ᠠᠷᠢᠬᠢᠨ ᠬᠣᠯᠪᠣᠭᠠ - ᠬᠤᠭᠤᠷᠴᠢ ᠦᠰᠬᠦᠪᠣᠶᠠᠨ Архин холбоо-Хуурч Үсэхвуян
3325ᠠᠷᠢᠬᠢᠨ ᠬᠣᠯᠪᠣᠭᠠ
1960 ᠣᠨ ᠳ᠋ᠤ᠌ ᠠᠬᠠᠮᠠᠳ ᠬᠤᠭᠤᠷᠴᠢ ᠦᠰᠬᠦᠪᠣᠶᠠᠨ ᠬᠡᠯᠡᠵᠦ ᠦᠯᠡᠳᠡᠭᠡᠪᠡ
ᠽᠠᠨᠳᠠᠨ ᠬᠤᠭᠤᠷ ᠢ᠋ ᠪᠡᠨ ᠲᠠᠲᠠᠵᠤ
ᠰᠢᠯᠦᠭ ᠦ᠋ᠨ ᠳᠡᠭᠡᠵᠢ ᠪᠡᠨ ᠳᠡᠪᠰᠢᠭᠦᠯᠦᠶᠡ
ᠰᠠᠷᠬᠤᠳ ᠬᠠᠳᠠᠭ ᠢ᠋ᠶ᠋ᠠᠨ ᠡᠷᠭᠦᠵᠦ
ᠰᠢᠨᠡ ᠵᠢᠯ ᠦ᠋ᠨ ᠪᠠᠶᠠᠷ ᠢ᠋ᠶ᠋ᠠᠨ ᠪᠡᠯᠭᠡᠯᠡᠶᠡ
ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠶ᠋ᠢᠨ ᠡᠭᠡᠰᠢᠭᠯᠡᠯ ᠲᠡᠢ
ᠠᠷᠠᠯᠲᠤ ᠬᠤᠭᠤᠷ ᠢ᠋ ᠪᠡᠨ ᠲᠠᠲᠠᠵᠤ
ᠠᠷᠢᠬᠢ ᠪᠣᠯᠤᠨ ᠰᠠᠷᠬᠤᠳ ᠤ᠋ᠨ
ᠠᠮᠲᠠ ᠰᠢᠮᠳᠠ ᠶ᠋ᠢ ᠮᠠᠭᠲᠠᠶᠠ
ᠰᠠᠷᠠᠨ ᠬᠥᠬᠥᠭᠡ ᠶ᠋ᠢᠨ ᠡᠭᠡᠰᠢᠭᠯᠡᠯ ᠲᠡᠢ
ᠽᠠᠨᠳᠠᠨ ᠬᠤᠭᠤᠷ ᠢ᠋ ᠪᠡᠨ ᠲᠠᠲᠠᠵᠤ
ᠰᠠᠷᠬᠤᠳ ᠪᠣᠯᠤᠨ ᠨᠠᠩᠴᠢᠳ ᠤ᠋ᠨ
ᠰᠢᠪᠰᠢᠭ ᠱᠣᠭ ᠢ᠋ ᠴᠤ᠌ ᠬᠣᠯᠪᠣᠶᠠ
ᠪᠠᠯᠠᠷ ᠡᠷᠲᠡᠨ ᠡᠴᠡ ᠪᠡᠨ ᠡᠷᠬᠢᠮᠯᠡᠭᠰᠡᠨ
ᠪᠠᠯ ᠤ᠋ᠨ ᠠᠮᠲᠠ ᠲᠠᠢ ᠠᠷᠢᠬᠢ ᠯᠠ ᠶᠤᠮ
ᠪᠠᠶᠠᠷ ᠨᠠᠢᠷ ᠤ᠋ᠨ ᠨᠠᠭᠠᠳᠤᠮ ᠳᠡᠭᠡᠷᠡ
ᠪᠡᠯᠡᠭ ᠦ᠋ᠨ ᠳᠡᠭᠡᠵᠢ ᠨᠢ ᠴᠤ᠌ ᠠᠷᠢᠬᠢ ᠯᠠ ᠶᠤᠮ
ᠤᠷᠢᠳᠤ ᠶ᠋ᠢᠨ ᠲᠡᠦᠬᠡᠨ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ
ᠤᠮᠳᠠ ᠶ᠋ᠢᠨ ᠳᠡᠭᠡᠳᠦ ᠨᠢ ᠴᠦ᠍ ᠠᠷᠢᠬᠢ ᠯᠠ ᠶᠤᠮ
ᠤᠯᠤᠰ ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠡᠷᠬᠢᠮᠯᠡᠳᠡᠭ
ᠤᠤᠭᠤᠭᠠᠳ ᠬᠠᠨᠤᠰᠢ ᠦᠭᠡᠢ ᠰᠠᠷᠬᠤᠳ ᠶᠤᠮ
ᠪᠠᠭᠠᠲᠤᠷ ᠲᠦᠮᠡᠨ ᠢ᠋ ᠪᠡᠨ ᠤᠭᠲᠤᠬᠤᠯᠠᠷ
ᠪᠡᠯᠭᠡᠯᠡᠭᠡᠳ ᠪᠠᠷᠢᠳᠠᠭ ᠠᠷᠢᠬᠢ ᠯᠠ ᠶᠤᠮ
