ᠠᠷᠠᠳ ᠊ᠤᠨ ᠠᠮᠠᠨ ᠢᠷᠥᠭᠡᠯ (ᠶᠠᠪᠠᠭᠠᠨ ᠢᠷᠥᠭᠡᠯ)Ардын аман ерөөл(явган ерөөл)
2112ᠠᠷᠠᠳ ᠤ᠋ᠨ ᠠᠮᠠᠨ ᠢᠷᠥᠭᠡᠯ① (ᠶᠠᠪᠠᠭᠠᠨ ᠢᠷᠥᠭᠡᠯ)
ᠮᠠᠨ ᠤ᠋ ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠣᠯᠠᠩᠬᠢ ᠨᠢ ᠵᠢᠯ ᠴᠠᠭᠠᠨ ᠰᠠᠷᠠ ᠪᠣᠯᠤᠭᠰᠠᠭᠠᠷ ᠠᠪᠤ ᠡᠵᠢ᠂ ᠠᠬᠠᠰ ᠵᠠᠬᠠᠰ ᠲᠠᠭᠠᠨ ᠲᠣᠯᠣᠭᠠᠢ ᠮᠥᠷᠭᠥᠬᠦ ᠳ᠋ᠡᠭᠡᠨ ᠤᠷᠢᠳᠠ ᠪᠠᠷ ᠭᠤᠷᠪᠠ ᠤᠳᠠᠭᠠ ᠨᠠᠮᠠᠨᠴᠢᠯᠠᠨ ᠮᠥᠷᠭᠥᠵᠦ ᠠᠳᠢᠰ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠶᠢ ᠳᠠᠬᠢᠨ ᠬᠦᠬᠦᠷ ᠬᠠᠳᠠᠭ ᠢ᠋ᠶ᠋ᠠᠨ ᠭᠠᠷᠭᠠᠵᠤ᠂ ᠬᠣᠶᠠᠷ ᠭᠠᠷ ᠲᠠᠭᠠᠨ ᠠᠯᠲᠠ ᠲᠣᠷᠭᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠪᠠᠷᠢᠵᠤ ᠠᠪᠤ ᠡᠵᠢ ᠳ᠋ᠡᠭᠡᠨ ᠮᠥᠷᠭᠥᠬᠦ ᠳ᠋ᠦ᠍ ᠠᠪᠤ ᠡᠵᠢ ᠨᠢ ᠬᠠᠳᠠᠭ ᠤ᠋ᠨ ᠠᠮᠠ ᠶ᠋ᠢ ᠨᠢ ᠡᠷᠭᠢᠭᠦᠯᠦᠨ᠂ ᠮᠥᠷᠭᠥᠭᠰᠡᠨ ᠬᠥᠮᠦᠨ (ᠳᠡᠭᠦᠦ ᠨᠠᠷ ᠬᠡᠦᠬᠡᠳ) ᠲᠡᠭᠡᠨ ᠥᠭᠴᠦ ᠠᠮᠠᠨ ᠤ᠋ ᠰᠠᠢᠬᠠᠨ ᠢᠷᠦᠭᠡᠯ ᠢ᠋ᠶ᠋ᠡᠨ ᠬᠠᠢᠷᠠᠯᠠᠳᠠᠭ ᠪᠢᠯᠡ᠃ ᠲᠡᠭᠡᠭᠡᠳ ᠮᠥᠷᠭᠥᠭᠰᠡᠨ ᠬᠥᠮᠦᠨ ᠨᠢ ᠢᠷᠦᠭᠡᠯ ᠲᠣᠭᠲᠠᠬᠤ ᠪᠣᠯᠲᠤᠭᠠᠢ! ᠭᠡᠵᠦ ᠮᠥᠷᠭᠥᠭᠡᠳ ᠬᠠᠳᠠᠭ ᠢ᠋ᠶ᠋ᠠᠨ ᠠᠪᠴᠤ ᠬᠦᠬᠦᠷ ᠰᠣᠯᠢᠯᠴᠠᠳᠠᠭ᠃ ᠲᠡᠷᠡᠴᠢᠯᠡᠨ ᠨᠠᠰᠤ ᠰᠠᠴᠠᠭᠤ ᠪᠤᠶᠤ ᠡᠩ ᠦ᠋ᠨ ᠬᠥᠮᠦᠨ ᠲᠡᠢ ᠵᠣᠯᠭᠠᠬᠤ ᠳ᠋ᠤ᠌ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠮᠥᠷᠭᠥᠬᠦ ᠦᠭᠡᠢ ᠬᠠᠷᠢᠨ ᠬᠣᠶᠠᠷ ᠬᠥᠮᠦᠨ ᠲᠤᠰ ᠪᠦᠷᠢ ᠲᠣᠷᠭᠠᠨ ᠬᠠᠳᠠᠭ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷ ᠲᠠᠭᠠᠨ ᠪᠠᠷᠢᠵᠤ《ᠵᠣᠯᠭᠠᠶᠠ! ᠵᠣᠯᠭᠠᠶᠠ!》 ᠭᠡᠵᠦ ᠶᠡᠬᠡ ᠯᠠᠷᠵᠢᠶᠠ ᠨᠠᠮᠪᠠ ᠲᠠᠲᠠᠵᠤ ᠪᠠᠷᠢᠭᠰᠠᠨ ᠬᠠᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠠᠮᠠ ᠶ᠋ᠢ ᠨᠢ ᠲᠤᠯᠭᠠᠵᠤ ᠨᠤᠳᠤᠷᠴᠤ ᠳᠠᠷᠠᠭᠠ ᠨᠢ ᠬᠦᠬᠦᠷ ᠰᠣᠯᠢᠳᠠᠭ᠃ ᠬᠦᠬᠦᠷ ᠰᠣᠯᠢᠬᠤ ᠳ᠋ᠠᠭᠠᠨ᠄ ᠵᠠ ᠠ᠋! ᠰᠠᠢᠨ ᠰᠢᠨᠡᠯᠡᠪᠡ ᠤᠤ? ᠵᠤᠯᠠ ᠶ᠋ᠢᠨ ᠮᠠᠨᠳᠤᠯᠭᠠ ᠰᠠᠢᠨ? ᠵᠤᠯᠠ ᠪᠠᠨ ᠡᠷᠲᠡ ᠡᠷᠭᠦᠪᠡ ᠤᠤ?②ᠵᠢᠯ ᠦ᠋ᠨ ᠰᠢᠨᠵᠢ ᠥᠩᠭᠡ ᠰᠠᠢᠨ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠨᠢᠭᠡ ᠨᠢ ᠰᠠᠢᠨ ᠰᠠᠢᠨ ᠳᠠᠶᠠᠭᠠᠷ ᠤ᠋ᠨ ᠳᠡᠯᠢᠮ ᠢ᠋ᠶ᠋ᠡᠷ ᠮᠠᠨᠳᠤᠭᠤᠯᠤᠯᠠ (ᠰᠢᠨᠡᠯᠡᠪᠡ) ᠭᠡᠳᠡᠭ᠃ ᠲᠡᠭᠡᠭᠡᠳ ᠵᠠ ᠠ᠋! ᠰᠢᠨᠡ ᠵᠢᠯ ᠦ᠋ᠨ ᠰᠢᠨᠵᠢ ᠥᠩᠭᠡ ᠶ᠋ᠢ ᠰᠠᠢᠨ ᠲᠤᠩᠭᠠᠵᠤ ᠠᠢᠯᠠᠳᠪᠠ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠨᠢᠭᠡ ᠨᠢ᠄ ᠰᠠᠢᠨ᠂ ᠰᠠᠢᠨ! ᠲᠩᠷᠢ ᠭᠠᠵᠠᠷ ᠳᠤᠯᠠᠭᠠᠨ ᠲᠣᠭᠲᠠᠭᠤᠨ
