ᠤᠷᠠᠨᠳᠦ᠋ᠰᠢ ᠶᠢᠨ ᠳᠣᠮᠣᠭ (ᠨᠢᠭᠡ -2)– ᠭᠠᠰᠢᠸᠠ Урандүшийн домог(1-2) – Гашваа
1254ᠤᠷᠠᠨᠳᠦ᠋ᠰᠢ ᠶᠢᠨ ᠳᠣᠮᠣᠭ (ᠨᠢᠭᠡ)
ᠨᠢᠭᠡ – 2
ᠠᠭᠤᠯᠠ ᠶᠠᠪᠤᠬᠤ ᠲᠣᠰᠤᠮ ᠦᠨᠳᠤᠷᠰᠢᠵᠤ᠂ ᠵᠠᠮ ᠠᠭᠤᠯᠠ ᠶ᠋ᠢ ᠳᠠᠭᠠᠨ ᠥᠭᠰᠥᠭᠰᠡᠭᠡᠷ ᠁
ᠨᠠᠮᠤᠷ ᠤ᠋ᠨ ᠪᠠᠭᠠ ᠦᠳᠡ ᠶ᠋ᠢᠨ ᠰᠢᠷᠠ ᠨᠠᠷᠠ ᠳᠠᠯᠤ ᠨᠢᠷᠤᠭᠤ ᠶ᠋ᠢ ᠲᠥᠭᠡᠨᠡᠵᠦ ᠰᠡᠷ ᠭᠡᠬᠦ ᠰᠠᠯᠬᠢ ᠦᠭᠡᠢ ᠬᠠᠭᠤᠷᠠᠢ ᠦᠶᠡᠷ ᠦ᠋ᠨ ᠬᠥᠨᠳᠡᠢ ᠳ᠋ᠦ᠍ ᠪᠣᠯᠵᠢ ᠪᠣᠷᠣᠯᠠᠮᠠᠷ ᠪᠠᠢᠵᠤ ᠠᠰᠬᠠᠷᠠᠭᠰᠠᠨ ᠬᠠᠷᠠ ᠬᠥᠯᠥᠰᠥ ᠪᠦᠬᠦ ᠪᠡᠶᠡ ᠳ᠋ᠦ᠍ ᠳᠠᠭᠠᠭᠠᠪᠤᠷᠢᠯᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠢᠳᠡ ᠰᠠᠶᠢ ᠬᠠᠳᠠ ᠴᠢᠯᠠᠭᠤ ᠲᠠᠢ ᠵᠠᠮ ᠤ᠋ᠨ ᠬᠠᠯᠠ ᠵᠣᠪᠠᠯ ᠢ᠋ ᠮᠡᠳᠡᠵᠦ᠂ ᠬᠥᠯ ᠨᠤᠭᠤᠷᠠᠭᠠᠳ ᠪᠠᠰᠠ ᠬᠡᠳᠦᠢ ᠬᠣᠯᠠ ᠪᠠᠢᠳᠠᠭ ᠪᠣᠯ ᠭᠡᠰᠡᠨ ᠪᠣᠳᠣᠯ ᠲᠦᠷᠦᠭᠳᠡᠵᠤ᠂ ᠳᠠᠭᠠᠵᠤ ᠭᠦᠢᠴᠡᠬᠦ ᠦᠭᠡᠢ ᠬᠣᠴᠣᠷᠤᠭᠰᠠᠨ ᠳ᠋ᠤ᠌᠂ ᠲᠦᠷᠦᠭᠦᠯᠡᠵᠦ ᠶᠠᠪᠤᠭᠰᠠᠨ ᠬᠣᠶᠠᠷ ᠠᠪᠤᠭᠠᠢ ᠵᠠ ᠲᠠᠨᠤᠰ ᠬᠤᠷᠳᠤᠨ ᠬᠤᠷᠳᠤᠨ ᠶᠠᠪᠤᠭᠠᠷᠠᠢ ᠡᠨᠳᠡ ᠪᠠᠰᠠ ᠰᠠᠢᠬᠠᠨ ᠦᠯᠢᠭᠡᠷ ᠲᠡᠢ ᠶᠠᠭᠤᠮᠠ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠪᠢᠳᠡ ᠬᠡᠳᠦᠭᠦᠯᠡ ᠲᠡᠩᠬᠡᠭᠡ ᠮᠡᠳᠡᠨ ᠰᠠᠷᠪᠠᠭᠯᠠᠭᠤᠯᠵᠤ ᠢᠷᠡᠪᠡᠯ ᠦᠶᠡᠷ ᠦ᠋ᠨ ᠬᠥᠨᠳᠡᠢ ᠶ᠋ᠢᠨ ᠪᠠᠷᠠᠭᠤᠨ ᠳᠡᠪᠰᠡᠨ ᠳᠡᠭᠡᠷᠡ ᠭᠤᠷᠪᠠᠨ ᠵᠡᠷᠭᠡᠴᠡᠭᠰᠡᠨ ᠳᠤᠭᠤᠢ ᠭᠡᠷ ᠦ᠋ᠨ ᠬᠠᠳᠠᠨ ᠣᠷᠣᠮ ᠬᠠᠷᠠᠭᠳᠠᠨᠠ᠃ ᠵᠠ ᠲᠠᠨᠤᠰ ᠦᠵᠡ᠂ ᠡᠨᠡ ᠭᠤᠷᠪᠠᠨ ᠳᠤᠭᠤᠢ ᠭᠡᠷ ᠪᠣᠯ ᠴᠢᠡᠭᠭᠡᠰ ᠬᠠᠭᠠᠨ ᠪᠠᠷᠠᠭᠤᠨ ᠭᠠᠵᠠᠷ ᠲᠠᠩᠭᠤᠳ ᠢ᠋ ᠳᠠᠢᠯᠠᠨ ᠰᠢᠷᠬᠠᠳᠤᠭᠠᠳ ᠵᠡᠭᠦᠨᠰᠢ ᠪᠤᠴᠠᠬᠤ ᠵᠠᠮ ᠳ᠋ᠤ᠌ ᠪᠠᠨ ᠡᠨᠡ ᠬᠦ ᠪᠠᠷᠲᠠᠭᠠ ᠶᠡᠬᠡ ᠲᠡᠢ ᠬᠥᠮᠦᠨ ᠠᠮᠢᠲᠠᠨ ᠣᠷᠣᠵᠤ ᠭᠠᠷᠬᠤ ᠳ᠋ᠤ᠌ ᠬᠦᠴᠢᠷ ᠤᠰᠤ ᠲᠦᠯᠡᠭᠡ ᠣᠢᠷᠠᠬᠠᠨ ᠭᠠᠵᠠᠷ ᠢ᠋ ᠲᠦᠰᠢᠵᠦ ᠰᠢᠷᠬᠠ ᠪᠠᠨ ᠰᠤᠪᠢᠯᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠡᠷ ᠦ᠋ᠨ ᠣᠷᠣᠮ ᠭᠡᠵᠦ ᠶᠠᠷᠢᠳᠠᠭ ᠶᠤᠮ᠃ ᠡᠨᠡ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠠᠭᠤᠯᠠ ᠲᠦᠰᠢᠭᠰᠡᠨ ᠨᠢ ᠪᠣᠯ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠰᠠᠭᠤᠵᠤ ᠬᠣᠯᠠ ᠣᠢᠷᠠ ᠶ᠋ᠢᠨ ᠪᠠᠷᠠ ᠬᠠᠷᠠᠵᠤ ᠬᠠᠮᠠᠭᠠᠯᠠᠯᠲᠠ ᠰᠡᠷᠭᠡᠢᠯᠡᠯᠲᠡ ᠬᠢᠳᠡᠭ ᠭᠡᠷ ᠪᠣᠯᠤᠨᠠ᠃ ᠵᠡᠭᠦᠨ ᠵᠠᠬᠠ ᠶ᠋ᠢᠨ ᠭᠣᠣᠯ ᠭᠦᠪᠡᠭᠡᠯᠡᠭᠰᠡᠨ ᠨᠢ ᠪᠣᠯ ᠠᠮᠤ ᠬᠦᠨᠡᠰᠦ ᠲᠠᠯᠪᠢᠬᠤ᠂ ᠭᠠᠯ ᠲᠣᠭᠣᠭᠠ ᠬᠢᠳᠡᠭ ᠭᠡᠷ ᠪᠣᠯᠤᠨᠠ᠂ ᠡᠭᠦᠳᠡᠨ ᠳ᠋ᠦ᠍ ᠨᠢ ᠲᠤᠯᠭᠠ ᠶ᠋ᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠶ᠋ᠢᠨ ᠣᠷᠣᠮ ᠲᠠᠢ ᠪᠠᠢᠭᠰᠠᠭᠠᠷ᠃ ᠭᠣᠣᠯ ᠤ᠋ᠨ ᠭᠡᠷ ᠨᠢ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠭᠡᠷ ᠡᠴᠡ ᠪᠡᠨ ᠶᠡᠬᠡ ᠪᠣᠱᠣᠭᠠᠨ ᠠ᠋ᠴᠠ ᠪᠠᠨ ᠴᠠᠭᠠᠰᠢ ᠭᠤᠷᠪᠠᠨ ᠳᠡᠭᠲᠡᠷ ᠱᠠᠲᠤᠨ ᠣᠷᠣᠮ ᠲᠠᠢ᠂ ᠡᠨᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠢᠷᠬᠠ ᠪᠠᠨ ᠰᠤᠪᠢᠯᠠᠵᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠣᠷᠳᠣᠨ ᠪᠣᠯᠤᠯᠲᠠᠢ ᠭᠡᠵᠦ ᠬᠡᠯᠡᠳᠡᠭ ᠶᠦᠮ᠃ ᠣᠳᠣ ᠡᠨᠳᠡ ᠡᠴᠡ ᠴᠠᠭᠠᠰᠢ ᠬᠡᠳᠦᠨ ᠵᠠᠭᠤᠨ ᠠᠯᠬᠤᠮ ᠶᠠᠪᠤᠪᠠᠯ ᠦᠶᠡᠷ ᠦ᠋ᠨ ᠬᠥᠨᠳᠡᠢ ᠪᠠᠷᠠᠭᠤᠨᠰᠢ ᠡᠷᠭᠢᠭᠡᠳ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠮᠤᠬᠤᠷ ᠲᠤ᠌ ᠲᠤᠯᠬᠤ ᠶᠤᠮ᠃ ᠠᠭᠤᠯᠠᠨ ᠢᠷᠣᠭᠠᠷ ᠠ᠋ᠴᠠ ᠳᠡᠭᠡᠭᠰᠢ ᠬᠡᠳᠦᠨ ᠮᠧᠲ᠋ᠷ ᠵᠠᠢ ᠳᠡᠭᠡᠷᠡ ᠡᠮᠦᠨᠡ ᠬᠣᠢᠨᠠ ᠵᠡᠷᠭᠡᠴᠡᠭᠡ ᠬᠣᠶᠠᠷ ᠪᠤᠯᠠᠭ ᠲᠠᠢ᠂ ᠡᠮᠦᠨᠡᠬᠢ ᠨᠢ ᠭᠣᠣᠯ ᠪᠤᠯᠠᠭ᠂ ᠬᠣᠢᠨᠠᠬᠢ ᠨᠢ ᠲᠤᠰᠠᠯᠠᠬᠤ ᠪᠤᠯᠠᠭ ᠭᠡᠨᠡ᠃ ᠴᠢᠩᠭᠢᠰ ᠬᠠᠭᠠᠨ ᠡᠳᠦᠷ ᠦ᠋ᠨ ᠭᠤᠷᠪᠠ ᠤᠳᠠᠭᠠ ᠡᠨᠡ ᠪᠤᠯᠠᠭ ᠤ᠋ᠨ ᠤᠰᠤ ᠪᠠᠷ ᠰᠢᠷᠬᠠ ᠪᠠᠨ ᠤᠬᠢᠶᠠᠵᠤ ᠠᠷᠢᠭᠤᠳᠬᠠᠭᠰᠠᠨ ᠪᠣᠯᠬᠣᠷ ᠰᠢᠷᠬᠠ ᠨᠢ ᠴᠦ᠍ ᠰᠡᠪ ᠦᠭᠡᠢ ᠰᠠᠢᠬᠠᠨ ᠡᠳᠡᠭᠡᠷᠡᠭᠰᠡᠨ ᠭᠡᠳᠡᠭ ᠬᠠᠭᠤᠴᠢ ᠦᠯᠢᠭᠡᠷ ᠲᠡᠢ ᠪᠠᠢᠳᠠᠭ ᠶᠤᠮ ᠭᠡᠨᠯᠡᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠡᠨᠡ ᠪᠤᠯᠠᠭ ᠢ᠋ 《ᠰᠢᠷᠬᠠ ᠶ᠋ᠢᠨ ᠪᠤᠯᠠᠭ 》 ᠭᠡᠮᠡᠨ ᠨᠡᠷᠡᠢᠳᠬᠦ ᠪᠣᠯᠵᠤ ᠭᠡᠨᠡ᠃ ᠡᠨᠡ ᠪᠤᠯᠠᠭ ᠢ᠋ ᠦᠵᠡᠪᠡᠯ ᠨᠢᠳᠤᠷᠭᠠ ᠪᠠᠭᠲᠠᠮᠠᠷ ᠠᠮᠠ ᠲᠠᠢ᠂ ᠨᠢᠳᠦᠨ ᠳ᠋ᠦ᠍ ᠢᠯᠡ ᠬᠠᠷᠠᠭᠳᠠᠭᠰᠠᠨ ᠭᠦᠢᠬᠡᠨ ᠢᠷᠣᠭᠠᠷ ᠲᠠᠢ᠂ ᠢᠯᠡ ᠦᠵᠡᠭᠳᠡᠮᠡᠷ ᠤᠰᠤᠨ ᠢᠷᠡᠯᠲᠡ ᠶ᠋ᠢᠨ ᠡᠬᠢ ᠰᠤᠷᠪᠤᠯᠵᠢ ᠦᠭᠡᠢ ᠪᠠᠢᠲᠠᠯᠠ ᠤᠰᠤ ᠬᠡᠵᠢᠶᠡᠳᠡ ᠪᠡᠯᠡᠬᠡᠨ ᠴᠠᠯᠭᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢᠯᠬᠠᠷᠠᠮᠠ ᠪᠠᠢᠳᠠᠭ ᠨᠢ ᠨᠡᠭᠡᠷᠡᠨ ᠬᠠᠴᠢᠨ ᠰᠣᠨᠢᠨ ᠰᠠᠨᠠᠭᠳᠠᠨᠠ᠃ ᠪᠢᠳᠡ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠣᠩᠭᠣᠴᠠ ᠦᠵᠡᠭᠰᠡᠨ ᠦᠬᠡᠷ ᠰᠢᠭ ᠨᠢᠭᠡ ᠨᠢ ᠤᠤᠭᠤᠭᠠᠳ ᠭᠠᠷᠬᠤ ᠳ᠋ᠤ᠌ ᠨᠥᠭᠦᠭᠡ ᠨᠢ ᠵᠠᠯᠭᠠᠭᠠᠳ ᠰᠠᠯ ᠭᠡᠬᠦ ᠵᠠᠪᠰᠠᠷ ᠦᠭᠡᠢ ᠤᠤᠭᠤᠵᠤ ᠤᠬᠢᠶᠠᠭᠠᠳ ᠰᠠᠪᠠ ᠰᠠᠭᠠᠯᠢ ᠳ᠋ᠤ᠌ ᠪᠠᠨ ᠰᠠᠪᠠᠯᠠᠭᠰᠠᠨ ᠪᠣᠯᠪᠠᠴᠤ ᠤᠰᠤ ᠮᠥᠨ ᠯᠡ ᠳᠤᠮᠳᠠᠷᠠᠰᠢ ᠦᠭᠡᠢ ᠪᠠᠢᠪᠠ᠃ ᠦᠯᠢᠭᠡᠷ ᠠ᠋ ᠦᠯᠢᠭᠡᠷ ᠁