ᠪᠠᠶᠠᠷ ᠨᠠᠢᠷ ᠤ᠋ᠨ ᠨᠠᠭᠠᠳᠤᠮ ᠳᠡᠭᠡᠷᠡ
ᠪᠠᠰᠠ ᠴᠤ᠌ ᠡᠷᠬᠢᠮ ᠨᠢ ᠠᠷᠢᠬᠢ ᠶᠤᠮ
ᠶᠢᠰᠦᠨ ᠲᠠᠷᠢᠶᠠᠨ ᠤ᠋ ᠦᠷᠡ ᠰᠢᠮᠡ ᠪᠡᠷ
ᠢᠰᠬᠡᠭᠡᠳ ᠨᠡᠷᠡᠭᠰᠡᠨ ᠠᠷᠢᠬᠢ ᠴᠤ᠌ ᠪᠣᠢ
ᠠᠢᠷᠠᠭ ᠰᠦ ᠶ᠋ᠢᠨ ᠰᠢᠮᠡ ᠠᠮᠲᠠ ᠪᠠᠷ
ᠨᠠᠢᠷᠠᠭᠤᠯᠤᠭᠠᠳ ᠨᠡᠷᠡᠭᠰᠡᠨ ᠠᠷᠢᠬᠢ ᠴᠤ᠌ ᠪᠣᠢ
ᠴᠡᠴᠡᠭ ᠨᠠᠪᠴᠢ ᠶ᠋ᠢᠨ ᠦᠨᠦᠷ ᠰᠢᠮᠡ ᠪᠡᠷ
ᠵᠢᠩᠨᠡᠭᠡᠳ ᠨᠡᠷᠡᠭᠰᠡᠨ ᠰᠠᠷᠬᠤᠳ ᠴᠤ᠌ ᠪᠣᠢ
ᠵᠢᠮᠢᠰ ᠦᠵᠦᠮ ᠦ᠋ᠨ ᠰᠢᠭᠦᠰᠦ ᠪᠡᠷ ᠢ᠋ᠶ᠋ᠡᠨ
ᠰᠢᠬᠠᠵᠤ ᠨᠡᠷᠡᠭᠰᠡᠨ ᠰᠠᠷᠬᠤᠳ ᠪᠣᠢ
ᠪᠠᠷᠰ ᠯᠤᠤ ᠶ᠋ᠢᠨ ᠶᠠᠰᠤ ᠪᠠᠷ
ᠪᠠᠯᠪᠠᠴᠢᠭᠠᠳ ᠨᠡᠷᠡᠭᠰᠡᠨ ᠰᠠᠷᠬᠤᠳ ᠪᠣᠢ
ᠪᠠᠯ ᠰᠢᠬᠢᠷ ᠢ᠋ ᠬᠣᠯᠢᠵᠤ ᠪᠠᠢᠭᠠᠳ
ᠨᠠᠢᠷᠠᠭᠤᠯᠤᠭᠠᠳ ᠨᠡᠷᠡᠭᠰᠡᠨ ᠰᠠᠷᠬᠤᠳ ᠪᠣᠢ
ᠤᠯᠠᠭᠠᠨ ᠨᠣᠭᠣᠭᠠᠨ ᠥᠩᠭᠡ ᠲᠡᠢ
ᠣᠯᠠᠨ ᠴᠤ᠌ ᠵᠦᠢᠯ ᠦ᠋ᠨ ᠠᠷᠢᠬᠢ ᠨᠤᠭᠤᠳ ᠪᠣᠢ
ᠤᠤᠭᠤᠳᠠᠭ ᠣᠯᠠᠨ ᠤ᠋ ᠮᠡᠳᠡᠵᠦ ᠪᠠᠢᠬᠤ ᠪᠠᠷ
ᠣᠳᠣ ᠳᠡᠮᠡᠢ ᠲᠣᠭᠠᠴᠢᠬᠤ ᠦᠭᠡᠢ ᠰᠢᠦ
ᠵᠢᠮᠢᠰ ᠦᠵᠦᠮ ᠦ᠋ᠨ ᠠᠮᠲᠠ ᠲᠠᠢ
ᠵᠦᠢᠯ ᠵᠦᠢᠯ ᠦ᠋ᠨ ᠠᠷᠢᠬᠢ ᠨᠤᠭᠤᠳ ᠪᠣᠢ
ᠵᠣᠭᠣᠭᠯᠠᠳᠠᠭ ᠲᠠ ᠨᠠᠷ ᠤ᠋ᠨ ᠮᠡᠳᠡᠵᠦ ᠪᠠᠢᠬᠤ ᠪᠠᠷ
ᠵᠦᠢᠷᠯᠡᠵᠦ ᠳᠡᠮᠡᠢ ᠬᠡᠯᠡᠬᠦ ᠦᠭᠡᠢ ᠰᠢᠦ
ᠰᠢᠯ ᠦ᠋ᠨ ᠯᠣᠩᠬᠣᠨ ᠳ᠋ᠤ᠌ ᠮᠡᠯᠮᠡᠯᠵᠡᠭᠡᠳ
ᠰᠢᠯᠦᠰᠦ ᠭᠣᠭᠣᠵᠢᠮᠠᠷ ᠭᠠᠢᠬᠠᠯ ᠲᠡᠷᠡ
ᠰᠢᠮᠡᠭᠡᠳ ᠵᠠᠯᠭᠢᠭᠠᠳ ᠦᠵᠡᠶᠡ ᠯᠡ ᠭᠡᠳ
ᠰᠢᠭᠢᠳᠦᠭᠦᠯᠦᠭᠡᠳ ᠪᠠᠢᠳᠠᠭ ᠭᠠᠢᠬᠠᠯ ᠲᠡᠷᠡ
ᠪᠣᠷᠣ ᠴᠤ᠌ ᠯᠣᠩᠬᠣᠨ ᠳ᠋ᠤ᠌ ᠮᠡᠯᠮᠡᠯᠵᠡᠭᠡᠳ
ᠪᠠᠭᠠᠯᠵᠤᠤᠷ ᠬᠥᠳᠡᠯᠭᠡᠮᠡᠷ ᠭᠠᠢᠬᠠᠯ ᠲᠡᠷᠡ
ᠪᠤᠰᠢᠭᠤ ᠴᠤ᠌ ᠨᠢᠭᠡ ᠵᠠᠯᠭᠢᠶᠠ ᠭᠡᠳ
ᠪᠣᠳᠣᠭᠳᠠᠭᠤᠯᠤᠭᠠᠳ ᠪᠠᠢᠳᠠᠭ ᠭᠠᠢᠬᠠᠯ ᠲᠡᠷᠡ
ᠬᠦᠢᠲᠡᠨ ᠴᠦ᠍ ᠡᠳᠦᠷ ᠤᠤᠭᠤᠪᠠᠯ
