ᠣᠷᠳᠣᠰ ᠮᠣᠩᠭᠣᠯᠴᠤᠳ ᠊ᠤᠨ ᠭᠠᠯ ᠲᠠᠬᠢᠬᠤ ᠶᠣᠰᠣᠨ- ᠮᠢᠩᠭᠠᠲᠤ ᠮᠡᠷᠭᠡᠨᠪᠢᠯᠢᠭОрдос Монголчуудын гал тахих ёсон-Мянгат Мэргэнбилэг
3599
ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠭᠠᠯ ᠲᠠᠬᠢᠬᠤ ᠶᠣᠰᠣᠨ
ᠮᠢᠩᠭᠠᠲᠤ ᠮᠡᠷᠭᠡᠨᠪᠢᠯᠢᠭ
1᠂ ᠡᠪᠴᠢᠭᠦᠦ ᠥᠳᠬᠡᠷᠡᠭᠦᠯᠬᠦ
ᠣᠷᠳᠣᠰ ᠮᠣᠩᠭᠣᠯᠴᠤᠳ ᠡᠪᠴᠢᠭᠦᠦ ᠪᠡᠨ ᠴᠢᠨᠠᠬᠤ ᠶ᠋ᠢ ᠥᠳᠬᠡᠷᠡᠭᠦᠯᠬᠦ ᠭᠡᠳᠡᠭ᠃ ᠤᠷᠢᠳᠠᠪᠡᠷ ᠡᠪᠴᠢᠭᠦᠨ ᠳᠤ ᠪᠡᠨ ᠦᠯᠡᠳᠡᠭᠡᠭᠰᠡᠨ ᠬᠡᠷᠰᠡᠩ ᠢ᠋ᠶ᠋ᠡᠨ ᠬᠤᠢᠬᠠᠯᠠᠵᠤ ᠴᠡᠪᠡᠷᠯᠡᠭᠡᠳ ᠠᠷᠴᠠ ᠬᠦᠵᠢ ᠪᠡᠷ ᠡᠪᠴᠢᠭᠦᠦ ᠪᠡᠨ ᠠᠷᠢᠭᠤᠳᠬᠠᠨ ᠬᠤᠳᠳᠤᠭ ᠠ᠋ᠴᠠ ᠰᠢᠨᠡ ᠤᠰᠤ ᠳᠠᠮᠨᠠᠵᠤ ᠢᠷᠡᠭᠡᠳ ᠲᠣᠭᠣᠭᠠᠨ ᠳ᠋ᠠᠭᠠᠨ ᠬᠢᠵᠦ᠂ ᠳᠠᠷᠠᠭᠠ ᠨᠢ ᠲᠣᠭᠣᠭᠠᠨ ᠳ᠋ᠤ᠌ ᠪᠠᠨ ᠵᠢᠭᠠᠬᠠᠨ ᠰᠦ ᠠᠢᠷᠠᠭ ᠳᠤᠰᠤᠭᠠᠳᠠᠭ᠃ ᠬᠠᠷᠠ ᠤᠰᠤᠨ ᠳ᠋ᠤ᠌ ᠡᠪᠴᠢᠭᠦᠦ ᠪᠡᠨ ᠴᠢᠨᠠᠬᠤ ᠶ᠋ᠢ ᠴᠡᠭᠡᠷᠯᠡᠨᠡ᠃ ᠡᠭᠦᠨ ᠳ᠋ᠦ᠍ ᠳᠠᠪᠤᠰᠤ ᠬᠢᠳᠡᠭ ᠦᠭᠡᠢ᠃ ᠬᠠᠷᠢᠨ ᠠᠯᠢ ᠲᠣᠭᠰᠢᠨ ᠱᠦᠭᠦᠮᠡᠯ (ᠴᠥᠷᠮᠡ) ᠬᠤᠷᠤᠳ᠂ ᠤᠯᠠᠭᠠᠨ ᠴᠢᠪᠠᠭᠠ ᠬᠢᠳᠡᠭ᠃ ᠥᠭᠡᠷᠡ ᠵᠦᠢᠯ ᠢ᠋ ᠬᠢᠳᠡᠭ ᠦᠭᠡᠢ᠃ ᠨᠡᠯᠢᠶᠡᠳ ᠴᠢᠨᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠪᠢᠯᠠᠭ ᠢ᠋ᠶ᠋ᠠᠨ ᠬᠠᠮᠲᠤ ᠳ᠋ᠤᠨᠢ ᠴᠢᠨᠠᠳᠠᠭ᠃ ᠡᠪᠴᠢᠭᠦᠦ ᠪᠡᠨ ᠬᠡᠲᠦᠷᠬᠡᠢ ᠵᠥᠭᠡᠯᠡᠷᠡᠭᠦᠯᠵᠦ ᠶᠠᠰᠤ ᠮᠢᠬᠠ ᠨᠢ ᠬᠤᠪᠢ ᠬᠤᠪᠢ ᠳ᠋ᠠᠭᠠᠨ ᠪᠣᠯᠬᠤ ᠶ᠋ᠢ ᠣᠨᠴᠠ ᠴᠡᠭᠡᠷᠯᠡᠨᠡ᠃ ᠣᠷᠴᠢᠮ ᠤ᠋ᠨ ᠵᠢᠯ ᠦ᠋ᠳ ᠢ᠋ᠶ᠋ᠡᠷ ᠵᠠᠷᠢᠮ ᠠᠢᠯ ᠡᠷᠦᠬᠡ ᠨᠢ ᠦᠵᠦᠮ᠂ ᠪᠤᠷᠠᠮ (ᠬᠠᠷᠠ ᠰᠢᠬᠢᠷ) ᠵᠡᠷᠭᠡ ᠶ᠋ᠢ ᠭᠠᠯ ᠤ᠋ᠨ ᠪᠤᠳᠠᠭᠠᠨ ᠳ᠋ᠤ᠌ ᠬᠢᠳᠡᠭ ᠪᠣᠯᠵᠠᠢ ᠡᠨᠡ ᠨᠢ ᠪᠠᠷᠤᠭ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠨᠡᠪᠴᠢᠯᠲᠡ ᠡᠴᠡ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃
2᠂ ᠡᠪᠴᠢᠭᠦᠦ ᠴᠥᠮᠥᠬᠦ
ᠴᠢᠨᠠᠵᠤ ᠪᠣᠯᠭᠣᠭᠰᠠᠨ ᠡᠪᠴᠢᠭᠦᠦ ᠪᠡᠨ ᠲᠣᠭᠣᠭᠠᠨ ᠠ᠋ᠴᠠ ᠪᠠᠨ ᠭᠠᠷᠭᠠᠬᠤ ᠳ᠋ᠠᠭᠠᠨ ᠵᠠᠭᠠᠮᠠᠯ ᠪᠤᠶᠤ ᠲᠠᠪᠰᠢᠨ ᠳ᠋ᠤ᠌ ᠭᠠᠷᠭᠠᠵᠤ ᠴᠥᠮᠥᠨᠡ᠃ ᠴᠥᠮᠥᠬᠦ ᠳ᠋ᠡᠭᠡᠨ ᠳᠣᠣᠷᠠᠬᠢ ᠬᠡᠳᠦᠨ ᠵᠦᠢᠯ ᠢ᠋ ᠠᠩᠬᠠᠷᠬᠤ ᠴᠢᠬᠤᠯᠲᠠᠢ᠃
(1) ᠭᠠᠷ ᠢ᠋ᠶ᠋ᠠᠨ ᠰᠠᠢᠨ ᠤᠬᠢᠶᠠᠵᠤ ᠠᠷᠢᠭᠤᠳᠬᠠᠬᠤ ᠬᠡᠷᠡᠭᠲᠡᠢ᠃
(2) ᠳᠡᠪᠡᠯ ᠬᠤᠪᠴᠠᠰᠤᠨ ᠤ᠋ ᠲᠣᠪᠴᠢ ᠶ᠋ᠢ ᠰᠠᠢᠬᠠᠨ ᠲᠣᠪᠴᠢᠯᠠᠨᠠ᠃
(3) ᠮᠠᠯᠠᠭᠠᠢ ᠪᠠᠨ ᠲᠡᠭᠰᠢ ᠵᠡᠭᠦᠬᠦ ᠬᠡᠷᠡᠭᠲᠡᠢ᠃
(4) ᠡᠪᠴᠢᠭᠦᠨ ᠦ᠌ ᠪᠦᠳᠦᠷᠬᠡᠢ ᠲᠠᠯᠠ (ᠲᠣᠯᠣᠭᠠᠢ) ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠮᠢᠬᠠ ᠶ᠋ᠢ ᠨᠢ ᠴᠥᠮᠥᠨᠡ᠃