ᠲᠥᠷᠥ ᠲᠦᠪᠰᠢᠨ ᠲᠦᠮᠡᠨ ᠠᠮᠤᠭᠤᠯᠠᠩ
ᠲᠦᠮᠡᠨ ᠪᠣᠳᠠᠰ ᠴᠡᠴᠡᠭᠯᠡᠨ ᠳᠡᠯᠭᠡᠷᠡᠵᠦ
ᠲᠦᠮᠡᠨ ᠠᠷᠠᠳ ᠪᠠᠶᠠᠷᠯᠠᠩᠭᠤᠢ ᠰᠠᠢᠬᠠᠨ
ᠣᠷᠴᠢᠯᠠᠩ ᠳ᠋ᠤ᠌ ᠤᠨᠢᠶᠠᠷ ᠲᠠᠢ ᠣᠭᠲᠠᠷᠭᠤᠢ ᠳ᠋ᠤ᠌ ᠡᠭᠦᠯᠡ ᠲᠡᠢ
ᠬᠠᠪᠤᠷ ᠪᠣᠯᠬᠤ ᠳ᠋ᠤ᠌ ᠨᠣᠭᠣᠭᠠ ᠡᠷᠲᠡ ᠤᠷᠭᠤᠵᠤ
ᠬᠠᠯᠠᠭᠤᠨ ᠳᠤᠮᠳᠠ ᠪᠣᠷᠣᠭᠠᠨ ᠬᠤᠷᠠ ᠲᠠᠢ
ᠠᠮᠤᠨ ᠤ᠋ ᠲᠣᠯᠣᠭᠠᠢ ᠪᠥᠬᠥᠢᠵᠦ
ᠠᠷᠠᠳ ᠤ᠋ᠨ ᠲᠣᠯᠣᠭᠠᠢ ᠭᠡᠳᠡᠢᠵᠦ᠂ ᠴᠣᠬᠣᠮ ᠴᠤ᠌ ᠰᠠᠢᠬᠠᠨ ᠵᠢᠯ ᠪᠣᠯᠬᠤ ᠰᠢᠨᠵᠢ ᠲᠡᠢ ᠪᠠᠢᠨᠠ ᠭᠡᠵᠦ ᠶᠡᠬᠡ ᠪᠡᠯᠭᠡ ᠳᠡᠮᠪᠡᠷᠢᠯ ᠲᠡᠢ ᠦᠭᠡ ᠬᠡᠯᠡᠳᠡᠭ ᠪᠥᠭᠡᠳ ᠬᠡᠦᠬᠡᠳ ᠲᠦ᠍ ᠪᠡᠨ ᠫᠤᠤ ᠰᠠᠢᠨ ᠲᠠᠯᠪᠢᠪᠠ ᠤᠤ?
ᠫᠤᠤ ᠶ᠋ᠢᠨ ᠳᠠᠭᠤ ᠰᠠᠢᠨ
ᠪᠤᠤᠰᠠ ᠪᠠᠩᠰᠢ ᠶ᠋ᠢᠨ ᠠᠮᠲᠠ ᠰᠠᠢᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠪᠠᠶᠠᠷ ᠰᠠᠢᠨ ᠴᠠᠭᠠᠰᠤᠨ ᠫᠤᠤ ᠶ᠋ᠢᠨ ᠳᠠᠭᠤ ᠰᠠᠢᠨ ᠭᠡᠬᠦ ᠳ᠋ᠦ᠍ ᠬᠡᠦᠬᠡᠳ ᠬᠠᠷᠢᠭᠤ ᠳ᠋ᠤᠨᠢ᠄ ᠰᠠᠢᠨ ᠰᠠᠢᠨ! ᠭᠡᠵᠦ ᠮᠥᠷᠭᠥᠭᠡᠳ ᠬᠦᠬᠦᠷ ᠰᠣᠯᠢᠳᠠᠭ᠃ ᠡᠨᠡ ᠬᠦ᠌ ᠠᠮᠠᠨ ᠢᠷᠦᠭᠡᠯ (ᠶᠠᠪᠠᠭᠠᠨ ᠢᠷᠦᠭᠡᠯ) ᠢ᠋ ᠰᠡᠢᠷᠡᠭᠦᠯᠪᠡᠯ ᠳᠣᠣᠷᠠᠬᠢ ᠮᠡᠲᠦ᠄
1 ᠰᠠᠢᠨ ᠶᠠᠪᠤᠵᠤ ᠰᠠᠨᠠᠭᠠ ᠪᠠᠷ ᠵᠢᠷᠭᠠ
ᠡᠩᠬᠡ ᠶᠠᠪᠤᠵᠤ ᠮᠥᠩᠬᠡ ᠵᠢᠷᠭᠠ
ᠡᠷᠳᠡᠨᠢ ᠶ᠋ᠢᠨ ᠱᠠᠩ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠵᠢᠷᠭᠠ!
2 ᠠᠷᠤ ᠭᠠᠵᠠᠷ ᠤ᠋ᠨ ᠨᠣᠭᠣᠭᠠ ᠮᠡᠲᠦ ᠨᠠᠢᠭᠤᠨ ᠵᠢᠷᠭᠠ
ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠮᠡᠲᠦ ᠳᠦᠭᠦᠷᠡᠩ ᠵᠢᠷᠭᠠ
ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠰᠢᠭ ᠢ᠋ ᠲᠣᠭᠲᠠᠭᠠᠨ ᠵᠢᠷᠭᠠ!
3 ᠠᠷᠤ ᠪᠠᠷ ᠳᠦᠭᠦᠷᠡᠩ ᠠᠳᠤᠭᠤ ᠲᠠᠢ ᠪᠣᠯ
ᠠᠪᠳᠠᠷᠠ ᠪᠠᠷ ᠳᠦᠭᠦᠷᠡᠩ ᠠᠯᠲᠠ ᠲᠠᠢ ᠪᠣᠯ!
4 ᠨᠠᠨᠲᠠᠢ ᠠᠭᠤᠯᠠ ᠮᠡᠲᠦ ᠪᠤᠶᠠᠨ ᠬᠡᠰᠢᠭ ᠲᠡᠢ ᠪᠣᠯ
ᠨᠠᠮᠰᠠᠷᠠᠢ ᠪᠤᠷᠬᠠᠨ ᠮᠡᠲᠦ ᠪᠠᠶᠠᠨ ᠱᠠᠩ ᠲᠠᠢ ᠪᠣᠯᠲᠤᠭᠠᠢ!
5 ᠠᠭᠤᠯᠠ ᠶ᠋ᠢᠨ ᠮᠣᠳᠣ ᠮᠡᠲᠦ ᠨᠠᠢᠭᠤᠨ ᠵᠢᠷᠭᠠᠲᠤᠭᠠᠢ
ᠤᠳᠤᠮᠪᠠᠷᠠ ᠯᠢᠩᠬᠤᠠ ᠴᠡᠴᠡᠭ ᠮᠡᠲᠦ ᠵᠢᠭᠰᠠᠨ ᠵᠢᠷᠭᠠᠲᠤᠭᠠᠢ!
6 ᠬᠬᠢᠷ ᠦᠭᠡᠢ ᠨᠠᠷᠠᠨ ᠰᠠᠷᠠᠨ ᠮᠡᠲᠦ ᠭᠡᠢᠭᠦᠯᠦᠨ ᠵᠢᠷᠭᠠᠲᠤᠭᠠᠢ
ᠬᠢᠯᠢᠨᠴᠡ ᠦᠭᠡᠢ ᠨᠣᠮ ᠤ᠋ᠨ ᠱᠠᠰᠢᠨ ᠮᠡᠲᠦ ᠠᠷᠪᠠᠨ ᠵᠦᠭ ᠲᠦ᠍ ᠳᠡᠯᠭᠡᠷᠡᠨ
ᠬᠡᠪᠬᠦᠨ ᠵᠠᠩᠭᠢᠶᠠ ᠮᠡᠲᠦ ᠪᠥᠬᠡ ᠠᠮᠢ ᠲᠠᠢ ᠪᠣᠯᠲᠤᠭᠠᠢ!
ᠬᠡᠵᠢᠶᠡᠳᠡ ᠡᠩᠬᠡ ᠲᠥᠷᠥ ᠮᠥᠩᠬᠡ ᠱᠠᠰᠢᠨ ᠢ᠋ ᠲᠦᠰᠢᠭᠰᠡᠭᠡᠷ ᠵᠢᠷᠭᠠᠲᠤᠭᠠᠢ!
7 ᠲᠥᠪ ᠶᠡᠬᠡ ᠲᠥᠷᠥ ᠶᠦ᠍ᠭᠡᠨ ᠲᠦᠰᠢᠭᠰᠡᠭᠡᠷ ᠵᠢᠷᠭᠠᠲᠤᠭᠠᠢ
ᠲᠥᠷᠥ᠂ ᠱᠠᠰᠢᠨ ᠬᠣᠶᠠᠷ ᠢ᠋ ᠪᠡᠨ ᠪᠠᠷᠢᠭᠰᠠᠭᠠᠷ ᠵᠢᠷᠭᠠᠲᠤᠭᠠᠢ
ᠳᠥᠷᠪᠡᠯᠵᠢᠨ ᠴᠠᠭᠠᠨ ᠣᠯᠪᠣᠭ (ᠢᠰᠡᠭᠡᠢ) ᠳᠡᠭᠡᠷᠡ ᠪᠡᠨ ᠲᠥᠪᠯᠡᠨ ᠰᠠᠭᠤᠵᠤ
ᠳᠥᠷᠪᠡᠨ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠶᠠᠨ ᠢ᠋ ᠲᠣᠭᠲᠠᠭᠠᠨ ᠬᠦᠷᠲᠡᠬᠦ ᠪᠣᠯᠲᠤᠭᠠᠢ!
8 ᠤᠷᠭᠤᠬᠤ ᠠᠭᠤᠯᠠ ᠮᠡᠲᠦ ᠪᠠᠲᠤ
ᠤᠷᠤᠰᠬᠤ ᠤᠰᠤ ᠮᠡᠲᠦ ᠲᠤᠩᠭᠠᠯᠠᠭ
ᠤᠷᠲᠤ ᠨᠠᠰᠤᠯᠠᠵᠤ
ᠤᠳᠠᠭᠠᠨ ᠵᠢᠷᠭᠠᠬᠤ ᠪᠣᠯᠲᠤᠭᠠᠢ!
9 ᠡᠯᠪᠡᠭ ᠶᠡᠬᠡ ᠪᠤᠶᠠᠨ ᠲᠠᠢ᠂ ᠳᠡᠯᠭᠡᠷ ᠶᠡᠬᠡ ᠬᠡᠰᠢᠭ ᠲᠡᠢ᠂
ᠡᠭᠦᠷᠢᠳᠡ ᠡᠪᠳᠡᠷᠡᠰᠢ ᠦᠭᠡᠢ᠂ ᠡᠩᠬᠡ ᠮᠥᠩᠬᠡ ᠵᠢᠷᠭᠠᠲᠤᠭᠠᠢ!
10 ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠶᠠᠨ ᠢ᠋ ᠲᠣᠭᠲᠠᠭᠠᠨ ᠵᠢᠷᠭᠠ
ᠠᠳᠤᠭᠤ ᠮᠠᠯ ᠤ᠋ᠨ ᠣᠯᠠᠨ ᠢ᠋ ᠡᠳ᠋ᠯᠡᠨ ᠵᠢᠷᠭᠠ
ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠮᠡᠲᠦ ᠳᠦᠭᠦᠷᠡᠩ ᠵᠢᠷᠭᠠ
ᠠᠭᠠᠷ ᠲᠩᠷᠢ ᠶ᠋ᠢᠨ ᠣᠳᠣ ᠮᠡᠲᠦ ᠭᠢᠯᠠᠯᠵᠠᠨ ᠵᠢᠷᠭᠠ!
11 ᠤᠷᠠᠨ ᠲᠦᠰᠢ ᠶ᠋ᠢᠨ ᠠᠭᠤᠯᠠ ᠮᠡᠲᠦ ᠪᠠᠶᠠᠨ ᠡᠷᠬᠢᠮ ᠶᠠᠪᠤᠲᠤᠭᠠᠢ
ᠤᠷᠭᠤᠭᠠ ᠽᠠᠨᠳᠠᠨ ᠮᠣᠳᠣ ᠮᠡᠲᠦ ᠮᠥᠩᠬᠡ ᠨᠣᠭᠣᠭᠠᠨ ᠶᠠᠪᠤᠲᠤᠭᠠᠢ!
ᠤᠷᠲᠤ ᠮᠥᠷᠡᠨ ᠳᠠᠯᠠᠢ ᠮᠡᠲᠦ ᠪᠤᠶᠠᠨ ᠬᠡᠰᠢᠭ ᠲᠡᠢ ᠪᠣᠯᠲᠤᠭᠠᠢ
ᠤᠳᠤᠮᠰᠢᠯᠲᠤ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠰᠠᠬᠢᠵᠤ ᠶᠠᠪᠤᠲᠤᠭᠠᠢ!
12 ᠬᠠᠨ ᠰᠦᠮᠪᠦᠷ ᠠᠭᠤᠯᠠ ᠮᠡᠲᠦ ᠪᠠᠶᠠᠨ ᠡᠷᠬᠢᠮ ᠶᠠᠪᠤᠲᠤᠭᠠᠢ
ᠬᠠᠲᠤᠨ ᠳᠠᠯᠠᠢ ᠶ᠋ᠢᠨ ᠤᠰᠤ ᠮᠡᠲᠦ ᠪᠤᠶᠠᠨ ᠬᠡᠰᠢᠭ ᠲᠡᠢ ᠪᠣᠯᠲᠤᠭᠠᠢ!
ᠬᠠᠮᠤᠭ ᠣᠯᠠᠨ ᠲᠦᠮᠡᠨ ᠳ᠋ᠡᠭᠡᠨ ᠬᠦᠷᠢᠶᠡᠯᠡᠯ ᠲᠡᠢ ᠶᠠᠪᠤᠵᠤ
ᠬᠠᠢᠷᠠᠲᠤ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠶᠠᠨ ᠬᠡᠰᠢᠭ ᠢ᠋ ᠬᠦᠷᠲᠡᠵᠦ ᠶᠠᠪᠤᠲᠤᠭᠠᠢ!
13 ᠰᠦᠮᠪᠦᠷ ᠠᠭᠤᠯᠠ ᠮᠡᠲᠦ ᠪᠠᠷᠠ ᠲᠠᠢ
ᠰᠦᠨ ᠳᠠᠯᠠᠢ ᠮᠡᠲᠦ ᠬᠡᠰᠢᠭ ᠲᠡᠢ ᠪᠣᠯᠲᠤᠭᠠᠢ!
ᠰᠥᠮᠡᠨ ᠴᠡᠴᠡᠭ ᠮᠡᠲᠦ ᠪᠠᠳᠠᠷᠠᠨ ᠳᠡᠯᠭᠡᠷᠡᠵᠦ
ᠰᠦᠯᠳᠡ ᠬᠡᠢᠮᠣᠷᠢ ᠴᠢᠨᠢ ᠮᠠᠨᠳᠤᠲᠤᠭᠠᠢ!
14 ᠨᠠᠷᠠ ᠠᠳᠠᠯᠢ ᠬᠡᠷᠡᠯᠳᠦᠵᠦ ᠶᠠᠪᠤ᠂ ᠨᠠᠪᠴᠢ ᠠᠳᠠᠯᠢ ᠳᠡᠯᠭᠡᠷᠡᠵᠦ ᠶᠠᠪᠤ
ᠨᠠᠢᠷ ᠬᠥᠷ ᠢ᠋ᠶ᠋ᠡᠷ ᠳᠦᠭᠦᠷᠡᠩ ᠶᠠᠪᠤ᠂ ᠨᠠᠰᠤᠨ ᠲᠤᠷᠰᠢᠲᠠ ᠵᠢᠷᠭᠠᠵᠤ ᠶᠠᠪᠤ!
15 ᠰᠠᠷᠠ ᠠᠳᠠᠯᠢ ᠰᠠᠴᠤᠷᠠᠵᠤ ᠶᠠᠪᠤ᠂ ᠰᠠᠷᠭᠠᠢ ᠴᠡᠴᠡᠭ ᠰᠢᠭ ᠳᠡᠯᠭᠡᠷᠡᠵᠦ ᠶᠠᠪᠤ!
ᠰᠠᠨᠠᠭᠠ ᠰᠡᠳᠬᠢᠯ ᠠᠮᠤᠷ ᠶᠠᠪᠤ᠂ ᠰᠠᠢᠨ ᠰᠠᠢᠬᠠᠨ ᠵᠢᠷᠭᠠᠵᠤ ᠶᠠᠪᠤ!
16 ᠪᠠᠲᠤ ᠴᠠᠭᠠᠨ ᠢ᠋ᠶ᠋ᠠᠨ ᠪᠠᠷᠢᠪᠠᠯ ᠪᠠᠶᠠᠨ ᠪᠣᠯᠬᠤ ᠰᠢᠨᠵᠢ ᠲᠡᠢ
ᠪᠠᠳᠮᠠᠷᠠᠭ ᠵᠢᠩᠰᠡ ᠪᠡᠨ ᠵᠡᠭᠦᠪᠡᠯ ᠨᠣᠶᠠᠨ ᠪᠣᠯᠬᠤ ᠰᠢᠨᠵᠢ ᠲᠡᠢ
ᠪᠠᠶᠠᠨ ᠨᠣᠶᠠᠨ ᠪᠣᠯᠵᠤ᠂ ᠪᠠᠳᠠᠷᠠᠨ ᠵᠢᠷᠭᠠᠬᠤ ᠪᠣᠯᠲᠤᠭᠠᠢ!
17 ᠨᠠᠷᠠᠨ ᠰᠠᠷᠠᠨ ᠮᠡᠲᠦ ᠭᠡᠢᠭᠦᠯᠡᠩ ᠵᠢᠷᠭᠠ
ᠨᠠᠪᠴᠢᠲᠤ ᠽᠠᠨᠳᠠᠨ ᠮᠣᠳᠣ ᠮᠡᠲᠦ ᠨᠠᠢᠭᠤᠨ ᠵᠢᠷᠭᠠ!
ᠨᠠᠢ᠍ᠮᠠᠨ ᠵᠦᠭ ᠦ᠋ᠨ ᠣᠯᠠᠨ ᠲᠠᠢ ᠪᠠᠨ ᠨᠠᠢᠵᠠᠯᠠᠵᠤ
ᠨᠠᠰᠤᠨ ᠲᠤᠷᠰᠢ ᠵᠢᠷᠭᠠᠵᠤ ᠶᠠᠪᠤᠬᠤ ᠪᠣᠯᠲᠤᠭᠠᠢ!
18 ᠵᠢᠯ ᠢᠷᠡᠬᠦ ᠳ᠋ᠦ᠍ ᠵᠡᠷᠭᠡ ᠨᠡᠮᠡ
ᠣᠨ ᠢᠷᠡᠬᠦ ᠳ᠋ᠦ᠍ ᠤᠲᠤᠭᠠ ᠨᠡᠮᠡ
ᠤᠲᠤᠭᠠᠨ ᠳᠡᠭᠡᠷᠡ ᠪᠡᠨ ᠭᠡᠷᠡᠯ ᠨᠡᠮᠡ
ᠭᠡᠷᠡᠯ ᠳᠡᠭᠡᠷᠡ ᠪᠡᠨ ᠭᠢᠯᠪᠠᠭᠠ ᠨᠡᠮᠡ!
19 ᠱᠧᠩ ᠠᠮᠤ ᠲᠠᠷᠢᠪᠠᠯ᠂ ᠳ᠋ᠠᠨ ᠠᠮᠤ ᠬᠤᠷᠢᠶᠠ
ᠰᠢᠨᠡ ᠪᠡᠷᠢ ᠪᠠᠭᠤᠯᠭᠠᠪᠠᠯ ᠬᠦᠦ ᠲᠡᠢ ᠪᠣᠯ!
20 ᠬᠥᠮᠥᠷᠭᠡ ᠪᠡᠷ ᠳᠦᠭᠦᠷᠡᠩ ᠪᠤᠳᠠᠭᠠ ᠲᠠᠢ ᠪᠣᠯ
ᠬᠥᠨᠵᠢᠯᠡ ᠪᠡᠷ ᠳᠦᠭᠦᠷᠡᠩ ᠬᠡᠦᠬᠡᠳ ᠲᠡᠢ ᠪᠣᠯ!
21 ᠪᠠᠶᠠᠨ ᠠᠢᠯ ᠤ᠋ᠨ ᠪᠡᠷᠢ (ᠬᠦᠷᠭᠡᠨ) ᠪᠣᠯ
ᠪᠠᠨᠲᠠᠭᠠᠷ ᠴᠠᠭᠠᠨ ᠬᠦᠦ ᠲᠡᠢ ᠪᠣᠯ!
22 ᠭᠣᠶᠣ ᠬᠡᠭᠡᠨᠴᠢᠷ ᠪᠦᠰᠡᠭᠦᠢ ᠲᠡᠢ ᠪᠣᠯ
ᠭᠣᠨᠵᠢᠷ ᠭᠣᠢᠭᠣᠷ ᠬᠡᠦᠬᠡᠨ ᠲᠡᠢ ᠪᠣᠯ!
23 ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ ᠲᠥᠪᠡᠷᠭᠡᠨ ᠳ᠋ᠦ᠍
ᠠᠯᠤᠰ ᠤ᠋ᠨ ᠵᠠᠮ ᠢ᠋ ᠲᠣᠪᠴᠢᠯᠠᠵᠤ ᠶᠠᠪᠤ
ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠶᠠᠨ ᠳ᠋ᠤ᠌
ᠠᠯᠲᠠ ᠰᠤᠪᠤᠳ ᠢ᠋ ᠬᠡᠯᠬᠢᠵᠦ ᠶᠠᠪᠤ!
24 ᠪᠦᠭᠦᠳᠡ ᠶ᠋ᠢᠨ ᠡᠮᠦᠨᠡ ᠴᠣᠯᠭᠣᠷᠠᠵᠤ ᠶᠠᠪᠤ
ᠳᠠᠶᠠᠭᠠᠷ ᠤ᠋ᠨ ᠡᠮᠦᠨᠡ ᠲᠠᠪᠰᠢᠵᠤ ᠶᠠᠪᠤ!
25 ᠪᠠᠳᠠᠷᠠᠩᠭᠤᠢ ᠡᠭᠦᠯᠡ ᠮᠡᠲᠦ ᠪᠠᠳᠠᠷᠠᠨ ᠵᠢᠷᠭᠠ
ᠪᠠᠳᠮᠠ ᠯᠢᠩᠬᠤᠠ ᠴᠡᠴᠡᠭ ᠮᠡᠲᠦ ᠳᠡᠯᠭᠡᠷᠡᠨ ᠵᠢᠷᠭᠠ
ᠪᠠᠶᠠᠨ ᠨᠠᠮᠰᠠᠷᠠᠢ ᠶ᠋ᠢᠨ ᠱᠠᠩ ᠮᠡᠲᠦ ᠡᠳ᠋ ᠪᠠᠷᠠᠭᠠ ᠲᠠᠢ ᠪᠣᠯᠵᠤ
ᠪᠠᠢᠳᠠᠭ ᠤᠳᠤᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠶᠠᠵᠢᠨ ᠵᠢᠷᠭᠠ!
26 ᠳᠡᠯ ᠢ᠋ ᠨᠢ ᠵᠠᠰᠠᠬᠤ ᠠᠳᠤᠭᠤ ᠲᠠᠢ ᠪᠣᠯ
ᠳᠠᠯᠠᠩ ᠢ᠋ ᠨᠢ ᠲᠠᠲᠠᠬᠤ ᠦᠨᠢᠶᠡ ᠲᠡᠢ ᠪᠣᠯ!
27 ᠬᠠᠢᠴᠢᠯᠠᠬᠤ ᠨᠢ ᠬᠠᠷᠠ ᠲᠣᠷᠭᠠ
ᠬᠠᠭᠠᠯᠬᠤ ᠨᠢ ᠰᠢᠷᠠ ᠲᠣᠰᠣ
ᠤᠤᠭᠤᠬᠤ ᠨᠢ ᠷᠠᠰᠢᠶᠠᠨ ᠪᠤᠯᠠᠭ ᠤ᠋ᠨ ᠤᠰᠤ
ᠤᠨᠤᠬᠤ ᠨᠢ ᠡᠷᠳᠡᠨᠢ ᠶ᠋ᠢᠨ ᠬᠦᠯᠦᠭ ᠪᠣᠯᠲᠤᠭᠠᠢ!
28 ᠬᠤᠰᠢ ᠮᠠᠨᠴᠤᠭ ᠴᠢᠨᠢ ᠭᠠᠵᠠᠷ ᠳᠣᠯ
ᠭᠣᠵᠣᠭᠣᠷ ᠮᠠᠯᠠᠭᠠᠢ ᠴᠢᠨᠢ ᠲᠩᠷᠢ ᠳᠤᠯ!
29 ᠪᠢᠷ ᠢ᠋ᠶ᠋ᠡᠨ ᠪᠠᠷᠢᠪᠠᠯ ᠣᠶᠤᠲᠠᠨ ᠪᠣᠯ ᠤᠷᠭᠠ ᠪᠠᠨ ᠪᠠᠷᠢᠪᠠᠯ ᠠᠳᠤᠭᠤᠴᠢᠨ ᠪᠣᠯ!
30 ᠮᠥᠷᠭᠥᠭᠰᠡᠨ ᠲᠣᠯᠣᠭᠠᠢ ᠴᠢᠨᠢ ᠮᠥᠩᠬᠡ ᠪᠣᠯ
ᠮᠥᠩᠭᠥ ᠵᠣᠭᠣᠰ ᠢ᠋ᠶ᠋ᠠᠷ ᠡᠯᠪᠡᠭ ᠪᠣᠯ!
31 ᠪᠤᠶᠠᠨ ᠴᠢᠨᠢ ᠳᠡᠯᠭᠡᠷᠡ ᠪᠤᠳᠠᠭᠠ ᠴᠢᠨᠢ ᠥᠳᠬᠡᠷᠡ!
32 ᠠᠯᠠᠭ ᠮᠣᠷᠢ ᠪᠠᠨ ᠤᠨᠤᠨ ᠵᠢᠷᠭᠠ
ᠠᠯᠴᠢᠭᠤᠷ ᠬᠠᠳᠠᠭ ᠢ᠋ᠶ᠋ᠠᠷ ᠴᠢᠮᠡᠨ ᠵᠢᠷᠭᠠ
33 ᠪᠢᠯᠢᠭ ᠵᠢᠷᠭᠠᠯ ᠢ᠋ᠶ᠋ᠠᠷ ᠰᠣᠶᠣᠷᠬᠠᠭᠰᠠᠨ
ᠪᠡᠯᠭᠡᠲᠦ ᠴᠠᠭᠠᠨ ᠰᠠᠷᠠ ᠳ᠋ᠠᠭᠠᠨ
ᠪᠡᠯᠭᠡ ᠶ᠋ᠢᠨ ᠬᠡᠭᠡᠷ ᠢ᠋ ᠣᠷᠣᠯᠠᠭᠰᠠᠨ
ᠪᠢᠳᠤᠷᠶᠠᠲᠤ ᠲᠡᠷᠭᠡ ᠪᠡᠨ ᠵᠢᠯᠣᠭᠣᠳᠤᠨ ᠵᠢᠷᠭᠠ!
34 ᠠᠯᠮᠠᠰ ᠬᠦᠷᠳᠦᠲᠦ ᠬᠤᠷᠳᠤᠨ ᠲᠡᠷᠭᠡ ᠪᠡᠨ
ᠠᠯᠭᠤᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠢᠯᠣᠭᠣᠳᠤᠨ ᠶᠠᠪᠤᠵᠤ ᠠᠮᠤᠭᠤᠯᠠᠩᠲᠤ ᠰᠠᠢᠬᠠᠨ ᠰᠢᠨᠡ ᠶ᠋ᠢᠨ ᠪᠠᠶᠠᠷ ᠢ᠋ᠶ᠋ᠠᠷ ᠠᠪᠤ ᠡᠵᠢ ᠳ᠋ᠡᠭᠡᠨ ᠮᠥᠷᠭᠥᠨ ᠮᠥᠷᠭᠥᠨ ᠵᠢᠷᠭᠠ!