ᠬᠤᠪᠴᠠᠰᠤ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠬᠡᠯᠡᠯᠴᠡᠵᠦ ᠶᠠᠷᠢᠯᠴᠠᠭᠠᠳ ᠰᠠᠭᠤᠬᠤ ᠳ᠋ᠤ᠌ ᠪᠠᠨ
ᠬᠡᠮᠵᠢᠶᠡ ᠴᠤ᠌ ᠦᠭᠡᠢ ᠭᠠᠢᠬᠠᠯ
ᠬᠡᠢᠯᠡᠭᠦᠯᠵᠦ ᠳᠣᠭᠣᠯᠭᠠᠬᠤ ᠡᠪᠡᠳᠴᠢᠨ ᠳ᠋ᠦ᠍
ᠡᠮ ᠴᠤ᠌ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠬᠢᠷᠢ ᠡᠴᠡ ᠪᠠᠬᠠᠨ ᠬᠡᠲᠦᠷᠡᠭᠰᠡᠭᠡᠷ
ᠬᠡᠷᠡᠭᠦᠯ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠲᠠᠭᠠᠷᠠᠭᠰᠠᠨ ᠡᠳᠦᠷ ᠤᠤᠭᠤᠪᠠᠯ
ᠳᠠᠪᠬᠤᠴᠠᠭᠠ ᠴᠤ᠌ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠲᠠᠭᠠᠷᠠᠵᠤ ᠬᠠᠮᠲᠤᠷᠠᠭᠠᠳ ᠬᠥᠭᠡᠷᠬᠦ ᠳ᠋ᠦ᠍ ᠪᠡᠨ
ᠲᠠᠪᠠᠲᠠᠢ ᠴᠤ᠌ ᠰᠠᠢᠬᠠᠨ ᠭᠠᠢᠬᠠᠯ ᠲᠡᠷᠡ
ᠳᠠᠪᠤᠰᠠᠩ ᠭᠡᠳᠡᠰᠦ ᠶ᠋ᠢᠨ ᠡᠪᠡᠳᠴᠢᠨ ᠳ᠋ᠦ᠍ ᠪᠡᠨ
ᠡᠮ ᠴᠤ᠌ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠳᠡᠩᠳᠡᠭᠦᠦ ᠬᠡᠲᠦᠷᠡᠲᠡᠯᠡ ᠤᠤᠭᠤᠭᠰᠠᠭᠠᠷ
ᠲᠡᠢᠨ ᠪᠤᠰᠬᠠᠳᠠᠭ ᠭᠠᠢᠬᠠᠯ ᠲᠡᠷᠡ
ᠪᠠᠭᠠ ᠪᠠᠭᠠ ᠪᠠᠷ ᠤᠤᠭᠤᠪᠠᠯ
ᠪᠠᠯ ᠤ᠋ᠨ ᠠᠮᠲᠠ ᠲᠠᠢ ᠭᠠᠢᠬᠠᠯ ᠲᠡᠷᠡ
ᠪᠠᠬᠠᠨ ᠳᠡᠩᠳᠡᠭᠦᠦ ᠵᠣᠭᠣᠭᠯᠠᠭᠰᠠᠭᠠᠷ
ᠪᠠᠷᠴᠢᠳ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠰᠢᠮᠡᠨ ᠰᠢᠮᠡᠨ ᠤᠤᠭᠤᠪᠠᠯ
ᠰᠢᠬᠢᠷ ᠲᠡᠢ ᠠᠳᠠᠯᠢ ᠭᠠᠢᠬᠠᠯ ᠲᠡᠷᠡ
ᠬᠢᠷᠢ ᠡᠴᠡ ᠪᠡᠨ ᠪᠠᠬᠠᠨ ᠬᠡᠲᠦᠷᠡᠭᠰᠡᠭᠡᠷ
ᠰᠢᠪᠰᠢᠭ ᠪᠣᠯᠳᠠᠭ ᠭᠠᠢᠬᠠᠯ ᠲᠡᠷᠡ
ᠰᠠᠳᠤᠨ ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠢᠷᠯᠠᠬᠤ ᠳ᠋ᠤ᠌
