ᠭᠣᠪᠢ ᠶ᠋ᠢᠨ ᠭᠠᠭᠴᠠ ᠠᠶ᠋ᠢᠯ - ᠱ ᠂ ᠭᠦᠷᠦᠪᠠᠽᠠᠷ Говийн гагц айял – Ш᠂ Гүрбазар
ᠭᠣᠪᠢ ᠶ᠋ᠢᠨ ᠭᠠᠭᠴᠠ ᠠᠶ᠋ᠢᠯ
ᠳᠡᠯᠭᠡᠭᠰᠡᠨ ᠲᠡᠷᠯᠢᠭ ᠰᠢᠭ
ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ
ᠭᠤᠨᠳᠠᠭᠰᠠᠨ ᠰᠢᠷᠭᠠᠯ ᠰᠡᠵᠢᠭᠦᠷ ᠢ᠋ᠶ᠋ᠡᠨ
ᠬᠣᠰᠢᠭᠤᠯᠳᠠᠭᠰᠠᠨ ᠬᠣᠷᠮᠣᠢ ᠰᠢᠭ᠋
ᠭᠤᠴᠢᠨ ᠭᠤᠷᠪᠠᠨ ᠭᠣᠪᠢ ᠶ᠋ᠢᠨ
ᠬᠤᠳᠳᠤᠭ ᠪᠠᠷᠠᠳᠠᠭᠰᠠᠨ ᠡᠪᠦᠭᠡᠳ ᠢ᠋ᠶ᠋ᠡᠨ
ᠮᠠᠷᠲᠠᠬᠤ ᠶ᠋ᠢᠨ ᠤᠴᠢᠷ ᠦᠭᠡᠢ ᠳ᠋ᠦ᠍ ᠦᠷᠦ ᠡᠪᠡᠳᠬᠦ ᠳ᠋ᠡᠭᠡᠨ
ᠰᠢᠯᠦᠭ ᠪᠢᠴᠢᠵᠦ ᠰᠠᠭᠤᠨᠠ
ᠮᠢᠨᠦ ᠥᠭᠦᠯᠡᠬᠦ ᠪᠤᠷᠤᠭᠤ ᠶᠤᠮ ᠪᠣᠯ
ᠰᠢᠭᠦᠬᠦ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌ ᠴᠦ᠍ ᠪᠡᠯᠡᠨ ᠠ᠋
ᠢᠵᠢᠢ ᠪᠡᠨ ᠳᠠᠭᠠᠭᠠᠳ ᠠᠷᠭᠠᠯ ᠳ᠋ᠤ᠌ ᠶᠠᠪᠤᠳᠠᠭ ᠪᠠᠢᠭᠰᠠᠨ
ᠢᠵᠢᠯᠢ ᠦᠭᠡᠢ ᠭᠠᠭᠴᠠᠬᠠᠨ ᠲᠣᠭᠣᠨᠣᠲᠤ ᠮᠢᠨᠢ
ᠭᠣᠪᠢ ᠢᠰᠢᠭᠡ ᠬᠥᠭᠡᠭᠡᠴᠡᠯᠳᠦᠵᠦ ᠬᠥᠯ ᠳ᠋ᠦ᠍ ᠣᠷᠣᠬᠤ ᠳ᠋ᠠᠭᠠᠨ
ᠢᠨᠢᠶᠡᠵᠦ ᠲᠤᠯᠤᠭᠰᠠᠨ ᠰᠢᠷᠢᠳᠡᠭ ᠮᠢᠨᠢ ᠲᠠᠯᠠ
ᠬᠠᠯᠲᠠᠷ ᠴᠢᠭᠢᠭ ᠲᠦ᠍ ᠵᠣ ᠨᠢ ᠲᠡᠨᠢᠢᠬᠦ
ᠬᠠᠭᠰᠠᠭᠠ ᠨᠢᠮᠭᠡᠨ ᠮᠣᠷᠢᠳ ᠲᠠᠢ ᠨᠤᠲᠤᠭ
ᠬᠠᠭᠠᠰ ᠡᠳᠦᠷ ᠪᠣᠷᠣᠭᠠ ᠰᠢᠪᠡᠷᠡᠬᠦ ᠳ᠋ᠦ᠍ ᠴᠦ᠍
ᠬᠠᠰᠬᠢᠷᠴᠤ ᠤᠷᠭᠤᠳᠠᠭ ᠳᠠᠭᠠᠨᠠ ᠲᠠᠢ ᠨᠤᠲᠤᠭ
ᠪᠦᠷᠢᠨ ᠣᠷᠣᠨ ᠤ᠋ ᠪᠠᠨ ᠰᠡᠮᠡᠷᠡᠭᠡ ᠦᠭᠡᠢ ᠬᠠᠶᠠᠭᠠ ᠶ᠋ᠢ
