᠯᠥᠨ ᠭᠡᠳᠡᠰᠦ ᠶ᠋ᠢᠨ ᠥᠨᠴᠥᠭ ᠪᠤᠯᠤᠩ ᠳ᠋ᠤ᠌ ᠪᠠᠢᠬᠤ ᠲᠠᠢ ᠦᠭᠡᠢ ᠲᠡᠢ᠂ ᠳᠡᠭᠡᠷᠡ ᠨᠢ ᠰᠢᠷᠬᠠ ᠶ᠋ᠢᠨ ᠪᠤᠯᠠᠭ ᠤ᠋ᠨ ᠤᠰᠤ ᠬᠣᠳᠣᠭᠣᠳᠣ ᠶ᠋ᠢ ᠵᠠᠢᠯᠤᠭᠠᠳ ᠨᠠᠷᠢᠨ ᠪᠦᠳᠦᠭᠦᠨ ᠭᠡᠳᠡᠰᠦ ᠪᠡᠷ ᠭᠠᠷᠤᠭᠠᠳ ᠳᠠᠪᠤᠰᠠᠭ ᠤ᠋ᠨ ᠠᠮᠠ ᠬᠦᠷᠬᠦ ᠲᠡᠢ ᠳᠥᠷᠪᠡᠨ ᠮᠥᠴᠢ ᠲᠠᠪᠤᠨ ᠴᠤᠯᠤ ᠳ᠋ᠤ᠌ ᠠᠩᠭᠢᠯᠠᠭᠳᠠᠨ ᠠᠷᠠᠰᠤ ᠮᠢᠬᠠᠨ ᠰᠦᠪᠡ ᠪᠡᠷ ᠠᠭᠤᠷᠰᠢᠭᠠᠳ ᠠᠷᠢᠯᠪᠠ᠃ ᠪᠤ ᠠᠪᠤᠭᠠᠢ᠂ ᠪᠢᠳᠡ ᠣᠳᠣ ᠳᠠᠷᠠᠰᠤᠲᠤ ᠶ᠋ᠢᠨ ᠳᠤᠭᠤᠢ᠂ ᠶᠣᠯᠣ ᠶ᠋ᠢᠨ ᠭᠦᠨᠳᠢ ᠶ᠋ᠢ ᠠᠪᠤᠭᠠᠳ ᠰᠦᠪᠡ ᠶ᠋ᠢᠨ ᠭᠣᠣᠯ ᠤᠷᠤᠭᠤ ᠣᠷᠣᠵᠤ ᠬᠠᠭᠠᠰ ᠵᠠᠮ ᠶᠠᠪᠤᠭᠠᠳ ᠪᠠᠢᠨᠠ᠃ ᠨᠥᠬᠥᠳ ᠢ᠋ ᠬᠠᠷᠠᠭᠠᠳ ᠪᠠᠢᠬᠤᠯᠠᠷ ᠴᠢᠷᠠᠢ ᠨᠢ ᠲᠣᠭᠣᠰᠣ ᠳᠠᠭᠠᠭᠠᠵᠤ ᠦᠭᠡ ᠨᠢ ᠴᠥᠭᠡᠷᠡᠨ ᠰᠦᠷ ᠰᠦᠯᠳᠡ ᠦᠭᠡᠢ ᠰᠢᠨᠵᠢ ᠣᠷᠣᠵᠤ᠂ ᠳᠣᠲᠣᠷ ᠤ᠋ᠨ ᠵᠢᠷᠭᠤᠭᠠᠨ ᠨᠢ ᠬᠥᠳᠡᠯᠵᠦ ᠪᠠᠢᠬᠤ ᠪᠣᠯᠤᠯᠲᠠᠢ ᠭᠡᠵᠦ ᠬᠡᠯᠡᠭᠡᠳ ᠠᠭᠤᠯᠠ ᠶ᠋ᠢ ᠣᠷᠢᠶᠠᠵᠤ ᠭᠠᠷᠤᠮᠠᠭᠴᠠ ᠶᠡᠬᠡ ᠵᠠᠮ ᠠ᠋ᠴᠠ ᠰᠠᠯᠵᠤ ᠪᠠᠷᠠᠭᠤᠨ ᠭᠠᠷ ᠲᠡᠢᠰᠢ ᠡᠷᠭᠢᠵᠦ ᠭᠤᠷᠪᠠᠨ ᠠᠭᠤᠯᠠ ᠶ᠋ᠢᠨ ᠠᠭᠤᠯᠵᠠᠷ ᠪᠣᠯᠤᠭᠰᠠᠨ ᠨᠠᠷᠢᠨ ᠵᠥᠷᠢᠭ ᠵᠠᠮ ᠢ᠋ᠶ᠋ᠠᠷ ᠴᠤᠬᠤᠰ ᠭᠡᠵᠦ ᠣᠷᠣᠭᠠᠳ ᠬᠡᠳᠦᠨ ᠮᠣᠩᠭᠣᠯ ᠭᠡᠷ ᠲᠡᠢ ᠠᠢᠯ ᠤ᠋ᠨ ᠭᠠᠳᠠᠨᠠ ᠬᠦᠷᠦᠯᠡ᠃ ᠠ ᠡᠨᠡ ᠴᠤ᠌ ᠶᠣᠰᠣᠲᠠᠢ ᠬᠦᠢᠲᠡᠨ ᠳᠤᠯᠠᠭᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠤᠯᠠᠭᠠᠢ ᠵᠢᠯᠡᠭᠡᠢ ᠳ᠋ᠦ᠍ ᠦᠭᠳᠡᠬᠦ ᠦᠭᠡᠢ ᠰᠡᠵᠢᠭ ᠶᠡᠬᠡᠲᠡᠢ ᠰᠡᠷᠡᠮᠵᠢ ᠰᠠᠢᠲᠠᠢ ᠠᠢᠯ ᠪᠠᠢᠨᠠ᠃ ᠦᠭᠡᠢ ᠪᠣᠯ ᠡᠨᠡ ᠰᠦᠪᠡ ᠶ᠋ᠢᠨ ᠭᠣᠣᠯ ᠢ᠋ ᠳᠠᠭᠠᠭᠰᠠᠨ ᠠᠷᠪᠢᠨ ᠰᠡᠭᠦᠯ ᠲᠡᠢ ᠰᠡᠭᠦᠯ ᠦᠭᠡᠢ ᠠᠮᠢᠲᠠᠳ ᠬᠡᠵᠢᠶᠡᠨ ᠦ᠌ ᠰᠥᠨᠢ ᠡᠳᠦᠷ ᠦᠭᠡᠢ ᠭᠤᠯᠭᠢᠳᠠᠭᠠᠳ ᠲᠠᠷ ᠢ᠋ ᠨᠢ ᠪᠠᠷᠠᠵᠤ ᠲᠠᠮᠤ ᠶ᠋ᠢ ᠨᠢ ᠦᠵᠡᠭᠦᠯᠵᠦ ᠪᠠᠢᠬᠤ ᠦᠭᠡᠢ ᠤ᠋ᠤ ᠭᠡᠵᠦ ᠪᠢᠳᠡ ᠬᠡᠳᠦᠭᠦᠯᠡ ᠲᠡᠷᠭᠡᠨ ᠡᠴᠡ ᠪᠠᠭᠤᠬᠤ ᠵᠠᠭᠤᠷᠠ ᠬᠡᠯᠡᠯᠴᠡᠭᠡᠨ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌᠂ ᠪᠤ ᠠᠪᠤᠭᠠᠢ ᠠᠮᠠᠳᠠᠵᠤ ᠡᠨᠡ ᠪᠣᠯ ᠰᠦᠪᠡ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠨᠡᠷᠡ ᠴᠤᠤ ᠲᠠᠢ ᠲᠠᠩᠰᠤᠭ ᠮᠣᠩᠭᠣᠯ ᠬᠣᠭᠣᠯᠠ ᠪᠠᠷ ᠢ᠋ᠶ᠋ᠠᠨ ᠳᠠᠶᠠᠭᠠᠷ ᠲᠦᠮᠡᠨ ᠳ᠋ᠦ᠍ ᠠᠯᠳᠠᠷᠰᠢᠭᠰᠠᠨ ᠠᠷᠪᠠᠰ ᠨᠤᠲᠤᠭ ᠤ᠋ᠨ ᠰᠡᠴᠡᠨᠪᠢᠯᠢᠭ ᠦ᠋ᠨ ᠬᠢᠨ ᠭᠡᠭᠴᠢ ᠪᠢᠯᠡ᠂ ᠵᠠ ᠣᠳᠣ ᠬᠡᠳᠦᠭᠦᠯᠡ ᠪᠡᠨ ᠴᠠᠭ ᠢ᠋ᠶ᠋ᠠᠨ ᠪᠠᠷᠢᠵᠤ ᠡᠨᠳᠡ ᠨᠢᠭᠡ ᠳᠥᠭᠥᠮ ᠬᠣᠭᠣᠯᠠᠯᠠᠭᠠᠳ ᠶᠠᠪᠤᠶᠠ ᠭᠡᠪᠡ᠃ ᠪᠢᠳᠡ ᠭᠡᠷ ᠲᠦ᠍ ᠣᠷᠣᠬᠤ ᠪᠠᠷ ᠠᠵᠢᠯᠰᠠᠭ ᠠᠢᠯ ᠤ᠋ᠨ ᠵᠢᠭᠠᠬᠠᠨ ᠪᠣᠷᠣ ᠪᠦᠰᠡᠭᠦᠢ ᠴᠢᠷᠠᠢ ᠳᠦᠭᠦᠷᠡᠩ ᠠᠭᠠᠯᠢ ᠲᠠᠢ ᠢᠷᠵᠠᠯᠵᠠᠭᠤᠯᠤᠨ᠂ ᠡᠶᠡᠯᠰᠡᠭ ᠰᠠᠢᠬᠠᠨ ᠮᠣᠩᠭᠣᠯ ᠶᠣᠰᠣ ᠵᠠᠩ ᠢ᠋ᠶ᠋ᠠᠷ ᠤᠭᠲᠤᠨ ᠪᠠᠢᠬᠤ ᠳ᠋ᠤ᠌ ᠥᠷᠥᠭᠡ ᠳᠦᠭᠦᠷᠡᠩ ᠬᠠᠩᠭᠢᠨᠠᠭᠰᠠᠨ ᠴᠠᠭᠠ ᠲᠠᠢ ᠮᠣᠩᠭᠣᠯ ᠪᠤᠳᠠᠭᠠ ᠶ᠋ᠢᠨ ᠦᠨᠦᠷ ᠰᠢᠯᠦᠰᠦ ᠶ᠋ᠢ ᠬᠤᠷᠠᠭᠤᠯᠨᠠ᠃ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠠᠪᠬᠠ ᠬᠤᠭᠤᠯᠵᠤ ᠰᠢᠪᠡᠭ ᠴᠠᠪᠴᠢᠮᠠᠷ ᠨᠢᠳᠤᠷᠭᠠᠨ ᠴᠢᠨᠡᠭᠡᠨ ᠬᠣᠯᠢᠶᠠ ᠲᠠᠢ ᠲᠤᠲᠤᠷᠭᠠᠨ ᠪᠤᠳᠠᠭᠠ ᠠᠭᠤᠷ ᠰᠡᠪᠰᠡᠯᠵᠡᠨ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠵᠤ ᠬᠠᠵᠠᠭᠤ ᠳ᠋ᠤᠨᠢ ᠠᠶᠠᠭᠠ ᠱᠠᠭᠠᠵᠠᠩ᠂ ᠰᠠᠪᠬᠠ᠂ ᠪᠠᠰᠠ ᠬᠡᠳᠦᠨ ᠰᠡᠷᠡᠭᠦᠨ ᠨᠣᠭᠣᠭᠠ᠂ ᠰᠦ ᠲᠡᠢ ᠴᠠᠢ ᠪᠡᠯᠡᠬᠡᠨ ᠪᠠᠢᠪᠠ᠃ ᠥᠯᠥᠰᠴᠦ ᠴᠠᠩᠭᠠᠭᠰᠠᠨ ᠰᠢᠨᠵᠢ ᠨᠢ ᠴᠢᠷᠠᠢ ᠠ᠋ᠴᠠ ᠨᠢ ᠢᠯᠡᠬᠡᠨ ᠲᠠᠨᠢᠭᠳᠠᠭᠰᠠᠨ ᠮᠠᠨᠤᠰ ᠶᠠᠮᠠᠷ ᠴᠤ᠌ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ ᠳᠠᠭᠠ ᠳᠠᠭᠠ ᠪᠠᠷ ᠢ᠋ᠶ᠋ᠠᠨ᠂ ᠵᠠᠷᠢᠮ ᠨᠢ ᠵᠠᠮ ᠵᠠᠰᠠᠨᠠ ᠭᠡᠵᠦ ᠴᠠᠢ ᠠ᠋ᠴᠠ ᠪᠠᠨ ᠬᠢᠵᠦ᠂ ᠵᠠᠷᠢᠮ ᠨᠢ ᠮᠢᠨᠦ ᠵᠠᠮ ᠢ᠋ ᠡᠵᠢ ᠡᠴᠡ ᠭᠠᠷᠬᠤ ᠳ᠋ᠤ᠌ ᠪᠥᠬᠡᠯᠢᠭ ᠵᠠᠰᠠᠴᠢᠬᠠᠭᠰᠠᠨ ᠶᠤᠮ ᠭᠡᠳ ᠰᠢᠭᠤᠳ ᠪᠤᠳᠠᠭᠠ ᠠ᠋ᠴᠠ ᠨᠢ ᠠᠪᠤᠨᠠ᠃ ᠬᠠᠯᠠᠭᠤᠨ ᠴᠠᠢ ᠥᠳᠬᠡᠨ ᠪᠤᠳᠠᠭᠠ ᠪᠠᠷ ᠢ᠋ᠶ᠋ᠠᠨ ᠥᠯᠥᠰᠴᠦ ᠴᠠᠩᠭᠠᠵᠤ ᠵᠠᠮ ᠶᠠᠪᠤᠭᠰᠠᠨ ᠲᠠᠨᠢᠬᠤ᠂ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠰ ᠢ᠋ ᠦᠷᠦ ᠡᠪᠡᠳᠴᠦ ᠴᠠᠳᠬᠠᠭᠠᠳ ᠶᠠᠪᠤᠭᠤᠯᠳᠠᠭ ᠮᠣᠩᠭᠣᠯᠴᠤᠳ ᠤ᠋ᠨ ᠲᠠᠯᠠ ᠥᠩᠭᠡ ᠬᠠᠮᠢᠭᠠ ᠴᠤ᠌ ᠪᠦᠷ ᠠᠳᠠᠯᠢ ᠪᠠᠢᠨᠠ᠃ ᠪᠤᠳᠠᠭᠠᠨ ᠤ᠋ ᠳᠠᠷᠠᠭᠠ ᠪᠤ ᠠᠪᠤᠭᠠᠢ ᠠ᠋ᠴᠠ ᠵᠠ᠂ ᠨᠢᠭᠡ ᠠᠶᠠᠭᠠ ᠭᠤᠯᠢᠷ ᠪᠤᠳᠠᠭᠠ ᠭᠤᠷᠪᠠᠨ ᠮᠥᠩᠭᠥ ᠪᠠᠢᠳᠠᠭ᠂ ᠲᠤᠲᠤᠷᠭᠠᠨ ᠪᠤᠳᠠᠭᠠ ᠪᠣᠯᠬᠣᠷ ᠳᠥᠷᠪᠡᠨ ᠮᠥᠩᠭᠥ ᠡᠴᠡ ᠭᠠᠷᠬᠤ ᠦᠭᠡᠢ ᠪᠠ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠤᠷᠤᠭᠤ ᠨᠢᠳᠦ ᠭᠦᠶᠦᠯᠭᠡᠬᠦ ᠪᠡᠷ᠂ ᠬᠥᠶᠢ ᠶᠠᠭᠤ ᠬᠡᠯᠡᠵᠦ ᠪᠠᠢᠬᠤ ᠪᠣᠢ᠂ ᠡᠢᠮᠦ ᠳᠥᠭᠥᠮ ᠬᠣᠭᠣᠯᠠ ᠢᠳᠡᠭᠦᠯᠦᠭᠡᠳ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯ ᠠᠬᠠ ᠡᠭᠡᠴᠢ ᠨᠠᠷ ᠠ᠋ᠴᠠ ᠮᠥᠩᠭᠥ ᠬᠤᠷᠢᠶᠠᠵᠤ ᠪᠠᠢᠭᠰᠠᠨ ᠪᠣᠯ ᠮᠠᠨ ᠤ᠋ ᠬᠢᠨ ᠪᠠᠶᠠᠵᠢᠭᠠᠳ ᠠᠭᠤᠯᠠ ᠪᠠᠨ ᠬᠥᠨᠳᠡᠢᠯᠡᠭᠡᠳ ᠮᠥᠩᠭᠥ ᠪᠡᠨ ᠬᠤᠷᠢᠶᠠᠴᠢᠬᠠᠭᠰᠠᠨ ᠪᠠᠢᠯᠭᠦᠢ᠂ ᠳᠠᠬᠢᠪᠠᠯ ᠲᠠᠨ ᠤ᠋ ᠪᠣ ᠠᠪᠤᠭᠠᠢ ᠤᠷᠢᠳᠤ ᠲᠥᠷᠥᠯ ᠡᠴᠡ ᠪᠣᠯᠵᠣᠭᠠ ᠲᠠᠢ ᠮᠢᠨᠦ ᠤᠨᠠᠭᠠᠨ ᠪᠠᠭᠠ ᠶ᠋ᠢᠨ ᠨᠠᠢᠵᠠ ᠶᠤᠮ᠂ ᠥᠨᠥᠳᠥᠷ ᠪᠢ ᠮᠥᠩᠭᠥ ᠬᠤᠷᠢᠶᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠡᠨᠡ ᠰᠠᠢᠨ ᠡᠷᠡ ᠮᠠᠷᠭᠠᠰᠢ ᠢᠷᠡᠵᠦ ᠪᠣᠭᠣᠨᠢ ᠥᠷᠥᠭᠡ ᠶ᠋ᠢ ᠮᠢᠨᠢ ᠪᠠᠯᠪᠠᠴᠢᠵᠤ ᠬᠠᠶᠠᠨᠠ ᠰᠢᠦ ᠭᠡᠵᠦ ᠨᠠᠭᠠᠳᠤᠮ ᠱᠣᠭ ᠭᠠᠷᠭᠠᠨᠠ᠃ ᠵᠠ ᠲᠡᠢᠮᠦ ᠪᠣᠯ ᠰᠠᠢᠬᠠᠨ ᠵᠠᠩ ᠴᠢᠨᠠᠷ ᠲᠤ᠌ ᠨᠢ ᠲᠠᠯᠠᠷᠬᠠᠵᠤ ᠠᠢᠯ ᠡᠷᠦᠬᠡ ᠶ᠋ᠢᠨ ᠲᠠᠨᠢ ᠠᠵᠤ ᠠᠮᠢᠳᠤᠷᠠᠯ ᠠᠵᠢᠯ ᠦᠢᠯᠡᠰ ᠦ᠋ᠨ ᠥᠭᠡᠳᠡᠯᠡᠨ ᠮᠠᠨᠳᠤᠬᠤ ᠶ᠋ᠢ ᠬᠦᠰᠡᠶᠡ ᠭᠡᠳ ᠮᠠᠨᠤᠰ ᠠᠢᠯ ᠠ᠋ᠴᠠ ᠭᠠᠷᠴᠤ ᠦᠷᠭᠦᠯᠵᠢᠯᠡᠨ ᠵᠠᠮ ᠢ᠋ᠶ᠋ᠠᠨ ᠡᠯᠭᠦᠵᠦ ᠰᠦᠪᠡ ᠶ᠋ᠢᠨ ᠭᠣᠣᠯ ᠢ᠋ ᠳᠠᠭᠠᠵᠤ ᠲᠣᠭᠣᠭᠠ ᠮᠡᠲᠦ ᠠᠭᠤᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠲᠣᠭᠣᠰᠣ ᠮᠠᠨᠠᠷᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠨᠢᠳᠦ ᠣᠷᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠠᠭᠤᠯᠠᠨ ᠬᠠᠭᠠᠰ ᠢ᠋ᠶ᠋ᠠᠷ ᠡᠨᠳᠡ ᠲᠡᠨᠳᠡ ᠦᠭᠡᠢ ᠤᠲᠤᠭᠠᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠵᠢᠵᠢᠭ ᠵᠢᠵᠢᠭ ᠦᠢᠯᠡᠳᠪᠦᠷᠢ ᠶ᠋ᠢᠨ ᠪᠠᠢᠰᠢᠩ ᠤ᠋ᠳ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠵᠤ᠂ ᠠᠭᠤᠯᠠᠨ ᠣᠷᠣᠢ ᠬᠡᠰᠦᠭᠰᠡᠨ ᠰᠠᠭᠠᠷᠠᠯ ᠪᠤᠭᠤᠷᠤᠯ ᠢᠮᠠᠭᠠᠳ ᠬᠠᠳᠠ ᠴᠢᠯᠠᠭᠤᠨ ᠵᠠᠪᠰᠠᠷ ᠲᠤ᠌ ᠭᠠᠩ ᠤ᠋ᠨ ᠬᠠᠯᠠᠭᠤᠨ ᠰᠠᠯᠬᠢᠨ ᠢ᠋ᠶ᠋ᠠᠷ ᠰᠤᠷ ᠨᠢ ᠪᠠᠭᠤᠷᠠᠵᠤ ᠥᠩᠭᠡ ᠪᠡᠨ ᠠᠯᠳᠠᠭᠰᠠᠨ ᠡᠪᠡᠰᠦ ᠤᠷᠭᠤᠮᠠᠯ ᠢ᠋ ᠲᠠᠮᠲᠤᠷᠠᠨᠠ᠃ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ ᠠᠭᠤᠯᠠ᠂ ᠨᠢᠭᠡ ᠠᠭᠤᠯᠠ ᠶ᠋ᠢ ᠵᠥᠪ ᠢ᠋ᠶ᠋ᠡᠷ ᠣᠷᠢᠶᠠᠭᠠᠳ ᠭᠠᠷᠬᠤ ᠳ᠋ᠤ᠌ ᠳᠠᠬᠢᠭᠠᠳ ᠨᠥᠭᠦᠭᠡ ᠠᠭᠤᠯᠠ ᠶ᠋ᠢ ᠪᠤᠷᠤᠭᠤ ᠪᠠᠷ ᠣᠷᠢᠶᠠᠭᠠᠳ ᠳᠤᠭᠤᠢᠯᠠᠭᠰᠠᠭᠠᠷ ᠳᠤᠭᠤᠢᠯᠠᠭᠰᠠᠭᠠᠷ ᠲᠣᠯᠣᠭᠠᠢ ᠡᠷᠭᠢᠵᠦ ᠵᠦᠭ ᠴᠢᠭ ᠮᠡᠳᠡᠬᠦ ᠪᠡᠨ ᠪᠠᠢᠵᠤ ᠪᠤᠳᠠᠩ ᠲᠠᠲᠠᠭᠰᠠᠨ ᠲᠡᠷᠭᠡᠳ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠴᠥᠮᠴᠡᠷᠡᠭᠦᠯᠭᠦ ᠳ᠋ᠦ᠍᠂ ᠣᠳᠣ ᠦᠬᠠᠢ ᠬᠣᠲᠠ ᠶ᠋ᠢᠨ ᠵᠠᠭᠠᠭ ᠲᠤ᠌ ᠣᠷᠣᠯᠠ ᠲᠡᠭᠡᠲᠡᠯᠡ ᠪᠠᠰᠠ ᠣᠳᠣ ᠣᠷᠳᠣᠰ ᠬᠣᠲᠠ ᠶ᠋ᠢᠨ ᠵᠠᠭᠠᠭ ᠲᠤ᠌ ᠣᠷᠣᠯᠠ ᠭᠡᠳ ᠳᠠᠬᠢᠨ ᠳᠠᠬᠢᠨ ᠮᠡᠳᠡᠭᠡᠯᠡᠵᠦ ᠪᠠᠢᠪᠠ᠃ ᠣᠳᠣ ᠴᠤ᠌ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠣᠢᠷᠠᠳᠴᠤ ᠪᠠᠢᠬᠤ ᠶᠤᠮ ᠪᠠᠢᠨᠠ ᠭᠡᠵᠦ ᠬᠡᠨ ᠨᠢᠭᠡᠨ ᠳ᠋ᠦ᠍ ᠪᠡᠨ ᠶᠠᠷᠢᠵᠤ ᠪᠠᠢᠲᠠᠯᠠ ᠬᠠᠷᠢᠨ ᠮᠧᠩ ᠰᠢ ᠶ᠋ᠢᠨ ᠨᠡᠭᠦᠷᠡᠰᠦᠨ ᠠᠭᠤᠷᠬᠠᠢ᠂ ᠦᠬᠠᠢ ᠬᠣᠲᠠ ᠶ᠋ᠢᠨ ᠲᠡᠭᠦᠷᠭᠡ᠂ ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠵᠤᠭᠠᠴᠠᠯ ᠤ᠋ᠨ ᠭᠠᠵᠠᠷ ᠭᠡᠬᠦ ᠵᠠᠮ ᠤ᠋ᠨ ᠲᠡᠮᠳᠡᠭ ᠴᠤᠬᠤᠰ ᠴᠤᠬᠤᠰ ᠥᠩᠭᠡᠷᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠵᠠᠮ ᠪᠥᠭᠯᠡᠭᠰᠡᠨ ᠶᠡᠬᠡ ᠲᠡᠷᠭᠡᠨ ᠬᠡᠯᠬᠢᠶᠡ ᠲᠡᠭᠷᠢ ᠲᠤᠯᠤᠮᠠ ᠲᠣᠭᠣᠰᠣ ᠲᠠᠲᠠᠭᠤᠯᠤᠭᠰᠠᠭᠠᠷ ᠰᠠᠯᠠᠭᠠ ᠵᠠᠮ ᠢ᠋ᠶ᠋ᠠᠷ ᠮᠤᠷᠤᠢᠵᠤ ᠠᠷᠤ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠣᠷᠣᠬᠤ ᠪᠠᠷ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠤᠢᠳᠬᠠᠷ ᠲᠠᠢᠯᠤᠭᠳᠠᠵᠤ ᠳᠣᠲᠣᠷᠠ ᠣᠩᠭᠣᠢᠵᠤ ᠠᠪᠤᠯᠠ᠃ ᠵᠠᠯᠭᠠᠭᠠᠳ ᠥᠨᠳᠥᠷ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠤ᠋ᠳ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠨᠠᠷᠠ ᠶ᠋ᠢ ᠬᠠᠯᠬᠠᠯᠠᠨ ᠵᠢᠭᠳᠡᠷᠡᠵᠦ ᠭᠠᠩᠭᠠ ᠵᠢᠯᠠᠭᠠ ᠶ᠋ᠢᠨ ᠣᠢ ᠮᠣᠳᠣ ᠡᠪᠡᠰᠦ ᠤᠷᠭᠤᠮᠠᠯ ᠤ᠋ᠨ ᠠᠩᠬᠢᠯᠤᠮᠠ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠰᠡᠷᠢᠭᠦᠨ ᠠᠮᠢᠰᠬᠤᠯ ᠰᠡᠩᠭᠢᠨᠡᠵᠦ᠂ ᠰᠠᠯᠬᠢ ᠲᠠᠲᠠᠭᠤᠯᠤᠭᠰᠠᠨ ᠲᠡᠷᠭᠡᠨ ᠦ᠌ ᠬᠤᠷᠳᠤᠴᠠ ᠶ᠋ᠢᠨ ᠠᠶᠠ ᠪᠠᠷ ᠦᠵᠡᠲᠡᠯᠡ ᠵᠠᠮ ᠵᠤᠷᠠᠢᠨ ᠵᠤᠷᠠᠢᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠠᠭᠤᠯᠠᠨ ᠡᠩᠭᠡᠷ ᠲᠦ᠍ ᠰᠦᠷᠯᠢᠭ ᠰᠠᠢᠬᠠᠨ ᠪᠠᠢᠷᠢᠰᠢᠯ ᠲᠠᠢ ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠣᠩᠭᠣᠨ ᠳᠦᠷᠢ ᠲᠣᠳᠣᠷᠠᠯᠠ᠃
ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠳ᠋ᠢᠶᠠᠨ ᠠᠭᠤᠢ ᠶ᠋ᠢᠨ ᠨᠡᠷᠡ ᠶ᠋ᠢ ᠨᠠᠰᠤᠨ ᠠ᠋ᠴᠠ ᠪᠠᠨ ᠢᠯᠡᠭᠦᠦ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠶᠤᠮ᠃ ᠥᠨᠥᠳᠥᠷ ᠡᠨᠳᠡ ᠢᠷᠡᠬᠦ ᠪᠡᠷ ᠬᠠᠷᠢᠨ ᠳ᠋ᠢᠶᠠᠨ ᠰᠦᠮᠡ ᠭᠡᠵᠦ ᠠᠰᠲᠠᠭᠠᠨ ᠪᠠᠰᠠ ᠨᠡᠷᠡ ᠲᠡᠢ ᠶ᠋ᠢ ᠰᠠᠶᠢ ᠮᠡᠳᠡᠯᠡ᠃ ᠳ᠋ᠢᠶᠠᠨ ᠰᠦᠮᠡ ᠨᠢ ᠠᠷᠵᠠᠢ ᠠᠭᠤᠢ᠂ ᠮᠠᠮᠪᠠᠷᠡᠽᠠᠡᠭ ᠰᠦᠮᠡ ᠲᠡᠢ ᠨᠡᠢᠯᠡᠭᠡᠳ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠭᠤᠷᠪᠠᠨ ᠶᠡᠬᠡ ᠰᠦᠮᠡ ᠶ᠋ᠢᠨ ᠨᠢᠭᠡ ᠨᠢ ᠭᠡᠨᠡ᠃ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠠ᠋ᠴᠠ ᠦᠵᠡᠪᠡᠯ ᠡᠷᠭᠢᠨ ᠲᠣᠭᠣᠷᠢᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠡᠮᠦᠨᠡᠭᠦᠷ ᠨᠢ ᠳ᠋ᠢᠶᠠᠨ ᠭᠣᠣᠯ ᠲᠠᠢ᠂ ᠬᠣᠢᠲᠤ ᠠᠭᠤᠯᠠᠨ ᠠ᠋ᠴᠠ ᠡᠮᠦᠨᠡᠰᠢ ᠨᠠᠯᠠᠤᠬᠠᠨ ᠡᠩᠭᠡᠷᠯᠢᠭ ᠭᠠᠵᠠᠷ ᠲᠠᠢ᠂ ᠳᠤᠮᠳᠠᠭᠤᠷ ᠨᠢ ᠬᠥᠮᠦᠨ ᠬᠠᠷᠠ ᠲᠡᠷᠭᠡ ᠤᠨᠤᠭᠠ ᠶᠠᠪᠤᠳᠠᠭ ᠥᠷᠭᠡᠨ ᠵᠠᠮ ᠲᠠᠢ᠂ ᠵᠠᠮ ᠤ᠋ᠨ ᠵᠡᠭᠦᠨ ᠡᠷᠭᠢ ᠶ᠋ᠢ ᠳᠠᠭᠠᠭᠠᠳ ᠱᠠᠲᠤᠯᠠᠭᠰᠠᠨ ᠬᠡᠯᠪᠡᠷᠢ ᠶ᠋ᠢ ᠪᠠᠢᠷᠢᠰᠢᠯ ᠢ᠋ᠶ᠋ᠠᠷ ᠭᠤᠷᠪᠠᠨ ᠰᠤᠪᠤᠷᠭᠠ᠂ ᠨᠢᠭᠡ ᠣᠪᠣᠭᠠ᠂ ᠬᠣᠶᠠᠷ ᠰᠦᠮᠡ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠵᠢᠭᠳᠡᠷᠡᠭᠡᠳ ᠳ᠋ᠢᠶᠠᠨ ᠭᠣᠣᠯ ᠤ᠋ᠨ ᠳᠡᠨᠵᠢ ᠬᠦᠷᠴᠦ ᠣᠨᠴᠠ ᠶ᠋ᠢᠨ ᠬᠡᠪ ᠨᠠᠮᠪᠠ ᠲᠠᠢ ᠪᠠᠢᠷᠢᠰᠢᠵᠠᠢ᠃ ᠰᠦᠮᠡ ᠳᠡᠭᠡᠷᠡ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠶᠢᠰᠦᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠨ ᠳ᠋ᠤ᠌ ᠬᠤᠷᠠᠯ ᠬᠤᠷᠠᠵᠤ ᠲᠠᠬᠢᠯᠭᠠ ᠬᠢᠳᠡᠭ ᠭᠡᠨᠡ᠃ ᠵᠠᠮ ᠤ᠋ᠨ ᠪᠠᠷᠠᠭᠤᠨ ᠬᠥᠪᠡᠭᠡ ᠶ᠋ᠢ ᠳᠠᠭᠠᠭᠠᠳ ᠵᠣᠴᠢᠳ ᠲᠤ᠌ ᠳᠥᠭᠥᠮ ᠦᠵᠡᠭᠦᠯᠦᠭᠰᠡᠨ ᠵᠢᠵᠢᠭ ᠬᠤᠳᠠᠯᠳᠤᠭᠠ᠂ ᠬᠡᠳᠦᠨ ᠲᠠᠰᠤᠯᠭᠠ ᠬᠣᠭᠣᠯᠠᠨ ᠭᠡᠷ ᠪᠤᠶᠤ ᠡᠵᠡᠡᠭᠨᠡᠭᠴᠢᠳ ᠦ᠋ᠨ ᠣᠷᠣᠨ ᠰᠠᠭᠤᠴᠠ ᠶ᠋ᠢ ᠭᠠᠷᠭᠠᠪᠠᠯ ᠢᠯᠡᠭᠦᠦ ᠳᠤᠲᠠᠭᠤ ᠭᠡᠷ ᠪᠠᠢᠰᠢᠩ ᠬᠥᠮᠦᠨ ᠬᠠᠷᠠ ᠠᠷᠢᠯᠵᠢᠶᠠ ᠮᠠᠢᠮᠠᠢ ᠭᠡᠳ ᠣᠪᠣᠭᠠᠷᠠᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠮᠪᠤᠷᠬᠠᠨ ᠴᠡᠪᠡᠷ ᠠᠬᠤᠢ ᠲᠠᠢ᠂ ᠶᠠᠭ ᠯᠠ ᠡᠬᠡ ᠪᠠᠢᠭᠠᠯᠢ ᠶ᠋ᠢᠨ ᠨᠠᠮ ᠵᠢᠮ ᠰᠡᠯᠡᠭᠦᠨ ᠣᠷᠴᠢᠨ ᠳ᠋ᠤ᠌ ᠣᠴᠢᠭᠰᠠᠨ ᠮᠡᠲᠦ ᠲᠡᠨᠢᠭᠦᠨ ᠰᠠᠨᠠᠭᠳᠠᠭᠤᠯᠤᠨᠠ᠃ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠠᠭᠤᠯᠠᠨ ᠡᠩᠭᠡᠷ ᠡᠴᠡ ᠣᠨᠳᠣᠷᠴᠤ ᠤᠷᠤᠰᠤᠭᠰᠠᠨ ᠭᠣᠣᠯ ᠭᠤᠷᠪᠠᠨ ᠷᠠᠰᠢᠶᠠᠨ ᠪᠤᠯᠠᠭ ᠲᠠᠢ᠃ ᠬᠠᠮᠤᠭ ᠳᠡᠭᠡᠷᠡ ᠨᠢ ᠵᠢᠷᠦᠬᠡᠨ ᠷᠠᠰᠢᠶᠠᠨ᠂ ᠭᠠᠵᠠᠷ ᠤ᠋ᠨ ᠲᠦᠪᠰᠢᠨ ᠡᠴᠡ ᠪᠠᠷᠤᠭ ᠬᠡᠳᠦᠨ ᠵᠠᠭᠤᠨ ᠮᠧᠲ᠋ᠷ ᠥᠨᠳᠥᠷ ᠳᠠᠬᠢ ᠠᠭᠤᠯᠠᠨ ᠡᠡᠡᠭ ᠡᠴᠡ ᠤᠷᠤᠰᠴᠤ ᠪᠣᠢ᠃ ᠡᠨᠡ ᠷᠠᠰᠢᠶᠠᠨ ᠢ᠋ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠷ ᠤᠤᠭᠤᠪᠠᠯ ᠵᠢᠷᠦᠬᠡᠨ ᠡᠪᠡᠳᠴᠢᠨ ᠳ᠋ᠦ᠍ ᠰᠠᠢᠨ ᠭᠡᠨᠡ᠃ ᠨᠥᠭᠦᠭᠡ ᠬᠣᠶᠠᠷ ᠨᠢ ᠳᠡᠭᠡᠳᠦ ᠰᠤᠪᠤᠷᠭᠠ ᠶ᠋ᠢᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠠᠭᠤᠯᠠᠨ ᠲᠡᠭᠳᠡᠷᠭᠡ ᠡᠴᠡ ᠱᠦᠭᠦᠷᠡᠵᠦ᠂ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠪᠠᠢᠭᠠ ᠨᠢ ᠬᠣᠳᠣᠭᠣᠳᠣᠨ ᠷᠠᠰᠢᠶᠠᠨ᠂ ᠤᠳᠠᠭᠠᠨ ᠴᠢᠨᠠᠷᠲᠠᠢ ᠬᠣᠳᠣᠭᠣᠳᠣᠨ ᠤ᠋ ᠠᠷᠬᠠᠭ ᠭᠡᠮ ᠳ᠋ᠦ᠍ ᠰᠠᠢᠨ᠂ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠬᠢ ᠨᠢ ᠨᠢᠳᠦᠨ ᠷᠠᠰᠢᠶᠠᠨ᠂ ᠦᠷᠭᠦᠯᠵᠢ ᠡᠨᠡ ᠷᠠᠰᠢᠶᠠᠨ ᠢ᠋ᠶ᠋ᠠᠷ ᠨᠢᠳᠦ ᠪᠡᠨ ᠤᠬᠢᠶᠠᠪᠠᠯ ᠨᠢᠳᠦᠨ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠬᠦ ᠶ᠋ᠢ ᠰᠡᠷᠭᠡᠢᠯᠡᠬᠦ ᠪᠤᠶᠤ ᠬᠠᠷᠠᠭᠠ ᠬᠠᠮᠠᠭᠠᠯᠠᠳᠠᠭ ᠭᠡᠨᠡ᠃ ᠡᠨᠡ ᠭᠤᠷᠪᠠᠨ ᠷᠠᠰᠢᠶᠠᠨ ᠨᠢ ᠲᠤᠰ ᠲᠤᠰ ᠤ᠋ᠨ ᠥᠪᠡᠷᠮᠢᠴᠡ ᠳᠠᠪᠠᠭᠤᠯᠢᠭ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠬᠥᠮᠦᠰ ᠦ᠋ᠨ ᠠᠩᠬᠠᠷᠤᠯ ᠳ᠋ᠤ᠌ ᠬᠦᠷᠴᠦ ᠣᠯᠠᠨ ᠠᠷᠪᠢᠨ ᠵᠤᠭᠠᠴᠠᠭᠰᠠᠳ ᠤ᠋ᠨ ᠰᠡᠳᠬᠢᠯ ᠢ᠋ ᠲᠡᠳᠡᠨ ᠪᠡᠶᠡ ᠪᠡᠨ ᠡᠷᠭᠦᠯᠵᠢᠭᠦᠯᠭᠦ ᠶ᠋ᠢᠨ ᠲᠤᠰᠠᠳᠠ ᠳ᠋ᠢᠶᠠᠨ ᠰᠦᠮᠡ ᠳ᠋ᠦ᠍ ᠮᠥᠷᠭᠥᠵᠦ ᠪᠤᠶᠠᠨ ᠬᠡᠰᠢᠭ ᠢ᠋ᠶ᠋ᠡᠨ ᠳᠠᠭᠠᠳᠬᠠᠳᠠᠭ ᠶᠤᠮ ᠪᠠᠢᠨᠠ᠃ ᠡᠨᠡ ᠡᠳᠦᠷ ᠮᠠᠨᠤᠰ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠦᠨᠡᠬᠡᠷ ᠢᠷᠦᠭᠡᠯ ᠲᠡᠢ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ᠃ ᠦᠳᠡ ᠶ᠋ᠢᠨ ᠡᠮᠦᠨᠡ ᠰᠢᠷᠬᠠ ᠶ᠋ᠢᠨ ᠪᠤᠯᠠᠭ ᠤ᠋ᠨ ᠷᠠᠰᠢᠶᠠᠨ ᠢ᠋ ᠤᠤᠭᠤᠵᠤ᠂ ᠬᠣᠳᠣᠭᠣᠳᠣ ᠭᠡᠳᠡᠰᠦ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠠᠷᠢᠭᠤᠳᠬᠠᠵᠤ ᠠᠪᠤᠭᠰᠠᠨ ᠪᠣᠯ ᠦᠳᠡ ᠶ᠋ᠢᠨ ᠬᠣᠢᠨᠠ ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠷᠠᠰᠢᠶᠠᠨ ᠢ᠋ ᠤᠤᠭᠤᠵᠤ ᠤᠬᠢᠶᠠᠭᠠᠳ ᠭᠱᠠᠨ ᠵᠠᠭᠤᠷᠠ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠶᠠᠳᠠᠷᠠᠭᠠ ᠵᠦᠳᠡᠷᠡᠭᠡ ᠲᠠᠢᠯᠤᠭᠳᠠᠵᠤ ᠨᠢᠭᠡ ᠡᠳᠦᠷ ᠢ᠋ ᠵᠢᠷᠭᠠᠯ ᠲᠠᠢ ᠥᠩᠭᠡᠷᠡᠭᠦᠯᠵᠡᠢ᠃ ᠵᠠᠯᠭᠠᠭᠠᠳ ᠣᠷᠣᠢ ᠶ᠋ᠢᠨ ᠬᠣᠨᠣᠭ ᠬᠣᠭᠣᠯᠠᠨ ᠴᠠᠭ ᠪᠣᠯᠵᠤ ᠠᠯᠳᠠᠷ ᠨᠡᠷᠡ ᠪᠡᠷ ᠢ᠋ᠶ᠋ᠡᠨ ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠳᠠᠭᠤᠷᠢᠰᠤᠭᠰᠠᠨ ᠠᠷᠪᠠᠰ ᠤ᠋ᠨ ᠴᠠᠭᠠᠨ ᠢᠮᠠᠭᠠᠨ ᠤ᠋ ᠠᠮᠲᠠᠲᠤ ᠵᠠᠭᠤᠰᠢ ᠳ᠋ᠤ᠌ ᠪᠠᠭᠤᠯᠠ᠃ ᠥᠩᠭᠡ ᠪᠣᠳᠣᠭ ᠢ᠋ᠶ᠋ᠠᠷ ᠭᠣᠶᠣᠯᠠᠨ ᠴᠢᠮᠡᠭᠰᠡᠨ ᠠᠭᠤᠵᠢᠮ ᠮᠣᠩᠭᠣᠯ ᠭᠡᠷ ᠲᠦ᠍ ᠲᠠᠩᠰᠤᠭ ᠰᠠᠢᠬᠠᠨ ᠢᠳᠡᠭᠡᠨ ᠢ᠋ ᠵᠣᠭᠣᠭᠯᠠᠵᠤ ᠠᠷᠢᠬᠢ ᠰᠠᠷᠬᠤᠳ ᠢ᠋ᠶ᠋ᠠᠨ ᠡᠷᠭᠦᠵᠦ ᠠᠷᠠᠳ ᠤ᠋ᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ ᠨᠠᠷᠭᠢᠨ ᠴᠡᠩᠭᠡᠬᠦ ᠲᠠᠰᠢᠷᠠᠮ ᠢ᠋ᠶ᠋ᠠᠷ ᠮᠠᠨ ᠤ᠋ ᠬᠣᠶᠠᠷ ᠦᠯᠢᠭᠡᠷᠴᠢᠨ ᠨᠠᠢᠵᠠ ᠰᠡᠳᠬᠢᠯ ᠪᠡᠶᠡᠰᠦᠨ ᠬᠥᠭᠰᠡᠵᠦ ᠬᠥᠭᠡᠷᠦᠯᠳᠦᠭᠡᠳ ᠳ᠋ᠢᠶᠠᠨ ᠰᠦᠮᠡ᠂ ᠤᠷᠠᠨᠳᠥ᠋ᠰᠢ ᠶ᠋ᠢᠨ ᠭᠠᠢᠬᠠᠮᠰᠢᠭ ᠢ᠋ ᠳᠤᠷᠠᠰᠴᠤ ᠡᠬᠢᠯᠡᠯᠡ᠃
ᠳ᠋ᠢᠶᠠᠨ ᠰᠦᠮᠡ ᠶ᠋ᠢ ᠡᠨᠳᠡ ᠪᠠᠢᠭᠤᠯᠤᠭᠰᠠᠨ ᠨᠢ ᠶᠡᠬᠡ ᠦᠯᠢᠭᠡᠷ ᠤᠴᠢᠷ ᠲᠠᠢ ᠶᠤᠮ ᠭᠡᠨᠯᠡᠢ᠃ ᠣᠳᠣ ᠪᠣᠳᠣᠪᠠᠯ ᠪᠠᠷᠤᠭ ᠰᠢᠷᠠ ᠶ᠋ᠢᠨ ᠱᠠᠵᠢᠨ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠳᠡᠯᠭᠡᠷᠡᠬᠦ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠪᠠ᠂ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠵᠦ ᠪᠢᠰᠢᠯᠭᠠᠯ ᠬᠢᠭᠰᠡᠨ ᠨᠢᠭᠡ ᠯᠠᠮᠠ ᠠᠷᠪᠠᠰ ᠤ᠋ᠨ ᠠᠭᠤᠯᠠᠨ ᠤ᠋ ᠥᠪᠡᠷᠮᠢᠴᠡ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠠᠰᠢᠭᠯᠠᠵᠤ ᠰᠦᠮᠡ ᠳᠤᠭᠠᠩ ᠪᠠᠢᠭᠤᠯᠬᠤ ᠪᠠᠷ ᠬᠡᠴᠢᠨᠡᠭᠡᠨ ᠡᠳᠦᠷ ᠶᠠᠪᠤᠵᠤ ᠭᠠᠵᠠᠷ ᠢ᠋ ᠪᠠᠷᠠᠭᠰᠠᠨ ᠪᠣᠯᠪᠠᠴᠤ ᠰᠠᠨᠠᠭᠠᠨ ᠳ᠋ᠤ᠌ ᠲᠠᠭᠠᠷᠠᠭᠰᠠᠨ ᠲᠣᠬᠢᠯᠢᠭ ᠭᠠᠵᠠᠷ ᠣᠯᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠨᠢᠭᠡ ᠡᠳᠦᠷ ᠯᠠᠮᠠ ᠴᠠᠩᠭᠠᠵᠤ ᠥᠯᠥᠰᠦᠭᠡᠳ ᠶᠠᠳᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ᠂ ᠨᠠᠷᠠ ᠰᠢᠩᠭᠡᠬᠦ ᠶ᠋ᠢᠨ ᠠᠯᠳᠠᠰ ᠢ᠋ᠶ᠋ᠠᠷ ᠡᠨᠡ ᠪᠢᠲᠡᠭᠦᠦ ᠠᠭᠤᠯᠠᠨ ᠳ᠋ᠤ᠌ ᠢᠷᠡᠵᠦ ᠷᠠᠰᠢᠶᠠᠨ ᠠ᠋ᠴᠠ ᠤᠤᠭᠤᠵᠤ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠬᠠᠵᠠᠭᠤ ᠳ᠋ᠤ᠌ ᠨᠢ ᠪᠡᠶᠡ ᠪᠡᠨ ᠠᠮᠠᠷᠠᠭᠠᠵᠤ ᠡᠮᠦᠨᠡ ᠪᠠᠢᠭᠠ ᠵᠡᠷᠭᠡᠴᠡᠭᠡ ᠬᠣᠶᠠᠷ ᠠᠭᠤᠯᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠭᠠᠳ ᠬᠠᠵᠠᠭᠤᠯᠠᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠴᠢᠬᠢ ᠳᠦᠯᠡᠢᠷᠡᠭᠦᠯᠦᠮᠡ 《ᠲᠦᠩ》 ᠭᠡᠰᠡᠨ ᠨᠦᠰᠡᠷ ᠳᠠᠭᠤᠨ ᠭᠠᠷᠬᠤ ᠪᠠᠷ ᠵᠡᠭᠦᠨ ᠠᠭᠤᠯᠠ ᠶ᠋ᠢᠨ ᠬᠢᠨᠢ ᠪᠠᠷᠠᠭᠤᠨ ᠡᠩᠭᠡᠷ ᠲᠦ᠍ ᠲᠣᠭᠣᠰᠣ ᠳᠡᠭᠳᠡᠵᠦ ᠨᠢᠭᠡᠨ《ᠤᠯᠠᠭᠠᠨ ᠬᠠᠳᠠᠨ ᠰᠤᠪᠤᠷᠭᠠ》 ᠭᠠᠷᠴᠤ ᠢᠷᠡᠭᠰᠡᠨ ᠶᠦᠮ ᠭᠡᠨᠡ᠃ ᠯᠠᠮᠠ ᠰᠣᠴᠢᠬᠤ ᠲᠠᠢ ᠠᠶᠤᠬᠤ ᠲᠠᠢ ᠲᠡᠷᠡ ᠳᠣᠣᠷᠠ ᠪᠠᠨ ᠡᠷᠢᠭᠡ ᠪᠡᠨ ᠪᠠᠷᠢᠵᠤ ᠵᠠᠯᠪᠠᠷᠢᠭᠠᠳ ᠣᠮ ᠮᠠ ᠨᠢ ᠪᠠᠳ ᠮᠠᠢ ᠬᠣᠩ ᠭᠡᠳᠡᠭ ᠮᠠᠨᠢ ᠶ᠋ᠢᠨ ᠵᠢᠷᠭᠤᠭᠠᠨ ᠦᠰᠦᠭ ᠢ᠋ᠶ᠋ᠡᠨ ᠤᠩᠰᠢᠵᠤ ᠪᠦᠲᠦᠨ ᠰᠥᠨᠢ ᠶ᠋ᠢ ᠥᠩᠭᠡᠷᠡᠭᠦᠯᠵᠡᠢ᠃