(5) ᠡᠪᠴᠢᠭᠦᠨ ᠦ᠌ ᠬᠤᠷᠤᠭᠤ (ᠵᠢᠵᠢᠭ ᠶᠠᠰᠤ) ᠠᠢᠮᠠᠲᠠᠭᠠᠢ ᠮᠥᠭᠡᠷᠡᠰᠦ᠂ ᠰᠦᠪᠡ (ᠰᠦᠪᠡᠷᠭᠡ)ᠵᠡᠷᠭᠡ ᠶᠠᠰᠤ ᠶ᠋ᠢ ᠵᠠᠪᠠᠯ ᠪᠦᠷᠢᠨ ᠪᠦᠲᠦᠨ ᠤᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠯᠭᠠᠬᠤ ᠶ᠋ᠢ ᠱᠠᠭᠠᠷᠳᠠᠳᠠᠭ
(6) ᠠᠮᠠᠨ ᠠᠭᠤᠷ ᠣᠷᠣᠬᠤ ᠶ᠋ᠢ ᠰᠡᠷᠭᠡᠢᠯᠡᠵᠦ᠂ ᠠᠮᠠᠨ ᠳ᠋ᠠᠭᠠᠨ ᠠᠯᠴᠢᠭᠤᠷ ᠵᠡᠭᠦᠬᠦ ᠬᠡᠷᠡᠭᠲᠡᠢ᠃
3᠂ ᠡᠪᠴᠢᠭᠦᠦ ᠪᠡᠨ ᠣᠷᠢᠶᠠᠬᠤ
ᠤᠷᠢᠳᠴᠢᠯᠠᠨ ᠪᠡᠯᠡᠳᠬᠡᠭᠰᠡᠨ ᠬᠤᠴᠠ ᠪᠤᠶᠤ ᠬᠣᠨᠢᠨ ᠤ᠋ ᠡᠭᠡᠷᠡᠭᠰᠡᠨ ᠤᠲᠠᠰᠤ ᠪᠠᠷ ᠣᠷᠢᠶᠠᠳᠠᠭ᠃ ᠳᠠᠷᠤᠢ ᠪᠦᠳᠦᠷᠬᠡᠢ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠡᠬᠢᠯᠡᠭᠦᠯᠦᠨ ᠨᠠᠷᠠᠨ ᠵᠥᠪ ᠢ᠋ᠶ᠋ᠡᠷ ᠭᠤᠷᠪᠠ ᠭᠤᠷᠪᠠ ᠪᠠᠷ ᠣᠷᠢᠶᠠᠳᠠᠭ᠂ ᠲᠡᠮᠡᠭᠡ ᠮᠠᠯᠵᠢᠵᠤ ᠪᠠᠢᠭᠠ ᠠᠢᠯ ᠡᠷᠦᠬᠡ ᠵᠠᠷᠢᠮ ᠨᠢ ᠪᠤᠤᠷᠠ ᠶ᠋ᠢᠨ ᠵᠣᠭᠳᠣᠷ ᠢ᠋ᠶ᠋ᠠᠷ ᠡᠭᠡᠷᠡᠭᠰᠡᠨ ᠤᠲᠠᠰᠤ ᠪᠠᠷ ᠣᠷᠢᠶᠠᠳᠠᠭ ᠴᠤ᠌ ᠪᠣᠢ᠃
4᠂ ᠭᠠᠯ ᠲᠠᠬᠢᠬᠤ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠵᠦᠢᠯ
(1) ᠲᠠᠪᠤᠨ ᠲᠠᠷᠢᠶᠠᠨ ᠤ᠋ ᠦᠷᠡ (ᠭᠠᠯ ᠤ᠋ᠨ ᠪᠤᠳᠠᠭᠠ)
(2) ᠲᠠᠪᠤ ᠪᠤᠶᠤ ᠶᠢᠰᠦᠨ ᠥᠩᠭᠡ ᠶ᠋ᠢᠨ ᠲᠣᠷᠭᠠ ᠳᠤᠷᠳᠤᠩ᠂ ᠲᠤᠷᠠᠭᠠᠨ ᠤᠲᠠᠰᠤ᠂ ᠪᠥᠰ ᠦ᠋ᠨ
ᠥᠭᠡᠳᠡᠰᠦ᠃ (ᠡᠭᠦᠨ ᠳ᠋ᠦ᠍ ᠬᠠᠷᠠ ᠥᠩᠭᠡ ᠶ᠋ᠢ ᠴᠡᠭᠡᠷᠯᠡᠨᠡ᠃) ᠭᠠᠯ ᠤ᠋ᠨ ᠡᠮᠦᠰᠬᠡᠯ ᠭᠡᠵᠦ ᠪᠠᠰᠠ ᠬᠡᠯᠡᠳᠡᠭ᠃
(3) ᠬᠠᠢᠯᠠᠰᠤᠨ ᠮᠣᠳᠣᠨ ᠤ᠋ ᠰᠠᠯᠠᠭᠠ
(4) ᠠᠷᠴᠠ᠂ ᠬᠦᠵᠢ
(5) ᠠᠭᠢ᠂ ᠬᠢᠯᠠᠭᠠᠨᠠ᠂ ᠬᠠᠵᠠᠭᠠᠷ ᠡᠪᠡᠰᠦ᠂ ᠶᠥᠷᠬᠥᠭ ᠡᠪᠡᠰᠦ ᠵᠡᠷᠭᠡ
(6) ᠤᠯᠠᠭᠠᠨ ᠴᠢᠪᠠᠭᠠ᠂ ᠰᠢᠷᠠ ᠲᠣᠰᠣ᠂ ᠥᠷᠥᠮᠡ᠂ ᠬᠠᠯᠢᠮ ᠤ᠋ᠨ ᠥᠭᠡᠬᠦ᠂ ᠡᠪᠴᠢᠭᠦᠦ ᠥᠳᠬᠡᠷᠡᠭᠦᠯᠦᠭᠰᠡᠨ ᠱᠥᠯᠦᠨ ᠲᠣᠰᠣ᠂ ᠡᠪᠴᠢᠭᠦᠨ ᠡᠴᠡ ᠴᠥᠮᠥᠭᠰᠡᠨ ᠮᠢᠬᠠ ᠶ᠋ᠢᠨ ᠴᠥᠪᠥᠳᠡᠯ ᠵᠡᠷᠭᠡ᠃ ᠡᠳᠡᠭᠡᠷ ᠵᠦᠢᠯ ᠢ᠋ᠶ᠋ᠡᠨ ᠪᠦᠷᠢᠨ ᠪᠡᠯᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠣᠷᠢᠶᠠᠭᠰᠠᠨ ᠡᠪᠴᠢᠭᠦᠨ ᠦ᠌ ᠪᠡᠨ ᠬᠣᠩᠬᠣᠷ ᠲᠠᠯᠠ ᠳ᠋ᠤᠨᠢ ᠣᠪᠣᠭᠠᠯᠠᠵᠤ ᠲᠠᠯᠪᠢᠨᠠ᠃
5᠂ ᠭᠠᠯ ᠤ᠋ᠨ ᠪᠤᠳᠠᠭᠠ ᠴᠢᠨᠠᠬᠤ
ᠡᠪᠴᠢᠭᠦᠦ ᠥᠳᠬᠡᠷᠡᠭᠦᠯᠦᠭᠰᠡᠨ ᠱᠥᠯᠦᠨ ᠳ᠋ᠡᠭᠡᠨ ᠳᠠᠩ ᠪᠤᠶᠤ ᠬᠣᠶᠠᠷ ᠵᠦᠢᠯ ᠦ᠋ᠨ ᠪᠤᠳᠠᠭᠠ (ᠲᠤᠲᠤᠷᠭᠠ ᠪᠠ ᠴᠠᠭᠠᠨ ᠪᠤᠳᠠᠭᠠ (ᠠᠮᠤ) ᠪᠤᠶᠤ ᠰᠢᠷᠠ ᠠᠮᠤ) ᠬᠣᠯᠢᠵᠤ ᠬᠢᠳᠡᠭ ᠪᠣᠢ᠃ ᠭᠠᠯ ᠤ᠋ᠨ ᠪᠤᠳᠠᠭᠠᠨ ᠳ᠋ᠠᠭᠠᠨ ᠳᠠᠪᠤᠰᠤ ᠬᠢᠳᠡᠭ ᠦᠭᠡᠢ᠂ ᠵᠥᠭᠡᠯᠡᠨ ᠭᠠᠯ ᠢ᠋ᠶ᠋ᠠᠷ ᠴᠢᠨᠠᠨᠠ᠃
6᠂ ᠲᠤᠯᠭᠠ ᠪᠠ ᠵᠤᠤᠬᠠᠨ ᠤ᠋ ᠪᠠᠨ ᠳᠥᠷᠪᠡᠨ ᠲᠠᠯᠠ ᠳ᠋ᠤ᠌ ᠴᠡᠪᠡᠷ ᠮᠠᠩᠬᠠ (ᠡᠯᠡᠰᠦ) ᠲᠤᠰ ᠪᠦᠷᠢ ᠣᠪᠣᠭᠠᠯᠠᠨ ᠲᠠᠯᠪᠢᠬᠤ ᠪᠤᠶᠤ ᠬᠦᠵᠢ ᠵᠤᠯᠠ ᠡᠷᠭᠦᠳᠡᠭ ᠴᠤ᠌ ᠪᠣᠢ᠃ ᠡᠨᠡ ᠨᠢ ᠳᠥᠷᠪᠡᠨ ᠵᠦᠭ ᠦ᠋ᠨ ᠠᠭᠤᠯᠠ ᠬᠠᠢᠷᠬᠠᠨ ᠢ᠋ᠶ᠋ᠠᠨ ᠳᠠᠬᠢᠵᠦ ᠪᠠᠢᠬᠤ ᠠᠭᠤᠯᠭᠠ ᠲᠠᠢ ᠭᠡᠨᠡ᠃
7᠂ ᠲᠤᠯᠭᠠ ᠶ᠋ᠢᠨ ᠡᠮᠦᠨᠡ ᠰᠢᠷᠡᠭᠡ ᠵᠠᠰᠠᠵᠤ᠂ ᠢᠰᠡᠭᠡᠢ ᠳᠡᠯᠭᠡᠵᠦ ᠴᠢᠮᠡᠭᠰᠡᠨ ᠡᠪᠴᠢᠭᠦᠦ᠂ ᠳᠤᠰᠤᠭᠠᠯ᠂ ᠰᠠᠷᠬᠤᠳ (ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ) ᠵᠡᠷᠭᠡ ᠶ᠋ᠢ ᠪᠡᠯᠡᠳᠬᠡᠵᠦ ᠲᠠᠯᠪᠢᠨᠠ᠃ ᠳᠤᠰᠤᠭᠠᠯ ᠨᠢ ᠬᠠᠯᠢᠮ ᠤ᠋ᠨ ᠥᠭᠡᠬᠦ ᠪᠠ ᠡᠪᠴᠢᠭᠦᠦ ᠥᠳᠬᠡᠷᠡᠭᠦᠯᠦᠭᠰᠡᠨ ᠱᠥᠯᠦᠨ ᠲᠣᠰᠣ᠂ ᠰᠢᠷᠠ ᠲᠣᠰᠣ᠂ ᠰᠦ ᠠᠢᠷᠠᠭ ᠲᠤᠰᠤᠭᠠᠳᠠᠭ᠃ ᠳᠤᠰᠤᠭᠠᠯ ᠢ᠋ᠶ᠋ᠠᠨ ᠨᠢᠭᠡ ᠰᠠᠪᠠᠨ ᠳ᠋ᠤ᠌ ᠬᠣᠯᠢᠵᠤ᠂ ᠰᠢᠨᠠᠭᠠ ᠬᠠᠯᠪᠠᠭᠠ ᠵᠡᠷᠭᠡ ᠶ᠋ᠢ ᠪᠡᠯᠡᠳᠬᠡᠨᠡ᠃
8᠂ ᠭᠡᠷ ᠦ᠋ᠨ ᠡᠵᠡᠨ ᠡᠴᠡ ᠭᠠᠯ ᠤ᠋ᠨ ᠥᠴᠢᠭ ᠤᠩᠰᠢᠨᠠ᠃ ᠭᠡᠷ ᠦ᠋ᠨ ᠪᠤᠰᠤᠳ ᠬᠥᠮᠦᠰ ᠨᠢ ᠠᠬᠠᠮᠠᠳ
ᠬᠡᠦᠬᠡᠳ ᠦ᠋ᠨ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠢᠰᠡᠭᠡᠢ ᠪᠤᠶᠤ ᠣᠯᠪᠣᠭ ᠳᠡᠭᠡᠷᠡ ᠰᠥᠬᠥᠳᠡᠨ ᠪᠠᠢᠵᠤ ᠭᠦᠢᠴᠡᠳᠬᠡᠨᠡ᠃
ᠭᠠᠯ ᠤ᠋ᠨ ᠥᠴᠢᠭ
ᠤᠸ᠋ᠮ ᠰᠠᠢᠨ ᠠᠮᠤᠭᠤᠯᠠᠩ ᠲᠠᠨ ᠪᠣᠯᠲᠤᠭᠠᠢ!
ᠳᠡᠭᠡᠷᠡ ᠲᠡᠭᠷᠢ ᠳ᠋ᠦ᠍ ᠭᠡᠷᠡᠯ ᠲᠡᠢ
ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤ᠌ ᠢᠯᠴᠢ ᠲᠡᠢ
ᠳᠡᠭᠡᠳᠦ ᠮᠣᠩᠭᠣᠯ ᠳ᠋ᠤ᠌ ᠭᠣᠯᠣᠮᠲᠠ ᠲᠠᠢ
ᠳᠡᠯᠭᠡᠷ ᠬᠠᠩᠭᠠᠢ ᠳ᠋ᠤ᠌ ᠨᠤᠲᠤᠭ ᠲᠠᠢ
ᠰᠢᠷᠠ ᠲᠡᠷᠢᠭᠦᠲᠦ ᠴᠠᠭᠠᠨ ᠬᠣᠨᠢᠨ ᠤ᠋
ᠰᠢᠷᠠᠭᠰᠠᠨ ᠡᠪᠴᠢᠭᠦᠨ ᠦ᠌ ᠲᠠᠬᠢᠯᠭᠠ ᠲᠠᠢ
ᠰᠢᠷᠠᠭᠴᠢᠨ ᠦᠨᠢᠶᠡᠨ ᠦ᠌ ᠰᠦ ᠶ᠋ᠢᠨ
ᠰᠢᠷᠠ ᠲᠣᠰᠣᠨ ᠤ᠋ ᠢᠳᠡᠭᠡᠨ ᠲᠡᠢ
ᠠᠢᠷᠠᠭ ᠴᠡᠭᠡ ᠪᠡᠷ ᠨᠡᠷᠡᠭᠰᠡᠨ
ᠠᠷᠢᠬᠢ ᠰᠠᠷᠬᠤᠳ ᠤᠮᠳᠠᠭᠠᠨ ᠲᠠᠢ
ᠠᠯᠲᠠ ᠮᠥᠩᠭᠥ ᠪᠡᠷ ᠴᠢᠮᠡᠭᠰᠡᠨ
ᠠᠯ ᠲᠤᠷᠠᠭᠠᠨ ᠡᠮᠦᠰᠬᠡᠯ ᠲᠡᠢ
ᠠᠭᠤᠯᠠ ᠬᠠᠢᠷᠬᠠᠨ ᠳ᠋ᠤ᠌ ᠨᠣᠭᠣᠭᠠᠷᠠᠭᠰᠠᠨ
ᠠᠷᠴᠠ ᠽᠠᠨᠳᠠᠨ ᠤ᠋ ᠨᠤᠴᠤᠭᠠᠯ ᠲᠠᠢ
ᠠᠭᠤᠳᠠᠮ ᠲᠠᠯᠠ ᠳ᠋ᠤ᠌ ᠬᠠᠯᠢᠭᠤᠷᠠᠭᠰᠠᠨ
ᠠᠭᠢ ᠬᠢᠯᠠᠭᠠᠨᠠ ᠶ᠋ᠢᠨ ᠰᠢᠲᠠᠭᠠᠯ ᠲᠠᠢ
ᠡᠵᠡᠨ ᠪᠣᠭᠳᠠ ᠶ᠋ᠢᠨ ᠴᠠᠬᠢᠭᠰᠠᠨ
ᠡᠬᠡ ᠬᠠᠲᠤᠨ ᠤ᠋ ᠨᠣᠴᠣᠭᠠᠭᠰᠠᠨ
ᠬᠢᠷᠠᠭᠠ ᠲᠡᠷᠢᠭᠦᠲᠦ
ᠭᠢᠯᠠᠭᠠᠨᠠᠨ ᠠᠮᠢᠳᠤ
ᠲᠤᠷᠠᠭᠠᠨ ᠴᠢᠷᠠᠢᠲᠤ
ᠲᠣᠰᠣᠨ ᠴᠢᠷᠠᠢᠲᠤ
ᠲᠣᠰᠣᠨ ᠨᠢᠭᠤᠷᠲᠤ
ᠤᠳᠬᠠᠨ ᠭᠠᠯ ᠤ᠋ᠨ ᠡᠬᠡ ᠳ᠋ᠦ᠍
ᠠᠷᠪᠠᠨ ᠶᠡᠬᠡ ᠲᠦᠭᠡᠯ ᠢ᠋ ᠴᠢᠨᠦ
ᠲᠠᠯᠪᠢᠨ ᠲᠠᠯᠪᠢᠨ ᠵᠢᠭᠰᠠᠭᠠᠨᠠᠮ
ᠠᠷᠢᠭᠤᠨ ᠶᠡᠬᠡ ᠥᠴᠢᠭ ᠢ᠋ ᠴᠢᠨᠦ
ᠳᠠᠬᠢᠨ ᠳᠠᠬᠢᠨ ᠳᠠᠭᠤᠳᠠᠨᠠᠮ
ᠡᠬᠢᠯᠡᠨ ᠰᠠᠭᠤᠭᠴᠢ ᠪᠢᠳᠡᠨ
ᠡᠨᠡ ᠭᠡᠷ ᠦ᠋ᠨ ᠡᠵᠡᠨ ᠪᠦᠭᠦᠳᠡ
ᠡᠬᠡ ᠳᠡᠯᠡᠬᠡᠢ ᠶ᠋ᠢᠨ ᠢᠷᠭᠡᠨ ᠠᠮᠢᠲᠠᠨ
ᠡᠩᠬᠡ ᠮᠥᠩᠬᠡ ᠪᠠᠶᠠᠨ ᠵᠢᠷᠭᠠᠯᠠᠩ ᠤ᠋ᠨ ᠳᠤᠮᠳᠠ
ᠡᠭᠦᠷᠢᠳᠡ ᠰᠠᠢᠬᠠᠨ ᠠᠮᠤᠷ ᠵᠢᠷᠭᠠᠨ ᠠᠲᠤᠭᠠᠢ!