ᠰᠠᠯᠤᠰᠢ ᠦᠭᠡᠢ ᠰᠠᠷᠬᠤᠳ ᠶᠤᠮ
ᠰᠠᠨᠠᠭᠠ ᠴᠤ᠌ ᠲᠠᠭᠠᠷᠠᠭᠠᠳ ᠤᠤᠭᠤᠪᠠᠯ
ᠴᠠᠳᠤᠰᠢ ᠦᠭᠡᠢ ᠰᠠᠷᠬᠤᠳ ᠶᠤᠮ
ᠨᠠᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠪᠠᠨ ᠤᠨᠠᠭᠰᠠᠨ
ᠬᠥᠮᠦᠨ ᠨᠣᠷᠬᠤ ᠦᠭᠡᠢ ᠴᠤ᠌ ᠭᠡᠮᠡᠨ ᠪᠠᠢᠨᠠ ᠤᠤ ᠳᠠ
ᠨᠠᠩᠴᠢᠳ ᠰᠡᠷᠵᠢᠮ ᠢ᠋ᠶ᠋ᠡᠨ ᠲᠠᠲᠠᠭᠰᠠᠨ ᠬᠥᠮᠦᠨ
ᠨᠣᠮᠣᠬᠠᠨ ᠴᠤ᠌ ᠭᠡᠮᠡᠨ ᠪᠠᠢᠨᠠ ᠤᠤ ᠳᠠ
ᠱᠠᠯᠪᠠᠭ ᠤᠰᠤᠨ ᠳ᠋ᠠᠭᠠᠨ ᠤᠨᠠᠭᠰᠠᠨ ᠬᠥᠮᠦᠨ
ᠰᠢᠪᠠᠷᠳᠠᠬᠤ ᠦᠭᠡᠢ ᠭᠡᠮᠡᠨ ᠪᠠᠢᠨᠠ ᠤᠤ ᠳᠠ
ᠰᠠᠷᠬᠤᠳ ᠨᠠᠩᠴᠢᠳ ᠢ᠋ᠶ᠋ᠠᠨ ᠲᠠᠲᠠᠭᠰᠠᠨ ᠬᠥᠮᠦᠨ
ᠰᠠᠢᠨ ᠶᠠᠪᠤᠳᠠᠯ ᠴᠤ᠌ ᠭᠡᠮᠡᠨ ᠪᠠᠢᠨᠠ ᠤᠤ ᠳᠠ
ᠵᠢᠷᠦᠬᠡᠨ ᠦ᠌ ᠪᠡᠨ ᠦᠭᠡ ᠶ᠋ᠢ ᠶᠠᠷᠢᠭᠠᠳ ᠪᠠᠢᠳᠠᠭ
ᠵᠦᠩ ᠴᠧᠩ① ᠰᠣᠭᠲᠣᠭᠤ ᠪᠠᠰᠠ ᠪᠠᠢᠨᠠ
ᠵᠦᠢᠯ ᠦ᠋ᠨ ᠶᠠᠪᠤᠳᠠᠯ ᠢ᠋ ᠰᠤᠳᠤᠯᠤᠭᠠᠳ ᠪᠠᠢᠳᠠᠭ
ᠵᠥᠩᠴᠢ② ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠪᠠᠷᠰ ᠲᠤ᠌ ᠪᠠᠨ ᠠᠳᠠᠯᠢ ᠪᠠᠭᠠᠲᠤᠷ ᠲᠣᠭᠰᠢᠨ
ᠪᠠ ᠸᠠᠩ③ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠪᠠᠰᠢᠷ ᠠᠷᠭᠠᠨ ᠳ᠋ᠠᠭᠠᠨ ᠮᠡᠷᠭᠡᠨ ᠪᠠᠢᠳᠠᠭ
ᠬᠠᠨ ᠰᠢᠨ④ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠦᠵᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠶᠠᠷᠢᠭᠠᠳ ᠶᠠᠪᠤᠳᠠᠭ
ᠦᠨᠡᠨᠴᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠦᠯᠢᠭᠡᠷ ᠲᠡᠦᠬᠡ ᠪᠡᠨ ᠬᠡᠯᠡᠭᠡᠳ ᠪᠠᠢᠳᠠᠭ