ᠠᠮᠢᠳᠤ ᠪᠠᠢᠯᠭᠠᠬᠤ ᠭᠡᠰᠡᠨ ᠳ᠋ᠡᠭᠡᠨ ᠵᠠᠬᠠᠯᠠᠵᠤ ᠨᠤᠲᠤᠭᠯᠠᠭᠰᠠᠨ
ᠪᠦᠯᠢᠶᠡᠨ ᠵᠤᠯᠠᠢ ᠲᠠᠢ ᠡᠬᠡ ᠨᠤᠲᠤᠭ ᠢ᠋ᠶ᠋ᠠᠨ
ᠠᠢᠯ ᠲᠠᠢ ᠪᠠᠢᠯᠭᠠᠬᠤ ᠭᠡᠰᠡᠨ ᠳ᠋ᠡᠭᠡᠨ ᠬᠠᠶᠠᠭᠠᠯᠠᠵᠤ ᠬᠣᠯᠠᠳᠤᠭᠰᠠᠨ
ᠥᠷᠲᠡᠭᠡ ᠥᠷᠲᠡᠭᠡ ᠭᠡᠷ ᠦ᠋ᠳ ᠨᠢ
ᠪᠦᠦᠷᠴᠢ ᠶ᠋ᠢᠨ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ ᠮᠡᠳᠡᠯᠴᠡᠭᠰᠡᠨ
ᠡᠳᠦᠷ ᠡᠳᠦᠷ ᠲᠡᠭᠡᠨ ᠬᠠᠶᠠ
ᠭᠤᠴᠢᠨ ᠤᠰᠤᠨ ᠳᠡᠭᠡᠷᠡ ᠪᠡᠨ ᠠᠭᠤᠯᠵᠠᠳᠠᠭ
ᠣᠪᠣᠭᠠᠲᠤ ᠶ᠋ᠢᠨ ᠽᠠᠰᠲ᠋ᠠᠸ ᠠ᠋ᠴᠠ ᠨᠠᠭᠠᠬᠠᠨᠠ
ᠬᠣᠨᠢ ᠨᠢ ᠪᠡᠯᠴᠢᠵᠦ ᠢᠳᠡᠰᠢᠯᠡᠭᠰᠡᠨ
ᠣᠷᠣᠨ ᠤᠯᠤᠰ ᠤ᠋ᠨ ᠮᠢᠨᠢ ᠲᠣᠭᠣᠨᠣ ᠲᠠᠢ ᠰᠠᠬᠢᠭᠤᠯ
ᠭᠣᠪᠢ ᠶ᠋ᠢᠨ ᠭᠠᠭᠴᠠ ᠠᠢᠯ
ᠬᠣᠯᠠᠳᠠᠯᠠ ᠬᠣᠯᠠᠳᠠᠯᠠ ᠭᠡᠬᠦ ᠳ᠋ᠦ᠍
ᠬᠣᠨᠳᠣ ᠠ᠋ᠴᠠ ᠪᠠᠨ ᠬᠣᠯᠠᠳᠴᠤ ᠴᠢᠳᠠᠭᠠ ᠦᠭᠡᠢ
ᠬᠣᠲᠠ ᠭᠠᠭᠴᠠ ᠣᠷᠣᠬᠤ ᠳ᠋ᠠᠭᠠᠨ
ᠬᠣᠶᠠᠷ ᠬᠣᠨᠣᠭ ᠠ᠋ᠴᠠ ᠬᠡᠲᠦᠷᠡᠵᠦ ᠦᠵᠡᠭᠡ ᠦᠭᠡᠢ
ᠠᠳᠤᠭᠤ ᠡᠵᠡᠨ ᠬᠣᠶᠠᠭᠤᠯᠠ ᠪᠠᠨ
ᠱᠠᠩᠳᠠ ᠳ᠋ᠠᠭᠠᠨ ᠡᠭᠡᠨᠡᠭᠰᠢᠭᠰᠡᠨ ᠭᠣᠪᠢ ᠶ᠋ᠢᠨ ᠬᠢᠨ ᠢ᠋
ᠠᠷᠠᠳ ᠤ᠋ᠨ ᠳᠠᠭᠤᠤ ᠶ᠋ᠢᠨ ᠪᠠᠳᠠᠭ ᠰᠢᠭ᠋
ᠮᠠᠷᠲᠠᠴᠢᠬᠠᠬᠤ ᠰᠢᠬᠠᠭᠰᠠᠨ ᠶᠤᠮ ᠪᠢᠰᠢ ᠤᠤ ᠳᠠ
ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠬᠤᠪᠢ ᠵᠠᠶᠠᠭᠠ ᠪᠠᠨ
ᠥᠪᠡᠷ ᠲᠡᠭᠡᠨ ᠳᠠᠭᠠᠳᠬᠠᠭᠰᠠᠨ ᠭᠣᠪᠢᠴᠤᠳ ᠮᠢᠨᠢ
