ᠦᠯᠢᠭᠡᠷ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Үлгэр - Очирбатын Дашбалбар
322ᠦᠯᠢᠭᠡᠷ
ᠦᠯᠢᠭᠡᠷ
ᠨᠢᠭᠡ
ᠳᠣᠯᠭᠢᠶᠠᠨᠲᠤ ᠴᠡᠩᠬᠡᠷ ᠨᠠᠭᠤᠷ ᠲᠤ᠌ ᠬᠠᠪᠤᠷ ᠢ᠋ᠶ᠋ᠠᠷ
ᠳᠣᠯᠣᠭᠠᠨ ᠴᠠᠭᠠᠨ ᠬᠤᠨ ᠨᠢᠰᠴᠦ ᠢᠷᠡᠯᠡ
ᠳᠣᠯᠣᠭᠠᠨ ᠪᠤᠷᠬᠠᠨ ᠣᠳᠣᠳ ᠤ᠋ᠨ ᠳᠣᠣᠷᠠ
ᠳᠣᠯᠣᠭᠠᠨ ᠴᠠᠭᠠᠨ ᠴᠡᠴᠡᠭ ᠬᠥᠦ᠋ᠪᠴᠦ ᠶᠠᠪᠤᠯᠠ
ᠳᠣᠯᠣᠭᠠᠨ ᠴᠠᠭᠠᠨ ᠴᠡᠴᠡᠭ ᠰᠥᠨᠢ ᠪᠡᠷ
ᠳᠣᠯᠣᠭᠠᠨ ᠬᠥᠭᠡᠷᠦᠬᠦᠨ ᠥᠬᠢᠨ ᠪᠣᠯᠤᠭᠠᠳ
ᠡᠷᠭᠢ ᠶ᠋ᠢᠨ ᠵᠦᠯᠭᠡᠨ ᠳ᠋ᠦ᠍ ᠪᠠᠶᠠᠯᠠᠨ ᠨᠠᠭᠠᠳᠴᠤ
ᠡᠯᠡᠰᠦᠨ ᠦ᠌ ᠬᠡ ᠳ᠋ᠦ᠍ ᠮᠥᠷ ᠢ᠋ᠶ᠋ᠡᠨ ᠦᠯᠡᠳᠡᠭᠡᠯᠡ
ᠳᠣᠯᠣᠭᠠᠨ ᠠᠯᠲᠠᠨ ᠣᠳᠣ ᠤᠰᠤᠨ ᠳ᠋ᠤ᠌ ᠱᠤᠮᠪᠠᠵᠤ
ᠳᠣᠯᠣᠭᠠᠨ ᠴᠠᠭᠠᠨ ᠴᠡᠴᠡᠭ ᠲᠦ᠍ ᠭᠡᠷᠡᠯᠲᠦᠨᠡ
ᠳᠣᠯᠣᠭᠠᠨ ᠤᠶᠠᠬᠠᠨ ᠬᠥᠮᠦᠨ ᠬᠥᠪᠦᠭᠰᠡᠨ
ᠳᠣᠷᠣᠨᠠ ᠶ᠋ᠢᠨ ᠨᠠᠭᠤᠷ ᠬᠡ ᠲᠡᠳᠡᠨ ᠮᠢᠷᠠᠯᠵᠠᠨᠠ
ᠳᠣᠯᠣᠭᠠᠨ ᠴᠠᠭᠠᠨ ᠴᠡᠴᠡᠭ ᠨᠢ
ᠳᠣᠯᠣᠭᠠᠨ ᠬᠥᠭᠡᠷᠦᠬᠦᠨ ᠥᠬᠢᠨ ᠶᠦᠮ
ᠳᠣᠯᠣᠭᠠᠨ ᠬᠥᠭᠡᠷᠦᠬᠦᠨ ᠥᠬᠢᠨ ᠨᠢ
ᠳᠣᠯᠣᠭᠠᠨ ᠴᠠᠭᠠᠨ ᠬᠤᠨ ᠶᠤᠮ
ᠳᠣᠯᠣᠭᠠᠨ ᠴᠠᠭᠠᠨ ᠬᠤᠨ ᠨᠢ
ᠳᠣᠯᠣᠭᠠᠨ ᠴᠠᠭᠠᠨ ᠣᠳᠣ ᠶᠤᠮ
ᠳᠣᠯᠣᠭᠠᠨ ᠴᠠᠭᠠᠨ ᠣᠳᠣ ᠨᠢ
ᠳᠣᠯᠣᠭᠠᠨ ᠴᠠᠭᠠᠨ ᠰᠢᠯᠦᠭ ᠶᠦᠮ
ᠳᠣᠷᠣᠨᠠ ᠶ᠋ᠢᠨ ᠪᠤᠭᠤᠷᠤᠯ ᠰᠥᠨᠢ ᠪᠡᠷ
ᠳᠣᠮᠣᠭ ᠢᠩᠭᠢᠵᠦ ᠮᠡᠨᠳᠦᠯᠡᠳᠡᠭ ᠶᠦᠮ
ᠦᠯᠢᠭᠡᠷ ᠪᠢᠰᠢ ᠭᠡᠵᠦ ᠦᠨᠡᠨ ᠢ᠋ ᠬᠡᠯᠡᠬᠦ ᠤᠤ?