ᠬᠤᠭᠤᠷᠴᠢᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠬᠠ ᠶᠡᠬᠡᠰ ᠢ᠋ᠶ᠋ᠡᠨ ᠬᠦᠨᠳᠦᠯᠡᠭᠡᠳ ᠪᠠᠢᠳᠠᠭ
ᠠᠮᠠᠷᠠᠭ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠯᠠᠭᠠᠳᠠᠭᠠᠳ ᠠᠪᠤᠪᠠᠴᠤ ᠬᠥᠳᠡᠯᠬᠦ ᠦᠭᠡᠢ
ᠨᠣᠮᠣᠬᠠᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠬᠥᠭᠡᠷᠴᠦ ᠨᠠᠢᠷᠯᠠᠭᠠᠳ ᠳᠠᠭᠤᠯᠠᠭᠠᠳ ᠪᠠᠢᠳᠠᠭ
ᠬᠥᠭᠵᠢᠮᠴᠢᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠬᠥᠮᠦᠨ ᠴᠦ᠍ ᠪᠦᠬᠦᠨ ᠲᠡᠢ ᠨᠠᠭᠠᠳᠤᠭᠠᠳ ᠪᠠᠢᠳᠠᠭ
ᠬᠥᠭᠡᠷᠦᠦ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠪᠥᠭᠡᠮᠨᠡᠷᠡᠵᠦ ᠤᠨᠠᠭᠠᠳ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ
ᠪᠦᠳᠦᠷᠢᠭᠡ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠪᠦᠭᠦᠳᠡ ᠬᠥᠮᠦᠨ ᠲᠡᠢ ᠨᠣᠴᠣᠯᠳᠤᠭᠠᠳ ᠪᠠᠢᠳᠠᠭ
ᠪᠥᠬᠡᠴᠢᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠡᠩᠭᠡᠷ ᠵᠠᠭᠠᠮᠠ ᠪᠠᠨ ᠤᠷᠠᠴᠢᠬᠠᠭᠰᠠᠨ
ᠱᠠᠯᠳᠠᠩ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠡᠳ᠋ ᠲᠠᠸᠠᠷ ᠢ᠋ᠶ᠋ᠠᠨ ᠬᠡᠭᠡᠴᠢᠬᠡᠳᠡᠭ
ᠭᠠᠷᠤᠵᠠ ᠲᠠᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠡᠷᠦᠢ ᠬᠤᠷᠤᠢ ᠦᠭᠡᠢ ᠳᠣᠪᠲᠣᠯᠤᠭᠠᠳ