ᠥᠴᠢᠵᠦ ᠪᠠᠷᠠᠮᠠᠭᠴᠠ ᠡᠪᠴᠢᠭᠦᠦ ᠪᠡᠨ ᠭᠠᠯ ᠳ᠋ᠠᠭᠠᠨ ᠡᠷᠭᠦᠳᠡᠭ᠂ ᠳᠠᠷᠠᠭᠠ ᠨᠢ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠭᠤᠷᠪᠠ ᠪᠤᠶᠤ ᠭᠤᠷᠪᠠ ᠭᠤᠷᠪᠠ ᠶ᠋ᠢᠨ ᠶᠢᠰᠦ ᠮᠥᠷᠭᠥᠳᠡᠭ᠃
9᠂ ᠭᠠᠯ ᠤ᠋ᠨ ᠳᠤᠰᠤᠭᠠᠯ
ᠣᠷᠳᠣᠰ ᠮᠣᠩᠭᠣᠯᠴᠤᠳ ᠭᠠᠯ ᠲᠠᠬᠢᠬᠤ ᠳ᠋ᠠᠭᠠᠨ ᠭᠠᠯ ᠤ᠋ᠨ ᠳᠥᠯᠥ ᠶ᠋ᠢ ᠬᠥᠭᠵᠢᠭᠡᠬᠦ ᠳ᠋ᠡᠭᠡᠨ ᠭᠠᠯ ᠳ᠋ᠠᠭᠠᠨ
ᠳᠤᠰᠤᠭᠠᠯ ᠳᠤᠰᠤᠭᠠᠳᠠᠭ᠃ ᠭᠠᠯ ᠤ᠋ᠨ ᠪᠤᠷᠬᠠᠨ ᠳ᠋ᠠᠭᠠᠨ ᠳᠤᠰᠤᠭᠠᠯ ᠳᠤᠰᠤᠭᠠᠬᠤ ᠳ᠋ᠠᠭᠠᠨ《ᠤᠳᠬᠠᠨ ᠭᠠᠯ
ᠭᠣᠯᠣᠮᠲᠠ ᠳ᠋ᠠᠭᠠᠨ ᠥᠭᠡᠬᠦ ᠲᠣᠰᠣᠨ ᠢ᠋ ᠳᠤᠰᠤᠭᠠᠨᠠᠮ》 ᠭᠡᠵᠦ ᠬᠡᠯᠡᠭᠡᠳ
(1) ᠡᠷᠬᠡᠲᠦ ᠲᠡᠭᠷᠢ (2) ᠡᠬᠡ ᠳᠡᠯᠡᠬᠡᠢ (3) ᠡᠩᠬᠡ ᠭᠣᠯᠣᠮᠲᠠ ᠳ᠋ᠤ᠌ ᠭᠡᠵᠦ ᠬᠡᠯᠡᠭᠡᠳ ᠭᠤᠷᠪᠠ ᠤᠳᠠᠭᠠ ᠳᠤᠰᠤᠭᠠᠯ ᠳᠤᠰᠤᠭᠠᠵᠦ᠂ ᠡᠨᠡ ᠭᠡᠷ ᠦ᠋ᠨ ᠶᠡᠬᠡ ᠪᠠᠭᠠ ᠬᠥᠮᠦᠰ ᠪᠦᠭᠦᠳᠡ ᠢᠷᠡᠬᠦ ᠨᠢᠭᠡ ᠵᠢᠯ ᠳ᠋ᠦ᠍ ᠠᠵᠤ ᠠᠮᠢᠳᠤᠷᠠᠯ᠂ ᠠᠵᠢᠯ ᠦᠢᠯᠡᠰ᠂ ᠡᠩᠬᠡ ᠮᠡᠨᠳᠦ ᠳ᠋ᠡᠭᠡᠨ ᠡᠨᠡ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠮᠡᠲᠦ ᠬᠡᠢᠮᠣᠷᠢ ᠮᠠᠨᠳᠤᠵᠤ ᠶᠠᠪᠤᠬᠤ ᠶ᠋ᠢ ᠵᠥᠩᠨᠡᠨ ᠪᠡᠯᠭᠡᠳᠡᠳᠡᠭ᠃ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠨᠡᠪᠴᠢᠯᠲᠡ ᠪᠡᠷ ᠭᠠᠯ ᠳ᠋ᠠᠭᠠᠨ ᠳᠤᠰᠤᠭᠠᠯ ᠳᠤᠰᠤᠭᠠᠬᠤ ᠳ᠋ᠠᠭᠠᠨ ᠤᠸ᠋ᠮ᠂ ᠠ᠂ ᠬᠣᠩ ᠭᠡᠵᠦ ᠬᠡᠯᠡᠳᠡᠭ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃
10᠂ ᠭᠡᠷ ᠦ᠋ᠨ ᠡᠵᠡᠨ ᠡᠴᠡ ᠭᠠᠯ ᠤ᠋ᠨ ᠢᠷᠦᠭᠡᠯ ᠤᠩᠰᠢᠨᠠ᠃
ᠡᠨᠡ ᠦᠶᠡᠰ ᠲᠦ᠍ ᠪᠦᠬᠦ ᠭᠡᠷ ᠦ᠋ᠨ ᠬᠥᠮᠦᠰ ᠮᠥᠨ ᠰᠥᠬᠥᠳᠡᠨ ᠪᠠᠢᠵᠤ ᠭᠦᠢᠴᠡᠳᠬᠡᠨᠡ᠃ ᠠᠳᠠ ᠨᠢᠭᠡ ᠢᠷᠦᠭᠡᠯ ᠢ᠋ ᠰᠡᠢᠷᠡᠭᠦᠯᠵᠦ ᠯᠠᠪᠯᠠᠯᠲᠠ ᠪᠣᠯᠭᠠᠶᠠ᠃
ᠭᠠᠯ ᠤ᠋ᠨ ᠢᠷᠦᠭᠡᠯ
ᠤᠸ᠋ᠮ ᠰᠠᠢᠨ ᠠᠮᠤᠭᠤᠯᠠᠩ ᠲᠠᠨ ᠪᠣᠯᠲᠤᠭᠠᠢ!
ᠤᠨᠤᠨ ᠮᠥᠷᠡᠨ ᠦ᠌ ᠤᠰᠤᠨ ᠳ᠋ᠤ᠌ ᠰᠣᠢᠵᠤ ᠬᠡᠲᠡ ᠠᠪᠤᠭᠰᠠᠨ
ᠤᠷᠠᠨ ᠳᠥᠰᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠴᠦ ᠴᠠᠬᠢᠭᠤᠷ ᠠᠪᠤᠭᠰᠠᠨ
ᠤᠯᠠ ᠨᠡᠷᠡᠲᠦ ᠡᠪᠡᠰᠦᠨ ᠡᠴᠡ ᠨᠤᠴᠤᠭᠠᠯ ᠠᠪᠤᠭᠰᠠᠨ
ᠤᠷᠭᠤᠭᠠ ᠽᠠᠨᠳᠠᠨ ᠮᠣᠳᠣᠨ ᠠ᠋ᠴᠠ ᠰᠢᠲᠠᠭᠠᠯ ᠢ᠋ ᠠᠪᠤᠭᠰᠠᠨ
ᠤᠳᠬᠠᠨ ᠭᠠᠯ ᠤ᠋ᠨ ᠡᠬᠡ ᠳ᠋ᠦ᠍
ᠤᠮᠳᠠ ᠰᠢᠮᠡ ᠶ᠋ᠢᠨ ᠳᠡᠭᠡᠳᠦ ᠪᠣᠯᠤᠭᠰᠠᠨ
ᠤᠭᠤᠷᠠᠭ ᠰᠦᠨ ᠢ᠋ᠶ᠋ᠡᠨ ᠡᠷᠭᠦᠨ ᠳᠠᠬᠢᠨᠠᠮ
ᠣᠯᠠᠨ ᠲᠦᠮᠡᠨ ᠠᠮᠢᠲᠠᠨ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠤᠮᠳᠠ
ᠡᠩᠬᠡᠨ ᠠᠮᠤᠷ ᠵᠢᠷᠭᠠᠨ ᠠᠲᠤᠭᠠᠢ!