ᠦᠨᠡᠨ ᠪᠢᠰᠢ ᠭᠡᠵᠦ ᠦᠯᠢᠭᠡᠷ ᠢ᠋ ᠨᠤᠲᠠᠯᠠᠬᠤ ᠤᠤ?
ᠬᠣᠶᠠᠷ
ᠵᠤᠨ ᠨᠠᠮᠤᠷ ᠤ᠋ᠨ ᠲᠣᠷᠭᠠᠨ ᠵᠠᠭᠠᠭ ᠢ᠋ ᠬᠡᠨ ᠮᠡᠳᠡᠨᠡ
ᠵᠢᠷᠤᠭᠰᠠᠨ ᠲᠥᠷᠥᠭᠰᠡᠨ ᠦ᠌ ᠬᠢᠯᠢ ᠬᠢᠵᠠᠭᠠᠷ ᠢ᠋ ᠬᠡᠨ ᠢᠯᠭᠠᠨᠠ
ᠬᠤᠳᠠᠯ ᠦᠨᠡᠨ ᠢ᠋ ᠬᠡᠨ ᠰᠢᠭᠦᠵᠦ ᠮᠡᠳᠡᠭᠦᠯᠦᠨᠡ
ᠬᠤᠭᠤᠷ ᠶᠠᠲᠤᠭᠠ ᠠᠯᠢ ᠨᠢ ᠢᠯᠡᠭᠦᠦ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠨᠡ
ᠦᠯᠢᠭᠡᠷ ᠲᠡᠭᠦᠰᠦᠭᠰᠡᠨ ᠭᠠᠵᠠᠷ ᠠ᠋ᠴᠠ ᠦᠨᠡᠨ ᠡᠬᠢᠯᠡᠨᠡ ᠤᠤ
ᠦᠨᠡᠨ ᠳᠠᠭᠤᠰᠤᠭᠰᠠᠨ ᠮᠥᠴᠡ ᠡᠴᠡ ᠦᠯᠢᠭᠡᠷ ᠠᠮᠢᠯᠭᠠ ᠤᠤ?
ᠬᠠᠷᠠ ᠶ᠋ᠢ ᠴᠠᠭᠠᠨ ᠭᠡᠪᠡᠯ ᠬᠠᠮᠤᠭ ᠠ᠋ᠴᠠ ᠦᠨᠡᠨ ᠴᠦ᠍ ᠶᠦ᠍ᠮ ᠤᠤ
ᠬᠠᠲᠠᠭᠤ ᠶ᠋ᠢ ᠵᠥᠭᠡᠯᠡᠨ ᠭᠡᠪᠡᠯ ᠬᠢᠵᠠᠭᠠᠷ ᠢ᠋ ᠲᠠᠨᠢᠬᠤ ᠴᠤ᠌ ᠶᠤᠮ ᠤᠤ?