ᠤᠨᠠᠳᠠᠭ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠡᠮᠡᠭᠡᠯ ᠲᠡᠢ ᠮᠣᠷᠢ ᠪᠠᠨ ᠠᠯᠳᠠᠴᠢᠬᠠᠳᠠᠭ
ᠶᠠᠪᠠᠭᠠᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠬᠥᠳᠡᠭᠡ ᠭᠠᠳᠠᠨᠠ ᠪᠠᠨ ᠬᠥᠷᠪᠡᠭᠡᠳ ᠪᠠᠢᠳᠠᠭ
ᠬᠥᠯᠴᠥᠭᠦᠦ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠬᠥᠯ ᠭᠠᠷ ᠢ᠋ᠶ᠋ᠠᠨ ᠬᠥᠯᠳᠡᠭᠡᠴᠢᠬᠡᠭᠰᠡᠨ
ᠵᠡᠮᠳᠡᠭ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠵᠡᠭᠡᠯᠢ ᠭᠤᠳᠤᠮᠵᠢ ᠪᠠᠷ ᠲᠦᠢᠪᠡᠭᠡᠳ ᠶᠠᠪᠤᠳᠠᠭ
ᠵᠡᠷᠯᠢᠭ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠵᠦᠢᠲᠡᠢ ᠵᠦᠢ ᠦᠭᠡᠢ ᠠᠭᠠᠰᠢᠯᠠᠭᠠᠳ ᠪᠠᠢᠳᠠᠭ
ᠵᠢᠭᠰᠢᠯ ᠲᠡᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠢᠯ ᠬᠣᠲᠠ ᠪᠠᠨ ᠬᠡᠰᠦᠭᠡᠳ ᠪᠠᠢᠳᠠᠭ
ᠠᠯᠢᠶᠠ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠵᠢᠯ ᠬᠥᠳᠡᠯᠮᠦᠷᠢ ᠡᠴᠡ ᠳᠤᠲᠠᠭᠠᠳᠠᠭ
ᠠᠯᠵᠠᠭᠤ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠰᠢᠯᠦᠰᠦ ᠨᠢᠰᠦ ᠪᠡᠨ ᠭᠣᠭᠣᠵᠢᠭᠤᠯᠳᠠᠭ
ᠰᠢᠯᠦᠬᠡᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠰᠢᠳᠦ ᠠᠮᠠ ᠪᠠᠨ ᠳᠤᠤᠭᠠᠷᠭᠠᠳᠠᠭ
ᠠᠳᠠ ᠲᠠᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠭᠠᠯ ᠲᠦᠢᠮᠡᠷ ᠠᠯᠳᠠᠴᠢᠬᠠᠳᠠᠭ
ᠭᠠᠮᠰᠢᠭ ᠲᠠᠢ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠬᠠᠰᠬᠢᠷᠴᠤ ᠪᠠᠷᠬᠢᠷᠠᠭᠠᠳ ᠤᠷᠢᠯᠠᠭᠠᠳ ᠪᠠᠢᠳᠠᠭ