— ᠠᠯᠲᠠᠨ ᠬᠠᠩᠭᠠᠢ ᠶ᠋ᠢᠨ ᠬᠠᠳᠠ ᠴᠢᠯᠠᠭᠤ ᠬᠠᠢᠷᠬᠠᠨ ᠪᠦᠬᠦᠢ ᠡᠴᠡ
ᠠᠯᠲᠠᠨ ᠲᠡᠪᠰᠢ ᠶ᠋ᠢᠨ ᠭᠣᠣᠯ ᠮᠥᠷᠡᠨ ᠱᠠᠯᠴᠢᠭ ᠪᠦᠬᠦᠢ ᠡᠴᠡ
ᠠᠷᠢᠶᠠᠪᠠᠯᠤ ᠪᠤᠷᠬᠠᠨ ᠢ᠋ ᠪᠠᠯᠴᠢᠷ ᠪᠦᠬᠦᠢ ᠡᠴᠡ
ᠠᠮᠢᠲᠠᠨ ᠲᠦᠮᠡᠨ ᠦ᠌ ᠪᠡᠶᠡ ᠳ᠋ᠦ᠍ ᠢᠯᠴᠢ ᠪᠣᠯᠤᠭᠰᠠᠨ
ᠤᠳᠬᠠᠨ ᠭᠠᠯ ᠤ᠋ᠨ ᠡᠬᠡ ᠳ᠋ᠦ᠍
ᠠᠷᠪᠠᠨ ᠵᠢᠷᠭᠤᠭᠠᠨ ᠰᠠᠯᠠᠭᠠ ᠰᠡᠷᠪᠡᠭᠡᠲᠦ
ᠠᠷᠢᠭᠤᠨ ᠡᠪᠴᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠨ ᠳᠠᠬᠢᠨᠠᠮ
ᠠᠮᠢᠲᠠᠨ ᠣᠯᠠᠨ ᠲᠦᠮᠡᠨ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠤᠮᠳᠠ
ᠡᠩᠬᠡᠨ ᠠᠮᠤᠷ ᠵᠢᠷᠭᠠᠨ ᠠᠲᠤᠭᠠᠢ!
— ᠪᠣᠭᠳᠠ ᠬᠠᠨ ᠬᠠᠢᠷᠬᠠᠨ ᠢ᠋ ᠳᠣᠪᠣᠨ ᠪᠦᠬᠦᠢ ᠡᠴᠡ
ᠪᠤᠲᠠ ᠽᠠᠨᠳᠠᠨ ᠮᠣᠳᠣᠨ ᠢ᠋ ᠨᠠᠢᠯᠵᠠᠭᠤᠷ ᠪᠦᠬᠦᠢ ᠡᠴᠡ
ᠪᠤᠳᠢᠰᠡᠸᠠ ᠪᠤᠷᠬᠠᠨ ᠢ᠋ ᠪᠠᠯᠴᠢᠷ ᠪᠦᠬᠦᠢ ᠡᠴᠡ
ᠪᠤᠷᠤᠲᠤᠬᠤᠢ ᠶ᠋ᠢᠨ ᠠᠮᠢᠲᠠᠨ ᠳ᠋ᠤ᠌ ᠭᠡᠷᠡᠯ ᠪᠣᠯᠤᠭᠰᠠᠨ
ᠤᠳᠬᠠᠨ ᠭᠠᠯ ᠤ᠋ᠨ ᠡᠬᠡ ᠳ᠋ᠦ᠍
ᠪᠣᠯᠭᠣᠭᠰᠠᠨ ᠢᠳᠡᠭᠡᠨ ᠦ᠌ ᠳᠡᠭᠡᠵᠢ
ᠪᠣᠷᠣᠯᠠᠭ ᠬᠠᠯᠵᠠᠨ ᠤ᠋ ᠡᠪᠴᠢᠭᠦᠨ ᠢ᠋ᠶ᠋ᠡᠨ ᠡᠷᠭᠦᠨ ᠳᠠᠬᠢᠨᠠᠮ
ᠪᠤᠷᠤᠲᠤᠬᠤᠢ ᠶ᠋ᠢᠨ ᠠᠮᠢᠲᠠᠨ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠤᠮᠳᠠ
ᠡᠩᠬᠡ ᠰᠠᠢᠬᠠᠨ ᠠᠮᠤᠷ ᠵᠢᠷᠭᠠᠨ ᠠᠲᠤᠭᠠᠢ!
— ᠲᠥᠷᠥ ᠶ᠋ᠢᠨ ᠶᠡᠬᠡ ᠳᠥᠷᠪᠡᠨ ᠬᠥᠯᠲᠦ ᠲᠡᠮᠦᠷ ᠲᠤᠯᠭᠠᠨᠠ ᠭᠡᠷᠡᠯ ᠪᠣᠯᠤᠭᠰᠠᠨ
ᠲᠦᠭᠡᠮᠡᠯ ᠦ᠋ᠨ ᠡᠵᠡᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠳ᠋ᠠᠭᠠᠨ ᠪᠠᠮᠪᠠᠷ ᠪᠣᠯᠤᠭᠰᠠᠨ
ᠲᠦᠮᠡᠲᠦ ᠮᠢᠩᠭᠠᠲᠤ ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ ᠲᠠᠬᠢᠯᠭᠠ ᠪᠣᠯᠤᠭᠰᠠᠨ
ᠲᠥᠭᠥᠷᠢᠭ ᠰᠠᠷᠠᠨ ᠮᠡᠲᠦ ᠰᠥᠨᠢ ᠶ᠋ᠢ ᠡᠳᠦᠷ ᠢ᠋ᠶ᠋ᠡᠷ ᠬᠡᠷᠡᠯᠳᠦᠭᠦᠯᠦᠭᠰᠡᠨ
ᠤᠳᠬᠠᠨ ᠭᠠᠯ ᠤ᠋ᠨ ᠡᠬᠡ ᠳ᠋ᠦ᠍
ᠲᠦᠭᠡᠯ ᠰᠢᠭᠦᠰᠦᠨ ᠦ᠌ ᠭᠠᠳᠠᠨᠠ ᠲᠠᠯᠪᠢᠭᠰᠠᠨ
ᠲᠦᠷᠦᠭᠦᠦ ᠬᠣᠨᠢᠨ ᠤ᠋ ᠡᠪᠴᠢᠭᠦᠦ ᠪᠡᠨ ᠡᠷᠭᠦᠨ ᠳᠠᠬᠢᠨᠠᠮ
ᠲᠦᠮᠡᠨ ᠣᠯᠠᠨ ᠠᠮᠢᠲᠠᠨ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠤᠮᠳᠠ
ᠡᠩᠬᠡ ᠰᠠᠢᠬᠠᠨ ᠠᠮᠤᠷ ᠵᠢᠷᠭᠠᠨ ᠠᠲᠤᠭᠠᠢ!
