ᠨᠢᠭᠡᠨ ᠨᠣᠮ ᠲᠠᠪᠴᠠᠩ ᠦ᠋ᠨ ᠡᠳᠦᠷ ᠦ᠋ᠨ ᠲᠡᠮᠳᠡᠭᠯᠡᠯ ᠡᠴᠡ – 17 Нэгэн ном тавцан үн өдөр үн тэмдэглэлээс – 17
543 ᠰᠠᠢᠬᠠᠨ ᠵᠠᠩ ᠲᠠᠢ ᠪᠦᠰᠡᠭᠦᠢ ᠭᠡᠷ ᠡᠴᠡ ᠭᠠᠷᠲᠠᠯᠠ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠲᠠᠢ ᠭᠤᠷᠪᠠᠨ ᠡᠪᠦᠭᠡᠨ ᠪᠠᠢᠰᠢᠩ ᠤ᠋ᠨ ᠬᠢᠨᠢ ᠡᠮᠦᠨᠡ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃ ᠪᠦᠰᠡᠭᠦᠢ ᠲᠡᠳᠡᠨ ᠢ᠋ ᠬᠠᠷᠠᠭᠠᠳ ᠲᠠᠨᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠨᠤᠲᠤᠭ ᠤ᠋ᠨ ᠰᠠᠢᠬᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ᠄《ᠪᠢ ᠲᠠ ᠨᠠᠷ ᠢ᠋ ᠣᠭᠲᠣ ᠲᠠᠨᠢᠬᠤ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠠ ᠨᠠᠷ ᠥᠯᠥᠰᠴᠦ ᠶᠠᠳᠠᠷᠠᠭᠠ ᠪᠠᠢᠯᠭᠦᠢ ᠳᠧ᠃ ᠮᠠᠨ ᠤ᠋ ᠳ᠋ᠤ᠌ ᠣᠷᠣᠭᠠᠳ ᠢᠳᠡᠭᠡ ᠤᠮᠳᠠᠭᠠᠨ ᠵᠣᠭᠣᠭᠯᠠᠨᠠ ᠤᠤ?》 ᠭᠡᠮᠡᠨ ᠤᠷᠢᠵᠠᠢ᠃ ᠲᠡᠭᠡᠲᠡᠯᠡ ᠡᠪᠦᠭᠡᠳ᠄《 ᠲᠠᠨ ᠤ᠋ ᠭᠡᠷ ᠦ᠋ᠨ ᠡᠵᠡᠨ ᠴᠢᠨᠢ ᠭᠡᠷ ᠲᠡᠭᠡᠨ ᠪᠠᠢᠨᠠ ᠤᠤ?》 ᠭᠡᠵᠦ ᠰᠠᠢᠬᠠᠨ ᠵᠠᠩ ᠲᠠᠢ ᠡᠮᠡᠭᠲᠡᠢ ᠡᠴᠡ ᠯᠠᠪᠯᠠᠪᠠ᠃《ᠦᠭᠡᠢ ᠠ᠋᠂ ᠨᠥᠬᠥᠷ ᠮᠠᠨᠢ ᠢᠷᠡᠭᠡ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠪᠦᠰᠡᠭᠦᠢ ᠬᠡᠯᠡᠬᠦ ᠳ᠋ᠦ᠍《ᠵᠠ ᠲᠡᠭᠡᠪᠡᠯ ᠲᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠪᠠᠢᠨᠠ》 ᠭᠡᠮᠡᠨ ᠡᠪᠦᠭᠡᠳ ᠬᠠᠷᠢᠭᠤᠯᠵᠠᠢ᠃