ᠡᠨᠡ ᠤᠰᠤ ᠶ᠋ᠢ ᠪᠠᠰᠠ ᠬᠣᠳᠣᠭᠣᠳᠣ ᠭᠡᠳᠡᠰᠦᠨ ᠦ᠌ ᠠᠷᠬᠠᠭ ᠭᠡᠮ᠂ ᠶᠠᠷᠠ ᠰᠢᠷᠬᠠᠨ ᠳ᠋ᠤ᠌ ᠲᠤᠰᠠᠲᠠᠢ ᠭᠡᠵᠦ ᠶᠡᠬᠡᠴᠦᠳ ᠬᠠᠭᠤᠴᠢᠯᠠᠳᠠᠭ ᠠ᠋ᠴᠠ ᠣᠢᠷᠠ ᠣᠷᠴᠢᠮ ᠤ᠋ᠨ ᠮᠠᠯᠴᠢᠳ ᠳᠥᠷᠪᠡᠨ ᠤᠯᠠᠷᠢᠯ ᠢ᠋ᠶ᠋ᠠᠷ ᠢᠷᠡᠵᠦ ᠤᠤᠭᠤᠳᠠᠭ ᠵᠠᠩᠰᠢᠯ ᠲᠠᠢ ᠪᠣᠢ ᠭᠡᠵᠦ ᠵ ᠠᠪᠤᠭᠠᠢ ᠤᠰᠤ ᠤᠤᠭᠤᠬᠤ ᠶ᠋ᠢᠨ ᠵᠠᠭᠤᠷᠠ ᠪᠢᠳᠡᠨ ᠳ᠋ᠦ᠍ ᠶᠠᠷᠢᠯᠠ᠃
ᠦᠳᠡ ᠠᠶᠠᠳᠠᠬᠤ ᠪᠠᠷ ᠮᠠᠨᠤᠰ ᠰᠡᠷᠢᠭᠦᠨ ᠠᠮᠢᠰᠬᠤᠯᠯᠠᠭᠰᠠᠨ ᠠᠭᠤᠯᠠᠨ ᠰᠡᠭᠦᠳᠡᠷ ᠲᠦ᠍ ᠶᠠᠳᠠᠷᠠᠭᠠ ᠪᠠᠨ ᠲᠠᠢᠯᠵᠤ ᠰᠠᠭᠤᠵᠤ ᠪᠠᠢᠲᠠᠯᠠ ᠪᠤ ᠠᠪᠤᠭᠠᠢ ᠣᠳᠣ ᠠᠮᠠᠷᠠᠵᠤ ᠪᠣᠯᠤᠭᠰᠠᠨ᠂ ᠪᠠᠰᠠ ᠤᠤᠭᠤᠬᠤ ᠰᠠᠨᠠᠭᠠ ᠲᠠᠢ ᠬᠥᠮᠦᠨ ᠪᠠᠢᠪᠠᠯ ᠬᠤᠷᠳᠤᠨ ᠤᠤᠭᠤᠵᠤ ᠠᠪᠤᠭᠠᠳ ᠶᠠᠪᠤᠵᠠᠭᠠᠶᠠ᠂ ᠦᠭᠡᠢ ᠪᠣᠯ ᠥᠨᠥᠳᠥᠷ ᠴᠢ ᠪᠢᠳᠡ ᠦᠳᠡ ᠳ᠋ᠦ᠍ ᠬᠣᠭᠣᠯᠠ ᠦᠭᠡᠢ ᠥᠯᠥᠨ ᠭᠡᠳᠡᠰᠦ ᠪᠡᠨ ᠡᠪᠬᠡᠭᠡᠳ ᠤᠷᠠᠨᠳᠥ᠋ᠰᠢ ᠳ᠋ᠦ᠍ ᠬᠦᠷᠬᠦ ᠯᠡ ᠬᠡᠷᠡᠭ ᠭᠡᠪᠡ᠃
ᠰᠢᠷᠬᠠ ᠶ᠋ᠢᠨ ᠪᠤᠯᠠᠭ ᠠ᠋᠂ ᠰᠢᠷᠬᠠ ᠶ᠋ᠢᠨ ᠪᠤᠯᠠᠭ᠂ ᠡᠬᠡ ᠪᠠᠢᠭᠠᠯᠢ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠡᠭᠴᠡ ᠬᠠᠳᠠᠨ ᠤ᠋ ᠡᠩᠭᠡᠷ ᠡᠴᠡ ᠡᠵᠢ ᠶ᠋ᠢᠨ ᠴᠠᠭᠠᠨ ᠰᠦ ᠰᠢᠭ ᠢᠪᠢᠯᠵᠦ ᠣᠨᠳᠣᠷᠣᠭᠰᠠᠨ ᠡᠨᠡᠷᠢᠯ ᠦ᠋ᠨ ᠬᠡᠰᠢᠭ᠂ ᠡᠨᠡ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠠᠷᠠᠳ᠂ ᠡᠪᠡᠰᠦ ᠮᠣᠳᠣ ᠵᠡᠷᠭᠡ ᠠᠮᠢ ᠠᠬᠤᠢ ᠳ᠋ᠤ᠌ ᠦᠶᠡ ᠶ᠋ᠢᠨ ᠦᠶᠡ ᠪᠡᠷ ᠠᠴᠢ ᠲᠤᠰᠠ ᠪᠠᠨ ᠦᠵᠡᠭᠦᠯᠦᠭᠰᠡᠨ ᠠᠷᠢᠭᠤᠨ ᠪᠤᠯᠠᠭ ᠠ᠋᠃
ᠰᠦᠯᠳᠡᠬᠦᠦ ᠤᠶᠠᠩᠭᠠᠯᠠᠪᠠ