ᠳᠠᠷᠠᠭᠠ ᠥᠷᠯᠥᠭᠡ ᠨᠢ ᠲᠡᠭᠷᠢ ᠭᠡᠭᠡᠷᠡᠬᠦ ᠪᠡᠷ ᠤᠯᠠᠭᠠᠨ ᠰᠤᠪᠤᠷᠭᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠳᠠᠪ ᠪᠣᠰᠤᠭᠠ ᠪᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠳ᠋ᠤ᠌ ᠯᠠᠮᠠ ᠶᠡᠬᠡᠳᠡ ᠭᠠᠢᠬᠠᠰᠢ ᠠᠯᠳᠠᠵᠤ ᠲᠡᠷᠡ ᠳᠣᠣᠷᠠ ᠪᠠᠨ ᠪᠣᠰᠴᠤ ᠶᠠᠪᠤᠭᠠᠳ ᠳ᠋ᠢᠶᠠᠨ ᠭᠣᠣᠯ ᠢ᠋ ᠲᠤᠭᠤᠯᠵᠤ ᠠᠭᠤᠯᠠ ᠳᠠᠪᠠᠨ ᠤᠯᠠᠭᠠᠨ ᠰᠤᠪᠤᠷᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠡᠷᠭᠢᠨ ᠲᠣᠭᠣᠷᠢᠨ ᠰᠢᠨᠵᠢᠵᠦ ᠰᠢᠨᠵᠢᠭᠡᠳ ᠠᠰ ᠬᠣᠢᠰᠢ ᠪᠠᠨ ᠬᠠᠷᠠᠪᠠᠯ ᠥᠨᠳᠥᠷ ᠠᠭᠤᠯᠠ ᠪᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠷᠠᠰᠢᠶᠠᠨ ᠪᠤᠯᠠᠭ ᠤ᠋ᠨ ᠤᠮᠳᠠ ᠲᠠᠢ᠂ ᠨᠠᠷᠠ ᠨᠢᠭᠤᠷᠯᠠᠭᠰᠠᠨ ᠡᠩᠭᠡᠷ ᠲᠡᠢ᠂ ᠡᠭᠦᠯᠡ ᠭᠦᠯᠦᠭᠯᠡᠭᠰᠡᠨ ᠭᠣᠣᠯ ᠲᠠᠢ᠂ ᠤᠯᠠᠭᠠᠨ ᠰᠤᠪᠤᠷᠭᠠ ᠶ᠋ᠢᠨ ᠪᠠᠷᠠ ᠲᠠᠢ᠂ ᠠ ᠡᠨᠡ ᠭᠠᠵᠠᠷ ᠪᠣᠯ ᠮᠢᠨᠦ ᠰᠦᠮᠡ ᠬᠡᠢᠳ ᠪᠠᠢᠭᠤᠯᠵᠤ ᠪᠢᠰᠢᠯᠭᠠᠯ ᠬᠢᠬᠦ ᠪᠡᠷ ᠡᠷᠢᠵᠦ ᠶᠠᠪᠤᠭᠰᠠᠨ ᠭᠠᠵᠠᠷ ᠪᠣᠯᠠᠢ ᠭᠡᠵᠦ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠭᠰᠠᠨ ᠪᠠᠢᠨᠠ᠃ ᠢᠡᠭᠭᠡᠭᠡᠳ ᠳᠠᠷᠤᠢ ᠳ᠋ᠤ᠌ ᠨᠢ ᠬᠥᠮᠦᠨ ᠬᠠᠷᠠ ᠣᠯᠵᠤ ᠰᠦᠮᠡ ᠪᠠᠢᠭᠤᠯᠤᠭᠠᠳ ᠬᠦᠰᠡᠯ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠵᠦ ᠭᠡᠨᠡ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠳ᠋ᠢᠶᠠᠨ ᠰᠦᠮᠡ ᠨᠢ ᠠᠷᠪᠠᠰ ᠤ᠋ᠨ ᠠᠭᠤᠯᠠᠨ ᠤ᠋ ᠭᠦᠨ ᠵᠢᠯᠠᠭᠠ ᠳ᠋ᠤ᠌ ᠦᠶᠡ ᠤᠯᠠᠷᠢᠨ ᠣᠯᠠᠨ ᠪᠢᠰᠢᠯᠭᠠᠭᠴᠢᠳ ᠤ᠋ᠨ ᠰᠦᠰᠦᠭᠯᠡᠯ ᠦ᠋ᠨ ᠣᠷᠣᠨ ᠪᠣᠯᠵᠤ ᠥᠨᠥᠳᠥᠷ ᠲᠦ᠍ ᠭᠦᠷᠤᠭᠰᠡᠨ ᠰᠢᠦ ᠭᠡᠵᠦ ᠪᠣ ᠠᠪᠤᠭᠠᠢ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠮᠦᠷᠭᠦᠯᠭᠦ ᠵᠠᠭᠤᠷᠠ ᠵ ᠠᠪᠤᠭᠠᠢ ᠵᠠᠪᠳᠤᠵᠤ ᠦᠭᠡ ᠶ᠋ᠢ ᠨᠢ ᠡᠯᠭᠦᠵᠦ ᠠᠪᠤᠭᠠᠳ ᠲᠠᠨᠤᠰ ᠰᠠᠶᠢᠬᠠᠨ ᠳᠡᠭᠡᠳᠦ ᠰᠤᠪᠤᠷᠭᠠ ᠶ᠋ᠢᠨ ᠡᠭᠦᠳᠡᠨ ᠲᠠᠯᠠ ᠳ᠋ᠤ᠌ ᠭᠣᠣᠯ ᠤ᠋ᠨ ᠳᠡᠨᠵᠢ ᠡᠭᠴᠡ ᠬᠠᠳᠠᠨ ᠤ᠋ ᠢᠷᠮᠡᠭ ᠳᠡᠭᠡᠷᠡ ᠨᠢᠭᠡ ᠲᠠᠪᠠᠭ ᠬᠠᠢᠯᠠᠰᠤ ᠤᠷᠭᠤᠵᠤ ᠪᠠᠢᠬᠤ ᠶ᠋ᠢ ᠠᠵᠢᠶᠠᠷᠠᠪᠠ ᠤ᠋ᠤ ? ᠲᠡᠷᠡ ᠬᠠᠢᠯᠠᠰᠤ ᠶ᠋ᠢ 《ᠰᠠᠬᠢᠭᠤᠯᠰᠤᠨ ᠮᠣᠳᠣ》 ᠭᠡᠳᠡᠭ ᠃ ᠬᠡᠴᠢᠨᠡᠭᠡᠨ ᠵᠢᠯ ᠪᠣᠯᠤᠭᠰᠠᠨ ᠢ᠋ ᠬᠡᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠶᠦᠮ᠃ ᠰᠠᠯᠠᠭᠠ ᠨᠠᠮᠠᠭᠠ ᠠ᠋ᠴᠠ ᠨᠢ ᠣᠯᠠᠨ ᠥᠩᠭᠡ ᠶ᠋ᠢᠨ ᠬᠠᠳᠠᠭ ᠡᠯᠭᠦᠵᠦ ᠪᠠᠢᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠵᠠᠷᠢᠮ ᠰᠠᠯᠠᠭᠠᠨ ᠳ᠋ᠤ᠌ ᠨᠢ ᠢᠰᠢᠭᠡ ᠢᠮᠨᠡᠭᠰᠡᠨ ᠴᠢᠬᠢᠨ ᠮᠠᠯᠲᠠᠭᠠᠰᠤ ᠶ᠋ᠢ ᠬᠡᠯᠬᠢᠭᠡᠳ ᠰᠣᠨᠳᠣᠷ ᠰᠢᠭ᠋ ᠵᠡᠭᠦᠭᠰᠡᠨ ᠪᠠᠢᠳᠠᠭ ᠶᠤᠮ᠃
ᠬᠠᠢᠯᠠᠰᠤᠨ ᠤ᠋ ᠢᠷᠣᠭᠠᠷ ᠲᠤ᠌ ᠬᠥᠮᠦᠨ ᠦ᠌ ᠤᠷᠤᠭᠤᠯ ᠠᠮᠠ ᠮᠡᠲᠦ ᠠᠩᠭᠠᠢᠵᠤ ᠳᠡᠷᠪᠡᠢᠭᠰᠡᠨ ᠬᠡᠯᠪᠡᠷᠢ ᠲᠡᠢ ᠶᠠᠩᠵᠤ ᠶ᠋ᠢᠨ ᠮᠣᠳᠣᠨ ᠶᠠᠷᠠ ᠴᠤ᠌ ᠶᠤᠮ ᠤ᠋ᠤ᠂ ᠳᠠᠯᠠᠩ ᠴᠤ᠌ ᠶᠤᠮ ᠤ᠋ᠤ ᠭᠡᠮᠡᠷ ᠪᠠᠨᠲᠠᠭᠠᠢ ᠲᠠᠢ ᠪᠣᠢ᠃ ᠲᠡᠭᠡᠪᠡᠯ ᠲᠤᠰ ᠰᠦᠮᠡ ᠳ᠋ᠦ᠍ ᠭᠤᠴᠢᠨ ᠵᠢᠯ ᠰᠠᠭᠤᠵᠤ ᠦᠢᠯᠡᠴᠢᠯᠡᠭᠡ ᠶ᠋ᠢᠨ ᠠᠵᠢᠯ ᠬᠢᠭᠰᠡᠨ ᠴᠠᠭᠠᠨᠳᠠᠮᠠ ᠨᠠᠰᠤᠲᠠᠨ ᠤ᠋ ᠬᠡᠯᠡᠬᠦ ᠪᠡᠷ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠤᠯᠠᠭᠠᠨ ᠰᠢᠭᠤᠷᠭᠠᠨ ᠤ᠋ ᠳᠤᠮᠳᠠ 《ᠳᠥᠷᠪᠡᠨ ᠬᠠᠭᠤᠴᠢᠨ》 ᠢ᠋ ᠡᠪᠳᠡᠬᠦ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠰᠦᠮᠡ ᠬᠡᠢᠳ ᠢ᠋ ᠪᠠᠯᠪᠠᠴᠢᠵᠤ ᠯᠠᠮᠠ ᠬᠤᠸᠠᠷᠠᠭ ᠢ᠋ ᠲᠡᠮᠡᠴᠡᠵᠦ ᠥᠭᠡᠷᠡᠴᠢᠯᠡᠯᠲᠡ ᠬᠢᠵᠦ ᠪᠠᠢᠬᠤ ᠴᠠᠭ ᠦᠶᠡ ᠳ᠋ᠦ᠍ ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠣᠷᠴᠢᠮ《ᠴᠠᠪᠴᠢᠷᠠ ᠶ᠋ᠢᠨ ᠨᠡᠭᠦᠷᠡᠰᠦᠨ ᠠᠭᠤᠷᠬᠠᠢ》 ᠨᠡᠭᠡᠭᠡᠭᠳᠡᠵᠦ ᠶᠡᠬᠡ ᠪᠡᠷ ᠲᠤᠯᠭᠠᠭᠤᠷᠢ ᠮᠣᠳᠣ ᠬᠡᠷᠡᠭᠴᠡᠭᠡ ᠲᠡᠢ ᠪᠣᠯᠵᠠᠢ᠃ ᠢᠡᠭᠭᠡᠭᠡᠳ ᠰᠦᠮᠡ ᠶ᠋ᠢᠨ ᠬᠠᠪᠢ ᠪᠠᠷ ᠬᠢ ᠪᠠᠢᠭᠠᠯᠢ ᠠᠬᠤᠢ ᠶ᠋ᠢ ᠡᠪᠳᠡᠯᠡᠨ ᠮᠣᠳᠣ ᠶ᠋ᠢ ᠬᠢᠷᠥᠭᠡᠳᠡᠵᠦ ᠴᠠᠪᠴᠢᠭᠠᠳ ᠳᠡᠭᠡᠳᠦ ᠰᠤᠪᠤᠷᠭᠠ ᠶ᠋ᠢᠨ ᠡᠮᠦᠨᠡᠬᠢ ᠬᠡᠳᠦᠨ ᠲᠠᠪᠠᠭ ᠳᠡᠭᠡᠷᠡ ᠬᠦᠷᠴᠦ ᠣᠯᠠᠨ ᠬᠥᠮᠦᠰ ᠨᠢ ᠶᠠᠪᠤᠭᠠᠳ ᠭᠤᠷᠪᠠ ᠨᠢ ᠦᠯᠡᠳᠡᠵᠦ ᠦᠷᠭᠦᠯᠵᠢᠯᠡᠨ ᠬᠢᠷᠥᠭᠡᠳᠡᠵᠦ ᠭᠡᠨᠡ᠃ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠨᠢᠭᠡ ᠲᠠᠪᠠᠭ ᠳᠡᠭᠡᠷᠡ ᠢᠷᠡᠭᠡᠳ ᠬᠢᠷᠥᠭᠡᠳᠡᠵᠦ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠨᠢ ᠴᠢᠰᠤ ᠪᠠᠷ ᠪᠥᠭᠡᠯᠵᠢᠵᠦ ᠪᠠᠷᠢᠨ ᠳᠣᠣᠷᠠ ᠨᠢ ᠦᠬᠦᠵᠦ ᠭᠡᠨᠡ᠃ ᠬᠠᠵᠠᠭᠤ ᠳ᠋ᠤ᠌ ᠨᠢ ᠪᠠᠢᠭᠰᠠᠨ ᠨᠢᠭᠡ ᠨᠢ ᠮᠠᠭᠤ ᠪᠣᠯᠤᠭᠰᠠᠨ ᠢ᠋ ᠦᠵᠡᠭᠡᠳ ᠠᠶᠤᠬᠤ ᠳ᠋ᠤ᠌ ᠪᠠᠨ ᠳᠤᠲᠠᠭᠠᠵᠠᠢ᠃ ᠨᠥᠭᠦᠭᠡ ᠨᠢᠭᠡ ᠨᠢ ᠰᠦᠮᠡ ᠶ᠋ᠢᠨ ᠴᠢᠳᠬᠥᠷ ᠡᠴᠡ ᠴᠤ᠌ ᠠᠶᠤᠭᠰᠠᠨ ᠦᠭᠡᠢ ᠪᠠᠢᠭᠠᠳ ᠡᠭᠦᠨ ᠡᠴᠡ ᠶᠠᠭᠤᠨ ᠳ᠋ᠤ᠌ ᠠᠶᠤᠬᠤ ᠪᠣᠢ ᠭᠡᠳ ᠵᠠᠯᠭᠠᠭᠠᠳ ᠬᠢᠷᠥᠭᠡᠳᠡᠵᠦ ᠭᠡᠨᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠣᠳᠣ᠄《ᠨᠠᠮᠠ ᠶ᠋ᠢ ᠪᠤᠤ ᠬᠢᠷᠥᠭᠡᠳᠡ》 ᠭᠡᠵᠦ ᠬᠡᠯᠡᠬᠦ ᠲᠡᠢ ᠵᠡᠷᠭᠡ ᠭᠢᠷᠤᠭᠡᠨ ᠢᠷ ᠢ᠋ ᠳᠠᠭᠠᠭᠠᠳ ᠤᠯᠠᠭᠠᠨ ᠴᠢᠰᠤ ᠤᠷᠤᠰᠴᠤ ᠭᠡᠨᠡ᠃ ᠲᠡᠷᠡ ᠬᠥᠮᠦᠨ ᠴᠢᠰᠤ ᠶ᠋ᠢ ᠦᠵᠡᠭᠡᠳ ᠲᠤᠢᠯ ᠢ᠋ᠶ᠋ᠠᠷ ᠠᠶᠤᠵᠤ ᠰᠣᠴᠢᠨ ᠶᠠᠭᠠᠬᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠪᠠᠯᠠᠭ ᠠᠯᠳᠠᠵᠤ ᠪᠠᠢᠲᠠᠯᠠ ᠬᠠᠮᠠᠷ ᠠ᠋ᠴᠠ ᠨᠢ ᠪᠠᠰᠠ ᠴᠢᠰᠤ ᠭᠣᠭᠣᠵᠢᠭᠠᠳ ᠲᠣᠭᠲᠠᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠲᠦᠷᠭᠡᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠠᠪᠤᠷᠠᠯᠲᠠ ᠬᠢᠭᠡᠳ ᠰᠠᠶᠢ ᠠᠮᠢ ᠮᠡᠨᠳᠦ ᠭᠠᠷᠴᠤ ᠭᠡᠨᠡ᠃ ᠰᠡᠭᠦᠯᠡᠷ ᠨᠢ ᠲᠡᠷᠡ ᠮᠣᠳᠣ ᠤᠰᠤ ᠤᠮᠳᠠ ᠰᠢᠮᠡ ᠲᠡᠵᠢᠭᠡᠯ ᠬᠦᠷᠬᠦ ᠦᠭᠡᠢ ᠡᠴᠡ ᠪᠣᠯᠵᠤ ᠬᠠᠲᠠᠵᠤ ᠦᠬᠦᠮᠡᠷ ᠪᠠᠢᠬᠤ ᠳ᠋ᠤ᠌᠂ ᠰᠦᠮᠡ ᠶ᠋ᠢᠨ ᠯᠠᠮᠠ ᠬᠤᠸᠠᠷᠠᠭ ᠪᠢᠰᠢᠯᠭᠠᠯ ᠬᠢᠭᠰᠡᠳ ᠳ᠋ᠢᠶᠠᠨ ᠭᠣᠣᠯ ᠠ᠋ᠴᠠ ᠵᠠᠮᠠᠭ ᠱᠦᠭᠦᠵᠦ ᠠᠪᠴᠢᠷᠠᠭᠠᠳ ᠰᠢᠷᠬᠠ ᠶ᠋ᠢ ᠨᠢ ᠴᠢᠩᠭᠠᠬᠠᠨ ᠪᠠᠭᠯᠠᠵᠤ ᠪᠣᠭᠣᠵᠤ ᠲᠠᠯᠪᠢᠭᠰᠠᠨ ᠠ᠋ᠴᠠ ᠳᠠᠬᠢᠨ ᠰᠠᠢᠬᠠᠨ ᠠᠮᠢᠯᠠᠵᠤ ᠤᠷᠭᠤᠭᠰᠠᠨ ᠶᠤᠮ᠃ ᠲᠤᠬᠠᠢ ᠶ᠋ᠢᠨ ᠬᠢᠷᠥᠭᠡᠳᠡᠭᠰᠡᠨ ᠣᠷᠣᠮ ᠨᠢ ᠣᠳᠣᠬᠢ ᠶ᠋ᠢᠨ ᠲᠡᠷᠡ ᠪᠠᠨᠲᠠᠭᠠᠢ ᠶᠠᠷᠠ ᠪᠣᠯᠤᠨᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠡᠨᠡ ᠬᠠᠢᠯᠠᠰᠤ ᠶ᠋ᠢ ᠰᠠᠬᠢᠭᠤᠯᠰᠤᠨ ᠮᠣᠳᠣ ᠭᠡᠵᠦ ᠰᠦᠰᠦᠭᠯᠡᠨ ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠢᠷᠡᠵᠦ ᠮᠥᠷᠭᠥᠬᠦ ᠡᠷᠡᠭᠦᠯ ᠡᠩᠬᠡ᠂ ᠠᠮᠤᠷ ᠮᠡᠨᠳᠦ᠂ ᠠᠵᠤ ᠠᠮᠢᠳᠤᠷᠠᠯ᠂ ᠬᠡᠰᠢᠭ ᠪᠤᠶᠠᠨ ᠠᠮᠢ ᠨᠠᠰᠤ᠂ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠠᠮᠠᠯᠳᠠᠨ ᠳᠠᠭᠠᠳᠬᠠᠭᠰᠠᠭᠠᠷ ᠢᠷᠡᠭᠰᠡᠨ ᠭᠡᠨᠡ ᠭᠡᠪᠡ᠃
ᠦᠭᠡ ᠣᠯᠠᠳᠠᠵᠤ ᠦᠯᠢᠭᠡᠷ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠴᠠᠭ ᠪᠠᠬᠠᠨ ᠣᠷᠣᠢᠲᠠᠬᠤ ᠪᠠᠷ ᠬᠡᠨ ᠠᠯᠢᠨ ᠨᠢ ᠪᠦᠷ ᠮᠠᠷᠭᠠᠰᠢ ᠥᠷᠯᠥᠭᠡ ᠶ᠋ᠢᠨ ᠠᠭᠤᠯᠠ ᠳᠠᠪᠠᠬᠤ ᠤᠴᠢᠷ ᠶᠠᠪᠤᠳᠠᠯ ᠳ᠋ᠤ᠌ ᠪᠠᠨ ᠰᠠᠨᠠᠭᠠ ᠪᠣᠯᠤᠨᠠ᠃ ᠣᠷᠣᠢ ᠨᠢ ᠮᠠᠨᠤᠰ ᠪᠤᠶᠠᠨ ᠲᠠᠢ ᠬᠣᠶᠠᠷ ᠵᠠᠮ ᠤ᠋ᠨ ᠠᠬᠠᠯᠠᠭᠴᠢ ᠶ᠋ᠢᠨ ᠠᠴᠢ ᠪᠠᠷ ᠰᠦᠮᠡ ᠶ᠋ᠢᠨ ᠣᠯᠠᠨ ᠮᠠᠮᠠ ᠨᠠᠷ ᠤ᠋ᠨ ᠨᠣᠮ ᠤᠩᠰᠢᠵᠤ ᠬᠤᠷᠠᠯ ᠬᠤᠷᠠᠬᠤ ᠳ᠋ᠤ᠌ ᠬᠣᠨᠣᠵᠤ ᠥᠨᠵᠢᠳᠡᠭ ᠴᠡᠪᠡᠷ ᠲᠣᠬᠢᠯᠢᠭ ᠪᠠᠢᠷᠢᠨ ᠳ᠋ᠤ᠌ ᠮᠥᠩᠭᠥ ᠵᠣᠭᠣᠰ ᠦᠭᠡᠢ ᠠᠮᠤᠷ ᠲᠣᠭᠲᠠᠭᠤᠨ ᠬᠣᠨᠣᠬᠤ ᠪᠣᠯᠤᠭᠰᠠᠨ ᠨᠢ ᠬᠤᠪᠢ ᠪᠠᠷ ᠣᠯᠳᠠᠭᠰᠠᠨ ᠥᠨᠥᠳᠥᠷ ᠦ᠋ᠨ ᠠᠵᠠ ᠭᠡᠵᠦ ᠮᠡᠳᠡ᠃
ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠨᠠᠷᠠ ᠭᠠᠷᠬᠤ ᠨᠢ ᠣᠷᠣᠢ᠂ ᠰᠢᠩᠭᠡᠬᠦ ᠨᠢ ᠡᠷᠲᠡ ᠭᠡᠵᠦ ᠬᠡᠯᠡᠳᠡᠭ ᠨᠢ ᠦᠨᠡᠨ ᠶᠦᠮ ᠪᠠᠢᠨᠠ᠃ ᠣᠷᠣᠢ ᠶ᠋ᠢᠨ ᠳᠣᠯᠣᠭᠠᠨ ᠴᠠᠭ ᠤ᠋ᠨ ᠠᠯᠳᠠᠰ ᠢ᠋ᠶ᠋ᠠᠷ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ ᠣᠷᠣᠵᠤ ᠠᠯᠭᠤᠷ ᠢ᠋ᠶ᠋ᠠᠷ ᠰᠥᠨᠢ ᠶ᠋ᠢᠨ ᠬᠥᠰᠢᠭᠡ ᠪᠠᠭᠤᠯᠠ᠃ ᠦᠳᠡᠰᠢ ᠰᠠᠨᠠᠭᠠᠨ ᠳ᠋ᠤ᠌ ᠲᠠᠭᠠᠯᠠᠭᠳᠠᠭᠰᠠᠨ ᠨᠢᠭᠡ ᠡᠳᠦᠷ ᠦ᠋ᠨ ᠦᠯᠢᠭᠡᠷ ᠤᠴᠢᠷ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ ᠡᠷᠭᠢᠯᠳᠦᠬᠦ ᠪᠡᠷ ᠨᠣᠢᠷ ᠬᠤᠯᠵᠢᠵᠤ ᠭᠠᠳᠠᠨᠠ ᠭᠠᠷᠪᠠᠯ ᠣᠭᠲᠠᠷᠭᠤᠢ ᠲᠣᠪ ᠲᠤᠩᠭᠠᠯᠠᠭ ᠣᠳᠣᠨ ᠮᠡᠴᠢᠳ ᠭᠢᠯᠠᠯᠵᠠᠨᠠ᠃ ᠨᠠᠮᠠ ᠶ᠋ᠢ ᠪᠠᠭᠠ ᠪᠠᠢᠬᠤ ᠳ᠋ᠤ᠌ ᠵᠤᠨ ᠤ᠋ ᠦᠳᠡᠰᠢ ᠭᠡᠷ ᠲᠦ᠍ ᠪᠥᠭᠰᠢᠬᠦ ᠪᠡᠷ ᠭᠠᠳᠠᠨᠠ ᠭᠠᠷᠴᠤ ᠮᠠᠩᠬᠠᠨ ᠳᠡᠭᠡᠷᠡ ᠡᠵᠢ ᠲᠡᠢ ᠪᠡᠨ ᠬᠠᠮᠲᠤ ᠰᠡᠷᠢᠭᠦᠴᠡᠨ ᠰᠠᠭᠤᠬᠤ ᠳ᠋ᠤ᠌ ᠶᠠᠭ ᠯᠠ ᠡᠢᠮᠦ ᠪᠠᠢᠭᠰᠠᠨ᠃ ᠡᠵᠢ ᠲᠡᠭᠷᠢ ᠶ᠋ᠢᠨ ᠣᠳᠣᠳ ᠢ᠋ ᠵᠢᠭᠠᠵᠤ᠂ ᠠᠯᠲᠠᠢ ᠬᠠᠩᠭᠠᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤ ᠪᠣᠢ᠂ ᠲᠣᠭᠠ ᠶ᠋ᠢ ᠨᠢ ᠠᠪᠤᠭᠰᠠᠨ ᠳᠣᠯᠣᠭᠠ ᠪᠣᠢ᠂ ᠲᠣᠪᠴᠢᠯᠠᠭᠰᠠᠨ ᠭᠤᠷᠪᠠ ᠪᠣᠢ᠂ ᠬᠠᠢᠴᠢᠨ ᠢᠮ(ᠡᠩ) ᠲᠡᠢ ᠵᠢᠷᠭᠤᠭᠠ ᠪᠣᠢ᠂ ᠬᠠᠷᠠ ᠴᠠᠭᠠᠨ ᠢ᠋ ᠢᠯᠭᠠᠳᠠᠭ ᠬᠣᠶᠠᠷ ᠪᠣᠢ ᠭᠡᠵᠦ ᠣᠨᠢᠰᠣᠭᠠ ᠲᠠᠭᠠᠯᠭᠠᠵᠤ ᠪᠠᠢᠪᠠ᠃ ᠲᠡᠭᠡᠪᠡᠯ ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤ ᠭᠡᠳᠡᠭ ᠨᠢ ᠲᠡᠭᠷᠢ ᠳᠡᠭᠡᠷᠡᠬᠢ ᠣᠯᠠᠨ ᠣᠳᠣᠳ ᠢ᠋ ᠵᠢᠭᠠᠳᠠᠭ ᠶᠤᠮ᠂ ᠲᠣᠭᠠ ᠶ᠋ᠢ ᠨᠢ ᠠᠪᠤᠭᠰᠠᠨ ᠳᠣᠯᠣᠭᠠ ᠭᠡᠳᠡᠭ ᠨᠢ ᠣᠳᠣᠳ ᠤ᠋ᠨ ᠳᠤᠮᠳᠠ ᠲᠣᠬᠣᠢ ᠰᠢᠭ᠋ ᠳᠣᠬᠢᠢᠭᠰᠠᠨ ᠳᠣᠯᠣᠭᠠᠨ ᠣᠳᠣ ᠪᠠᠢᠳᠠᠭ ᠲᠡᠭᠦᠨ ᠢ᠋ ᠳᠣᠯᠣᠭᠠᠨ ᠪᠤᠷᠬᠠᠳ ᠭᠡᠳᠡᠭ ᠶᠦᠮ᠂ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠳᠣᠯᠣᠭᠠᠨ ᠢ᠋ ᠪᠠᠭᠠ ᠰᠢᠨᠡ ᠭᠡᠵᠦ ᠳᠣᠯᠣᠭᠠᠨ ᠪᠤᠷᠬᠠᠳ ᠢ᠋ᠶ᠋ᠠᠨ ᠳᠠᠬᠢᠳᠠᠭ ᠵᠠᠩᠰᠢᠯ ᠲᠠᠢ ᠪᠢᠯᠡ᠃ ᠳᠣᠯᠣᠭᠠᠨ ᠪᠤᠷᠬᠠᠳ ᠢ᠋ ᠬᠡᠦᠬᠡᠳ ᠦ᠋ᠨ ᠪᠤᠷᠬᠠᠨ ᠭᠡᠵᠦ ᠶᠠᠷᠢᠳᠠᠭ ᠠ᠋ᠴᠠ ᠰᠠᠢᠲᠤᠷ ᠳᠠᠬᠢᠪᠠᠯ ᠬᠡᠦᠬᠡᠳ ᠨᠢᠭᠡ ᠵᠢᠯ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠣᠷᠣᠬᠤ ᠦᠭᠡᠢ ᠡᠷᠡᠭᠦᠯ ᠡᠩᠬᠡ ᠪᠡᠷ ᠲᠣᠷᠨᠢᠨ ᠪᠣᠢᠵᠢᠳᠠᠭ ᠶᠤᠮ ᠭᠡᠰᠡᠨ ᠬᠡᠯᠡᠯᠭᠡ ᠲᠡᠢ᠂ ᠲᠣᠪᠴᠢᠯᠠᠭᠰᠠᠨ ᠭᠤᠷᠪᠠ ᠭᠡᠳᠡᠭ ᠨᠢ ᠭᠤᠷᠪᠠᠨ ᠮᠠᠷᠠᠯ ᠢ᠋ ᠬᠡᠯᠡᠵᠦ᠂ ᠬᠠᠢᠴᠢᠨ ᠢᠮ (ᠡᠩ) ᠲᠡᠢ ᠵᠢᠷᠭᠤᠭᠠ ᠭᠡᠳᠡᠭ ᠨᠢ ᠵᠢᠷᠭᠤᠭᠠᠨ ᠮᠡᠴᠢᠳ ᠢ᠋ ᠵᠢᠭᠠᠵᠤ᠂ ᠬᠠᠷᠠ ᠴᠠᠭᠠᠨ ᠢ᠋ ᠢᠯᠭᠠᠳᠠᠭ ᠬᠣᠶᠠᠷ ᠭᠡᠳᠡᠭ ᠨᠢ ᠨᠠᠷᠠ ᠰᠠᠷᠠ ᠶ᠋ᠢ ᠬᠡᠯᠡᠳᠡᠭ ᠰᠢᠦ ᠭᠡᠮᠡᠨ ᠨᠢᠭᠡᠳ ᠨᠢᠭᠡ ᠪᠡᠷ ᠶᠠᠷᠢᠳᠠᠭ ᠯᠠ ᠪᠠᠢᠭᠰᠠᠨ ᠶᠤᠮ᠃
ᠬᠣᠵᠢᠮ ᠨᠢ ᠬᠣᠲᠠ ᠵᠡᠭᠡᠯᠢ ᠬᠡᠰᠦᠵᠦ ᠴᠠᠬᠢᠯᠭᠠᠨ ᠳ᠋ᠧᠩ ᠭᠡᠷᠡᠯ ᠲᠡᠢ ᠭᠠᠵᠠᠷ ᠵᠢᠯ ᠤᠳᠠᠭᠠᠨ ᠠᠮᠢᠳᠤᠷᠠᠵᠤ ᠰᠠᠭᠤᠭᠰᠠᠨ ᠠ᠋ᠴᠠ ᠰᠥᠨᠢ ᠪᠣᠯᠪᠠᠯ ᠵᠥᠪᠬᠡᠨ ᠰᠠᠷᠠ ᠭᠠᠷᠴᠤ ᠰᠢᠩᠭᠡᠬᠦ ᠶ᠋ᠢ ᠲᠣᠳᠣᠷᠬᠠᠢ ᠣᠯᠵᠤ ᠦᠵᠡᠳᠡᠭ ᠡᠴᠡ ᠪᠢᠰᠢ ᠬᠠᠷᠢᠨ ᠣᠳᠣ ᠮᠡᠴᠢᠳ ᠢ᠋ ᠶᠡᠷᠦ ᠠᠩᠬᠠᠷᠴᠤ ᠦᠵᠡᠳᠡᠭ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠃ ᠥᠨᠥ ᠰᠥᠨᠢ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠳ᠋ᠢᠶᠠᠨ ᠰᠦᠮᠡ ᠶ᠋ᠢᠨ ᠳ᠋ᠧᠩ ᠭᠡᠷᠡᠯ ᠦᠭᠡᠢ ᠬᠠᠷᠠᠩᠭᠤᠢ ᠣᠷᠴᠢᠨ ᠳ᠋ᠤ᠌ ᠲᠡᠭᠷᠢ ᠳᠦᠭᠦᠷᠡᠩ ᠣᠳᠣᠨ ᠮᠡᠴᠢᠳ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠬᠤ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠠᠭᠠ ᠶ᠋ᠢᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠪᠤᠳᠤᠭᠳᠤᠭᠤᠯᠤᠭᠰᠠᠨ ᠨᠢ ᠥᠨᠥᠳᠥᠷ ᠦ᠋ᠨ ᠵᠤᠭᠠᠴᠠᠯ ᠤ᠋ᠨ ᠪᠠᠰᠠ ᠨᠢᠭᠡ ᠶᠡᠬᠡ ᠣᠯᠵᠠ ᠭᠡᠵᠦ ᠪᠣᠯᠤᠨᠠ᠃