ᠢᠷᠦᠭᠡᠵᠦ ᠪᠠᠷᠠᠪᠠᠯ ᠳᠠᠶᠠᠭᠠᠷ ᠭᠠᠯ ᠳ᠋ᠠᠭᠠᠨ ᠮᠥᠷᠭᠥᠨᠡ᠃
11᠂ ᠭᠠᠯ ᠤ᠋ᠨ ᠳᠠᠯᠠᠯᠭᠠ ᠳᠠᠯᠠᠯᠬᠤ
ᠳᠠᠯᠠᠯᠭᠠ ᠳᠠᠯᠠᠯᠬᠤ ᠭᠡᠳᠡᠭ ᠨᠢ ᠠᠯᠢᠪᠠ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠬᠤᠷᠤᠢᠯᠠᠨ ᠳᠠᠭᠤᠳᠠᠬᠤ ᠢᠷᠦᠭᠡᠯ ᠪᠢᠰᠢᠷᠡᠯ ᠦ᠋ᠨ ᠵᠠᠩ ᠦᠢᠯᠡ ᠬᠢᠭᠡᠳ ᠨᠡᠢᠲᠡ ᠮᠣᠩᠭᠣᠯ ᠤ᠋ᠨ ᠶᠣᠰᠣ ᠵᠠᠩ ᠮᠥᠨ᠃ ᠡᠭᠦᠨ ᠳ᠋ᠦ᠍《ᠵᠤᠨ ᠤ᠋ ᠳᠠᠯᠠᠯᠭᠠ 》᠂ 《ᠨᠠᠮᠤᠷ ᠤ᠋ᠨ ᠳᠠᠯᠠᠯᠭᠠ》᠂ 《ᠬᠠᠪᠤᠷ ᠤ᠋ᠨ ᠳᠠᠯᠠᠯᠭᠠ》᠂ 《ᠣᠪᠣᠭᠠᠨ ᠳᠠᠯᠠᠯᠭᠠ》᠂ 《ᠲᠠᠮᠠᠬᠢᠨ ᠭᠠᠯ ᠤ᠋ᠨ ᠳᠠᠯᠠᠯᠭᠠ》᠂ 《ᠠᠮᠠᠨ ᠬᠦᠵᠦᠭᠦᠨ ᠦ᠌ ᠭᠠᠯ ᠤ᠋ᠨ ᠳᠠᠯᠠᠯᠭᠠ》 《ᠦᠭᠦᠴᠡ ᠦᠬᠡᠷ ᠦ᠋ᠨ ᠳᠠᠯᠠᠯᠭᠠ》 ᠵᠡᠷᠭᠡ ᠣᠯᠠᠨ ᠵᠦᠢᠯ ᠪᠣᠢ᠃ ᠡᠭᠦᠨ ᠳ᠋ᠦ᠍ ᠴᠠᠭᠠᠨ ᠢᠳᠡᠭᠡ ᠪᠡᠷ ᠳᠠᠯᠠᠯᠬᠤ ᠶ᠋ᠢ《ᠴᠠᠭᠠᠨ ᠳᠠᠯᠠᠯᠭᠠ》 ᠭᠡᠵᠦ ᠤᠭᠤᠴᠠ ᠰᠢᠭᠦᠰᠦ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠷ ᠳᠠᠯᠠᠯᠬᠤ ᠶ᠋ᠢ 《ᠤᠯᠠᠭᠠᠨ ᠳᠠᠯᠠᠯᠭᠠ》 ᠭᠡᠳᠡᠭ᠃
ᠭᠠᠯ ᠲᠠᠬᠢᠬᠤ ᠶᠣᠰᠣ ᠪᠡᠯᠡᠭ ᠢ᠋ᠶ᠋ᠡᠨ ᠪᠦᠷ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠲᠠᠬᠢᠯᠭᠠ ᠶ᠋ᠢᠨ ᠲᠠᠩᠰᠤᠭ ᠢᠳᠡᠭᠡᠨ ᠢ᠋ᠶ᠋ᠡᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠷᠥᠵᠦ᠂ ᠫᠢᠯᠠᠯᠠᠵᠦ ᠭᠡᠷ ᠦ᠋ᠨ ᠡᠵᠡᠨ ᠡᠴᠡ ᠡᠬᠢᠯᠡᠨ ᠳᠠᠯᠠᠯᠭᠠ ᠶ᠋ᠢᠨ ᠰᠠᠭᠤᠯᠭᠠ ᠪᠤᠶᠤ ᠠᠶᠠᠭᠠ ᠲᠠᠢ ᠰᠦ ᠠᠢᠷᠠᠭ᠂ ᠰᠠᠭᠠᠯᠢ ᠶ᠋ᠢᠨ ᠵᠦᠢᠯᠡᠰ᠂ ᠠᠶᠠᠭᠠᠯᠠᠭᠰᠠᠨ ᠪᠤᠶᠤ ᠫᠢᠯᠠᠯᠠᠭᠰᠠᠨ ᠭᠠᠯ ᠤ᠋ᠨ ᠪᠤᠳᠠᠭᠠ ᠂ ᠮᠢᠬᠠ᠂ ᠡᠮᠡ ᠮᠠᠯ ᠤ᠋ᠨ《ᠪᠠᠶᠠᠨ ᠲᠦᠷᠦᠭᠦᠦ》 ᠪᠠ ᠳᠠᠯᠠᠩ ᠢ᠋ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠪᠦᠰᠡᠭᠦᠢ ᠪᠠ ᠪᠡᠷᠢ ᠨᠢ ᠪᠠᠷᠢᠳᠠᠭ᠂ ᠭᠡᠬᠦ ᠳ᠋ᠡᠭᠡᠨ ᠬᠥᠮᠦᠨ ᠪᠦᠷᠢ ᠨᠢᠭᠡ ᠰᠠᠪᠠ ᠲᠠᠢ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠪᠠᠷᠢᠨᠠ᠃ ᠭᠠᠷ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠳᠠᠯᠠᠯᠭᠠ ᠠᠪᠳᠠᠭ ᠦᠭᠡᠢ᠂ ᠭᠡᠷ ᠦ᠋ᠨ ᠡᠵᠡᠨ ᠡᠴᠡ ᠳᠠᠯᠠᠯᠭᠠ ᠶ᠋ᠢᠨ ᠢᠷᠦᠭᠡᠯ ᠤᠩᠰᠢᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠰᠠᠪᠠ ᠲᠠᠢ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷᠳᠠᠨ ᠮᠥᠷᠦᠨ ᠡᠴᠡ ᠪᠡᠨ ᠳᠡᠭᠡᠭᠰᠢ ᠡᠷᠭᠦᠨ ᠨᠠᠷᠠᠨ ᠵᠥᠪ ᠢ᠋ᠶ᠋ᠡᠷ ᠠᠶᠠᠷᠬᠠᠨ ᠡᠷᠭᠢᠭᠦᠯᠵᠦ《ᠠ ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ !》 ᠭᠡᠵᠦ ᠬᠡᠯᠡᠭᠡᠳ ᠬᠥᠭ ᠨᠡᠢᠯᠡᠭᠦᠯᠦᠨ ᠬᠤᠷᠤᠢᠯᠠᠳᠠᠭ᠃
12᠂ ᠭᠠᠯ ᠤ᠋ᠨ ᠳᠠᠯᠠᠯᠭᠠ
ᠤᠸ᠋ᠮ ᠰᠠᠢᠨ ᠠᠮᠤᠭᠤᠯᠠᠩ ᠲᠠᠨ ᠪᠣᠯᠲᠤᠭᠠᠢ!
ᠡᠰᠡᠷᠸᠠ ᠬᠠᠨ ᠬᠤᠷᠮᠤᠰᠲᠠ ᠲᠡᠷᠢᠭᠦᠯᠡᠨ
ᠡᠷᠬᠡᠲᠦ ᠳᠡᠭᠡᠳᠦ ᠨᠠᠷ ᠤ᠋ᠨ
ᠡᠷᠬᠢᠮ ᠬᠡᠰᠢᠭ ᠢ᠋ ᠳᠠᠭᠤᠳᠠᠨᠠᠮ
ᠬᠤᠷᠤᠢ ! ᠬᠤᠷᠤᠢ! ᠬᠤᠷᠤᠢ!
ᠪᠣᠭᠳᠠ ᠡᠵᠡᠨ ᠬᠠᠭᠠᠨ ᠲᠡᠷᠢᠭᠦᠯᠡᠨ
ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠᠨ ᠤ᠋
ᠪᠤᠶᠠᠨ ᠬᠡᠰᠢᠭ ᠢ᠋ ᠳᠠᠭᠤᠳᠠᠨᠠᠮ
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠠᠭᠤᠯᠠᠨ ᠬᠠᠨ ᠲᠡᠷᠢᠭᠦᠯᠡᠨ
ᠠᠭᠤᠳᠠᠯᠤᠭᠠᠳ ᠪᠠᠷᠠᠭᠳᠠᠰᠢ ᠦᠭᠡᠢ
ᠠᠭᠤᠷᠬᠠᠢ ᠡᠷᠳᠡᠨᠢᠰ ᠦ᠋ᠨ ᠰᠠᠩ ᠤ᠋ᠨ
ᠠᠷᠢᠭᠤᠨ ᠬᠡᠰᠢᠭ ᠢ᠋ ᠳᠠᠭᠤᠳᠠᠨᠠᠮ
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠤᠰᠤᠨ ᠤ᠋ ᠬᠠᠭᠠᠨ ᠲᠡᠷᠢᠭᠦᠯᠡᠨ
ᠤᠮᠳᠠᠯᠠᠭᠠᠳ ᠪᠠᠷᠠᠭᠳᠠᠰᠢ ᠦᠭᠡᠢ
ᠣᠯᠠᠨ ᠤᠯᠤᠰ ᠤ᠋ᠳ ᠤ᠋ᠨ
ᠤᠨᠳᠤᠷᠤᠮᠠᠯ ᠬᠡᠰᠢᠭ ᠢ᠋ ᠳᠠᠭᠤᠳᠠᠨᠠᠮ
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠳᠠᠶᠠᠩ ᠳᠡᠯᠡᠬᠡᠢ ᠮᠡᠲᠦ ᠰᠢᠩᠭᠡᠷᠡᠰᠢ ᠦᠭᠡᠢ
ᠳᠠᠯᠠᠢ ᠮᠥᠷᠡᠨ ᠮᠡᠲᠦ ᠰᠢᠷᠭᠢᠰᠢ ᠦᠭᠡᠢ
ᠳᠠᠶᠠᠭᠠᠷ ᠣᠯᠠᠨ ᠠᠮᠢᠲᠠᠨ ᠤ᠋
ᠳᠠᠯᠠᠯᠭᠠ ᠶ᠋ᠢᠨ ᠬᠡᠰᠢᠭ ᠢ᠋ ᠭᠥᠷᠳᠡᠨᠡᠮ ᠬᠤᠷᠤᠢ᠂ ᠬᠤᠷᠤᠢ!
