ᠮᠣᠷᠢᠨ ᠤ ᠴᠣᠯᠠ < ᠭᠤᠷᠪᠠ > МОРИНЫ ЦОЛ – III
243 ᠪᠦᠷᠢᠨ ᠡᠷᠬᠡᠲᠦ ᠪᠦᠭᠦᠳᠡ ᠨᠠᠢᠷᠠᠮᠳᠠᠬᠤ
ᠮᠣᠩᠭᠣᠯ ᠠᠷᠠᠳ ᠤᠯᠤᠰ ᠤ᠋ᠨ
... ᠠᠢᠮᠠᠭ ᠤ᠋ᠨ ...ᠰᠤᠮᠤ ᠶ᠋ᠢᠨ
... ᠳ᠋ᠤᠭᠠᠷ ᠪᠠᠷᠢᠭᠠᠳᠠ ᠶ᠋ᠢᠨ
ᠥᠳᠬᠡᠨ ᠰᠦᠷᠦᠭ ᠦ᠋ᠨ ᠭᠡᠭᠦᠳ ᠦ᠋ᠨ ᠤᠨᠠᠭᠠ ᠠ!
ᠬᠠᠩᠭᠠᠢ ᠳᠡᠯᠡᠬᠡᠢ ᠶ᠋ᠢᠨ ᠰᠦᠷ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ
ᠬᠠᠮᠤᠭ ᠠᠮᠢᠲᠠᠨ ᠤ᠋ ᠬᠠᠨᠤᠰᠢ ᠦᠭᠡᠢ
ᠪᠠᠶᠠᠷ ᠴᠡᠩᠭᠡᠯ ᠦ᠋ᠨ ᠮᠠᠩᠯᠠᠢ
ᠲᠥᠷᠥ ᠶ᠋ᠢᠨ ᠨᠠᠭᠠᠳᠤᠮ ᠤ᠋ᠨ ᠪᠠᠶᠠᠰᠬᠤᠯᠠᠩ ᠪᠣᠯᠤᠭᠰᠠᠨ
ᠲᠦᠮᠡᠨ ᠠᠭᠲᠠᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍
ᠲᠦᠳᠡᠯ ᠦᠭᠡᠢ ᠬᠤᠷᠳᠤᠯᠠᠳᠠᠭ
ᠲᠡᠮᠦᠷ ᠵᠤᠤᠵᠠᠢ ᠰᠤᠩᠭᠠᠨ ᠭᠦᠶᠦᠳᠡᠭ᠃
ᠮᠢᠩᠭᠠᠨ ᠠᠭᠲᠠᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍
ᠮᠢᠲᠠᠷᠠᠯ ᠦᠭᠡᠢ ᠬᠤᠷᠳᠤᠯᠠᠳᠠᠭ
ᠮᠢᠨᠳᠠᠭᠰᠠᠨ ᠵᠣᠯ ᠢ᠋ᠶ᠋ᠠᠨ ᠰᠤᠩᠭᠠᠨ ᠭᠦᠶᠦᠳᠡᠭ
ᠵᠠᠭᠠᠨ ᠳᠥᠷᠪᠡᠨ ᠰᠣᠶᠣᠭᠠ ᠶ᠋ᠢ ᠢᠷᠠᠯᠵᠠᠭᠤᠯᠤᠭᠰᠠᠨ
ᠵᠠᠭᠠᠮᠠᠯ ᠵᠢᠷᠭᠤᠭᠠᠨ ᠬᠦᠵᠦᠭᠦᠦ ᠶ᠋ᠢ ᠰᠤᠩᠭᠠᠭᠰᠠᠨ
ᠲᠥᠭᠡ ᠰᠠᠢᠬᠠᠨ ᠴᠢᠬᠢ ᠶ᠋ᠢ ᠰᠣᠯᠪᠢᠯᠵᠠᠭᠤᠯᠤᠭᠰᠠᠨ
ᠲᠥᠭᠥᠷᠢᠭ ᠬᠠᠷᠠ ᠨᠢᠳᠦ ᠶ᠋ᠢ ᠲᠣᠷᠮᠣᠯᠵᠠᠭᠤᠯᠤᠭᠰᠠᠨ
ᠲᠠᠤᠯᠠᠢ ᠰᠠᠢᠬᠠᠨ ᠵᠣᠭᠣᠭ ᠬᠣᠲᠣᠯᠵᠠᠭᠤᠯᠤᠭᠰᠠᠨ
ᠲᠤᠷᠤᠭ ᠰᠠᠢᠬᠠᠨ ᠪᠡᠶᠡ ᠶ᠋ᠢ ᠬᠣᠯᠪᠣᠯᠵᠠᠭᠤᠯᠤᠨ
ᠱᠠᠰᠢᠷ ᠰᠠᠢᠬᠠᠨ ᠳᠡᠯ ᠢ᠋ ᠰᠠᠭᠰᠠᠯᠵᠠᠭᠤᠯᠤᠭᠰᠠᠨ
ᠱᠠᠨᠠᠮ ᠰᠠᠢᠬᠠᠨ ᠰᠡᠭᠦᠯ ᠢ᠋ ᠰᠠᠮᠪᠠᠯᠵᠠᠭᠤᠯᠤᠭᠰᠠᠨ
ᠡᠷᠴᠢᠮᠲᠦ ᠳᠥᠷᠪᠡᠨ ᠲᠤᠭᠤᠷᠠᠢ ᠶ᠋ᠢ ᠵᠢᠷᠢᠯᠵᠡᠭᠦᠯᠦᠭᠰᠡᠨ