ᠭᠠᠯᠵᠠᠭᠤ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠭᠲᠠ ᠮᠣᠷᠢ ᠪᠠᠨ ᠮᠠᠭᠲᠠᠭᠠᠳ ᠪᠠᠢᠳᠠᠭ
ᠠᠳᠤᠭᠤᠴᠢᠨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠪᠠᠬᠠᠢ ᠭᠡᠷᠭᠡᠢ ᠶ᠋ᠢ ᠲᠣᠭᠣᠭᠠᠳ ᠪᠠᠢᠳᠠᠭ
ᠠᠢᠯᠤᠤ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠪᠳᠠᠷᠠ ᠳᠠᠩᠭᠦᠢ⑤ ᠪᠡᠨ ᠡᠪᠳᠡᠳᠡᠭ
ᠮᠤᠵᠢᠶᠠᠩ ⑥ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠶᠠᠭᠠ ᠱᠠᠵᠠᠩ ᠢ᠋ᠶ᠋ᠠᠨ ᠬᠠᠭᠠᠴᠢᠭᠠᠳ ᠪᠠᠢᠳᠠᠭ
ᠶᠤᠤᠵᠢᠶᠠᠩ⑦ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠯᠲᠠ ᠮᠥᠩᠭᠥᠨ ᠡᠳ᠋ ᠢ᠋ ᠪᠡᠨ ᠰᠦᠢᠳᠬᠡᠵᠦ ᠪᠠᠢᠳᠠᠭ
ᠶᠢᠨᠵᠢᠶᠠᠩ ⑧ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠠᠷᠠᠰᠤᠨ ᠳᠡᠪᠡᠯ ᠢ᠋ ᠪᠡᠨ ᠤᠷᠠᠭᠠᠳ ᠪᠠᠢᠳᠠᠭ
ᠫᠢᠵᠢᠶᠠᠩ⑨ ᠰᠣᠭᠲᠣᠭᠤ ᠪᠠᠰᠠ ᠴᠤ᠌ ᠪᠣᠢ
ᠰᠠᠷᠬᠤᠳ ᠨᠠᠩᠴᠢᠳ ᠤ᠋ᠨ ᠤᠴᠢᠷ ᠶᠠᠪᠤᠳᠠᠯ ᠢ᠋
ᠰᠢᠯᠦᠭᠯᠡᠵᠦ ᠬᠡᠯᠡᠭᠡᠳ ᠭᠦᠢᠴᠡᠨᠡ ᠤᠤ ᠳᠠ
ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠶ᠋ᠢᠨ ᠱᠣᠭ ᠵᠦᠢᠯ ᠢ᠋
ᠬᠣᠯᠪᠣᠵᠤ ᠶᠠᠷᠢᠭᠠᠳ ᠪᠠᠷᠠᠨᠠ ᠤᠤ ᠳᠠ
ᠬᠦᠰᠡᠯᠲᠡᠢ ᠵᠦᠢᠯ ᠢ᠋ ᠪᠣᠳᠣᠭᠠᠳ ᠦᠵᠡᠪᠡᠯ
ᠬᠥᠮᠦᠨ ᠪᠦᠬᠦᠨ ᠬᠦᠷᠲᠡᠵᠦ ᠪᠣᠯᠤᠮᠠᠷ
ᠬᠥᠨᠥᠭᠡᠯ ᠲᠡᠢ ᠵᠦᠢᠯ ᠢ᠋ ᠨᠢ ᠪᠣᠳᠣᠭᠠᠳ ᠦᠵᠡᠪᠡᠯ
ᠬᠡᠦᠬᠡᠳ ᠨᠢᠯᠬᠠ ᠨᠤᠭᠤᠳ ᠵᠢᠭᠰᠢᠮᠡᠷ