ᠬᠣᠷᠢᠨ ᠨᠢᠭᠡᠨ ᠣᠨ ᠠ᠋ᠴᠠ
ᠠᠷᠠᠢ ᠴᠠᠭᠠᠬᠠᠨᠠ ᠠᠮᠢᠳᠤᠷᠠᠵᠤ ᠪᠠᠢᠨᠠ
ᠳᠠᠷᠠᠰᠤ ᠳᠡᠷᠡᠰᠦᠨ ᠳ᠋ᠦ᠍ ᠤᠨᠠᠭᠰᠠᠨ
ᠲᠩᠷᠢ ᠶ᠋ᠢᠨ ᠰᠢᠷᠭᠠᠯ ᠳᠦᠯᠡᠢ ᠰᠢᠭ
ᠳᠡᠯ ᠳᠡᠯ ᠢ᠋ᠶ᠋ᠡᠨ ᠪᠠᠷᠠᠳᠠᠵᠤ
ᠲᠡᠳᠡ ᠮᠢᠨᠢ ᠣᠳᠣ ᠶᠠᠭᠠᠬᠢᠵᠤ ᠶᠠᠪᠤᠨᠠ ᠳᠠ
ᠠᠷᠤᠭ ᠲᠦᠰᠢᠵᠦ ᠦᠷᠡ ᠲᠥᠷᠥᠭᠦᠯᠦᠭᠰᠡᠨ
ᠠᠮᠠᠷᠠᠭ ᠬᠡᠦᠬᠡᠨ ᠨᠦ᠍ᠭᠦᠳ ᠬᠣᠪᠣᠭᠣ ᠲᠠᠲᠠᠭᠰᠠᠭᠠᠷ ᠯᠠ
ᠠᠲᠠᠨ ᠲᠡᠮᠡᠭᠡᠨ ᠳ᠋ᠡᠭᠡᠨ ᠠᠴᠢ ᠪᠠᠨ ᠳᠡᠭᠦᠷᠴᠦ
ᠠᠳᠤᠭᠤ ᠤᠷᠭᠠᠯᠠᠵᠤ ᠡᠮᠨᠢᠭ ᠰᠤᠷᠭᠠᠭᠰᠠᠭᠠᠷ ᠯᠠ
ᠦᠷᠡ ᠨᠢ ᠬᠥᠯᠰᠡᠬᠦ ᠳ᠋ᠦ᠍ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠪᠡᠨ
ᠦᠳᠡᠰᠢ ᠣᠷᠣᠢ ᠵᠠᠯᠠᠨ ᠳᠡᠭᠡᠷᠡ ᠪᠡᠨ
ᠢᠩᠭᠡ ᠬᠦᠦᠰᠯᠡᠬᠦ ᠦᠨᠡᠰᠦᠨ ᠳᠡᠭᠡᠷᠡ ᠪᠡᠨ
ᠢᠯᠡᠭᠦᠦ ᠭᠡᠷ ᠲᠡᠭᠡᠨ ᠢᠳᠡᠭᠡᠨ ᠳᠡᠭᠡᠷᠡ ᠪᠡᠨ
ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠣᠯᠣᠭᠠᠨ ᠤ᠋
ᠭᠠᠭᠴᠠᠬᠠᠨ ᠡᠳᠦᠷ ᠦ᠋ᠨ ᠠᠮᠠᠷᠠᠯᠲᠠ ᠲᠠᠢ ᠴᠦ᠍
ᠨᠠᠷᠠ ᠳᠠᠯᠳᠢᠴᠢᠭᠤᠯᠤᠭᠰᠠᠨ ᠭᠣᠪᠢ ᠳ᠋ᠠᠭᠠᠨ
ᠨᠠᠰᠤᠯᠠᠬᠤ ᠳ᠋ᠠᠭᠠᠨ ᠲᠡᠳᠡ
ᠪᠤᠬᠢᠨᠢᠳᠤᠭᠠ ᠦᠭᠡᠢ ᠶᠠᠪᠤᠨᠠ
ᠠᠩᠭᠠᠭᠰᠠᠨ ᠬᠥᠮᠦᠨ ᠳ᠋ᠦ᠍
ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠬᠢ
ᠭᠣᠪᠢ ᠶ᠋ᠢᠨ ᠭᠠᠭᠴᠠ ᠠᠢᠯ