35 ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠪᠠᠶᠠᠷ ᠳᠤᠷᠠᠰᠬᠠᠯ ᠢ᠋ᠶ᠋ᠠᠨ
ᠴᠠᠭᠯᠠᠰᠢ ᠦᠭᠡᠢ ᠤᠭᠲᠤᠨ ᠪᠡᠯᠭᠡᠯᠡᠵᠦ
ᠴᠠᠭ ᠡᠷᠡᠨ ᠦ᠌ ᠬᠥᠭᠵᠢᠯᠲᠡ ᠬᠤᠪᠢᠷᠠᠯᠲᠠ ᠪᠠᠷ
ᠴᠠᠬᠢᠯᠭᠠᠨ ᠲᠡᠷᠭᠡ ᠪᠡᠨ ᠳᠠᠪᠬᠢᠭᠤᠯᠤᠨ ᠵᠢᠷᠭᠠ!
36 ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠨᠠᠪᠴᠢ ᠴᠡᠴᠡᠭ ᠮᠡᠲᠦ ᠳᠡᠯᠭᠡᠷᠡᠨ ᠵᠢᠷᠭᠠ
ᠨᠠᠢ᠍ᠮᠠᠨ ᠴᠠᠭ ᠤ᠋ᠨ ᠨᠠᠷᠠᠨ ᠮᠡᠲᠦ ᠮᠡᠲᠦ ᠭᠡᠶ᠋ᠢᠭᠦᠯᠡᠩ ᠵᠢᠷᠭᠠ!
37 ᠤᠳᠪᠠᠯᠠ ᠯᠢᠩᠬᠤᠠ ᠴᠡᠴᠡᠭ ᠮᠡᠲᠦ ᠳᠡᠯᠭᠡᠷᠡᠨ ᠵᠢᠷᠭᠠ
ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠷᠠᠨ ᠰᠠᠷᠠᠨ ᠮᠡᠲᠦ ᠭᠡᠢᠭᠦᠯᠡᠩ ᠵᠢᠷᠭᠠ!
38 ᠲᠡᠮᠡᠭᠡᠨ ᠬᠣᠷᠭᠣᠯ ᠤ᠋ᠨ ᠴᠢᠨᠡᠭᠡᠨ ᠱ᠌ᠢᠷᠦ ᠵᠡᠭᠦ
ᠲᠡᠭᠡᠷᠮᠡ ᠶ᠋ᠢᠨ ᠴᠢᠨᠡᠭᠡᠨ ᠮᠥᠩᠭᠥᠨ ᠭᠣᠣ ᠵᠡᠭᠦ!
39 ᠤᠯᠠᠭᠠᠨ ᠨᠠᠷᠠᠨ ᠮᠡᠲᠦ ᠮᠠᠨᠳᠤᠵᠤ ᠶᠠᠪᠤ
ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ ᠶᠠᠪᠤ
ᠤᠷᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠷᠠᠯᠠᠵᠤ ᠶᠠᠪᠤ
ᠣᠵᠣᠭᠣᠷ ᠤ᠋ᠨ ᠦᠭᠡᠰ ᠢ᠋ ᠴᠡᠭᠡᠵᠢᠯᠡᠵᠦ ᠶᠠᠪᠤ!
40 ᠨᠡᠷᠡ ᠲᠡᠢ ᠪᠡᠨ ᠠᠳᠠᠯᠢ ᠵᠢᠷᠭᠠᠵᠤ ᠶᠠᠪᠤ
ᠨᠡᠷᠡ ᠲᠥᠷᠥ ᠪᠡᠨ ᠮᠠᠨᠳᠤᠭᠤᠯᠵᠤ ᠶᠠᠪᠤ
ᠨᠡᠢᠭᠡᠮ ᠨᠡᠢᠲᠡ ᠳ᠋ᠦ᠍ ᠲᠤᠰᠠ ᠲᠠᠢ ᠶᠠᠪᠤ
ᠨᠡᠢᠲᠡ ᠣᠯᠠᠨ ᠳ᠋ᠠᠭᠠᠨ ᠬᠦᠷᠢᠶᠡᠯᠡᠯᠲᠡᠢ ᠶᠠᠪᠤ!
41 ᠲᠤᠶᠠᠭᠠ ᠮᠡᠲᠦ ᠬᠡᠷᠡᠯᠳᠦᠵᠦ ᠶᠠᠪᠤ
ᠲᠤᠭᠤᠯ ᠪᠢᠷᠠᠭᠤ ᠪᠠᠨ ᠬᠠᠷᠢᠭᠤᠯᠵᠤ ᠶᠠᠪᠤ
ᠲᠤᠯᠭᠠ ᠲᠣᠭᠣᠭᠠ ᠪᠠᠨ ᠳᠠᠬᠢᠵᠤ ᠶᠠᠪᠤ
ᠲᠣᠰᠣ ᠮᠢᠬᠠ ᠪᠠᠷ ᠡᠯᠪᠡᠭ ᠶᠠᠪᠤ!
42 ᠬᠠᠰ ᠡᠷᠳᠡᠨᠢ ᠮᠡᠲᠦ ᠬᠡᠷᠡᠯᠳᠦᠵᠦ ᠶᠠᠪᠤ
ᠬᠠᠷᠠ ᠠᠷᠢᠬᠢ ᠠ᠋ᠴᠠ ᠵᠠᠢᠳᠠᠵᠤ ᠶᠠᠪᠤ
ᠬᠠᠮᠲᠤ ᠶ᠋ᠢᠨ ᠵᠣᠷᠢᠯᠭᠠ ᠪᠠᠨ ᠪᠡᠶᠡᠯᠡᠭᠦᠯᠵᠦ ᠶᠠᠪᠤ
ᠬᠠᠮᠤᠭ ᠰᠠᠢᠬᠠᠨ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠶᠠᠪᠤ!
43 ᠠᠩᠬᠠᠨ ᠬᠦᠦ ᠴᠢᠨᠢ ᠠᠮᠪᠠᠨ ᠰᠠᠭᠤ
ᠳᠠᠷᠠᠭᠠ ᠬᠦᠦ ᠴᠢᠨᠢ ᠳᠡ ᠯᠠᠮᠠ ᠪᠣᠯ
ᠭᠤᠲᠠᠭᠠᠷ ᠬᠦᠦ ᠴᠢᠨᠢ ᠬᠣᠨᠵᠢᠨ ᠰᠠᠭᠤ
ᠳᠥᠲᠥᠭᠡᠷ ᠬᠦᠦ ᠴᠢᠨᠢ ᠲᠥᠯᠭᠡᠴᠢᠨ ᠪᠣᠯ!