ᠮᠡᠷᠭᠡᠳ ᠦ᠋ᠨ ᠣᠶᠤᠨ ᠪᠢᠯᠢᠭ᠂ ᠤᠷᠠᠨ ᠰᠠᠮᠪᠠᠭᠠ
ᠠᠳᠠ ᠢᠷᠡᠨ ᠣᠷᠣᠭᠰᠢ ᠬᠤᠷᠤᠢ᠂ ᠬᠤᠷᠤᠢ!
ᠲᠠᠪᠤᠨ ᠡᠷᠳᠡᠮ ᠳᠣᠯᠣᠭᠠᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ
ᠠᠳᠠ ᠢᠷᠡᠨ ᠣᠷᠣᠰᠢ ᠬᠤᠷᠤᠢ᠂ ᠬᠤᠷᠤᠢ!
ᠳᠡᠯ ᠶᠡᠬᠡᠲᠡᠢ ᠠᠵᠢᠷᠭᠠ ᠨᠤᠭᠤᠳ
ᠳᠠᠯᠠᠩ ᠰᠠᠢᠲᠠᠢ ᠭᠡᠭᠦᠦ ᠨᠦ᠍ᠭᠦᠳ
ᠪᠤᠭᠤᠯᠤᠭ ᠶᠡᠬᠡᠲᠡᠢ ᠪᠤᠬᠠᠳ
ᠪᠤᠯᠠᠭ ᠮᠡᠲᠦ ᠰᠦ ᠲᠡᠢ ᠦᠨᠢᠶᠡᠳ ᠦ᠋ᠨ
ᠪᠤᠶᠠᠨ ᠬᠡᠰᠢᠭ ᠠᠳᠠ ᠲᠣᠭᠲᠠ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠰᠢᠷᠡᠮᠦᠨ ᠲᠠᠪᠠᠭ ᠲᠠᠢ ᠪᠤᠤᠷᠠᠳ
ᠰᠢᠯᠢᠨ ᠳ᠋ᠡᠭᠡᠨ ᠵᠣᠭᠳᠣᠷ ᠲᠠᠢ ᠢᠩᠭᠢᠭᠡᠳ
ᠥᠭᠡᠬᠦᠨ ᠰᠡᠭᠦᠯᠲᠦ ᠢᠷᠭᠡ
ᠥᠨᠳᠥᠷ ᠡᠪᠡᠷᠲᠦ ᠰᠡᠷᠬᠡ
ᠦᠷᠡᠵᠢᠯ ᠰᠠᠢᠲᠠᠢ ᠬᠣᠨᠢ ᠢᠮᠠᠭᠠᠳ ᠤ᠋ᠨ
ᠪᠤᠶᠠᠨ ᠬᠡᠰᠢᠭ ᠠᠳᠠ ᠲᠣᠭᠲᠠ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠣᠶᠤᠨ ᠮᠡᠷᠭᠡᠨ ᠬᠥᠪᠡᠭᠦᠳ
ᠤᠷᠠᠨ ᠰᠡᠴᠡᠨ ᠥᠬᠢᠳ
ᠰᠠᠭᠠᠳᠠᠭ ᠰᠠᠢᠲᠠᠢ ᠬᠦᠷᠭᠡᠳ
ᠰᠢᠪᠠᠭ ᠰᠠᠢᠲᠠᠢ ᠪᠡᠷᠢᠶᠡᠳ ᠦ᠋ᠨ
ᠪᠤᠶᠠᠨ ᠬᠡᠰᠢᠭ ᠠᠳᠠ ᠲᠣᠭᠲᠠ!
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠢᠩᠭᠢᠵᠦ ᠳᠠᠯᠠᠯᠭᠠ ᠳᠠᠯᠠᠯᠵᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠠᠷᠢᠮ ᠭᠠᠵᠠᠷ (ᠵᠢᠶᠦ᠋ᠨ ᠸᠠᠩ) ᠪᠢᠴᠢᠬᠠᠨ ᠬᠡᠦᠬᠡᠳ ᠢ᠋ᠶ᠋ᠡᠷ《ᠵᠠᠭᠤ᠂ ᠮᠢᠩᠭᠠ᠂ ᠲᠦᠮᠡ᠂ ᠪᠤᠮ᠂ ᠰᠠᠶᠠ᠂ ᠵᠢᠪᠡ᠂ ᠳ᠋ᠦᠩᠰᠢᠭᠤᠷ》 ᠭᠡᠮᠡᠨ ᠲᠣᠭᠠ ᠲᠣᠭᠠᠯᠠᠭᠤᠯᠵᠤ ᠭᠦᠶᠦᠯᠭᠡᠵᠦ ᠳᠠᠯᠠᠩ ᠬᠠᠵᠠᠭᠤᠯᠳᠠᠭ᠃ᠡᠨᠡ ᠨᠢ《ᠳᠡᠯᠡᠬᠡᠢ ᠶ᠋ᠢᠨ ᠰᠢᠮᠡ ᠳ᠋ᠦ᠍ ᠦᠷᠡᠵᠢᠵᠦ᠂ ᠳᠠᠯᠠᠩ ᠤ᠋ᠨ ᠰᠢᠮᠡ ᠳ᠋ᠦ᠍ ᠳᠡᠯᠭᠡᠷᠡᠨᠡ》《ᠦᠭᠡᠨ ᠡᠳᠦᠭᠡᠨ ᠦᠷᠡᠵᠢᠬᠦ ᠶ᠋ᠢᠨ ᠰᠢᠲᠦᠭᠡᠨ᠂ ᠤᠭᠤᠷᠠᠭ ᠰᠦᠨ ᠠᠮᠢᠳᠤᠷᠠᠬᠤ ᠶ᠋ᠢᠨ ᠰᠢᠲᠦᠭᠡᠨ》 ᠭᠡᠰᠡᠨ ᠤᠳᠬᠠ ᠲᠠᠢ ᠶᠤᠮ ᠭᠡᠨᠡ᠃ ᠮᠥᠨᠴᠥ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠮᠣᠩᠭᠣᠯᠴᠤᠳ ᠢᠰᠡᠭᠡᠢ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠠᠨᠠᠨ ᠳ᠋ᠤ᠌ ᠭᠡᠭᠦᠦ ᠶ᠋ᠢᠨ ᠳᠠᠯᠠᠩ ᠡᠯᠭᠦᠭᠡᠲᠡᠢ᠂ ᠵᠡᠭᠦᠨ ᠬᠠᠨᠠᠨ ᠳ᠋ᠤ᠌ ᠦᠨᠢᠶᠡᠨ ᠦ᠌ ᠬᠥᠬᠥ ᠡᠯᠭᠦᠭᠡᠲᠡᠢ ᠪᠠᠢᠳᠠᠭ ᠲᠠᠢ ᠬᠣᠯᠪᠣᠭᠠ ᠲᠠᠢ ᠪᠤᠶᠤ᠃
ᠳᠠᠯᠠᠯᠭᠠ ᠬᠡᠰᠢᠭ ᠢ᠋ ᠳᠠᠷᠤᠢ《ᠪᠠᠶᠠᠨ ᠲᠦᠷᠦᠭᠦᠦ》 ᠲᠡᠢ᠂ ᠳᠠᠯᠠᠩ ᠢ᠋ ᠨᠢ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠭᠠᠯ ᠤ᠋ᠨ ᠪᠤᠳᠠᠭᠠᠨ ᠤ᠋ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂ ᠭᠠᠯ ᠤ᠋ᠨ ᠪᠤᠷᠬᠠᠨ ᠤ᠋ ᠬᠡᠰᠢᠭ ᠪᠤᠶᠤ ᠳᠡᠭᠡᠳᠦᠰ ᠦ᠋ᠨ ᠬᠤᠪᠢ ᠭᠡᠵᠦ ᠠᠪᠳᠠᠷᠠ ᠶ᠋ᠢᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠭᠤᠷᠪᠠ ᠬᠣᠨᠣᠭ ᠬᠥᠳᠡᠯᠭᠡᠬᠦ ᠦᠭᠡᠢ᠂ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠠᠭᠤᠯᠭᠠᠵᠤ ᠳᠡᠭᠡᠳᠦᠰ (ᠪᠤᠷᠬᠠᠨ) ᠤ᠋ ᠬᠡᠰᠢᠭ ᠭᠡᠵᠦ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠬᠤᠪᠢᠶᠠᠨ ᠢᠳᠡᠳᠡᠭ᠃ ᠡᠷᠲᠡᠨ ᠳ᠋ᠡᠭᠡᠨ ᠣᠩᠭᠣ ᠰᠢᠲᠦᠭᠡᠨ (ᠳᠡᠭᠡᠳᠦᠰ) ᠲᠡᠭᠡᠨ ᠡᠷᠭᠦᠵᠦ ᠲᠠᠯᠪᠢᠳᠠᠭ ᠪᠠᠢᠭᠰᠠᠨ ᠪᠣᠯ ᠰᠡᠭᠦᠯᠳᠡᠵᠦ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠰᠢᠲᠦᠭᠰᠡᠨ ᠦ᠌ ᠳᠠᠷᠠᠭᠠ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠲᠠᠯᠪᠢᠳᠠᠭ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃ ᠣᠳᠣ ᠴᠤ᠌ ᠭᠡᠳ ᠪᠤᠷᠬᠠᠨ ᠰᠢᠲᠦᠳᠡᠭ ᠠᠢᠯ ᠡᠷᠦᠬᠡ ᠶ᠋ᠢᠨ ᠬᠢᠨ ᠪᠤᠷᠬᠠᠨ ᠤ᠋ ᠬᠡᠰᠢᠭ ᠭᠡᠳᠡᠭ ᠪᠣᠯᠵᠠᠢ᠃ ᠵᠠᠷᠢᠮ ᠠᠢᠯ ᠡᠷᠦᠬᠡ ᠪᠠᠰᠠ ᠭᠠᠯ ᠤ᠋ᠨ ᠪᠤᠳᠠᠭᠠ ᠳᠤᠰᠤᠭᠠᠯ ᠵᠡᠷᠭᠡ ᠪᠡᠷ ᠮᠠᠯ ᠤ᠋ᠨ ᠬᠣᠲᠠ ᠬᠣᠷᠣᠭᠠ᠂ ᠠᠮᠢᠲᠠᠢ ᠶ᠋ᠢᠨ ᠭᠡᠷ᠂ ᠨᠣᠬᠠᠢ ᠶ᠋ᠢᠨ ᠡᠭᠦᠷ᠂ ᠮᠣᠷᠢᠨ ᠤᠶᠠᠭᠠ ᠬᠦᠷᠲᠡᠯᠡ ᠮᠢᠯᠢᠶᠠᠳᠠᠭ ᠴᠤ᠌ ᠪᠣᠢ᠃
13᠂ ᠭᠠᠯ ᠤ᠋ᠨ ᠬᠡᠰᠢᠭ ᠬᠦᠷᠲᠡᠬᠦ
ᠭᠠᠯ ᠲᠠᠬᠢᠬᠤ ᠠᠯᠢᠪᠠ ᠶᠣᠰᠣ ᠪᠠᠯᠠᠩ ᠢ᠋ ᠴᠥᠮ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠭᠡᠷ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠭᠠᠯ ᠤ᠋ᠨ ᠬᠡᠰᠢᠭ (ᠮᠢᠬᠠ᠂ ᠪᠤᠳᠠᠭᠠ) ᠪᠠᠨ ᠵᠣᠭᠣᠭᠯᠠᠨᠠ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠲᠥᠷᠥᠯ ᠰᠠᠳᠤᠨ ᠪᠠ ᠣᠢᠷᠠ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠡᠷᠦᠬᠡ ᠳ᠋ᠡᠭᠡᠨ ᠭᠠᠯ ᠤ᠋ᠨ ᠪᠤᠳᠠᠭᠠ ᠬᠦᠷᠭᠡᠳᠡᠭ᠃
ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠭᠠᠯ ᠲᠠᠬᠢᠬᠤ ᠶᠣᠰᠣ ᠨᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠳᠡᠭᠡᠷᠡ ᠶᠠᠷᠢᠭᠰᠠᠨ ᠮᠡᠲᠦ ᠬᠡᠳᠦᠨ ᠠᠯᠬᠤᠮ ᠢ᠋ᠶ᠋ᠠᠷ ᠶᠠᠪᠤᠭᠳᠠᠳᠠᠭ᠃ ᠠᠳᠠ ᠲᠣᠳᠣᠷᠬᠠᠢᠯᠠᠬᠤ ᠴᠢᠬᠤᠯᠠ ᠲᠠᠢ ᠵᠦᠢᠯ ᠭᠡᠪᠡᠯ《ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠵᠠᠩ ᠂ ᠭᠦᠵᠡᠭᠡ ᠭᠦᠵᠡᠭᠡᠨ ᠦ᠌ ᠪᠤᠯᠤᠩ》 ᠭᠡᠳᠡᠭᠴᠢᠯᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠭᠠᠯ ᠲᠠᠬᠢᠬᠤ ᠵᠠᠩ ᠦᠢᠯᠡ ᠨᠢ ᠬᠡᠳᠦᠢᠪᠡᠷ᠂ ᠡᠷᠲᠡ ᠳᠡᠭᠡᠳᠦ ᠦᠶᠡ ᠡᠴᠡ ᠦᠨᠳᠦᠰᠦᠨ ᠳ᠋ᠡᠭᠡᠨ ᠠᠳᠠᠯᠢᠪᠲᠤᠷ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠠᠢᠮᠠᠭ ᠪᠦᠯᠦᠭ ᠣᠯᠠᠨ᠂ ᠭᠠᠵᠠᠷ ᠨᠤᠲᠤᠭ ᠠᠭᠤᠳᠠᠮ᠂ ᠢᠵᠠᠭᠤᠷᠲᠠᠨ ᠪᠣᠯᠤᠨ ᠡᠭᠡᠯ ᠠᠷᠠᠳ ᠤ᠋ᠨ ᠠᠮᠢᠳᠤᠷᠠᠯ ᠠᠳᠠᠯᠢ ᠪᠤᠰᠤ᠂ ᠵᠢᠴᠢ ᠠᠢᠯ
ᠠᠢᠮᠠᠭ ᠤ᠋ᠳ ᠠᠳᠠ ᠲᠡᠨᠳᠡ ᠪᠤᠲᠠᠷᠠᠨ ᠰᠠᠭᠤᠷᠢᠰᠢᠭᠰᠠᠨ ᠵᠡᠷᠭᠡ ᠵᠦᠢᠯ ᠵᠦᠢᠯ ᠦ᠋ᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠵᠤ᠂ ᠥᠨᠢ ᠤᠳᠠᠭᠠᠨ ᠲᠡᠦᠬᠡᠨ ᠶᠠᠪᠤᠴᠠ ᠳ᠋ᠠᠭᠠᠨ ᠠᠷᠠᠳ ᠤ᠋ᠨ ᠭᠠᠯ ᠲᠠᠬᠢᠬᠤ ᠶᠣᠰᠣ ᠨᠢ ᠴᠤ᠌ ᠬᠣᠭᠣᠷᠣ ᠬᠣᠭᠣᠷᠣᠨᠳᠣ ᠪᠠᠨ ᠡᠳᠦᠢ ᠲᠡᠳᠦᠢ ᠵᠥᠷᠢᠶᠡ ᠲᠡᠢ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠵᠥᠪ ᠢ᠋ᠶ᠋ᠡᠷ ᠣᠢᠯᠠᠭᠠᠨ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠲᠤᠩᠭᠠᠭᠠᠮᠤ! ᠳᠠᠬᠢᠭᠠᠳ ᠬᠡᠯᠡᠪᠡᠯ ᠢᠵᠠᠭᠤᠷᠲᠠᠨ ᠤ᠋ ᠭᠠᠯ ᠲᠠᠬᠢᠯᠭᠠ ᠶ᠋ᠢᠨ ᠶᠠᠪᠤᠴᠠ ᠪᠠ ᠦᠢᠯᠡ ᠥᠴᠢᠭ᠂ ᠢᠷᠦᠭᠡᠯ᠂ ᠳᠠᠯᠠᠯᠭᠠ ᠶ᠋ᠢᠨ ᠢᠷᠦᠭᠡᠯ ᠨᠢ ᠴᠤ᠌ ᠠᠳᠠᠯᠢ ᠦᠭᠡᠢ ᠪᠠᠢᠳᠠᠭ ᠭᠡᠰᠡᠨ ᠢ᠋ ᠲᠣᠳᠣᠷᠬᠠᠢᠯᠠᠶᠠ᠃
ᠡᠰᠢᠯᠡᠭᠰᠡᠨ ᠨᠣᠮ:
(1) 《ᠥᠪ ᠰᠣᠶᠣᠯ ᠤ᠋ᠨ ᠳᠡᠭᠡᠵᠢ》
(2)《ᠣᠷᠳᠣᠰ ᠤ᠋ᠨ ᠰᠣᠶᠣᠯ ᠤ᠋ᠨ ᠥᠪ》
(3)《ᠣᠷᠳᠣᠰ ᠮᠣᠩᠭᠣᠯ ᠤ᠋ᠨ ᠨᠡᠢᠭᠡᠮ ᠦ᠋ᠨ ᠵᠠᠩ ᠦᠢᠯᠡ》
(4)《ᠮᠣᠩᠭᠣᠯ ᠵᠠᠩ ᠦᠢᠯᠡ ᠶ᠋ᠢᠨ ᠰᠤᠳᠤᠯᠤᠯ》