ᠠᠯᠤᠰ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌
ᠦᠯᠢᠭᠡᠷ ᠦ᠋ᠨ ᠲᠡᠭᠦᠰᠬᠡᠯ ᠰᠢᠭ
ᠬᠣᠯᠠ ᠶ᠋ᠢᠨ ᠴᠡᠭᠡᠨ ᠰᠤᠪᠤᠳ
ᠬᠤᠷᠠᠭᠰᠠᠨ᠂ ᠭᠤᠶᠤᠭᠰᠠᠨ ᠵᠠᠯᠪᠠᠷᠢᠯ ᠳ᠋ᠤᠨᠢ
ᠪᠣᠷᠣᠭᠠ ᠠᠰᠬᠠᠭᠤᠯᠵᠤ ᠭᠡᠢᠭᠦᠯᠳᠡᠭ ᠦᠭᠡᠢ ᠶᠦᠮ ᠠ᠋ ᠭᠡᠬᠦ ᠳ᠋ᠦ᠍
ᠬᠤᠪᠢ ᠲᠡᠩᠴᠡᠭᠦᠦ ᠲᠥᠷᠥ ᠶ᠋ᠢᠨ ᠬᠡᠰᠢᠭ ᠡᠴᠡ
ᠪᠦᠲᠦᠨ ᠠᠳᠬᠤᠭᠠᠳ ᠥᠭᠴᠢᠬᠡᠬᠦ ᠯᠡ ᠶᠤᠮᠰᠠᠨ ᠳᠠ
ᠰᠢᠷᠢᠩᠭᠢ ᠣᠢ ᠪᠠᠷ ᠲᠠᠢᠳᠬᠤᠷᠠᠭᠤᠯᠵᠤ
ᠰᠢᠷᠢᠭᠢ ᠵᠦᠯᠭᠡ ᠬᠥᠭᠯᠡᠷᠡᠭᠦᠯᠳᠡᠭ ᠦᠭᠡᠢ ᠶᠦᠮ ᠠ᠋ ᠭᠡᠬᠦ ᠳ᠋ᠦ᠍
ᠰᠢᠷᠬᠡᠭ ᠯᠡ ᠨᠢ ᠪᠥᠬᠥᠬᠦ ᠳ᠋ᠦ᠍
ᠳ᠋ᠧᠩ ᠲᠡᠮᠲᠡᠴᠢᠭᠦᠯᠵᠦ ᠰᠥᠬᠦᠷᠡᠭᠦᠯᠬᠦ ᠦᠭᠡᠢ ᠯᠡ ᠶᠤᠮᠰᠠᠨ ᠳᠠ
ᠠᠳᠤᠭᠤᠰᠤ ᠨᠢ ᠬᠦᠷᠲᠡᠯᠡ
ᠤᠯᠠᠭᠠᠨ ᠨᠣᠮ ᠳ᠋ᠤ᠌ ᠳᠠᠷᠬᠠᠯᠠᠭᠳᠠᠭᠰᠠᠨ ᠭᠣᠪᠢ ᠶ᠋ᠢᠨ ᠮᠢᠨᠢ
ᠠᠢᠯ ᠨᠢ ᠴᠣᠬᠣᠮ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ
ᠤᠯᠠᠭᠠᠨᠪᠠᠭᠠᠲᠤᠷ ᠠ᠋ᠴᠠ ᠮᠠᠷᠲᠠᠭᠳᠠᠳᠠᠭ ᠪᠠᠢᠨᠠ
ᠥᠯᠭᠡ ᠬᠦᠷᠪᠡᠯ ᠦ᠋ᠨ ᠥᠨᠳᠡᠭᠡ ᠨᠢ
ᠡᠷᠲᠡᠨ ᠦ᠌ ᠲᠡᠦᠬᠡᠨ ᠳ᠋ᠦ᠍ ᠦᠨᠡᠲᠡᠢ ᠴᠦ᠍
ᠦᠳᠡ ᠶ᠋ᠢᠨ ᠨᠠᠷᠠᠨ ᠳ᠋ᠤ᠌ ᠴᠠᠬᠢᠯᠤᠭᠰᠠᠨ ᠭᠠᠭᠴᠠ ᠠᠢᠯ ᠨᠢ
ᠡᠵᠡᠨ ᠦ᠌ ᠪᠡᠨ ᠰᠡᠳᠬᠢᠯ ᠳ᠋ᠦ᠍ ᠲᠡᠭᠦᠨ ᠡᠴᠡ ᠴᠦ᠍ ᠦᠨᠡᠲᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