ᠵᠡᠭᠦᠯᠲᠡ
① ᠡᠨᠡᠬᠦ ᠠᠮᠠᠨ ᠢᠷᠦᠭᠡᠯ ᠢ᠋ ᠬᠡᠯᠡᠬᠦ ᠳ᠋ᠡᠭᠡᠨ ᠵᠠᠪᠠᠯ ᠡᠩ ᠦ᠋ᠨ ᠬᠥᠮᠦᠨ ᠪᠤᠶᠤ ᠠᠵᠢᠯ ᠠᠯᠪᠠ ᠲᠠᠢ ᠬᠥᠮᠦᠨ᠂ ᠡᠰᠡᠬᠦᠯᠡ ᠳᠡᠭᠦᠦ ᠨᠠᠷ ᠬᠡᠦᠬᠡᠳ ᠵᠡᠷᠭᠡ ᠬᠥᠮᠦᠨ ᠬᠥᠮᠦᠨ ᠦ᠌ ᠣᠨᠴᠠᠯᠢᠭ ᠪᠠᠢᠳᠠᠯ ᠢ᠋ ᠨᠢ ᠦᠵᠡᠵᠦ ᠠᠮᠢᠳᠤᠯᠢᠭ ᠢ᠋ᠶ᠋ᠠᠷ ᠢᠷᠦᠭᠡᠬᠦ ᠨᠢ ᠬᠠᠮᠤᠭ ᠴᠢᠬᠤᠯᠠ ᠪᠢᠯᠡ᠃
② ᠵᠤᠯᠠ ᠭᠡᠳᠡᠭ ᠨᠢ ᠲᠩᠷᠢ ᠶ᠋ᠢᠨ ᠵᠤᠯᠠ ᠡᠷᠭᠦᠬᠦ ᠶ᠋ᠢ (ᠮᠣᠷᠢᠨ ᠵᠤᠯᠠ ᠭᠡᠵᠦ ᠪᠠᠰᠠ ᠬᠡᠯᠡᠳᠡᠭ) ᠬᠡᠯᠡᠵᠦ ᠪᠣᠢ᠃ ᠲᠩᠷᠢ ᠶ᠋ᠢᠨ ᠵᠤᠯᠠ ᠭᠡᠳᠡᠭ ᠨᠢ ᠨᠢᠭᠡ ᠲᠣᠬᠣᠢ ᠥᠨᠳᠥᠷ361 ᠵᠣᠯᠠᠨ ᠤ᠋ ᠭᠣᠣᠯ ᠢ᠋ᠶ᠋ᠠᠷ ᠪᠦᠷᠢᠯᠳᠦᠭᠰᠡᠨ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠪᠡᠨ ᠬᠢᠬᠦ ᠳ᠋ᠦ᠍ ᠵᠠᠪᠠᠯ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠵᠤ ᠴᠡᠪᠡᠷ ᠠᠷᠢᠭᠤᠨ ᠪᠣᠯᠭᠠᠨ ᠬᠥᠪᠥᠩ ᠡᠨᠡ ᠲᠡᠷᠡ ᠶ᠋ᠢ ᠪᠡᠨ ᠠᠷᠢᠭᠤᠳᠬᠠᠯ ᠤ᠋ᠨ ᠠᠷᠴᠠ ᠪᠠᠷ ᠠᠷᠢᠭᠤᠳᠬᠠᠯ ᠬᠢᠵᠦ ᠪᠢᠲᠡᠭᠦᠦ ᠬᠣᠷᠢ ᠶᠢᠰᠦᠨ ᠰᠥᠨᠢ ᠲᠡᠷᠡ ᠬᠦ᠌ ᠨᠢᠭᠡ ᠲᠣᠬᠣᠢ ᠥᠨᠳᠥᠷ361 ᠳᠠᠷᠠᠰᠤ ᠶ᠋ᠢ ᠳᠣᠣᠷᠠ ᠲᠠᠯᠠ ᠳ᠋ᠤᠨᠢ ᠭᠤᠷᠪᠠᠨ ᠬᠤᠷᠤᠭᠤ ᠦᠯᠡᠳᠡᠭᠡᠵᠦ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠬᠢ ᠶ᠋ᠢ ᠨᠢ ᠲᠠᠬᠢᠯ ᠳ᠋ᠠᠬᠢ ᠵᠤᠯᠠᠨ ᠤ᠋ ᠭᠣᠣᠯ ᠢ᠋ ᠢᠮᠡᠷᠬᠦ ᠮᠡᠲᠦ ᠪᠡᠷ ᠪᠦᠷ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠵᠤ ᠳᠠᠬᠢᠨ361 ᠭᠣᠣᠯ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠨ ᠬᠣᠶᠠᠷ ᠮᠧᠲ᠋ᠷ ᠤᠷᠲᠤ ᠬᠤᠷᠤᠭᠤ ᠪᠦᠳᠦᠭᠦᠨ ᠮᠣᠳᠣᠨ ᠡᠰᠢ ᠣᠷᠣᠭᠤᠯᠤᠨ ᠬᠥᠪᠥᠩ ᠤᠲᠠᠰᠤ ᠪᠠᠷ ᠪᠠᠭᠯᠠᠵᠤ ᠪᠣᠭᠣᠵᠤ ᠲᠡᠭᠦᠨ ᠳ᠋ᠡᠭᠡᠨ ᠰᠢᠷᠠ ᠲᠣᠰᠣ ᠬᠢᠵᠦ ᠰᠢᠩᠭᠡᠭᠡᠭᠡᠳ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠥᠷᠯᠥᠭᠡ ᠬᠥᠮᠦᠨ ᠭᠠᠷ ᠤ᠋ᠨ ᠠᠯᠠᠭᠠᠨ ᠪᠢᠴᠢᠭ ᠦᠵᠡᠭᠳᠡᠬᠦ ᠶ᠋ᠢᠨ ᠦᠶᠡ ᠪᠡᠷ ᠴᠡᠪᠡᠷ ᠭᠠᠵᠠᠷ ᠠ᠋ᠴᠠ ᠴᠠᠪᠴᠢᠨ ᠠᠪᠴᠢᠷᠠᠭᠰᠠᠨ ᠵᠤᠯᠠᠨ ᠱᠠᠪᠠᠭ ᠢ᠋ᠶ᠋ᠠᠨ ᠨᠣᠴᠣᠭᠠᠨ ᠳᠦᠷᠡᠯᠵᠡᠭᠦᠯᠵᠦ ᠴᠣᠭ ᠠ᠋ᠴᠠ ᠪᠠᠨ ᠠᠪᠴᠤ ᠰᠠᠩ ᠤ᠋ᠨ ᠰᠥᠷᠥ ᠳᠡᠭᠡᠷᠡ ᠪᠡᠨ ᠰᠠᠩ ᠲᠠᠯᠪᠢᠨ ᠲᠤᠩ ᠦᠯᠢᠶᠡᠵᠦ᠂ ᠴᠡᠪᠡᠷ ᠴᠠᠭᠠᠨ ᠰᠢᠷᠣᠢ ᠬᠢᠭᠰᠡᠨ ᠬᠠᠳᠠᠨ ᠤᠭᠤᠷ ᠢ᠋ᠶ᠋ᠠᠨ ᠰᠠᠩ ᠤ᠋ᠨ ᠰᠥᠷᠥ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠳᠣᠲᠣᠷᠠ ᠲᠠᠯᠠ ᠳ᠋ᠤ᠌ ᠲᠠᠯᠪᠢᠵᠤ ᠲᠡᠭᠷᠢ ᠶ᠋ᠢᠨ ᠵᠤᠯᠠᠨ ᠤ᠋ ᠮᠣᠳᠣᠨ ᠡᠰᠢ ᠶ᠋ᠢ ᠣᠭᠣᠷ ᠳᠣᠲᠣᠷᠠ ᠬᠠᠳᠬᠤᠵᠤ ᠵᠤᠯᠠ ᠪᠠᠨ ᠠᠰᠠᠭᠠᠨ ᠨᠣᠴᠣᠭᠠᠵᠤ ᠡᠵᠡᠨ ᠰᠠᠩ ᠤᠩᠰᠢᠨ ᠲᠩᠷᠢ ᠪᠤᠷᠬᠠᠨ ᠪᠣᠯᠤᠨ ᠡᠵᠡᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠳ᠋ᠠᠭᠠᠨ ᠲᠩᠷᠢ ᠶ᠋ᠢᠨ ᠵᠤᠯᠠ ᠪᠠᠨ ᠡᠷᠭᠦᠵᠦ᠂ ᠴᠠᠭᠠᠨ ᠢᠰᠡᠭᠡᠢ ᠳᠡᠪᠢᠰᠴᠦ ᠰᠥᠭᠥᠳᠦᠨ ᠮᠥᠷᠭᠥᠵᠦ ᠭᠡᠷ ᠮᠠᠯ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠡᠷᠡᠭᠦᠯ ᠲᠡᠩᠬᠡᠯᠡᠭᠦᠨ ᠰᠠᠢᠨ ᠰᠠᠢᠬᠠᠨ ᠶᠠᠪᠤᠬᠤ ᠶ᠋ᠢ ᠪᠡᠨ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠵᠤ᠂ ᠲᠡᠷᠡ ᠬᠦ᠌ ᠲᠩᠷᠢ ᠶ᠋ᠢᠨ ᠵᠤᠯᠠ ᠨᠢ ᠭᠠᠯ ᠪᠠᠮᠪᠠᠷ ᠰᠢᠭ᠋ ᠢ᠋ᠶ᠋ᠡᠷ ᠰᠦᠷ ᠰᠦᠯᠳᠡ ᠲᠡᠢ ᠪᠠᠳᠠᠷᠠᠭᠤᠨ ᠢ᠋ᠶ᠋ᠠᠷ ᠨᠣᠴᠣᠵᠤ ᠲᠩᠷᠢ ᠭᠠᠵᠠᠷ ᠢ᠋ ᠭᠡᠷᠡᠯᠲᠦᠭᠦᠯᠦᠨ᠂ ᠭᠡᠷ ᠦ᠋ᠨ ᠡᠵᠡᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠠᠶᠠᠷᠯᠠᠯᠳᠤᠨ ᠵᠡᠯᠡ ᠫᠤᠤᠵᠢᠩ ᠫᠠᠷᠵᠢᠭᠢᠨᠠᠭᠤᠯᠤᠨ ᠪᠠᠶᠠᠷ ᠬᠥᠷ ᠲᠡᠢ ᠪᠡᠷ ᠰᠢᠨᠡᠯᠡᠳᠡᠭ ᠮᠣᠩᠭᠣᠯ ᠤ᠋ᠨ ᠰᠠᠢᠬᠠᠨ ᠤᠯᠠᠮᠵᠢᠯᠠᠯᠲᠤ ᠵᠠᠩ ᠵᠠᠩᠰᠢᠯ ᠲᠠᠢ ᠪᠢᠯᠡ᠃ ᠲᠩᠷᠢ ᠶ᠋ᠢᠨ ᠵᠤᠯᠠ ᠪᠠᠨ ᠡᠷᠭᠦᠵᠦ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠣᠯᠠᠨ ᠤ᠋ ᠮᠣᠳᠣᠨ ᠡᠰᠢᠨ ᠦ᠌ ᠦᠵᠦᠭᠦᠷ ᠲᠦ᠍ ᠨᠢᠭᠡ ᠴᠢᠪᠠᠭᠠ ᠬᠠᠳᠬᠤᠵᠤ ᠡᠮᠦᠰᠬᠡᠨ ᠲᠠᠯᠪᠢᠳᠠᠭ ᠪᠥᠭᠡᠳ ᠰᠢᠷᠣᠢ ᠲᠠᠢ ᠬᠠᠳᠠᠨ ᠤᠭᠤᠷ᠂ ᠴᠠᠭᠠᠨ ᠢᠰᠡᠭᠡᠢ ᠵᠡᠷᠭᠡ ᠶ᠋ᠢ ᠪᠦᠷ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ᠬᠦᠷᠲᠡᠯᠡ ᠬᠥᠳᠡᠯᠭᠡᠳᠡᠭ ᠦᠭᠡᠢ ᠪᠢᠯᠡ᠃
ᠳᠠᠭᠠᠯᠳᠤᠭᠤᠯᠤᠯ᠄
ᠲᠣᠭᠯᠠᠵᠤ ᠨᠠᠭᠠᠳᠬᠤ ᠬᠣᠱᠣᠩ ᠶᠦᠮᠦᠷ ᠬᠡᠯᠡᠯᠭᠡ᠄
1 ᠪᠤᠭᠤᠷᠤᠯ ᠪᠣᠯᠲᠠᠯᠠ ᠪᠠᠨ ᠵᠢᠳᠬᠦᠵᠦ ᠶᠠᠪᠤ
ᠪᠣᠯᠬᠤ ᠦᠭᠡᠢ ᠪᠣᠯᠲᠠᠯᠠ ᠵᠦᠯᠭᠦᠵᠦ ᠶᠠᠪᠤ!
2 ᠡᠭᠡᠭ ᠰᠢᠭ ᠡᠷᠭᠢᠵᠦ ᠶᠠᠪᠤ
ᠡᠯᠵᠢᠭᠡ ᠰᠢᠭ ᠵᠢᠷᠣᠭᠠᠯᠠᠵᠤ ᠶᠠᠪᠤ!
3 ᠬᠤᠨ ᠴᠠᠭᠠᠨ ᠰᠢᠭ᠋ ᠬᠣᠨᠳᠣᠢᠨ ᠵᠢᠷᠭᠠ
ᠬᠤᠴᠠᠨ ᠬᠠᠯᠳᠠᠭᠠ ᠰᠢᠭ᠋ ᠪᠠᠯᠲᠠᠢᠨ ᠵᠢᠷᠭᠠ
4 ᠨᠣᠶᠠᠨ ᠤᠯᠠᠭᠠᠨ ᠰᠤᠪᠤᠷᠭᠠ ᠪᠠᠨ ᠨᠦᠬᠡᠨ ᠠᠭᠤᠢ ᠳ᠋ᠠᠭᠠᠨ ᠵᠠᠯᠠᠨ ᠵᠢᠷᠭᠠ
5 ᠬᠤᠸᠠ ᠮᠠᠩᠬᠠ ᠪᠠᠨ ᠨᠤᠭᠤᠷᠠᠭᠤᠯᠵᠤ ᠶᠠᠪᠤ
ᠬᠣᠭ ᠨᠣᠪᠰᠢ ᠪᠠᠨ ᠴᠡᠪᠡᠷᠯᠡᠵᠦ ᠶᠠᠪᠤ
ᠬᠣᠳᠣᠭᠣᠳᠣ ᠭᠡᠳᠡᠰᠦ ᠪᠡᠨ ᠴᠠᠳᠬᠠᠵᠤ ᠶᠠᠪᠤ
ᠬᠣᠩᠭᠣᠷ ᠪᠦᠰᠡᠭᠦᠢ ᠪᠡᠨ ᠬᠠᠢᠷᠠᠯᠠᠵᠤ ᠶᠠᠪᠤ!
2012 ᠣᠨ ᠤ᠋4 ᠰᠠᠷᠠ ᠶ᠋ᠢᠨ11 ᠦ᠌ ᠡᠳᠦᠷ ᠬᠡᠷᠡᠢᠳ ᠪᠡ᠊᠂ ᠬᠡᠢᠷᠦᠪ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ ᠵᠤᠯᠵᠢᠷᠭᠠᠯ
ᠦᠰᠦᠭ ᠬᠠᠲᠠᠵᠤ ᠤᠶᠠᠩᠭᠠᠯᠠᠭᠰᠠᠨ᠄ ᠬᠡᠷᠡᠢᠳ ᠨᠠᠷᠠᠰᠤ
ᠬᠢᠨᠠᠭᠴᠢ᠄ ᠨᠠᠷᠠᠨ᠂ ᠣᠳᠬᠠᠨᠰᠣᠠ