ᠣᠷᠣᠢ ᠪᠣᠯᠵᠤ ᠨᠥᠬᠥᠷ ᠨᠢ ᠭᠡᠷ ᠲᠡᠭᠡᠨ ᠢᠷᠡᠬᠦ ᠳ᠋ᠦ᠍ ᠡᠬᠡᠨᠡᠷ ᠥᠨᠥᠳᠥᠷ ᠦ᠋ᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠵᠤ ᠭᠡᠨᠡ᠃ ᠨᠥᠬᠥᠷ《ᠠᠯᠢᠪ᠂ ᠡᠬᠡᠨᠡᠷ ᠮᠢᠨᠢ ᠶᠠᠪᠤᠭᠠᠳ ᠠᠵᠠᠢ ᠪᠤᠭᠤᠷᠤᠯ ᠤ᠋ᠳ ᠢ᠋ ᠤᠷᠢᠭᠠᠳ ᠢᠷᠡ!》 ᠭᠡᠵᠦ ᠬᠡᠯᠡᠵᠡᠢ᠃ ᠪᠦᠰᠡᠭᠦᠢ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠡᠪᠦᠭᠡᠳ ᠢ᠋ ᠤᠷᠢᠨ ᠭᠡᠷ ᠲᠦ᠍ ᠨᠢ ᠠᠢᠯᠴᠢᠯᠠᠬᠤ ᠶ᠋ᠢ ᠳᠠᠬᠢᠨ ᠭᠤᠶᠤᠯᠠ᠃ ᠬᠠᠷᠢᠨ ᠤᠷᠲᠤ ᠰᠠᠬᠠᠯᠲᠤ ᠴᠠᠭᠠᠨ ᠡᠪᠦᠭᠡᠨ᠄《ᠪᠢᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠨᠢᠭᠡ ᠠᠢᠯ ᠳ᠋ᠤ᠌ ᠵᠡᠷᠭᠡ ᠣᠷᠣᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠦᠮ》 ᠭᠡᠮᠡᠨ ᠬᠠᠷᠢᠭᠤᠯᠵᠠᠢ᠃ ᠡᠬᠡᠨᠡᠷ ᠶᠠᠮᠠᠷ ᠤᠴᠢᠷ ᠲᠠᠢ ᠪᠣᠯᠬᠤ ᠶ᠋ᠢ ᠭᠠᠢᠬᠠᠨ ᠯᠠᠪᠯᠠᠵᠤ ᠭᠡᠨᠡ᠃ ᠬᠠᠷᠢᠨ ᠨᠢᠭᠡ ᠡᠪᠦᠭᠡᠨ ᠨᠥᠭᠦᠭᠡ ᠤᠷᠤᠭᠤ ᠪᠠᠨ ᠵᠢᠭᠠᠭᠠᠭᠰᠠᠨ ᠢ᠋ᠶ᠋ᠠᠨ᠄《ᠲᠡᠭᠦᠨ ᠦ᠌ ᠨᠡᠷᠡ ᠶ᠋ᠢ ᠡᠳ᠋ ᠪᠠᠶᠠᠯᠢᠭ ᠭᠡᠳᠡᠭ᠂ ᠳᠠᠷᠠᠭᠠ ᠨᠢ ᠠᠮᠵᠢᠯᠲᠠ᠂ ᠬᠠᠷᠢᠨ ᠨᠠᠮᠠᠶ᠋ᠢ ᠪᠣᠯ ᠬᠠᠢᠷᠠ ᠭᠡᠳᠡᠭ ᠶᠦᠮ᠃ ᠲᠠ ᠣᠳᠣ ᠭᠡᠷ ᠲᠡᠭᠡᠨ ᠪᠢᠳᠡ ᠭᠤᠷᠪᠠ ᠶ᠋ᠢᠨ ᠬᠡᠨ ᠢ᠋ ᠨᠢ ᠰᠣᠩᠭᠣᠵᠤ ᠤᠷᠢᠮᠠᠷ ᠪᠠᠢᠨᠠ ᠭᠡᠳᠡᠭ ᠢ᠋ᠶ᠋ᠡᠨ ᠨᠥᠬᠥᠷ ᠲᠡᠢ ᠪᠡᠨ ᠶᠠᠷᠢᠯᠴᠠᠭᠠᠳ ᠢᠷᠡ!》 ᠭᠡᠵᠦ ᠬᠡᠯᠡᠪᠡ᠃ ᠢᠩᠭᠢᠭᠡᠳ ᠡᠬᠡᠨᠡᠷ ᠭᠡᠷ ᠲᠡᠭᠡᠨ ᠣᠷᠣᠵᠤ ᠨᠥᠬᠥᠷ ᠲᠡᠭᠡᠨ ᠡᠨᠡ ᠲᠤᠬᠠᠢ ᠬᠡᠯᠡᠬᠦ ᠳ᠋ᠦ᠍ ᠭᠡᠷ ᠦ᠋ᠨ ᠡᠵᠡᠨ᠄《ᠶᠠᠮᠠᠷ ᠰᠠᠢᠨ ᠶᠤᠮ ᠪᠣᠢ? ᠨᠢᠭᠡᠨᠲᠡ ᠡᠨᠡ ᠪᠦᠬᠦᠨ ᠦᠨᠡᠨ ᠶᠦᠮ ᠪᠣᠯ ᠭᠡᠷ ᠲᠡᠭᠡᠨ ᠡᠳ᠋ ᠪᠠᠶᠠᠯᠢᠭ ᠳᠦᠭᠦᠷᠭᠡᠶᠡ!》 ᠭᠡᠯᠡ᠃ ᠭᠡᠲᠡᠯᠡ ᠡᠬᠡᠨᠡᠷ ᠨᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠄《ᠬᠣᠩᠭᠣᠷ ᠮᠢᠨᠢ! ᠪᠢᠳᠡ ᠶᠠᠭᠠᠬᠢᠭᠠᠳ ᠠᠮᠵᠢᠯᠲᠠ ᠶ᠋ᠢ ᠭᠡᠷ ᠲᠦ᠍ ᠪᠡᠨ ᠤᠷᠢᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ ᠪᠣᠢ?》 