ᠡᠷᠳᠡᠮᠲᠦ ᠳᠥᠷᠪᠡᠨ ᠬᠥᠯ ᠢ᠋ ᠭᠢᠯᠠᠯᠵᠠᠭᠤᠯᠤᠭᠰᠠᠨ᠃
ᠳᠠᠭᠠᠷᠢᠵᠤ ᠢᠷᠡᠭᠰᠡᠨ ᠳᠠᠶᠠᠩ ᠤ᠋ᠨ ᠬᠦᠯᠦᠭ
ᠳᠠᠪᠬᠢᠵᠤ ᠭᠠᠷᠤᠭᠰᠠᠨ ᠬᠠᠩᠭᠠᠢ ᠶ᠋ᠢᠨ ᠪᠤᠭᠤ
ᠲᠦᠮᠡᠨ ᠦ᠌ ᠳᠤᠷᠠᠳᠬᠠᠯ
ᠳᠠᠶᠠᠭᠠᠷ ᠤ᠋ᠨ ᠭᠠᠢᠬᠠᠮᠰᠢᠭ᠃
ᠭᠠᠨ ᠵᠤᠤᠵᠠᠢ ᠭᠠᠯ ᠳ᠋ᠤ᠌ ᠢᠳᠡᠷ ᠬᠦᠯᠦᠭ ᠠ᠋
ᠡᠨᠡ ᠨᠠᠭᠠᠳᠤᠮ ᠤ᠋ᠨ ᠡᠮᠦᠨᠡ
ᠡᠷᠬᠢᠮ ᠴᠣᠯᠠ ᠶ᠋ᠢ ᠥᠷᠨᠢᠨ ᠳᠡᠯᠭᠡᠷᠡᠭᠦᠯᠦᠭᠰᠡᠨ
ᠢᠷᠡᠬᠦ ᠨᠠᠭᠠᠳᠤᠮ ᠤ᠋ᠨ ᠡᠮᠦᠨᠡ
ᠥᠰᠬᠦ ᠴᠣᠯᠠ ᠶ᠋ᠢ ᠲᠡᠮᠳᠡᠭᠯᠡᠭᠦᠯᠦᠭᠰᠡᠨ
ᠣᠯᠠᠨ ᠲᠦᠮᠡᠨ ᠠᠷᠠᠳ ᠤ᠋ᠨ ᠡᠮᠦᠨᠡ
ᠣᠨᠴᠠ ᠰᠠᠢᠬᠠᠨ ᠦᠵᠡᠮᠵᠢ ᠪᠣᠯᠤᠭᠰᠠᠨ
ᠡᠩᠬᠡ ᠪᠠᠲᠤ ᠲᠥᠷᠥ ᠳ᠋ᠦ᠍ ᠪᠡᠨ
ᠡᠷᠬᠢᠮ ᠰᠠᠢᠬᠠᠨ ᠴᠢᠮᠡᠭ ᠪᠣᠯᠤᠭᠰᠠᠨ
ᠡᠵᠡᠨ ᠬᠦᠩ ᠢ᠋ᠶ᠋ᠡᠨ ᠪᠠᠶᠠᠷᠯᠠᠭᠤᠯᠤᠭᠰᠠᠨ
ᠢᠵᠢᠯ ᠣᠯᠠᠨᠠ ᠠᠷᠪᠢᠵᠢᠭᠤᠯᠤᠭᠰᠠᠨ
ᠮᠠᠭᠲᠠᠵᠤ ᠪᠠᠷᠠᠰᠢ ᠦᠭᠡᠢ ᠡᠷᠳᠡᠮ ᠲᠡᠢ
ᠮᠠᠨᠳᠤᠭᠤᠯᠵᠤ ᠪᠠᠷᠠᠰᠢ ᠦᠭᠡᠢ ᠦᠵᠡᠰᠬᠦᠯᠡᠩ ᠲᠡᠢ
ᠡᠯᠳᠡᠪ ᠵᠦᠢᠯ ᠦ᠋ᠨ
ᠡᠷᠳᠡᠨᠢᠰ ᠦ᠋ᠨ ᠰᠢᠨᠵᠢ ᠪᠦᠷᠢᠳᠦᠭᠰᠡᠨ
ᠡᠩᠬᠡ ᠠᠮᠤᠭᠤᠯᠠᠩ᠂ ᠡᠯᠪᠡᠭ ᠵᠢᠷᠭᠠᠯᠠᠩ
ᠲᠦᠮᠡᠨ ᠦ᠌ ᠡᠬᠢ ᠲᠣᠷᠭᠠᠨ ᠵᠢᠯᠣᠭᠣ
ᠲᠣᠳᠣ ᠮᠠᠩᠯᠠᠢ ᠡᠨᠡ ᠪᠢᠯᠡ!
III
Бүрэн эрхт Бүгд Найрамдах
Монгол Ард Улсын
... аймгийн ...сумын
... дугаар бригадын
Өтгөн сүргийн гүүний унага аа!
Хангай дэлхийн сүрийг бадруулагч
Хамаг амьтны ханашгүй баяр цэнгэлийн манлай
Төрийн наадмын баясгалан болсон
Түмэн агтны тэргүүнд
Түдэлгүй хурдалдаг
Төмөр зуузай сунган гүйдэг.
Мянган агтны тэргүүнд
Мятралгүй хурдалдаг
Мяндсан жолоо сунган гүйдэг
Заан дөрвөн соёог яралзуулсан
Заамал зургаан хүзүүг сунгасан
Төө сайхан чихийг солбилзуулсан
Төгрөг хар нүдийг тормолзуулсан
Туулай сайхан зоог хотолзуулсан
Тураг сайхан биеийг холбилзуулан
Шашир сайхан дэлийг сагсалзуулсан
Шанам сайхан сүүлийг самбалзуулсан
Эрчимт дөрвөн туурайг жирэлзүүлсэн
Эрдэмт дөрвөн хөлийг гялалзуулсан.
Дайрч ирсэн даянгийн хүлэг
Давхиж гарсан хангайн буга
Түмний дурдатгал Даяарын гайхамшиг.
Ган зуузай Галт идэр хүлэг ээ
Энэ наадмын өмнө
Эрхэм цолыг өрнөн дэлгэрүүлсэн
Ирэх наадмын өмнө
Өсөх цолыг тэмдэглүүлсэн
Олон түмэн ардын өмнө
Онц сайхан үзэмж болсон
Энх бат төрдөө
Эрхэм сайхан чимэг болсон
Эзэн хүнээ баярлуулсан
Ижил олноо арвижуулсан
Магтаж баршгүй эрдэмтэй
Мандуулж баршгүй үзэсгэлэнтэй
Элдэв зүйлийн эрдэнэсийн шинж бүрдсэн
Энх амгалан, элбэг жаргалан
Түмний эх Торгон жолоо
Тод манлай энэ билээ!