ᠲᠥᠷᠥᠬᠦ ᠶ᠋ᠢ ᠦᠬᠦᠬᠦ ᠶ᠋ᠢᠨ ᠡᠬᠢᠯᠡᠯ ᠭᠡᠪᠡᠯ ᠦᠨᠡᠮᠰᠢᠬᠦ ᠤᠤ
ᠲᠥᠭᠡᠷᠢᠬᠦ ᠶ᠋ᠢ ᠣᠯᠬᠤ ᠶ᠋ᠢᠨ ᠦᠵᠦᠭᠦᠷ ᠭᠡᠪᠡᠯ ᠢᠲᠡᠭᠡᠬᠦ ᠤᠤ
ᠦᠬᠦᠬᠦ ᠶ᠋ᠢ ᠲᠥᠷᠥᠬᠦ ᠶ᠋ᠢᠨ ᠡᠭᠦᠳᠬᠡᠯ ᠭᠡᠪᠡᠯ ᠵᠥᠪᠰᠢᠶᠡᠷᠡᠬᠦ ᠤᠤ
ᠦᠢᠯᠡ ᠶ᠋ᠢᠨ ᠦᠷᠡ ᠶ᠋ᠢ ᠵᠣᠪᠠᠯᠠᠩ ᠭᠡᠪᠡᠯ ᠮᠠᠷᠭᠤᠬᠤ ᠤᠣ?
ᠤᠰᠤ ᠶ᠋ᠢ ᠴᠠᠰᠤ ᠭᠡᠪᠡᠯ ᠰᠣᠯᠢᠶᠠᠷᠠᠯᠠ ᠭᠡᠬᠦ ᠤᠤ
ᠠᠭᠤᠯᠠ ᠶ᠋ᠢ ᠰᠢᠷᠣᠢ ᠭᠡᠪᠡᠯ ᠭᠠᠯᠵᠠᠭᠤᠷᠠᠯᠠ ᠭᠡᠬᠦ ᠤᠤ
ᠠᠨᠳᠠ ᠶ᠋ᠢ ᠳᠠᠢᠰᠤᠨ ᠭᠡᠪᠡᠯ ᠠᠨᠳᠠᠭᠤᠷᠠᠯᠠ ᠭᠡᠬᠦ ᠤᠤ
ᠠᠷᠢᠶᠠᠲᠠᠨ ᠢ᠋ ᠨᠥᠬᠥᠷ ᠭᠡᠪᠡᠯ ᠡᠨᠳᠡᠭᠦᠷᠡᠯᠡ ᠭᠡᠬᠦ ᠤᠤ?
ᠰᠠᠷᠢᠳᠠᠭ ᠥᠨᠳᠥᠷ ᠠᠭᠤᠯᠠᠰ ᠢ᠋ ᠳᠣᠪᠣᠴᠠᠭ ᠪᠠᠢᠭᠰᠠᠨ ᠳ᠋ᠤ᠌ ᠢᠲᠡᠭᠡᠬᠦ ᠤᠤ
ᠰᠠᠷᠠᠭᠤᠯ ᠲᠠᠯᠠ ᠶ᠋ᠢᠨ ᠲᠤᠯᠤᠭᠠᠳ ᠢ᠋ ᠣᠷᠭᠢᠯ ᠪᠠᠢᠭᠰᠠᠨ ᠳ᠋ᠤ᠌ ᠦᠨᠡᠮᠰᠢᠬᠦ ᠤᠤ
ᠰᠠᠮᠠᠭᠠᠨ ᠪᠤᠭᠤᠷᠤᠯ ᠡᠵᠢ ᠪᠡᠨ ᠵᠠᠯᠠᠭᠤ ᠪᠠᠢᠭᠰᠠᠨ ᠢ᠋ ᠬᠤᠳᠠᠯ ᠭᠡᠬᠦ ᠤᠤ?
ᠰᠠᠢᠬᠠᠨ ᠪᠤᠭᠤᠷᠤᠯ ᠠᠪᠤ ᠪᠠᠨ ᠬᠡᠦᠬᠡᠳ ᠪᠠᠢᠭᠰᠠᠨ ᠢ᠋ ᠪᠤᠷᠤᠭᠤ ᠭᠡᠬᠦ ᠤᠤ?
ᠳᠣᠷᠣᠨᠠ ᠶ᠋ᠢᠨ ᠪᠤᠭᠤᠷᠤᠯ ᠰᠥᠨᠢ ᠪᠡᠷ ᠳᠣᠮᠣᠭ ᠨᠢ ᠦᠨᠡᠨ ᠪᠣᠯᠳᠠᠭ ᠶᠤᠮ
ᠦᠢ ᠲᠦᠮᠡᠨ ᠣᠳᠣᠳ ᠤ᠋ᠨ ᠳᠣᠣᠷᠠ ᠦᠨᠡᠨ ᠨᠢ ᠦᠯᠢᠭᠡᠷ ᠪᠣᠯᠳᠠᠭ ᠶᠤᠮ᠃