ᠳᠠᠷᠠᠰᠤ ᠯᠠ ᠤᠤᠭᠤᠳᠠᠭ ᠤᠯᠤᠰ ᠤ᠋ᠳ ᠢ᠋
ᠳᠣᠭᠣᠭᠢᠯᠠᠵᠤ ᠬᠡᠯᠡᠵᠦ ᠪᠠᠢᠭᠠ ᠪᠢᠰᠢ ᠰᠢᠦ
ᠳᠠᠩᠴᠤ ᠠᠯᠳᠠᠰᠢ ᠨᠢ ᠶᠡᠬᠡ ᠲᠤᠯᠠ
ᠳᠠᠪᠰᠢᠵᠤ ᠭᠤᠶᠤᠵᠤ ᠠᠢᠯᠠᠳᠬᠠᠵᠤ ᠪᠠᠢᠨᠠ
ᠠᠷᠢᠬᠢ ᠪᠠᠨ ᠤᠤᠭᠤᠳᠠᠭ ᠬᠥᠮᠦᠰ ᠦ᠋ᠳ ᠢ᠋
ᠠᠶᠤᠯᠭᠠᠵᠤ ᠬᠡᠯᠡᠵᠦ ᠪᠠᠢᠭᠠ ᠪᠢᠰᠢ ᠰᠢᠦ
ᠠᠯᠳᠠᠰᠢ ᠡᠨᠳᠡᠭᠳᠡᠯ ᠨᠢ ᠠᠷᠪᠢᠨ ᠲᠤᠯᠠ
ᠠᠢᠯᠠᠳᠬᠠᠵᠤ ᠰᠠᠨᠠᠭᠤᠯᠤᠭᠠᠳ ᠭᠤᠶᠤᠵᠤ ᠪᠠᠢᠨᠠ ᠬᠦᠢ
ᠲᠠᠢᠯᠪᠤᠷᠢ᠄ ① ᠵᠦᠩ ᠴᠧᠩ— ᠦᠨᠡᠨᠴᠢ
② ᠵᠥᠩᠴᠢ— ᠵᠦᠩ ᠪᠢᠯᠢᠭᠲᠡᠨ᠂ ᠢᠷᠡᠭᠡᠳᠦᠢ ᠶ᠋ᠢ ᠲᠥᠰᠥᠪᠯᠡᠭᠴᠢ
③ ᠪᠠ ᠸᠠᠩ — ᠨᠡᠷᠡ ᠰᠢᠶᠠᠩ ᠢᠦᠢ᠂ ᠪᠠᠷᠠᠭᠤᠨ ᠴᠤ᠌ ᠤᠯᠤᠰ ᠤ᠋ᠨ ᠬᠥᠮᠦᠨ᠂ ᠢᠳᠡ ᠬᠦᠴᠦ ᠶᠡᠬᠡᠲᠡᠢ ᠪᠠᠭᠠᠲᠤᠷ
④ ᠬᠠᠨ ᠰᠢᠨ— ᠪᠠᠷᠠᠭᠤᠨ ᠬᠠᠨ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠰᠠᠨ ᠭᠠᠪᠢᠶᠠᠲᠤ ᠰᠠᠢᠳ᠂ ᠴᠡᠷᠢᠭ ᠦ᠋ᠨ ᠡᠷᠳᠡᠮᠲᠡᠨ᠃
⑤ ᠳᠠᠩᠭᠦᠢ— ᠬᠣᠷᠭᠣ
⑥ᠮᠤᠵᠢᠶᠠᠩ — ᠮᠣᠳᠣᠨ ᠳᠠᠷᠬᠠᠨ
⑦ ᠶᠤᠤᠵᠢᠶᠠᠩ— ᠸᠠᠭᠠᠷ᠂ ᠱᠠᠭᠠᠵᠠᠩ᠂ ᠲᠣᠭᠣᠰᠬᠠ ᠵᠡᠷᠭᠡ ᠶ᠋ᠢ ᠦᠢᠯᠡᠳᠦᠭᠴᠢ
⑧ᠶᠢᠨᠵᠢᠶᠠᠩ— ᠮᠥᠩᠭᠥᠨ ᠳᠠᠷᠬᠠᠨ
⑨ ᠫᠢᠵᠢᠶᠠᠩ— ᠡᠯᠳᠡᠭᠦᠷᠴᠢᠨ᠂ ᠠᠷᠠᠰᠤ ᠰᠢᠷᠢ ᠡᠳ᠋ᠰᠢᠭᠦᠯᠵᠦ ᠦᠢᠯᠡᠳᠳᠡᠭ ᠬᠥᠮᠦᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠴᠢ᠄ ᠠᠯᠲᠠᠨᠴᠡᠴᠡᠭ
ᠮᠠᠲ᠋ᠧᠷᠢᠶᠠᠯ ᠴᠤᠭᠯᠠᠭᠤᠯᠵᠤ ᠦᠭᠡᠰ ᠢ᠋ ᠡᠮᠬᠢᠳᠬᠡᠭᠰᠡᠨ᠄ ᠳᠥᠭᠥᠮ ᠬᠠᠲᠠᠮᠠᠯ ᠴᠤᠭᠯᠠᠷᠠᠯ ᠤ᠋ᠨ ᠨᠥᠬᠥᠳ ᠨᠠᠷ
ᠬᠢᠨᠠᠭᠴᠢ᠄ ᠱᠠᠯᠵᠢᠭᠤᠳ ᠳᠡᠭᠵᠢᠷᠡᠬᠦ
ᠪᠢᠴᠢᠯᠭᠡ ᠵᠢᠷᠤᠭ᠄ ᠳᠥᠭᠥᠮ ᠬᠠᠲᠠᠮᠠᠯ ᠴᠤᠭᠯᠠᠷᠠᠯ ᠨᠠᠢᠷᠠᠭᠤᠯᠪᠠ