ᠭᠡᠬᠦ ᠳ᠋ᠦ᠍ ᠥᠬᠢᠨ ᠨᠢ᠄《ᠬᠠᠢᠷᠠ ᠶ᠋ᠢ ᠤᠷᠢᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠭᠡᠷ ᠣᠷᠣᠨ ᠮᠢᠨᠢ ᠬᠠᠢᠷᠠ ᠪᠠᠷ ᠳᠦᠭᠦᠷᠦᠨᠡ ᠰᠢᠦ ᠳᠡ》 ᠭᠡᠯᠡ᠃ ᠨᠥᠬᠥᠷ ᠨᠢ᠄《ᠪᠢᠳᠡ ᠥᠬᠢᠨ ᠦ᠌ ᠪᠡᠨ ᠵᠥᠪᠯᠡᠯᠭᠡ ᠶ᠋ᠢ ᠳᠠᠭᠠᠵᠠᠭᠠᠶᠠ᠂ ᠶᠠᠪᠤᠵᠤ ᠣᠴᠢᠭᠠᠳ ᠬᠠᠢᠷᠠ ᠶ᠋ᠢ ᠭᠡᠷ ᠲᠡᠭᠡᠨ ᠤᠷᠢᠭᠠᠳ ᠢᠷᠡ!》 ᠭᠡᠯᠡ᠃ ᠡᠬᠡᠨᠡᠷ ᠭᠡᠷ ᠡᠴᠡ ᠭᠠᠷᠴᠤ ᠭᠤᠷᠪᠠᠨ ᠡᠪᠦᠭᠡᠨ ᠡᠴᠡ᠄《ᠲᠠ ᠨᠠᠷ ᠤ᠋ᠨ ᠬᠡᠨ ᠨᠢ ᠬᠠᠢᠷᠠ ᠪᠢᠯᠡ? ᠪᠢᠳᠡ ᠬᠠᠢᠷᠠ ᠶ᠋ᠢ ᠤᠷᠢᠳᠠᠪᠡᠷ ᠭᠡᠷ ᠲᠡᠭᠡᠨ ᠤᠷᠢᠶᠠ》 ᠭᠡᠵᠡᠢ᠃ ᠬᠠᠢᠷᠠ ᠪᠣᠰᠤᠭᠠᠳ ᠪᠠᠢᠰᠢᠩ ᠤᠷᠤᠭᠤ ᠠᠯᠬᠤᠪᠠ᠃ ᠬᠠᠷᠢᠨ ᠨᠥᠭᠦᠭᠡ ᠬᠣᠶᠠᠷ ᠨᠢ ᠴᠦ᠍ ᠲᠡᠭᠦᠨ ᠢ᠋ ᠳ᠋ᠨᠭᠠᠨ ᠠᠯᠬᠤᠵᠤ ᠭᠡᠨᠡ᠃ ᠭᠠᠢᠬᠠᠭᠰᠠᠨ ᠬᠠᠲᠤᠭᠲᠠᠢ ᠡᠳ᠋ ᠪᠠᠶᠠᠯᠢᠭ᠂ ᠠᠮᠵᠢᠯᠲᠠ ᠬᠣᠶᠠᠷ ᠠ᠋ᠴᠠ᠄《ᠪᠢ ᠵᠥᠪᠬᠡᠨ ᠬᠠᠢᠷᠠ ᠶ᠋ᠢ ᠤᠷᠢᠭᠰᠠᠨ ᠰᠢᠦ ᠳᠡ᠃ ᠶᠠᠭᠠᠬᠢᠭᠠᠳ ᠲᠠ ᠬᠣᠶᠠᠷ ᠲᠡᠭᠦᠨ ᠢ᠋ ᠳᠠᠭᠠᠵᠤ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠡᠪᠦᠭᠡᠳ᠄《ᠬᠡᠷᠪᠡ ᠲᠠ ᠨᠠᠷ ᠡᠳ᠋ ᠪᠠᠶᠠᠯᠢᠭ ᠪᠤᠶᠤ ᠠᠮᠵᠢᠯᠲᠠ ᠶ᠋ᠢᠨ ᠠᠯᠢ ᠨᠢᠭᠡ ᠶ᠋ᠢ ᠨᠢ ᠤᠷᠢᠭᠰᠠᠨ ᠪᠣᠯ ᠪᠤᠰᠤᠳ ᠬᠣᠶᠠᠷ ᠨᠢ ᠭᠠᠳᠠᠨᠠ ᠪᠠᠢᠬᠤ ᠪᠠᠢᠭᠰᠠᠨ ᠶᠤᠮ᠃ ᠨᠢᠭᠡᠨᠲᠡ ᠬᠠᠢᠷᠠ ᠶ᠋ᠢ ᠤᠷᠢᠭᠰᠠᠨ ᠲᠤᠯᠠ ᠲᠡᠭᠦᠨ ᠢ᠋ ᠳᠠᠭᠠᠵᠤ ᠪᠢᠳᠡ ᠪᠠᠢᠩᠭᠤ ᠶᠠᠪᠤᠳᠠᠭ ᠶᠤᠮ᠃ ᠬᠠᠢᠷᠠ ᠬᠠᠮᠢᠭᠠ ᠪᠠᠢᠪᠠᠯ ᠲᠡᠨᠳᠡ ᠡᠳ᠋ ᠪᠠᠶᠠᠯᠢᠭ ᠪᠣᠯᠤᠨ ᠠᠮᠵᠢᠯᠲᠠ ᠪᠠᠢᠳᠠᠭ ᠶᠤᠮ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